خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Apr 5, 2008

مدفع الإضــــراب .. إضراااااااااب

لما الفســـاد وقــّـفوه حـــارس على وطنى
ولهيب الغلا كوانى .. وحتّ ف بدنى
لما الحرامى سرق منى اللقمة والميه
وسرق هدوءى وسكنى .. حتى من سكنى
لما الحلم حتى اتسرق .. من يومى .. من زمنى
لما النظام نسج - فى عز الشباب - كفنى
أنا قلت هعلن العصيان
فى يوم حزين مـَدنى

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما سألت عالعيش .. قالوا مفيش
وقالو العيش على الأبونية
وسألت عالزيت .. وعزّيت
لما عرفت إن الزيت بتسعة جنيه
وسألت على حديد البُــنا
قالوا الحديد .. خلاص فى كرش البيه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما البشر والحجر
ووادى النيل ببنى أدمينــــه
لما زمان الوطن بايامة وشهورة وسنينه
لما الصغير والكبير
قالوا كفاية مش عايزينــة
كفاية علينا حكم سنين
تخرج الواحـــــد من دينـه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما المبيد صبح سرطان
يهرى ف ارضنا .. فى الزرع .. فى مواطن
لما بؤ الميه صبح وسخ داكن
لما خرب الاقتصاد .. واحد على تلـّـــهَ
قاعد وشارب وواكل وساكن
لما الشباب بيصرخ .. فى ذل ومهانة
ولا شغل ولا توظيف ولا شقة ومساكن

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


شعر : أحمد الصباغ

42 comments:

بيسوو said...

لما نشوف اخرتها..ونشوف هنوصل لفين

هنلاقيها من الزيت ولا من العيش ولا من الحديد
ولا من الظلم..ولا من كتمة الصوت والحس

EmY said...

ابو المخاليل حبيبي قلبي

ايه يا عم الجمال ده شكل الغلا خلاك مبدع جامد اوي

انا فعلا مسترغبه الراجل الموظف الي عندو ولاد عايش ازاي سيبك من اللبس و التعليم و الخروج بيأكلهم ايه طيب و بكام و مرتبه كام

مع اني مش متفأله بلاضراب لانه مش منظم صح بس اتمني انه يعمل فرق و الحكومه تحس ان الناس مش هاتفضل ساكته و الشعب صوته هايبتدي يعلا و هايقول لاء

البوست جميل اوي اوي اوي يا احمد بجد تسلم ايدك يا احلي خال

UNIQUE said...

يوم اسود على الظالم

بس يا ترى يوم واحد كفاية انه يغير

واقع بلد مليانة امراض واوجاع

لو ده حصل تبقى معجزة الهية

مع ذلك كلماتك مصدر للتفاؤل

و قليل من التفاؤل لا يضر

تحياتي

المنسى said...

الله عليك ياصباغ

بجد بتقول إللى جوانا كلنا

والله أنا مستنى اليوم ده بفارغ الصبر
بس

بس

خايف
مش عارف ليه

حاسس إن العواقب مش


مش عارف
ربنا يستر

قال ضربوا الأعور على عينه قال ما هى
ماهى عورانه عورانة


فى النهاية اتمنى من الله صلاح البلاد والعباد
اللهم أمين

العاشقة said...

كم أتمنى أن ينجح أحد في الأخذ بحقه يوما

فاليأس بات يقتل الارواح ببطئ

آمل حقا

أن يحيي هذا الإضراب ما مات في الأرواح

.
.

سلامات مسبلات

Sola said...

do u think it gonna make any change
i wish it does
i like ur poem go ahead
chao

Che The Hermit said...

راااااااااااااائع
كل حاجة رائعه
الشعر كان او الالقاء الصوتي اللى مسجله
الشعر ابهرني وصوتك كمل الابهار

هأضرب لوحدي على فكرة علشان فى كليتي كل الطلبة والمعيدين والدكاترة والفراشين حتى مش هيضربوا وهيروحوا عادي ولا كأن شيء حصل

ربنا معانا

تحياتى
تشي

عاشقه الفردوس said...

تدوينه حلوة اوي


ماشاء الله حضرتك شاعر بقي

ماشاء الله وطريقه القاء حضرتك ليها روعه

جزيت خيرا ودمت ودام ابداعك

اهو ده عيبه said...

اتمنى بجد ان اليوم يوصلنا للنتائج اللى احنا عايزينها

ويعدى على خير بدون مهازل او عواقب سيئة

Abo 7anf said...

السلام عليكم
ربنا سهل ويكون فى نتيجه
ربنا يسهل
ونقف وقفه مفيده
يريت نكون كلنا مع بعض فى اى مكان
لاصوت الجماعه بيوصل لاخر الزمان
ان شاء الله يكون يوم مشهود
وان شاء الله
نفرح بيه

SKOBL- Little Lazy Me said...

بجد حلوة .. ايه الحلاوة دي
بس أنا نفسي الاضراب ده يبقى بجد و مش كدبة ابريل .. أنا مش باحبطك ، بس خلاص قربت أيئس
و بعدين قوللي.. هو الزيت عندكم لسه بتسعة .. يخرب بيت الرخص اللي عندكم ، ماتبعتلي كام قزازة .. اهه أنا باكتبلك و النشرة بتاعة الساعة واحدة على القناة الأولى العظيمة .. و هما بيشتموا "مناورة مشبوهة " .. أدي وصف يا سيدي
"رابعا .. أن نصوص القانون يترتب عليه" .. افتح التلفزيون يا عم .. و الله بجد .. شكل الراجل اللي بيكتب النشرة ده بياخد زيت دوبل ع التموين .. و الله حاجة كووول أوي .. من الآخر .. الحكومة بتقولنا اخبطوا راسك في الحيطة يا قلة مشبوهة من الجماعات السرية المؤذية لكيان الوطن العظيم ..اخ منك انت .. خد بالك أنا أول واحد حابلغ عنك .. و لو مش عايزني أبلغ يبقى تقوللي فين الزيت أبو تسعه ده ..طب أنا حاقولك حاجة .. واحد صاحبي عند والده في الشغل قالولهم اللي حيتغيب الاحد حيتخصم منه خمس أيام .. أكيد المدير عندهم من بتوع الزيت الدوبل برضه .. خلاص .. أنا باكل مسلوق .. اهه منه أوفر زيت و منه أغلي الميه و ما أتسرطنش و لا اتبلهرس
و لك كل التحيات

YHYيــوســف الـمصـرى said...

السلام عليكم ورحمة الله وبركاته
...........................
أحمد بك ازيك يا باشا
ولو انى مش مع فكرة الاضراب دى وبصراحة شايف انها ملهاش لزمة خالص لكن نتمنى انها تعمل شىء ويحصل اى تغير !

الصورة دى حلوى يا ريس دى فى السيدة عائشة صح ؟

تحياتى

خمسة فضفضة said...

السلام عليكم ورحمة الله وبركاته

حلوه اوي الشعر
بس الاضراب مش حاسه ان هايعمل اي حاجه

اصلا نسبه كبيره اوي من الناس مش عارفين يعني ايه اضراب ولا عارفين يعملوا ايه في اليوم ده من اصله

العاديه كانت سيئه جدا وموجهه لشريحه معينه من الناس اللي بتتعامل مع النت اساسا وحصل اهمال رهيب لاساليب الدعايه التانيه
وده في رايي اهم الاسباب اللي هاتخلي الاضراب يفشل

appy said...

يا خوفى عليك يا ريس احمد عبد العال

بس والله حلوة يا احمد جدا

ويا ريت يجيب نتيجه اصل جالى احباط بعد مناقشتنا بجد

مهندس مصري said...

و لو اني مش سامع الصوت بس الله عليك بجد يا أحمد

أنا مش نازل الشغل بكرة و بلغت كل زمايلي و بعضهم حيشارك
يارب الإضراب ينجح و يعمل تأثير

•√أريـ السمر ـج√• said...

للاسف الصوت مش مسموع عندى .. كنت اتمنى انى اسمعها منك لأن اكيد الأحساس حيختلف ..



لكن البوست حلو جدا جدا .. و ان كان موضوع الاضراب ده ما أظن حينجح

فى ناس كتير مضطرة تنزل علشان خايفة يتقال شاركت .. و ناس تقولك حرام طيب الناس اللى بتشتغل باليوم ذنبهم أيه ما نشتري منهم حاجة !!


انما لعل و عسى شىء يتغير
دمت بخير

ِِAdem El-Mahdy said...

السلام عليكم

انا ورايا امتحان دوائر اليكترونية بكرة

و الدكتور قال بتوع المحلة لو مجوش الامتحان

انا هعملهم امتحان تانى علشان الاضراب

فغالبا مش هروح الكلية

دا لانى ورايا امتحان آلات بعده فعد اليومين ازاكر فيهم
الات
و هعمل اضراب فى بيتنا

او ممكن اتسحب من امى و انا نازل اصلى الظهر بكرة و اخد الكاميرا
و اغطى الاضراب اعلاميا
\
و ربنا يرجعنا بالسلامة
و بس
و سلام عليكم

شمعى أسعد said...

شعر جميل وصارخ
تفتكر الاضراب ها ينجح
ولا هتكون مجرد مظاهرات فى وسط البلد

أنسانة-شوية وشوية said...

مش عارفة ا احمد بس حاسة ان اليوم ده مش هيعمل فرق
كان لازم يكون فيه اعداد لفئات الشعب ويكون فيه توعيه للمواطن عن الحقوق والطرق الصحيحة والمؤثرة اللي نسلكها لاخذ الحق ده
جميل جدا تسلم ايديك

نوره الخشن said...

برغم اني اول وحدة قريت الكلام ده وقبل ماينزل ألا اني زي الغبيه امبارح نمت قبل ما الصباغ ينزله وابئى اول تعليق فيه
ساعات الواحد بيعمل تصرفات حيوانة
يلا تتعوض

ايــــــــه ياعم الصباغ
انا هبلغ عنك على فكرة هقول هو ده اللي حرض عالاضراب

متميز كعادتك ياصباغ
مبسوطة منك انا
أستـــــــــمر

أسامه يوسف said...

تحفه قوى يا خالو
وبالذات
"لما البشر والحجر
ووادى النيل ببنى أدمينــــه
لما زمان الوطن بايامة وشهورة وسنينه
لما الصغير والكبير
قالوا كفاية مش عايزينــة
كفاية علينا حكم سنين
تخرج الواحـــــد من دينـه"

المفروض دى تكون قصيدة او ترنيمة الاضراب الرسميه

تحياتى

عاشقة القمر said...

جاااااااااامد جدا بجد حلو اوي .. تسلم ايدك يا خالو .. ويارب حاجة تعمل اي حاجة ..

Marvel said...

حلوة اوي بجد...مفيش كلام تاني ممكن يتقال

تحياتي لك

سعيد عمر said...

أشكرك وأبشرك بأن المارد النايم بدأ يستيقظ بعد ما حس بالجوع
ولا يمكن أبدا لمثل هذا الوضع السيء أن يدوم أكثر من ذلك

haitham said...

ايه الكلام الجامد ده
بس انتى معرفتش انه اللى هيشارك فى الاضراب هيترزع سنة سجن
(هههههههههههههههه)
يعنى مصر كلها هتنور ابو زعبل

حنة said...

ايه يا استاذنا الجمال ده
ان شاء الله بكرة يكون يوم اسود على الظالم ابيض على المظلوم
صباحك قشطة ممزوجة بالحرية والعدالة

دمعاتي said...

أتمنى ان يكون غدا بداية جديدة لمصر
أتمنى ان تكون انتفاضه
ضد الظلم و الجهل و الفقر
اتمنى أن لا ترى مصر ربع قرن قدام كالذي مضى

خالص تحياتي

الساحرة said...

ايه الابداع دة
حلوة بجد

مع اني مش متفائله للاضراب دة

بس هنزل بكرة
لازم اروح لماما ولا دة ممنوع في الاضراب

عموما اتمني ينجح

والسجون متتمليش والمستشفيات كمان

بت خيخة وأى كلام said...

يا بن الايه يا صباغ
ايه ده
جامدة جامدة جامدة
من هنا لحد بعد بكرة
اسمحلى انحنيلك أمام تألقك
تحياتى ليك

ابن حـجـر الـعـسـقـلانـى said...

لما النظام نسج - فى عز الشباب - كفنى

مؤثر البيت دة جدا يا صباغ

و القصيدة كلها رائعة .. بجد تحياتى ليك و على الكلام الجميل

أنا ملاحظ إن الإضراب دة أخباره انتشرت بشكل كبير بين قطاعات كبيرة من الناس .. و بين مختلف الشرايح .. حتى الفلاحات و البياعات اللى بتبيع فجل و جرجير و طماطم فى السوق هايمتنعوا عن البيع .. أو على الأقل مستعدين للإضراب

طبعا غير سواقين المايكروباص و البياعين فى المحلات .. سمعت منهم كلام كتير

و بصراحة مش مهم هم هايمتنعوا عن أى نشاط فى اليوم دة و لا لأ ... المهم إن الناس بقى عندها وعى و أصبح من الممكن إن فكرة تنتشر بين كل شرايح الناس بهذا الشكل

تحياتى ليك يا صباغ

dododody said...

ماشاء الله عليك يا أحمد المدونه بتاعتك فوق الرائعه وانا اول مرة ادخل ولسه مستجده فى موضوع المدونات ده وياريت تقبلنى اخت لك ، بالنسبه لموضوع الاضراب يارب نوصل لنتائج كويسه ويحسوا بالشعب المصرى

محمود الدوح said...

قالوا عقوبة الاضراب سجن
من 3 شهور لسنة
قلتلهم وفيها اية
دى مش معضلة
بس المعضلة
هيحبسوا الشعب اكتر من كدا


*********

دومة اتقبض علية

زيزو باشا said...

تعليق بسيط بخصوص موضوع الإضراب يوم ٦ أبريل.... أول مرة طرحت الفكرة دي والمناقشات حولها كانت في مدونة وائل عباس الوعي المصري وتحديدا في بوست صور قتيل جزاري الشرطة الطفل وبدأت يوم ١٥ أغسطس من العام الماضي بفكرة بإمضاء أنا المستقبل والأمل وتوالت المناقشات في نفس البوست بعد ذلك ولازال البوست والتعليقات موجودين .... وشكرا

only spot said...

سلام عليكم
خالو احمد بجد استاذ وجبت من الاخر
كلنا من جوانا عالنين الاضراب حتى ولو كان اضراب سلبى
ادينا مستنين الى قاعد على تلها هيعمل ايه تانى بعد ما التل اتخرب واتنهب
اهنيك على اسلوبك الجامد
ملحوظه
فكره انك تقول البوست حلوه اوى بس الصوت مش واضح مع الاغنيه فلو قدرت تنزل بس الموسيقى مع صوتك هيبقى افضل
تحياتى

مصطفى فتحي said...

جميل الكلام ده

جميل ومعبر جدا

تحياتي

عاشقة القمر said...

خالو خالو خالو .. انا بعد إذن حضرتك اخدت البوست عندي في المدونة لو ما يضايقش حضرتك يعني .. بس لو يضايق حضرتك يعني ياريت تقولي وانا هشيله على طول مفيش مشكلة .. شكرااااااا ..

Human said...

أعتقد إن الإضراب ده جيه بدري شوية ...مش قصدي على الحاله العامه ..أنا قصدي على الناس
الناس لسه جبانه
خايفين...؟
لسه الخوف معشش في قلوبهم..؟
مش عارف إمتى الناس تتوجع وتطلع الطلعه التمام
مستنيين لما يبيعوا ولادهم
..؟
مش عارف

Anonymous said...

فى كل العصور و الأزمنة كان هناك شعراء يقولون كلمة حق عند سلطان جائر و بهذة الكلمات أصبحت منهم يا أستاذ أحمد .
و ربك الكبير المتعال و لكل أجل كتاب هانت و بشريات الفرج قادمة
لقد و عدنا الله أن مع العسر يسر .
تحياتى القلبية مع أطيب الأمنيات لشباب هذة الأمة باليقظة.
أبو خالد

Ahmed Al-Sabbagh said...

بيسوو

ايوة بعيد عنك البلاوى كتير

Ahmed Al-Sabbagh said...

EmY

منورة يا ايمى

ايوة شفتى الجوع بيطلع مواهب ازاى

somaa mahaba said...

مفيش فايده
تحياتى ليك سومه_87

مـحـمـود فـرج أحمد said...

السلام عليكم

ازيك يا أحمد

عارف انت قبل كده قلت لي انك بتكتب شعر
لكن دي أول مره أقرا لك

بجد بجد روعه

طريقتك في الكتابه حلوه وسلسه جدا

ولما النظام نسج في عز الشباب كفني دي لوحدها تاخد عليها الأوسكار

بجد بجد حلوه قوي

أخر الأخبار من المحله بقه يا باشا إن الليله دي كانت ليله هاديه ومفيش حاجه غريبه وامبارح وأنا راجع من طنطا لقيت هما يادوبك عربيتين امن مركزي بس خارجين
علي فكره يوم الاتنين وانا طالع من المحله الصبح دخل قدامي عشرين عربيه امن مركزي علي طول الطريق.. واحد صاحبي كان راكب معايا قعد يعد فيهم
دول طبعا غير حوالي خمسين او أكتر كانوا في المحله من يوم السبت ومعسكرين في الميادين الكبيره

مش عارف امتى الأمم المتحده هتعلن وقفاطلاق النار وامتي القوات المعاديه هتنسحب ههههههههههههههههههههه

وهنعمل ساعتها عيد الجلاء المحلاوي هههههههههههه

كل اضراب وانت طيب