خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Mar 23, 2008

ملخص لقاء المدونين بساقية الصاوى / البورصة

كان أمس السبت 23 مارس 2008 موعدنا مع لقاء المدونين فى ساقية الصاوى وحضرت مجموعة كبيرة وجميلة من المدونين سواء من القاهرة او من مدن أخرى وتمت مناقشة مجموعة موضوعات هامة وحيوية
وتم فى اللقاء مناقشة مجموعة من الموضوعات منها

التعارف وتبادل لينكات المدونات ووسائل الاتصال
-----------------
توجية التهنئة من المدونين لأحمد الجيزاوى وشاهندا بمناسبة الخطوبة السعيدة
-----------------
مناقشة فكرة الكتاب الأدبى للمدونين – وتم الاتفاق على ان كل من يود الاشتراك فى الكتاب يختار افضل تلات اربع اعمال له ( شعر – قصة قصيرة ) ويرسلها لى على الايميل وانا هجمعها فى ملف وورد واحد وابعتها للجروب كله وبعدين كل واحد يكتب ملاحظاته واختيارة ونعمل جلسة لتحرير الكتاب واختيار الاعمال اللى هتشارك وايميلى تحت فى اخر البوست
-----------------
مناقشة التطور الطبيعى للتدوين وكيف تطورت فكرة التدوين بداخل كل منا من أول ما بدأ التدوين حتى الان
-----------------
مناقشة فكرة الكومنت موديراشن والحذف للتعليقات وعلاقتها بحرية الرأى والتعبير
-----------------
تقييم فكرة اتحاد المدونين المصريين ومناقشة الاراء المختلفة
-----------------
الاتفاق على التبرع بالدم يوم 5 إبريل 2008 بمركز المصل واللقاح فى الدقى – الفاكسيرا ، وزيارة ملجأ الايتام بعد التبرع
قائمـــــة الحاضــــــــرين

أحمد الصباغ صاحب مدونة خالو أحمد ..أنا
أحمد الجيزاوى صاحب مدونة بحبك يا مصر
دكتورة شاهندا صاحبة مدونة حاجات ملخبطة جوايا
أحدث عريس وعروسة فى عالم التدوين ، وكان أول حاجة تمت فى اللقاء توجية التهانى من كل المدونين لأجمل حبيبن فى دنيا المدونات وبجد بنتمنى ليهم كل التوفيق والأمنيات الطيبة
نوران الشاملى أشهر بت خيخة وأى كلام فى الدنيا ، وهى صاحبة فكرة التجمع للتبرع بالدم يوم 5/4/2008 وكمان فتحت موضوعات جامدة جدا للمناقشة فى اللقاء وكان منها تصور المدونين لطريقة التعبير عن الإعتراض عن الوضع الحالى للبلد اقرو البوست ده هو لازم نحرقها
نورا الخشن صاحبة مدونة اه .. وكفى ، والصديقة الجديدة فى عالم التدوين وده كان اول لقاء تحضرة معانا وهى بالمناسبة شاعرة وأديبة وفنانة تشكيلية جميلة اوى
ميكا بريطانية صاحبة مدونة ميسيف أتاك ، وصحفية بجريدة ديلى نيوز بيبر
حمادة زيدان : صاحب مدونة على مكتوب تحمل أسمة وهو كان بيدون على مكتوب لكن استقطابة لبلوجر وعمل من أول السطر
أحمد سعد دومة شاعر الأخوان وصاحب مدونة
لإننى احببت
محمد عطية مدونة الشاعر
أحمد مهنى – مدونة مزاج حزين
محمد – إبن حجر العسقلانى : صاحب مدونة الصحيفة الكاشفة وشهرتة أبو العساقيل وكمان فى اسم جديد قالوه امبارح .. عسقوووول
محمد عامر ( التمنياوى طه) وهو صديق قديم للمدونين لكنه لم يدوّن بعد وبنقول له مستنين نشوفك على بلوجر قريب
سيد سعد صاحب مدونة المكسرات وبدون أدنى مجاملة هو مدوّن يتمتع بحس فنى عالى اوى
القيثارة المكسورة غير مدونة
شيماء فارس صاحبة مدونة فضفضة ودى كانت اول حضور لها فى صالون المدونين وبجد شخصية جميلة
منار عونى قلب الاسد
أحمد سعيد مدونة أحمد سعيد
محمد قنديل صاحب مدونة مهندس مصرى اللى قرفان وبيفكر يسيب البلد ويمشى ، الحقيقة كان اسم المدونة ظاهر عليه اوى انهاردة ، بس لما اتكلم حسيت ان لسه لديه تفاءول .. حاجة غريبة هههه
احمد البوهى صاحب مدونة إنكسارات .. فى الحقيقة ده كان تانى لقاء ليا مع البوهى بس ما كنتش متخيل انه بالثقافة والروعة والفكر المنظم ده بجد رغم انه ما اتكلمش كتير لكن كلامة مركز جدا وعملى اوى ومنظم وعجبنى اوى وعجب معظم الموجودين
محمد الجوهرى بولوتيكيا
ابراهيم عادل "معايا" صاحب مدونة انا وانا ، مدون قديم ورائع لكن دى اول مرة اتشرف بلقاءة وهو شاب مثقف وعنده فكر تجاة كل اللى بيدور حوالينا
عبد الرحمن فارس لسانى هو القلم
رودينا مدونة بنوتة مصرية ، فاكهة اللقاء وأم العسولة نور اللى كانت موقفة الدنيا على رجل واحدة ، وكمان فى اكتر من خمستلاف مدون لغاية دلوقت اتقدمو عشان يحجزو خطوبة نور ههههههه
أميرة صديقة غير مدونة و هى صاحبة شيماء فضفضة
مدحت محمد مدونة مشاعر دافئة
لولا صاحبة مدونة أحلى الأوقات
احمد سوو جارى العزيز وصاحب مدونة عجوز وعندى30 سنة ، ده طلع مفترى بشكل كنا بنناقش فكرة نحذف والا نخلى التعليقات لو حد أساء لينا فى المدونة ، قام كل الناس اللى قال نحذف واللى قال نخلى ، ده بقى فهمنا ان يوم ما حد يقول فى التعليقات حاجة ما تعجبوش مش هيخرج من المدونة سليم هههههه كويس كدة بقى اما احب اشتمة بعد كدة ابقى ادخل مجهول ههههه
أسامة المهدى صحفى بجريدة المصرى اليوم
إسلام عيسى شاعر غنائى
محمد مدحت صاحب مدونة مواطن حقوقى
مدحت أبو طاقية صاحب مدونة الزينبى
محمد عادل مدونة ميت

أنا .. مع إبراهيم عادل

محمد الجوهرى

مهندس مصرى .. مبتسم والله اهو


سيد سعد .. صاحب المكسرات
وأخيرا وليس أخرا .. أحب أشكر بشدة كل اللى شرفوا الصالون بالحضور واتمنى دوام التوفيق والنجاح لكل المدونين
واتمنى من كل الاصدقاء اللى يحبو يحضرو لقاء المدونين القادم انهم يقترحو الميعاد والمكان اللى يشوفوه مناسب وهناخد بأغلب الأراء
E-mail:ahmed000eg@hotmail.com
أحمد الصباغ

49 comments:

ftafeet said...

امممممممممممم شكله كان يوم جامد

معلش تتعوض واجى معاكو فى يوم تانى ان شاء الله

(بحقد عليكو)
الكلام اللى بين القوسين ده فى بالى محدش يقراه

سهر الليالى said...

أنا كنت مستنية التغطية دى بفارغ الصبر

والله حاولت بأستماتة لكن بائت محاولاتى بالفشل أنى أجى من اسكندرية

بجد يارب دايما متجمعين على الخير يارب فى الدارين إن شاء الله

بس ألا هو لو أنا قلتلكو تعالو مرة أتجمعو فى اسكندرية وعملت دعوة كدة هل فى ناس هتيجى؟؟؟

تحياتى يا صباغ وسلامى لكل الناس الموجودين

مهندس مصري said...

دي ابتسامة الخلاص يا أستاذ
علشان خلاص مسافر و كلي امل اني الاقي بره اللي ما لقيتوش جوه
ثم الصورة دي تقريباً كنت مبتسم من الكلام اللي بيتقال ساعتها
بس كان يوم جميل بجد
عقبال ما نوصل لفايدة من الكلام ده كله يا ديكتاتور الإدارة الحوارية

أصل ما قالكوش يا جماعة كل شوية و هو اللي بينظم الكلام في اللقاء الاقيه بيقول ممنوع الكلام الجانبي اسمعوا اللي بيتكلم
بس هو نفسه اتكلم كلام جانبي على البورصة و عندي الشهود
بس ياله مش مهم
حنفوت المرة دي
:)
هههههههههههههههههه
تغطية جميلة يا أحمد
بس مختصرة شوية
انت عارف انا رغاي كبير
:)

Abd-Alrahman & NOUR said...

اكيد كان يوم جامد وانا كنت جاي خلاص
بس للاسف طلع لي مشوار من تحت الارض والله حاشني مرة واحدة

علي العموم تتعوض المرة الي جاية يا جماعة

والف مبروك العروسين

عبدالرحمن

هناء صابر said...

موفقين ان شاء الله يا جماعة
كان نفسى جدا اكون معاكم بس أكيد المرة الجاية ان شاء الله متتفوتش
و ادعوكم لعمل اللقاء القادم فى محافطتى الجميلة الاسكندرية بعدوة من جمعية مصر للثقافة و احوار مقر الاسكندرية ...حيث أن مقر الاسكندرية يرعى مشروعا لاتحاد الكتاب الهواه و أكيد هيسعدنا جدا اننا نستضيف الاجتماع القادم عندنا ان شاء الله
اتمنى قبول الدعوة

د/اجدع بنوته said...

طبعا انا كمان حاولت

وباستماته شديده

بس كان الرد

عندك امتحان ياهانم يوم الاتنين ب 40 درجه

وعايزه تسافرى كايرو يوم السبت

اصل يابابا

ولا كانى سمعت حاجه

يابابا

اتفضلى ع كتابك

.............

وكنت ف نفس اللحظات اللى انتو

قاعدين تتكلموا فيها

وتضحكوا فيها

انا هنا بتقطع بين طيات كتابى

ازاى جالكم قللللللب تضحكوا بعد كل ده

...............

يارب دايما كده ف تجمعات زى الفل

وربنا يديم المعروف

وخلاص اخدت اذن مسبق الدفع م الحاج بابراء يوم 5/4 ده ياموسهل

بس مع تحزير شديد اللهجه بانى متبرعش علشان اتبرعت ف نص السنه

ياااااارب بس ميطلعلناش امتحان م تحت

الارض .. حاجه تفقع

وطبعا بالمناسبه نبعث ارق التهانى للجيزاوى ودوك شيماء

وبالتوفيق يارب

ودايما كده البلوجات مجمعانا

....................

انا دخلت ساقية الصاوى دى مره

وم ساعتها معدتهاش

ممكن بعد كده تتقابلوا ف حتت سهله وحلوه كده

حديقة الازهر مثلا

جنينة الفسطاط

الحديئه الدوليه

المتحف المصرى مثلا

متحف طه حسين

متحف ام كلثوم

وسط البلد

ستى ستارز

كفايه الخريطه اللى انفتحت دى

بس اقصد نوعوا ف الاماكن

اماكن يكون فيها بهجه كده

وطبعا م غير نقاش

لما شوفت الصور

اكيد شعرت ببهجت

علاء سالم said...

السلام عليكم

فكرة اللقاء جميله جداً
إن شاء الله لما تحددوا اللقاء القادم هاحاول أتواجد فيه .

خالص تحياتي ليك ولكل اللي حضروا اللقاء.

Soooo said...

صباغ حليب قلبي وابن منتقتي

تعليقي منصب في صبابين مصبوبين

اول صباب .. انا بجد نفسي اتعرف على كل المدونين اللي بيدونو في الحياه التدوينه ككل .. وباقترح اننا لو هنتقابل يبقى يكون يوم اجازة عشان الناس اللي مش بتاخد اجازة يوم سبت تقدر تيجي .. يعني خد عندك مثلا يوم خميس اخر النهار ولو ان ده برضه صعب .. ويوم الجمعه من اوله بقى عادي الحياه فل

تاني صباب .. انت قلتلي ان القائمين على ساقية الصاوي قلقو الى حد ما من تجمع الناس وماسابوكمش على حريتكم .. وبالتالي انا باقترح اننا ممكن نبقى نتقابل في الاوبرا مثلا والمكان هناك زي مانت شفت مكان جميل ومفتوح وكافتيريا حلوةوماعتقدش ان في حد هيعترض منهم خصوصا واننا في فتره زمان كنا بنعمل بروفات مسرح وقرايات ترابيزه هناك وبعلو صوتنا وماحدش اتكلم ولا اعترض علينا
وكمان موقع الاوبرا اسهل من الساقيه خصوصا وانه في منطقة وسط وسهل ان الناس تروح هناك سواءا بالمترو او باي وسيله مواصلات لو جايين من وسط البلد او من الهرم

يعني باختصار
الموعد المقترح للتجمع : يوم الجمعه
المكان المقترح : كافيتيريا المجلس الاعلى للثقافه في دار الاوبرا


ملحوظه
اه طبعا لو حد دخل عندي في المدونه واتكلم بطريقه مش حلوة ولا حاجه هاهزأه .. مش داخل في منطقتي وبيتكلم وبتاع




سلاموووووووووووووز

مدحت محمد said...

كان يوم جميل فعلا يااحمد
واتعرفنا على ناس اجمل

امام الجيل said...

جميل
مبارك عليكم الملتقى ده

فعلا مهم جدا نحول المجتمع التدوينى الى واقع
كنت لسه بكلم دكتور حر امبارح لما اتقابلنا عن النقطة دى
وكلمنى عن حكاية الكتاب
كنت لسه اول مرة اعرف بيها

وفعلا فكرة جميلة جدا

خمسة فضفضة said...

السلام عليكم ورحمة الله وبركاته

لا احنا كده اتكروتنا

يعني تعملوا الاجتماع بعيد وقلنا مش مشكله
كمان تكروتونا في التغطيه لا ماينفعش

وكمان حد شاري دوا من صيدلية العزبي
ينفع كده تبقي صيدليتي موجوده وتشتروا من بره ...ههههههههههه


كل مره وانتوا طيبين

أبو أمل said...

رائع ربنا معاكم بس كان نفسنا نحضر
بجد التدوين حاجة هايلة
ممكن يعمل المعجزات
بس انت تعالى شوف آخر البدع
عندى
حاجة جبارة ممكن تغير مصر كلها
لو وقفنا سوا
المدونين والشباب
الحلو

صاحب المضيفة said...

كنت منتظر التغطية دي

وكنت موجود في القاهرة يومها

لكن نسيت خالص والله


يالا حصل خير

ويراب دايما عودا عودا


تحياتي يا خال

بت خيخة وأى كلام said...

ازيك يا ابو حميد
عجبانى التغطية المرة دى للقاء
البوست جميل ومختصر بس شامل كل حاجة حصلت
بس انا عايزة اعرف مين ميكا دى
دى اكيد جت على البورصة
انا ماشفتشهاش واحنا فى الساقية
الحاجة التانية بقى انت نسيت تذكر مدام نيفين
اللى هى تبقى صاحبة مدام وفاء مرات احمد المصرى صاحب مدونة يوميات عيل مصرى
لان حضورها فى اللقاء كان جميل جدا وانا عجبتنى اوى ارائها
خصوصا الجملة اللى قالتها
مافيش واحد فيكى يا مصر حكمك صح
واحد امم وواحد عمل انفتاح وواحد باع
الجملة دى على اد ما هى صغنونة بس تجمع كل شئ جواها

وعجبنى جدا اراء شيماء صاحبة مدونة فضفضة
واحمد البوهى كمان عجبنى اوى اسلوبه فى التفكير
ومش قادرة اعبر بقى عن مدى استمتاعى بكلام سيد سعد مكسرات
بجد الراجل ده كلامه موزون بطريقة تجنن

اللقاء كله فعلا كان يجنن
بس انا مع سووو
فى اقتراحه نبقى نخلى اللقاء فى مكان تانى زى الاوبرا
علشان محدش يجى يفركشنا زى اسمها ايه دى الى جت عملتهم علينا
وخلتنا نمشى من الساقية
بس يكون يوم السبت برضه
لان انا خميس وجمعة ماينفعش اروح فى اى حتة


وطبعا انا اساسا كنت مستمتعة كمان انى استفردت بيك انت وعسقول وقاعدنا ندردش شوية قبل باقى المدونين مايشرفوا

وطبعا بشكرك جدا على طريقتك فى تنظيم الحوار

تحياتى ليك
اختك خيخة

My Hope$ said...

فكرة حلوة اللقاء والتجمعات دة
بس انا من اليكس صعب اوي اني اتجمع معاكم
مرة كدا بقي اكون في مصر واجلكم ان شاء الله
سلام

نوره الخشن said...

نورا الخشن صاحبة مدونة اه .. وكفى ، والصديقة الجديدة فى عالم التدوين وده كان اول لقاء تحضرة معانا وهى بالمناسبة شاعرة وأديبة وفنانة تشكيلية جميلة اوى


خلاص عملتني فنانة تشكيلية عشان بعك كده حبة عك بالرصاص عملتني فنانة بتشكل
ماشي ياعم الصباغ مشكرين ياذوق
مع انك كنت عاملها بدري اوي وانت عارفني انا عدوة الصحيان بدري والجو كمان كان حر وانت برضو عارفني عدوة الحر بس يلا كانت قاعدة حلوة وانا انبسطت اني جيت
اينعم انا كنت قاعدة فالاجتماع نافرقش كتير عن الكرسي اللي قاعدة عليه
بس ده عشان كنت مع ناس معرفهمش ومكسوفة
قال يعني البت هادية ووش كسوف
اللي عايز بئى يعرفني يبئى يروح المدونة بتاعتي يزورني هناك
زي مخيخة عملت كده ومصدقتش ان انا يجي مني ده كلو

يلا سلام دلوقتي عشان اصب الشاي وهبئى ارجع ارغي تاني

حد عايز شاي؟!!!

حسن توفيق said...

الاخ الفاضل
احمد
طبعا انا سعيد وحزين الاثنين معاوهذا احساسى عن هذا اللقاء
اولا انا سعيد لكل لقاء يتم بين المدونيين من اجل مزيد من التعارف والتواصل بيننا
ثانيا انا حزين لعدم دعوتى سواء بصفة شخصية او بصفتى من مؤسسى اتحاد المدونيين المصريين طالما كان هناك نقاش حول هذا الموضوع كان يجب دعوة من يشرح اهداف وخطة وبرنامج عمل الاتحاد
اخى العزيز اتمنى ان تراعى ذلك المرة القادمة بس ياريت قبلها بفترة كى نستعد فانت ربما لا تعرف اننا موظفون واصحاب عائله لذا يجب عمل بعض الترتيبات قبل السفر
اتمنى للجميع التوفيق ان شاء الله ولعلمك عندنا اخبار ساره بخصوص الاتحاد
شكرا لك واتمنى ان نتواصل لمزيد من التعاون المثمر من اجل خدمة الجميع
اخوكم
حسن محمد توفيق
من مؤسسى اتحاد المدونيين المصريين

only spot said...

سلام عليكم
بجد كان يوم روعه بجد يا خالو هههه وكنت اتمنى بجد اكمل معاكم بس للاسف كنت مرهقه جدا ومكانش ليا نصيب بقى ان شاء تتعوض فى مره تانيه وبجد تقبل منى خالص الاحترام والتقدير

elmancy said...

السلام عليكم
إزيك ياخالو
يارب تفضل مجمعنا
إعذرونى ماكنتش معاكو
عندى إمتحانات
إدعولى
ربنا يوفقكم إلى مايحب ويرضى

elmancy said...

http://elmancy2000.blogspot.com/

weswes said...

لالالالالالالالالالالالالالالا
مش كل الناس التحفه دى تيجى وانا مش اشوفها
حسبى الله على الدكتره والشيتات اللى منعتنى عن الحضور
بجد كان نفسى اتقابل مع كتير منهم
اللى بجد كنت معجبه بمدوناتهم
يلا ان شاء الله اكون معاكم يوم 5ابريل
تحياتى

Anonymous said...

اللى اسمها خيخة دى مش مصورها ليه
كنت عايز اعرف هى زينا كدة ولا عاملة ازاى

نوره الخشن said...

انا جيت تاني

بص بئى اولاً انا هقول كده شروطي من اولها عشان اللقاء الجاي ونبئى متفقين كده على عشان مغلسش عليك وانت عارفني فالغلاسة عشان يبئى لقاء على مية بيضة
اولاً المكان كان حلو اوي وجميل هو لولا بس طنت اللي جت أومتنا دي
يعني لو المرة الجاية نقتل طنت دي اللي قرفانة من نفسها ونروحو مفيش مشاكل
ثانياً ايك ثم اياك ثم اياك تعمل التجمع فالبورصة عشان انا مابعرفش اقعد على قهاوي بلدي بصراحة هحس اني منظري شبشب
ثالثاً وخد بالك من ثالثاً دي كويس حذاري تيجي تقولي المعاد الساعة 11 دي تاني هدعي عليك 11 دعوة وربنا انشاء الله يستجيب ابئى خليها على 5 او 6 كده فالتراوة
رابعاً بئى
لأ مفيش رابعاً
خامساً مبحبش الزحمة ومبحبش الزحمة دي يعني مش حب الزحمة يارب تكون فهمت
و هروح اغسل رجلي ووشي بميه سئعة وانتعش كده عشان حرانة وجايز لو جالي نفس او لئيت كلمة محشورة فزوري بالعرض كده عيزة احدفك بيها هجي احدفك بيها

سلاموووز ياخاااال

بنوته مصرية said...

ازيك يا احمد بجد كان لقاء جميل سواء في الساقية او البورصة واستمتعت فعلا بلحوار اللي تم في البورصة

وكمان مبسوطة اني اتعرفت علي ناس جميلة

علي فكرة انا تاني يوم رحت فعلا مستشفي معهد ناصر وزورنا الجرحا الفلسطنين

كان يوم جميل فعلا
عاوزين نرتب ونروح تاني

وانا مع الناس اللي بتقول الميعاد يكون 5 او 6 انت عارف الحر بقي وكمان لازم
لازم
لازم

نتقابل في جنينه علشان نور هانم تلعب وانا اركز معاكم
ههههههههههههههه

بهزر طبعا

بجد تغطية جميلة ومش غريبة عليك يا وزير الاعلام
(*_^)

تحياتي
رودي

ابن حـجـر الـعـسـقـلانـى said...

كان يوم جميل يا صباغ .. بس كدة الساقية أعتقد إنها مش هاتنفع تانى .. أنا هاحس إنى قاعد مراقب و مش هابقى واخد راحتى .. و لا الناس رأيها إيه ؟؟

إقتراح سوووو ظريف .. الأوبرا مكان حلو و مركزى لناس كتير

حتى ممكن عشان ما نعملش مشاكل نبقى نحدد المواضيع اللى هانتكلم فيها لكل الناس قبل ما نروح .. حتى عشان نروح و احنا فى دماغنا أفكار محددة

إلى جانب عشان الحوار يكون بناء ممكن نتفق على شوية التزامات نلتزم بيهم أثناء اللقاء عشان ماحدش يقاطع حد مثلا و عشان ظاهرة "الاتنين اتنين" ما تتكررش كتير

دة رأيى ماعرفش الكلام دة هايبقى مناسب و لا لأ

و ربنا يديم المودة ما بين الجميع

نوره الخشن said...

نتقابل في جنينه علشان نور هانم تلعب وانا اركز معاكم
ههههههههههههههه

اه نلعب انا وانتي ونفضلو هو ايه رأيك
ههههههههههههههه

نوره الخشن said...

ابن حـجـر الـعـسـقـلانـى


حتى ممكن عشان ما نعملش مشاكل نبقى نحدد المواضيع اللى هانتكلم فيها لكل الناس قبل ما نروح .. حتى عشان نروح و احنا فى دماغنا أفكار محددة

إلى جانب عشان الحوار يكون بناء ممكن نتفق على شوية التزامات نلتزم بيهم أثناء اللقاء عشان ماحدش يقاطع حد مثلا و عشان ظاهرة "الاتنين اتنين" ما تتكررش كتير



اه والنبي وابئو ادوني فرصة اتكلم عشان خنقتوني الصراحة

آفاق الحرية said...

السلام عليكم
والله كان نفسي اكون متواجد بس كنت مشغول شوية
خيرها في غيرها ان شاء الله
تحياتي

Mohamed ElGohary said...

هو أنا كنت عنيف؟ :D

Mohamed ElGohary said...

هو أنا كنت عنيف؟ :D

Miss Dot said...

ازيك يا خالو؟؟؟ :( انا ماجيتش
اول مرة احس بالندم اني حضرت امتخان
و الله كان عندي امتحان و بعد الامتحان وقفت ساعتين و نص اشرح .... مانت عارف بقي المخلوله بتاعتك ياسو نوجا ميس دوت
قول اللي تقوله
المهم
انا بجد نفسي اجي تاني
و ان شاء الله هبعت القصايد بس ان شاء الله بعد الامتحانات ينفع؟؟؟؟
و لا هتعملوا الكتاب بسرعه؟

عموما انا كنت برضه عاوزاك يا خالو تساعدني عشان انا بعمل بلوج جديده هو انا هتدرب فيها ده اولا ده غير اني مؤمنه بكل ما فيها
بدرب فيها لان ان شاء الله عن قريب هبقي .... صحفيه ان شاء الله
بس ادعيلي
الموضوع ماشي و عاوزه مساعدتك و ياريت تتكلم معايا علي المسنجر في الموضوع ده


أنشرها بين المدونين ان استطعت
ادعوكم لزيارة هذه المدونه
http://www.ta7arosh.blogspot.com/

MKSARAT SAYED SAAD said...

احمد فعلا كان يوم جميل وان شاء يتكرر
وانا مع فكرة الاوبرا او اي مكان مفتوح
واسمحلي اشكر خيخة في تعليقها عليا
وتحياتي لكل الموجودين
صاحب المكسرات
سيد سعد

mohammed alsha3r said...

كان يوم جميل بوجود المدونين المثقفين

Reham Mahmoud said...

ماشى ياواد بااحمد ماقولتليش ليه كنت خرجت معاكوا ماشى انا بجد زعلانه منك بس اما حاجة اتبسطوا
ربنا يبسطكوا اكتر واكتر ويخليكوا لبعض
تحياتى
ريهام

Miss Dot said...

زوروني كل سنه مرة
كده برضه يا خالو؟؟؟
مش بتزورني خالص؟
:(
اعمل ايه بقي كل دا
انا لقيتك بتعلق عند ناس
انت زعلان مني و انا مش واخده بالي؟

عموما انا مخمصاك

ياللا بقي انا زعلانه:(

نوجا (الزعلانه من خالو)
ميس دوت

مروة الزارع said...

كان نفسى اجى والله يا خالو

بس انت عارف انى كنت تعبانة وبفرفر

معلش

المرة الجاية

عاااااااااااااااااا

عااااااااااااااا

:(((

شروق ..مدونة تحت العشرين said...

الفكرة جميلة جداً و لولا إني في إسكندرية أكيد كنت حاجي
لإننا فعلاً محتاجين نتجمع و نتكلم
و مبروك عيد ميلاد البلوج عقبال 100 سنة بلوجية

محمود الدوح said...

جميل والله

انا اسف بجد مكنش ينفع اجى
بس والله كان نفسى اجى

يلا خيرها فى غيرها

إبـراهيم ... معـايــا said...

سعدت بوجودي معكم، وأتمنى أن تشاركونا جميييعًا هذا اليوم/الاحتفال ....
إلى كل المدونين المصريين، ومحبي الأدب،وبهاء طاهر ، ومصر :
أدعوكم، وتدعوكم ورقة وقلم .... إلى الاحتفالية المقامة بمناسبة فوز بوكر العربية ببهاء طـاهر ، وذلك يوم الثلاثاء القادم .... الأول من إبريل ... في نقابة الصحفيين الدور الرابع ... السادســـة مساءً

nonoymm said...

متجمعين في الخير على طول

somaa said...

سبحان الله بقى انا اوصفلكم العنوان بالتفصيل
واقعد فى بيتنا ومجيش خساره والله بس كويس انكم اتبسطوا انا كمان زى فتافيت بس انا بغبطكم مش بحسدكم بقى
تحياتى ليكم سومه_87

Ahmed El-Agouz said...

قتل الله الشغل لو كان رجلا لقتلته
كان نفسي اجي بس معلش
العجوز

كلاكيت تانى وتانى said...

ياريتنى قدرت اجى بس انا اصلا مكنتش اعرف ويمكن دى اول مرة ادخل مدونتك برغم انى من زمن حابة ادخلها هحازل اتابع اكتر ان شاء اللة ومبروك الاجتماع شئ جميل بجد تحياتى نتقابل انشاء اللة فيوم التبرع بالدم

وينكى said...

صباح الفل اولاوتانيا انا زعلانه موت انى ماحضرتش اللقاء المرادى
وانتو عارفين انى من البايونييرز اللى بيحضروا اى لقاء
لكن بجد انا كنت مسافره ولسه راجعه امبارح بالليل مش شايفه قدامى
قولولى ان خالو التوكتوكى مابلغكوش سلامى واعتذارى عشان ابقلظه
اشوفكم دايما على خير

سلام

مهندس مصري said...

هي الصور راحت فين ؟
انت حذفتها و لا ايه ؟

محمد ابراهيم said...

لقاء جميل جدا جدا
و مفرح جدا جدا
يارب ما ينفض ابدا
تحياتي
محمد

saad said...

معلش تتعوض واجى معاكو فى يوم تانى ان شاء الله

ahmed said...

انا زعلانه موت انى ماحضرتش اللقاء المرادى
وانتو عارفين انى من البايونييرز اللى بيحضروا اى لقاء
لكن بجد انا كنت مسافره ولسه راجعه امبارح بالليل مش شايفه قدامى
قولولى ان خالو التوكتوكى مابلغكوش سلامى واعتذارى عشان ابقلظه
اشوفكم دايما على خير

zaid said...

سبحان الله بقى انا اوصفلكم العنوان بالتفصيل
واقعد فى بيتنا ومجيش خساره والله بس كويس انكم اتبسطوا انا كمان زى فتافيت بس انا بغبطكم مش بحسدكم بقى