خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Dec 3, 2007

حد بااااااااااايع ؟؟

إعــــادة بناءاَ على طلب الجماهير

حد جاى معايا بايع ؟؟

انا راح ابيع وأسرق وأغش وأرتشى

وأقش وأنهب فى الغلابة وما اختشى

أنا راح أبيع وطنى لمحتل صايع

راح يدلعنى ويخلينى شاب مايع

حد بايع ؟

أنا راح ابيع بلدى .. خلاص ماهو بلدى ضايع

حد جاى معايا بايع ؟

أنا راح ابيع فدادين غيطان

وراح ابيع حتى المصانع

وهبيع مدارس أو مصالح

أو كنايس أو جوامع

حد جاى معايا بايع ؟؟

إخلاص خلاص .. وضمير خلاص

ووفاء ونخوة وهمبكة دى حاجات رفايع

حد جاى معايا بايع ؟؟

أنا راح ابيع وطنى لمحتل صايع

راح يهنينى فلوس وسيما وهلوسة وبنات رئايع

صدقونى مش كلام

ده انا بعت له حتى ببـــــلاش

وقبضت حـــــق بلادى كــاش

وخلصت البيعة خلاص بالليل

من غير مماطلة أو تأجيل

بقى عندى فيلات في مارينا

وشاليه على شط النخيل

وبدل الشقة الواحدة .. لأه

عندى العماير عالنيل

وولادى وزراااا

واخواتى سفراااا

ومراتى ماسكة التمويل

مش شايف حد جه عليا وقاللى بايع ؟؟

طيب خلاص

دلوقتى أبيع وأقبض لوحدى

وسايب لكم عهد الكرامة والأمانة والزمن الجميل

حد جاى معايا بايع ؟؟



أحمد الصبــاغ

يوليو 2007

47 comments:

علياء said...

جيت على الوجع

Ahmed Al-Sabbagh said...

ايوة يا عليــــاء
بس البلد كلها بقت اوجاع دلوقت
يعنى اى كلام بيتقال بقى بيوجع

Radwa Lotfy..(Rodirock) said...

جميلة اوى و الفاظ متميزة...و بجد عاجبنى الحس الوطنى اللى فيك :)

بت خيخة وأى كلام said...

هى لسه فيها حتة متبعتش مخلاصكله اتباع
ومبقاش وطننا ده بقى وطن ناس غيرنا يعنى لو قامت حرب تفتكر فى حد هيقوم يحارب يحارب ايه ويحارب علشان ايه
يحارب على حاجة مش بتاعته
منه لله اللى فى بالى

مهندس مصري said...

خش عندي
عندي المشتري
http://egyptioneng.blogspot.com/2007/10/blog-post_23.html

mabdona said...

بس القصيدة دى منشورة فى مواقع تانية على اساس انها بتاعة البضين احمد فؤاد نجم
ايه تعليق يا صباغ على الكلام ده

دكتور حر said...

الله يسامحك يا صباغ

قلبت علينا المواجع

سهر الليالى said...

اولا بهنيك جدا على ما كتبت بجد رائع ومنظوم حلو اوى وبيوصل معانى كتير كبيرة

بص يا صباغ أنا بجد بحب بلدى اوى اوى
وصعبان عليا اللى وصلتلو بس مش راح ابيعها ابدا

هصبر لعل فرج ربنا ييجى قريب طالما مش قادرة اعمل حاجة فأقل حاجة طالما مش قادرة اعمل حاجة انى احبها ومش ابيعها

تحياتى يا جميل

السيد شبل said...

ما نقدرش


ولا انت تقدر

ولو فكرنا نعمل كده فى شىء مغروس جوانا هيمنعنا.... كان فيه قصيده بنفس المعنى ده لعلى سلامه بعنوان تيجى..كان بيقول
تيجى نهرب م الحقيقة
.
تيحى نتعلم ازاى ننام


لكن ما نقدرش ياجماعه
وما تنساش فكل ميسر لما خلق له
من خلقه الله حرا يابى ان يكون ذليلا

Arabic ID said...

ايه يا عم أحمد
هو أنا أغيب عنك شويتين ألاقيك قالب كيان المدونة
وخليتها فاتحة على قلبك طوالى

ايه ياعم انت شيطانك
قصدى الوجع بتاعك بيجى على الشتا ولا إيه

إيه الحلاوة دى

ربنا يكرمك ويوفقك يا أحمد المبدع باشا

بت خيخة وأى كلام said...

كنت لسه هاقولك انشرها تانى
لانها بجد تحفة

يوميات عيل مصري said...

أنا قاعد لحد ما ترجع يا ريس

Ahmed Al-Sabbagh said...

Radwa Lotfy..(Rodirock)

شكرا يا رضوى ونتمنى نعرف اخبارك عشان بتختفى كتير

Ahmed Al-Sabbagh said...

بت خيخة وأى كلام

اكيد ولكن كلنا بنحب مصر وانا شخصيا أفديها بروحى
ومفهوم ان الشعر ده موجة للى باعو البلد وقبضو التمن

Ahmed Al-Sabbagh said...

مهندس مصري

دخلت يا باشا وعجبنى جدا

Ahmed Al-Sabbagh said...

mabdona

عزيزتى انا معنديش أى معلومات انها اتنشرت بإسم احمد فؤاد نجم
واظن ده لو حصل ده هيبقى شرف كبير ليا

Ahmed Al-Sabbagh said...

دكتور حر

معلش بقى ما تزعلش
خميرة عكننة انا

Ahmed Al-Sabbagh said...

سهر الليالى

صديقتى الجميلة ميرو

اكيد كلنا مش ممكن نبيع

وكلنا نفديها بروحنا وده بجد مش كلام

واحيى فيكى الروح العالية

بس مش غريب عليكى

ما انتى اسكندرانية

Ahmed Al-Sabbagh said...

السيد شبل

تسلم ايديك يا حبيبى
انا بموت فى على سلامة

Ahmed Al-Sabbagh said...

Arabic ID

ايه ده طارق هلال ده ولا انا بحلم

لا اكيد بحلم

انت فين يا اخى من زماااان

اختفيت فين

ولا هان عليك العيش والزراعة اللى اكلناهم سوا فى الكلية

Ahmed Al-Sabbagh said...

بت خيخة وأى كلام

أشكرك تانى على تشجيعك الدائم لى

Ahmed Al-Sabbagh said...

يوميات عيل مصري

ازيك يا استاذ أحمد

انشالله تكون حضرتك بخير

انا جيت ومنتظر حضرتك وهخرج بعد شوية

شكرا على السؤال

3ala asm masr said...

بوست جامد أوى يا أحمد
وجعنى أوى
خلاص فعلا كل حته فيها اتباعت ببلاش
تحياتى

Desert cat said...

طيب يا احمد انا هبيع
بس مش بعد ابيع اروح المعتقل
علشان نصيبى يتنهب برضه
ياباشا بعت زى ما بعتش
احنا فى النهاية متهانييييين
وساكتين وراضيين ومطنشين
تحياتى

عاشقه الفردوس said...

حسبنا الله ونعم الوكيل

جزاك الله خيرا
رائع ماخطته يمناك

لولا said...

تعليقي على البوست الجامدة

اغنية هاني شاكر: كله ضاع كله راح كله اتكسر كله ادمر

وندعي ربنا
اللهم هون علينا مصائب الدهر

قول امين

د/اجدع بنوته said...

ايون انا جايه معاك هبيع ..

احنا عيله بتبيع اعضائها ع راى هنيدى ..

ف مانع .. اسلوب جامد وكلام اجمد

انت م البارعين ف جعل الفسيخ

شربات .. بتضحكنى ع مصايبنا يعنى

تسلم ايدك

nesma algendy said...

مدونتك رائعة وانا اسعد باكتشافها شكلها بيقول حاجات كتير

الدائخ said...

عارف يا أبو حميد .. أنت لخصت اللي بيحصل في قصيدة ..
لأ بجد أنا بحييك
فيها سلاسة و معني كبير .. مش مجر كلام و خلاص
بس عيبها الوحيد إنها داست ع الجرح، مش جت عليه

لما أنا أكبر و أبقي قدك و ما لاقيش حاجة ف بلدي ملكي .. تفتكر ساعتها المفروض الواحد يعمل إيه ؟ .. بس برضه أنا غتيت و مش حاسيبها تبوظ إلا لما ايأس خالص .. قول يا رب ما ايأسشي

آمين

عبدالرحمن ياسين said...

السلام عليكم
أظن إن ده أول تعليق عندك
بس مش هي دي أول زيارة
مخش في التعليق

........
أولا جزيت خيرا علشن إنت فعلا وصفت الحالة بطريقة جميلة....فجزاكم الله كل خير

ثانيا أنا مش هبيع...ولا حد عاوز يبيع
أمال سكتين ليه..ما هو دا إلي مجنني

مينفعشي نكلم بس ياإخواننا
لازم نقول مش هنبيع..مش هنبيع.....
عمواما مشكور على البوست الرائع

وجزاك الله خيرا
وكان هذا في ميزان حسناتك بإذن الله


تحياتي لك

e7na said...

روق يا عم
البلد دى بتتسرق بقى لها سبعة الاف سنه
تفتكر لسه تجيب حاجه فى سوق النهارده

عصفور المدينة said...

أنا مش جاي معاك وبعدين اصبر علينا إن ما كناش نرجع كل الحاجات اللي انت بعتها مانبقاش مصريين

MKSARAT SAYED SAAD said...

حبيبي وصديقى الغالي احمد
طيب وبعدين يا احمد اية الحال عمالين نعترض بالكلام واوقات شوية مظاهرات لكن للأسف الوحش بيزيد انا بجد بدأت ايأس مصر جميلة قوي يا احمد متعرفشي انا بحب بلدي قد اية وبقول يواد ابتدي بنفسك قبل ما تفكر في اللي غيرك بيعملة غلط بس للأسف الوحش بقى كتير والضغط كل يوم بيزيد مهي الحكومة دية مننا عينة من شعبنا الكراسي ثابتة والناس هى اللي بتتغير معني كدا ان شعبنا بقى كلة وحش
مصر عمرها ما كانت كدة الكابوس اللس اللي بعيشة في كلة حاجة حوليا في تعامل بشوفة كل يوم
انا بعمل اللي اقدر علية وزيادة بس لما بشوف اجيال صغيرة طالع منها كتير بقة ممسوخ بخاف على بلدي قوي وبخاف على اهلى واصحابي
ويفضل سؤالي كلمتين
في اية؟

Omar said...

..........................

بمناسبة البيع يا احمد

فكرنى البوست بتاعك بواقعه يمكن تلخص لنا انهم مهما باعون وتنازلوا ،و انبطحو لكن بيبقى جوانا معنى حقيقى و نظيف للوطن

من 10شهور كنت مسافر المانيا فى مهمة عمل و لحظى السعيد جدا كانت فى المقعد اللى جنبى السيدة الفاضلة / حرم رفعت الجمال او رافت الهجان و هى كانت راجعه بلدها الاصلى المانيا بعد زيارة فاشلة لمصر عشان تحصل لابنه - من الجمال - تحصل له على الجنسية، وطبعا شربت المر من كيعانها عشان تجيب الجنسية لابنها و للاسف فشلت .. القعدة طولت 4 ساعات ونصف حكت لى كل شىء عن القصة الشهيرة المزخرفة و المختزلة اعلاميا بالمسلسل الشهير.

بس الست اللى موش جذورها مصرية وبتحمل فقط الجنسية المصرية قالت لى عبارة خلتنى احس قد ايه ان معنى الوطن لا يختزل فى بيع او شراء او حمل جنسية او بزنس متعجل لبيع كل ما تطوله الايدى

قالت لى: تعرف يا مستر عمر ؟ هههههههه مستر عمر!!!؟ مع انى تقريبا من دور ابنها فى السن.

المهم قالت: رغم المعاناه اللى بشوفها فى مصر.... لكن ملامح رفعت يوم وفاته خليتنى احب مصر زى ما هوا حبها بالظبط، رغم انى مولودة فى دوسلدورف لكن حاسة انى اتولدت تانى كسيدة مصرية يوم ما رفعت قالى يعنى ايه معنى الوطن.

عشان كده يا احمد، مهما باعو او تنازلوا او انبطحوا،..... بيفضل الوطن الحقيقى بشكل الجميل و قيمته العظيم جوايا و جواك و جوا كل انسان عارف معنى حقيقى للوطن..............


طابت النهارات و الاماسى و السلام عليكم

................

أحمد مصطفى said...

والله كلام فى الصميم
تحياتى لك

Al Azif said...

السلام عليكم

كلنا بعنا

كلنا بعنا دراعتنا و لسنتنا
كلنا بعنا عقولنا و دماغتنا
...من يوم ماغمضنا عنينا
و حطينا جزمنا في بقنا و سكتنا

الله عليك يا ريس أحمد

امتى بقى نسمع منك لما البلد حالها ينصلح
قولوا آمين

بس في أمل

Rehab Mostafa said...

تسلم أفكارك... معبره جداً بجد ماشاء الله عليك

كرياكو said...

احمد
بيع ياعم هيا البلد دى بتعتنا البلد دى بتاعت غيرنا

غمض عينيك said...

باشا استنى
انا جاي

رنــرونـه said...

ايه الكلام الجامد ده بجد فظيع

همسات عاشقه said...

بجد جميله اوى اوى وكلام كله صح بجد

البلد اللى كانوا اليهود بيحلموا

برمله واحده من ارضها دلوقتى بقوا مش

بياخدوا رمله واحده بقوا

بياخدوا اراضى بجد حلوه اوى

الفاظها حلوه اوى تسلم ايديك

ويتهيالى كلنا شكلنا هنبيع فى الاخر مش

بمزاجنا

هيبقا غصب عننا والله اعلم

همسات عاشقه

ســــــهـــــــــر said...

لمبن تبيع وما فى حد هيشترى
زمنك ده زمن المهيصه
لو للمواطن كان تمن
ما كان سلم م الخصخصه
---------------------------
تحياتى لفكر و حرف و حرفه

شيماء خطاب said...

أحنا ممكن نبيع بس نبيع الانسان اللى
بايع تسلم أيدك يا احمد

Sho0ody said...

ياأحمد الناس دلوقتى بتبيع إخواتهم
وبتبيع ولادهم
وبتبيع نفسهم
مش عاوزه يبيعوا وطنهم
لكـ الشكر

دعاء مواجهات said...

نهااااااااارك أبيض ياصبااااغ

إية ياابنى دة

وتقوللى لا يرقى؟؟؟؟

اوومال مين اللى يرقى بقى؟؟؟

زى ما إتفقنا متسكتش.....

دعاء مواجهات said...

التعليق اللى فات كان

هووزااار

نيجى بقى للجد...
__________________________

بعيداً عن جمال الكلمات وقوة تعبيرها

ودوساانها ع الجرح بقوة

وبعيداً عن المجاملات

والقول إن الكلااام دة أكتر من جامد كمان


وبعيداً عن التدوين والمدونات

وبعيداً عن شارعكوا..

دعنى أقولك..

ياأحمد ياابنى

إنت مش إبنى...........

ههههههههههههههههههههههههههههههههه

دعاء مواجهات said...

لالالالالالا

هنعلق بجد خلااااص

_____________________

تعالالى هنا

هو انت اية مش تقوول

التفاصيل

الموقع

الإدارة

العبارة

الشيكارة

ولا إحنا هنبيعها لوكشة كدة على بعضها؟؟؟؟؟؟؟؟؟؟؟؟؟؟؟

نرجوا مزيداً من التفااصيل؟؟؟؟؟؟

بيس