خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Nov 21, 2007

عيل مصرى .. فى الدستوووووور


طلعنا فى الدستور انهاردة


ولما أقول طلعنا .. يبقى واحد مننا


واحد بيعبر عننا كلنا


وبنحبه كلنا.. وبنلتف حولية


بس مش واحد عادى


واحد بيعبر وبيفكرنا دايما بأجمل لحظات حياتنا


هو بالنسبة لكتير مننا مش مجرد صاحب مدونة


بالنسبة لى انا شخصيا هو جزء من روحى


وأكتر من مجرد صديق وأخ أكبر .. أكتر بكتير


أكتر من مجرد شخص .. انا بعتبره رمز فى حياتى .. معنى كبير من معانى مصر الجميلة


لما بسمع صوتة فى التليفون أو أفتح مدونتة

بتهب عليا نسمات مصرية ونغمات قاهرية أصيلة من كل الجهات


وبحس إنى قاعد وحوليا فى حجرتى سبعين مليون مصرى لأ مش سبعين أكتر بكتير



كل المصريين اللى عاشو زمان وعايشين دلوقت ..


هو نسمة من هواء مصر المحمل برائحة الخبز البلدى الساخن و تراب مصر الغالى


هو لمحة من طفولة مصر المفقودة فى طيات الزمن التليد


هو صرخة من قلب مصر الملهوف على كل أبن فقدتة فى حرب الهزيمة وحرب الانتصار

تراه فى شوارع القاهرة الشعبية وفى مسارحها ومتاحفها وجناينها

وتسمع صوته مع رنات جرس عجلة بائع اللبن

وفى اختلاط اصوات التلاميذ فى مدارس مصر الابتدائية


اثناء تحية العلم

يعنى ايه كلمة وطن؟؟

يعني ارض حدود مكان

و لا حالة م الشجن

ولا ايه ولا ايه ولا ايه

شاي بالحليب على قهوة في الظاهر هناك

نسمة عصاري السيدة و دير الملاك

يعني ايه كلمة وطن؟؟

نشع الرطوبة في الجدار

ولا شمس مغرقة برد النهار

و لا امك و لا اختك

و لا عساكر دفعتك و الرملة نار

يعني ايه كلمة وطن؟؟

يعني ريحة يعني صوت

ايام بتشبه بعضها وسنين تفوت

و اما نسافر و الحدود يفصل ما بينها الف ميل

بنسيب سنين الحب و العمر الجميل

ولا ايه ؟

ولا بناخد كل دول

هزة فرح او غيم هموم

و احنا بنحلم بالوصول

حتى في عرقنا في الهدوم

بتهزنا حالة شجن

!هو ده معنى الوطن




هذة الكلــــــــمات تسمعها عندما تفتح مــــــدونة
يوميـــــات عــــيل مـصــــرى

وتحفك من اليمين صور من قلب مصر النابض
صور القهاوى والبيوت والجوامع والكنايس والقصور والحدائق و كوبرى قصر النيل زمان



كنت أعد العدة لكتابة مقال جامد عنه كما ذكرت فى تعليقى عنده بتاريخ 17/11/2007 هنا




ولكن سبقتنى مجلة الدستور اللى بدفع فيها لحلوح كل يوم ويوم الاربع لحلوحين كمان ينفسونى فى البؤين اللى هقولهم ( ان ما وريتهم ) هههه

فى عدد اليوم الاربعاء 21/11/2007 من جريدة الدستور قام الزميل عبد المنعم محمود صاحب مدونات
أنا أخوان ومدونة منعم ومنعم برس
بكتابة هذا المقال الرائع


إضــــــــــــــــــــغط هنا لتكبير صـــــــــــــورة المقال




وإضغط هنا لتحـــــميل الصـــــــورة


تحياتى أحمد الصباغ

51 comments:

سهر الليالى said...

أحمد صديقى الجميل
بجد بهنىء صديقك المدون الجميل الاستاذ احمد على صاحب مدونة يوميات عيل مصرى عليك وبهنيك عليه
وربنا يديم صداقتكم للجنه

أنا أكتشفت ان كان فايتنى كتير اوى لانى مدخلتش عنده قبل كدة بس اوعدك انى هروح لانى بجد حبيت البوست والمقال واللى كان بيحمل كتير من كلماته
ولأن اللى يكون صديق حد جميل زيك يبقى اكيد هنلاقى عندو جميل
يا بخته
:)

وبقولو هو انى هقرا بوست بوست عندو لانى بجد بحب زمان وايام زمان ايام الزمن الجميل والناس الطيبين على حق
تحياتى ليك يا أحمد
ولأحمد صاحب مدونه عيل مصرى

عصفور المدينة said...

ياعيني يا صباغ ضاعت مقالتك بس برضه أنا أنتظرها حيث أنني كنت أنوي أكتبها ولما قرأت تعليقك لغيت الفكرة

اسكندراني اوي said...

ايه يا خاااال
مبروك وعقبال الحبايب كلهم

دكتور حر said...

والله فرحت يا عم احمد
لما قريت الخبر
هي فعلا مدونه تستاهل
وعيل عسل

مكملتش شهرين لكن جذبت الكثير من القراء

ربنا يبارك لك ويباركله

وفي انتظار بوستك ان شاء الله

Salma Amer said...

يا نهار اية الكلام الجميل وبعدين انت سبقتني امال لو قابلته حتعمل اية
أ/ احمد محمد يستاهل اكتر من كدة بكتير لأنه ببساطة إنسان رائع وعنده قلب مساكن شعبية بجد تساع كل ناس
والمدونة بتاعته بتعبر عن جزء صغير منه
تحياتي ليك على البوست

نوري said...

الوطن ده حاجه مهمه جدا
عند المواطن لغايه دلوقتي
اما عند العالم الاخر
فهو مصدر رزق فقط
واكمني انا من المواطنين فانا معنديش كلام اجمل من الاغنيه الي انت كاتبها ومن اختيار احمد العيل المصري البسيط
شكرا لانك عرفتني ع احمد العيل المصري وده جميل مش هنسهولك ابدا
و(بست وشز فور يو)0
وتقريبا الكومنت ده شامل البوست ده والبوست الي قبل الي قبله
هههههههههه

Emre Belözoğlu said...

الف مبروك يا ابو حميد باشا ليك ووللاستاذ احمد على وان شاء الله من تقدم لتقدم ويارب توصلو للفرانس فوتبول واللا جازيتا ديلو سبورت ..

Иεşċąfě &иεmö said...

لا كلام جامد ئوي و كبير ئوي ئوي بس بصراحه هو الكلام في محله انا بعرف ا/أحمد من فترة صغيرة بس بصراحه انا بحس اني بعرفه طول عمري هو شخص واضح و صريح و اهم حاجه طيب جدا جدا و بيدخل البهجه ديما لما بيجي عندنا بجد ربنا يخليك لينا يا ا/أحم

مهندس مصري said...

و الله انت راجل جدع يا أحمد و قولت الكلمتين اللي أنا شخصياً كنت عايز نقولهم
و أعتقد ناس ياما متفقة معاك في كل كلمة قولتها على الأستاذ أحمد محمد علي
و بجد نفسي نتقابل معاه كلنا لما يرجع مصر
الله يكرمك ياأحمد و تسلم لنا دايماً بإحساسك الجميل و مشاعرك الطيبة

MKSARAT said...

جميله فعلا
مهو لازم الحلو يجيب الحلو اللي زية
تحياتي

3ala asm masr said...

مبرررررررررررررروك
عقبالنا يارب

منـير said...

صديقى أحمد
كلامك اكتر من رائع وملئ بالحب والمشاعر النبيلة

واستطعت انك تقدم صاحب مدونة عيل مصرى نعم التقديم اللى يليق بجمال مدونتة ومدونتك ايضا

حقيقى استمتعت جدا وجسمى اهتز وانا بقرا كلامك

اسلوبك رائع فى التعبير وكلمات فظيعة

شكرا يا صديقى

مؤمنه said...

السلام عليكم ورحمة الله وبركاته
بوست رائع
يعنى ايه كلمة وطن
الله
يالا معلشى تتعوض فى بوست قادم
جعبة حضرتك لا تفرغ
والسلام عليكم ورحمة الله وبركاته

يوميات عيل مصري said...

انا ما رضتش اعلق لا امبارح ولا النهاردة
مش عارف اقولك ايه
اه اللي بتعمله في ده
اقلوك ربنا يخليك
طب وبعدين
وتتجوز احلى واحدة في الدنيا
وبعدين
وتكون أصلح النساء
طب وبعدين
ويكون عندك أولاد أجمل الولاد
طب وبعدين
وتبقى احسن الناس في كل حاجة
طب اقولك إن انت غالي عندي أوي
ولا أقولك .. إني متلخبط من الكلام
ولا اقولك .. انت عند رمز لشاب مصري اصيل
ولا اقولك .. تعيش وتكتب
ولا اقولك .. يا خالو أحمد يا جميل
ولا اقوك ايه ولا ايه ايه
شاي بالحليب على قهوة في الظاهر هناك
نسمة عصاري السيدة ودير الملا
اقول للناس ان انت اللي ساعدتني في المدونة
وإن انت اللي نزلت الاغنية التحفة
وإنك عايش حياتك عشان غيرك
اقول للناس انك قلت الكلام ده كله من غير ما عمرك تشوفني
ولا اقول للناس .. إن البلد دي حلوة عشان فيها زيك
اقو ايه ولا ايه
ربنا يخليك يا صباغ

السيد شبل said...

ايه الحلاوة دى يامعلم....... وحلو موضوع خالو ده..... ولاد اخواتك اللى معاك ف الصورة ؟ صح...
رائعه مدونتك على فكرة
أنا هضيفك عندى
----------------------
اتمنى انك تخش برضه ع المدونة بتاعتى وتقللى رايك.....ماشى يا معلم
على فكرة" بلا اسم"
هو اسم الدونة بتاعتى مستنيك بجد

السيد شبل said...

بجد يا صباغ انا عايز اعرف ناس بتفهم زيك وبتكتب ع المدونات واعلرف رايهم ف مدونتى

ولقلك المرة الجاية اخش الاقى اللينك بتاعى
قشطاط

عايز اتكلم said...

عم أحمد الصباغ
صباح الفل يا غالى
بصراحه انت خليت عنيا تدمع من قصيدة يعنى ايه كلمة وطن.
باشكرك انت ويوميات عيل مصرى وغيركم كتيييييييييير من اصحاب المدونات الروعه اللى بتخلى الواحد يندم انه ما قرأهاش من زمان.
ربنا يوفقكم ويحلى ايامكم
آسر الشاملى

أحمد مصطفى said...

تدوينه حلوة

وفعلا مدونته تستهل الشو دا

وكما سبق وقالت له

ياعزيزى كلنا عيال

تحياتى

أحمد مصطفى

عاشقه الفردوس said...

بجد بوست رائع يااستاذ احمد

وانا فعلا دخلت المدونه دى وبجد رائعه
اقولك على حاجه وماتقولهاش للاستاذ احمد صاحب المدونه
ههههههههههه
بجد انا دخلتتها ومعرفتش حط ولا كومنت من روعتها مش عارفه اعمل فيها حاجه ولا ارد ولو بكلمه عليها

جزاك الله خيرا واياه

NIDAAL PAL said...

ايه يا حج
مساء الخير و الفل و الياسمين
ايه يا عم التدوينة الجامدة دى
خمسة و خميسة طبعاً يا معلمنا
و مبروك لمدونة يوميات عيل مصرى
ي.ع.م
و اتمنى لصاحبها التوفيق الدائم و العطاء المستمر
ور بنا يوفقك يا صباغ ....
و مستنين جديدك دائماً
و عن جد يا صباغ ... انت صاحب عن جد و لى الشرف ان اكون صديقك
....
بقولك ايه ما فيش حاجة كدة دم فى دم
ضرب فى ضرب ..يعنى اى حاجة
هههههههههه
حبيبى و الله يا صباغ
بارك الله فيك / اخى و صديقى

NIDAAL PAL said...

احمد يا صباغ
طبعاً انت صاحبى و حبيبى
بصراحة انا عاجبتنى قوى الصورة بتاعت اتفوو على اسرائيل فاخذتها و ما انتظرت موافقتك
اسف لهذا :
و اطلب منك الان السماح لى اخى باخذها
بتقول ايه ؟ موافق
مش عارف اقولك ايه يا صباغ انت فعلاً تمام التمام
شكراً يا عمنا

Ahmed Al-Sabbagh said...

سهر الليالى

صديقتى الجميلة ميرووو

اشكرك من قلبى على كلامك الجميل الرقيق اللى تعودنا دائما عليه منك

وابقى قوليلى رأيك لما تقرى بوستات عيل مصرى

Ahmed Al-Sabbagh said...

عصفور المدينة

اه شوفت الرخامة بقى

Ahmed Al-Sabbagh said...

اسكندراني اوي


الله يبارك فيك وعقبالنا كلنا ما نتدستر

Ahmed Al-Sabbagh said...

دكتور حر

اشكرك على الزيارة

Ahmed Al-Sabbagh said...

Salma Amer

معلش بقى يا استاذة سلمى على أد ما عرفت أعبر
:)

Ahmed Al-Sabbagh said...

نوري

شكرا بس انا عايز لكل بوست تعليق ماليش دعوة :)

Ahmed Al-Sabbagh said...

Emre Belözoğlu

هههههههه
واضح ان دماغك كلها كووورة زى ما قلت

Ahmed Al-Sabbagh said...

Иεşċąfě &иεmö


اشكرك ومنتظرين مدونتك

Ahmed Al-Sabbagh said...

مهندس مصري

اشكرك يا باشمهندس احمد وربنا يديم المحبة واكيد هنلتقى قريب

Ahmed Al-Sabbagh said...

MKSARAT

شكرا يا ابو السيد بس انا بتكسف :)

Ahmed Al-Sabbagh said...

3ala asm masr

اشكرك يا هند

Ahmed Al-Sabbagh said...

منـير

أشكرك يا منير على كلماتك الرقيقة وتعليقك الاكثر من رائع

Ahmed Al-Sabbagh said...

مؤمنه

ههههه
اشكرك

Ahmed Al-Sabbagh said...

يوميات عيل مصري

صدقينى مهما كتبت عنك فأنا مقصر فى حقك

وصدقنى كل الناس دول اللى بيقولو انى كتبت عنك كويس لو عرفوك عن قرب هيقولو انى قصرت فى حقك

وصدقنى انا بتمنى لك كل خير واتمنى ان ربنا يحقق لك كل الدعوات اللى دعيتهالى
ربنا ما يحرمنا منك ابدا

Ahmed Al-Sabbagh said...

السيد شبل

ابو السيد انا مقدرش ارفض لك طلب

ودايما طمننا عليك

Ahmed Al-Sabbagh said...

عايز اتكلم

اشكرك يا آسر ويا عم ما تختفيش كدة

Ahmed Al-Sabbagh said...

أحمد مصطفى

اشكرك يا صديقى العزيز

Ahmed Al-Sabbagh said...

عاشقه الفردوس

ههههه
انا كمان ببقى محتار اكتب كومنت ايه

Ahmed Al-Sabbagh said...

NIDAAL PAL

اشكرك يا حبيب قلبى وعلى فكرة حملة اتفو على اسرائيل دى كانت معمولة وانا كنت واخد اللوجو بتاعها بس طالما استأذنتنى يبقى لازم ادفعك جوز جنيهات
هههههه
حبيب قلبى انت

shahy said...

بصراحة بصراحة هي مدونة تستاهل انة ينكتب عنها
وبصراحة كمان واضح انك انسان مصري اصيل وجميل

تحياتي ياخلو احمد

نسيت اقولك ان رباعياتك كانت حلوة وعجبتني وضحكني قوي الجزء اللي كاتب فية اسمك واضح انك بتحب اسمك قوي وانا كمان بحب اسمي جدا

سلامات

محمد مارو said...

الف مبروك يا ابو حميد
عقبالك يا رب
و اتمنى مزيد من التقدم لكل الاخوه المدونين

السيد شبل said...

ورحمة ابويا يا صباغ انت بتهزر
كده اخش ملاقيش اللينك بتاعى
طب على الطلاق لأفجر سيجما بتاعة الأدوية
ايه ياصباغ
---------------------------------
القى بكرة لينك جامد جدا
السيد شبل..بلا اسم
------------------------------
ايوة طويل كده عشان الناس تشوفوه
---------------------------------
والا هزعل منك وانا مش عايز ازعل منك لانى بجد بحبك

عـسـل مـرمـر said...

مقدمتك فكرتنى بمقدمات هاله سرحان

real love said...

يعني ايه وطن ؟
يعني بيت كبير بيلمنا
حضن حنون بيضمنا
شجرة كبير ةبتضلل علينا
حضن دافى وايد بتطبطب علينا
يعني بلد بتحمينا
وأرض بتأوينا
وجيش بيدافع عنا
وطن يعني أمان
يعني حنان
يعنى لما نقول عنها
نقول أحلى كلام
وهو دا ممكن نقول عليه
وطن وأغلى وطن
.......................
لإهداء خاص لكاتب هذا البوست
من
ريال لف

ابن حـجـر الـعـسـقـلانـى said...

يا عم احمد أنا متابع مدونتك بقالى فترة .. و نفسى أعلق فى الكام تعليق الأوائل (مش هاقول أول تعليق عشان أعتقد إن دة مستحيل) لكن دايما باجى فى الخمسينات و الستينات .. المرة دى قلت أعلق و أجرى على الله .. لقيتنى فاتنى موضوع الرباعيات .. لكن لحقت موضوع العيل المصرى و يومياته .. أحييك بشدة على الموضوع الجميل اللى بيدور حوالين مدونة جميلة و اللى منشور فى مدونة جميلة

بت خيخة وأى كلام said...

كلماتك اللى فى اول الوست تحفة
ويابخت احمد صاحب مدونة عيل مصرى
بيك يا صباغ

وبما اننى مش احمد ولكنى تمنيت ان اكون احمد

من كلامك الحلو عنه
هى دى الجدعنة ولا بلاش

اختك خيخة

يوميات عيل مصري said...

صباغ كفاية بقى البوست،
انت فين يا عم
سيبك من العيال، عاوزين شغلك يا ريس
وحشتنا

ahmed said...

بجد بهنىء صديقك المدون الجميل الاستاذ احمد على صاحب مدونة يوميات عيل مصرى عليك وبهنيك عليه

ali said...

يا عم احمد أنا متابع مدونتك بقالى فترة .. و نفسى أعلق فى الكام تعليق الأوائل (مش هاقول أول تعليق عشان أعتقد إن دة مستحيل) لكن دايما باجى فى الخمسينات و الستينات .. المرة دى قلت أعلق و أجرى على الله .. لقيتنى فاتنى موضوع الرباعيات .. لكن لحقت موضوع العيل المصرى و يومياته .. أحييك بشدة على الموضوع الجميل اللى بيدور حوالين مدونة جميلة و اللى منشور فى مدونة جميلة

zaid said...

ورحمة ابويا يا صباغ انت بتهزر
كده اخش ملاقيش اللينك بتاعى
طب على الطلاق لأفجر سيجما بتاعة الأدوية
ايه ياصباغ