خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Mar 10, 2008

تسمحولى أجاوب التاج بقى ؟

أصدقائى الأعزاء
اليوم تتم المدونة عاما بالتمام والكمال
والحقيقة انا مش بعتبر يوم انشاء المدونة يوم 10 مارس بالتحديد
لأن انشاءها استغرق أيام وربما أسابيع
وعشان كدة هيتضمن شهر مارس بالكامل فقرات ذات طابع خاص
تمثل ملخص لعام كامل من التدوين
نيجى للتاج بقى
التاج ده عبارة عن عشر أسئلة اختارتهم لانى فعلا محتاج اكون رأى فى الموضوعات دى
والحقيقة التاج ده لقى صدى واسع جدا
سواء فى المدونات على بلوجر
او مدونات على مواقع استضافة اخرى زى مكتوب
بل الامر امتد للمنتديات والمواقع الشخصية ومواقع بعض المنظمات السياسية
وانا سعيد جدا لأن ده بالنسبة لى مقياس نجاح لهدف مهم جدا من اهدافى التدوينية
هو التواصل
وفى الواقع انا فكرت فى تجميع كل الاجابات فى كتاب إلكترونى واحد
تمثل إستطلاع للرأى العام للمدونين فى الموضوعات التى يطرحها التاج
بحيث انه يكون وجبة متكاملة للقارئ
ويستطيع عمل رؤية شاملة للموضوعات
وكمان كنوع من التحية للأصدقاء اللى جاوبو التاج
ودعم لأواصر الصداقة بين المدونين
وانا فى اللمسات الأخيرة لتصميم الكتاب
وبعد كدة هحملة على مواقع الداونلود المشهورة
ويمكن أى حد تحميلة
واللى يحب يساعد فى انهاء الكتاب ده ياريت
انا جمعت حتى الأن أكثر من 100 إجابة على التاج
بس فى مئات اخرى مش قادر اوصل لها
فياريت اللى جاوب التاج او يعرف حد جاوب التاج
يساعدنى بالاشارة الى لينك الاجابة فى تعليق او ايميل
يتبقى إنى أقول انا فعلا استفدت كتير من قراءة اجابات التاج فى المدونات المختلفة
صحيح فى بعض الاسئلة ما اقتنعتش اقتناع كامل بالردود
وما كونتش رأى قاطع
وبعض الاسئلة الاخرى غيرت وجهة نظرى وكونت راى
ياللى بقى تسمحولى أجاوب ؟

هل توافق على حزف خانة الديانة من البطاقة الشخصية ؟

أوافق ، فى الحقيقة للموضوع بالنسبة لى عدة أبعاد
إذا كان وجود خانة الديانة فى البطاقة الشخصية يتسبب فى حدوث بعض الاضطهاد من أشخاص متعصبين لا يتفهمون سماحة الدين الإسلامى ولا يقدرون معنى كلمة وطن ، فإن الرسول صلى الله عليه وسلم يقول " لا ضرر ولا ضرار " .. ولقد رأيت أشخاصا حولى ينظرون لتلك الخانة على إنها الحقيقة الدينية لصاحب البطاقة .. لدرجة ان احد الاصدقاء المدونين الاعزاء جدا المعروفين برجاحة الرأى قال : أمال لو واحد خطب واحدة مسلمة او اتجوزها تعرف ازاى انه مسلم مهوش بوذى او يعتنق اى دين أخر ... يا حلولى .. يعنى هو لا بيصلى ولا بيصوم ولا بيمارس اى شعائر تدل على دينة ، وبالتالى هى محتاجة تشوف خانة الديانة عشان تتأكد من ديانتة .. طب ياريته ما كان مسلم

والطريف فى الموضوع أن أغلبية الشعب المسلم يرفض حذف خانة الديانة من البطاقة الشخصية وأغلبية الشعب المسيحى يطالب بحذف الخانة ، وهذا لا يشير مطلقا الى ان المسلمين يعتزون بدينهم بينما المسيحين لا يعتزون ، وأنما يشير الى الضرر الذى ربما وقع من قلة على بعض الأقلية المسيحية

وربما الرافضون لإلغاء خانة الديانة ينظرون الى الموضوع من وجة نظر أخرى ، ويتخوفون من حدوث مشاكل نتيجة لذلك ، وربما يؤدى الحذف الى مطالبات اكبر ، وربما يكون وراء هذا المطلب طموح لطمس الهوية الاسلامية لمصر ، والحقيقة انا لا استطيع أن أراهن على نية أى شخص ويكفينى مدى شرعية منطقَه المُعلن

لكن رغم الراى السابق إلا ان فى رأى أخر أنظر له بجدية واحترام هو راى الصديق " مختار العزيزى" : إذا كان في تمييز فهو حاصل دون حاجة إلى خانة الديانة. التمييز عموما حاصل فى مصر لأن مبدأ العدالة غايب أو مفقود تماما لأننا مفيش عندنا تعليم ولا تربية ولا إعلام محترم، وده معناه أن التمييز قبل ما يكون عشان الديانة فهيكون عشان المحسوبية والرشوة والتوصيات والنفوذ والأساطير والخرافات إلخ مظاهر الفساد الأخلاقى والاجتماعى ، يعني باختصار التمييز الدينى يدوب له نصيب صغير من حالة الفساد العامة، فممكن نعالج المرض الأصلي اللي هو غياب العدالة وثقوب الضمائر يكون أفضل. ونترك الناس يهنأوا بالتعبير عن انتماءاتهم الدينية فى البطاقة الشخصية.

يعنى ربما يبقى فى أكتر من وجهة نظر وكلهم صحيح ، يا أما نلغى خانة الديانة ، يا أما نسير فى إتجاة تحقيق العدالة فى المجتمع ونشر ثقافة الحوار وإحترام الأخر

ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين؟

أبدأ بإجابة السؤال من الأخر ، أيوة .. لى أصدقاء ومعارف من المثليين
والحقيقة يبدو أن المثلية الجنسية تصنف إلى أنواع ولا يمكن النظر الى الموضوع بأعتبارة حديث عن فئة شاذة فقط ، لأننى بالاطلاع على حياة واراء ومدونات الكثير من المثليين وجدت ان هناك فئة تتصف بالصفة دى شذوذا وانحرافا عن الفطرة السوية ، وفئة أخرى تتصف بها لوجود خلل سواء نفسى او اى نوع من أنواع الخلل
من ضمن من عرفت من المثليين ، شخص تعرض للتحرش الجنسى فى صغرة ، ويقول انه حاليا لا يشعر بأى عاطفة ذكورية تجاة أى بنت ، وربما عندما يستجيب لعواطفة يجد أن عواطفة تتجه نحو الرجال


ومن المفيد جدا عند الحديث عن هذا الموضوع خبر قرأناه فى الصحف فى الأونة الاخيرة ، وهو يمثل الجدوى الحقيقة من مناقشة موضوع المثليين
الخبر يقول : لأول مرة فى مصر .. عيادة لعلاج الشواذ ، والعيادة قام بإفتتاح الطبيب المصرى : أوسم وصفى ، ويهدف البرنامج الذي يقدمه الطبيب إلى علاج المثليين جنسيا عن طريق تدعيم ثقتهم بأنفسهم ودفعهم للتواصل الإنساني، بعيدا عن التفكير في الجنس وإثراء الوازع الديني داخلهم، ودفعهم إلى ممارسة الرياضة
أما عن الأعتراف بالمثليين فأنا مندهش جدا من فئة من المثليين أصبحو يعلنون عن أنفسهم بفخر ، وأصبحت لهم مطالب يطالبون بها ، وكأن الموضوع تحول لديهم إلى شئ طبيعى يستحق الفخر
وعموما فإن المثلية هى حرية شخصية " و كل إنسان ألزمناه طائره فى عنقه و نخرج له يوم القيامة كتابا يلقاه منشورا اقرأ كتابك كفى بنفسك اليوم عليك حسيبا" سورة الإسراء

هل تعتقد بوجود إضطهاد للمسيحين فى مصر ؟

الحقيقة كلمة اضطهاد ربما تشير الا انه صفة عامة وفعل منظم لكن فى الواقع هو ليس ذلك مطلقا ، و حتى إذا قولنا أنه يوجد إضطهاد فهو من بعض ذوى الثقافات المحدودة ، أو العقول المتعصبة ، أو نتيجة للجهل بالأخر
وانا نتيجة لعملى فى شركة مملوكة لمسيحين وما رايته من تسامح وتقارب ومودة ونتيجة للتصحيح الذى قمت به لرؤيتى تجاة المسيحين فأرى ان البعض احيانا يسئ للإسلام بتعصبة رغم ان ممكن يكون التعصب ده ليس له أى أساس
مثلا : سمعت فى محطة مترو لما المترو جه محطة مارجرجس واحد بيقول بقرف محطة المسيحين اهى وهو بيشاور على الكنيسة
لكن عموما سعدت جدا لما عرفت ان معظم المسيحين مش حاسين انهم مضطهدين وانهم متفهمين لوجود حالة جهل عامة بين بعض طبقات المجتمع المصرى ، وإن أقباط المهجر وما يدّعونه من وجود إضطهاد منظم ومقصود لا يعبر إطلاقا عن المسيحين فى مصر

من هو الشخص الذى تختارة لرئاسة مصر ؟

!الدكتور : أحمد مستجير .. بس الله يرحمة
للأسف استمرار الحياة الغير ديمقراطية فى مصر عشرات السنين أدت لظهور أجيال كاملة غير ناضجة وغير مكتملة سياسيا وفكريا ، وأصبح من العسير جدا أن ترى شخصا يجمع من الصفات والخبرات ما أن يؤهلة لأن تعطية ثقتك وتختارة رئيسا للبلاد ، وحتى الأشخاص الجديرين صعب الوصول إليهم
وفعلا لو كنت أخدت حق الانتخاب ولو كان الدكتور مستجير موجود كنت أخترتة
لكن مبدئيا لو حصلت أنتخابات تعددية نزيهه ، بين مرشحين يمثلون التيارات المختلفة ويختار الشعب واحد اختيار حقيقى ، فأنا أمضى على بياض بموافقتى على الشخص ده

أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟

سأدعوا الكثيرون .. أيمن نور ، نعمان جمعة ، عصام العريان ، على عبد الفتاح ، أسامة الغزالى حرب وغيرهم ، وكل ممثلى التيارات المختلفة ، وكل خبرة وكفاءة بالذات فى المجالات الصناعية والعلمية والإدارية

فى رأيك الشخصى .. ما هى أفضل مدونة على بلوجر قمت بزيارتها ؟

للتدوين أقطاب زيه زى أى مجال أخر ، وأقطاب التدوين زى : وائل عباس ، ونوارة نجم ، وعبد المنعم محمود ، وغادة عبد العال ، ومصطفى الحسينى ، و نهى محمود ، واحمد فؤاد نجم ، واحمد على ، بيحتلوا مكانة خاصة عندى
لكن الحقيقة انا بنظر لكل مدونة على إنها وجبة متكاملة أو حزب سياسى أو تيار فكرى ، وبدى لكل مدونه جزء من التأمل ، وبحترم جدا أفكار المدونين حتى اللى بختلف معاهم جزئيا أو كليا ، وبحرص على قراءة السطور وبين السطور كمان ، لكن بحكم الوقت مش بقدر أسيب تعليقات الا فى قليل جدا من المدونات

للذكور فقط : أيهما تفضل كزوجة .. إمراءه عاملة ، أم ربة منزل ؟
أفضل ربة المنزل بإعتباراها المهمة الفطرية التى خلقت لها المرأة ، رعاية الزوج والأولاد وبث الحنان والدفء فى المسكن ، لكن طبعا احترم المراءه العاملة لظروف قهرية ، يعنى مثلا أمى كانت سيدة عاملة لوفاة والدى فى صغرنا وأظن ان ده شئ نبيل نقدرة كلنا ، لكن العمل من أجل المساواه وتحقيق الذات والبطيخ وغير أرفضة تمام واعتبر المتحدثين عنه يعانون من العقد النفسية

اذا تزوجت وأنجبت ولدين وبنتين .. أى الأسماء تحب أن تسمى ؟

من الأولاد : زياد ، عمر
من البنات : همس ، نورا

هل تعتقد أن توريث الحكم فى مصر . . سيتم فعلا أم لا ؟

أشعر أن توريث الحكم سيتم فعلا ، ربما على بطريقة تمنحة بعض الشرعية مثل تقديم الحزب الحاكم لمرشحة ، وعدم وجود مرشحين على مستوى منافس وهكذا ، وادى الايام بيننا

فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

أفضل إنجاز : الحفاظ على مصر من حدوث أى حرب أهلية والمحافظة على الأمن العام بصورة مقبولة ، كذا توفير مساحة معقولة من الحرية الفكرية
أسوأ عمل : القوانين المقيدة للحريات مثل قانون الطوارئ والاعتقالات ، والاستمرار فى الحكم حتى الأن ، وربنا يستر بقى

وأخير وليس أخرا
أشكر كل اللى جاوبوا التاج سواء انا وجهت لهم الدعوة
أو قام بالمهمة دى شخص أخر
ولسه الفرصة مفتوحة للجميع إنهم يجابو على التاج
وأشكر لكم الإهتمام ، وأعتذر عن تأخرى فى المتابعة والتعليق
لكن والله كل أصحابى فى بالى دايما
ومستنى ردود الناس اللى تحب تساعدنى فى تجميع إجابات التاج
مع خالص تمنياتى

أحمد الصباغ

92 comments:

ftafeet said...

ياخالو ياجااااااااااااامد

ايه الكاريكاتير الجامد الفظييييع الرهييب ده ياعمونا

لا وايه مجاوب اجابت بقى ايه جبت من الاخر انا هاعتزل التدوين واعد فى بيتنا استنا عدلى
خلاص بعد كلامك مافيش كلام

لا بجد بجد جامد ياخالو ياحبيبو


نوناااااااا

ftafeet said...

هييييييييييييييه انا كنت اول كومنت اه صحيح كل سنه وانت الومدونه بخير ودايما معانا ياخالو ياقمر انت ياسكر

ياحلو وش بيلعب حواجبو

وهديتى ليك بقى ياحبيبو انا هاساعد فى تجميع اجابات التاج يلا ياعم هيص افرح

وانا اعده بغنى اغنيه
مين حبيب خالو اناااا
مين روح خالو انااا


باااااى

أحمد منتصر said...

ممممممممممم في تشابه كبير بين إجاباتك وإجابات مختار العزيزي

http://unbrainwasher.blogspirit.com/archive/2008/02/13/new-tag-from-ramiz.html

تحياتي :)

Rehab Mostafa said...

كل سنه وانت ومدونتك طيبييين يا خالو
أنا عيد ميلاد مدونتي كان امبارح9-3سنه اولي وعملت احتفال كبير وكان فيه تورته كمان وروح الحق بقى :)

كل سنه وانت بتدون وبتدستر يا خالو أحمد


ملحوظه: أنا بعتذر عن عدم اجابتي للتاج :)

Anonymous said...

احمد..مش عارف حتفتكريني ولا لأ كل سنه و البلوج بتاعك بخير وبجد حلو اوي البلوج بتاعك وانا بتعلم منو حاجات كتير .. انا اتشرفت بيك جداا .. كريم

مستــ ج ــــدة said...

موفق إن شاء الله

كرياكو said...

خالو احمد
كل سنة وانت بخير ويارب تشوف كدة كتكيت المدونة الصغيرين

على فكرة عجيتنى اجاباتك اوى
وستفت منها كتير اوى

تمنياتى لك بتوفيق

عبدالرحمن فارس said...

عيد ميلاد سعيد

________


أتفق معاك في الكثير من اجاباتك

وبشده في موضوع خانة الديانه دا


_____

محبتي

دكتور حر said...

الله ينور يا خال

بقى كده

حاسس ان التوريث هيحصل
ياراجل
تفاءلوا بالخير تجدوه

واللي تختاره للرئاسه يطلع ميت
انت بتثبت كلامهم??

(:
يا عم تاجك وانت حر فيه
ربنا يكرمك يا خال

SKOBL- Little Lazy Me said...

كل سنة وانت و المدونه بخير زز و عقبال مليون و ستماية و تسعة و سبعين الف خمسماية و اتناشر سنة :)

اجندا حمرا said...

صديقي العزيز أحمد

اول ألف مبروك علي مرور عام علي مدونتك الجميل و يارب نيجي كل سن و نحتفل بيها و تفضل متألقه دايما

اجابات التاج عجبتني كلها
موضح فيها وجهه نظرك من غير تعصب و بأستفاضه و ده عجبني اوي

بحييك و بتمني ليك مع دخول تاني سنه تدوين مزيد من الـتألق و الموضوعات الجميله اللي دايما بتسعدنا و بتعجبنا

تحياتي ليك احمد

ابن حـجـر الـعـسـقـلانـى said...

أحمد باشا أبو الصبابيغ .. أو أبو المخاليل زى ما بتحب

يا عم كل سنة و انت و مدونتك طيبين و فى نجاح و تقدم مستمر .. و يا رب أشوفك رئيس تحرير مجلة "المدون العربى" يا رب .. بس طبعا دة لما يبقى فيه مجلة موجودة بالاسم دة أصلا

بص يا صباغ ..أنا قابلتك مرتين فقط .. بس بعد التاج دة .. انت اختصرت عليا بتاع عشرين مقابلة تانى عشان أعرفك أكتر .. و بجد احترامى لك يزداد يوما بعد يوم

و بخصوص التاج .. أنا كنت فاهم إنى لازم أجاوب التاج على المدونة اللى أنا باكتب فيها .. بس أنا ما قدرتش لأن تتابع الموضوعات على المدونة جعلنى أؤخر التاج .. لكن لو ينفع أجاوب التاج و أبعته ليك على الإيميل ابقى قول لى لأنى بجد التاج دة مثير جدا و أنا حابب أجاوبه .. لكن لو لازم أجاوبه على المدونة يبقى هايتأخر شوية كتير الله أعلم لحد إمتى

و بالتوفيق يا ابو المخاليل
أخوك أبو العساقيل

مدحت محمد said...

شوف انت عملت التاج وكان ردك موضوع جدا يااحمد
كل سنة ومدونتك طيبة يااحمد
بقلك البنات اللى فى مدونتى امانة فى رقابتك
تحياتى

قلب الأسد said...

كل سنة و مدونتك بخير يا معلم .. حلو التاج .. بس:العمل من أجل المساواه وتحقيق الذات والبطيخ !! بطيخ يا أحمد!!انت كنت قسم خضر و لا ايه؟؟ شوف : كل امرأة هي اللي بتحدد تحقيق ذاتها هيكون في ايه.. لما واحدة تشوف تحقيق ذاتها في بيتها نرفع لها القبعة و نقولها جو أون.. انما لو شايفة حاجة تانية هي حرة و سيبها تمارس حريتها .. أحمد انت ديكتاتور :))

مهندس مصري said...

أولاً كل سنة و انت طيب انت و مدونتك
:)
و متفق معاك في حاجات كتير يا أحمد
بس بجد انت ليك اصدقاء مثليين و لا مجرد معارف
أصل كلمة أصدقاء دي كبيرة يا احمد
و انت ما جاوبتش بشكل مباشر على سؤال هل توافق على مشاركة الإخوان المسلمين و الأقباط
:)
بس جاوبت بشكل غير مباشر

و أعتقد ان تحقيق العدالة افضل 1000 مرة من حذف خانة الديانة

بس بجد حلو الكركاتير ده
:)

هبههههووب said...

اذيك يا خالو احمد الصباغ
كل سنه وانت بخير ومدونتك بكل خير وتوالينا بالجديد دايما
الى الامام يا خالو

بت خيخة وأى كلام said...

انت ليك اصدقاء من المثليين؟؟؟؟؟؟؟؟
وانت عارف انهم مثليين؟
وهما عارفين انك انت عارف انهم مثليين؟
يعنى الحياة حلوة كدة وبتتقابلوا وتخرجوا
مش فاهمة يعنى ايه اصدقاء من المثليين دى
اللى انا اعرفه ان المثليين مش بيبينوا نفسهم لحد


عموما ماشى
ولو انى كنت عشمانة الاقى اسمى مكتوب وسط المدونات اللى انت بتفضلها
لكن عموما
انا هامشى على مبدأ
لا تجعل ندالة الصباغ تكشف عن ندالة خيخة

واعتبر نفسك مرفود من التشكيل الوزارى
حلو اوى اسم همس
على فكرة خالد صاحب مدونة همس الاحباب
بنته اسمها همس
وتقريبا هو جاوب التاج بتاعه
ابقى خد اجاباته وحطها فى الكتاب بتاعك
هتلاقى اللينك بتاعه عندى
يلا سلام
اختك خيخة

بت خيخة وأى كلام said...

اه صحيح
كل سنة وانت طيب ومدونتك طيبة يا ابو حميد

Desert cat said...

اجابات هايلة ياا حمد منتهى العلاقنية
من اجمل الاجابات اللى قريتها على التاج ده وبدون اى مجاملة

د/اجدع بنوته said...

ربنا يديك الصحه ياخالو

تسللللللللللم

تاج فعلا معمول بفن

ماطبيعى ماهو انت اصلا اللى عامله

لازم تلبسه صح

بجد ولا اروع

تحيااااااااتى

وياريت السنه كلها تبقى مارس

علشان نشوف التميز ده

آفاق الحرية said...

السلام عليكم
ايه ياعم التاجات الجامدة ده
انا رايي تجمعها وتنزلها في معرض الكتاب الجاي ان شاء الله
ونعمل ندوة خاصة بالمدونين فقط
بس بصراحة الكاريكاتير فظيع

عاليا حليم said...

كل سنة و انت طيب يا خالو
اجاباتك مميزة ككل اجابات على التاجات السابقة
بسس استغربت من اجابتك على موضوع المرىة العاملة
مش كل امرىة عاملة بتعمل عشان فى دماغها المساواة و البطيخ فيه بيحبوا كده و بيلاقوا نفسهم فى مجالات معينة مش معنة كده انهم معقدين نفسيا زى ما قلت

يعنى انا مثلا مصممة جرافيك و صحفية عشان انا بحب كده مش عشان عايزة اتساوى بالراجل و لا حاجة ابقى معقدة نفسيا ؟

عصفور المدينة said...

من فحت حفرة لابن أخته وقع فيها
:)

ammola said...

كل سنة وانت طيب
المثلية حرية شخصية!!!!!!!!!؟؟؟؟؟؟؟؟
طيب حاولت تعرف رأى الدين فى كده؟
بلاش... نشوف الناس اللى خلوها حرية شخصية-بلاد برة يعنى - وصلت بيهم لاى مستنقع
وبعدين ما دمت شايف انها حرية شخصية ليه بتستنكر انهم يعلنوا عن انفسهم ما دامت اى حرية شخصية لابد وان تكون مكفولة ومحترمة من المجتمع؟
انا معاك طبعا ان فى "بعض"حالات المثلية بتكون نتيجة مرض نفسى ويلزمها علاج لكن ما عدا ذلك فهو انحراف عن الفطرة وسوء استخدام"للحرية الشخصية" ومستهجن حتى من عقلاء الغربيين
الاية التى قمت بالاستشهاد بها هى فى الوضع الاخروى انما فى الدنيا يلزمنا ان نكون اكثر تحديدا لما يعد معصية صغيرة او كبيرة من الكبائر التى قد تستلزم اقامة حد عليها والا لوكان الامر كذلك لالغيت الحدود فى الاسلام من منطلق ان"كل انسان الزمناه طائره فى عنقه"ولما كان هناك اى مؤاخذة فى الدنيا على الاجتراء على حدود الله
ارجو الا اكون اثقلت عليك ومرة اخرى كل سنة وانت طيب وتثرى التدوين

Sola said...

ana awel mara agy hena bas i read alot of ur comments
ya fandem happy anniversary for ur 1st year 3o2baln ya rab
o bgad lama la2etko kolo as blogers meet each others i wished i was in egypt 2 meet all of u
salam ya basha

مثلية فقط said...

الله يعيطك العافية عالى المدونة المهضومة
إسمحلي عبر عن إعجابي و إحترامي لتعليقاتك على التاج خصوصا موضوع رأيك في المثليين
إحترامي و تقديري لرأيك

خالص تحياتي

only spot said...

السلام عليكم
بجد احيك على اجاباتك واعتقد ان تحيتى لا تقدم ولا تؤخر لانك تستحق ذلك حقا وكل سنه وانت دايما متالق وبنستفيد من مدونتك الى بجد بعتز بزيارتها جداااا
واكيد متفقه فى النقط الاساسيه معاك وومنها موضوع المثليين وايضا الاضطهاد واعتقد ان هناك خلط واضح ممكن يكون متعمد او غير متعمد بين الدين كدين وبين الافراد كحاملى ديانه وللاسف القضيه دى ربنا سبحانه وتعالى جزمها فى قوله كل نفس بما كسبت رهينه بمعنى انى مسلم اينعم بس ممكن اكون لا بعامل الناس كويس وده اساس الدين وقاسى وسليط اللسان ومش بصلى ولا بقرى قران معنى كده ان الاسلام دين وحش او حتى المثل ينطبق على المسيحيه لدى اصحاب مسحين منهم العلمانين ومنهم المتدينين معنى ذلك ان المسحيه دين وحش للاسف احنا ثقتنا اهتزت بسبب رؤيه الغرب الغير سويه لينا واصبحنا نصدق كلامهم دون وعى ومناسبة الكلام ده دار حديث بينى وبين طالب المانى الجنسيه يتساءل مندهشا اننا بندعى الاسلام رغم ان اعلامنا ملئ بالمذيعات الاتى لا يرتدين الحجاب فكيف اذن هذا الدين المتناقض الذى يامر بالحجاب ولا يتردى اصحابه الحجاب كان ردى ان الاعلام فى كل الدنيا مضلل بعد الاحيان ثم اننا لو اخذنا بهذا المنطق فان العذراء فى صورها ترتدى الحجاب فمعنى ذلك ان ديانتك مضلله لانه كان مسيحى الديانه
عموما بجد اعتذر عن الاطاله وتقبل منىخالص التحيه والتقدير

only spot said...

معلش بس عندى طلب يا ريت لو فيه ندوه او اى لقاء ثقافى يتم التنويه قبله بفتره لان هناك من يحب ارتياد لك الندوات والدال على الخير كفاعله واكرر اعتذارى للازعاج مره اخرى
سلام

fatima said...

كل سنة و مدونتك بخير و تألق
يا خالو ...
مدونتك من الجهد المبذول بها و ثرائها تبدو لو كانت عمرها خمس سبع سنين موش سنة واحدة بس ... و دا أذا دل فيدل على إنك إنسان مجتهد و بتحب اللى بتعمله و تقوم بيه بذمة ....
إجاباتك عجبتنى طبعا فيما عدا موضوع أصحابك المثليين دول عشان أنا عندى حساسية من الموضوع دا ... بس طبعا كل واحد حر فى أختياراته و نظرته للأمور ....

كل سنة و انت طيب
و السنة الجاية تاخد لقب نقيب المدونين بالإجماع
تحياتى الخالصة
مامت يوسف

حمادة زيدان said...

صباغ
هابي بلوج داى
ههههههههههههههه
كل سنة والمدّونة وصاحب المدّونة وزوار المدّونة إحنا طبعاً بخير وعقبال مليون سنة تدوينيه يا معلم

Ahmed Al-Sabbagh said...

ftafeet

هههههه

ما بتصدقى انتى عشان يجليك عدل

لأ ما تعتزليش التدوين ما نقدر على فراق نونا فتافيت

وميرسى على الكلام الحلو

Ahmed Al-Sabbagh said...

ftafeet

وكمان وش بيلاعب حواجبة

لا انا مخاليلى بيغيروا وممكن يقطعوكى

كل سنة وانتى طيبة يا كميلة

Ahmed Al-Sabbagh said...

أحمد منتصر

ياعم بص كويس ده احنا مختلفين فى كل الاراء
ولا انت عشان لقيتنى استشهد بكلمتين من عندة

اقرا تانى يا احمد

Ahmed Al-Sabbagh said...

Rehab Mostafa

كل سنة وانتى طيبة

وكمان اكبر منى بيوم

:)

Ahmed Al-Sabbagh said...

Anonymous

كريييييييييييييم

بجد انا سعيد اوى انى اتعرفت عليك فى المناسبة الجميلة دى

وسعيد اكتر انك جيت وعملت كومنت

ياريت لو جيت تانى تسيب لك ايميلك

او تكلمنى على ايميلى الموجود فى المدونة

ميرسى يا كريممم

Ahmed Al-Sabbagh said...

مستــ ج ــــدة

ميرسى اوى يا حنان

Ahmed Al-Sabbagh said...

كرياكو

ميرسى ربنا يخليك يارب

وما يحرمنى منك

Ahmed Al-Sabbagh said...

عبدالرحمن فارس

ربنا يخليك يا عبد الرحمن

وياريت اشوفك قريب

وحشتنا يا اخى

Ahmed Al-Sabbagh said...

دكتور حر

ههههههه

حاضر هتفاءل

بس انت متفاءل ؟؟

Ahmed Al-Sabbagh said...

SKOBL- Little Lazy Me

يااااااااااه

كل ده

ربنا يخليك يا اخى

Ahmed Al-Sabbagh said...

اجندا حمرا

كل سنة وانتى طيبة يا جميل

وميرسى اوى على الكلام الجميل

Ahmed Al-Sabbagh said...

ابن حجر العسقلانى

ربنا يخليك يا صديقى العزيز

وانا كمان فكرتى عنك حلوة اوى

ومعزتك عندى كبيرة اوى

متجمعين فى الخير دايما

Ahmed Al-Sabbagh said...

مدحت محمد

ماشى يا ابو البنات

ما انا قولت لك انا ناوى اعمل ايه

ولا لازم اسيح هنا

ههههههههه

Ahmed Al-Sabbagh said...

قلب الأسد

مناااااااااار

ههههههه

ايوة بطيخ فى حاجة

لأ ما كنتش قسم خضر

بس طموحاتى كلها غذائية

:)

Ahmed Al-Sabbagh said...

مهندس مصري

لأ جاوبت على السؤال ده

والاشخاص اصلا اللى مختارهم فيهم اقباط واخوان

موضوع الاصدقاء من المثليين ده واقع

يعنى حقيقة بقولها مش رأى عشان تعترض عليه

كل سنة وانت طيب يا حبيبى

Ahmed Al-Sabbagh said...

هبههههووب

وانتى طيبة يا هبهوب

ميرسى يا جميل

Ahmed Al-Sabbagh said...

بت خيخة وأى كلام

اكيد مدونتك من احلى المدونات عندى

بس ايه سر اعجابك باسم همس

انتى رخمة اوى ؟

Ahmed Al-Sabbagh said...

بت خيخة وأى كلام

وانتى طيبة يا احلى خيخة

Ahmed Al-Sabbagh said...

Desert cat

شكرا يا حنان

ربنا ما يحرمنى منك ابدا

Ahmed Al-Sabbagh said...

د/اجدع بنوته

ربنا يخليكى يا دكتورة

ايوة مش تاجى

يعنى مقاسى
هههههه

Ahmed Al-Sabbagh said...

آفاق الحرية

ميرسى ربنا يخليك

بس عايزينك كدة تحضر معانا مرة ونتكلم

Ahmed Al-Sabbagh said...

عاليا حليم

ميرسى يا عاليا

لا طبعا

انتى ست الكل

انا عارف طبعا ان فى عقول متفتحة والواحد بيتشرف ويتعلم منها

لكن للاسف قابلت شخصيات غير كدة

:)

Ahmed Al-Sabbagh said...

عصفور المدينة

عاااااااااااا

Ahmed Al-Sabbagh said...

ammola

بصى يا امولة

نتفق مبدئيا ان أى ذنب يقوم به الانسان او معصية لله تدخل فى نطاق الحرية الشخصية

لأن ببساطة الانسان مخير وليس مسير

وتنتهى حدود الحرية الشخصية عند المجاهرة

بمعنى انا من حقى اشرب خمرة

فى بيتى فى بار فى خمارة

ده هيبقى انعاكس لأخلاقى مش اكتر

لكن مش من حقى ان اشرب خمرة فى الشارع
او اعمل بوستر اعلقو على بيتى واقول

هنا احمد اللى بيشرب خمرة

دى وجهة نظرى ببساطة

ولا انتى رأيك ايه ؟؟

Ahmed Al-Sabbagh said...

Sola

thanks sloa

i am happy to contact with yo u

and we wish to meet you too

thanks again

Ahmed Al-Sabbagh said...

مثلية فقط

ميرسى

اشكرك على كلامك الجميل

Ahmed Al-Sabbagh said...

only spot

اولا تحيتك تقدم كتيييييير

وتشرفنى

واعتبرها تاج على راسى

ثانيا الكلام اللى قولتيه ده

بجد يدل على فكرك المتألق

وشخصيتك الجميلة

اشكرك يا شيكو بجد على الكلام المشجع

Ahmed Al-Sabbagh said...

only spot

حاضر اوك

هعمل اعلان

Ahmed Al-Sabbagh said...

fatima

عزيزتى مامت يوسف

فى الحقيقة كلامك دة وسام على صدرى

وايضا مدونتك من المدونات اللى بعتز بيها اوى

ميرسى اوى

Ahmed Al-Sabbagh said...

حمادة زيدان

وكل سنة وانت طيب وجميل ونبيل يا حمادة

ربنا يخليك

مشتاق لله said...

السيد احمد اولا افتقدت مرورك في مدونتي لان رايك يهمني -ثانيا انت قلت قرارك بشائن حذف خانة الدين من البطاقة -انا لست مصريا واعتز جدا حينما يقرء احدهم انني مسلم علي بطاقتي -ولست ادري ماهي ظروف مصر الحاليه ولا النية من وراء اثارة الامر لكني علي يقين ان احدا من المدونين لم يثير حتي ولو بشكل ملاحظة الصلبان الظخمة التي يلبسها الاقباط علي صدورهم -ثانيا يوجد من نسميه في الطب بالسجين الكيميائي وهو من حدث خلل ما في تركيبته الجسميه واصبح لايفرق بين ميوله الذكورية والانوثية -هناك درساات جادة ونتائج طيبة قام بها علماء نفس سعوديون للعلاج والامر اصبح والحمد لله متاحا ويكفينا قول الرسول صلي الله عليه وسلم الخير عادة والشر لجاجة ومن يتقي الشر يوقه -اما ان تقول في حياء ان المثلة حرية شخصية فانتظر يااخي حتي يطرق بابك احد اولادك يوما ما منهارا امامك وقد مارس الفاحشة مع احد الذئاب ستقول له بهدوء انت حر -ولنضرب بعرض الحائط كل احكام الله لنقول انتم احرار اختاروا -بالفعل لايمككنني ان احاسب انسانا علي مرض ان افترصنا ذلك مرضا لكني لااسمح له ان ينشر المرض ويهلك الحرث والنسل -اما عن الاظطهاد انا زرت مصر كثيرا ورئيت ان الاقباط يعيشون حياة اكثر رفاهية من المسلمين -اما عن الزواج فرزقك الله بسيدة بيت طباخة ونفاخة وولادة اذا نظرت اليها سرتك ورزقك منها الذرية الصالحة وابعد عن ذريتك الشواذ جنسيا -اما من يحكم مصر فارجو ان تختاروا ذلك في صناديق اقتراع شريفه ونظيفة -شكرا لانك سمحت لي بالدخول وارجو تشريف مدونتي

Abd-Alrahman & NOUR said...

حبيبي احمد بيك
كل سنة والمدونة وصاحبها طيبين
نورتني يا حبيبي
وعلي فكرة التاج بتاعك جميل اوي وانا اوبت عليه قبل كدة بس ممكن تقولي انت جيت ورديت عندي ولية ما جاوبتش علي التاج الي مررتهولك يا حبيبي
انا علي فكرة مررت لك اخر تاج الي هوة حاليا مجاب عليه في مدونتي واتمني اشوف اجابتك عليه

عبدالرحمن

ammola said...

الله ينور
الكلام كده يبقى فى سياقه الصح
الف سلام للحوار الراقى

الدائخ said...

عقبالنا لما نحتفل بعيد ميلادنا

كل سنةو أنت طيب

بس بالنسبة للتاج
آسف إني ما جاوبتوش
الواحد خبرته لسه قليلة ف الدنيا و صعب كون رأي قاطع و حاسم

علي كل مبروك سنة كاملة تدوين

أسامه يوسف said...

انا جاوبت عالتاج بس بسرعه
وبالنظر لإجاباتك المتكامله على عكس إجاباتى اللى كانت باقتضاب
يبقى أنا ما جاوبتش

تحياتى يا خالو

ابو مفراح said...

السلام عليكم
و حشنى كتييييير
هوة فعلا تاج فى الضياع
ههههههههههه
تحياتى ابو مفراح

Eman Eltaher said...

الواحد مش بيلحق يعلق عندك
انت حطيت البوست بتاع اللقاء ده امتى ؟؟
ملحقتووووووش
كله م النت بتاعى
معلش ملحوقة
بخصوص اللقاء
انت كنت هايل ف ادارة الحوار و اللقاء بأكمله كان ممتاز و ان شاء الله المرات اللى جاية يكون العدد أكبر كمان و الاستفادة اكتر
بس فيه حاجة
.
.
لأ فيه مشكلة مش حاجة
.
.
انى ان شاء الله داخلة على مشروع شغل و مش هيبقى عندى أجازة السبت
مينفعش تعملوا اللقاء يبقى يوم الجمعة ؟؟؟
و بعدين انا عندى اقتراح كمان
يوم المولد النبوى الشريف

مينفعش اننا نتجمع كلنا المدونين المسلمين و المسلمات و نحتفل بيه بطريقة ذكر الأحاديث النبوية فى سياق دينى جميل

ده على افتراض كمان انه الشغل الخاص بيبقى فيه اليوم ده أجازة !!!!!
ياللا ربنا يستر

بس بجد لو مفيش لقاءات هتتعمل الجمعة ده معناه انى مش هعرف اجى تانى و اتنور بيكم

حاول و كان ينفع ومناسب للباقى

آلام وآمال said...

هايل يا خالو
اولا كل سنة وانت ومدونتك بخير
وعلى فكرة الدكتورة خمسة فضفضة بردو النهاردة مدونتها تمت سنة ولسة جاي من عندها حالا

بالنسبة لأسئلة التاج واجاباته انا كمان بصراحة استفدت كتير من الاجابات اللي قرأتها عند مدونين كتير
وقدرت اكون رأي حلو الى حد ما عن الموضوعات اللي في التاج
مع اني مجاوبتوش لسة بس حقيقي استفدت منه

جزاك الله خيرا

انا ليا تعقيب بسيط بس لو تسمح على اجابتك على سؤال المثليين
بتقول انها تعتبر حرية شخصية
طب اذا كان فيه جزء منهم مرضى زي ماذكرت يبقى ازاي تعتبر حرية شخصية

وتقبل تحيتي العميقة
:)

مجداوية said...

ما شاء الله ربنا يجمعكم دايما على الحب والخير وطاعة الله ,,كل اجاباتك جميلة على التاج ما عدا ان خانة الديانة تحذف ,,لأن مش دلوقت تحذف هى ممكن تحذف لما نحسن اختيار أسماء أولادنا ونسمى بأسماء اسلامية مش نسمى بناتنا ديانا وماهينور وشافكى وسوزى أو أولادنا فادى وفكرى وصبحى ولما كل بنت مسلمة تتحجب ولما كل شاب مسلم أثر الصلاة والتقوى تبان عليه فيعرف من وجهه انه مسلم ومن لبسه انه مسلم مش يكون اسمه محمد ولابس بنطلون ساجى واقع منه وملزق شعره بالجيل ولابس اكسسوار ولا البنات وصحيح أن النصارى لهم سحنة خاصه بيهم ولا تخطأها العين ومش محتاجة تبص فى البطاقة عشان تعرف انه مسيحى لكن للأسف المسلم هو اللى دلوقت محتاج تبص فى البطاقه عشان تعرف اذا كان مسلم ولا لأ ..وقتها ممكن نلغى خانة الديانة ,,ولك تحياتى

خبيب said...

إجابات جميلة

عموما .. مسألة البطاقة الشخصية مسألة توثيق في ظل مسلمين - زي ما انت قلت - لا بيروحوا المسجد ولا بيلبسوا حجاب - بنات - ولا فيه أي علامة نعرف بيها

لكن يبقى إنهم مسلمين موحدين وتسري عليهم أحكام الإسلام

وبالتالي ..

حذف الخانة هيعمل كارثة

زي توثيق الزواج اللي احتجناه لما الناس كترت .. الخ

وعشان كده أصلا أنا مش فاهم قصة كتابة "بهائي" في خانة الديانة ؟

هو بيقول أنا مش مسلم ، ليه يتكتب مسلم في خانة الديانة ؟ غلط

---

بالنسبة للمثلية ..

هارد عندي إن شاء الله

---

تقبل تحياتي

عاليا حليم said...

طب يا سيدى اديك قابلت شخصيات من النوع التانى :))))

EmY said...

ايه يا راجل ده اتصورت امتي نسخه منك يا شيخ
واحشني يا صباغ مختفي فين
جميله اجاباتك و التاج عجبني اوي انا جاوبته طبعا ماقدرش ماجوبش علي تاج انت الي عامله

تحياتي يا ابو المخاليل

احمد الجيزاوى said...

اولا هذا التعليق اعتذار على موعد يوم الجمعه
بس انا شرحت الاسباب واعتقد انك تفهمت ولكن بردة يبقه ليك عندة عظومه على البورصه ماشى يا جميل

احمد الجيزاوى said...

اما هذا العليق فهو الف مبروك على المدونه يا خالو
وعوزين دة شعار زى روتنا
صباغ مش هتقدر تشوف النوم حاجه كدة
كل عام تدوينى وانت بخير

عاشقه الفردوس said...

اجابات دبلوماسيه وصريحه

حسن توفيق said...

اخى الفاضل -- اختى الفاضلة
ادعوكم للتضامن مع دعوة الداعية الاسلامى الكبير ( عمرو خالد )والانضمام
الى ---- ( حملة حما يه ) ------
فى انتظاركم ولاتترددوا نحن فى حاجة اليكم
برجاء التواصل للمساهمة وشكرا لكم مقدما....للمزيد يمكنك زيارة مدونتى
او زيارة موقع عمرو خالد مباشرة

amraction said...
This comment has been removed by the author.
محمود المصرى said...

بسم الله الرحمن الرحيم

تحياتى لحضرتك يا استاذ احمد وهذه اول مرة اتشرف بالتعليق فى المدونة ولى بعض الملاحظات على الكلام لو تسمحلى
بداية احب ان اوضح ان العقلانية والنضج الفكرى والسياسى لا يعنى تبنى موقف سياسى وفكرى معين من الاخرين , فمن الممكن ان يخالفك فى الرأى الذى تراه موقف صحيح من هو فى الحقيقة اكثر منك نضجا واوسع افقا فكرا وسياسة , فأى موقف لا يمكن الحكم من خلاله ببساطة على صاحبه بالقصور الفكرى او التخلف السياسى او ما الى ذلك
ثانيا بالنسبة لحذف خانة الديانة من البطاقة هو فى الحقيقة لا داعى له , فيكفى ان يسأل اى شخص عن اسمه الرباعى واكيد لو مسيحى هاتلاقى وديع او جرجس او حنا او مايكل او اى اسم تعرف ان صاحبه مسيحى , وحتى دون السؤال عن الاسم سترى الصليب المدقوق على رسغ اليد اليمنى والصلبان المعلقة على صدور المسيحيات ولبس المسيحيين الرجال للسلاسل الذهبية او الخواتم الذهبية بصورة ملحوظة , فالمسيحيين يحرصون على اظهار هويتهم الدينية وبالتالى حذف خانة الديانة لا معنى له , اما وضع الاقلية المسيحية فى مصر فبصراحة دا موضوع لا يمكن اختزاله فى جواب على سؤال بسيط بخصوص خانة الديانة .
تحياتى مرة اخرى لحضرتك ومبروك مرور عام ناجح على المدونة وبالتوفيق

Lc said...

NICE BLOG. I LOVE EGYPT.

Hello from Faial Island - Azores.

Come and meet our beautiful island in the middle of the Atlantic...

http://rotadashortencias.blogspot.com/

Leave me a comment, to keep in touch.

حزيــــــــــــــــــن said...

كل سنه وانت بخير
وربنا يجعل المدونه نافذه تفيد الناس

الفاتح الجعفري said...

حبيب قلي الغالي
ربنا يحفظك يارب
طبعا بااختلف معاك في بعض الاجابات لعلها اول اجابه
طيب هو مثلا الخانة دي هتستغل ازاي في التعصب مثلا؟
يعني مثلا هجيب البطاقه واحطها في وش واحد واقول انت مسيحي وانا مسلم
وليه اصلا الموضوع اثير في الفتره الاخيره؟
وليه ايضا النصاري يوافقون عليه بشده؟
بصراحه انا والله لاضطهدهم ولااؤذي احد منهم ولكن ليه
الا يعتز كل منهم بدينه؟
ولكنها خطوة مهمه في الغاء الماده الثانيه من الدستور
التي يطالب بها الكثير للاسف
والموضوع له ابعاد كثيره
ولكن رؤيتك طبعا لها كل الاحترام
---------
ولاتنسانا من صالح دعائك
وجزاكم الله خير

أحمد سعيد بسيوني said...

اجابات مميزة

صاحب المضيفة said...

كل سنة وانت طيب يا خال


ويارب دايما في طاعة وسعادة




ومترقبين الكتاب الالكتروني ده


ان شاء الله هايطلع حلو مدام من ايدك الحلوة



تحياتي

Miss Dot said...

انا عاوزه اقول كل سنه وانت طيب يا احلي خالو ف الدنيا
اكيد خالو اليكتروني

المهم
انا مبسوطه من الاجابات
و مقتنعه بكتير منها
و بخصوص السؤال اللي اثار جدل =كأني بتكلم علي سؤال واحد=
انا بصراحه قلت بلاش اقول رأيي بصراحه
لاسباب معروفه
و اسباب تانيه ان اصحابي اللي ف الكليه بيدخلوا علي المدونه
و طبعا ماينفاعش ادخل وعاهم ف نقاش ف النقطه دي
عشان كده مرضتش اقول لكن اجابة الشؤال ده عندي ف درافت
;)
كل سنه و المدونه طيبه
و يا ريييييييييت ترجع تزورني
انا بجد مفتقده اراءك
و آراء د. حماس
و نضال اللي مبيسألش

نوجا
ميس دوت

خمسة فضفضة said...

السلام عليكم ورحمة الله وبركاته

تخيل يا احمد قريت البوست ده من اول ما نزل وتخيلت اني علقت عليه وجايه اشوف ردودك علي لتعليقات اكتشف اني ماعلقتش
عااااااااااااااا

مش عارفه ايه الزهايمر اللي بقيت فيه اليومين دول ، معلش بقي

كل سنة وانت طيب وعقبال مليون سنه تدوين
حلوه اوي اجاباتك عن التاج ولاونها دبلوماسيه حبتين


كل سنة وانت طيب كمان مره


تحياتي

وينكى said...

ههههههههههههههههه
اولا كل سنه ومدونتك طيبه وعقبال المئوية
تانيا.. انا متفقه كتير قوى مع آراءك , لو اخدت بالك من التاج اللى جاوبته عندى
وان كنت انت شارح ومفسر وواخد راحتك على الآخر.. وارغى يا عم الأمور
تالتا: بجد انا زعلانه منك جدا.. لأنك واحد من الناس اللى كلمتهم عشان يحضروا حفلتى وماجيتش
ادخل واقرا البوست اللى انا كاتباه
رابعا: بس بقى كفايه رغى
:)

البنت الشلبية said...

كل سنة وانت ومدونتك بخير وبسعادة يارب
ويارب يا خالو تبقى فى احسن حال

أحمد سعيد said...

فعلاً تاج جميل يا أحمد

وردك كان جميل جدا

وموضوعى


أتمنالك دوام التوفيق

أخوك نيجــر

بت خيخة وأى كلام said...

ابو حميد ازيك
هتطلب منك طلب
ياريت تعمل عندك فى البلوج اعلان عن لقاء المدونين اللى هيكون السبت الجاى فى ساقية الصاوى
ياريت تحطه عندك هناك فى البانر بتاعك
علشان الناس تيجى
ومتنساش تتصل بكل المدونين اصحابك وتخليهم يجوا
شكرا ليك
اختك خيخة
لو تعرف توصف فين ساقية الصاوى بالظبط
يارت تعمل كدة
لان الناس عندى سألونى وانا مش بعرف اوصف اوى
واكتب كمان كيفية الوصول ليها عن طريق المواصلات
شكرا ليك يا احمد
سلام

منى said...

انا جايه اقول
كل سنه وانت طيب
وعلى فكره انا جاوبن التاج ده
جالى من هبههههههوب

Ahmed El-Agouz said...

السلام عليكم الحقيقة انا سعيد بان ازور هذة المدونة والتي ان كنت اعتقد ان للتدوين اقطاب مثلما انت تعتقد فانا اعتقد انك احد هذة الاقطاب
وكل سنة ومدونتك يا سيدي وهي طيبة وعقبال ما تحتفل باليوبيل الذهبي لمدونتك
واتمني ان نتواصل علي مدونتي المتواضعة
http://a-agouz.blogspot.com/

nonoymm said...

السلام عليكم
عيد سعيد للمدونة والعام اللي جاي في طاعة باذن الله
انا جاوبت على التاج دة بس من خلال اجابتي هتعرف انا بختلف معاك في ايه
وطبعا الاختلاف في الراي لايفسد اي حاجة
بس اجاباتك دبلوماسية شويتين
تحياتي