خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Apr 23, 2008

شالوا العاصمة من تحتى

طول عمرى بحلم انى انقل من القاهرة واروح مدينة هادية لكن عمرى ما كنت أتخيل انى اصحى من النوم ألاقيهم شالوا القاهرة من تحتى .. أى والله عملونى فى محافظة جديدة إسمها " محافظة حلوان " ... أووووع لامؤاخذة ده صوت واحد بيرجع .. حلوان دى كانت لا تمثل لى اكتر من أبو رجيلة بتاع المكرونة .. رايح فين .. رايح حلوان .. تعمل إيه .. آكل مكرونة من عند أبو رجيلة .. وأروح أطلب طبق وأقولة كتّر التقلية .. أَضرب الطبق وأرجع .. هى دى حلوان يا عبلة . إنما الوقت أصبحت جمهورية حلوان العربية هى كل كيانى ، أكتبها فى البطاقة ، وأفتخر بيها ، وأقول بكل ألاطة " حلوانى يا بية " .. سبحان مغير الأحوال أو بمعنى أدق " سبحان مصبر الوحش عالجحش " .. أنا عارف إن نومى تقيل بس مش لدرجة إنهم يشيلوا العاصمة من تحتى .. وبكدة فى إحتمال أصحى فى يوم ألاقى نفسى فى بلد تانى

دلوقت بس حسيت بإحساس الناس فى فلسطين وف روسيا قبل وبعد التقسيم وف البوسنة والهرسك ويوغوسلافيا وتشيكوسلوفاكيا وأد ايه اللخبطة اللى كانوا فيها مع الإنفصال وإعادة التقسيم والإتحاد مرة تانية .

محافظة حلوان .. تصدقوا شغال بردة . . يعنى طول عمرى أسمع جمهورية إمبابة ، أو امبراطورية صفط اللبن ، إنما محافظة حلوان دى ماكانش فى حد بيفكر يدلعها جه اليوم اللى بقت سيرتها على كل لسان .

الطريف بقى ان إخواتنا - أبناء الصمت – فى محافظة 6 أكتوبر ماهو عقبال عندكم 6 اكتوبر بقت محافظة .. بيمرو بنفس اللحظات الأليمة يعنى واحد ساكن فى الهرم صحى لقاهم شالوا الجيزة من تحتة .. طب والنبى يا جماعة كل واحد أما ينام يبقى يتبت فى المحافظة اللى نايم فيها ... وعجبى



أحمد الصباغ

32 comments:

sebofy7alo said...

يبختك بحلوان دأنا خايف يعملوا محافظة فيصل الشرقية وفيصل الغربية وبينهم سور فيصل العظيم والدخول بتصريح.
ياراجل الحكومة بتهبل
هههههههههههههههههه

قلم رصاص said...

والله يا خالو أحمد الواحد يتوقع أي شئ في بلدنا يعني انهم يعملوا مدينة محافظة ديت بقي عجب العجاب
الواحد يخاف يصحي في يوم يقولوا المنصورة بقت محافظة المنصورة هههههه
وعلي رأي الشيخ كشك
يا بلادنا يا حبيبة فيك حاجة محيراني نزرع القمح في سنين يطلع القرع في ثواني
ودة أحد أنواع القرع مع اعتذاري التام للحاج القرع ....
تحياتي
قم رصاص

د\أسماء علي said...

برااااااحتهم خاااااالص
أصلهم مشوشين
ويمكن افتكروا لما يعملوا حلوان واكتوبر ويلغوا الجيزة تحصل حرب أهلية
وننسى الحكومة المُفترية ..
ولا تطالب امبابة باستقلالها
وتنقسم الناس
ولا بتوع حلوان يتنفخوا ويبصوا لبتوع الجيزة ويقوللهم ياللي اسمكم اتمحى
وتلاقي في تعصب داخلي
...
اتشلاااقا
الحكومة بس بقت بتتصرف زي اللي مش عارف ...
بوست حلو طبعا يااحمد بيه ..

خمسة فضفضة said...

السلام عليكم ورحمة الله وبركاته

طيب احمد ربنا انهم خلوها محافظه ومخالوهاش جمهورية حلوان العربيه المستقله

only spot said...

سلام عليكم
سبحان مغير الاحوال
ايه الى جاب القلعه جنب البحر على راى اللمبى وجه اليوم الى بقيت من سكان محافظه 7 اكتوبر وقال ايه بدرس بجامعة اقاليم وراحه فين مسافره حلوان وجايه منبن جايه من محافظه حلوان والعاقبه عندكم والنبى هم يضحك وهم يبكى بكره نلاقى بقى كارته عند دخول محافظه حلوان ونلاقى يافطه اهلا بكم فى محافظه حلوان يلى خير اكتر من كده وبيزيح ربنا
تحياتى

My Hope$ said...

اة عمرو اديب كان بيقول
عاين محافظة مارينا بقي
انا الحمدلله محافظة اسكندرية
مش هيشلوها
كان الله ف العون
واللي يعيش ياما يشوف
والفاضي يعمل قاضي
سلام

nonoymm said...

سبحان مغير الاحوال
له في ذلك حكم
الموضوع مدروووس ومضبوط
مبروك عليك المحافظة
ههههههههه
تحياتي

ياسر حسين said...

تفتكر لما حلوان بقت محافظة مستقلة أيه اللي ممكن يعود عليها غير غبار الاسمنت؟؟
خلاص كل مشاكل البلد اتحلت ومش فاضل غير انهم يقسموها محافظات جديدة
بكرة تلاقيها حلوان الشرقية وحلوان الغربية كده زي عين شمس الشرقية والغربية
:)

خالص تحياتي

Abo 7anf said...

السلام عليكم
يسدى ولا يهمك
مهمو دا التطور
الااحنا كل مره مبنفهمهوش
وبردوا هترجع القاهره الكبرى
ةالتقسيم على الورقث

أحمد عبد الفتاح said...

يا اخي والله احلي حاجة في القرار اللمعي بتاع المحافظات ده انه كشف المدونين الحلاونة
انا لقيت كتير حلاونة من المدونين بعد القرار ده
اما بخصوص الزعيم خالد الذكر ابو رجيلة فانا اقترح عمل الكشك بتاعه رمز للمحافظة والمحل الجديد بتاعه الي جنب الموقف مقر المحافظة وطبعا هو يبقي رئيس الجمهورية قصدي المحافظ

الساحرة said...

انا كنت من سكان المعادي محافظه القاهرة قوم خير اصحي الاقي نفسي حلوانيه اهو كويس حاجه مسكرة والسلام ما هو اللي بني مصر كان في الاصل حلواني هههههههه

مواطن مصرى نايم said...

بجد رغم انه موضوع شبه مضحك
لكن حاجة تضايق
يعنى انا انام اقوم الصبح الاقى نفسى
بدل ما كنت تبع محافظة اسكندرية
الاقى نفسى تبع محافظة ابو قير
يعنى انت تفضل طول عمرك اللى يسألك انت منين تقوله من القاهرة
مرة واحدة تلاقى نفسك عزلت روحت حلون
حاجة رزله
يالا كويس انها جت على قد كده
سلامى ليك

ftafeet said...

ازيك يااحمد
طب وفيها ايه لما يعملوها محافظه مش فاهمه اللى يدايق يعنى بجد

انا اصلا والله كنت فكراهم محافظات
اول مره اعرف انهم تبع القاهره
بص يااحمد انا عندى اى حاجه بعيد ومرحتهاش تبقى محافظه لوحدها
عندى جهل وطنى وجغرافى لمصر

بس بجد يااحمد ايه المشكل فى انها تبقى محافظه لوحدها ايه هايفررق يعنى

نونااااا

خبيب said...

"ماهو اللي بنى مصر كان في الأصل حلواني"

هو ده بالظبط التعليق اللي كنت عايز أقوله ..

يعني يا راجل يرضيك يبقى اللي بناها كلها حلواني ..

وملوش محافظة باسمه ؟!!

---

متقلقش

ده أكيد قرار "مخطط"

زي الحمار الوحشي بالظبط

Anonymous said...

احتراما لكل المدونين الحبيبة
واخي الفاضل والرائع
خالونتينو
اعجبني كونك بقيت حلواني ابسط يا عم هاكل جاتوة عنك لما اشوفك
بالنسبه للموضوع دة انا بفكر ارفع قضيه علي الحكومه المفروض تساوينا بيكم
احنا بالمحلة الكبري نطالب بتحويلها الي محافظة المحلة الكبري علي الاقل لينا

الان شنة ورنه
انا عارف عبء انك تحس كمواطن ان الحكومة مش بتهتم لارائك



سؤال هام هل من الممكن ان يحصل لاهالي جزيرة القرصاية وقعلة الكبش مش هذا الحدث التاريخي ويتحولوا لمحافظات رائدة

نوره الخشن said...

بورية منك مش سايب حاجة فحالها
ابئى بئى حط المحافظة تحت المخدة أضمن برضو عشان ماتتنشلش ولا حاجة

بس بأمانة حاجة مقرفة اوي موضوع محافظة 6اكتوبر كده هيزعجولنا المدينة الهادية
انا زعلانة اوي ياخالو اصل بصراحة معانا ناس تانيين صعبين اوي فالمحافظة كنت هفرح موت لو عملونا احنا والشيخ زايد بس محافظة لكن دخلوا معانا الواحات ومناطق تانية عاااااااااااا

ماتديهم ميسد من بتوعك يشوفلنا حل ويعود عليك وعلينا الايام بخير عقبال ماتبئوا دولة لوحدكم خخخخخخخخخخ

اهو ده عيبه said...

مش قادرة افهم ايه اللى خلى الحكاية دى تظهر فجاة كده فى دماغهم
عموما لو شرفتنى فى المدونة حتلاقى عندى موضوع فيه حلول لمشكلة المحافظات دى من اساسها

عموما هما عملوا بالمثل بتاع قالك تعرفه ازاى؟ ييجى فى المحافظة ويتصدر

Salma Amer said...

بالأصالة عن نفسي وعن أهل القاهرة بنهنئ شعب جمهورية حلوان الشقيق في عيد الاستقلال المجيد و بنطالب بعلاقات دبلوماسية بين الشعبين بحكم أن جمهورية حلوان هي امتداد استراتيجي لجمهورية القاهرة
سلمى
من القاهرة ( حتى الان وربنا يستر احسن ينقلوا مصر الجديدة لمحافظة تانية)

EmY said...

الحمد لله انا لسه في القاهره انا نيتي كويسه اكيد انت كان جواك حاجه وحشه و اسود كده من جوا فربنا سلطهم عليك يرموك برا المحافظه

ده اثبات ان الارض كرويه و هاتخلينتا نلف حول نفسنا

آفاق الحرية said...

السلام عليكم
احنا ان شاء الله نطالب رده ان المحلة تبقي محافظة
وعلي راي عمنا مصطفي كامل
لو لم اكن محلاويا لوددت ان اكون محلاويا
بس بصراحة الواحد بعد كده لازم يخلي باله من محافظته
نبقي نعمل عليها حراسة
ههههههههههههههه

dodda said...

عملوها فينا يا خال
انا كمان ..زيك كده
بس يا كسوفى دا انا يظهر كنت قدم السعدعلى المعادى
بقالى فيها بس 5 شهور
وبرضو صحيت لقيتنى اتجلبت!!!!
عموما انا مكنتش لسه غيرت البطاقه
عزائى الوحيد ان اللى بنى مصر كان فى الاصل حلوانى...بلديات يعنى
http://dodda-hanem.blogspot.com/

نوره الخشن said...
This comment has been removed by the author.
نوره الخشن said...

البوست الاخير بشهادة العتوله كلهم تحفة .. فياريت تروح تعلق وتخلص قبل ما الدنيا تتزحم وماتلئيش سانتي تعلق فيه .. انت حر
خخخخخخخخخخخخخ

واديني جيت وقولتلك اهه وعملت اللي عليا عشان ماترجعش تزعل زي كل مرة

سهر الليالى said...

يا حلااااااااااااااوة
والله الواحد بقى يشوف العجب فى البلد دى اليومين دول

هقول ايه يمكن عندهم وجهه نظر احنا مش فاهمنها ولا عمرنا هنفهمها

تحياتى من جمهورية اسكندرية الشرقيه البحرية الشمالية المهلبية

وسلملى ع المترو

دكتور بهــدوء said...

الحمد لله مش م حلوان ولا سته اكتوبر
وماسك ف ارضي
دا الارض عرض
خالو احمد
قريتلك كتير
بس اول مره ارد لاني لسه عامل البلوج جديد

appy said...

ههههههههههههههه تصدق الاحسن نربط المحافظه فى رجل السرير

دا ايه الخبيه دى بس انا مش عاوزة اصدفقان القاهرة الجديدة فى الموضوع ده بلا قرف عليهم طيب روح يا خالو رجع فى وشهم بقى

المنسى said...

هههههههههههه
شاللو العاصمة من تحتك
هههههههههههههه
ده بيقولك ياعم بيفكروا فى الموضوع ده بقالهم عشر سنين
لهو أنت متعرفش
هههههههههههه
ومش طلع كمان بعد فضلوا يفكروا فيه عشر سنين وبعد ما وعملوا المعادى تبع حلوان نسيو إن المحكمة الدستورية فىها وهى المفروض حسب الدستور المصرى إنها تكون فى العاصمة

أستر يارب
وإرحمنا بقى

أم أحمد المصرية said...

اولا السلام عليكم يا خالو عشان دي اول زيارة
ثانيا الف مبروك غيرت الجنسية في البطاقة و لا لسه و لا مش حتريق احسن اصحي الصبح الاقي نفسي ما بقتش اسكندرانية و بقيت رملاوية نسبة لمنطقة الرمل
عار ف اول ما سمعت الخبر من كام يوم قبل ما اقرا تدوينتك اللذيذة خطر في بالي يبيت الشعر اللي تعبنا من كتر ما قلناه
كم ذا بمصر من المضحكات و لكنه ضحك كالبكا
و سلم لي علي 6 اكتوبر و حلوان عقبال العاشر من رمضان

هبههههووب said...

اذيك يا احمد يارب تكون بخير
اللهم لا اعتراض
بقولك صحيح هى بنها هتبقى محافظه لوحدها صحيح وتبقى محافظه بنها ولا هتفضل تبع القليوبيه طول عمرها
لا اتعجب فنحن في زمن العجايب
متوقع فيه اى شىء وكل شىء

Dr.Mohammed Gohary said...

صباغ بجد ضحكتني قوووووي

هههههههههههههههههههههههه

هههههههههههههههههههه

يخرب عقلك يا راجل حلو حوار كل واحد يتبت عالمحافظه دا
هههههههههههههههههههههه

جامد يا باشا طول عمرك
تحياتي يا نجم يا متغنضر

DEW said...

ازيك يا خالو
البلوج جامدة ماشاء الله
انا لسة بلوجست جديد
وعايز اتعرف علي كل المدونين زمايلي
ياريت تقبلوا التعارف
ديو

بسمة ولكن.. said...

هههههههههههههه
ههههههههههههه
ههههههههههههه
نفسى افهم البلد دى ازاى وفين وامتى
كل اللى اعرفه عنها ان "مصر هى ام محمود....!!
وام محمود حرة تعمل اللى هى عاوزاه
تقسمها بقى بالطول ..بالعرض..بالوارب
المهم انها عودتنا نتفرج عليها وهى بتفاجئنا دائما بكل ماهو جديد
ابدااااااااااع
ومدونتك كمان ابداع يافندم
بس من نوع اخر غير ابداع ام محمود