خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Apr 18, 2008

تعليقات وخزعبلات


تتميز المدونة عن اى موقع عادى بوجود إمكانية التعليق على الموضوع

ودى مش مجرد خاصية للمنظرة بالعكس

دى بتدى التدوين روح جميلة من التواصل

لكن فى ظاهرة لذيذة اوى

ان بعض المدونين بيكتبوا فوق مربع التعليقات

بعض ملاحظاتهم على الشروط اللى بيتمنوها فى التعليق

مثلا من الملاحظات الطريفة ملحوظة آبى

بلاش الفاظ مش كويسه ، علشان مضربش بقله فى الدماغ على طول وانت الجانى على نفسك

ولا شوفو البت أجدع بنوتة كاتبة ايه

مـش كـده ولا ايـه ، على فكره .. لو كلمتين شتيمه هيريحوك ويفكوا عنك

فمتحرمنيش م الثواب دى .. انى اكون سبب ف راحة اخويا الانسان ابو لسانين

ههههههههههههههه

وتلاقى مثلا بطوط الحبوب كاتب

قول يا سيدى قول

أما بقى ملك الكبدة ده حكاية تقريبا كاتب نبذة عن حياتة فوق مربع الكومنت

يا ريت التعليق يكون ليه علاقة بالموضوع

انتقدني زي مانت عايز بدون الفاظ موش ظريفة من فضلك

لاني هضطر ارفض التعليق و ساعتها هحس بتانيب الضمير لاني ليبرالي موت

اه يا ريت بلاش تعليقات من نوعية شاركنا موش عارف في حملة ايه

و طريق الهداية و الحبشتكانات دي البلوج ده ليبرالي اجتماعي سياسي فقط

جامد جدا

أما بقى جمعاوى روش طحن فكاتب كلمتين كدة يصحصحو الضمير المكوع

علىّ صوتك و إنت بتكتب ..و ما يهمكش بس خد بالك ..ما يلفظ من قول ....كمل إنت بقى

مهندس مصرى كتب

شرفنى بتعليقك

وتكتب صاحبة أخر العنقود فوق مربع التعليقات كلمتين بعدهم علامات استفهام

رأيـــك يهـمنــى؟؟؟

يعنى ده سؤال ولا ايه ؟ .. ولا ملحوظة

هههههههههه

صاحبة مدونة حماتى ملاك كتبت

أدخل بإيدك اليمين

أما نورة الخشن فدخلت دخلة ايمانية عميقة

قال الله تعالى: { مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ } سورة ق الآية 18

أما نوران الشاملى كتبت

إوعى حد فيكم يكتب شتومة انا بزعل على فكرة

رغم كدة بتاخد شتايم أسود من قرن الخروب

لدرجة ان وقت كتابة المقال ده كانت قافلة امكانية التعليق فى مدونتها

أصدقاءنا الجعفرى واليعقوبى بيطلبو طلب قبل ما تعلق وهو

جدد نيتك قبل ماتعلق وضيف جديد

صديقى أدم المهدى كتب

أضفى علينا من تعليقاتك الباهرة

اما سوما صاحبة مدونة مجنونة فى بلد عاقل كتبت

مبحبش البلطجه ولا بحب السكوت
علق وقول اشتكى سمعنى اعلى صوت

ترررررا

حسام يحيى صاحب مدونة صوت الحرية كتب

الناس الحلوين اللى بيعلقوا

ولولا صاحبة صاحبة مدونة القادم أجمل كتبت

قول اللي في نفسك
قول و لا يهمك
اديها نعناع و قول ما تقول
بس متنساش
ربك شايفك علي طول

وصديقتنا الجميلة سارة سورسارة كتبت

إن لم تزد على الحياة شيئاً فأنت زائدٌ عليها

الدكتور الحر .. محمد أبو زيد كتب

زد الموضوع جمالا بتعليقك

دكتور أحمد صاحب مدونة موجة كتب

و إذا رأيت نيوب الليث بارزة ... فلا تظنن أن الليث يبتسم

دكتورة اجدع بنوتة كتبت

مـش كـده ولا ايـه.. ده حتى الاختلاف ف الراى .. لا يفسد للوز مهلبيه.. اه والله

همس صاحبة مدونة مصرية لكن متغاظة كتبت

اتفضل زى الباشا كدا قلى رايك ...لحد ما اجبلك حاجه ساقعه حالا..

والحقيقة اغرب حاجة شوفتها فوق مربع التعليقات انا مش هقولها عشان صاحبها ما يزعلش بس كان متشدد جدا وفارض شروط صعبة اوى على الزوار اللى بيفكرو يعلقوا

وانا فكرت انى أهدى النصايح الذهبية دى للمدونين المتزمتين دول

عن طريقة كتابة الملاحظات فوق مربع الكومنت

ممنوع منعا باتا كتابة تعليق قبل قراءة الموضوع عدة مرات .. لا تقل عن خمسة

ممنوع منعا باتا كتابة مدح او ذم او نقد غير موضوعى او نقد غير بناء او نقد ساخر أو نقد جارح أو انتقاد أو جدل أو نقاش أو أسئلة سخيفة أو أسئلة غير مريحة أو كلامى إنشائى أو ما شابه ذلك

ممنوع كتابة أى تعليق لا يتفق مع تعاليمات الدين الاسلامية أو المسيحية أو اليهودية أو البوذية أو الوثنية أو الالحادية أو السيخية أو أى عقيدة دينية سماوية أو أرضية

تقوم إدارة المدونة بنعل سنسفيل جدود أى تعليق لا يتفق مع اخلاقيات المدونة او مع تعليمات المدونة أو مع سياسة المدونة أو مع مزاج صاحب المدونة

ممنوع التجريح فى اى من اصحاب التعليقات الأخرى وفى حالة التجريح فى صاحب تعليق اخر تقوم المدونة بمسح التعليقين ونعل سنسفيل جدود اصحاب التعليقين

ممنوع وضع تعليقات تحتوى على أخطاء املائية أو نحوية أو نفسية أو منهجية أو راديكالية

ممنوع منعا باتا وضع تعليق طويل يزيد عدد حروفة عن خمسين حرف

ممنوع منعا باتا وضع تعليق قصير تقل حروفة عن تسعة واربعين حرف

ممنوع وضع تعليق يزيد عدد النقط على الحروف عن خمسة وتلاتين نقطة

اذا لم يلتزم الزوار بالتعليمات السابقة يحق لصاحب المدونة مسح التعليقات بدون إبداء أسباب وتوجية الشتيمة للمعلقين غير الملتزمين

عزيزى المدون اسمع نصيحتى وحط التعليمات دى فوق مربع التعليقات

واوعدك مفيش واحد يوحد الله هيدخل مدونتك تانى

وابقى ادعيلى

طيب ياريت كل واحد يقول نفسة فى ايه بخصوص التعليقات

نسمع كدة ؟


أحمد الصباغ


62 comments:

فاتيما said...

إيه يا أحمد
دا انت مسبتش حاجة مقولتهاش ...
انا كمان نفسى اكتب حاجة بس موش عارفة أعملها ازاى
بس هستكشف على مهلى واحدة واحدة
دمك سكر كالعادة و موجز بإفادة ...
هماالخمسين حرف خلصوا و لا لسه؟؟؟
تحياتى يا خالو

Anonymous said...

من زمااااااااااااااااااااان ما علقتش يابوحميد
الغريبة انك مش حاطط اي عنوان عندك للتعليقات
وحشتني جدا
لي عندك قهوة لما اجي
سلامي لكل حبايبك المتجمعين عندك
احمد
يوميات عيل مصري

مدحت محمد said...

مدونتك مختلفة
وليها نكهة
بطعم التفاح
ورائحة الزهور
ياصباغ

Amr Fekry said...

ممنوع منعا باتا وضع تعليق طويل يزيد عدد حروفة عن خمسين حرف

ممنوع منعا باتا وضع تعليق قصير تقل حروفة عن تسعة واربعين حرف

ممنوع وضع تعليق يزيد عدد النقط على الحروف عن خمسة وتلاتين نقطة

اذا لم يلتزم الزوار بالتعليمات السابقة يحق لصاحب المدونة مسح التعليقات بدون إبداء أسباب ((((وتوجية الشتيمة للمعلقين غير الملتزمين))))


-------------------



هههههههههههههههههههه

nonoymm said...

ازيك يا استاذ احمد دة انا لسة الصبحية مغيرة الكلام اللي فوق المربع دة
وعموما نفسي بس اننا نحترم بعض شويتين وما نحولش الاراء لشخصية ودة هيبقى احسن
يعني نفسي الاحترام حتى لو هنختلف
تحياتي

Unique said...

بيعجبني العنوان اللي في مدونة دمعاتي

* هات تعليق وخدلك منديل *هههه

موضوع ظريف

خالص التحية

صاحب المضيفة said...

لا بجد الموضوع المرة دي جامد قوي


والتعليقات دي الواحد بيقراها لكن مش بياخد باله من القصة دي قوي



على العموم

كان نفسي اسمي يتحط في الاسماء اللي حطيتها

لكن ملحوقة

خيرها في غيرها

دمت بسعادة

د/اجدع بنوته said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

انا طلعت بنفرين ف الليله دى هييييييييييه

حلو اوى الشروط دى ياابو احميد

دايما دماغ وافكارك ملهاش حللل

مش كده ولا ايه ..

آخر العنقود said...

اييييييييييه ده انا اسمى موجود
مش معقووووووووووووولة


ماشى ياخالو
يعنى علامتين الاستفهام دول اللى مضايقينك
:)

اشيلهم والله عشان خاطرك ولا تزعل
وبعدين ياخالو اى حاجة سؤال ,...ماحظة
المهم تعلق وتشرفنا

بس بجد موضوع جمييييييييييل وفكرته جديدة
وده اللى مش جديد عليك ياخال

تحياتى ليك

امام الجيل said...

هلا

انا بتابع كل تدويناتك على فكرة
بس مش بعلق كتير
عشان القيود اللى انت حاططها دى على التعليقات كلها
:)

ربنا يكرمك
لا بس جمية اخر جملة ان كل واحد يقول نفسه فى ايه بالنسبة للتعليقات
اصل كتير بنكتب بوستات ومنبقاش عارفة رايحة لفين او فين غرضها
فاهم حاجة

انا بقى نفسى بالنسبة للتعليقات انها تكون اولا فى صلب الموضوع مش ناخد جزء منه ونقعد نكبر فيه او اننا مثلا نبقى عارفين المدون وعارفين عقله وفكره ويكتب كلمه وممكن نفسرها غلط بس المفروض مدام متابعه كويس اخدها على المحمل الصح مش اصدقك انه كتب جملة كده
واهيص بقى

وان التعليقات تكون فيها جديدة ومفيدة مش بس شكر وابداء اعجاب هو مش وحش الشكر يعنى بس بحب احسن اللى يضيف جديد حتى لو بنقد

بحب اوى النقد البناء ومش بحب كل التعليقات تبقى موافقة لرأيى
عايزين دم
:)

لا بجد لازم يكون فيه اختلاف كده واتكلمت عن النقطة دى كذا مرة ان المدونين بقوا شبه بعض اوى او كل اللى شبه بعض بيعلقوا عند بعض وبس
يعنى الطوال بيعلوقا عند الطوال وهكذا
:)

على فكرة انت شبه واحد حبيبى كان معايا فى الكلية اسمه مازن فى كلية تجارة هل لك صلة شبه
قول متخبيش اعترف
:)

تحياتى

ابن حـجـر الـعـسـقـلانـى said...

يا صباغ فكرة التدوينة دى فكرة مش معقولة

بس أنا حابب أقول حاجة .. شهوة السيطرة و السلطة محببة جدا للنفس .. الواحد بيشعر بهذه السلطة و السيطرة بمقدار ما يقدر عليه من "المنع" لا بمقدار ما يوفره من "المنح" .. يعنى الواحد لما بيلاقى نفسه عنده إمكانية حذف تعليق أو السماح بيه بيقعد بقى يتفنن فى القواعد و القوانين اللى تحسسه بنفسه و بمقدار تحكمه فى الآخرين

القواعد دى بقى بتختلف حسب ثقافة كل واحد .. يعنى هاتلاقى واحد يقول لك :"التزم بالآداب و احترم حرية الآخرين" فى حين إن إجراء مسح التعليق ذاته به قدر كبير من اهدار حرية الآخرين

و يا سلام بقى لو صاحب المدونة متدين شوية .. هاتلاقيه جايب لك ترسانة نصوص تبيح له بل و توجب عليه إنه يحذف تعليقات الآخرين اعتمادا على "قال الله" و "قال الرسول" و يكون شايف نفسه بحذف التعليقات اللى مش على مزاجه إنه بيخدم الإسلام خدمة جليلة

و فى النهاية كلهم شركاء (متدين.. ليبرالى.. إخوانى .. سلفى .. علمانى) فى مصادرة حرية الآخرين كلما سنحت له الفرصة بذلك

طولت عليك معلش يا صباغ

appy said...

صباغ
جمايلك بقت مغرقانى فى بحر من الرمال يا رجل
والله مش عارفه اتشكر لك ازاى انه لشرف عظيم على كتابه اسمى فى مدونتك
ايه حصه اللغه العربيه الدايو دى
المهم ده مش هيمنع انى ارشك بالمسدس ههههههههههههههه وهغرقك
يا سياده الريس احمد عبد العال

بطوط حبوب said...

الفكره حلوه اوى
دماغك ما شاء الله عليها
دايما ممتعنا كده باابداعاتك

انا عجبنى اوعى هلعن سنسفيل جدود أى تعليق
هههههههههههههههههههه
جامده بجد
وشكرا على ادراجى من ضمن الناس
انه لشرف عظيم ان يظهر اسمى عندكم

هناء said...

المدونة مزاج و كل واحد و مزاجه

تحياتي يا احمد

مهندس مصري said...

فاكر انت فيلم النوم فبي العسل كان الراجل التخين بيقول ايه في البار ؟
الإحترام أهم حاجة الإحترام
:)
هو ده اهم حاجة في التعليق من وجهة نظري
مش مهم مؤيد و لا معارض المهم يكون عايز يوصل للحق مش يجادل و خلاص و يكون محترم و الفاظه مهذبة لأن بجد الواحد بيضايق من الألفاظ البذيئة
و انا مسافر يا سيدي في طائرة اسكندرية الرياض يوم الإثنين 21/4 الساعة 4.45م
:)

ftafeet said...

جامد اوى يااحمد

البوست حلو اوى

تصدق بايه انى مكنتش بشوف الكلام اللى فوق ده قبل كده وانت اللى خلتنى اخد بالى منه
هههههههههههه معلش انت عارفنى مسطوله على طول

بس والله دى حاجه لذيذ جدااااااا

بس تصدق مافيش حاجه فى دماغى اكتبها هامخمخ واجيلك اقولك هاكتب ايه
وانت طبعااا عارفنى لما بمخمخ


نوناااااا

نوره الخشن said...

هههههههههههههههه

قاعدلنا عالوحده انت
انا قولت بئى بدل ماتشتم زي خيخة ولا حد يفهم كلامي غلط ولا مايفهمش ايه اللي انا عملاه
قولت مهما كتبت مش هيجي اصعب من كلام ربنا

يعني بنبه اللي هيكتب بس بذوق

شوف .. ده اناثروة قومية يابني

يابخت البلد بيا

(شوفت الغرور)

بس كتر خيرك والله ياصباغ افتكرتني

والغريب بئى الاغرب يعني انو بتعجبك البوستات والكلام اللي بكتبه

والاغرب واغرب انو في ناس برضو بتيجي بيجوا وبيعلقوا كمان

في بئى حاجة اللي فارض شروطه ده
انابقول يقفل التعليقات اسهل بدل لائحة البرلمان دي
خخخخخخخ

تحياتي ياخااااااال

نوره الخشن said...

مدحت محمد said...
مدونتك مختلفة
وليها نكهة
بطعم التفاح
ورائحة الزهور
ياصباغ


ولعلمك طعمه بالشيكولاته يجنن
(بهزر اوعوا تزعلوا)

MĕŢø & ŘǿŖêĔ said...

حلوه منك يا احمد
والناس تعليماتها احلى من بعض والاجمل نصائحك الثمينه الله يعطيك العافيه

:D

دمت

روري

EmY said...

احنا نمسح التعليقات و نشتم الي يفكر يعلق هي سايبه ولا ايه و كل واحد يقول رأيه لا معندناش الكلام ده الي يعترض نقطع راسه
بوست لذيذ اوي يا احمد

تحياتي يا جميل

somaa mahaba said...

هههههههه انا اسمى فى الناس دى
ممكن احط الشروط دى فى حاله انى كرعت نفسى وكرهتكم
تحياتى ليك سومه_87

somaa mahaba said...

ايه دا ثوانى
مهندس مسافر ..خلاص
تروح وتيجى بالسلامه وربنا يقدرك على عمل اللى معملتوش فى بلدك متنساناش يا مهندس بقى وتروح وتقول عدولى
تحياتى للجميع سومه_87

Ahmed Al-Sabbagh said...

فاتيما

خلصتى الخمسين حرف

ادفعى الفرق بقى

وعندك خطأين نحوى

الحساب خمسة جنية

:))

Ahmed Al-Sabbagh said...

احمد على - يوميات عيل مصرى

وحشتنى جدا جدا جدا

بجد مشتاقلك اوى

وفرحان او بتعليقك

ومنتظرك جدا جدا

تسلم لى

Ahmed Al-Sabbagh said...

مدحت محمد

تسلم لى يا شاعرنا الرقيق

والمانجو كمان

:))

Ahmed Al-Sabbagh said...

عمرو فكرة

اى خدمات ياريس

بس كدة تعليقك كبير

عليك غرامة

:))

Ahmed Al-Sabbagh said...

nonoymm

ايوة ياريت والله الاحترام يسود كل الاوساط

وبالذات طبقة المدونين

اللى هما افضل طبقة مثقفة

Ahmed Al-Sabbagh said...

Unique

ههههههههههه

تصدقى حلو اوى

كويس اوى انك جبتيهولنا

Ahmed Al-Sabbagh said...

صاحب المضيفة

انت مش كاتب حاجة فوق مربع التعليقات

انا دخلت بصيت عندك

:)

Ahmed Al-Sabbagh said...

د/اجدع بنوته

ايوة يا ضنايا

كدة ونص وتلات اربع

تعليقك غير موضوعى وبه اخطاء نحوية

وعليكى غرامة خمسة جنيه

:))

Ahmed Al-Sabbagh said...

أخر العنقود

ياسلام بس كدة ده انتى تحطى علامات استفهام وتعجب زى ما انتى عايزة

انا بس حبيت ارخم

وكنت مش عارف ده سؤال ولا ايه

:)

Ahmed Al-Sabbagh said...

إمام الجيل

ايوة لبسنى تهمة بقى

انا لسه حطيت حاجة

ما انا سايب الفدان اللى فوق التعليقات فاضى اهو

يعنى تكتب زى ما انت عايز

ان شالله يارب تكح

وطالما بتحب اللى يعارضك

طب حضرتك طويل ولا ايه

انا طويل لازم طولك ما يقلش عن مترين عشان تعلق عندى

:))

والله انت زى السكر بجد

Ahmed Al-Sabbagh said...

امام الجيل تانى

اه انا معرفش مازن

برئ يا بيه

Ahmed Al-Sabbagh said...

ابن حجر العسقلانى

بالعكس ما طولتش ولا حاجة

انا بنتظر تعليقك بشدة

وانا بتعلم منك بجد

Ahmed Al-Sabbagh said...

appy

بتنجااااااانة

هههههههههههههه

انا الريس احمد عبد العال

اوعى من قدامى

Ahmed Al-Sabbagh said...

بطوط حبوب

ربنا يخليك

ده شرف ليا

انت اصلا كاتب كلام متميز زيك

:)

Ahmed Al-Sabbagh said...

هناء

ميرسى يا هناء لمرورك

بتوحشينا بجد

Ahmed Al-Sabbagh said...

مهندس مصرى

حبيب قلبى اولا ميرسى على الكومنت الرائع

وثانيا بقى

تروح وتيجى لنا بألف سلامة يا جميل

Ahmed Al-Sabbagh said...

ftafeet

مستنى المخمخة يا نونا

عايز ابداع

عايز الشعب يهتف نونا نونا

Ahmed Al-Sabbagh said...

نورة الخشن

(طب انتى عندك لوجو )

قصدى اه طبعا انتى روعة وثورة قويميمة

البتاعة اللى انتى قولتى عليها دى

ايوة خلى بالك انا قاعد على الواحدة

يعنى تخلى بالك وانتى بتكتبى اى حاجة فى المدونة

انا باصص من خرم المدونة

Ahmed Al-Sabbagh said...

نورة الخشن تانى

طب وهنزعل من ايه

واحدة لذيذة ودمها خفيف

(انتى )

يبقى ايه يزعل

:))

رخم انا صح

Ahmed Al-Sabbagh said...

MĕŢø & ŘǿŖêĔ

ربنا يكرمك

بس اوعى تسمع النصايح دى

:)

Ahmed Al-Sabbagh said...

Emy

طب فكرى تدلتينى كدة مرة

وانا اطربأ لك المدونة على اللى فيها

ايوة احنا ندلت الغرب بس انما خالو لأ ههههههههههه

:)

Ahmed Al-Sabbagh said...

somaa mahaba

ايوة وبما انك بتكرهينى من دلوقت

فممكن تحطى كام شرط منهم كدة على الماشى

:)

Ahmed Al-Sabbagh said...

somaa mahaba

2

ايوة مسافر

ده بعد اذن حضرتك طبعا

:))

A.SAMIR said...

ممنوع التعليق اساسا
واشتري دماغك
تحياتي

بت خيخة وأى كلام said...

اولا كدة من غير سلام ولا كلام
يعنى عامل لينكات لكل الناس اللى اتذكر اسمها فى هذا الموضوع وجيت عند اسمى انا وبخ
مافيش لينك لمدونتى
فكرنى لما اشوفك ابقى اغزك بمطوة

تانى حاجة بقى
ههههههههههههههههههه
ههههههههههههههههههههههه
هههههههههههههههههههههههههههه
ضحكتنى موت على النصائح الذهبية بتاعتك دى
بس كنت عايزة افهم يعنى ايه راديكالية
دى كلمة ابيحة ولا ايه يا احمد
ياريت تقولنا معناها ايه؟

تحياتى ليك
اختك خيخة

مـحـمـود فـرج أحمد said...

حبة خزعبلات في الجووووون يا صباغ

تحياتي يا كبير

MKSARAT SAYED SAAD said...

احمد باشا الصباغ
صباح الخير يا جميل
ماينفعشي اخش وما اصبحشي
سيد سعد

اهو ده عيبه said...

ايه كل الممنوعات دى؟
هو صحيح فى ناس بتزودها حبتين
بس الموضوع اغلبه دعابه مش اكتر

بيتهيالى لو حد التزم باللى انت قلته ان شاء الله حيقفلها من بكرة ويشوى درة:)

أنسانة-شوية وشوية said...

ايه كل ده يا احمد الموضوع جامد جدا وررررررررررررررررررررائع
مع انى مش موجودة بس متعوضه
تحياتى لك وللافكارك

آفاق الحرية said...

السلام عليكم
انا ان شاء الله هسمع الكلام ياخالو وهحط حاجة
لاتقلق فالتلاميذ ينتظرون الاشارة من استاذهم ليتحركون
ههههههههه
تحياتي

عاشقه الفردوس said...

هههههههههههههههه

ماهذا الذي؟؟؟؟؟


حلو اوي التدوينه دي

Anonymous said...

خالو
الرائع
ربنا يكرمك

Rehab Mostafa said...

أنا مش فاكره والله أنا كاتبه ايه ومش ليا نفس ادخل البلوج بتاعي أشوف

بس قولي يا خالو؟؟ انت مش كاتب حاجه ليه طيب ؟؟ ماتكتب التعليمات اللي قلتها دي هنا :))
أنا بقالي كتير ماكتبتش تعليق يعني ليا حق في أكتر من 50 حرف لو سمحت :)

سهر الليالى said...

تصدق يا واد يا خالو انت
والله انت لماح ودماغ عالية اوى
أعلى من بيتنا كدة يعنى
:)

لا ولا أفكارك وافتكاساتك لا ما شاء الله فى اول حيطة ع البركة ان شاء الله

طيب انا هبقى استلف كام تعليق من اللى انت كاتبهم دول واكتبو بس لو حصلى حاجة بسببك هتاكل ضااااااااااارب
هههههههه

تحياتى يا جميل يا ابو دم خفيف

العاشقة said...

هههههههههه

ويبقى بعد كمل هذا مجال للكتابة؟؟؟؟

...

بالنسبة للتعليقات

أفضل التعليقات الموضوعية صاحبة الرأي والمشاركة الفعالة

لا مجرد مدح للمدح
ولا مجرد ذم للذم

وبالتالي الاحترام والرقي في الردود
فتحصل أكبر استفادة ممكنة للجميع

....

موضوع مختلف
:)

....

سلامات مُسبلات

لسه بعقلى said...

شكرا جزيلا
بس واضح انك مش عايز غير ان الناس تيجى تعلقلقك انت بس بدليل انك مش حاطط ولا كلمة فوق صندوق التعليقات بتاعك

ياريت تزور مدونتى لان رايك بيهمنى

سلام

somaa mahaba said...

هههههههه
احمد بيتكلم بلسان بشمهندس
وعموما خلاص مهندس غادر الديار هروبا منغير تصريح منى
وسوف ارسل السلطات بتاعه لمونه المجنونه وراه لتلحق بيه
وساكلف الانتربول البطيخى لملاحقته وملاحقتك

حسن توفيق said...

العزيز

احمد
موضوع جميل وطبعا لن تغير كل هذه التعليمات من يدخل لهدف معين عن هدفه
اتمنى ان نرتقى جميعا الى ما يليق بنا
كمصريين ومثقفين ومؤمنيين وهكذا
--------------------------
انتظرتك طويلا لترد على رسالتى لعل المانع خير...واتمنى ان نتواصل للصالح العام

Jana said...

بصراحة لا توجد اضافة لشروطك اللوذعية ..دى زى راديكالية كده
واسمحلى استعير احداها لوضعها فوق مربعى

متابعة دائمة على فكرة لمدونتك الجميلة
حتى لوكانت اول مرة اعلق
فعلا مش فاكرة علقت ولا لأ قبل كده
لكنك اضفتنى على الفيس بوك
يبقى اكيد علقت
:)

اعتقد الخمسين حرف خلصوا
وفى انتظار الغرامة

تحياتى الخالصة

و القادم....أجمل said...

السلام عليكم

اسمي موجود
طااايب
:D

%%%%%%%%%%%%%%%%%%%

بيعجبني في مدونة حقل التيوليب الأحمر

لا تقذف أحداً بالوحل
فقد تصيب الهدف أو تُخطئ
ولكن
من المؤكد أن يديك
سوف تتسخ

%%%%%%%%%%%%%%%%%%%

لو لا قيت حاجة تانية عجباني هاجي اقولها

:)

معلش انا اسمي ولـاء
و لست بلوللا
:)

احترامي و تقديري