خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Oct 18, 2007

طوف وشوف

بسم الله الرحمن الرحيم
انا قبل العيد وعدتكم بموضوع جامد
وزمان بردة لما قلت لكم ان اصحابى الالمان هيجو مصر
هعمل بوست عن زيارتهم بالصور
وهحكى لكم عن اللفة قصدى الجولة اللى هناخدها فى القاهرة
وها انا ذا
اوفى بوعدى ..
بوست بقى بس ايه سياحى على ابوه
من بتاع زمان
بداية نعيد التعارف على الضيوف

Anke

Christian
والحقيقة انا شايف ان الصورة دى
من أهم صور الرحلة
ههههههههههه
لذلك اسمحولى أبدأ بيهاولمزيد من التعارف
اضغط هنا

بس انا طلعت مرشد سياحى ولا اجدعها خريج اثار او ألسن
والله وطمر فيك التعليم المجانى
وقعدت اشرح كل حاجة
وحتى المبانى العادية شرحتها
دى وزارة كذا ده فندق كذا دة قسم بوليس كذا ده محل كشرى كذا وده تمثال كذا وده الحمار قصدى الحصان بتاعة والفسقية اللى تحتة دى فيها ميه ههههه وده جامع ودى كنيسة ودى بلاعة مفتوحة كدة يعنى

المهم بقى
بس قبل ما ابتدى احب اوضح حاجة
ان مش الهدف من الموضوع مجرد حكاية موضوع شخصى او تسلية
ولكن دروس مستفادة او ملاحظات مستفادة
لانى فعلا يا جماعة اول مرة اشوف مصر بعين سائح
مش بعين مصرى
وفى حاجات كنت بشوفها مليون مرة وما كنتش باخد بدق
لأنى اتعودت عليها
لكن لما شوفتها بعين سائح
لفتت نظرى اوى


بداية محرجة
بداية نزلو من الطيارة الساعة واحدة صباحا ليلة العيد
وعقبال ما خلصوا الشنط و راحو الفندق وظبطو امورهم دخلت فى تلاتة والتقينا قدام فندق أروبا
لقطة من فوق فندق اوروبا
وكان كريس عايز يغير عملة وعرفنا إن فى فى فندق قريب مكان لتغير العملة
ورحنا وطبعا البشوات اللى على الباب بدأو حالة تسول
كل سنة وانت طيب يا باشا عيد بقى وعايزين العيدية
قلت لهم ماشى بس لما نخلص
ودخلنا
ولما وصلنا لمكان تغيير العملة
كان الراجل بيقفل وكلمنا وهو مدينا ضهرة
ولما قلت له عايزين نغير فلوس
قال : فوتو بعد نص ساعة
ثم استطرد فى قرف
او بكرة أحسن
ولما قلت لانكى وكريس ظهرت عليهم خيبة الامل
وبصراحة انا كنت لسه محرج
لان جو الترجمة والسياحة ده جديد عليا
واللى زاد الطين بلة
ان سعادة الباشا القرفان وقعت منه سلسلة المفاتيح
وفيها قرابة التلاتين مفاتح
واتفتحت والمفاتيح اتنتورت
و حسيت انى كنت عايز اقولة حوش اللى وقع منك هههههه
بس ماردتيش
وكنت زعلان اوى ان الزيارة ابتدت كدة
بس الحمد لله يكفى ان فى الاخر قالوا ان أكتر بلد استمتعو فيه هو مصر
رغم انهم زارو دول اوروبية واسيوية متنوعة
الحمد لله

الاهرامــــات التســــعة

اليوم الاول ابتدى بالاهرامات
وأول مرة اعرف ان عندنا تسعة اهرامات جنب بعض
مش تلاتة
صحيح ستة منهم نونو ما طلعوش من البيضة
بس اخر روعة
واخدنا مجموعة صور حلوة اثناء الجولة
وكانت الرحلة بالجمال
الاول ركبت حصان وبعدين
لقيت رجلى جايبة الارض
والحصان كان اقرب للحمار منه للحصان

والله حصان بس مدى على حمار

احنا التلاتة
وده بقى منظر الاهرامات التسعة الرائع

وده عم ابو الهول كمان

أنكى بتسأل

هو الطين ده قديم ؟
تقولش فارس مغوار يا خالو احمد

امام الهرم الاكبر
عم حسن بتاع الجمال
.
بس للاسف الشنيع المريع الفظيع
المناظر الجميلة دى ختمت بمنظر مأساه
خلانى رقعت بالصوت وبقيت فى نص هدومى
ترعة المريوطية متغطية بالزبالة إهئ إهئ
فى التاكسى
خان الخليلى
منطقة جميلة مليانة كوفى شوبات ومطاعم ومحالات وبازارات وعطارين بالهبل

وأمام المسجد الحسين

وفى مول خان الخليلى الجديد

عمو بتاع جوز الهند بيشرح كيفية فتح واستخراج لبن جوز الهند من باطن الجوزة
أثناء عملية شراء شيشة صغنونة من خان الخليلى
ويظهر فى الصورة محمود ابن صاحب المحل
انكى ومحاولات مستميتة لتركيب الشيشة
الشيشة المزعومة
شوفتو صغنونة ازاى

المتحف المصرى

لم نقم بالتصوير داخل المتحف المصرى
بس انا عندى صور قديمة متصورها هناك هحطها فى البوم الصور


القلــــعة
السلطان حسن والرفاعى وذكريات ما بين الجامعين
امام جامع محمد على

القاهرة فى الخلف

ميضة جامع محمد على
شوف الميض اللى على اصولها

فى جامع محمد على

حمام شمسى فى القلعة
وفى اليوم الاخير
اصطحبنا صديقى سامح فوزى فى جولة خلال منطقة كنائس مصر القديمة

محاولة استكشاف المنطقة

أول ما أنكى نزلت مصر قالت لى عايز اشوف الشوارع الصغنونة فى القاهرة القديمة
منظر رائع
إلى اللقاء فى العام القادم إن شاء الله
بوست عن زيارتى لألمانيا


بجد بحبك اوى يا مصر
بحبك اوى اوى
ونفسى اشوفك احسن مكان فى العالم
بحبك من كل قلبى
بحبك بكل ذرة وخلية فى جسمى
بحبك وبدوب فى حبك حتى النخاع
بحبك شوارعك واثارك ونيلك وطيبة اهلك

يـــــارب
يارب بلــــدى وحـــــبايبى والمجتمـــع والــناس
إجعـلنى شمــــعة تنـــور بالــــحب والإخـــــلاص
إجـــعلنى دفـــعة قــــــوية فى عجلــــة الانتــــاج
لإخـــــــواتى تلـــــبس وتاكــل ولغيرنا ما نحتاج

اجعلنى حبة تفرع
وتبقى فدادين سنابل
تحضن فروعها الايادى
وتبوس جدورها المناجل

وابدر على الناس محبة
وبسمة فى كل دار
وان مت اجعلنى طوبة
يعلو بيها جدار

أنا إيه لولا الناس بحالها
لولا انتو ايه فايدتى
لوكنتش اخدم بلادى
هتبقى إيه لازمتى

ده أصلنا الانسانية
والاب واحد يا عالم
وكلنا من دم واحد
ألفين سلام لك يا آدم

تحياتى

أحمد الصباغ

58 comments:

غمض عينيك said...

بوست جامد جدا ياباشا
الصداقة دي اجمل شىء في الدنيا بجد

وعندك حق في كمية الاحراج اللي اتحطيت فيه بسبب مناظر وسلوكيات المفروض ماتكونش موجودة
كان معايا بردو اصحاب من تونس بلف معاهم واتهريت مواقف محرجة من دي
ربنا يهدي

تحياتي ليك
محمد سمير

Ahmed Al-Sabbagh said...

هههههه
ايوة عندك حق يا محمد
عندنا كمية شحاتين يا أخى
لو اتفرقت على العالم هكتفية
بعيد عنك

فؤاده said...

ايه يا عم الحلاوة ده
صحيح حصل مواقف محرجه
بس واضح ان الرحله طلعت جميله الحمد لله
وواضح ان انت عملت مجهود جامد
على فكره
انا برضه اول مرة اسمع عن الاهرامات التسعه دول

Ahmed Al-Sabbagh said...

فـــــــؤادة

ميرسى يا باشا على الزيارة والمجاملة الرقيقة

الحمد لله

ايوة وانا كمان

david santos said...

Very good posting, thank you.

The regime of Mubarak and his minions is every day to transgress human rights. More than 10,000 Sudanese refugees are arrested and more than 100 have been killed.
Illustrative of the world arrogance and the atrocities committed against the Sudanese refugees by this criminal regime of Mubarak.

Ahmed Al-Sabbagh said...

Divid Santos

Thank you for visit and your notice


regards,

مؤمنه said...

السلام عليكم ورحمة الله وبركاته
انا بعتذر بالنيابه عن كل المصريين لان البلد ما كنتش فى اجمل صوره
بس ان شاء الله تكون فى احسن صوره بادينا وهمتنا
وسلملى على اصدقائك
ومستنين زيارة المانيا
بس الحمد لله ان هى عجبتهم فى الاخر
وان شاء الله ما تكونش اخر زياره
والسلام عليكم ورحمة الله وبركاته

Sampateek said...

رحلة مصورة هايلة
عقبال كل سنة
ربنا يوفقك


تحياتي

عمر جمال said...

شكرا يا باشا
علي مرورك علي مدونتي

وايه الرحلة الجميلة ديه

بس منظر الزبالة صعب اوووووووي
اللي علي المريوطية

Dr.Mohammed Gohary said...

يه يابني الجمال ده
لا خلاص اعتبرني من المقيمين في مدونتك بعد كده
تحياتي

yomna said...

اولا ميرسي على الزيارة

ثانيا بقى و ده المهم ان برغم من ان الواحد قرفان من احوالات البلد اللي متسرش لكن لما بيعمل جولة سياحية زى اللي انت عملتها دي بتجيله حالة انبساط غريبة اوى...طلعت في دماغي من قريب انا و واحدة صاحبتي اننا لازم نروح الحسين نتفرج على الحاجات اللي هناك و خصوصا بيت السحيمي اللي قلنا عيب اننا مشفناهوش لحد دلوقتي و لفينا بقى الحسين حتة حتة و كانت بصراحة فسحة تحففففففففة بكل المقاييس و احنا مروحين كنا مبسوطين اوى اوى و حاسين ان البلد حلوة اوى و مصر دي ام الدنيا و هي امي و كل كلام الاغاني ده بس بصراحة الواحد رجع قواعده سالما لما اتفرجنا على الاخبار و قرينا جرايد...بس بعيدا عن كل ده...بجد بجد البلد فيها حاجات حلوة اوى و اماكن روعة مشكلتنا اننا مش بنزورها

Ahmed Al-Sabbagh said...

مــــؤمنة

وعليكم السلام ورحمة الله وبركاتة

الحمد لله عجبتهم اوى

بس هما علقو كتير على موضوع الزبالة

وقالو مصر بلد جميلة

ليه المصريين مش يحافظو عليها ويهتمو ويغيروا سلوكياتهم

تحياتى

Ahmed Al-Sabbagh said...

Sampatek

شكرا ليكى كتير

ويارب تكون عجبتك

Ahmed Al-Sabbagh said...

عمر جمال


شكرا يا عمر
اه يابنى كنت فى نص هدومى المنظر صعب اوى

انا بينى وبينك شفتة كتير بس كنت لوحدى
هههههه

Ahmed Al-Sabbagh said...

داكتوور محمد الجوهرى

شكرا يا باشا
ده انت تنور وتآنس

وتسعدنا زيارتك دايما

بس ياريت ابقى هات تفاح من اللى عندك فى المدونة ده
ههههههههه

حبيبى يا دكتور جوهرى

Ahmed Al-Sabbagh said...

Yomna

اه والله يا بنتى كلامك جميل اوى بجد

بس انا مش عارف بيت السحيمى ده

والنبى ياريت تكتبى لى اى معلومة عنة
وازاى اروح هناك وتفاصيل


شكرا ليكى كتير

قليل من التفكير said...


ايه يا عم الحلاوة ديه

بجد بوست جامد

من وأنا صغير كان نفسي أراسل حد خارج مصر ونعد نبعت لبعض جوابات وصور وكده ...

حتي وأنا في الاعدادي واحد صحبي كان جايب جواب واحده من كندا بعتهوله وفيه صوره ليها عند شلالات نياجرا وهوا كان برد عليها

يلا يا باشا علي العموم أكيد انت اكرمتهم اخر كرم
سلالالالالالام

مهندس مصري said...

الله ينور
عقبال ما تورينا صور ألمانيا

حياة الأحلام said...

السلام عليكم

أول زياره للمدونه مدونه جميله وطبيعيه جدا بجد

وبخصوص البوست جميل بجد علشان تخلى الناس تشوف مصر بعين تانيه علشان يعرفوا أن مصر فيها حاجات جميله مش كلها مشاكل
وأن فيه ناس بتحدسنا على مصر

وفعلا زى ما انت قولت هنفضل نحب كل حته فى مصر وتراب مصر

وبحبك يا مصر مهما عملوا

تحياتى ليك ويارب تكون كانت زياره جميله وسعيده لاصدقائك ويكرروها تانى ان شاء الله

والسنه الجايه تبقى فى المانيا:)

Radwa Lotfy..(Rodirock) said...

انت شكلك خبير فى مصر ..ايه كل الاماكن دى...و مش بحسد على فكرة..هههه..لو كان فى حاجات وحشة ..ادينا بندعى ربنا انها تتغير و كفاية كرم ضيافتك..اما على سلوك الموظفين و اتساخ الشوارع..فاحنا بعنينا اللى بتشوف دلوقتى و عقلنا اللى بيسجل يا ريت احنا نشتغل على نفسنا يعنى اجنا نحافظ على كل مكان نروحه و عل جماله و نعامل الناس بشكل حلو فى مكان شغلنا و نحرص ان دايما صورتنا تبقى الاحسن..بجد ده هدفى و اكيد مش انا لوحدى...و كل اللى علينا ندعى ربنا الناس تتغير و يبقى همها همنا

مواطنة said...

جميييلة البوست ده

و عسولين أوى الألمان و هما بياكلوا الفوووووول.... هههههه

و لا إلا الرغيف .:.ههههه

رحلة جميلة

و جميل أوى الشعر اللى فى أخرها

و خاصة " لما أموت أبقى طوبة فى جدارها"

إلى الأمام

lua negra said...

Hello Ahmed. Unhappyly I do not say necessary English and to use the translator pra to send this commentary you. Taste very of very saying with you taste of its skill candy, affectionate and gentile of speaking with me. You he is now a friend very wanted of the heart of the Andréia. Here in the Brazil, everything is very difficult, to work is difficult, to study is difficult, or either, to survive in a country where it exists many social inaqualities is difficult, same I has that to work to always pay to my expenditures in the university, hahaha but nor what I receive in money gives... is a woman... But I wait sincerely that one day let us can in finding them, and that one day I can visit your country. Egypt is a country that always fascinated me, for history and the artistic and cultural patrimony. E now because of you Ahmed.
Love for your heart and its life.
kisses, many kisses.
Of its Brazilian friend
Andréia أندريا

الباحث عن الحقيقة said...

ايه ده يابنى
انت هتغينى اعيط
ومش بعيد كمان احب مصر والاهرامات التسعة والطين ..إلا هوكان قديم صح؟ وزبالة المريوطية واييييه
مش بقولك هاعيط

Desert cat said...

ما شاء الله يا احمد
شكلك صوير صوير يعنى
لاء حقيقى الصور تحفة ومختار الامكان اللى هيا
على فكرة انا لفيت الامكان دى كلها كتير قبل كدا
بس مع الصور والشرح حسيت انى عايزه ازورها تانى

ارسم بالرصاص said...

السلام عليكم ورحمة الله وبركاته
بوست لطيف جدا .. أظن الكام يوم سياحة دول كانوا مفيدين بالأكتر ليك ياأستاذ أحمد .. الصور فيها بساطة وتلقائية جميلة .. وماتزعلش من الاحراج ده موجود ف كل مكان وف كل بلد زي ماهو موجود أصدقاء رائعين زيك بيمثلوا واجهة حلوة لبلدهم ... أظن أن أصحابك الألمان انطبع بداخلهم أخلاقيات وطباع المصريين من خلالك ياأستاذ أحمد مش من خلال النماذج السلبية سواء كانت تسول أو سوء طباع من صاحب محل تبع فوت علينا بكرة .. وعموماً ح نكون ف انتظار البوست بتاعك عن زيارتك لألمانيا .. أتمنالك الاستمتاع برحلتك المستقبلية ولو إني متأكدة إنها لن تخلو من سلبيات بالطبع ... وطبعاً ف الآخر حابة أقولك انو البوست كان ممتع جداً وفعلاً حاولت أشوفو بمنطق وفكر السائح وفعلاً لو تقمصت حنجرة سائح أقول مصر أجمل بلد ف الدنيا ولما أرجع من تقمصي أقول بحبك يامصر .. بحبك يابلدي ... بالطبع ف انتظار كل بوست قادم لك .. تحياتي لك .. هايدي

Ahmed Al-Sabbagh said...

قليل من التفكير

شكرا يا محمد اوى
على فكرة الصداقة عبر الحدود دى شئ جميل جدا جدا وثقافة بلا حدود
انا شخصيا اشجعك فى الاتجاه ده

تحياتى

Ahmed Al-Sabbagh said...

مهندس مصرى


شكرا يا باشمهندس

ان شاء الله بس ادعيلى


تحياتى

Ahmed Al-Sabbagh said...

حيــاة الأحـــــلام

ربنا يخليكى ويارب كل البوستات تعجبك دايما

ان شاء الله هبقى اعمل بوست عن المانيا بس ادعيلى



تحياتى

Ahmed Al-Sabbagh said...

Radwa Lotfy..(Rodirock)

عزيزتى رضوى

دى المدونة كلها والمنطقة كلها نورت بزيارتك


هنعمل ايه بقى الاحراج مكتوب علينا


بس صدقينى مصر فيها بردة حاجات حلوة



تحياتى

Ahmed Al-Sabbagh said...

مــــواطنة

شكرا يا دكتورة على الزيارة الجميلة والمجاملة اللطيفة
الشعر اللى فى الاخر ده مقطوعة جميلة اوى غناها سمير الاسكندرانى ومشهور

اه هما بياكلو العيش بطريقة غريبة شوية
ههههههه


تحياتى

Ahmed Al-Sabbagh said...

lua negra

dear Andreia

thanks for your visit and nice words .. but i still like Brazil so much .. we have the same condtions in Egypt

thanks,

Ahmed Al-Sabbagh said...

الباحث عن الحقيقة

هههههههههههه

عيط يا راجل ولا يهمك

احنا خارجين من عيد يعنى اتبسطت كتير عيط شوية بقى ههههههه

لالا ما تقلقش يا صاحبى هبسطك بكام بوست حلو


تحياتى

Ahmed Al-Sabbagh said...

Desert cat

ههههه

شكرا ليكى كتير انا مش "صوير" اوى كدة دة بس من ذوقك

وانا بدعوكى وبدعو كل الاصدقاء انهم يهتموا بزيارة الاماكن السياحية فى مصر

مرة واتنين


تحياتى

Ahmed Al-Sabbagh said...

ارسم بالرصاص


ايوة والله يا هايدى كانو مفيدين جدا جدا
اكتر من ما تتخيلى حاجات كتير بجد
سلوكيات
وحضارات
ومقارنات
فى خلال ايام معدودة مرت عليا


شكرا ليكى

أحمد مصطفى said...

تدوينه جامدة ياباشا

ومدونة اجمد واجمد


اسعدنى مرورك بمدونتى

واهلا بك صديق جديد

مع تحياتى

أحمد مصطفى

Cognition-sense said...

عجبني الصور قوي

لايق عليك دور الدليل السياحي :)

Ahmed Al-Sabbagh said...

أحمد مصطفى


شكرا يا احمد باشا

ده من ذوقك بس

ويارب دايما تعجبك


تحياتى ليك كتير

Ahmed Al-Sabbagh said...

Cognition-sense

شكرا اوى

يعنى فى رأيك انفع مرشد سياحى بعد الضهر ؟

تحياتى ليكى كتير

أحمد مصطفى said...

لا شكرا على واجب ياباشا


على فكرة انا زعلان منك على الاخر

انت طلعت عينى

بسبب دليل مدونات الصباغ ياعم

قعدت عليه اكتر من 3 ساعات
اتصفح المدونات الشديدة اللى فيه

لحد مانمت وسيبت الجهاز شغال

فياريتك تضفنى ليهم (يعنى من باب من جاور السعيد يسعد


ولى عندك طلب ودا الاهم

انت ليه حاطط لينك لجريدة الوطنى اليوم

ياريتك لو تمسحه (اوعى تكون حزب وطنى


احسن هزعل منك اوى


مع تحياتى

أحمد مصطفى

حـريــة الــفـكــر والابــداع said...

تغطية شاملة ورائعة
تمنياتى لك بحياة سعيدة وعقبال ما نشوف فى ايدك دبلة الحياة السعيدة
تحياتى

Ahmed Al-Sabbagh said...

أحمد مصطفى


ياباشا انت دايما منورنى

يارب يكون الدليل عجبك

اكيد من غير ماتقول تنور فيه

انت موجود دلوقت فى الدليل

لا وطنى اليوم مش تبع اخواننا

دى حاجة تانية

خليك دايما على اتصال


تحياتى

Ahmed Al-Sabbagh said...

حـريــة الــفـكــر والابــداع

شكرا يا افندم على الكلام اللطيف


وعلى الدعوة الجميلة


بس مش عارف

هى دعوة حلوة ؟؟
هههه


تحياتى

نبض اسكندرية said...

الله ينور ياباشا

على الرحلات التمام

وصور جاااااااااااااااامدة جدا

تحياتى

اجندا حمرا said...

موضوع فعلا جميل ياأحمد
و الصراحه عجبتني الصور اوي اوي

فعلا الواحد لما بيشوف اد ايه السياح مبهورين بمصر بيبتدي يبصلها نظره تانيه و كل مره مثلا نشوفها تحس انها احلي و طبعا لازم تكون الواجهه كويسه وحد يكون بيفهم لما يشرح للسياح حاجات عن مصر

الصراحه شرفتنا و فعلا موضوعك مميز

اكيد هما انبسطوا في مصر و محظوظين بصديق جميل زيك

تحياتي ليك علي موضوعك المميز

Clandestino said...

بصراحة مصر جميلة جدّا
يعطيك الصحة أحمد فعلا اعجبتني مصر
و اول مرة اسمع انهم الاهرامات تسعة مش ثلاثة
انشالله لازم نعمل طلة على مصر
بعد ما نحرق بطبيعة الحال
:)))))

mohamed said...

صور حلوة قوى يا احمد وميهمكش من ترعة المريوطية المعفنة لانى الحكومة قالت انى بحلول 2007 مش هيكون فيه صرف مفتوح يعنى بالكتير سنة وهتتغطى فاللى خلانا مستحملينهم سنين كتير خلينا نستنى السنة دى كمان وعلى رأى المثل خليك ورا الكداب لغاية باب الدار اما بالنسبة للعالم الشحاتة فالحكومة قالت انها هتزود مرتبات الموظفين للضعف فخلاص مش هتلاقى المنظر المحرج ده تانى وبالنسبة للتعامل بتاع الموظف خلاص الحكومة عاملة حملة ان السياح اهل البلد وناسها فمش هتلاقى الموقف ده تانى خالص

مهندس مصري said...

ايه فين بوستك الجديد و لا نمت على البوست الألماني
لا فوق الله يكرمك
لا و حاططني مرتين في دليل المدونات عندك أحرجتني و الله
حطيتك عندي خلاص
و إذا كان على التصوير شوف الصور دي عندي
http://egyptioneng.blogspot.com/2007/08/3.html

Eanass Abouzeid said...

ana kaman ba7ebek ya masr,
kalamak da7'al zay el sahm keda we asab kabed al 7akeka :)
thanks for this nice blog

مهندس مصري said...

خش إقرا البوست ده
لتمكن من متابعة مدونات كتير بسهولة
http://ctybrd.blogspot.com/2007/10/rss.html

الفراشة الصغيرة said...

بصوا بقى يا جماعه بالرغم من انى مستائه من منظر الزباله و مع احترامى لارائكم كلكم الا انى شايفه

انى مشكله الزباله مش من الناس
لو الناس لقيت صندوق تحط فيه الزباله اكيد طبعا مش هترميهم برة الصندوق
بس المشكله انى الدوله مش مهتمه بموضوع الزباله اللى بقت موجودة فى كل حته فى مصر
احنا عندنا فى اسكندرية بدور كتير علشان نلاقى صندوق نرمى فيه الزباله والاخر نرمى زى ما الناس بيرموا هنعمل اية
ياريت بس صوتنا يوصل لحد مسئول يقدر يعمل حاجة علشان نظهر فى احسن شكل

ammola said...

طبعا انت قعدتهم ياكلوا الفول وانت على جنب مع الكباب والكفتة..عارفة انا الحركات دى وقعدت تقوللهم ان الزيارة حتفشل من غير الفول واحتمال يسحبوا باسبوراتهم
غلابة والله

صاحب البوابــة said...

هي المرة التي أعلق فيها على أحد المدونات منذ زمن بعيد

عزيزي احمد الصبغ

اشكرك كثيراً

وارجو ان يكونوا اصدقائك قد اسمتعتوا في مصر

تحياتي

Morad Azhary said...

السلام عليكم
بارك الله فيك يا اخى
بوست جميل جدا
ورحلة ممتعة اوى
وصور رائعة
نشكرك عليها

همسات دافئه said...

ايوه ايوه اغلطوا بقى فى الألسن اغلطوا
:)الصور حلوه موت بصراحه انا عملت الحركه الى انت عملتها ده بتاع اربع خمس مرات وكنت لما ألاقى منظر ذى ترعه المريوطيه ده بيكون نفسى استخبى واقولهم دا مش من هنا:)
أكتر حاجه كانت بتغظنى المصريين الى خان الخاليلى حاجه تقرف معاكسات ومد ايد وزعيق لما كانوا بيسرعوهم وللأسف مش كنت بعرف اتصرف او ارد عليهم لما يبقوا عايزنى اترجملهم بيقولوا ايه
:(((
مدونتك جميله وعجبتنى
أحييك
شيماء:)

أحمد مصطفى said...

شكرا يا خالو على اضافتى

واللهم لاحسد الناس عاجبها التدوينة اوى


ربنا يوافقق

تحياتى

أحمد مصطفى

coca said...

ايه دا انا كنت سايبالك تعليق
انا تعليقي اتسرق يا رجاااااله
عامه يا سيدي انا كنت بقولك انك فتحت نفسي علي الاثار واعملي جوله كدا وان العيال اصحابي اثار بلدنا اولي بينا

habiba said...

استاذ أحمد
مدونة رائعة فعلاً ما شاء الله عليك
صور رائعة ومأساة حقيقية عايشين فيها في مناطقنا السياحية بجد ربنا يعافينا ويرحمنا ونحاول نعمل اي حاجة نقدر من خلالها نساعد في تنضيف بلدنا من كل الاوساخ والسلبيات
نحاول يا جماعة ونقول يا رب

تحياتي لك

Akhadiwi Rajie said...

Can I just say what a relief to find someone who actually knows what theyre talking about on the internet. You definitely know how to bring an issue to light and make it important. More people need to read this and understand this side of the story. I cant believe youre not more popular because you definitely have the gift.
Visual-paradigm.com
Inmethod.com
Qubeshub.org