خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Jun 9, 2008

العيال رجعوا تاني

نص المقال التانى للفاجومى : أحمد فؤاد نجم عن مدونات مصرية للجيب

مش قلت لكم.. أهي حبلت وحزقت وولدت بسم الله ما شاء الله بنات وولاد النبي حارسهم زي قطف الورد.. ذكاوة وصحصحة وخفة دم ومفهومية في التاريخ والاقتصاد السياسي ولا أحلي ولا أروع وهما دول مستقبلك يا مصر. يا بنت الإيه يا للي جننتيني ودهولتيني وبرضه لسه باحبك مش عارف ليه؟

حبيبتي ما مدينه

متزوقة وحزينه

في كل حاره حسره

وف كل قصر زينه

ممنوع من أني أصبح

بعشقك

أو أبات

ممنوع من المناقشه

ممنوع من السكات

وكل يوم في حبك

تزيد الممنوعات

وكل يوم باحبك

أكتر من اللي فات

<

أنا أسمع عنس حاجة اسمها «النت» مجرد سمع إنما أكتر من كده ماتلاقيش، دنا حتي «الموبايل» ماليش أي علاقة بيه من أصله وما افتكرش إني لا قدر الله ح أشيله في المستقبل المنظور ومره أهداني صديقي المهندس نجيب ساويرس «موبايل» قلت له

إيه ده؟

قال لي

موبايل.

قلت له

موبايل إزاي يعني؟

قال لي:

- يعني تليفون تتكلم فيه، انت مش بتعرف تتكلم؟

خدت منه «الموبايل» ومشيت قابلني شخص قال لي

- تاخد ألف جنيه وتجيب البتاع اللي في إيدك ده؟

قلت له:

- آخد ألف جنيه واديك أي حاجة.

وفعلاً خدت الألف جنيه من الشخص اللي لسه ما أعرفوش لغاية وقتنا هذا واديته «الموبايل» ولما قلت لنجيب الحكاية ضحك وقال لي:

- بدأت تشغل مخك ودي بداية مبشرة، قول لي بقي، لما تبقي دي علاقتي بالموبايل ايشحال بقي علاقتي بالمدعوق اللي اسمه «النت».

امبارح بس كنت قاعد في دار ميريت هجم علي شاب زي القمر وبالأحضان والقبلات وقال لي:

- كانت أمنية حياتي إني أقابلك يا عم أحمد.

قلت له:

- أديك حققت الأمنية.. إنت اسمك إيه بقي؟

قال لي:

- إيهاب عمر.

قلت له:

- أنت لسه بتدرس يا إيهاب؟

قال لي:

- لا خلصت يا عم أحمد.

وتدخل محمد هاشم «كهربا» زي سعيد عبيد ما مسميه وقال:

- إيهاب من المدونين يا عم أحمد.

أنا سمعت عن المدونين مجرد سمع ممكن ياد يا إيهاب تديني سطرين عن المدونين دول؟ راح مناولني كتاب وقال لي:

- دا ممكن يديك فكرة عن المدونين يا عم أحمد.

الغلاف مكتوب عليه «مدونات مصرية للجيب» وتحتها مكتوب «مشروع وطن» وأول صفحة بعد الغلاف مكتوب «عدد خاص جدًا» الصفحة اللي بعدها مكتوب فيها «مدونات مصرية للجيب.. كتاب يؤلفه الشعب المصري» يا حلاوة يا ولاد.. الشعب المصري بقت سيرته تيجي تاني في سياق الحديث والأحداث بعدما أهملوه كتاب السلطة أكثر من ربع قرن واكتفوا بالحديث عن الرئيس والمدام والأنجال وفي أحسن الفروض عن مشكلة الحضري والمنتخب وحسن شحاتة وشحاتة حسن وسمير زاهر وزاهر وسمير إلي آخر هذا الحديث الممل الممجوج من شعب يقتل بعضه «ع العيش الحاف» وحسبنا الله ونعم الوكيل.. فكروني بالعيال بتوع السبعينيات من القرن الماضي.. العيال اللي نوروا الدنيا بانتفاضتهم المجيدة اللي أفزعت الرئيس السادات وجابت له الشلل الرعاش بعيد عن السامعين والحاضرين.

هما هما نفس الوجوه المصرية الحبيبة بنات وولاد ونفس الاشتعال الوطني الواعي ونفس الجسارة ونفس الثقة بالنفس والاعتزاز بالوطن الحبيب والانتماء الفكري لثقافتنا وأمتنا وتاريخنا.. وإيه رأيكم بقي إني بعد ما قابلت الواد إيهاب عمر ده زدت النص ربنا يحميهم ويكفيهم شر اللي ما يطيقوا شره واحنا بقي يا أجيال الفشل والخيبة مش مطلوب مننا إلا الدعاء لهم بالتوفيق يمكن ينجحوا ويحققوا مشروع الوطن اللي ياما حلمنا بيه، وطن العدل والحرية وطن العلم والمعرفة.. يا رب.


تحياتى

27 comments:

بت خيخة وأى كلام said...

هو انا اول تعليق ولا ايه

بت خيخة وأى كلام said...

يا حلاوة يا حلااااااااااااوة

بت خيخة وأى كلام said...

بس ايه ده غريبة دى ازاى الفاجومى مش جايب سيرتى فى المقال التانى
لا انا كدة ازعل بقى

بت خيخة وأى كلام said...

شكرا يا ابو حميد على اهتمامك بالمدونين
انا هاسميك بعد كدة الراعى الرسمى للمدونين

بت خيخة وأى كلام said...

احمد
لا مش عايزة اقول حاجة بس عايزة ابقى التعليق رقم خمسة

بت خيخة وأى كلام said...

طب يلا كفاية عليك كدة
هو حبر الكيبورد ببلاش؟
لسة ورايا زيارات تانية

بت خيخة وأى كلام said...

طب ايه هو انا هافضل العب لوحدى كتير هنا فى صفحة التعليقات محدش هيجى يلعب معايا

مع اصرارى said...

وسعى بقى يا شيخة
عايز اتكلملى كلمتين
انت ما صدقتى؟

مع اصرارى said...

ازيك يا خال احمد وازى العيال
هو كده عمنا فؤاد نجم لازم يهلكنا من الضحك
آخد الف جنيه وأديك أى حاجة.
يا أخى حتى احمد فؤاد نجم يكدب
لو ناوى يبيع كان باع من زمان مش كدة ولا ايه؟

دكتور بهــدوء said...

فعلا يا خالو زي ما خيخه بتقول
م كتر كلامك ع المدونين حاسس انك خالي بجدددد
يخليك لينا يا خالو يا غالي

موجة said...

أحمد الصباغ
♥ ♥ ♥ ♥ ♥ ♥
مساء الخير
اخبارك ايه
صحيح أحنا بنحب نعرف أخبار المدونين و اجتماعاتهم و كتبهم بس حقييق بوستاتك واحشاني جدا

خالص تحياتي
أحمد توفيق

دعاء مواجهات said...

انا هعتبر نفسى التعليق الساادس

مااشى ياخيخة هاانم

يابنتى الحركات دى عملناها من زمااان

انتى قديمة اوى

ههههههههههههههههههههه

بهزر طبعا

عزيزى الجميل اخر جماال احمد باشا

يسعدنى بل يسرنى

بل يزأططنى

ان ادعوك وكل الناس . الجامديين اللى هنا دوول واللى لسة هيججو ا لزيارة

(ضربة شمس)

http://darbetshamss.blogspot.com/

مدونة مجنونة

مدونة فظيعة

مدونة م الاااخر

مدونة ستغير تاريخ التدوين فى مصر

مدونة لا يمكن معها ان تغمض عينك او ترمشها

مدونة تدمنها من اول زياارة

مدونة بقلم كل من ضربتة شمس الحقيقة

مدونة كل المدونين الاسعين منهم والعاقلين

المدونة التى ستقلب موازين القوى التدوينية ف مصر والعالم العربر والغربى كمااان...

انتوااا لسة بتقرووا

يللا مستنياااكوا...

http://darbetshamss.blogspot.com/

د/أبويحيى وادم said...

لغتى هويتى.. الى كل عربى يتحدث بحرف الضاد، الى كل مسلم غيور على لغته وهويته الاسلامية ،الى كل من يريد العز والفخر لأمته وهويته الى من يبتغون النصرة ان شاء الله، الى من يسعون الى الصلاح والاصلاح ...ندعوكم جميعا اخوانى وأخواتى الافاضل الى المشاركة معنا فى هذه الحملة والتى شعارها (لغتى هويتى )وندعوا فيها الى أحياء اللغة العربية فى كل كتابتنا بجميع المدونات والمواقع والمنتديات وموقع الفيس بوك هذا الاسبوع بأسلوب سهل بسيط لا ندعوا الى أستخدام غريب الالفاظ أوالالفاظ الفخمه ولكن ندعواللبعد عن الالفاظ البذيئة والعامية المتدنيه ، لنثبت لانفسنا اننا أمة مسلمة عربية ، نثبت لانفسنا اننا نحب لغتنا ونعتز بها اكثر من اى لغة اخرى، هذا هو هدفنا.... يدك بيدنا ننشر الامر بكل المواقع والمنتديات والمدونات والايميلات- لله عز وجل فقط نفعلها ، لحفظ ماء وجوهنا أما أنفسنا نفعلها ، ليذكر فى التاريخ اننا ما زلنا عرب نفعلها ،لتأتى يوم القيامة امام الله وتقول يارب عملت على نشر لغة كتابك وإحياءها لا اندثارها ...هذه الحملة هى حملتك انت ليست ملك لاحد انت المسؤل عنها امام الله فأنظر ماذا ستفعل!!!!!!!!!! لمزيد من التفاصيل بمدونة (ادم ويحيى) www.sunlightatnight.blogspot.com التصميمات الخاصة بالحملة موجوده بالمدونة فلنرى الله من انفسنا خيرا ونتوكل على الله ونبدأ الان بسم الله ــــــــــــــــــــ

GiGi said...

العزيز احمد باشا الصباغ بجد مقال تحفه وانتوا بجد تستاهلوا وعلى فكره الشعر ده زي اشعارك لدرجه انا قلت هو ده احمد اللى كاتبه ولا ايه بجد والله زيه بالظبط
خالص تحياتي

المستنصر بالله said...

ما شاء الله مجهود كبير مشكور عليه بالتوفيق يارب دايما

د/أبويحيى وادم said...

السلام عليكم ورحمه الله وبركاته
آخى الكريم
لما أراك لم تشارك معنا فى حملتك إلى الآن ؟
أخي العزيز : هي حملتك هي لغتك ولغتي أذا لم نحافظ عليها نحن ونعمل على نشرها فمن يفعل ذلك ؟؟
أنا لا ادعوا إلى المثالية فى استخدام اللغة والأمر مفصل بالموضوع بالمدونة
وهى ليست دعوا لفرض قيود على كيفية التعبير عن الرأي فلك مطلق الحرية في هذا
أخي الحبيب أن مشاركتك في هذه الحملة سوف يكون احد أسباب نجاحها ونشر لغتك
ندعوا الى الاعتزاز بلغتنا ..أعلم انك تعتز بها ولكنى أدعوك الآن إلى نشر الأمر بين كل من تعرف وكل زوار مدونتك التي تدون بها وكل المنتديات التي تشارك بها
إلا أذا كنت غير مقتنع بالفكرة والحملة فلك مطلق الحرية في هذا واعتذر أذا كنت أطالت عليك
والسلام عليكم

سومه...مجنونه فى بلد عاقل said...

ايه دا حاسب يا خالو من الاحتلال الخيخى
والله كلام جميل ويفتح لنفس
تحياتى ليك سومه_87

shayma said...

جميييييييييييييل

يعنى لما عم احمد الجميل يقول الكلام ده يبقى وسام على صدور المدونين بجد

ربنا يكرمك يا احمد بجد

سلامى
:)))

tamer.sala7 said...

اقسملك بالله العلي العظيم لقد اقشعر جسدي من السعادة والخوف

احساس جميل ان يذكرك اي حد بالخير واحساس اجمل لو كان الحد ده له رأي وصاحب حكمة

ربنا يديك الصحة يا عم احمد

شهرزاد said...

ألف مبروووك
بجد كل كلمة بتتقال في حق الكتاب
تشجيع واعتراف بينا كمدونين
انا فرحت اوي لما قريت المقال ده

واحدة مفروسة said...

والله يا احمد اناقلت الكلام ده اول ما دخلت الدوين

ان يا بلدي لو همه دول ولادك يبقى الله و الله
فعلا ربنا يحفظهم كلهم و انت فيهم

Rehab Mostafa said...

والله يا خالو أحمد رغم اني مش في الكتاب ده لسه :) بس فرحانه جـــــــداً من اللي بيحصل ده

شفقة هانم واحسان بك said...

اخيرا وصلت لمدونتك يا عم احمد...بجد انا مبسوطة لاهتمامك بينا ...وبلاش تبقى بخيل وزورنا فى المدونة بتاعتنا ولا احنا مش من المدونين....ولا هنعمل فيها عبده المهم....ههههههههه
شفقة

نور said...

خالو احمد بجد كان نفسى اكون موجوده فى حفل التوقيع
و نفسى موت اشترى الكتاب بس اظن لسه مانزلش المنصوره
و بعدين انتو بجد تستحقوا ان عم نجم يكتب عنكو و عقبال الكتاب التانى
تحياتى ليك و سلام مؤقت

أبو عمر said...

والله يا أبو حميد مقال حلو وكلام ظريف وإن شاء الله تتكرر التجربة وتنال النجاح
مدونتك حلوة وغنية وثرية وإنت شكلك إنسان ظريف
أنا نسبياً جديد في عالم التدوين بتمنى منك ومن كل المدونين الاطلاع على مدونتي
masrychamy.blogspot.com
وتقولولي رأيكم فيها بصراحة ويعني إذا كنت مخليها جد زيادة عن اللزوم
أنا سعيد جدا بالانضمام إليكم ومدونتك إن شاء الله هتكون زياراتي ليها كتير.....سلام يا خاااالو أحمد

miro said...

يااااااااااااااارب

عاقلة علي ارض الجنون said...

بجد بجد موضوع و لا اجمل و لا اروع المدونات المصريه للجيب دي

يا ريتني كنت معاكوا بجد
بس معلش وقتها كنت في امتحانات

المرة الجايه بقي :)

و بجد فعلا كتاب يؤلفه الشعب المصري

مبروك .. يمكن جت متأخره بس مانت ظروف

مبروك يا خالو افرح بماخليلك بقي :)

تحياتي لخالو اللي مشوفتوش

ياسميـن