خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Dec 12, 2007

كان فى صبى صغير ابن الجيران

إعـــــــادة

إهـــــداء
الى الاستاذ أحمد على
يومــيات عــيل مصـرى
تعليقاَ على
عجلة دايرة

كان فى صبى صغير ابن الجيران
كان صاحبى وانا صغير
قبل الزمان ما يتغير
ويغيرنا الزمان
كنا نفرح سوا
ونغنى سوا
ونطير فى الهوا
والهوا فرحان
كان فى صبى صغير ابن الجيران
كنا نقعد انا وهوة بين الشجر
ينزل علينا المطر
نغنى للمطر
يجى علينا الليل نغنى للقمر
كان نهارنا فى اللعب وليلنا فى السهر
وضحكتنا نسياها الاحزان
كان فى صبى صغير ابن الجيران
كنت والصبى فوق السطح على طول
نعمل غديوة سوا من العيش والفول
ونندة للجدة تقعد تحكيلنا وتقول
حكايات جميلة عن الغولة والغول
وعن زهرة البستان
كان فى صبى صغير ابن الجيران
وفى يوم صحيت على صوت كبير
اكبر من احلامنا وسننا بكتير
صوت عربية شايلة دولاب وسرير
وبطانية وطبقان وشوية حصير
ومستعدة للمشيان
كان فى صبى صغير ابن الجيران
وشفت امى وام الصبى بيسلموا على بعض
وابوية وابو الصبى قاعدين سوا على الارض
سألت عن اللى حصل
مالقيتش منهم رد
وطلعت عند صاحبى
مالقيتش هنا حد
والسطح فاضى مهوش مليان
كان فى صبى صغير ابن الجيران
وشفت صاحبى ودمعة كبيرة فى عينية
من شباك العربية بيشاورلى بإيدية
ومقالش ولا كلمة ولا قاللى فى اية؟
!!وأنا كنت طفل صغير ميفهمش اية حوالية
ودارت الايام.. كان فى صبى صغير ابن الجيران
معدتش انا والصبى نقعد على السطوح
ولا نيجى ما المدر سة سوا ونروح
لسة كتابنا فوق السطح مفتوح
ولسة لحد انهاردة انا قلبى مجروح
ولسة جفنى بالدمع مليان
ولسة فى قلبى كتير من الاحزان
ولسة ما بيرحمش فرحتنا الزمان
كان فى صبى صغير ابن الجيران
كان صاحبى وانا صغير
لكن ما شفتوش من زمااااااان


أحمد الصباغ

55 comments:

Salma Amer said...

أنا اخدت جوله سريعة كدة عندك
عجبني قوي البلوج

أحلى حاجة ذكريات الطفولة يمكن صحبك مشي من زمان بس هو جواك لسة ودة كفاية

مواطنة said...

مؤثرة أوى المشاعر و الكلمات دى

كان شوية و ممكن ادمع.. لكن الأبيات خلصت قبل ما الدموع تاخد بالها...

مؤثرررررررررررة جدااااا.. و لا الصورة كمان

مين من الكبار اللى قرروا العزال ممكن يفكر فى مدى الألم اللى حصل فى روح الطفلين دول!!!!!!

تحياتى

بت خيخة وأى كلام said...

اول مرة اقرالك بوست يا صباغ ويخلينى اعيط
من اجمل الاشعار اللى قريتها فى حياتى


يا بختك يا عيل يا مصرى

اااااااااااااااه
دى صرخة وجع مكبوتة فى قلبى
تحياتى يا صباغ
اختك خيخة

عصفور المدينة said...

انت أصيل والله يا أحمد وودود جدا ربنا يحفظك

Ahmed Al-Sabbagh said...

بالمناسبة الصورة دى ليا

وانا مخلووول

يعنى كنت صغنون

شوفتو بقى التشرد الاطفالى

Ahmed Al-Sabbagh said...

الكلمات دى اتكتب لما اعز اصدقاء طفولتى ساب الحتة وعزل
واحنا فعلا بنقضى الحياه دى مع بعض

ومن يومها ما شوفتوش تانى

سهر الليالى said...

ياااه يا صباغ ادمعت عينى بجد
البوستين رائعين

احساسك فظيع

لسة كتابنا فوق السطح مفتوح
ولسة لحد انهاردة انا قلبى مجروح
ولسة جفنى بالدمع مليان
ولسة فى قلبى كتير من الاحزان
ولسة ما بيرحمش فرحتنا الزمان
كان فى صبى صغير ابن الجيران
كان صاحبى وانا صغير
لكن ما شفتوش من زمااااااان

الكلمات دى رائعه ووجعتنى بجد
انا باين هعيط تانى ولا ايه

يارب تشوفو تانى
يسلم قلبك الجميل
وايديك اللى كتبت الكلمات الرائعه دى

مهندس مصري said...

ما أنا قولت لك أشعار جبارة يا أحمد
بتهيج أحزان أي حد عزل من بيتهم
يا شعرك يا صباغ

دكتور حر said...

ايه الجمال ده يا سيدي

دائما ما تصل المشاعر الحقيقية للقلوب أسرع وأجمل من المصطنعه

وليست النائحة كالثكلى كما يقولون

وتعبير بالشعر أجمل وأبدع

سلمت اناملك
ودمت بكل الود

no chance said...

رووووووووووووووووووووووووووووووووووووووووووووووووووووووووووووووووووووووووووووووووعة

ااتوجعت اوى لما قرات دى

وفى يوم صحيت على صوت كبير

اكبر من احلامنا وسننا بكتير

صوت عربية شايلة دولاب وسرير

وبطانية وطبقان وشوية حصير

ومستعدة للمشيان

حسيت ان انا اللى فى الموقف




بجد كلام جامد
تحيااااااااااااااااااااااااتى

Salma Amer said...

أنا قريته اول مرة نزل
وقريته تاني بجد رائع رجعني صغير تاني وافتكرت برده بنت كنت بلعب معاها ومعرفش هي دلوقتي فين في الدنيا
شكرا يا أحمد قوي

mohamed said...

برافو على البوست
كلام فعلا جميل وزكريات مش ممكن تتنسى
تحياتى

ا بـن عــمــر said...

ربنا يكرمك
انت وعيل مصرى
ذكرتنى ايام
جميلة

يوميات عيل مصري said...

الرحمةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةةة
أنا في المكتب، قدام الناس، شكلي بقى وحش أوي
كل ما حد يدخل يقولي حاجة: أقوله ..ها
وابقى زي المهبول
ها
وأبص تاني ع الجهاز

جامدة أوي

جامدة اوي ده إيه، ده انا بأعيط منها

دي كلها مشاعر فظيعة،

وبعدين الله يخليك، يارب هدية مقبولة، وكفاية علي كده يا صباغ كتير أوي

غرقتني بأفضالك
وبأكون مقصر، والناس بتفتكرني إنسان مش كويس، وماعنديش أصل، وانا حكتلك الموضوع كله، وربنا يسعدك يارب

ارسم بالرصاص said...

مش أقدرة أقول لحضرتك قد ايه
الأشعار ده أثرت فيه
أكرمك الله وأعزك
و رزقك فسيح جناته

Ahmed Al-Sabbagh said...

Salma Amer

صاحبة اول تعليق

لما اتعرض البوست اول مرة

وكانت بداية معرفتى بيكى وبمدونتك الجميلة

اشكرك دايما على تشريفك ليا وتشجيعك الدائم

Ahmed Al-Sabbagh said...

مواطنة

اشكرك جدا

الصورة دى ليا وانا صغير

ايه رأيك فى التشرد الاطفالى ده

تعرفى لما بشوف صورتى وانا صغير ببقى عايز اعيط

وبفتكر ايام زمان

ايام البراءه والطيبة

Ahmed Al-Sabbagh said...

بت خيخة وأى كلام

طبعا يا خيخة انا مش محتاج ارد عليكى

لانك صاحبة المدونة

وانا اسف اذا كنت السبب فى دموعك الغالية

Ahmed Al-Sabbagh said...

عصفور المدينة

ربنا يكرمك ويعزك

واللة فى ناس الواحد لو يطول يديهم روحة ما يتأخرش

Ahmed Al-Sabbagh said...

سهر الليالى

صديقتى الجميلة أميرة

أشكرك على كلماتك الرقيقة دائما

وانا اسف اذا تسببت فى دموعك

Ahmed Al-Sabbagh said...

مهندس مصري

اشكرك يا باشمهندس

طب واللى ماعزلش مش هيعجبة ؟

:)

Ahmed Al-Sabbagh said...

دكتور حر

تسلم لى يا دكتور محمد

ويسلم لى قلبك اليقظ

Ahmed Al-Sabbagh said...

no chance

صديقى أحمد

انت اللى رائع وزيارتك الدائمة تسعدنى كثيرا

Ahmed Al-Sabbagh said...

Salma Amer

تانى تعليق

انتى الوحيدة اللى علقتى مرتين على البوست ده تعليق قديم وتعليق جديد

ودايما منورانى ربنا يكرمك

Ahmed Al-Sabbagh said...

mohamed

عزيزى محمد

شكرا على كلماتك الرقيقة

Ahmed Al-Sabbagh said...

ا بـن عــمــر

اشكرك يا صديقى وربنا يكرمك

ويجمعنا على خير

Ahmed Al-Sabbagh said...

يوميات عيل مصري

دى أقل هدية أقدمهالك

وقليلة اوى عليك

Ahmed Al-Sabbagh said...

ارسم بالرصاص

أشكرك يا استاذة هايدى

واشكر لكى مشاعرك الرقيقة ودعائك الجميل

shayma said...

تحفه تحفه تحفه
بجد كلام جمييييل جدا والاجمل منه المشاعر الحلوة دى

رائعه
سلامى

السيد شبل said...

مدونتك كل يوم تزيد ابداعا وتألقا
تحياتى

السيد شبل said...

اتمنى تنضم الينا فى حملة

"" فخور لأنى اتحدث العربيه ""


تحياتى ... للمزيد ادخل على المدونة

aya said...

الله يابوحميد ياجامد
والله انت واستاذ احمد بجد كلامكم حلو اوى
واحساسكم رائع
بجد يا بوحميد الكلام مؤثر وجميل
ربنا يكرمك
ومايحكمش على اى حد انه يتفرق عن حد بيحبه

تحياتى لك اخى
والسلام ختام

عاشقه الفردوس said...

حلو اوى الكلام ده

وبنطير فى الهوا والهوا فرحان

تشبيه رائع

رئيس جمهورية كمورا مورا said...

فعلا مافيش احلى واخلص من صحاب زمان
بس اصدقاء الطفوله عمرهم ميتنسوا عشان ايامهم كانت برئيه وجميله وكانت الواحد لسه الدنيا حلوة فى عنيه
وكنا بنعمل اى حاجه تيجى على بالنا
من غير خوف ومن غير حساب وزى متيجى تيجى

فعلا الكلمات جميل
ومؤثرة جدا
وتدخل القلب على طول ومن غير حتى استئذان
الله عليك

بت خيخة وأى كلام said...

انا جيت تانى علشان اقراها تانى
وكل ما اقراها اكتشف فيها معنى تانى احلى
واقعد اعيط تانى
انت فظيع يا صباغ بجد
اختك خيخة

أحمد مصطفى said...

ايه ياابوحميد
بقالك فترة داخل فى مود ذكريات

كدا ليه ؟؟

تحياتى

أحمد مصطفى

3ala asm masr said...

كل ما أقرا شعر أنت كاتبه وأحاول أكتب كومنت عليه أكتشف أن أى كومنت هكتبه هيظلم شعرك
عشان مفيش أروع من كلامك عشان أقوله
وأى كلام هيكون أقل كتير من كلماتك يا أحمد
رائع جدا
وألمنى بجد

التوأمان said...

انا مدخلتش عندك من زمان ياباشا واحشنااوي

و الشعر دا جامد اوي وحلوة طريقت الشعر بالعمي .
انتا مبدع بجد

لا تنسانا من دعواتك.

Desert cat said...

وما اجملها من ذكريات
فكرتنى انا كمان بكل ابناء جيرانا القدام
تحياتى

NIDAAL PAL said...

يا عالى يا صباغ
ايه المزيج الرائع ده
بجد كلمات خارجة من القلب
بارك الله فيك يا صباغ
و خلينا فى دماغك

مدحت نص said...

يا أبو حميد ايه الكلام الكبير الجامد ده برافو بجد ممتازة ورهيبه وروعه منتظرينكم فى حركااااااااات
http://www.7rakat.blogspot.com/

Ahmed Al-Sabbagh said...

shayma

ميرسى اوى يا شيماء على كلماتك الرقيقة

Ahmed Al-Sabbagh said...

السيد شبل

ربنا يكرمك ويعزك

طبعا يا باشا انضم

عادل سمك اسكندرية لية said...

اضحى مبارك ان شاء الله وعسى الله ان يجعلك من احبائه

one fine day said...

جميل ماكتبته

الشريف / جمال طة said...

انا سعدت بزيارتك وحكون اسعد لو عرفتك وعرفت مين انت يالى صحيت فيى كل المواجع وعلشان خاطرى اوعى تحرمنى من زياراتك انت من ذكريات الزمن الجميل اللى غير موجود الا فى الكتب والحواديت

إرهص براحتك يا زوق said...

تدويناتك رائعه إلي الأمام دائماً
كل سنه وإنتي طيب يا ابو حميد
تحياتي

AlShiMaa said...

أنا أول مرة أشوف المدونة

بس البوست جميل قوي

كلماته مؤثرة جداً حقيقي

فعلاً مكتوب من القلب

كل سنة وانت طيب :)

ســمـــر احمد said...

مش مهم ما تشوفوش لكن قلبك شايفة
مش احسن ما يبقى جنبك .. و عينه ف عينك و تكلمه
وما يفهمش
!!!!
دى زيارة اولى للبلوج و تقريبا هقعد هنا كتير
تحياتى

kareem azmy said...

الله
بجد كلمات رائعة

تقريبا اول زيارة لمدونتك

تحياتي ليك
كريم عزمي

seagull said...

وجعت قلبي بكلماتك يااحمد تسلم ايدك والله يسامحك خليتني دمعت

Anonymous said...

جميلة أوى وبسيطة لكن طالعة من القلب

Sahar said...

جميلة أوى وبسيطة لكن طالعة من القلب

Anonymous said...

مش حقدر اقول الا ان الصداقة اكبر من اى حب بجد الصاحب القلب كله بحبه وجرحه ودموعى تجرى فى عيونه ودمه فى شريانى ايوة هوا الصاحب بجد وفراقه صعب ربنا يصبرنا كلنا\\بسمة مسلم

smile rose said...

رائع ياحمد شعر جميل