خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Oct 1, 2008

شخشخ الكى بورد يا سيد

تحديث : نشر هذا الموضوع سابقا .. وأنشرة مرة ثانية .. ولكن مع بعض التخيلات لـ أحمد بدراوى
صاحب
مدونة طعم البيوت
إقرأ التحديث بعد البوست


طمـــوح إلكترونى


انا نفسى اعيش ويطول بيا الزمن لما أشوف مصر بقت جمهورية إلكترونية
كل شئ فيها يتم بالكمبيوتر
التعليم مثلا يبقى الكترونى
يعنى الواد بدل ما يصحى من النجمة ويدب مشوار للجامعة ..لأ
يفتح الكمبيوتر ويدخل على السايت بتاع الجامعة ويدوس على صفحة المدرج يلاقى العيال قاعدين متنحين والدكتور عمال يشرح
ويلاقى الطلبة عاملين غرف شات والدكتور بيشرح يقوم الدكتور يطلعهم برة السايت ويسحب منهم الباسوردات بتاعتهم

كمان الجواز الالكترونى ده حاجة مهمة أوى
لأ ..ما تفهمونيش غلط

يعنى العريس الالكترونى يتقدم ويقول لأبو العروسة
يا عمى انا شاب مبتدئ عندى موقع تلات صفحات ودومين
والحمد لله بابا كان سايبلى حتة مدونة على بلوج سبوت أهى سبوبة
وانا شفت بنت حضرتك دايما كانت بتعمل كومنت عندى والحقيقة عجبتنى اوى ويشرفنى اننا نعمل مدونة مشتركة

ابو العروسة يقولة : يا ابنى احنا بنشترى يوزر
وعمر الفقر ما كان عيب
ومدام سمعتك فى المنتديات كويسة
والبنت موافقة يبقى مبروووك
بعدين أهل العريس يتلموا حوالين كمبيوتر
وأهل العروسة يتلموا حوالين كمبيوتر تانى
و تروح العروسة الكوافير ..لا ..مش كوافير اللى فى بالكم
الكوافير الالكترونى ده ديزاينر محترف بيعرف فوتوشوب
يظبط صورتها اللى هتتحط فى الكوشة
وبعدين يروحوا طالعين بالعربيات على سايت مأذون.كوم
ويدوسوا إنتر على سنة الله ورسولة
وبعدين يطلعوا على موقع النادى يقعدوا يشيتوا ويتبادلوا التهانى

مش الجواز والدراسة بس
كمان السياسة هتبقى الكترونية
والتعذيب هيبقى الكترونى لان اقسام الشرطة هتبقى مجرد مواقع
مثلا عمرانية دوت كوم بولاق دوت كوم كدة يعنى
وياويله اللى هيتسأل و يطلع معهوش ايميل ويتاخد تحرى فى موقع القسم
لأ وكمان الوزراء والمسئولين والموظفين هينهبوا المال العام الكترونيا
والرشوة هتبقى عينى عينك فى المنتديات والمصالح الحكومية
يعنى مثلا تدخل موقع (السجق المدنى) تطلع بطاقة تقوم تلاقى راجل باعتلك ايميل بيقولك
شخشخ الكيى بورد يا سيييييد

تحديث من أحمد بدراوى

أحمــد بدراوى
طلع عنده طموح إلكترونى عالى وأضاف


طبعاً انت لو البنت اللى اتقدمت لها عندها سايت كامل
بسيرفر خاص .. وانت حيا الله عندك بلوجر مجانى
ابوها ممكن يقولك
لا و انا اضمن منين انك شارى البنت و بتحبها صحيح
مش يمكن داخل على طمع .. وعينك على السايت بتاعها
انا بنتى متتجوزش الا راجل فى مستواها الإلكترونى
و بعدين ازاى عايزها بعد ما كان عندها سايت خاص بيها
تعيشها فى مستوى اقل من كدة
و تأخذها فى حتة بلوجر صغير متكفيش
و لا تأخذها فى العشوائيات الإلكترونية
زى الدويقة دوت كوم

افرض مثلاً يوم و انتوا قاعدين وقع السايت عليكو
و لا الحكومة قررت تزيله و عملت هاكينج عليه
اعمل ايه ساعتها؟ .. قولى
لا يا بنى شوف بنت من مستواك

قطع
مشهد ليل داخلى
حبيبى معلش بقى متزعلش من كلام بابا
اصله هو كدة بيحبنى اوووى
انا عندى استعداد أبدأ معاك من الصفر
و نقضيها
gifts
و
notes
لحد ما ربنا يعدلها و نساعد بعض
و اهو أى وول تلمنا
إن شالله إيجار جديد سنة ولا اتنين

قطع
مشهد نهار خارجى
فى سيبر
ايوا يا حبيبى بابا خلاص مش موافق
اعمل ايه؟
هو : خلاص يا حبيتى نضرب انا و انتى
اكونت سكرت و نعمله بلوك عشان محدش يعرف
و اهو كفاية اتنين ميمبرز يشهدوا على الأكونت
هى : لا لا يا حبيبى كل الا ده
انت عارف ان الأكونت اساسه الإشهار
!!!

و بعدها بعام بعد فشل كل المحاولات

ألوووو ايوا يا حبيبى
انا فى عريس جاى متقدملى
و جاهز من كله
معاها سايتين بسيرفر كبير
و بلوجر
وواخذ ناصية كمان
فى التجمع الخامس

انا اسفة يا حبيبى
ليس بالحب وحدة يحيا الإنسان
الحب لازم معاه سيرفر يقويه .. سلام

الواد يرد
قوليلى فين السايت ده و انا اهييك عليه دلوقتى
محدش هيأخذك منى أبداً
ده انا ممكن اكسرله السايت باللى فيه
إيميل واحد للداخلية و الواد
يتبهدل فى العمرانية دوت كوم

بخصوص التعليم الإلكترونى

مشهد ظهر داخلى
بابا : مالك يا حبيبى قايم من على النت بتعيط ليه
الواد : عاه اهيه اهيه اهيه بابا الناظر هزأنى قدام صحابى
و قالى بكره لو مدفعتش المصاريف مش حتخش السايت تانى
و شكلى بقى وحش اووى
يا بابا

بعدها بيوم الواد داخل السايت
عاعاعا كدة يا بابا الناظر قفل الأكونت بتاعى لحد ما دفع المصاريف
عا عا عا عاه
اهيىء اهيىء اهيىء اهيىء

قطع

واد تانى فى سايت تعليمى أخر

الناظر : انت يا واد يا اللى بتشاتينج فى الطابور
مش واقف عدل ليه
لو ماتعدلتش حقفل عليك النت خالص


واد تالت
جاى متأخر بعد الطابور ما طلع
و نبى يا عم سيد افتحلى السايت اصلى صحيت متأخر معلش
لا يا واد البيه الناظر محرج افتح الدوووت نيت بعد الطابور ما يطلع

واد رابع
انت يا واد اللى هناك مش تقف كويس و احنا بنحيى العلم و بنقول النشيد
خلاص يا مستر بقى
ما انا منزل النشيد داونلود ام بى ثرى من على النت خلاص حفظته

واد خامس فلتان خالص
انت يا واد يا اللى هناك شايفك و انت بتكتب اسامى صحابك اللى مجوش انهارده على الكيبورد
اللى حيعمل كدة حيطرد من على السايت و حيتعمله انذار ولى الأمر يوصله لحد الميل

واد سادس

انت ياواد يا اللى هناك عمال تتفرج على فيديو حصة امبارح و بتستعبط
و عامل كأنك حضرت الحصة
!!!

واد سابع
انت ياض يا اللى هناك
سرحان فى ايه؟
طب قوم قوللى انا كنت بتكلم فى ايه
و على الله تفتح الميديا بلاير عشان تعرف عملنا ايه
عارف لو عملت كدة

حنزلك تلم الزبالة اللى على الوول كلها
و تلف السايت ثلاث مرات
لحد ما تهنج و النت يقع
!!!

114 comments:

دكتور حر said...

لأ جميله يا عم أحمد
افتكاسات ممتازه
بس لو ينفع نعمل لنا رئيس عالفوتوشوب
ونعمله انتر وديليت وقت ما احنا عاوزين
تبقى فله قوي

أضحك الله سنك

Omar said...

تفتكر العيب فى الكى بورد والا فى الشخشة والا فينا؟

حبة حاجات (ايمان) said...

يااااااااسلام على التكنولوجيا الجااامده اوى
بس دى محتاجه كيبورد كمان جااااااامده

فكره حلوه بجد بتاعة الطلبه والدكتور وحكاية يسحب الباس وورد بتاعهم

تحياتى

عصفور المدينة said...

هي كلها عجبتني بس أكثر حاجة عجبتني احنا بنشتري يوزر

NIDAAL PAL said...

على راى دكتور حر
ايه يا عم الافتكاسات دى
افتكاسات جامدة جمودية
بس بالنسبة للجواز الى بالكمبيوتر دى
ياريت و الله على الاقل هنخلع من تكاليف الفرح و كمان مش هيبقى فيه لا شبكة ولا دبلة ولا بتاع
بس فيه عيب واحد
ان الشباب كلها لما هتصدق و لما تيجى تدخل على السيرفر مش هتعرف لانه هيكون مليان و مشغوووووووول
و الشخشخة ... الزراير تبع الكى وقعت و بكتبلك من جوا المازربورد
اشخشخها هيه كمان
ولا انت ايه رايك
يا جامد
ربنا يحميك و يخليك لينا
و منتحرمش من افتكاساتك

A.SAMIR said...

ياااااااااه
بس دة فعلا كل دة موجود في مصر
انت مش عارف ان اللي بيحكمنا حاليا هي الحكومة الالكترونية؟
كله بالالكتروني دلوقتي
تحياتي

aya said...

هههههههههه
حلوة شخشخ الكى بورد يا سيد

دا احنا يا احمد هنشوف ايام فى البلد ديه؟؟؟ حاجة فللى على الاخر

بوست جامد موت وعجبنى اوى

بجد الله ينور يعنى

Dr.Mohammed Gohary said...

مش حلووووه












برضو مش حلوة









مقلتلك مش حلوة










يع









يع









يعني مش حلوه










هي فعلا مش حلوة














لأ جامدة



بخاصة الصورة اللي في الاول

التوأمان said...

جامدة اويي !!!!!!!!!!!!!!!!!!!

عجباني حكاية الجواز علي النت

Mo3Az said...

هههههههه

جامدة اوى الصورة اللى فى اول البوست

الموضوع فكاهى بشكل جميل
بالذات موضوع التعذيب الالكترونى دا:)

البوست دا يلفت نظرنا ازاى ان العلاقات الانسانية اذا تحولت الى اشياء جامدة ، تبقى الحياه صعبه اوى

تسلم يا جميل
وبعد كدة ما تمشيش من غير ايميل
وحط الفيس بوك فى جيبك على طول
;)

مهندس مصري said...

طب ليلة الدخلة حتبقى إلكتروني إزاي يا أبو حميد
:D

اسكندراني اوي said...

ايه يا خالو

هو في كده برضه

ههههههههههههههههه
بوست لذيذ وقاسي اوي

عاشقه الفردوس said...

ههههههههههههههههههههههههههه

بجد حلو
بوست روعه
خيالى جدا
بس وماله خلينا نحلم
مااحنا طول عمرنا بنتخيل

جزاك الله خيرا
واضحك الله سنك

osama said...

هههههههههههههههه
جميل اوي يا ابوحميد

وبكده نضمن المستقبل ونبقى بقى دولة متحضرة ..
كمان الفلاح يزرع المحصول على النت .. عن طريق العاب دفي دي .. ونحارب بنفس الطريقة ...

عجبني اوي ان التعذيب كمان عن طريق النت .. لان الوظيفه دي مهينسوهاش ابدا ...ههههههههههههههههههه

روح ساخرة جميلة .. دمت بكل ود..
خالص تحياتي

MKSARAT SAYED SAAD said...

احمد يا صباغ بجد ان مشكلة جميل بجد البوست بتاعك قوي
ليا تعليقين
اولا الخوف لا الكوافير الالكتروني يغير شكل العروسة ويضحك على العريس ويجوزة امها
ثانيا الرشاوية ولو الكترونى انا رأي تبقى بالفيزا او بالماستر كارد هتبقى اشيك
واخيرا بقى ملقتشي غير سيد اللي يشخشخ جيبة
تحياتي يا صدقيى الجميل ودمت بكل صحة وسعادة

سهر الليالى said...

يخرب عقلك يا أحمد
بوست جامد موت
قريته ييجى خمستبعتاشر مرة كدة
وفى كل مرة بضحك برضو

لكن أحنا بنشرى يوزر دى بقى فظييييعه مووت
هههههههههههه

وبعد كدة نقول ليكى يوزر يترد عليه
تحياتى يا جميل
استمر

Ahmed Al-Sabbagh said...

Omar

اظن العيب فى اليوزر
ههههههههههههههه

Ahmed Al-Sabbagh said...

دكتور حر

ياعم محمد تقصد رئيس فى العمل ولا رئيس ايه بالظبط هههههههه
عشان الواحد يبقى عارف يبقى بيتكلم على ايه
ربنا يكرمك دايما منورنى فى المدونة

Ahmed Al-Sabbagh said...

حبة حاجات (ايمان

:)

مش تكنولوجيا جامدة وبس يا ايمى
لأ كمان ناس تكون جامدة
يوزرس كويسين يعنى
هههه

Ahmed Al-Sabbagh said...

عصفور المدينة

اشكرك يا باشمهندس ويارب ما يحرمنا منك ومن تشجيعك الدائم لينا

Ahmed Al-Sabbagh said...

NIDAAL PAL

حبيب قلبى ربنا ما يحرمنا من كلامك الجميل
وعلى فكرة انا لسه قارى رسالتك اللى بعتهالى بتاعة الحملة واول ما قريتها دخلت عندك على طول

وانا حطيت بانر للمدونة بتاعتك فيها شعار الحملة
وده اقل تقدير لمجهودك وحماسك

وابقى طمنى عليك دايما

Ahmed Al-Sabbagh said...

aya

شكرا يا ايوش على زيارتك وكلماتك الجميلة وربنا يعديهالنا على خير

Ahmed Al-Sabbagh said...

Dr.Mohammed Gohary

ههههههه
انتى دايما كدة يتنقطنا بالكلام يا محمد
ههههههههههههه
تسلم يا حبيبى وخلينا دايما فى بالك

Ahmed Al-Sabbagh said...

التوأمان

أصدقائى سعد وعبد الرحمن

شكرا للزيارة الجميلة

Ahmed Al-Sabbagh said...

Mo3Az

أكيد يا ميزو
انا شايل على طول الهوتميل فى جيبى
هههه

Ahmed Al-Sabbagh said...

مهندس مصري

هههههههههههههههههههههههه
ليه الاحراج ده بس
اكيد هتبقى عن طريق البريد الالكترونى
:)

Ahmed Al-Sabbagh said...

اسكندراني اوي

ايوة ياباشا فى كل حاجة

اللى تؤمر بيه موجود

Ahmed Al-Sabbagh said...

عاشقه الفردوس


أشكرك وجزاكم الله خيرا على كلامك الجميل

Ahmed Al-Sabbagh said...

osama

ههههه
تصدق يا اسامة فاتتنى فكرة الدى فى دى ديه

اهو كدة عندنا الطاقات الالكترونية الخلاقة اللى بتفكر وتبتكر وعندها طموح الكترونى

Ahmed Al-Sabbagh said...

MKSARAT SAYED SAAD

امممم بالنسبة لموضوع الكوافير الالكترونى ده لازم يكون مرخص ومعاه شهادة من الصحة بمزاولة عملها ههههههه

وبعدين يا اخى جيب السبع ما يخلاش ما شخشخ الــــ

كى بورد

يا سيد

ههههههههههه

Ahmed Al-Sabbagh said...

سهر الليالى


هههه اشكرك يا ميرو يا عسل

بس ايه حكاية خمستبعتاشر دى

انتى جبتى الكلمة دى منين

ده انا لما سمعتها عملت زى الليمبى لما سمعت ابسيليوتلى

ههههههههههه

Ahmed Al-Sabbagh said...

A.SAMIR

ههههههههه
على فكرة انا زرت مدونتك وعجبتنى اوى اوى

Omar said...

احمد؟

لو العيب فى اليوزر تبقى مصيبة

انا افتكرت العيب فى السوفت ووير


شكلو اليوزر نسى الباص ورد

الله يخرب بيته

بت خيخة وأى كلام said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
عليك افكار يا ابو حميد
تجنن
عجبتنى اوى يسحب الباسوردات بتاعتهم
ويروحوا للمأذون . كوم ويعملوا انتر على سنة الله ورسوله
بجد عليك تعبيرات تجنن

بوست جميل اوى ودمه خفيف جدااااااااااا
اختك خيخة

mesh2dra said...

ههههههههههههه
حلوة بجد
وبناء عليه
حتكون علاقتي ببابا وماما واخواتي عبر البيئة الرقمية
يعنى يوم ما احب انزل مثلا مع اصحابي اكلم بابا على الماسنجر وهو قاعد معايا ف نفس البيت واستأذنه انى انزل
وطبعا مش حنزل بجد
حجيب الكافيه اللي حنروحه من على جوجل ايرث
ونتخيل ان احنا هناك

ونربي العيال بقى الكترونى

ويا سلام بقى لو الامتحانات بالنظام ده
وجمبك الكتاب :D

دي احلام يقظة يا خالو
نصيحتي بلاش التمادى
لان النهاية بتكون مش حلوة:p

البيروني said...

جاااااااااااااامدة يا خال
أسف نسيت اسلم
السلام عليكم

ما شاء الله الخيال الالكتروني ماهوش حل
بس أظن نسيت الاكل
هناكل ازاي الكترونيا

و معليشي على انقطاعي عن مدونتك الفترة اللي فاتت

د/اجدع بنوته said...

ياسبحان الله والله ياخالو انا لسه كاتبه بوست عن حياتنا النتيه عندى حالا
والذى بدوره يؤكد ع ان النت بقى شىء اساسى ف حياتنا وفعلا حلمك ده مش بعيد والله كلها 10 سنين ويمكن ااقل وهيتنفذ كل اللى حضرتك بتقولو ده وميرسى جدا ع تشريفك مدونتى المتواضعه .. هلف انا ااقرى بقيت البوستات .. بس ازاى يعنى لا حد قابلنى بحاجه ساقعه ولا واحد رز بلبن حتى .. لا لا متنفعش الضيافه دى خالص يعنى

فى القلب said...

ههههههههههههههههههههههه

أيه يا عم أحمد الوحده ألى أنتى عايزتعيشنا فيها دى

لاء يا عم أنا بحب الناس والهيصه

ممكن السجن الألكترونى ده أوافق عليه

Anonymous said...

جميلة فعلا تسلم ايدك

NoNa said...

تسلم ايدك

ارسم بالرصاص said...

استاذ احمد .. السلام عليكم ورحمة الله وبركاته .. طموحك مش عادي المرة دي ..

لكن تعرف هو معظمه متحقق بالفعل .. يعني حدوتة الدراسة ماشي حالها ومبلوعة

وحدوتة الزواج اهو ياما فيه من تقليعات وتعرف من غير ماتحس ح تطلع موضة ف الشباب بكرة تلقاهم بيقولو .. يلا لينا شات روم نتحاسب فيها ..

طيب كل ده ماشي .. لكن حبكت معايا ع حدوتة الاقسام وسحب الرخص اصدي الايميلات .. تفتكر ممكن يعملوها ؟؟ ااولك مفروض نعمل حسابنا من دلوقتي ونعملنا كام ايميل بيض ينفعوا ف اليوم الاسود ..

ولا اولك انا احسن لي اروح اتعلم ازاي اعمل فيارس واعملي كام تروجان محترمين اهو البد فيهم لحد مايجد ف الامور امور

استاذ احمد بجد صحيح انت دخلت ع ال second life

اهو فيه زي اللي انت بتقول عليه تعرف المغاربة عاملين شغل حلو اوي فيه .. عالم تاني ع النت تختار الشخصية اللي تعجبك وتعيش وتشتغل وتكسب وتعمل اللي انت عايزة وتروح حتى المسجد .. اي حاجة كلو كلو

بس تعرف انا حسيت لما اتفرجت عليه انو حاجة كده نوع من الهروب من الواقع وعبط .. المهم انو اصبح شاغل ناس كتير جدا وبيضع وقت ناس كتير .. شوفو واحكيلي رأيك

ح تلاقي ان طموحك .. بيتحقق بمنتهى البساطة ..

وح تكسب هناك اوي نسيت اسم العملة بتاعتهم ايه .. بس اسمع لازم تشخشخ الكي بورد ع الاخر .

http://blog.secondlife.com/

ح احاول اكتب ف بوست جديد تجربة عن السكند لايف

يلا يااستاذ احمد نجربوا ونشوف

ايه رايك ؟

ـــــــــــ

استاذ احمد موضوعات رغم رنات السخرية فيها الا انها بتفجر نقاش حول مواضيع مش عادية ..

اعزك الله واكرمك

تحياتي ليك
هايدي

Salma Amer said...

ههههههه
تخيل بقى لو دخلت على السيت بتاع الحكومة علشان تخلص ورق ولا حاجة
فتلاقي الموظف عامل بيزي علشان بيفطر وبعدين تقف في طبور الكتروني وبعد كدة يجيلك ميل يقلك فوت علينا بكرة
وكدةتبقى بيرقراطية الكترونية
تحياتي

و القادم....أجمل said...

هههههههههههه
ههههههههههههههههههه
هههههههههههههههههه

رووووووووعه بجد
جامده اوي حكاية الاستوديو بالفوتوشوب
ههههههههههههههه

طيب و الله حكاية التعليم دي جميلة
حضرتك انا بقول لصحابتي
ميمتحنونا علي النت
دا احنا بنكتب اسرع علي الكي بورد
:D
و لما بييجي سؤال و محتاج نكرر الاجابة
اقول فين بس الكوبي و البيست
:|

هههههههههههههه
ربنا يسعدك حضرتك يارب
موضوع جميل اووووووووووووي


تقديري

:)

3ala asm masr said...

بوست جامد أخر حاجه
وأهم حاجه موضوع المحاضرات اللى هيبقى بالنت ده تحفه
على الاقل نرتاح مش وش الدكاتره
تحياتى يا باشا

نوري said...

فظيع يا احمد فظيييييييييييع
مش معقول الي انت بتعمله ده
هههههههههههههههههه
ربنا يطول في عمرك وعمرنا
لحد ما ده يحصل
بس انا عندي راي كده يعني
ليه نشحطط اهل العريس والعروسه
مكل واحد كده يلبس ويقعد في بتهم ويفتح الماسنجر ويقعدو مع بعض يعيشو اللحظه ونشتري الايميل الخاص بتاع سعد الصغير من النت ونضيفه ويدخل معانا عشان يحي الفرح النتي ده ونعيش اللحظه
وكده يبقي حلينا مشكله المواصلات كمان
ونبعت للمعزيم الاكل ديليفري
وصور العرسان مع المعزيم نوديها لنفس السايت بتاع الفوتوشوب يظبطهم
الله يسمحك مش قادره
امسك نفسي من الضحك
بس بوست اكتر من رائع
يلا(بست وشز فور يو)0

NIDAAL PAL said...

ازيك يا صباغ
خبر عاجل : ياريت تنشره
اتصلت بايمان بدوى احدى الناشطات المشاركات فى قافلة رفح
و قالتلى ان الشرطة منعاهم يدخلوا العريش و اتفتشوا اكثر من 5 مرات تفتيش دقيق حتى الاكياس بتتفتش
و الشباب المشاركين عملوا مظاهرة
على الطريق .. و مخنوقين على الاخر و ممكن يرتكبوا جناية مع الشرطة
ربنا يستر الوضع جد خطير

ibn nasser - ابن ناصر said...

هههههههههههه
لا والله افكار حلوة جدا
!
تحياتي

Desert cat said...

ربنا يسمع منك يا خالو احمد
ده انا فى الحالة دى هعمل شغل محصلش
ووقتها السيبر بتاعى هيشتغل 48 ساعه فى اليوم ازاى متسالنيش
وعلشان فرحتى بيك هعملك نسبة وكل شهر اعزمك على مج نسكافيه

مواطنة said...

هههههههههه

تحفة

لكن استنى هنا

تعليم ايه الإلكترونى

أمال نضرب العيال إزاى.. ب

Nudge

!!!!!

مشمش said...

جميلة جداا يااسنتاذ احمد بس مفتكرش انها هتبقي كدة بالظبط يعني خصوصا في موضوع الجوزا يعني

أحمد مصطفى said...

والله العظيم تدوينه جامده جامده جدا جدا جدا


الله ينور ياخالو

تحياتى
أحمد مصطفى

السيد شبل said...

ايه الروعة دى يا صباغ ... حاجة محترمة محترمة يعنى....
بس اهم حاجة ان البوس البوس .... والحضن الحضن... وال...." علشان الرفابه"... كل ده اوعى يبقى ع النت

Cognition-sense said...

ههههه

ده إنت شاب غريب بمخيلة اغرب

بوست جميل فعلاً

My Hope$ said...

هههه
حلوة قوي الافكار الجامدة
بالذات الاقسام دوت كوم
تحفة
وكمان الجواز اون لاين
بابا كان بيقولي علي الفكرة دي
بس معجبتنيش
ههه
سلام

Ahmed Al-Sabbagh said...

Omar

اه تقريبا يا عمر اليوزر نسى الباسورد
:)

Ahmed Al-Sabbagh said...

بت خيخة وأى كلام

ميرسى اوى على البؤين الحلوين دول

بس ما تختفيش كدة

عـسـل مـرمـر said...

و لو حماك يا فالح سألك
بالنسبه للشبكه اللى حتشتريها حتكون حقيقية .. وللا فوتوشوب بردو ؟؟؟

احنا بنشترى يوزر

حتقول ايه يا عم اليوزر ؟
وللا حتهنج ؟

خواطر علياء said...

بصراحه جميله
فكرة حلوة
لعبتها صح
بس تفتكر كل حياتنا نقدر نمشيها بالكى بورد؟

Mahmoud Emre said...

لا بوست تحفة يا ابو حميد ..



وعجبتنى فحت حتة احنا بنشترى يوزر دى ..

عمر محمود said...

المشكلة مش فى الشخشخة
المشكلة الكيبوورد مش بيشخشخ
وعندى لكم رحلة لرفح
http://yalaya3mlak.blogspot.com/2007/12/blog-post.html

dandana said...

طب واللى ماعندوس دى اس ال يعنى يعمل ايه..يموت نفسه..لا ياعم
احنا كدا حلوين

دا حتى التعذيب مايبقالوش طعم

ولا الرشوة...اراهنك انه هايحس ان فيه حاجة ناقصاه..ملمس الفلوس برضه عجب


بس البوست حلو..

وربنا يستر

alzaher said...

أنا طموحي أكثر تواضعا منك
طموحي ان تصل مياة الشرب النظيفة لكل محافظة
وأن يحظى المواطن المصري برغيف عيش أدمي
ويحظى أولاده بتعليم يحترم عقليتهم ولا يجعلهم حفظة للمناهج
وأن تعود روح التسامح التي حجبها التعصب والطائفية
وأن يحترم رجال الشرطة المواطنين ايا كانوا
بعدها يمكن ان نفكر في هز الكي بورد
:)

coca said...

جامده جداااااااا التدوينه دي

خصوصا شخشخ الكي بورد يا سيد

يعني هولا مفر من السرقه والرشوه والتعذيب

حتي لو الكترونيا

وانت بقي يا احمد لما تيجي تتجوز

ادخل علي عروستك بسيديهات وكي بورد وماوس

والشبكه تبقي من ميكروسوفت

السيد شبل said...

يا ابن اللزينه ياصباغ ايه كل التعليقات ديه...
انا مش بحسد ولا حاجه ربنا يزيد ويبارك...
بس بجد الموضوع يستاهل ان كل الدنيا تقراه...
قشطاط... يا عم

ابن عمر said...

ربنا يحقق حلمك
*********
حمدلله علي السلامه
فى رساله
عندى ليك ياريت تقرأها

محمد مارو said...

ههههههههههههههههههههههههههههههههههههههههههههههههههههههههههههه
حلو اوووووووووووووووووووووى البوست ده تسلم اديك

Ahmed Al-Sabbagh said...

mesh2dra

ههه
اظن احنا فى طريقنا للى بتقولى عليه ده

انا شخصيا حاليا ببقى على رنات مع اسرتى
هههه

Ahmed Al-Sabbagh said...

البيروني

وعليكم السلام
ورحمة الله وبركاتة

احنا ممكن نبقى ناكل اى حاجة
انشالله سوفت وير

ههههه

Ahmed Al-Sabbagh said...

د/اجدع بنوته

يا دكتورة انا كنت مجهز كشرى للاستقبال بس حضرتك اتأخرتى رحت واكلة
ههههه

Ahmed Al-Sabbagh said...

فى القلب

هههههه
لأ مانتى هيبقى حواليكى ناس فى كل المواقع اللى حولك
هههههه

Ahmed Al-Sabbagh said...

NoNa

ميرسى يا نونا

Ahmed Al-Sabbagh said...

ارسم بالرصاص

WOOW

انا هدخل اشوف موضوع السكندلايف ده

ده موضوع شيق اوى

Ahmed Al-Sabbagh said...

Salma Amer

هههههههه
الله
اضافة جميلة لجمهورية مصر الالكترونية

Ahmed Al-Sabbagh said...

و القادم....أجمل

هههههه
اه ويبقى الغش على ودنة صح
غش الكترونى
هههه

Ahmed Al-Sabbagh said...

3ala asm masr

شكرا يا هاااااانوود

واضح انك بتعزى الدكاترة اوى

Ahmed Al-Sabbagh said...

نوري

ههههههههههههه
اللااااااااااااه
ده انتى الكترونية فظيعة
بس يا ترى الاكل هيبقى ايه
سوفت وير ؟

ههههه

Ahmed Al-Sabbagh said...

NIDAAL PAL

متشكرين يا زعيم

وفعلا الاخبار دى اتنشرت وكل الناس متابعة

متشكرين على اخبارك الجميلة

Ahmed Al-Sabbagh said...

ibn nasser - ابن ناصر

اشكرك يا صديقى وشرفتنا

Ahmed Al-Sabbagh said...

Desert cat

هههههههه
بس ساعتها مش هيبقى سايبر
ده انتى هتبقى خاطبة
هههههههه

Ahmed Al-Sabbagh said...

مواطنة

هههههههههههههه
انتى كل اللى همك الضرب
هههههههههه
واضح انك بتستمعى بتعذيب العيال
زييى تمام

Ahmed Al-Sabbagh said...

مشمش

اهو ادينا بنتخيل

Ahmed Al-Sabbagh said...

أحمد مصطفى

ميرسى يا ابو حميد
انت دايما منورنا وكلامك بيسعدنا

Ahmed Al-Sabbagh said...

السيد شبل

ههههههههههههههه
طبعا طبعا
مفهووم

Ahmed Al-Sabbagh said...

Cognition-sense

مخيلة دى غير مخاااليل ؟؟
هههههههههه

Ahmed Al-Sabbagh said...

My Hope$

لأ من لم يأتى بكلام بابا أتى بكلام خالو
ههههههههه

Ahmed Al-Sabbagh said...

عـسـل مـرمـر

لأ بالنسبة للشبكة ممكن تبقى سى دى
والعروسة تلبسها فى رجلها زى خلخال كدة

Ahmed Al-Sabbagh said...

خواطر علياء

شكرا يا علياء

Ahmed Al-Sabbagh said...

Mahmoud Emre

ههههه
وانا عجبتنى حتة فحت دى
:)

Ahmed Al-Sabbagh said...

عمر محمود

شكرا على الرحلة ومتابعين الاخبار

Ahmed Al-Sabbagh said...

dandana

ههههههههه
تصدقى عندك حق

Ahmed Al-Sabbagh said...

alzaher

الله
طموحاتك جميلة اوى
يارب تحقق

Ahmed Al-Sabbagh said...

coca

بصراحة انا حاسس انك اكتر واحدة فهمت المغزى من البوست

Ahmed Al-Sabbagh said...

السيد شبل

حبيب قلبى
ده أر ولا حسد

Ahmed Al-Sabbagh said...

ابن عمر

اشكرك يا صديقى
الرسالة وصلت

Ahmed Al-Sabbagh said...

محمد مارو

ميرسى اوى على ذوقك

هبههههووب said...

حلوة اوى
وعلى فكرة المدونه هايله اوى وانا اول مرة اقرأ بعض ما فيها
وان شاء الله لى زيارة اخرى لمدونتك
----
حلوة اوى احنا بنشترى يوزر دى
وشخشخ الكيبود يا سيد
بجد حلوة اوى
---
وربنا يوفقك يارب

Arabic ID said...

سيبك انت
أحلى حاكة الصورة بتاعة النت كافيه
معبرة
وبسيطة

ملعوووووبة

الدائخ said...

إحنا يا بني بنشتري يوزر برضه

عجبتني الحتة دي
بصراحة فطستني علي نفسك م الحك

يخرب مطنك يا أبو حميد .. أنت حتنافسنا في التهييس و الافتكاسات و لا إيه

غمض عينيك said...

جامدة ومفتكسه

محمد عبد القوى said...

صباح الأفتكاسات يامعلم
يخرب بيت دماغكم الجامدة
بوست حلو قوى والله ..بس الجزئية بتاعتك أجمد من جزيئة البدراوى
يمكن عشان هى اصل الفكرة

بدراوى said...

جميلة مريعة فظيعة
حلوة
اوووى
يا جماعة اللى بإسم بدراوى

ده انا اللى كاتبه
شكراً يا احمد على كلامك

و على انك خليت كلامى يتشرف بإنه يتحط فى مدونتك الجميلة

يا لا يا جماعة كلمة حلوة للعبد لله
متخفش يا خالو مش حسرق منك الجو
انا حيا الله مدون لسة بيكون نفسه

Ahmed Al-Sabbagh said...

محمد عبد القوى

انا اختلف معاك
الجزيئية بتاعة بدراوى احسن بكتييييييير
ده طلع كاتب ساخر فظيع

Ahmed Al-Sabbagh said...

بدراوى

الشرف ليا يا ريس
التعليقات اللى فاتت دى على البوست القديم لما اتنشر اول مرة
وانا واثق ان الجزء الخاص بك هيعجب الناس اكتر بكتييييير
عايزين الناس تعيد
:))

بدراوى said...

الحقيقة انت بتعرف من معنوياتى بكلامك ده
شكراً ليك
بس تقدر تقول انت قلت مجمل القصة
و انا نزلت بالتفاصيل
و ادينا بنكمل
بعض يا خالو

و جزئيتك احلى و لا جزئيتى مش مهم

المهم نبسط الناس اللى بتشرفك

واحد شاى فى الخمسينة و نبى للأخ الى هناك ده
و حجر معسل للأخت اللى هناك
ههههههه

Tamer Alhosiny said...

ههههههههههههههههههههههههههه

ايه الموضوع التحفة ده
بجد موضوع رائع وعجبني جدا جدا
هههههههههههههههه
ربنا يحقق احلامك يا احمد

اصلي بيني وبينك عندي سرفر خاص
ههههههههههههههه
ودومين كمان

ههههههههههههههههه
يعني هبقا عريس لقطوة في عالمك الالكتروني


كل سنة وانت طيب يا جميل
وعيد سعيد
متنساش تعدي علي مدونتي
انا عاين ليك عدية جميلة هتعجبك قوي
مخصوص ليك والله
وعيد سعيد

مهندس مصري said...

لا لا لا لا
الجزء بتاع البدراوي خطير
عجبني تفاصيل الحب الإلكتروني
أما المدرسة فتحفة بجد

ـ-ـ- أحمد عبد العدل-ـ-ـ said...

هههه
كل سنة وحضرتك طيب ياخال
وعيد سعيد عليك

رندا said...

كل عيد وانت طيب وبخير

اللهم بلغنا رمضان المقبل يارب

وكل عام واسرتك بخير

رندا

عايزه اتطلق و said...

كل سنه وانتا بالف خير وطيب يا صباغ
وحلوه قوى شخشخة الكيبورد دى
على اساس لو اعتبرناها عيديه...
وكل سنه وانتا معيد علينا
بشخشخه فوق كيبورد النيل ..ألا بقولك هيا العيديه راحت فين
ولاا بتستثمرها زى ما عملت مع
عيدية المخاليل..
..اه اعتقد ان ربنا
ستار حليم واسك على موضوع عيدية المخاليل دلوقت..

engy said...

بجد رائعه فعلا
بس حناكل ونشرب الكترونيا
كل سنه وانت طيب

بنت مصريه said...

هههههههههههههههههه
حلوه قوى يا احمد
باين عليك طاقق
هههههههههههههههه
بس والله مش بعيده
اهى كل حاجه بقت بالكمبيوتر دلوقتى
الدراسه والزواج
بكره الخلفه كمان تبقى بالكمبيوتى
ربنا ينجينا
احييك عالبوست يا احمد

دعاء مواجهات said...

جميله اوى بجد

وإضافات بدراوى

خلتها مسخرة رسمى

بجد تحفه

..

FreeKiller said...

شخشخناه يا خالو

Soul.o0o.Whisper said...

وبعدين يروحوا طالعين بالعربيات على سايت مأذون.كوم
ويدوسوا إنتر على سنة الله ورسولة
وبعدين يطلعوا على موقع النادى يقعدوا يشيتوا ويتبادلوا التهانى


بصراحة فطست على نفسى من الضحك

بس تكنولوجيا فظيعة يعنى

لا ماحنا مش اى حد بردوا
ههههههههههههههههههه


خالص تحياتى