خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Feb 4, 2008

مذكرات توك توكية

أحمد الصباغ التوكتوكى

لقب حصلت عليه من أصدقائى وأسرتى الحبيبة

من كُتر إشتياقى الدائم والمُعلًن لركوب توك توك

ومن كُتر أحاديثى وإنبهارى بالإختراع العظيم

وكتاباتى وكاريكاتيراتى وأبحاثى

فى وصف وتأريخ الحياة التوكتوكية فى مصر

واليوم واحد من أسعد أيام حياتى

إبتسمت لى الدنيا وافتر ثغرها البسّام عن إبتسامة عريضة

بل قل إبتسم ليا الزمان

وفتحت ليا الحياة بؤها بإبتسامة واسعة

فقد ركبت توك توك

والتوك توك لمن لا يعرفة هو مَركَبة شعبية

يركبها الناس أحيانا .. وأحيانا تركب هى الناس

إختراع جهنمى عجيب يأخذك إلى عالم غريب

جلوسك بالتوك توك أشبة بجلوسك فى غرزة شعبية

عندما تدخن فيها الجوزة وتختلط بكائنات تشبة البنى أدميين

وتستمع فيها إلى ألون غريبة من الفنون الشعبية الضفدعية

عندما تستمع الى عماد بعرووور .. إبتسم فأنت فى توك توك
وعندما تجد كائنا يصدر صوته من مكان خفى

!!الست لما .. يا عينى لما.. الست لما .. دى الست لما

فابتسم فأنت فى توك توك

عندما تجد نفسك ترزع واحد ماشى فى الشارع بالشلوت بدون قصد بقدميك المطلة خارج التوك توك

إبتسم فأنت فى توك توك

عندما تجمع ما بين متعة ركوب تختروان على ظهر جمل

وإنطلاقة ركوب مورجيحة عالية فى كوكى بارك

وهمجية الرقص فى زار بلدى

وعندما يقودك سائق فى سن المخاليل

حلو كدة بتاع اتناشر سنة وحالق كابوريا

إذن أنت حتما فى توك توك

ويتناقل أصدقائى وبعض المهتمين بالأخبار التوكتوكية
قولى الخالد المأثور

إن التوك توك لهو علامة بارزة فى تاريخ الإنسانية ، وخطوة على طريق تحقيق الخير والسلام فى العالم ، وإنجاز حضارى هام نقل مصر من عصر التروللى باص والحنطور وألقى بها فى عصر التوك توك

ويقول شاعر توكتوكى شهير
فى التعبير عن مشاعرة الجياشة تجاه التوك توك

يا توك توك المحــــــبة *** دلعنى حبـــة حبــــة
وبلاش ترزعنى لمـــا *** ترمـــينى وتستخــبا


ويقول المفكر المعاصر جوك توك إدوارد
وهو رجل ذو رؤية توكتوكية بعيدة المدى

إن إيدولوجيا المجتمع التضامنية تنحصر بما لاشك فيه ، فى البؤرة التى تنشأ من الفرق المذهبى بين العقل البشرى والتوك توك

قطع غيار وإكسسوارات توكتوك

وشاهدت مرة فى أحد شوارع القاهرة التوكتوكية
( وهو الأسم الذى حل حديثا محل القاهرة الفاطمية)
شاهدت أثناء أحدى جولاتى التوكتوكية أحدى المحالات
وقد علقت على بابة يافطة
حمادة فوزلوك .. لقطع غيار التوك توك

مصدر سياحى

وتقول ماريا توكتوكازنج – سائحة من الولايات المتحدة

!!أنا أهب توك توك كتير كتير .. وأهب مصر كتير كتير
!!وأنا فرهانة كتير إنى سوفت أهرامات وركبت توك توك


داروين .. والنشأة التوكتوكية

وقد نشأت فكرة التوك توك كرد فعل ثورى تعذيبى عكسي من داخل الشعب
ويقال إن صاحب فكرة التوك توك .. عبده تكاتك
وهو رجل سياسى مخضرم وله صولات وجولات
مع شرطة المخدرات ومكافحة التسول
قال فى إحدى جلساتة فى غرزته بالباطنية
و قد استلهم روح ثورة تستعتاشر وهو يشد بقوة نفسا من الجوزة

طالما الشرطة بتعذب الشعب والاسعار كل يوم عن يوم بتغلا والحاجة بتشح
طب ليه ما نعملش زى الحكومة اللينينية إبان الثورة البلشفية


نظرت له الحاشية المحيطة بغباء .. فتابع

احنا نستورد توك توك من الهند ونعذب الشعب
فنقوم نصعب على الحكومة وتفك عنا

انفجرت اسارير الجالسين وهلل بعضهم
وقام المعلم رضا التوكتكاوى وباسة فى خدية
وقد استشعروا أهمية الموقف
ومن هنا بدأ استيراد التوك توك

ويوما بعد يوم
انتشر التوك توك فى شوارع القاهرة انتشار القمل فى الرأس
فتراة فى الشواراع والحارات والأزقة
وأمام المحلات والأرصفة وعلى عتبة بيتك
وربما أثناء جلستك الكمبيوترية فى منزلك
تجد توك توكاً عدى من على الكى بورد

ويروى إن أحد الأصدقاء جه يهرش
فلقى توك توك واقف على مناخيرة

ويقول شاعر غنائى معاصر
التوك توك لما جه ** وندانى ف ليلة سهر
قلت بلاش بلطجة *** وجريت ويا القمر


توك توك العيد


وسمعت مرة أحد المخاليل فى العيد يقول
أنا رايح أشترى شيكولاتة وبلاليين واركب توك توك

وكأن التوك توك ده مورجيحة مثلا


المدونين والتوك توك

ويبدو أن المدونين لهم أراء حاسمة فى بيزنس التوك توك
فقد وقع بصرى يوما فى موقف التوك توك
على عمل إستثمارى - تدوينى - توك توكى هام

توك توك
سهر الليالى



المجد للتوك توك

ومن قال إن الحملات التضامنية لا تعلن الا للسياسين فقط ؟
فهذا أخى التوك توكى ..
عباس العبد

قد أعلن حملة قوية للتضامن مع التوك توك
حملة المجد للتوك توك

كائن فضائى

وأيضا فإن صديق التكتكة ..
سى السيد
قد ظهرت عليه أثار الوحى التوك توكى قائلا


ذلك الكائن له ملمس جلدى غريب منقوش عليه بعض الرسوم المرعبه والطلاسم المخيفه تراه وهو ينقض عليك .. انه شىء غريب ظهر فجأه لا أحد يعرف له اب ولا أم ....انه ظهر سفاحا ..اشبه فى ظهوره بالسلعوه ..انه ينتشر كالجراد فى كل مكان لا يترك أخضر ولا يابس الا طغى عليه


مدونة الجزيرة توك

وقد إقترح بعض المدونين التوكتوكيين إنشاء مدونة توكتوكية موازية
لمدونة الجزيرة توك
www.aljazeeratalk.net

ونقوم بتسميتها .. الجزيرة توك توك
www.aljazeeratalktalk.net


أصدقائى وأحبابى

أرجو أن تكونو قد استمتعتم بهذة الرحلة التوك توكية

ثم أشكر كل الاصدقاء اللى ردو على التاج بتاعى ونلتقى فى بوست لمناقشة الاجابات وتحليلها فى شهر مارس ان شاء الله
وكمان أحب أبدى سعادتى الشديدة بجروب المدونين اللى رحت معاه معرض الكتاب
بجد كان يوم جميل ومختلف جدا
أيضا تغطيات الندوات واللقاءات ومعرض الكتاب ومعرض كمبيوتر اسيتكس
تحت الاعداد بس النت يتصلح يا مسهل


أحمد الصباغ التوكتوكى

110 comments:

NIDAAL PAL said...

اول تعليـــــــــــــــــق
هههههههههههههههههه
اخيراً اخيراً يا توك توك المحبة
حد يكتب الشعر التوكتوكى ده هنا
موضوع جميييييل اوى اوى اوى

مهندس مصري said...

إن إيدولوجيا المجتمع التضامنية تنحصر بما لاشك فيه ، فى البؤرة التى تنشأ من الفرق المذهبى بين العقل البشرى والتوك توك

يا نهار احوس

ايه دا يا بني
هههههههههههههه
حرام عليك
كل التريقة دي على التوكتوك
لولا ان عنده مناعة طبيعية و جلده منحس كان زمانه ولع دلوقت

عندنا التوك توك منتشرفي جميع مراكز المحافظة ما عدا مدينتنا دمنهور عاصمة محافظة البحيرة لأن عندنا تاكسيات و ده مش موجود في بقية المراكز ما عدا كفر الدوار
يبقى التوك توك هو بديل التاكسي في المدن الصغيرة و القرى و الضواحي البعيدة المقطوعة للمدن الكبيرة

بس لو يترخص و يطلع رخص قيادة لسواقينه كان بقى وسيلة مواصلات ممتازة
انما الفوضى الحالية هي سبب كل مشاكله

و ابعت لي كل الصور بتاعتي عندك على ايميل الياهو لو سمحت
:)
عقبال ما اكتب بوست معرض الكتاب لأني بجد مفحوت في الشغل

لماضة said...

ههههههههه والله يا بختك يا صباغ انا هموت واركبه
للاسف الاختراع العظيم ده منزلش عندنا ضحكوا علينا
عاوزه اقولك انى وانا راكبه القطر لما كنت بشوف توك توك زى العيال الصغيره لما بتشاور على قطه مثلا ماشيه فى الشارع
بانبهار وبفرح شديد
وبعلن باعلى صوتى
تضامنا مع التوك توك
عاش التوك توك نصير المطحونين

سهر الليالى said...

يخرب عقلك يا أحمد
إيييييه يا ابنى دة
ههههههههههههه
هلكتنى من الضحك

دة أنا دماغى لفت من الكلام وحسيت أنى فى حصة كيميا على فيزيا على أدب
بس حقيقى بوست هايل يا أحمد بجد

هو صحيح أنا مش بقابل التوكتوك عندنا كتير بس شفتو وحسيت انو بينفع اوى فى الأماكن الصغيرة

ولذلك بفكر أعملى مشروع أهو برضو أكون بيه نفسى وأجيبلى كام توك توك وأشغلهم أهو يمكن أعمل حاجة ومعنديش مانع تشاركنى وتلملى العيال
ههههههههه

طبعا مشروع التكاتك دة جه بعد النجاح الفظيع لمشروع التوك توك بتاعى للدعاية عن المدونة اللى انت ناشر صورتة وعلى فكرة فى خمسه جنيه حق استغلال الصورة
:)

بجد يا أحمد حلو أوى وتسلم دماغك
تحياتى يا خالووو

ابن حـجـر الـعـسـقـلانـى said...

فى مرة كنت ماشى فى أدغال منطقة شعبية عندنا .. لقيت يافطة متعلقة على ناصية شارع و مكتوب عليها:"سيد سلعوة لصيانة التوك توك و الفنش" .. بصراحة أنا غرقت فى المعانى اللى ممكن نخرج بيها من الكلام اللى على اليافطة

حسيت إن الراجل دة من الرعيل الأول من أصحاب التخصص فى هذه التكنولوجيا الجديدة الوافدة .. و هذا السبق من "سيد سلعوة" فى مجال صيانة التكاتك و الفنش يجعل له هيبة فى نفوس الناس .. لذلك نسب نفسه إلى "السلعوة" المشهورة بالشراسة

و هو تلاقيه فى الآخر واحد غلبان و طلعان عينه و ممكن يكون ميكانيكى موتوسيكلات فاشل فقال يجرب فى اللى الناس ما بتفهمش فيه

و الله الناس المصريين دول ما حصلوش

mo'men mohamed said...

هههههههههههه
أضحكك الله و أسعدك
انا كليتى فى ادفينا
وموصلتى الأساسية هناك هى التكتك
لغاية ما زهقت منه
السلام عليكم

MerMaid said...

بقي نفسك وامنية حياتك تركب تكتك؟؟
تعالي هنا و انا اهيصك تكاتك
دول مقرفين يا ابني
ولا اختراع ولا حاجة
ده شيء مزعج

تحياتي ليك
تغيب تغيب و يفضل برضه دمك خفيف
:)

د/اجدع بنوته said...

اسعدنى الحظ الصراحه

وركبته مره واحده

ف البلد .. كنت رايحه ازور حد

ومعرفش العنوان ولولا الشديد القويه

ركبته علشان يوصلنى ..

وكانت اول واخر مره م بعد مسمعت فيه

شفيقه تتلألأ برائعتها

غلطة مين انا ولا انت غلطة مين

مين باع مين انا ولاا انت مين باع مين

شكرا ع الرحله التكتوكيه ياصبااغ

وانا قريت شويه عن تجمع المعرض ده عند قطة الصحراء

الله يسهلووووووووو ياعم

وشايل كتب لماضه طول الطريق

لا حول ولاقوة الا بالله

يلا ربنا يخليك للمدونين وميحرمناش م تكاتيكك
تحياتى

KHALIFA said...

موضوع جميل يا توكتوكي

احنا عندنا برضو توتوك في مركزنا ...بس بجد حاجة خانقه خصوصا لما تكون ماشي بالسيارة وتلاقي اللي طالعلك من اي شارع جانبي...اللي يحك في عربيتك.... اللي يزنق عليك بإشارة او من غيره

اما من غير السيارة فالتوكتوك علا وسيلة جميلة جدا وبتريح كتير.....

شكرا ليك على بوستك الجميل وده اول تعليق ليا وان شاء الله يدوم


أخو دكتور حر

ض/خالد said...

التوك توك ده...مسيبة..مسيبة...
:(

Rania said...

هتقولى على التوك توك
افتكر يا احمد مرة كنت هموت بالتوك توك
تخيل بقى اموت و بايه بالتوك توك
بجد كانت هتبقى فضيحة
و يقولوا بقى فى اهم الانباء مقتل شابه تحت عجلات التوك توك
ربنا ستر الحمدلله :((
عموما
موضوع التوك توك دة فعلا بقى مشكله كبيرة و جدااا لانه بدا يحل مشكله البطاله بس باسلوب همجى و جدااااااا

تحياتى على البوست الرائع دة

بت خيخة وأى كلام said...

ههههههههههههههههههههه
هههههههههههههههههههههه
ههههههههههههههههههههههه
هههههههههههههههههههههههه
ههههههههههههههههههههههههههههه
ههههههههههههههههههههههه
ايه ده
اييه اللى انت كاتبه ده
انت بتجيب الكلام الكبير ده منين
يخرب بيت فقرك
انا بصراحة لحد هذه اللحظة لم يسعفنى الحظ وانى اركب التوك توك
لكن الحقيقة تقال شريف هو اللى ركب التوك توك مرة مع اختى وجوزها
ومن ساعتها وهو كل مايشوف توكتوك يتهبل عليه ويبقى عايز ينط جواه
ولو رفضت يبصلى بصة معناها ازاى احرمه من ركوب التوك توك
وانى هاروح النار لو ماركبتهوش التوك توك ده
بس بجد بوست تكتوكاوى فظييييع
تحياتى ليك
اختك خيخة

appy said...

ايه انت عارف يا صباغ بحس ان التوكتوك ده عبارة عن ايه
واحده ست كانت قاعده بتفرط بسله فى طبق فقرد صغير اخده ورماه من البلكونه فزرعت توكتوك

paranoia,magnetic & dramatic girl said...

ازيك يااحمد
يارب تكون بخير
بوست ضحكني جدا والله
هههههههههه
علي فكرة انا تجربتي مع التوك توك جميلة اوي
ركبته في الشتا وبرفقة اعز الناس عندي
وبالليل وكان اجمل من الحلم
انا لسه والله امبارح كنت بفكر في اليوم ده وذكراه الجميلة لما ركبته

بس طبعا الذكري الجميلة متنفيش عيوب التوك توك الي انت قلت عليها
.
ربنا يوفقك يااحمد
الله حافظ
دودو

only spot said...

ههههههههههههه
تصدق بالله انا مقدره امسك نفسى من الضحك من طريقتك الساخره اللاذعه
بس بينى وبينك عندك حق ده فيرس وصعب السيطره عليه بس ممكن بجد يؤدى خدمه كويسه لو تم تقنينه بس طبعا ده فى عام 4000 ان شاء الله
انا ركبته مره واحده وتقريبا كده شعرى طقطق من ساعتها
يلى تمنياتى بالتوفيق

ريهام said...

بجد يا احمد مدونتك هايله يابنى حرام عليك انا على ما خلصت قراءة موضوع التوك توك كنت هموت من الضحك وفعلا واضح جدا اوى خالص انك اسم على مسمى فعلا احمد التوك توكى وموضوعك حلو ودمه خفيف وان شاء الله مش تكون اخر ذيارة ليا فى مدونتك الجميله دى

wanna b a bride said...

يا نهار أبيض

ده موضوع التوك توك ده طلع حكاية وانا مش واخدة بالي

إزاي ما أخدتش بالي من التنطور الحضاري الفزيع ده على أرض مصر المحروسة؟

كويس انك نبهتني


بلغني ان التوقيع بتاعي وقع منك

كده؟..انا مش مكتفاهولك و ربطاه كويس قبل ما اديهولك؟ أكيد انت فكيت الحبل قام هو نط من الكتاب

معلش معلش..أنا مصرحالك تشوف أي حد يضربلك توقيع على إنه بتاعي..و النعمة مسامحه فيه


المرة الجاية ليك توقيعين

ياااالا ان شالله ماحد حوش

:)
تحياتي

عصفور المدينة said...

هو التوكتوك مش ممنوع في المناطق الحضرية
:)

على فكرة عندي لكلوك صوف بالبسه في الشتاء سميته توك توك وأصبح الإسم متعارف عليه بيني وبين المواليد(على وزن مخاليل) تبعي

مدونة احنا الاخوان said...

فى جميع المساجد اخوانكم بيجمعوا اى مواد عينية لاخوانكم فى غزة يعنى " بطاطين قديمة ملابس قديمة سكر وزيت وشاى الخ.... "
وسوف يتم ارسال تلك المواد عبر لجنة الاغاثة بنقابة الاطباء
__________________________________________________________________
مع تحيات مدونة احنا الاخوان http://ikhwan2.maktoobblog.com/
شاهد ادراجى الجديد بعنوان " هل هلالك يا محليات "

احمد الجيزاوى said...

هى عليه معاك اوى الغزاله فى موضوع التوتك
بس بما اننا فى ظل عصر حريت تبادل المعلومات فى ظل عصر العولمه قرر
عبوة كروة انطلق الثورة من اجل كفاح ونضال الشعب العربجى ضد الغزو التكتوكى لعالم المواصلات

هيست انا كمان صح
**********
المهم
انا معاك فى الموضع التاج يا ريس
لانى خد تالى من الاجبات ووتعبتنى معاك لانك بعت التاج بتاعك لكورة الارضيه كله وماشى الف وراة هوالحمد الله التتاج بتاعك فى كولارمبور الان اول ميوصل الهند هبلغك
معك ونرتب لمه اشوفك يوم الخميس
تحياتى احمد الجيزاوى

خادمة الاسلام said...

السلام عليكم
بحب التوكتوك وبخاف اركبه
==============
إن إيدولوجيا المجتمع التضامنية تنحصر بما لاشك فيه ، فى البؤرة التى تنشأ من الفرق المذهبى بين العقل البشرى والتوك توك

ضحكتنى جدا

Nsreen Bsunee said...

هههههههههههههههههههههه
هههههههههههههه
ههههههههههههههههههههه
ههههههههههههههههههههههههه
هههههههههههههههههههههه
خخخخخخخخخخخخخخخخخخخخخخخ


لا بجد حاموت من الضحك
انا مكنتش اعرف انك مسخره كده يا احمد
انا عمرى ما ركبته مش منتشر فى اسكندريه موجود بس فى ادغال العجمى

UNIQUE said...

ههههههههههههههههه

انا عارفة ان التوكتوك كائن متطفل

بس لدرجة تجد توك توكاً عدى من على الكى بورد

لا ده يبقى كتير اوي

مش كفاية انك بتبقى ماشي في الشارع

وفجاة تلا قي التكاتك بتطلعلك من

تحت الارض من غير اي مناسبة

Soul.o0o.Whisper said...

الصراحة موضوع التوك توك دا فظييييييييييع

انا كنت هامت و اركبه
و لما رحت البلد ركبته


و يارتنى ما ركبته
خلاص هى اول مرة و آخر مرة

يحود كدا اروح الجهة دى يحود الجهة التانية الاقى نفسى فى الجانب الغربى

لا بجد حاجة صعبة
بس البوست جاااااااااااااامد موت

بس حاسة إن فى شئ ورا الكلام
مش قادرة أجيبه بالظبط

بس إن شاء الله راجعة تانى ...
يمكن أجيبه

تحياتى لك

وينكى said...

هههههههههههههه
عسل
انا بحب التكاتيك قوى قوى
شايفاها عربية القرن اللى جاى
صغنونه كده وعسوله وبحري
انا لو قالولى اشترى عربيخ هاقولهم ابدا
مش هاتنازل عنه ابدا
مهما يكوووووووووون
----
على فكره فيه اخبار مهمه جدا عندى
اوعى تفوتها
www.pinsywinsy.blogspot.com

مروة الزارع said...

ههههههههههههههههههههههههههههههههههههه
ههههههههههههههههههههههههههههه
ههههههههههههههههههههههههههههههه

فشتى عامت خلاص ياخالو

ات فقرى ياض يخرب عقلك

استنى اضحك تانى

ههههههههههههههههههههههههههه
ههههههههههههههههههههههههههههههههههههههه
هههههههههههههههههههههههههههههه

فظييييييييييييييييييييييييع

.......................

يعيش التوك توك يابنى

عارف المرة الوحيدة اللى ركبت فيها توك توك لاقيت فية تليفون
n70

ههههههههههههههههههه

رجعتة لصاحبة متقلقش

:))))

...............

محدش عارف قيمة التوك توك يابنى

ههههههههههههههههه

ملك الكبدة said...

ايييه

كيفك يا خال

على فكرة انا اسكندراني

و بعدين زعلان

قوللي ليه

اقوللك

يعني تتكلم عن التوكتوك
و تنسى الحالة التوكتوكية اللي عايشة فيها اسكندرية دونا عن باقي الجمهورية نتيجة موجة التلج العتية اللي بيقولوا عليها روسية و خلت البلد مهلبية و الله عيب يا خال
بقول يا خال

لو ما تمانعش عايز احطلك لينك عندي

يا ريت توافق يا خال

هاني جابر said...

السلام عليكم ورحمة الله
اغيثوا غزة
شارك معنا في القافلة الرابعة لمساعدة إخواننا في غزة
من يريد المشاركة من المدونين عليه الاتصال برقم0105076750
اتحاد الأطباء العرب لجنة الإغاثة والطوارئ

مدونة احنا الاخوان said...

الاخوانفى جميع المساجد اخوانكم بيجمعوا اى مواد عينية لاخوانكم فى غزة يعنى " بطاطين قديمة ملابس قديمة سكر وزيت وشاى الخ.... "
وسوف يتم ارسال تلك المواد عبر لجنة الاغاثة بنقابة الاطباء
__________________________________________________________________
مع تحيات مدونة احنا الاخوان http://ikhwan2.maktoobblog.com/
شاهد ادراجى الجديد بعنوان " هل هلالك يا محليات "

مواطنة said...

حلو يا خالو أحمد تناولك لقضية التوك توك

بس انا لغاية دلوقتى مش واضحلى

انت بتشيد و لا بتهاجم

و لا من دول الحياد

عن نفسى :: مابطيقهوووووش

فى الهرم مسميينه الصراصير

و انا مسمياه النمل

لحظة تأمل said...

ههههههههههه

بجد بوست جامد قووووووووى

خلاص ياريت بقى تشوفلنا مشروع توكتوك لكل مواطن

تحياتى ليك يا خالو

3ala asm masr said...

انا ليا رأى مختلف بقى شويه أنا رأيى أن التوك توك ده أعظم أختراع بعد النت أيوه صدقونى ده ممكن يوصلك لحد السرير كمان وبعدين بصراحه شويه بقى هو فتح فرص عمل لناس كتير وعجبنى أوى محافظ الدقهليه تقريبا يعنى لما عمل حاجه زى الرخص كده عشان أصحاب التوك توك يقدروا يشتغلوا وعلى فكره التوك توك مش فى مصر بس ده فى دول كتير والله أنا رأيى أنه فرصة عمل جديده لناس كتير وفى ناس فاتحه بيتها من التوك توك

3ala asm masr said...

أنضم لشباب هيروق مصر
http://hnro2masr.blogspot.com/

Anonymous said...

بغض النظر عن التكتكة اللى انت عملتهالنا بالبوست التكتوكى البحت ده ياخالو مع إننا متكتكييين خلقة من السقيع اللى إحنا فيه ده...بس التوك توك ده نصيييييبة والله ....ده انت ممكن تبقى ماشى ف أمان الله بالعربية وقدامك توك توك ماشى يتمخطر وإذ فجأتن تلاقية وبدون سابق إنذار لف وبيضير ف مساحه لا تزيد عن متر تقوم انت تضرب فرملة تخلى اللى راكب معاك يلزق ف الإزاز ومش بعيد تتشتم فيها
وغير كده كمان نص اللى بيسوقوه زى م انت قولت فى سن مخاليلك ربنا يخليهملك وبيعدوا بين العربيات ويزنقو نفسهم زنقة زفت وكمان بيتقلبوا والناس بتتعور....واهو ف الآخر فاتح بيوت ناس ويقوللك,,,, توك توك ياصغنن ### كل الناس حبوك

بوست جميييل بجد
مستـــ ج ـــدة

shams said...

اية يا واد يا صبقاغ الجمال و الحلاوة دي عامل حملة للتوك توك
و الله عال
بس تصدق هو حالل ازمة اقتصادية كبيرة و ازمة مواصلات اكبر

بنت الاسلام said...

حقيقي التكتك اتبهدل علي ايدك بهدلة يا خالو


بس حقيقي يستاهل


ركبته وانا في القاهرة والسواق كان طفل 8 سنين

قلت الشهادتين وانتظرت الموت

فعلا حرب التكاتك

بس يعني الشباب هتعمل ايه

والصراحة التكسيات غالية قوي

علينا

روح ياخالو

ربنا يكفيك شر التكاتك

قول امين

نـــــــازك الملائكـــــــة said...

يالهوى كل دا عن التوك توك
بجد ضحكتنى موووت
ماشاء الله بجد حضرتك عندك حس عالى بالفكاهة
:))))

النجم القادم said...

خالووووووووو احمد ايه ياعمنا انته مش بتيجى عندنا ليه
احنا زعلانك
ماشى ابقى هاتلى معاك عسليه وانته جى
بص انا زى ما ابى هانم قالت بحس ان
التوك توك ده عامل زى النمل
انا لما بروح لستو البلد بلاقى
التوك توك ده عامل زى النمل ادير يمين الاقيه ادير شمال القيه
بس انته جامد فى طريقة عرضك اعزك
الله بلاسلام حبيبى الغالى
وعاوز اعرف رايك فى مغامراتى وانجازاتى فى دريم بااااااااااارك

wafaa said...

كان نفسى اركب توك توك
بس شفته بره بيتشقلب بحركة بهلوانية والناس بتدلق منه ومن ساعتها مافكرتش افكر انى اركبه.
بس حد سجل براءة اخترع التو توك ؟؟ ولا سايبين اختراعتنا كده عرضة للسرقة من اوروبا والدول المتقدمة ؟

يورو said...

كل المباحثات دى عشان عيون التوكتوك
وشعر كمان
ياااا يابخته

انا م جربتوش قبل كدا بصراحه
المحافظ بتاعنا منعه يجى عندنا

مش عارفه اذا بكدا خدمنا ولا حرمنا

بالنسبه للتاج الحمد لله عدى علينا بسلام
ومستنين التحليل فى شهر مارس

تحياتى

مصطفى محمد said...

هههههههههههه
البوست جامد آخر حاجة
و بعدين لما انت بتحب التوك توك أوي كده
اعملهم نقابة و امسكها
غلشان تبقي مستند على شرعية و انت تخاطب الناس عن التوك توكيين

تحياتي

Omar... [ خروشات ] said...

شاعر؟ و عرفنا


رسام؟ وعرفنا

سياسى؟ و ربنا يستر عليك


اديب ؟ لك اسلوبك اكيد

و كمان عندك كمية مرح تقضى كل كتل الاكتئاب اللى فى الدنيا

انا حاسس انك ناوى تشترى توك توك خصوصى و تكتب عليه الاتى


احمد الصباغ لنقل الجثث بين المدونات و الاجرة بنص جنيه

............

على فكرة انا كتب اجابتى على التاج السلطانى بتاعك

فضلت اكتب اجابتى على التاج قبل ما اعمل بوست رحلتى لالمانيا وهولندا


عشان عيونك يا جميل ، عندى كام صباغ يعنى؟



اخوك عمــــر،

......

mohamed said...

السلام عليكم
بوست جامد ههههههههههه
بس انت عارف التكتك دا خد اكتر من حقه
ههههههههههه
موضوع ممتاز ودم واضح جدا انه خفيف قوى
طيب دلوقت بجد يعنى
فى مشكله التكاتك الدوله مش راضيه تعترف
يقوموا ايه بقى يركبوا من غير رخص
تقوم المشكله تبقى مشكلتين
ربنا ينجينا
تحياتى
اشوفك بين حروفك
سلاااااام

Desert cat said...

توتك توك يا احمد
بكرهههههههههههه
بكرههههههههههههه
وفى كل وقت واذان بدعى على اللى فكر فى اختراعه حسبى لله ونعم الوكيل فيه الهى يقعد فى اولاده
ده عامل عمايل سودة عندنا
ومن خلال البوست بتاعك انا عايزه سوتى يوصل للمتسكعين اللى بيسوقوا التكاتك يرحمنا من سفالتهم وقلة ادبهم وكمان سرقتهم لشنطنا فى عز الضهر ناهيك عن حوادث التحرش والقرف اللى بتحصل فيه
وكمان سوتى برضه يوسل للمسؤلسن اللى نزلوه البلد يا اما يرحمونا منه ويمنعوه يا اما ربنا ياخدهم جمعاااااااااااء
جمعاااااااااء
جمعااااااااء

مهندس مصري said...

مطلوب حضورك فوراً لمدونتي
و عليك غرامة تأخير يومين و الحسابة بتحسب
:)

Soooo said...

صديقي المدون التوك توكي
مما لاشكل فيه ان التوك توك يعتبر بمثابة تمرد واضح وصريح مقابل في الروح لمبادئ الثورة الفرنسيه والثورة البلفشيه والثورة الانترنتيه والثورة العباسيه حلوان حلوان حلوان حلوان

ولكن .. واسمحلي ان أؤكد .. ولكن
ولكن بعض الشخصيات ذوي العاهات العقليه المستديمه وذوي الامراض النفسيه المزمنه قد اساءو استخدام نظرية التكتكه وفضلو ان يحولو التوك توك من وسيلة مواصلات ممرجحه واستمتاعيه .. الى مجرد وسيلة مواصلات
وهذا نذير شؤم على ظاهرة الميكروبازات
وانا أؤيد وبشده انشاء مدينة ملاهي توك توكيه يكون قوامها عدد خماشر توك توك وارد الهند
ومعاهم فيلين




سلاموووووووووووووز

أحمد مصطفى said...

وحشنى والله يا ابوحميد

واول مرة اعرف انك مجنون تكتكاوى

أحمد

YHYيــوســف الـمصـرى said...

السلام عليكم ورحمة الله وبركاته
............................
ههههههههههه
بوست لذيذ بجد ..ونظرة توكتوكوية رائعة
هركب التوكتك وااكتكت
انا ركبته مرة واحدة بس وحرمت المشى احسن يا عم وأفيد
تحياتى

nonoymm said...

بوست دمه خفيف جدا
الاواد عندي بنبقى راكبين العربية ويعيطوا عشان يركبوه
للاسف كنا من راكبيه رغم انفنا والحمد لله ربنا تاب علينا واشترينا زوبة اللهلوبة
وعرفنا اد ايه انه اختراع فاشل جدا خصوصا وهو ماشي يتمختر ادام العربية او جاي في وشنا وفاتح كل الاضواء ليعمينا او لما لسان حاله يقول هعدي انا الاول بقى
لو عاوز تركب توك توك قولي وانا ادلك على مكان تجمهر التو كتاجية

هبههههووب said...

ههههههههههه
ههههههههه
هههههههه
انا بحب التوكتوك دا اوى وبركبه لما اروح البلد وببقى مبسوطه اوى وممكن يلف بيك ف البلد كلها
بقى مصدر سياحى فعلا
بس فكرة هايله جدا واهو الشباب يلاقوا حاجه يشتغلوها

إنسان جديد said...

رؤية توكتوكية بعيدة المدى
hehehehe
Great toktok , 2asdy great post ;)

واحدة مفروسة said...

نظرة توكتوكية ثاقبة
التوكتوك ولله الحمد بقى من علاماتنا المصرية واللى ما ركبش توكتوك يبقى ما عداش على مصر :-)
يا توكتوك المحبة مرجحنى حبة حبة

ياسمين حميد said...

واركب التوك توك
بررم بررم
وأتكتك
بررم بررم
:-P

هل صوت التوكتوك بنفس ارتفاع صوت الدراجات النارية؟ أم أنه أهدأ؟
وكيف يسمحون لأطفال بقيادته؟ ألا يوجد في مصر رخص قيادة للدراجات النارية مثلاً فيطبق ذلك على التوكتوك أيضاً؟

gannah said...

بشكرك كتير على تعليقك الجميل وان شاء الله اكون عند حسن الظن

Ahmed Al-Sabbagh said...

NIDAAL PAL

ههههههههه ايوة شعر توكتوكى

فى مانع

Ahmed Al-Sabbagh said...

مهندس مصري

ايوة تلاقيك بتحقد علينا عشان معندكوش توك توك

Ahmed Al-Sabbagh said...

لماضة

ههههههههههههههههههههه

زى القطة ؟؟


هههههههههههههههههه

Ahmed Al-Sabbagh said...

سهر الليالى

هههههههههه

خمسة جنيه عشان الصورة ؟؟

امال الركوب بكام ؟؟

Ahmed Al-Sabbagh said...

ابن حـجـر الـعـسـقـلانـى

هههههههههههه

بجد تعليقك مش ممكن

اشكرك بشدة

Ahmed Al-Sabbagh said...

mo'men mohamed

يا بختك يعنى بتركبة كل يوم

عااااااا

Ahmed Al-Sabbagh said...

MerMaid

بطلى بقى حقد على الخلق

تلاقيكى مش عارفى تركبى توك توك

هههههههه

Ahmed Al-Sabbagh said...

د/اجدع بنوته

هههههههههههه

العيال دول بيسيحولى كدة

انا اصلا كنت طمعان فى كتاب

:)

Ahmed Al-Sabbagh said...

KHALIFA

طيب كويس انك ما بتلاقيهوش قاعد جنبك فى العربية

هههههههههههه

Ahmed Al-Sabbagh said...

ض/خالد

ايوة مسيبة فعلا

:)

Ahmed Al-Sabbagh said...

Rania

هههههههههههههههه

شهيدة التوك توك

عسل يا رانيا

Ahmed Al-Sabbagh said...

بت خيخة وأى كلام

ههههههه

يعنى شريف التوك توكاوى

Ahmed Al-Sabbagh said...

appy

هههههههههههههههههههه

تشبيهاتك مالهاش حل يا رحاب

:)

Ahmed Al-Sabbagh said...

paranoia,magnetic & dramatic girl

ههههه

التجربة التوكتوكية

على وزن التجربة الدانماركية كدة

Ahmed Al-Sabbagh said...

only spot

ههههههههههه

شعرك طقطق

انا كلى طقطقت

Ahmed Al-Sabbagh said...

ريهام

هههه

ايوة انا توكتوكى فى مانع؟

هههههههه شكرا على كلام الجميل وربنا ما يحرمنى منك

Ahmed Al-Sabbagh said...

wanna b a bride

عاااااااااا

ايوة يا غادة

ماليش دعوة

لازم هشوفك تانى

وتكتبى لى توقيع تانى بدل ده

ومبروووك كتير يا غادة

Ahmed Al-Sabbagh said...

عصفور المدينة

هههههههههههههههه
هههههههههههههههه
ههههههههههههههههههه

مخاليل / مواليد

تصدق بردو

ولكلوك / توك توك

ههههههههههه

روعة

Ahmed Al-Sabbagh said...

مدونة احنا الاخوان

شكرا للمرور والدعوة

Ahmed Al-Sabbagh said...

احمد الجيزاوى

هههههههههههه

شكرا ياريس

ربنا ما يرحمنا من توجيهاتك

Ahmed Al-Sabbagh said...

خادمة الاسلام

هههههه

لا بالعكس

ده مش خطر خالص

ولا هتحسى بحاجة

لان احتمال تروحى فى غيبوبة اصلا

:)

Ahmed Al-Sabbagh said...

Nsreen Bsunee

هههههههههه

ايوة انا مسخرة التوكتوكى

:)

Ahmed Al-Sabbagh said...

UNIQUE

ههههههههههههه

انا مرة لقيت توكتوك فى جيبى

:)

Ahmed Al-Sabbagh said...

Soul.o0o.Whisper

ههههههههههه

ايوة طب كويس انك ما كنتيش بتوقعى فى التوكتوك اصلا

:)

Ahmed Al-Sabbagh said...

وينكى

ههههههههههههه

ضحكتنى اوى كلمة بحرى دى

Ahmed Al-Sabbagh said...

مروة الزارع

يا بنت المحظوظة

تليفون مرة واحدة وفى اول مرة تركبية

على كدة ممكن تلاقية فيه عربية المرة الجاية

ههههههههههه

Ahmed Al-Sabbagh said...

ملك الكبدة

هههههه

انا سمعت ان اسكندرية ما فيهاش تكاتك

البت سهر الليالى قالت كدة

Ahmed Al-Sabbagh said...

هاني جابر

شكرا على المرور والدعوة

Ahmed Al-Sabbagh said...

مدونة احنا الاخوان

شكرا على المرور والدعوة

Ahmed Al-Sabbagh said...

مواطنة

:)

طيب اقرى المقال تانى

:)

Ahmed Al-Sabbagh said...

لحظة تأمل

ايوة

والتوصيل للمنازل

:)

Ahmed Al-Sabbagh said...

3ala asm masr

ههههههه

ايوة عندك حق

وكمان انا فكرت اشترى تكتوك للبيت

:)

Ahmed Al-Sabbagh said...

3ala asm masr

شكرا على المرور والدعوة

Ahmed Al-Sabbagh said...

Anonymous


ههههههههههههههه

شكرا يا حنان

Ahmed Al-Sabbagh said...

shams

ايوة بس سبب ازمة مرورية اكبر

Ahmed Al-Sabbagh said...

بنت الاسلام

ههههههههه

يعنى الواحد يركب توك توك يستشهد

Ahmed Al-Sabbagh said...

نـــــــازك الملائكـــــــة

:)

اشكرك بشدة على كلامك الجميل

Ahmed Al-Sabbagh said...

النجم القادم

انا باجى ولاجئ فى مدونتك ليل نهار

حلو كدة

:)

Ahmed Al-Sabbagh said...

wafaa

هههههههههه

بس هو اصلا مش اختراع مصرى

Ahmed Al-Sabbagh said...

يورو

تمام تمام

تسلم ايدك

Ahmed Al-Sabbagh said...

مصطفى محمد

ههههههههههههههههههههه

ايوة نقابة التوكتوكين

Ahmed Al-Sabbagh said...

Omar... [ خروشات ]

ما تحرمش ابدا منك

ومن كلامك الحلو يارب

وبتوحشنا دايما

Ahmed Al-Sabbagh said...

mohamed

ايوة بحد انت قولت كلمة حق حلوة اوى

Ahmed Al-Sabbagh said...

Desert cat

ياخبر ابيض

ده الموضوع كبير اوى

لأ لازم سوتك يوصل

Ahmed Al-Sabbagh said...

مهندس مصري

عاااااااااااا

هاجى يا عمو

Ahmed Al-Sabbagh said...

Soooo

ههههههههههههههههههههههههه
هههههههههههههههههههههههههه

مسخرة يا واد

Ahmed Al-Sabbagh said...

أحمد مصطفى

ايوة انا مجنون توكتوكاوى

فى مانع ؟

هههههههه

واحشنى يا احمد

Ahmed Al-Sabbagh said...

YHYيــوســف الـمصـرى

ههههههههههه

انت كمان شاعر توكتوكى ؟؟

:)

Ahmed Al-Sabbagh said...

nonoymm

ههههههههههه

حلو اوى

بس هو التوكتوك عندة لسان حال بردو ؟؟

Ahmed Al-Sabbagh said...

هبههههووب

ههههههههه

ايوة شوفتى

زى الاهرامات تمام

:)

Ahmed Al-Sabbagh said...

إنسان جديد

هههههههههههه

وجريت توكتوك قصدى جريت كومنت

:)

Ahmed Al-Sabbagh said...

واحدة مفروسة

ايوة

انت مصرى يبقى ركبت توكتوك

:)

Ahmed Al-Sabbagh said...

ياسمين حميد

وهل يجوز تسمية اولئك اطفال ؟؟

هههههههه

Ahmed Al-Sabbagh said...

gannah

ربنا ما يحرمنى منك

:)

somaa said...

هههههههه يا توك توك الهنا يا ريتنى كنت انا دى اغنيه حديثه تسمعها ان شاء الله....اه التوك توك كمان حاليا بيحطولوا ستاير...وفى اكتوبر مركبين فيه مقطوره صغيره عشان يبقى توك توك عائلى ...ودا طبعا اجدع من النص نقل فى الركوب اللى فى اكتوبر يقدر يعرف ان هنا التكسيات نص نقل...اللذيذ فى الموقف ... زفه التكاتك اللى طلعت فى المقدر جديد...زمان كنا نشوف الزفه الحنطوريه زفه المرسيدس زفه موتوسيكلات ...دلوقت زفه تكاتك
اسلوبك رائع تقبل تعليقى
تحياتى ليك سومه_87

Akhadiwi Rajie said...

WONDERFUL Post. thanks for share.. more wait ..
Lijit.com
Community.intuit.com
Pixarcarsdiecast.com