خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Jun 5, 2008

أحمد فؤاد نجم فى حديث عن مدونات مصرية للجيب

كبير ثوّار الكلمة
عمنا الكبير الجميل
أحمد فؤاد نجم

فى حدث مهم جدا لكل من شارك فى انجاح كتاب المدونين
أول حديث له عن
مدونات مصرية للجيب لجريدة الدستور


نص مقال عم نجم الفاجومى عن الكتاب

أنا لما اخدت الكتاب اياه من الواد الجميل ايهاب عمر ماكنتش اظن انى ح اعيش مستقبل مصر المحروسة اهو كتاب وخلاص .. اتارينى اسم الله على مقامكم كنت حمار ودى مش اول مرة الحمد لله . ومش حتكون اخر مرة لان على راى حجازى الرسام كلنا حمير ربنا وده مش عيب .. والحمار احسن من البغل والزحلفة والفار

روّحت البيت ياعمنا وقلت اشوف ايه اللى بيكتبوه العيال بتوع النت اللى اطلق عليهم الاعلام الرسمى اسم المدونون واللى صنفهم اجهزة الامن العربية فى خانة " مثيرى الشغب" اللهم احفظنا واللى اصدرت عليهم بعض المحاكم احكاما بالسجن المشمول بالنفاذ .. وفتحت الكتاب : " الى المغتربين خارج مصر وداخلها نهديكم كلماتكم" .. يعنى دول بيكلموا حوالى تمانية وسبعين مليون فى عين العدو ونطلّع منهم الحكومة والاضيشها قول مليون ونص والباقى مغتربين برا مصر وجواها .. ده اول هام .. تانى هام بقى خفة الدم المصرية الحراقة اللى كانت اختفت فترة الابادة الجماعية للمصريين اللى بدأت بحرقهم فى قطارات السكك الحديدية ومرورا بإغراقهم بالعبارات المضروبة برضة ناهيك عن نظام السرطنة اللى نفذة باقتدار يوسف والى مزراحى ايام ما كان وزير زراعة - الله لا عاد يعودها- وتفضل اساليب الابادة الجماعية للمصريين ولا تنتهيش .. العيال دول بقى طالعين بخيرهم يعنى "بيور" وبيور دى انا سمعتها من واحد تاجر بودرة ويتحدث عن بضاعتة انا الاول اتفكرتها بيور جمع بير بالعامية المصرية زى جمع ديب بالعامية ديوبة لكن لما سألت واتقصيت قالولى بيور يعنى مش مخلوط ..أهى العيال دى مش مخلوطة وعشان كدة ناقلين كل الجينات المصرية واهمها خفة الدم وخد عندك مثلا مدونة "سكوت حنصوت " ..و"مدونة عايزة اتكلم".. و"مدونة البنت الشلبية" .. و"مدونة اهو دا عيبة".. و"مدونة بت خيخة واى كلام" ..و"مدونة بنوتة لاسعة"..و"مدونة يوميات عيل مصرى" ... وطبعا انا مش ح اقدر اقول كل المدونات لان عدم المؤاخذة المساحة ما تكفيش فما حدش يتقمص منى يا عيال والايام بيننا على رأى شكوكو وقال يا جحا عد موج البحر قال الجايات اكتر من الرايحات

تعالى بقى سيادتك لافتتاحية الكتاب اللى كتبها احمد البوهى اول هام حتفرح جدا جدا ان قضية فلسطين العربية والمغتصبة نايمة بالطول والعرض فى وجدان الجيل القادم بقوة لبناء مصر المستقبل يعنى لا صداقة السادات لمناحم بيجن ولا العلاقة العضوية بين مجرم الحرب قاتل الاطفال اللص الصهيونى المرتشى ايهود اولمرت وبين الرئيس مبارك او بين القاتل ايهود باراك وجمال مبارك قدرت تطرمخ ع القضة وتحولها الى كان كان ودو ده كان رهانى لما قولت لهم فى باريس عن اسرائيل هذا مشروع محكوم عليه بالفشل ويومها كان المذيع صهيونيا متعصبا وقال لى

انت الان تعترف بمعاداتك للسامية

ودى فى اوروبا وامريكا تهمة تساوى الزندقة فقلت له

وانت الان تعترف انك حمار لانك تتهمنى بمعادة السامية وانا سامى يا حمار يا صعيونى يا متعصب

ويختتم احمد البوهعى مقدمتة بالحديث عن كتاب المدونين قائلا : كتاب يسير فى اتجاة مواز لحرية الرأى والتعبير والمشاركة مهما اختلفت الاراء وتعددت الافكار وتناقضت الرؤى وتنوعت التجارب فى وطن واحد يكفى لان يستمع الجميع الى بعضة البعض وان سيشترك الجميع فى حلم بدايتة مساحة اتفاق وود حلم النهوض بهذا الوطن .. الكلام ده يا جدعان فى خطر امن الدولة ويستحق ان يحال لقضاء وتصدر ضدة احكام بالسجن المشمول بالنفاذ ؟ حد يفهمنى باعتبار غبى وجهول وحاقد وما اسواش بصلة ... والجميل فى الموضوع ان العيال المدونين دول فيهم مبدعين وشعرا بحق وحقيقى شعرا بالفصحى والعامية ودول مثالين الاول بالفصحى

المبدأ فى جيل الطمس

ما عادت ترغب فيه الشمس

يتوسط اجيالا حبلى بصراخ اليأس

يعلنها للناس جليا

يطويها للعالم طيا

بنى الارهاب على خمس

محمود موسى

بسم الله نصلى ع الحبيب ونقول توكلنا

ونتعاد يكون الحق رسمالنا

كلامنا اليوم عن الاوجاع عن اللى اتباع

وكام مليار بقول اجأة فى حجر بتاع

مالوش لازمة

احمد عصام

والبقية تأتى

اذا كان فى العمر بقية

---------

الى هنا ينتهى كلام عم نجم

الذى اعتبرة وساما على صدرى وعلى صدر كل مدوّن

وكل من شارك فى كتاب الشعب مدونات مصرية للجيب

وهذا الكلام اعتبرة شهادة تكريم لأبناء هذا الجيل ( البيور ) على حد تعبير عم نجم


ودى كمان خبر توقيع الكتاب فى جرنان نهضة مصر

تغطية الصديق العزيز الصحفى شعبان هداية




ويقول احمد البوهى

لم اتمالك نفسي من السعادة الطاغيه التي شعرت بها في قلبي و انا اقراء مقال عمنا احمد فؤاد نجم بجريده الدستور الصادره اليوم وهو يتكلم عن كتاب مدونات مصريه ويشيد به و بالفكره و بالمدونينين ووصفنا ان شباب جديد يحمل قلب و فكر جديد و لسنا مجرد عيال بتلعب و خلاص الي حد تعبيره


عندما يقوم شخص بحجم و مكانه عمنا فؤاد بالاشاده بينا و تشجيعنا فهذ اكبر دليل اننا بدانا نسلك الطريق الصحيح لخروج بالمدونات من العالم الافتراضي الي العالم الحقيقي لتسمع الدنيا كلها صوتنا

ادعوكوا لقراءه المقال في جريده الدستور الصادره بتاريخ اليوم 5/6


الموجود بالصفحه الخامسه تحت عنوان
بداية الرحلة

أحمد الصباغ


42 comments:

خبيب said...

وده الحمد لله دليل على النجاح اللي حققه العدد الأول من الكتاب .. اللي فعلا يستحق النجاح

---

العقبى لباقي الأعداد إن شاء الله

خمسة فضفضة said...

السلام عليكم ورحمة الله وبركاته

الف الف مبروك ما تتصوروش انا فرحانه اد ايه

كل الاحتفاء ده والناس اللي اشادة بالكتاب اكدت للجميع اننا مش شوية عيال زي ما كانوا بيقولوا علينا

وان شاء الله من نجاح انجاح

سلام

princess dodo said...

مبروك
بجد انا فرحت اوى لما قريت الكلام ده

وان شء الله
ربنا يكتب النجاح
للأعداد الجايه

.
.

سلامي ليك

قوس قزح said...

مبروك

ده واضح انه مسابش الكتاب الا لما قرا كل حرف فيه :)

كلام احمد فؤاد نجم تقدر تعرف منه يا صباغ ان لا غلاف الكتاب ولا عدد التدونات اللى فيه ولا اى شىء فى ديزاينه هم الاساس
الاساس هى الكلمة اللى بتتقرى و هى دى اللى هتعلم مع الناس

ربنا يوفقكم و يكون دايما صوتكم مسموع


تحياتى

عاشقه الاقصى said...

بجد أنا فرحانه جدااااااا

عشان كل الناس اللى بتقول علينا عيال يشوف عمنا نجم بيقول آيه

وفعلا ان شاء الله من نجاح الى نجاح

ونستمر فى العمل

Dr.Amor said...

ألف مبروك يا باشا
وده دليل النجاح الساحق للفكرة والكتاب
ويارب أنول شرف وجودي معاكوا العدد الجاي
مع تحياتي

Sometimes said...

الحمد لله
فرحاااااااااااااااانه جدا جدا جدا
انى انضميت لعالم التدوين مع العلم بانى لم اضف جديد
بس فرحانه انى عرفت الناس الجميلة دى
وده يكفينى

فرحانه جدا علشان نجاح السلسة وان شاء الله من نجاح لنجاح دايما يارب

فرحانه ان كلامكم قدر يوصل للناس
وانهم قدروه فعلا وجت ناس لها مقامها بجد وتشكر وتحب الكلام ده

يارب اجعل النهضة على ايد شبابنا يااااااااارب

د/اجدع بنوته said...

ده احدى الدلائل

التى تؤكد وتدعم ان احنا ماشيين ف الطريق الصح

وتضحد اى حد يفتح بؤه بكلمه متسواش باننا القله المندسه

وباذن الله هنفضل كدده

احنا جيل صح .. اتوفرت ليه كل المقومات

وهيحفر ف الصخر للوصول للنتايج

تحياتى يافاجومى ياكبير

وبذكرك لخمس او ست او سبع مدونات

كأنك ذكرت ال 44 مدون اللى ف الكتاب

وال 44 الف مدون اللى ف مصر

لان حزمة البشر دى كلها .. فكر جديد .. واسلوب جديد بجد

تحياتى ياصباغ

ويارب تتوالى النجاحات

NilE_QueeN said...

عم احمد دا راجل ذوق نكهه رائعه

ورئيه يعتد بيه لصالح كل مدون

آفاق الحرية said...

والله هو فعلا تتويج لنجاح المدونات
ووسام علي صدر كل مدون
فالحمد لله
وان شاء الله الاعهداد القادمة تكون انجح واجدي

آلام وآمال said...

والله حاجة تفرح
:)

Dr.Mohammed Gohary said...

ايه يا عم الحلاوة دي

عمنا بحاله

يا نهار ابيض

والله مشكور يا صباغ
الف شكر



تحياااتي

شهيدة said...

حاجه تفرح والل..


عقبال العدد التالي باذن الله

سفينة said...

الف مبروك ياصباغ علي شهاده عمنا نجم

الراجل ده انا بحبه قوي علي فكره

وفعلا كلامه دا وسام علي صدر كل مدون بيحب مصر ومش بيخاف

................
بالتوفيق ياجميل..واتمني تنورني دايماً

وان شاء الله من نجاح الي نجاح علي راي خمسه فضفضه....بالسلامه ياجميل

صاحب المضيفة said...

الحمد لله


الحلم بدا



وبكرة المشوار يكمل باذن الله تعالى



تحياتي الجميلات

مـحـمـود فـرج أحمد said...

ألف ألف مبروك يا صباغ

بجد بجد كل الكلام اللي اتقال تستحقوه كلكم وأكتر منه والله

وكلام عمنا نجم تتويج لنجاحكم ده

عقبال الأعداد الجايه .. وأبقى نازل فيها ههههههههههه

همس الاحباب said...

الف مبروك لكل المدونين
وراى عمنا احمد وسام على صدورنا جميعا
تحياتى وتقديرى

wanna b a bride said...

ألف مبروك يا فندم

عقبال السي إن إن

تحياتي للجميع

رامز عباس said...

شيء جميل للغاية
انا بشتري الدستور طبيعي وبقرأ للفاجومي

الحمد لله لكن اعتقد ان اهم حاجه ان الناس او الاشياء اللي بنعبر عنها هي اللي تقدرنا او تفهم بواعث قيامنا بكدة



انا زى مقريت اكتشفت بانكم مبسوطين برؤية أ-احمد فؤاد نجم الشاعر المعروف

وكلماته اتجاهكم


ولكن سيسرني ان اعرف كمدون رأي اسرتي وجيراني والقطاع الموجه له كلامي

فاللاسف هذا الرأي قد يمهني اكتر لانهم قطاع له رأي نافذ



ورغم شهادة المثقف الرائع الفاجومي الا انها تعدرؤية مبنية علي معرفة مسبقة يعني ايه




لو نظرنا سنجد ان شاعرنا له مدونة بعنوان مكنة الفاجومي

وابنته تعتبر من اوائل رموز الحركة التدوينة بمدونة جبهه التهييس الشعبية

واصدقاء ابنته الشباب والفتيات الذين التقو به لددى بعضهم مدونات ومواقع انترنت

فالبالتالي الراجل له رؤية
مسبقة


اما ان جاء رجل من الشارع واعطيته كتابا لمدونات مصرية للجيب فهذا بحق وهو الرأي اللي هيقوله سيكون مسار فخري واعتزازى

رامز عباس said...

احمد انا مبسوط من نشاطك ده جدا

واتمنالك النجاح الدائم

سومه...مجنونه فى بلد عاقل said...

واحد ينصف وعشره يخسفوا بينا الارض مبدا واحد فى الكتابه ان نكتب لانفسنا ونامل ان يصل كلامنا الى البشر والم يصلهم يكفينا انطلاق اصواتنا بدلا من صمتنا
ربنا يفتح نفسه ونفسك وينصر الجميع
تحياتى ليك سومه_87

GiGi said...

لهلهايه ده القله المندسه نجحت وعمنا الكبيييييييييير قوي احمد فؤاد نجم بيشيد بيكم
ربنا يوفق كل واحد كتب كلمه حق وكان دايما عايز الخير والعدل
الجماعه اللى مايستاهلوش على فكره بيسلموا عليك

رئـــــيسـة حزب الأحلام said...

الله يخليك لنا ياصباغ دايما جايب لنا الاخبار اللى تفرح
وبجد حاجة جميلة ان حد كبير يشكر فى الكتاب
بجد حاجة تفرح
تحياتى لك

صوت من مصر said...

وحشنى البلوج بتاعك بجد بس للاسف شغل

مطرح ما ترسى....دقلها said...

الخال العزيز أحمد الصباغ:

اولا ألف مبروك يا سيدى وبالفعل الكتاب تحفة فنيه

ثانيا
ايه رأيك فى مشروع مدونة مشتركة

اسمها بيعبر عنها وعن افكارها

HIGH HEAD ACADEMY

وانا بدعوك تبقى معانا فيها وممكن نضيف اعضاء تانيين

بس بشرط يحققوا الشروط بتاعتها

مستنى ردك


وده لينك المدونة

http://h-h-a.blogspot.com/


under construction

nonoymm said...

مبروووووووووووووووووك
دة وسام على صدر كل مدون مش اللي انطبع لهم بس ها
على فكرة انا فرحانة جدااا وكانه لي فيه تدوينة
بجد مبسوطة وكان نفسي اشوفكم
اعملوا لقاء تاني الاسبوع الجاي بقى
ماشي يلا
تحياتي

أحمد كمال said...

الظريف في التعليق إنه أثبت إن المدونين مش قلة مندسة ولا حاجة ، دول ناس من المصريين قدروا يسمعوا صوتهم لباقي الناس .

عقبال ما نسمع تعليقه عن الكتاب المئوي :)

شكرا على التغطية يا صباغ

محمد فكري said...

بجد روعة ماشاء الله
كنت أتمنى أكون موجود عشان أتعرف على الكوكبة الجميلة دي..
بس ملحوقة :)
المهم بس انا عاوز أسأل هوه الكتاب نزل بقية المحافظات ولا لأ..
أنا سألت هنا في المنصورة بس ما وصلتش لحاجة..
أتمنى لو حد يعرف يقوللي..
شكراً

appy said...

قلبى يا صباغوس والنبى بيرقص من الفرح لما قريت كلامه بجد
ربنا يكرمه ده شهاده هايله لينا

عاليا حليم said...

انا لسة جاية من عند اهوه ده عيبه
و فرحت اوى لما لقيت عندها الخبر
ده احنا كده قربنا ندخل التاريخ يا جماعة و قبل كده برده كتب عن المدونين بلال فضل
يلا و البقية تاتى بس احنا نركز فى كتابتنا و نسبنا شوية من الفيس بوك

محمد سلامة said...

يرجع نجاح التجربة إلى صدق القائمين عليها من شباب أخلصوا للفكرة إخلاص الشهيد لعقيدته
الصدق الذي ينبع من براءة الهدف
البراءة التي لم تتلوث بعد بتداعيات الشهرة و المال و حب الأستئثار بالفضل
وفقكم الله و في انتظار العدد القادم و كلي ثقة في أنه لن يقل روعة عن العدد الأول بل سيتخطاه إلى أفاق أبعد و أبرح من الأبداع
شكرا لكم

Coca said...

واحشني مووووووووووووت يا ابو الصبابيغ
مشغول انت اليومين دول بس يالا بالتوفيق يارب

mostafa rayan said...

ازيك يا صاحبي
طبعا كلام عم احمد دة اكبر دليل علي اننا ناس جامدة قوي وشم شوية عيال لاسعة
ربنا يوفقنا كمان وكمان
بس انا كنت عايز اقولك حاجة احنا كنا عايزين ندعم الكتاب التاني للمدونين (عندمااسمع كلمة مدونة ) يعني نحاول نعطيه للنقاد والصحفين والكتاب ليأخذ هو الأخر حقه من الأحتفاء والدعاية لأن الكتابين هما وجهين لعملة واحدة هي احنا
تحياتي ليك

دعاء مواجهات said...

اولا
احب ابارك ليك ولكل المدونين الحلوين اللى بجد جامدين ومستاهلين كل خير

اولا تانى

بردواحب اقولك انى بزوورك كتير اوى ومن كتر انشغالى بالكلام والصور وجمال المدونة بمشى وبنسى اسيب كومنت

اصل يانااس هسيب كومنت ع اية بس

هى المدونة التحفة دى محتاجة كومنت ولا محتاجة كلااام اصلا

بجد انا فخورة بانك حد مصرى جميل اوى

ومبسوطة اوى بكل نشاطاتك وحياتك الجميلة المليانة بجد حاجات تستاهل

بص بقى اوعى تفتكرنى بجامل لاااااااا

ابدا مش مواجهاات اللى تجاامل

كما انك لست فى حاجة لمجاملة منى
اساشا يعنى

والله جاامد يااحمد باشااا

تقبل تحيااتى

دعاء مواجهات said...

- تحديث

نسيت اقولك

انك عامود مهم اوى من اعمدة التدوين فى مصر

وبجد بتمنى نلتقى فى لقاء تدوينى يكوون جامد كدة

تحيااتى الحارة

بييس

مع اصرارى said...

انا متحسر
يظهر اننا جاى متأخر
بعد ما كل الناس هنوك
انا فى الاخر لسة ها قرر
بعد ما كل الناس جاوبوك
انا متردد لسة بفكر
كل الساعات الناس بتقدم
انما ساعتى انا بتأخر
وإذا كان ذنبى بحق كبير
لكن عشمى فى قلبك أكبر
عندى الفكرة ومع اصرارى
عايز كدة ويايا تفكر
نخدم اهل الوطن العربى
نخدم اهل وطنا الاكبر
طول ما ايدينا فى ايد الحق
طبعا نعرف لازم نقدر
انا مستنى زايارتك ليا
وانت كبير ولازم تتقدر
دعوتى عامة لكل الناس
وبتعليقك طبعا افخر
اصبغ يا احمد يلا يا خال
خلى القلب الاصفر اخضر

محمد الكومي said...

الله ينور يا احمد و بالتوفيق و عقبال مليون عدد انشاء الله

و ربنا يكرمنا و نشارك معاكم

ابو اعصار said...

هالله هالله يا جدعان
بداية موفقة يبقى ان نحتك بارض الواقع (الشارع المصري) وليه مش بره مصر
تسلم حبوبي الصباغي

Ihab Omar said...

علي فكرة يا احمد , لقائي مع احمد فؤاد نجم و حديثه معه حول كتابنا مشروع وطن اتي ذكره في مقالتين للفاجومي و ليس مقال واحد
التفاصيل هنا
http://ihabomar.blogspot.com/2008/06/blog-post_05.html

ahmed said...

يختتم احمد البوهعى مقدمتة بالحديث عن كتاب المدونين قائلا : كتاب يسير فى اتجاة مواز لحرية الرأى والتعبير والمشاركة مهما اختلفت الاراء وتعددت الافكار وتناقضت الرؤى وتنوعت التجارب فى وطن واحد يكفى لان يستمع الجميع الى بعضة البعض وان سيشترك الجميع فى حلم بدايتة مساحة اتفاق وود حلم النهوض بهذا الوطن .. الكلام ده يا جدعان فى خطر امن الدولة ويستحق ان يحال لقضاء وتصدر ضدة احكام بالسجن المشمول بالنفاذ ؟ حد يفهمنى باعتبار غبى وجهول وحاقد وما اسواش بصلة ... والجميل فى الموضوع ان العيال المدونين دول فيهم مبدعين وشعرا بحق وحقيقى شعرا بالفصحى والعامية ودول مثالين الاول بالفصحى

ali said...

روّحت البيت ياعمنا وقلت اشوف ايه اللى بيكتبوه العيال بتوع النت اللى اطلق عليهم الاعلام الرسمى اسم المدونون واللى صنفهم اجهزة الامن العربية فى خانة " مثيرى الشغب" اللهم احفظنا واللى اصدرت عليهم بعض المحاكم احكاما بالسجن المشمول بالنفاذ .. وفتحت الكتاب : " الى المغتربين خارج مصر وداخلها نهديكم كلماتكم" .. يعنى دول بيكلموا حوالى تمانية وسبعين مليون فى عين العدو ونطلّع منهم الحكومة والاضيشها قول مليون ونص والباقى مغتربين برا مصر وجواها .. ده اول هام

zaid said...

لم اتمالك نفسي من السعادة الطاغيه التي شعرت بها في قلبي و انا اقراء مقال عمنا احمد فؤاد نجم بجريده الدستور الصادره اليوم وهو يتكلم عن كتاب مدونات مصريه ويشيد به و بالفكره و بالمدونينين ووصفنا ان شباب جديد يحمل قلب و فكر جديد و لسنا مجرد عيال بتلعب و خلاص الي حد تعبيره