خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Feb 8, 2008

ليلة تدوينية فى حب مصر


كان يوم حلو أوى
المكان : وسط البلد – قهوة البورصة ومقاهى شارع علوى وميدان طلعت حرب وميدان التحرير مرورا بالإسعاف حتى ميدان رمسيس
الزمان : ليلة ماتش مصر وكوت ديفوار
الأشخاص : أنا و أحمد الجيزاوى ونضال وأحمد الجعفرى ومحمود اليعقوبى ومحمد مدحت الشهير بـ أبو جولدا وحمادة زيدان وعبد الرحمن و محمود فوزى ومحمد عباس وغيرهم الكثيير
كل الشلة البلوجرية اللى بحبهم
كان الجو جميل
الجعفرى توقع ان مصر تغلب اتنين واليعقوبى توقع تغلب تلاتة
وأغلبنا كان متشائم
وسيبتهم ورحت فرح فى نادى الخالدين بالدراسة
فرح صديق عمرى وائل رمضان
الف مبرووووووك يا وائل
والعروسة كانت امورة اوى
وصورت صور كتيييييييير بتاع ميه وخمسين صورة
وخلصت على الجاتوة وشربت عصير فى الفرح
وشوفت اصحاب كتير ما شوفتهومش بقالى كتيييييير واتصورنا مع بعض
وبعدين رجعت البورصة تانى
كانت الدنيا واقفة على رجل واحدة
الماتش كان سخن اوى
والتعليقات نازلة على ودانى من الجيزاوى ونضال وعبد الرحمن ومحمد مدحت العسل
الله عليك يا استاذ حضرى
الكورة دى بلن .. واصلا الكورة فى نص الملعب
اللهم انصرنا على اعدائنا كو دى فوار
انا اصلا كو دى فوارى بس ابويا كان حابسنى عشان كدة طلعت ابيض .. ده محمد مدحت
اه واللاعيب ده كان محبوس معاك عشان ابيض بردو

وانا فطسان على نفسى من الضحك
وفرحان اوى بالماتش الجميل وبالنتيجة الرائعة
وجه واحد خواجة ومعاه كاميرا ووقف جنب الشاشة ووجه الكاميرا بتاعتة للجماهير
بس اتأكدت انه بيصور شلتنا احنا لأن كل ما نعمل حاجة تسقيف او نطبل او الجيزاوى يرفع العلم يروح منتبه وباصص فى العدسة
ماهو الجيزاوى كان معاه علم مصر كبير
اللى انا متصور بيه ده
والعيال كمان اتصورو بيه
وبعد الماتش ميدان طلعت حرب والتحرير يعج بملايين من الشباب شايلين الاعلام
وعمالين يهيصو وهما مزأططين
وميدان طلعت حرب شهد تجمع ضخم جدا واعلام والعاب نارية
الغريب ان ما كنش فى عسكرى امن مركزى واحد
ولا عربيات امن مركزى
كان فى بس عربية شرطة بيضا وكانت مشغلة السارينة وبيزمرو بيييب بيييب
والعيال عمالين يقولو مصر .. مصر
هههه صحيح ياولاد الشرطة فى خدمة الشعب
وبعدين نزلنا ميدان التحرير
والجيزاوى وقف الدنيا على رجل واحدة
فوج سياحى امريكى كبير اكتر من خمستاشر واحد وواحدة
جم معانا ورفعو علم مصر ودخلو معانا الهتافات
والجيزاوى كان بيصور بالموبايل بتاعة
بصراحة كان يوم لذيذ جدا جدا
وان شاء الله نتقابل فى النهائى
ونقوووول
مبرووووووووووك لمصر

الجيزاوى ... كان ألذ حاجة فى اليوم ده
عبد الرحمن وتركيز شديد مع الماتش
بس كنت برخم عليه من آن لأخر



نضال .. كان عمال يهتف غزة .. غزة اثناء الماتش
وكنا بنقوم معاه بواجب ضرب تمام :)

حبة مدونين .. طبعا سامع واحد لذيذ بيقول امال انت مش معاهم ليه
أقوم أقولة .. ان انا اللى كنت بصور :)

42 comments:

مهندس مصري said...

قشطة يا أحمد
أحلى كلام
و سلامي لكل الجدعان

عـــــــــــــــروبة said...

جميلة هي هذه المدونة

عظييييمة يا مصر ....

تحياتي لك الحارّة ولكل مدونين امي مصر " وما اكثر امهاتي "

ملاحظةعلى الهامش :" اعجبني ايرادك لغزة واهتمامك بها في حاشيتك .. ولكن كان من الافضل لو كتبت " تضامنا مع غزة لا تعاطفا "

تحياتي لك مرة اخرى اخي العزيز

Dr-Abd-Alrahman said...

ههههههههه
الف الف الف مليون مبروك لمصر ولكل المصريين
وعقبال النهائي انشاء الله
احييك علي حبك لمصر وللمنتخب
وتشجيعك انت واصحابك ليهم بروح جميلة جدا

مدونتك كل زيارة ليا بتكبر في نظري

لماضة said...

والله وعملوها الرجاله
جميله التدوينة دى يا خال
نقلت فرحة جميله جدا
70 مليون مصر واكتر كاناو بيهتفوا فىكل حته
بنفس الروح الجميله دى

اخيرا لقينا حاجه تفرح

mo'men mohamed said...

مبروك لمصر
على فكرة احمد الجيزاوى شخصية لزيزة
جزاكم الله كل خير السلام عليكم

3ala asm masr said...

أنا فرحانه بالعبيط عشان مصر كسبت الماتش ده
مهى الكوره هى الحاجه اللى بتفرحنا دلوقتى

ابن حـجـر الـعـسـقـلانـى said...

أنا كنت متوقع مصر هاتخسر واحد صفر .. و واحد صاحبى قال اتنين واحد .. و التالت توقع تلاتة واحد .. و واحد تانى كان نفسه نخسر من أنجولا عشان ما نتبهدلش من ساحل العاج

إحتمال إننا نتعادل دة ما كانش موجود أصلا

لكن

عملوها الرجالة .. عملوها الأبطال .. عملوها الوحوش .. يا ريتنى كنت معاهم .. يا ريتنى كنت معاهم

only spot said...

مبروووووك يا خالو لمصر وعقبال النهائى
اجمل ما في المدونين روحهم الطيبه والجميله مع بعض ادامها الله عليكم
كده تاكل الجاتو لوحدك الى ياكل لوحده
وبعدين فين حلاوة ان مصر كسبت
شكلى داخله على طمع ولا ايه
هههههههههههه
عموما خالص تحياتى ومبروك لمصر

Hossam said...

حبيب قلبى احمد الصباغ مرسى لتعليقك واستى البوست الجاى لانه هيبقى مثير جدا للجدل
سلام

wafaa said...

مبروك لمصر
ويارب تكمل الفرحة فى النهائى

آفاق الحرية said...

السلام عليكم
طيب اتفرج علي النهائي معاهم علشان مصر تكسب ان شاء الله

صاحب المضيفة said...

ربنا ينضصرنا كمان وكمان

وفي كل مجال يارب


تسلم يا خال على التسلية الجميلة دي



دمت بعافية

Omar... [ خروشات ] said...

عقبال ما نقرا بوست الفينال يا ابو حميييييييييييييييييد

mohammed alsha3r said...

تصدق يااحمد انا استاهل ضرب الجزمه ياعم

بس اعمل ايه

كنت مريض جدا

الجيزاوى اتصل على

وكنت جاى بس كنت تعبان جدا


هتتعوض ان شاء الله


يوم جميل بوجودك ياأحمد

لولا said...

الف الف مليون مبروك لمصر
وعقبال النهائي يارب

MerMaid said...

مبروك للمصريين جميعا فوز المنتخب

مبروك علينا يا ولااااااااااد

:)
تحياتي ليك

النجمة الصامدة said...

ماشاء الله
إيه الهيصة دي كلها
أمال لو خدنا البطولة الناس هتعمل ايه؟؟؟

يلا لكِ الله يا غزة
>>> بس من غير ضرب
:D


سلااااااااام

دوحة said...

الف مبروك يابو حميد وعقبال المباراة لنهائية
ونشوفلك بوست
تكتب فيه تانى عن انتصار المصريين على الاسود
ان شاء الله
تحياتى يابو حميد

شمس الزناتي said...

و الله يا صباغ كنت جاي و كان نفسي اكون موجود بس اكيد الجيزاوي حكالك الظروف

ريهام said...

رغم انى مش بحب الكورة ولا الماتشات خاااااالص بس شوفت الماتش ده بالذات وكنت بشجع اوى مع بابا واخويا وبجد عجبتنى النتيجه 4/0 وكان نفسى ييجى الجون الخامس وكان نفسى ابقى فى الشارع معاكم وكان نفسى ؟ ايه الطفاسه دى انا نفسى فى حاجات كتير اليومين دول ليه هههه . المهم حلوة الصور اللى صورتها يا خالو بس كنت كتر شويه بطل البخل ده فالح بس تقول صورت 150 صورة

صدق مين قال عليك توكتكاوى بخيل

NIDAAL PAL said...

كيفك يا حج توكتوكى
بقى انا خد ضرب !!!!!!!!
و كل ده علشان بقول غزة
اومال لو قولت فلسطين كاملة هتعمل ايه
ههههههههههههههه
بوست و تغطية جميلة اوى يا صباغ

احمد الجيزاوى said...

بصراحه كان يوم رائع

مستنيك يا ميل يوم الاحد الساعه 6 علشان النهائى
نفس المكان البورصه

وطبعا مش محتاج اقول الدعوة عامه لكل
احمد الجيزاوى

سهر الليالى said...

يخرب عقلك يا أحمد
طول عمرك جامد ... عيشتنى معاكو الجو الجميل دة اوى

ألف مبروك لمصر وعقبال النهائى إن شاء الله
أصل أنا كنت متوقعه لهم النتايج الحلوة دى من بداية الدورة عارف ليه ... عشان عارفة أن مصر فيها ناس كتير بتدعى كويس
:)

ألف مبروك لوائل صحبك وعقبالك
بس مجبتليش كوبايه شربات أحمر ليه يا أحمد مكنش العشم
ههههههههه

يلا نتقابل يوم الحد إن شاء الله
;)

ارسم بالرصاص said...

السلام عليكم ورحمته وبركاته
الحمد لله لحقت التعليق ال24
انا أعتذر انا دايما كدة
المهم انهم كسبوا وبابا
كان مزاجو رايق علي
الآخر وراح عازمنا علي
سندوتشات فول وطعمة وبطاطس
ويا سلام كانت أكلة حلوة
ومبروك لمصر
والسلام عليكم ورحمته وبركاته
دعواتي
هايدي

الفاتح الجعفري said...

عمي الكبير اوي
ربنا يبارك فيك
الحمد لله انا كنت عندي احساس اننا ممكن نكسب بس مكنتش اعرف ان احساسي عالي اوي كده
وعم عز فرحان بنفسه هو علشان ضرب نار وحظه طلع عالي يقولك انا كنت عارف
بص ياعم هنكسب الكاميرون 3/1
ابوتريكه جون
حسني عبد ربه جون
سونج هيحط جون في نفسه
وبعدين جيرمي هيجيب الجون الوحيد للكاميرون
اصل انا جبتها من الكنترول
وجزاكم الله خير ياعمنا

sa7afia_rwsha said...

مدونتك سكر سكر سكر
والله وعملوها الرجاله ورفعوا راس مصر بلدنا
ابقى زورنى فى بلوجى بقة
مش الاصول بتقول لما حد يزورك لازم تروح ترد الزيارة وفى ايدك2 كيلو موز
هههههه
يلا سلام
namema2.blogspot.com

عبدالرحمن فارس said...

شرفت بالتعرف عليك في ليله في حب مصر
كم أسعدني في هذه الليله أني خرجت عن وقاري

بس بجد كانت ليله لذيذه اوي ومحستش أبدا انك بترخم عليا

هههههههههههههه

محبتي دائما تلك التي لا أملك سواها
عبدالرحمن فارس
لساني هو القلم

www.chabfares.arwp.net

مروة الزارع said...

ماهو الندل ندل من يومة

مش كنت تقولى ياض يا خالو

عشان اجى معاكم

البورصة وحشتنى والله

الله يجازى اللى كان السبب

هعهعهعهعهعهع

:)))

واحدة مفروسة said...

مبرووووووووووووووووووك لمصر و عقبال النهائى
يارب الكاس لمصر
المصريين دول غلابة اوى ما بيصدقو يلاقو حاجة تفرح
عندنا مشاكل بالكوم بس الحمد لله راضيين
ربنا يكرمنا النهاردة
مدونة جميلة بجد ودمها خفيف

أسامه يوسف said...

مبروووووووووووووووووووووووك
وسلام بأه
أنا نازل احجز مكان فى أى قهوه

بنت الاسلام said...

بجد كان نصر رائع

والنهاردة نصر اروع

ربنا يديم لقاءاتكم في الافراح

يارب

صوت من مصر said...

بجد من زمان نفسى ادخل بيت الصباغ ولما دخلت لقيته جوه قلب مصر مع الناس والمشجعين انا فعلا اليوم ده كونت ميت من كتر التشجيع بعد المطش فى وسط البلد لدرجه انى مش قادر اكتب
استاذ احمد ارجو ان اكون زائر دائم للمدونه

Salma Amer said...

انا بعلق بعد ما اخدنا الكاس
لان اعصابي كانت تعبانة جدا
بصراحة الماتشين الاخرنين كانوا سخنين جدا جدا
يلا بيب بيب بيب بيب بيب رجعنا من غانا بالكاس
تحياتي

nonoymm said...

مبروك لكل الكرويين
عشان ان مش كروية وتتجمعوا دايما في الخير

MĕŢø & ŘǿŖêĔ said...

الف الف الف مبروك يا رب يا مصر دايما في تقدم وفوز ونصر
والله هو نصر لكل الوطن العربي وفي فلسطين اقيمت حفلات وسهرات تتعدى نصف الليل
الله عليه زيدان طبخها وابو تريكه سجل
وجووووووووووول

shimaa mahdy said...

أنا عاوزة أعتذر أولا عن تقصيرى فى حقك يا خال وفى حق مدونتك.. انا أصلى عندى مشكلة فى متابعة المدونات ولو تابعت بيبقى فى مشكلة فى إنى أكتب تعليق

ثانيا منتخبنا طلع جامد بجد فرحنا رغم إنى ما بحبش الكورة وما بتفرجش عليها بس شفت آخر ماتشين كانوا جامدين جدا، بس نفسى يهتموا بباقى الألعاب الرياضية زى ما بيتهموا بكرة القدم إحنا وصلنا لبطولة العالم فى ألعاب كتيرة أوى بس للأسف ما حدش بيجيب سيرتها ولا بتأخذ ربع الاهتمام اللى بتخذه كرة القدم زى كرة اليد وغيرها كتير

ثالثا مش كنت تقول إنك بتغطى ندوات معرض الكتاب أنا كنت هناك طول أيام المعرض بغطى ندوات برده:)

بس مستنية اقرأ تغطياتك لأنى طبعا ما حضرتش كل الندوات كنت بحضر ندوات معينة

رابعا أنا متشكرة جدا على التاج ححاول أجاوب عليه بس سامحنى لو ما جاوبتش علشان أنا ظروفى آخر لخبطة ومش مركزة خااااااالص

معلش آخر حاجة أنا عارفة إنى رغيت كتير بس ده حقى انا ما بجيش كتير.. براحتى يعنى، إن شاء الله يوم الخميس الساعة 6 فى نقابة الصحفيين موقع عشرينات منظم حفلة " فى حب مصر" بمناسبة الفلانتين بس فلانتين لمصر وأعتقد الجو هيكون لذيذ يعنى ده دعوة ليك يا خال ولكل المدونين اللى ليهم مزاج يحضروا

shimaa mahdy said...
This comment has been removed by the author.
MKSARAT SAYED SAAD said...

مبروك لمصر يا احمد كلها

Bongo said...

اول زيارة للمدونة ,
مدونة جميلة و التدوينات كلها مميزة

تحياتي

فضفضة said...

مبرررررررررررروك

رائع

هو ده الشغل بجد

تسلم ايدك

واهو حاجة تفرحنا فى غمرة الاحباط

العنقـــــــاء said...

السلام عليكم

يا اخ احمد انا عايزة ااقولك اني وانا بقرأ البوست بتاعك حسيت بفرحتك انت بجد خليتني اعيش الزحمه والفرحة اللي انت شفتها

يعني تقدر تقول كدا اننا بقدره قادر انتقلنا لكل شبر انت زرته مع أصدقائك في اليوم ده .. بث مباشر وانت عمال تتكلم عن يومك

بجد انت رائع في وصفك وطبعا الصور ليها عامل كبير في البث المباشر ومبروك يا مصر

wanna b a physician said...

اعجبتنى الفرحة اتمنى التواصل