خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Nov 15, 2007

!! خـــــميرة عكننــــة


الزمان : يوم الخميس 15 نوفمبر
الساعة ستة مساءا بالظبط
المكان : شارع الهرم من أول النفق لغاية محافظة الجيزة
حوائط سوداء من عساكر الأمن المركزى
ماسكين عصى ومدججين بالسلاح
وظباط ومدنين ماسكين لاسلكى
من أول شارع الهرم ، وفى الجزيرة اللى فى وسط الشارع أمام القسم
وعشرات من رجال المباحث والظباط ورجال شرطة فى زى مدنين
وكل متر فى ظابط ، بطول الشارع لغاية مبنى المحافظة
الطريق واقف فى اتجاه من الجيزة للهرم تماما
بس من الهرم للجيزة شغال شوية
دخلت ابص اشوفهم بداو الاحتجاج ولا لسه
سمعت ناس بتقول ان الاحتجاج اتفشكل
يادى النيلة بقى انا سايب الدنيا وجاى
عشان امسك شمعة وأقف اظهر احتجاجى الاقى الاحتجاج اتفشكل
طفيت فلاش الكاميرا وحاولت اصور
الصور طلعت زى النيلة أسود من قرن الخروب
رحت ماسحها على أمل تصوير شوية صور حلوة لكن ميييين ؟؟
ظباط مترشقين فى كل حتة
الدنيا زحمة وضلمة ومحدش عارف مين مع مين
ومحدش بيكلم حد ولا بيرد على حد
والناس بتمد وناس بتجرى من الخوف
وواحد ست تقول هو فيه ايه يا ولاد؟
وناس تقول اظاهر الريس معدى

والف وادور ان الاقى حد من المدونين اعرفة .. أبدا
طب حد من حركة كفاية .. خالص
طب حد شكلة عامل احتجاج ولا حاجة .. مفيش
رحت ماشى قلبت رزقى ورجعت بعد شوية ابص
نفس المنظر
بس سمعت بوجود الاذاعية بوثينة كامل
وسمعت بإعتقال زميل مدون اسمه احمد الجيزاوى
.........
طيب اللى مش فاهم الموضوع نقول من الأول
الدعوة وصلتنى من كذا مصدر
الخميس 15 نوفمبر احتجاج امام قسم العمرانية
وحداد على روح شاب مصرى شهيد إسمة أحمد صابر عمرة 22 سنة
يقال انه صيدلى ويعمل فى شركة سيد للأدوية
كان قد تم القبض عليه بتهمة حيازة أقراص مخدرة
وتم اجبارة على اعترفات وتعذيبة فى قسم العمرانية
وبعد التعذيب رموه فى الشارع مخلص قدام القسم
واصحابة أ خدوه على مستشفى الهرم
وتقريبا قعد فى العناية المركزة شوية وبعدين فارق الحياه
شوف الفيديو ده لقيته على يوتيوب
ده للشاب بعد القسم وهو فى المستشفى
واذا استجد جديد لدى هبقى أبؤه
واللى عنده اخبار يقولنا عليها
واظن ناشر الفيديو ده هو
موقع ثمن الحرية

ياترى أحمد صابر شهيد ولا لأ يا سيدنا المفتى ؟



ياترى تفتكروا هيجيى يوم تبقى مصر حاجة تانية
تبقى كرامة الانسان متصانة
وحياتة أغلى عند الوطن من أى حاجة تانية
ياترى تفتكرو هيجى يوم ترجع تانى الشرطة فى خدمة الشعب
ونسمع الظابط وهو بيقول
الى المواطن احمد ابراهيم القاطن فى دير النحاس لا تشرب الدواء
الدواء فيه سم قاتل
ياترى هيجى اليوم اللى نشوف فيه الشرطى حريص كل الحرص على راحة الأهالى وبيخدمهم بعنيه زى زمان زى إسماعيل يس فى البوليس
ياترى تفتكرو هيجى يوم نشوف فيه اللى بيغلطو فى حق بلدنا واللى بينتهكو شرف مهنتهم بيتعاقبو العقاب المناسب
ياترى ده هيحصل ؟
ياترى امتى ؟
إمتى ؟

أحمد الصباغ

73 comments:

يوميات عيل مصري said...

تعيش وتولع شموع يا ابو حميد، كانك قمت بالواجب يا ريس
بس متبقاش تطفي فلاش الكاميرا تاني
على فكرة.. يا مدونين مصر
عاوز أبوس الأرض بين اياديكم
انشر الورد على جباهكم
ارمي ولادي في وسطكم
افديكم بعيوني
يا عيال رجالة
تسلموا وتعيشوا وتقولوا لأ والف لأ

الدائخ said...

رغم إني متشائم و شايف الدنيا إن لك تكن ضلمة فهي رمادي غامق، لكن عندي إحساس أنه أكيد حيجي اليوم الل نحس فيه إننا بني آدمين تاني .. لكن إمتي ؟ الله أعلم .. حاسس إنه قريب لأن الناس بدأت تصحي رغم شيوع الأنتخة و التهييس بين الناس، و ده شيء يبشر بالخير .. قول يارب ..

فى القلب said...

لا حول و لا قوه ألا بالله

شهيد شهيد شهيد أقسم بالله شهيد
يارب يا رافع الغمه ومكشف الكرب
ورينا فيهم يوم

أما عن أحمد الحيزاوى فهورجل بألف رجل
نهض لشخص لا يعرفه فمن ينهض له الأن

مواطنة said...

ياااه .. و عندكم كل جديد على المدونة

انا إمبارح كنت راكبة ميكروباص فى شارع الهرم على المغرب كدة (كنت فى زيارة تسوقية لكايرو مول) و لقيت فعلا المنظر الملفت ده

طبعا قلنا يا زيارة لمسئول يا إما انتخابات و خاصة ان كان فى الطريق مدرسة هما حواليها

و احنا راجعين لمحطة مترو ام المصريين برده عربيات الأمن

و محطة القطر على طول سورها عربيا امن مركزى

بصراحة افتكرت ان القطر مهدد بعملية ارهابية و لا حاجة

لكن كل ده عشان احتجاجة !!!

لا حول و لا قوة إلا بالله

عصفور المدينة said...

رحم الله القتيل وفرج كرب أخي وصديقي أحمد الجيزاوي

وبالمناسبة لا نريد أننشغل أنفسنا بالرد على مهاترات المفتي بأن نصنف الناس شهيد وغير شهيد والحقيقة أنه مقتول ظلما وحاله يعلمه الله

رجاء موافاتنا بأي فعاليات للتضامن مع أحمد الجيزاوي

عصفور المدينة said...

وجدت البلوج الخاص بالجيزاوي مقفول!!!!!!!

سى السيد said...

والله يا أحمد
إحنا لوجينا نولع شموع عشان إللى بيحصل فى البلد
يبقى هنولع فى البلد ونرتاح
نقلت الخبر بقلم مبدع
عجبتنى أوى خاتمة البوست
ولسه هنشوف فى البلد كتير

حبة حاجات (ايمان) said...

قصدك تقول ان المواطن الغلبان المطحون اللى طالع ....امه دا مهضوم حقه؟؟

قصدك تقول ان الشباب العواجيز اللى هما احنا مش لاقينن حقوقنا؟؟

قصدك تقول ان فرص العمل المنقرضه فى بلدنا مش قادره توفر لينا اى عمل محترم او غير محترم حتى؟؟؟

لا ياراجل ماتبقاش ظالم

تحياتى ليك عالبوست دا

Desert cat said...

يارتنى كنت هناك
بس للاسف انا بعيده جدا
اليوم اللى بتستناه ده يا احمد انا كمان بستناه وبسال معاك نفس التساؤلات ربنا يهد الظالم وينصر الظازم
ويرحم احمد صابر برحمته الواسعه
تحياتى على البوست اللى وجعنى

NIDAAL PAL said...

احمد البوست جميل جداً يا صباغ
و لو انى معترض على حكاية الشموع دى
بقولك ايه .. فاكر لما كان اخوتنا السودانيين ليهم حقوق و مش عارفين ياخدوها
عملوا ايه ؟
مش وقفة احتجاجية بقى .. دى كانت اعتصام لعدة ايام فى الشارع ولا همهم امن ولا بتاع
لكن حكاية الشموع دى مش هنعرف ناخذ بيها لا حق ولا باطل مع ولاد***** دول
عايزين نعمل حاجة ترجع لينا جزء من حقوقنا يبقى اعتصام مفتوح لحين الاستجابة لمطالبنا و الرضوخ لها من جانب الحكومة
و ابسط الامثلة اعتصامات المصانع بدأت بمصنع واحد ..... شوف بقى يا معلم دلوقتى بقت منتشرة ازاى و الكل بيحاول ياخد حقه
واضح يا صباغ هاا
بس البوست جميل و مشكور على الجهد المبذول
كفاية زحمة المواصلات
مش المفروض ان المفتى يفتى بان من يموت غيظاً او زهقاً او اختناقاً من زحمة السير يبقى شهيد و مجاهد فى سبيل العمل
ولا ايه ؟

مهندس مصري said...

الله ينور عليك يا أبو حميد
أنا سمعت إن الجيزاوي خرج
عندنا فيه تضامن مع العميد السابق بالشرطة و المحامي الحالي محمود قطري في محكمة الجنح بدمنهور في الدور التاني بمجمع محاكم دمنهور يوم الأحد 18/11/2007 الساعة 9 صباحاً
لأنه فضح الشرطة من الداخل
حأحاول أحضر و أبلغكم بالتفاصيل

Cognition-sense said...

يااااه
عيشتني بحلم جميل في اَخر مقطع
مين عارف إمتى
بس أكيد إن دوام الحال من المحال

محمد مارو said...

ردا ع السؤال اللى وصلنى من السيد الزميل احمد الصباحى و السؤال كان بيقول
ياترى تفتكروا هيجيى يوم تبقى مصر حاجة تانية
تبقى كرامة الانسان متصانة
وحياتة أغلى عند الوطن من أى حاجة تانية
ياترى تفتكرو هيجى يوم ترجع تانى الشرطة فى خدمة الشعب
انا بقوله
طبعا هيجى بس لما يخلصوا علينا و يكون عددنا مليون او اتنين زى الامارات او الكويت او اسرائيل
هنا هيعرفوا قيمتنا لكن الان بقول لك هما شاينا كتير و ملناش لزمه
ناخد اتصال تانى و نقول الو

ابن القرية said...

جميل العنوان جدا
بس احنا متعودين علي كدة!
احنا لو شفنا غير كدة مش هانصدق
والله العظيم مش فادر اتخيل انه هايجي اليوم...يلا

شكرا جزيلا

سهر الليالى said...

عايز تعرف أمتى مصر هترجع حاجة تانية
عايز تعرف امتى هتكون كرامة الانسان متصانه
لما نفوق لنفسنا
وترجع التربية اللى بسبب غيابها بنعانى من كل اللى احنا فيه
لما كل أم واب يربو ولادهم وينتبهولهم يربو ستات تعرف تربى ويربو رجالة بحق يزرعو فيهم قيم صح واخلاق
يربوهم بما يرضى الله
ساعتها بس هتلاقى اللى يقف ويقول لا

أنا كنت لسه بقول ان احنا لو جالنا العدوان من برة مش بس مش هنلاقى ناس جامدة زى زمان بتحارب لا دة كمان ممكن يرحبو بيه لان كتير بقى جواهم غضب وناقمين على البلد دى

ربنا يرحمنا

coca said...

هقولك حاجه الشرطه مش وحشه اوي كدا
اي نعم بقوا اغبيه زياده حبتين بس بردو البلد من غيرهم اتفرج عليها
اكيد هتبقي حالتنا تصعب علي مامي امريكا نفسها
بس يعن يالله يكرمك يا خال بجد اخبارك كلها تشرح القلب
ههههههه
واللي عرفته عن احمد صابر ان الاخ كان واخ مخدرات
مش مبرر انه يتعمل فيه كدا
بس بردو اللي عرفته ايضا من مصادري
ان اللي بيدخل التخشبيه المساجين القدامي بيظبطوه جوا
وممكن يتعذب اكتر من ظباطنا ما بيعذبوا الشعب
تحياتي

ارسم بالرصاص said...

السلام عليكم ورحمة الله وبركاته
أول دخول ليا ع البلوجات كان ع بلوجك ياأستاذ أحمد ياصاحب القلب الكبير .. الله يعينا ويرحمنا من اللي احنا فيه .. أخبارك تجنن ... بجد والله تجنن .. بس ياأستاذ أحمد إحنا محتاجين وقفة مع نفسنا .. محتاجين نفوق شوية .. مش عارفة ليه حاسة انه مش الصح اننا نحتج ونصوت ونهلل واحنا خربانين من جوه ماهو برضو احنا محتاجين نتصلح .. لو كنا متصلحين بحق وحقيقي ماكانش ده بقه حالنا .. لو كنا بنعرف نكون صح كنا ح نعرف نفرض الصح .. ونجبر الآخر عليه .. تعرف انت بتقول امتى تشوف مصر زي مابتحلم وأنا بقول امتى اشوف الناس زي ماربنا أمر .. ساعتها استحالة نقول الا الصح ولا نعمل الا الصح .. ع الله حتى لو حلم بالرصاص أديني بحلم

الله يرحم أخي أحمد ويغفر له ويسامحه ويلهم أهله الصبر والسلوان ..

أستاذ أحمد فعلا البوست بتاعك كل مرة بيجي ف الصميم بس المرة دي

مؤؤؤؤؤؤؤؤؤؤؤلللللللللللمممممممممممم


تحياتي ليك ويارب تكون بألف خير ودايماً لله أقرب ..سلام عليكم ... هايدي

Sampateek said...

افتكر المفتي حيقول لا مش شهيد لانه عمدا متعمدا ليه بطن و ملوش ضهر
و لو كان ليه ضهر مكنش اتضرب على بطنة

يبقى هو مذنب

----
لما تعرف امتى ابقى قولي
:(

تحياتي

Sampateek said...

الفيديو مؤلم جدا
الله يصبر امه





.

yomna said...

خميرة عكننة بصحيح
انت مش كنت قلت انك مش هتقول اخبار غم تاني...ايه الموضوع...هي الكابة وحشتك تاني

انا بضم صوتي لصوت الجماهير اللي بتوقلك ابوس ايدك كفاية غم

يا راجل ده انت خال قد الدنيا...خاف علي نفسك و على العيال بقى

ابن حـجـر الـعـسـقـلانـى said...

لا حول و لا قوة إلا بالله
ربنا ينتقم منهم

Tamer Nabil said...

لاحول الله يارب

لااسف الهمجية والبلطجة اصبحت طريق اغلبية افراد الشرطة


لكن مهما طال الوقت عمر الظلم ما هو دايم

وربنا كبير


الله يرحمة ويحسن الية

تحياتى

بت خيخة وأى كلام said...

كنت فرحانة انى اخيرا لقيت بوست جديد
لكن فرحتى مكملتش لما شوفت البوست عن ايه

بصراحة معنديش اى تعليق غير ان ربنا يرحمه
وحسبى الله ونعم الوكيل فى اللى كانوا السبب فى موته بالطريقة دى
لان بصراحة خلينا واقعيين محدش بيموت ناقص عمر هو كان هيموت كدة ولا كدة فى الساعة اللى ربنا كتبهالله
لكن طريقة موته هى دى اللى مؤلمة فعلا
بس متهيالى انه شهيد
مش عايزة افتى فيها بس اكيد شهيد
ان شاء الله

دايما كدة موضاعاتك جامدة يا صباغ
حسبى الله ونعم الوكيل فيهم

وانا بقرا باقى البوست
افتكرت ايام زمان الشعار بتاع
الشرطة فى خدمة الشعب
وبعد كدة لما الشعار اتغير وبقى الشرطة والشعب فى خدمة الوطن
ونفسى اعرف مين اللى هيبقى فى خدمة الشعب

سلام من اختك
بت خيخة واى كلام

osama said...

قال تعالى:
وَلاَ تَحْسَبَنَّ اللَّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ

مُهْطِعِينَ مُقْنِعِي رُؤُوسِهِمْ لاَ يَرْتَدُّ إِلَيْهِمْ طَرْفُهُمْ وَأَفْئِدَتُهُمْ هَوَاء

وَأَنذِرِ النَّاسَ يَوْمَ يَأْتِيهِمُ الْعَذَابُ فَيَقُولُ الَّذِينَ ظَلَمُواْ رَبَّنَا أَخِّرْنَا إِلَى أَجَلٍ قَرِيبٍ نُّجِبْ دَعْوَتَكَ وَنَتَّبِعِ الرُّسُلَ أَوَلَمْ تَكُونُواْ أَقْسَمْتُم مِّن قَبْلُ مَا لَكُم مِّن زَوَالٍ

وَسَكَنتُمْ فِي مَسَاكِنِ الَّذِينَ ظَلَمُواْ أَنفُسَهُمْ وَتَبَيَّنَ لَكُمْ كَيْفَ فَعَلْنَا بِهِمْ وَضَرَبْنَا لَكُمُ الأَمْثَالَ

وَقَدْ مَكَرُواْ مَكْرَهُمْ وَعِندَ اللَّهِ مَكْرُهُمْ وَإِن كَانَ مَكْرُهُمْ لِتَزُولَ مِنْهُ الْجِبَالُ

فَلاَ تَحْسَبَنَّ اللَّهَ مُخْلِفَ وَعْدِهِ رُسُلَهُ إِنَّ اللَّهَ عَزِيزٌ ذُو انتِقَامٍ

صدق الله العظيم

اخي الكريم احمد الصباغ
للظلم نهاية وان بدا انه مستحكم

مؤمنه said...

السلام عليكم ورحمة الله وبركاته
رحمه الله
وربنا يفرجها ن عنده ويسرع انتقامه
الا ان نصر الله قريب
والسلام عليكم ورحمة الله وبركاته

يوميات عيل مصري said...

أبو حميد زرني في البوست الجديد وسامحني على اللي فيه

ابن اسكندرية said...

انا جيت اه عشان اقولك
انا كنت بهزر معاك
مدونه جميله
بس سامحنى الطريقة مكنتش ولا بد
بس فرصه سعيده
وان حسجل مدونتك عندى
بقولك معلش على المشور الى على الفاضى ده
تعيش وتجرب المشاوير السقع ده بس أن شاء الله تكون بفايده
ههههههههههه
سلام

3ala asm masr said...

البوست اكتر من رائع فعلا ونقلته بطريقه مينفعش يتقال فيها اى كلام
ربنا يرحمه يارب ويصبر اهله
وياريت كلنا نقراله الفاتحه
وبجد البوست وجعنى اوى لدرجه انى مش قادره اقول حاجه
حسبى الله ونعم الوكيل

احساس لسه حى said...

عزيزى
المشكله انها مشكله مش هيكون ليها اى حل طول ما فيه حكام زى حكمنا طول ما هيكون فى تعذيب وقهر واللى بنشوفه ونحس بيه اقل من الواقع بكتير ومش لازم يتصور فيديوا البانسان وهو بيتعذب علشان يتحكم على ضابط ولا يتحاسب
والحساب الاكبر يوم الحساب ان شاء الله
سلام

دكتور حر said...

هيييييجي يا صباغ
اكيد هييجي

امال احنا مستحملين ليه

ربنا لمصر ان شاء الله

اشكرك على البوست المتميز

بدراوى said...

بإذن الله اليوم ده حيجى يا أحمد بس لازم نقف وفقة رجالة
و الأرض و عطشانة نرويها بدمانا

-------
المفروض اللى موت بنى أدم

يأخذ حكم بالإعدام

MAKSOFA said...

أكيد حاتتحسن الأحوال طول مافيه ناس بتطالب بحقوقها بس علي فكره اللي موتوه ده موش صيدلي بس واحد مواطن مصري غلبان وامه غلبانه ومالوش عمو ولا أونكل علشان يحوش عنه

mohamed said...

انا لله وانا اليه راجعون
ربنا يرحمه ويدخله الجنات العلى
وانا بقى البوست دا دمى غلى
ياترى امتى هنحسش بقيمه الانسان
اللى هو اغلى من كل حاجة فى الدنيا
ياترى المشكله مشكله ايه
افراد ممكن طيب ازاى الناس دى تفهم
ازاى الناس دى تتعلم
ربنا ينتقم من كل ظالم
تحياتى

MKSARAT said...

صديقي العزيز
منذ زمن فقدنا كرامتنا واصبحنا مثل القطيع
وبات حالنا يحمل عنوان مهما نبادر بأن نتجة إلى اليمين نسير إلى اليسار
لا ادري نا ايضا متى سيضاء معني للكرامة
تحياتي

Ahmed Al-Sabbagh said...

يوميات عيل مصري

حبيب قلبى ربنا ما يحرمنا من دعوتك
وربنا يرجعك بالسلامة عشان تبقى بين مدونين مصر اللى بيحبوك ومشتاقين يشوفوك وتبقى بينهم يا اجمل مدون من قلب مصر الغالية


تحياتى

Ahmed Al-Sabbagh said...

الدائخ


أشكرك وربنا يستجيب دعائك

Ahmed Al-Sabbagh said...

فى القلب

أشكرك ونحتسبة من الشهداء

Ahmed Al-Sabbagh said...

مواطنة

أى خدمة ابقى تعالى عندنا
:)

Ahmed Al-Sabbagh said...

عصفور المدينة

نعم عندك حق يا أخى

Ahmed Al-Sabbagh said...

عصفور المدينة

أيوة أغلق ولكن فتح مرة اخرى
وافرج عن احمد

Ahmed Al-Sabbagh said...

سى السيد

أشكرك ده من ذوقك

Ahmed Al-Sabbagh said...

حبة حاجات (ايمان

:)
أشكرك

Ahmed Al-Sabbagh said...

Desert cat

امين ربنا يرحمة رحمة واسعة

Ahmed Al-Sabbagh said...

NIDAAL PAL

اممم اظن ان موضوع الاعتصام ده مش ينفع فى الظروف بتاعتنا احنا محتاجين نشتغل اكتر مش نعتصم أظن كدة

Ahmed Al-Sabbagh said...

مهندس مصري

ايوة فعلا خرج بالسلامة

Ahmed Al-Sabbagh said...

Cognition-sense

أكيد كل شئ ان شاء الله هيتحسن

Ahmed Al-Sabbagh said...

محمد مارو
:)

خليك متفائل يا رجل

Ahmed Al-Sabbagh said...

ابن القرية

معلش بعكنن عليكو دايما

Ahmed Al-Sabbagh said...

سهر الليالى

معاكى حق يا ميرو تسلم ايديك والله

Ahmed Al-Sabbagh said...

coca

اظن كلامك فى شئ كبير من الصحة
بس زى ما انتى قولتى مش مبرر يتعمل فيه كدة

Ahmed Al-Sabbagh said...

ارسم بالرصاص

ياهايدى تسلم ايديكى وتسلمى على ذوقك
وانا اسف اذا كان البوست مؤلم

Ahmed Al-Sabbagh said...

Sampateek
:)

تفتكرى كدة ؟

Ahmed Al-Sabbagh said...

yomna

:)

معلش يا قمر اوعدك ان قريبا بوستات تفرح

Ahmed Al-Sabbagh said...

ابن حـجـر الـعـسـقـلانـى

امين

Ahmed Al-Sabbagh said...

Tamer Nabil

اكيد يا تمور

ربنا يرحمة ويرحم كل المظلومين

Ahmed Al-Sabbagh said...

بت خيخة وأى كلام

معلش يا نور دايما معكنن عليكى كدة

Ahmed Al-Sabbagh said...

osama

تسلم ايديك يا اسامة بجد

Ahmed Al-Sabbagh said...

مؤمنه

وعليكم السلام ورحمة الله

شرفتينا وربنا يستجيب دعاكى

Ahmed Al-Sabbagh said...

يوميات عيل مصري

شوفت البوست بتاعك وعيط كمان

تحب تشوف عينة من الدموع
:)

Ahmed Al-Sabbagh said...

ابن اسكندرية

وانا عمرى ما ازعل من هزارك ده انت حبيب قلبى

Ahmed Al-Sabbagh said...

3ala asm masr

ربنا يكرمك يا هند

أشكرك

Ahmed Al-Sabbagh said...

احساس لسه حى

اكيد كل شئ له حل
وخليك دايما متفاءل

Ahmed Al-Sabbagh said...

دكتور حر

أشكرك يا عزيزى وربنا يستجيب دعاك

Ahmed Al-Sabbagh said...

بدراوى


طبعا معاك حق

Ahmed Al-Sabbagh said...

MAKSOFA


بجد ممكن تكون المعلومات عندى اتلخبطت ؟

Ahmed Al-Sabbagh said...

mohamed

يارب امين

اشكرك

Ahmed Al-Sabbagh said...

MKSARAT

أشكرك يا سيد على كلماتك الرائعة

أحمد مصطفى said...

لا حول ولا قوة الا بالله

اكيد فى نهاية لكل دا

يارب عجل نهايتهم

Dalia Al Marghani said...

ان شاء الله هيجى اليوم دة يا أحمد والدليل الصحوة اللى بدأت تظهر وماكنتش موجودة لحد خمس سنين بس فاتوا .. لما كان واحد يدخل قسم ويتعذب ما كانش حد بيحس بيه دلوقتى الداخلية عاملة لنا الف حساب علشان عرفت انها حتتفضح وعلى فكرة انا عرفت من مصدر من داخل الداخلية انهم اخدوا اوامر بانهم يخفوا شوية على الشعب اليومين دول وشبه اتقال لهم غمضوا عينيكم شوية .. ودة دليل ان اللى بنعمله بدأ يجيب نتيجة وان شاء الله بكرة احسن

ra7eel said...

خميرة عكننة
فعلا

شوف ياحمد الله يحرقهم بجد
انا مش فاهمه الظباط والعساكر دول مش عندهم قلب مش بيحسوا مش كده؟
ازاى يوصل بيهم الحال فى تعذيب حد للدرجه دى
ربنا ينتقم منهم يارب

تحياتى

mesh2dra said...

السلام عليكم

ياااه يا خالو
اسئلتك صعبة اوى
صعبة جدا
عشان ده يحصل
محتاجين معجزة

***********
والله فعلا خميرة عكننة وضيق واكتئاب
وتكتيف

**********

ياترى أحمد صابر شهيد ولا لأ يا سيدنا المفتى ؟

مش فيه ترزية قوانين
الظاهر الترزية كترو اليومين دول

سلاماتي

max.adams said...

هيبقى اليم ده
لما نبطل سكوت
ونبطل نخاف من اللي ماسكلنا النبوت
ونقول بأعلى صوت
دي بلدي ومش هسيب اللي يبوظ فيها يفوت

نوري said...

بالنسبه انه ممكن يكون لنا قومه تانيه
ونبقي زي افلام زمان
لاتشرب الدواء واسماعيل ياسين
والحركات دي يبقي موعدكش ياصاحبي
مدام كل شخصيه وجدت حياتها وراحتها في الخراب وحب النفس فقط يبقي استحاله يرجع المستوى العام زي أفلام زمان
بل ممكن يسوء لو وجدو
طرق اخري وممكن يبقي زي ماهو
قال تعالي(لايغير الله مابقوم حتي يغيرو ما بانفسهم)ومعتقدش في زمنا ده حد ممكن يغير من نفسه ممكن يحصل ده ع المستوى الشخصي عليا وعليك وع جراننا لكن استحاله يحصل ع المستوى الاجتماعي كله ابدا
كومنت نكد مش كده مفيهوش تفائل
بس برضه(بست وشز فور يو)0