خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

May 6, 2008

رسالة من خالو أحمد


إلى كل الناس المتضايقة .. وإلى المبئوئين والمتغاظين والمقهورين

والمتنيلين على عنيهم زى حالاتى كدة وزى معظم ولاد البلد .. وبنتوتات البلد بردة

إلى أجيال مصر المتعاقبة

(ما تفهمش متعاقبة دى من التعاقب أم من العقاب)

إلى الاجيال اللى ما اخترتش فى يوم رئيس ولا حكومة ولا وزير .. ومسلمة أمرها لله

دعوة من أخ لكم فى الإنسانية .. وفى الغيظ والقهر

دعوة للتفاؤل والسيطرة على الشعور الجارف بالقهر وانعدام الذات

لسه بردة الحياة فيها جوانب حلوة كتير .. مش كلها سودا ومش كلها ظلم وقهر

ولسه بردة مصر جميلة .. وهتفضل جميلة

صحيح إن أباطرة الحديد والاسمنت والدواء والكساء والاسكان قد اتحدوا علينا وسلبوا مصر مقدراتها وثرواتها وخيرها

لكنهم .. لم ولن يستطيعو منعنا ان نتنسم هواء مصر

ولا الشرب من مياة النيل الذى يسرى مع دمائنا

فيخلق فينا هؤلاء الرجال الذين قال عنهم الرسول صلى الله عليه وسلم

" خير اجناد الارض"

صحيح سلبونا حقوقنا فى الحياة الكريمة وفى التخطيط والطموح والحلم

لكن تبقت لنا وسائلنا الخاصة فى التنفس ، وفى طريقة تعبيرنا عن انفسنا

وربنا يخلى لنا المدونات والفيس بوك والصحافة النضيفة وكل واحد عنده قلم او صوت جرئ وضمير لسه صاحى

وصحيح أصيب المدونون بخيبة أمل فى الاضرابات الاخيرة ولم يتحقق ما نتمناه من تغيرات وخطوات نحو الاصلاح

لكن .. لم نفقد القدرة على النطق والحركة ، وتظل ألسنتنا رطبة ، وقلوبنا تنبض بالحق وحب الخير

وصحيح سافر مهندس مصرى وافتقدنا وجوده بيننا بشدة وسرت غصة فى حلوقنا ومرارة شديدة على شباب من خيرة أبناء الوطن كنا نتمنى ان تنتفع مصر بهم وتستمر طاقاتهم اللامحدودة

لكن .. يظل معنا فى عالم التدوين من أرضة الجديدة وبعيون مصرية خارج مصر

وعاد الاستاذ احمد على صاحب يوميات عيل مصرى إلى القاهرة وستفتح نافذتة يوميات عيل مصرى التى تنتنسم منها هواء مصر الاصيلة الجميلة وستعود الينا قريبا بإذن الله

صحيح يقبع خيرة شباب مصر خلف اسوار السجون والمعتقلات

لكن ..لازال لدى مصر عشرات من شبابها الذين يحيون فى كل لحظة .. الامل فى نفوسنا ان لدينا من يحمل اسم مصر ويخاف عليها

لدينا الاف المدونين والمثقفين وشباب كفاية وشباب الفيس بوك وما تبقى من شباب الاحزاب وشباب فى كل المجالات يتطلع الى حياة مصرية افضل ويخلق لذاتة فرصا فى وقت سُرق من مصر الاخضر واليابس

سُلبت الحرية .. والعدالة ..والقانون

وكشّرت المحاكم العسكرية عن أنيابها وكشف النظام عن انيابة بلا رحمة

وصحيح ماتت الضحية الثالثة التى قُتلت بلا ذنب فى أحداث المحلة الاخيرة وماتت الام ذات الـ 55 عام حزنا على ولدها خلف اسوار المعتقل

لكن لدينا ملايين الامهات وملايين الأكف التى تدعو لنا ليل نهار .. والقلوب التى تنبض بمباركتنا وتشجيعنا وبالسخط واللعنات على كل ظالم وكل فرعون

وصحيح تنحى الازهر عن دورة الجليل الى أداه مئات السنين ، وأصبح دوره مهمّشا لكن لا زال لدينا العلماء الشرفاء الأجلاء والذين ينيرون لنا الطريق فى تلك الفترة العصيبة السوداء من تاريخ الوطن


وصحيح أغتصبت الارض الزراعية وصرنا اكبر مستورد للمنتجات الزراعية بعد ما علمنا البشرية كيف تزرع الارض وصحيح تسمم الزرع وضاعت الثروة الحيوانية وأتلفت الصحة وأهلكت المحاصيل الزراعية

لكن يكفينا ناكل ان شالله لقمة حاف مع الاسرة والاصدقاء والحبايب وف وسط صحبة ولمّة جميلة

وصحيح لدينا نقصا حادا فى الرعاية الصحية وفى المستشفيات والكفاءة والاجهزة والمعدات الطبية لكن لدينا عشرات من من يتبرعون بدمائهم وملابسهم واموالهمخ لمساعدة غيرهم واللى مش مصدق يبص هنا
وهنا ودى مجرد عينات

وصحيح انتشر نجوم الكليبات العارية انتشار القمل والبراغيب والاكلان واصيح يسيطر على الاعلام حفنة من الشخصيات التافهة او الهبلة

لكن يبقى لدينا وائل الابراشى ومنى الشاذلى وأحمد المسلمانى وغيرهم شرفاءا يظهرون لنا الحقائق

لازالت مصر وستظل الى قيام الساعة جميلة فمصر لم تبنى فى 27 عاما لكننها بنيت فى عشرات الالف من السنين

مصر الاسلامة والقبطية والفرعونية والرومانية والفاطمية

خلى عندكم أمل أن الظلمة تنزاح وتيجى أيام جميلة نشوف فيها مصر دولة صناعية متحضرة إقتصادها قوى وأهلها مستريحين ومبسوطين وواخدين حقهم

وابقوا ادعولى

ملحوسة : الصورة اللى فوق من ألبوم صور رقمية واخده ومنزله على الفيس بوك واسمه لمحات مصرية أبقوا شوفوه


خالو أحمد

68 comments:

ftafeet said...

ازييييييك يااحمد

عامل ايه

على فكره كلامك حلو اوى بجد بوست جامد موت

ومش عارفه اكتب كومنت عليه ايه بصراحه بس ربنا يعدل حال مصر ان شاء الله ويخلى عندكو امل على طول ان بكره يبقى احسن


نونااااا

Anonymous said...

خالي احمدالسلام عليكم يا حبيبي
اخوك رامز عباس
وحشتنا طلتك
كدة تنكد عليا وانا اللي مفتقد مهندس مصري
انا مش هعلق علي البوست واقول رائع لكن هقول اكتر امتياز لانه يحمل الامل رغم الظلمه
يحمل قوة معنوية باننا مازالنا بقايا احياء ان لم نكن احياء بالكامل
اخي الرائع


رغم وجود الظلام لاباس من النضال حتي يعود ضوءا قد ولي


الله اكبر علينا شباب فعلا فعلا حاجه كويسه للبلد دى



انا سعيد بوجود امثالك لكن اسمحلي محنش متنيلين


احنا متنيلين بستين نيله





وحشنييييييييييييييييييييي
جدا



واعتقد ان رسالتك مست عمق القلوب اللي بتياس

mohammed alsha3r said...

صحيح

بوست جيد

كما تعودنا منك ياخالو

محمد فكري said...

الجميل..خالو/أحمد الصباغ..
قد يكون ده أول رد ليا عندك في المدونة..وأنا عارف إني واصل متأخر جداً..بس اهو أحسن من إني ما اوصلش بردوا :)
الموضوع اللي إنت طرحته..على أد ماهوه مؤلم...على أد ما هوه جميل...وفية شعاع أمل...بجد..يخلينا.بكل بساطة رغم كل الهم..نريم ابتسامة ونقول..بكرة أحسن..
وبامناسبة دي..هاذكر بيتين..نت كتبتهم..في فترة صراع نفسي بين اليأس والأمل..داخلي..
إن باتَ صدرُكَ بالشدائِدِ ضائِقاً // هوّن عليكَ وأطلِقِ الأنفاسا
وامحُ التشاؤمَ إن أتاكَ ببسمةٍ // واقهر بقوةِ آملٍ وَسواسا
واصعد إلى قِمَمِ التفاؤلِ عالياً // كن في الظلامِ إذا أتى..نبراسا
...................
...................
إن شاء الله بإدينا وأقلامنا وعقولنا وإيماننا..وقلوبنا.. :)
بكرة أحسن

الساحرة said...

بوست جميل

بس مش دعوة للتفاؤل دة دعوة للبكاء علي الامل
اللي راح

مخلوش احلام نحلمها دول حتي نسونا ازاي نحلم

اللي بيحصل دة استفزاز لمشاعرنا

ربنا ينتقم منهم

gehad_fci said...

بجد والله بوست جامده جدا
دا ولا نشره تسعه ياراجل
عاوزينك بقي تطلع من حاله الاكتئاب دي وتفرفش كدا
تحياتي الحاره

محمود الدوح said...

احمد
كلامك جميل جدا جدا
بس على فكرة لو قعدنا فى بيوتنا وسيبنا اللى بيحصل فينا حضارة عشرات الاف السنين هتروح فى ايام

مصر بتقع من على جبل عالى ولازم نلحقها
نمسك فيها بايدينا وسنانا ونمسك اللى وقعهوا من فوق وناكلهم بسنانا

بوست جميل
فية امل كبيييييير

مـحـمـد مـفـيـد said...

صحيح يا احمد كل كلمه قلتها
لكن بجد
دوله الظلم ساعه
ودوله الحق الي قيام الساعه
الغمه هتنزاح ولكن محتاجين صبر
وهنصبر

صاحب المضيفة said...

ربنا يبارك لك يا خال على كل اللي قلته


انت عبرت عن اللي جاوي بالظبط


يارب يفرجها من عنده يارب


تحياتي

محمود الدوح said...

انا رجعت عشان اقولك اتفرجت على الصور

بجد صور جميلة جدا

المنسى said...

ياسلام عليك ياخالو يافنان
إيه الكلام الجميل ده
والله كلام مصرى بسيط يردالروح
يملأ الحياة أمل وتفاؤل والله لما بقول لحد من صحابى كلام زى كده يقولوى يابنى إللى زيك خلصو من زمان إنت عايش فى العصر الحجرى والناس بقت عاملة زى الإنجليز مفيش فيهم المعاملة المصرية الطيبة ومحدش حاسس بالنعمة إللى ربنا إدهالو إنه خلقو مصرى مكرم عن ك خلق الله
كلام جميل جدا يافنان
تحياتى

A.SAMIR said...

كفاية يا احمد بجد
انا بقالي يومين من ساعة ما العصابة قررت زيادة الاسعار وانا شايف كل حاجة سودة
كل حاجة
مش طايق حد ومش طايق حاجة
مخنوووووووووووووووووووووق
انا كرهت كلمة لسة وكرهت كلمة بكرة وكفرت بكلمة امل
الظاهر ان احنا جيل كتب عليه ان يتعذب
تحياتي

فاتيما said...

يا خالو
الله يفتح عليك يا جدع
أهى دى الأيجابية و إلا فلا
جميل أنك لسه شايف طاقة نور
و لسه قادر تحس بالحاجات الجميلة و تشاور عليها
البوست دا عامل زى كوباية ميه مشبرة فى صحرا عز الضهر
أنا لما شوفتك قولت كدا برضو فى بالى
قولت الواد دا طيب قوى و نموذج مشرف للشاب المصرى اللى بيحاول يعمل حاجة يغير بيها دنيته و لو حتى بكلمة طيبة
دمت بكل خير يا خالو

د/اجدع بنوته said...

رغم ان بوستك حلو جدا

وكلامك حلو جدااااااا

ومفيش بعده نهائى

الا ان الحاله المرضيه والصوره السودا

لم تفارق عينى ولو لحظه

شكل العيب م عندى انا

وتقريبا دى مرحلة ما قبل العمااااا

آلام وآمال said...

فرج ربنا قريب فعلا
ربنا يزيح عننا الغمة
الواحد بقالو كتير مقراش حاجة تفتح النفس كده
لكن والله يا احمد غصب عننا كلنا
من كتر اللي بقينا نشوفه
ونسمع عنه

ايييييييه
ربنا كبير

مدحت محمد said...

وصحيح لما يكون موجود خالو احمد الصباغ
الجميل ده واللى زيه
يبقى اكيد لسة الامل موجود

جزاك الله خير على الرسالة

اهو ده عيبه said...

بجد احييك على الروح دى
وعلى ان لسه عندك امل وبصيص نور
واتمنى ان انا وغيرى نقدر نشوف الحياة من الزاوية دى يمكن نقدر نحس اننا عايشين شوية
تحياتى ليك

Maha Omar said...

و الله يا أحمد انا مش محبطة
خالص لأن الاحباط و اليأس قنوط من رحمة الله بالعكس انا شايفة ان كل اللي بيحصل في مصر جديد عليها و المفروض نتأمله و عارفة ان العصابة دي ساعتها قربت قوي
و كل المؤشرات بتقول
" و يمكرون و يمكر الله و الله خير الماكرين"
بس انا مخنوقة قوي
و مفروسة أوي
و خايفة أوي على مستقبل البلد دي

rona said...

بجد البوست رائع جدا ورغم انه به كثير من الامل كل مانشوف اما نصحى الصبح على خبر يضيه اى امل ربنا يستر على بلدنا وعلى البقيه الباقيه من الشباب العاقل المتفتح

شهيدة said...

الحمد لله ان هنا ممن حولي من بقي متفائلا

لابد من كبوة واثنين وثلاثه .. لكن المهم الاصرار على الوصول للنهايه

لو مكناش ماشيين صح مكنش ربنا امتحنا .. كون ان فيه امتحانات في الطريق دا معناه اننا ماشيين صح باذن الله

nonoymm said...

ان بعد اعسر يسرا
انا اللي بتعلم من حضرتك خصوصا البوست دة
بارك الله فيك
تفائل يا اخي وابتسم الدنيا حلوة
وباذن الله هتفرج بس نقول يارب

أحمد سعيد بسيوني said...

جميلة هذه الدعوة
صدق من قال
ما اضيق العيش لولا فسحة الامل
تحياتي

dr.Roufy said...

صحيح
أنا كنت باقول الكلام دا كله لنفسي لحد وقت قريب وأديها أمل
لكن أنا دلوقتي قربت أفقد ثقتي وايماني بحاجات كتير قوي
لكن الحاجة الوحيدة الى مش هافقد ايماني بيها هي الشعب دا
صحيح هو شعب يبدو حاليا انهزامي واستسلامي
لكن برضه..دا الشعب ...المصري
وبعد كلمة المصري مايتقالش

ربنا يرحمنا

لسه بعقلى said...

انا مش متضايقة ولا حاجة
وربنا يجعل كلامنا خفيف عليهم

تعالى ايها الصديق الى المدونة بتاعتى
فيها بوست جديد
مش هيعجبك خالص
بس محتاجة مشاركتك ...

tamer.sala7 said...

معلش يا خال انا عندي اوبجكشن علي السفر من مصر ومش لازم نعمل زي مهندس مصري
دي بلدنا واحنا زهقنا من الحكومة المصرية بس لسة مزهقناش من مصر
وهم اللي لازم يمشو ويسيبوها لينا

appy said...

احمد انا رايحه العباسيه لما تشوفنى هتعرف حالتى
اتفائل اه اضرب بالشالوت لاااااااااااااااااا

ابو النجوم said...

احمد
الحياه هنعيشها بمزاجنا او غصب عننا ومهما هيحصل هنعيش لحد ماتييجى الساعه ونروح فى داهيه لكن الناس اللى نازله سرقه وتهليب من قوت الشعب عمرهم لازم يطول علشان احنا شعب مترباش ودول ربنا باعتهم علشان يخلصوا مننا فى الدنيا .احييك على الامل فى البوست ده لكن ياترى هنعيش لما الامل يتحقق ولا هيتحقق مع الورثه عموما انا بشكر العصابه على 27 سنه هباب عشتهم من عمرى وبكده ضمنت انى هاادخل الجنه لما اموت لانه مش معقول ادخل النار دنيا واخره.... تحياتى

عادل نجم

إيمان صبحي said...

على فكر يا خالو بعد كل الصحيح اللي انت قلته وبعد كل الكلمات المختنقه المتفائله اللي انت كتبتها ...مقدرش اقول حاد بعد كلامك بس ف نفس الوقت مقدرش اوعدك بالتفاؤل

بس بجد البوست جامد قوييييي

حل وسط said...

يا ترى الامل ممكن يتغلب على الواقع
الموضوع عايز قوة عزيمة وقوة تحمل كبيرة قوي يا احمد
ياترى هنقدر
قدام كل الضربات والانهزامات والطحن اللي الواحد مطحونه ليل ونهار

دكتور حر said...

والله
بحاول
*
*
*

*
*
*
لكن
تسلم
يا خال

وواحشني والله

مصطفى محمد said...

شكرا يا أحمد

في الوقت ده فعلا كنت عايز جد يفكرني ان مصر عمرها مش 27 سنة

:)

Desert cat said...

الشعب كله اتخوذق وهو متاخد على خوانة
طيب كانوا ادونا انذار الاول علشان البواسير متوجعناش

مشتاق لله said...

ياساتر يااحمد كل ده في صدرك-اسئل الله ان يفرج عنكم ياخير اجناد الارض

Abo 7anf said...

السلام عليكم
كلامك حلو وجميل
فيه امل
وتفاؤل
بس يارب ينفع الامل لوحده

مهندس مصري said...

حبيبي يا فاكرني في غربتي
:)
سمعت عن البلاوي اللي حصلت
ربنا يستر

la3lahakhier said...

السلام عليكم يا احمد
اهو كدا حلوة الروح دى
اهى الحكومات رايحة جاية حتى الحكام بس هى بردوا بتاعتنا احنا
سلام

may said...

بعد كل ده ونتفائل
ههههههههههه
ماشي
هانحاول مع ال30% الزياده دول

somaa mahaba said...

وصحيح اننا اتجننا بس لسه الامل موجود
تحياتى ليك سومه_87

حزلووووقه said...

اه والله بنعرف نتنفس بطريقتنا

سلام

أنا حر said...

المشكلة ان كل ما نتفائل نتصدم صدمة جديدة وقوية وعنيفة وكأنها عقاب على التفائل ده
تفتكر المشكلة اننا بنتفائل دايما برغم الانكسارات ولا هي انكساراتنا كتير وملهاش دعوة بالتفائل يعني انكسارات على البطاقة لمجرد اننا مصريين؟؟؟
تحياتي

break said...

بسم الله الرحمن الرحيم

هو مين اللى طفا النور


بجد جالى اكتئاب
الواحد بردوا عامل نفسه م شواخد باله

ra7eel said...

احمد

انت متفائل قوى

ومش عارفه ده كويس ولا وحش

بس اكيد انها حاجه بتخفف عنا بجد كل الى بيحصل حاليا

خالص تحياتى لك

Anonymous said...

خالو احمد
من رامز عباس
عاجل
تم حذف مدونه
واحدة قاضية ودماغها فاضية --يا مسهل

ودة وانا بحاول افتحها من عندك
ليقت الويب بيقول لم يتم العصور عليها لانها محذوفة
الرجاء توضيح ذلك لي ان كنت تعرف شيء

Anonymous said...

خالو احمد
من رامز عباس
عاجل
تم حذف مدونه
واحدة قاضية ودماغها فاضية --يا مسهل

ودة وانا بحاول افتحها من عندك
ليقت الويب بيقول لم يتم العصور عليها لانها محذوفة
الرجاء توضيح ذلك لي ان كنت تعرف شيء

esraa said...

كلامك صح يااحمد

بس امتي بقي النهار هيطلع والنور يرجع ينور تاني؟

المبدع الناقد said...

تمني أن نصبح أحسن حالا في مصر


http://fekrety.blogspot.com/
زر مدونتي استاذي الفاضل

خمسة فضفضة said...

السلام عليكم ورحمة الله وبركاته

ازيك يا خالو
اليومين دول باطبق المثل اللي بيقول اصبر علي جار السو لا يرحل يا تجيله ......تاخده

ربنا يجعل يومه قريب


سلام

Lc said...

Hi friend, have a great weekend, in your beautiful country.

أبا يحيى وادم said...

السلام عليكم ورحمه الله وبركاته
اخى احمد الصباغ
كانت تلك اولى زيارتى لمدونتك المشهوره والتى سمعت عنها الكثير حقا
لكن ليس من سمع كمن راى
أن شاء الله لن تكون الاخيره اطلاقا
دعوه للامل
دعوه للتفائل
دعوه للمكافحه والمواصله
رغم كل ما حولنا
فنعم صدقت لدينا المزيد والمزيد
ومن صنع الامس قادر على صناعه الغد أن شاء الله
جزاكم الله عنا خيرا والسلام عليكم
أخوك
د/أبا يحيى وادم

Salma Amer said...

بحاول اتفاءل بس انا بقيت إنسانة مفروسة تمشي على قدمين
فعلا خلاص احنا جبنا اخرنا

david santos said...

Excellent post.
Thank you.

Ahmed Al-Sabbagh said...

فتافيت كلام

ازيك يا نهى

شفتى مصر اتبهدلت فى الكام يوم اللى سافرتى فيهم ازاى

منتظرين عودتك يا جميل

Ahmed Al-Sabbagh said...

رامز عباس

حبيب قلبى رامز

مقدرش اعكنن عليك ده حبيبى

انا بس مفتقدة اوى

Ahmed Al-Sabbagh said...

محمد الشاعر

ربنا يخليكى

Ahmed Al-Sabbagh said...

محمد فكرى

صديقى العزيز اسعدنى مرورك جدا كما اسعدنى زيارة مدونتك وكلامك الجميل
وحقيقى فى عالم التدوين اكسب كل يوم اصدقاء فى منتهى الروعة وفنانين وشعراء مثلك

dodda said...

خالو احمد
انا حطلب منك حاجه قبل مل تكمل التعليق
افتح البلوج عندى واقرا من الاول مش كاتبه كتير
بس حتلاحظ التحول..اللى غصب عنى

انا عمرى ما كنت بتاعت سياسه..
انا مهتمه اوى بالناس بس الناس فاجأه لاقيتنى بعد ما كان كل فكرى فى حاجات كلها تقدر تقول اجتماعيه ...بقيت بموت فى اليوم الف مره وانا شايفه الناس باوضاع ..لا حول ولا قوة الا بالله

مش عايزه حد يقول احنا حضارة سبع تلاف سنه
مش عايزه حد يقول ربنا يخفف عنا
مش عايزه حد يسكت
عايزه الناس تتلف حوالين بعض يتفقوا
عايزه نتغير عشان ربنا يرضى عننا ويساعدنا
نتوكل على الله مش نتواكل

ومش عارفه اعمل ايه
انا قلتها مره وحماتى اللى هى اعز اصدقائى افتكرتنى بهلوس من البنج!!..انا فقدت جنينى بسبب حالتى النفسيه من نقص العيش فى مصر...الناس تجوع فى مصر ام الخير كله؟؟؟؟؟

انا مرحه جدا عمرى ما بكشر وما بكتئب.. ولله الحمد ايمانى بالله لا محدود
بس والله العظيم بحس بضغطى بيعلى وبخبط دماغى فى الحيطه بجد
ومع كل ده يا خالو والخال والد ..كلامك طيب بخاطرى
عشت زخرا للغلابه...اللى لاقيين ياكلوا بس الاكل مر فى حلوقهوم من زعلهم على اهاليهم
وانا كل مصر اهلى
ربنا يحميك

maii bahaa said...

إزيك يا خالو
والله فيك الخير ..أصل الأحوال اللي عايشينها اليومين دول بتخلي الواحد شايف كله اسود في كحلي
ولفت النظر اللي انت عملته خفف شوية

الكلمة الطيبة صدقة

متشكرين ياخالو
:)

بسمة ولكن.. said...

مصر بتوجعنى.....
متنساش ايها المهندس المصرى ترجع
وانت راجع بقى جيب اخواتك معاك
انا مستنياكم

rona said...

اكيد بعد الظلمه نور
مع ان الظلام طول جداااااااااا
بس ان شاء الله النور هيطلع

Founoon said...

المفترض انها دعوة للتفاؤل

جابت معايا نتيجة عكسية خالص للاسف :)

Anonymous said...

Eхcellеnt pοst hοwеѵег , І was wondегing if уou
could writе a litte moгe on this subjеct?
ӏ'd be very thankful if you could elaborate a little bit more. Thank you!

my blog post; make boobs bigger

Anonymous said...

Gгeetings! I've been reading your site for a long time now and finally got the bravery to go ahead and give you a shout out from New Caney Texas! Just wanted to tell you keep up the good job!

my web-site; how to lose belly fat fast

Anonymous said...

Wonderful poѕt howeѵer I waѕ ωanting to
κnow іf yοu could ωгіte a litte
moгe on this topiс? I'd be very grateful if you could elaborate a little bit more. Thanks!

My web-site ... how to get rid of heartburn fast

Anonymous said...

Wow that was unusual. I ϳust ωrotе an really long commеnt
but after I cliсkеd submіt my сomment dіdn't appear. Grrrr... well I'm not writing all thаt
oνer again. Anуωау, just wantеd tο saу wοnderful
blog!

Rеνіeω my sitе :: how to increase height

Anonymous said...

Ι enjoy, cause I dіscoveгed exactly what Ӏ was looking fог.

You've ended my four day lengthy hunt! God Bless you man. Have a nice day. Bye

Also visit my blog ... locksmiths in solihull

Anonymous said...

Hello! Would you minԁ if Ι share your blog with my myspace group?
There's a lot of people that I think would really enjoy your content. Please let me know. Many thanks

Feel free to visit my homepage bigger boobs naturally

Anonymous said...

Write more, thats all I have to say. Literally, it seems as though you relied on the video to make your point.
You definitely know what youre talking about, why waste your intelligence on just posting videos to your site
when you could be giving us something enlightening
to read?

my web page quiz machines

Akhadiwi Rajie said...

WONDERFUL Post. thanks for share.. more wait ..
Ccoc.cmes.tn.edu.tw
My.sitemark.com
Photozou.jp