خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Aug 30, 2008

حكايتى مع رمضان

أول حاجة احب اقول لكم كل سنة وانتم والاسرة بخير يارب

ورمضان كريم ويارب يجعله أحلى رمضان مر عليكم

وحبيت أكتب بعض خواطرى عن شهر رمضان

رمضان بالنسبة لى مش مجرد شهر عبادة او صيام فقط

لكنى بعتبرة شهر الخير والجمال والحب والاستمتاع بكل شئ جميل


والحقيقة انا نشأت على بعض المصطلحات الرمضانية الهامة


المسحراتى


صوت المسحراتى وهو بيقول

اصحى يا نايم

وحّد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحّد الرزاق

رمضان كريم

اصحى يانايم وحّد الدايم

السعي للصوم خير من النوم

اصحى يانايم يانايم اصحى

وحّد الرزّاق


وكان الراجل المسحراتى بيصعب عليا اوى

لما عرفت انه بيشتغل شهر واحد فى السنة

وكمان لما بيعدى يسحر الناس من غير ما يخد فلوس

بس عرفت بعد كدة انه بيشتغل شغلانات تانية باقى اوقات السنة

وكمان بيجى فى اخر رمضان وناس كتير بتديلوا فلوس كتير


السحور



ودى الكلمة الغذائية الوحيدة المرتبطة إرتباط كلى برمضان لإن حتى الافطار بنتناولة فى الايام العادية مع اختلاف التوقيت .. رسولنا الكريم عليه الصلاة والسلام قال : تسحروا، فإن في السحور بركة

وعشان كدة – رغم ان فطارى دايما بيبقى تقيل لدرجة انى مببقاش قادر اكل فى السحور – الا انى من صغرى بحب اخد بركة السحور الجميلة



والسحور غالبا بيبقى فول .. نظرا لإيمان المصريين الكامل بقدرة الفول الجبارة على الصمود ضد مجهود اليوم الطويل

وساعات فى أيام العز والبغددة والرخاء بيبقى فى زبادى .. بس انا مش باكل الزبادى الا نادرا


فانوس رمضان



رغم ان الفانوس اساسا عرفت انه ظهر فى مصر فى العهد الفاطمى لما دخل المعز لدين الله القاهرة واستقبلوه اهل القاهرة بالفوانيس للاضاءة

الا ان للفانوس عندى سحر غريب جدا

بحس انى لما بشوف الفانوس بشوف جزء مهم جدا من شريط حياتى

بالذات الفانوس الازاز أبو شمعة

اللى هو أول فانوس أشوفة وانا صغير

بعد كدة بقى فى الفانوس البلاستك او لمبة

وفوانيس على أشكال مختلفة وفوانيس بتغنى كمان

والسنة دى شوفت فانوس على شكل توكتوك


مدفع رمضان



المدفع أصلا ما كوناش بنشوفة

بس كان دايما يتقال فى التليفزيون

مدفع الافطااااار .. إضرب

لغاية ما رحت القلعة .. قلعة صلاح الدين الايوبى

وشوفت أقدم مدفع موجود فى القاهرة


أغانى رمضانية

أمى قالت لى فى أحدى الدردشات الرمضانية على بعض الأغانى اللى كانو بيغنوها زمان واللى انا لحقت منها حبة .. وانا دورت على الاغانى دى واستكملتها


أغنية وحوى يا وحوى

****

وحوى وحوى إياح
وكمان وحوى إياحا
بنت السلطان إياحا
لابسة قفطان إياحا
بالأخضرى إياحا
بالأصفرى إياحا
يا لمونى إياحا
يادوا عيونى إياحا
يارب خليلى سى عثمان
خاللى نينته سى عثمان
لولا سى عثمان لولا جينا يالا الغفار
ولا تعبنا رجلينا يالا الغفار
يحل كيسه ويدينا يالا الغفار
ويدينا ياما يدينا يالا الغفار
يدينا ميتين ريال يالا الغفار
نروح بيهم على بر الشام يالا الغفار



أغنية على عليوة

****

على عليوة ياللى
ضرب الزُميرة ياللى
ضربها حربى ياللى
نطت فى قلبى ياللى
قلبى رصاص ياللى
أحمد رقاص ياللى
رقص على مين ياللى
على شاهين ياللى
وشاهين ما مات ياللى
خلف بنات ياللى
خلفهم متعة ياللى
وجبهم تسعة ياللى
وتحت النصبة ياللى
فاطمة قاعدة على مكنتها بتخيط بدلة دخلتها

يا رب تمم فرحتها بنت العزيز الغالى
لما حوينا لما جينا يالله الغفار
ولا تعبنا رجلينا يالله الغفار
يحل كيسه ويدينا يالله الغفار
يدينا ياما يدينا يالله الغفار
يدينا متين ريال يالله الغفار
نروح بهم على بر الشام يالله الغفار
نجيب رنيئى ومئيئى يالله الغفار
نجيب زئيئى العصفور يالله الغفار
اللى يكاكى فوق السور يالله الغفار
ادونا العادة يالله يخليكو
لبه وقلادة يالله يخليكو
الفانوس طقطق يالله يخليكو
والشمعة خلصت يالله يخليكو


رمضان جانا

****

رمضان جانا وفرحنا به
بعد غيابه وبقاله زمان
غنوا وقولوا شهر بطوله
غنوا وقولوا اهلا رمضان
رمضان جانا اهلا رمضان
قولوا معانا اهلا رمضان
بتغيب علينا وتهجرنا وقلوبنا معاك
وفى السنة مرة تزورنا وبنستناك
من امتى واحنا بنحسبلك ونوضبلك ونرتبلك
اهلا رمضان جانا قولوا معانا اهلا رمضان
رمضان جانا اهلا رمضان
قولوا معانا اهلا رمضان
يوم رؤيتك لما تجينا زى العرسان
نفرح وننصب لك زينة اشكال والوان
فى الدخلة نبقى نطبلك ونهللك اه ونقولك
اهلا رمضان جانا قولوا معانا اهلا رمضان
رمضان جانا اهلا رمضان
قولوا معانا اهلا رمضان
يا مسحراتي دوقلنا تحت الشباك
سمعنا وافضل غنيلنا للفجر معاك
واعملنا هوليلة تلاتين ليلة حلوة جميلة
اهلا رمضان جانا قولوا معانا اهلا رمضان
رمضان جانا اهلا رمضان
قولوا معانا اهلا رمضان
رمضان جانا وفرحنا به
بعد غيابه وبقاله زمان
غنوا وقولوا شهر بطوله
غنوا وقولوا اهلا رمضان
رمضان جانا اهلا رمضان
قولوا معانا اهلا رمضان


الكنافـــــة



الجو الرمضانى


بصراحة من أعظم الأماكن وأقربها لقلبى فى رمضان

حى السيدة زينب

بجد بعشقة وبعشق كل مكان وركن فيه

جامع السيدة زينب الكبير بمآذنة العالية وأنوارة وتراويحة وبخورة وعطرة



الحديقة الثقافية اللى فى شارع قدرى اللى دايما بتقدم كرنفال رمضانى بديع

ابتداءا من فنون الذكر والاناشيد والفنون الابداعية والاراجوز والقعدات العربية والبدوية





العرقسوس


من الأشياء المعروفة عنى داخل محيط أسرتى الصغيرة نهمى الشديد – نهمى يعنى فجعتى – تجاه العرقسوس

حيث يمكننى تناول برميل عرقسوس كامل .. بغض النظر عن انى هقدر أفطر بعد كدة او لا

والعرقسوس أيضا من الأشياء


بتمنالكم أحلى وأجمل رمضان وأسألكم الدعـــاء

وأخيرا
أقولكـــــــــــــم
كــل سنة وأنتم بخير .. كــل سنة وأنتم صائمون .. كــل سنة وأنتم مصلون .. كــل سنة وأنتم قائمون .. كــل سنة وأنتم قانتون .. كــل سنة وأنتم متصدقون.. كــل سنة وأنتم مغفور لكم .. كــل سنة وأنتم معتمرون .. كــل سنة وأنتم قائمون ليلة القدر .. كــل سنة وأمتكم الإسلامية منتصرة
خالو أحمد

64 comments:

مصــــري said...

يا خـــــــــــال

كل سنة وانت طيب
وشكراً لكل الأغاني الحلوة دي.

ذكريات رائعة
كل سنة وانت بألف خير

تحياتي
أسامة

خمسة فضفضة said...

السلام عليكم ورحمة الله وبركاته

كل سنة وانت طيب يا خالو
وبعوده الايام


ماتكترش في العرقسوس عشان بيعلي الضغط

سلام

عين ضيقة said...

كل رمضان وانت طيب يارب

ويارب يكتر الاشياء اللى بتسعدك


ــــــــــــــــــــــــ

لسه انما عايشة فرحة لقاؤكم يوم التوقيع والله


ياللا كل سنة وانت لربنا اقرب

EMMY BABY said...

الله والله حسستنى بجو رمضان

نسيت تقول القطايف

والزينة

والصواريخ والبمب

ههههههههههههه

بوست جامد

كل سنة وانت طيب يا خالو

بس بجد انت حضرت الفانوس ابو شمعة فعلا !!!!!!

تحياتى

ايمى

Dr.ELsonpaty said...

الله ينور عليك

فكرتنى باللذى مضى

و لفت نظرى لكارثة كونية حتحصل قريب

الجيل الجديد معندهمش فكرة إطلاقا عن نص الحاجات دى

هم طلعوا شافوا الفانوس المصنوع فى الصين و اللى بيغنى أغانى بعيدة كل البعد عن رمضان

و مشافوش الفانوس أبو شمعة اللى معمول من الصفيح و الزجاج الملون الجميل

مسمعوش أغانى رمضان القديمة

عمرهم ما سمعوا عن المسحراتى و لا عمرهم شافوه

معرفوش معنى لمة الأسرة على طابلية أو ترابيزة واحدة ساعة الفطار

مسمعوش القرآن بصوت الشيخ رفعت قبل الفطار على طول على القناة الأولى

طب يا ترى كده دول لما يكبروا و يتجوززا و يخلفوا إيه اللى ممكن يكون ولادهم عارفينه عن رمضان ؟!؟!؟!؟


معلش صدعتكم

كل سنة و كلنا طيبين

سومه...مجنونه فى بلد عاقل said...

كل عام وانت بخير يا صباغ جوعتنا يا شيخ الله يسامحك
سومه_87

همسة قلم said...

كل عام وانت الى الله أقرب وعلى طاعته أدوم

كل سنة وحضرتك طيب وربنا يتقبل منا ومنكم الطاعات ويعينا واياكم عليها

دمتم بكل خير

dina seliman said...

الله بجد جووو جميل جداا
مكنش ناقص الا الاكليبات بتات زمان وهما بيصوروا فوانيس زمان والمساجد المنوره

ياااااااااااااااااه
افتقدت فوانيس زمان اووووووى

ورمضااااان كريم

aya said...

خالو خالو
فين فانوسى يا احمد؟
كل سنة وانت طيب
ويارب السنة الجاية نشوفك بابا احمد
وكمان مخاليلك يزيدوا

كل سنة وانت فى هنا وفى خير يا احمد يارب


ربنا يكرمك ويسعدك

والدعاوات الجميلة ديه
اللهم امين
ولك مثلهم يا ابوحميد

سلام

مؤمنه said...

السلام عليكم ورحمة الله وبركاته
تعيش وتفتكر يا خالو

ورمضان كريم عليك وعلينا والمسلمين اجمعين

دومت بخير
والسلام عليكم ورحمة الله وبركاته

maha zein said...

يا ابن الايه
تصدق انك بجد عملت جو يشبه جوي كتير اللى عملته عندي
بجد
لازم والله يا صباغ تدخل تشوف
ايه توارد الافكار ده
نفس الاغنية
نفس الصور
نفس اللى انت اتكلمت عنه
ايه يا جرع ده
بجد
يخرب بيت دماغك
شكلك طالعلي
كل سنة وانت طيب
بس في كام حاجة انت نسيت تحكي عنهم
بس انا حكيت ولا يهمك
تحياتي الحارة ليك
عشان انت طلعت بتفهم وتقدر رمضان

StEEl BeaUtY said...

ووواو بوست ياللهوى شديد اوى

بجد رائع و اتكلمت فية عن الشعائر ونسيت التراويح و التلفزيون و الاكل oops
كل اللى عامل دايت بقا يستعوض ربنا فية اكيد مش هنقدر نقاوم والنس كلها مقضيها

بس انا اكتر بحبها الخروج قبل الفطار وساعته

ياااه الناس مش موجودة فى مصر كلها يعنى لو دخل اجنبى البلد الساعة دى هيدور ع الناس بجد كل مكان مش تتخيل

هات ازحم مكان فيكى يامصر تلاقية فارغ تمام من الناس

وحتى اللى فية تلاقية بيجرى او سايق العربية ع اقصى سرعة

اللحظة دى عايزة تتصور بجد اجمل حاجة فى رمضان الهدوء وفراغ الشواع ساعة الفطار

رمضان كريم
كل سنة وحضرتك طيب
ورمضان كريم عليكم وعلينا
و يكون من اجمل رمضان مر عليكم

ضى القمر said...

ياااااه الله على جو رمضان الجميل

بجد كان نفسى احس بالجو ده بين الناس ..

لكن الناس تايهه بتجرى وبس

بجد حسستنى يا احمد بروح وبهجه رمضان

الله على ما كتبت يا اخى ..

بجد روووعه

كل عام وانت بخير ..

كل عام وانت إلى الله اقرب

اضف خبر لآخبار المدونات المصرية said...

السلام عليكم لقد تم افتتح مشروع يشبة الى حد كبير فكرة مشروع موقع خبر افلق خبرية ولكن مع اختلافة فى انة لمدونات العربية

اذا حبيت ترسلنا اخبار من مدونتك وطلعنا على جديد اخبارك و مساعدة فى ترويج مقالات مدونتك ضف لنا خبرا فى آخبار المدونات العربية

http://arab-newsblog.blogspot.com

كل سنة والجميع طيب و
رمضان كريم

mostafa rayan said...

كل سنة وانت طيب مرتين
مرة علشان رمضان ومرة علشان عيد ميلادك اللي كان الثلاثاء اللي فات
ربنا يا اخي يكرمك ويوفقك
تحياتي ومحبتي ليك

د/مروة المعداوى .....قباحة سابقا said...

اولا كل سنه و انت طيب

تانيا انا بحب المسحراتى جدا لانى مولودة فى حى شعبى

بموت فى اغانى رمضان

احيي تذوقك للسيدة زينب لانه مكان حالم و مريح و من الاخر كدا بتاعنا اوى احنا المصريين ولاد البلد

كله كوم و العرقسوس كوم
اول مرة اقابل حد بيمةت فيه زيى

وانا صغيره كان جدى يدينى جنيه و ازازه فاضيه و يقولى امشى يا بت الحقى عم جلال بتاع العرقسوس
و كان بشربه و لازم و هو بيشربه يعمل صوت و بعد ميشريه على بوء واحد

لا مؤاخذة يكرع و يقول

صحــــــــــــــه

الله يرحم جميع موتانا و المسلمين يارب بحق شهرك الكريم

دا اللى بلاقيه فى مدونتك يا احمد
ريحه زمان ودا اللى بيجبنى هنا على طول

شكرا

تشااااااااااااوووووووووووووو

محمد محمود يوسف said...

أحمد بيه


رمضان كريم


ابعتلي الكود أوف لاين وحياتك

the ghost said...

اولا كل سنة وانت طيب يا استاذ احمد.انا عندى 16 سنة فى بالنسبالى مفيش ذكريات كتيرة اوى عن رمضان.لكنى هتكلم عن الفترة اللى انا متذكرها يعن من وانا عندى 12مثلا كل فترة الحجة بتتغير للاسوا مثلا رالمسحراتى هو عم محمد اللى باشوفة وهو ماشى والمفروض بيصحى الناس مثلا2005كان بيندى على الناس اللى بيسصحوا ولادهم علشان يسمعوا اسمهم وهو بينادى وطبعا كانت الاسرة بتدفع تمن الخدمة دى و2006 زاد عددالاسر طبعا كان فى كلسنة بعد رمضان كان بيلف على الشقق ياخد تمن السحور بالرغم ان احنا نقولة محنا صاحيين وبرضة كان بياخد فلوس,جت2007 والرجل بئة ما بيمشيش فى الشوارع وما شوفناهوش خلال ال30يوم بس جى فى الاخر علشان يشحت.ودى كل ذكرياتى عن المسحراتى.نا بحب كل حاجة قديمة عموما لكن حدممكن يقارنلى بين الفانوس ابو شمعة الجميل اللى انا عمرى ممسكتهوش وبين البتاع العبيط اللى بيقول وحوى يا وحوى.اما بالنسبة للمدفع فانا كنت بستناة وطبعا بستنى شاشة فودافون الحمرا والمدفع الورق اللى محطوط ومابيكونش لية فايدة لان بعدية بيجى اعلانين وبابا يصمم ما نكلش لغاية ما نسمع الادان.طبعا من الغنى عن اذكر ان انا عمرى ما روحت شارع قدرى دة.يمكن الحاجة الوحيدة اللى متفقين عليها هى الاغانى الرمضانية لانها االحاجة الوحيدة القديمة والجميلة بجد,طب حد يقولى على اغانى جديدة علشان ما احبهاش اصلا غير اغنية ايهاب توفيق.والعرقسوس بالنسبة لى حا جة مرة رذلة ريحته اللى بتسببلى اريكتاريا دىاللى بتتشم عن بعهد ميل بامانة رمضان بقة مالوش طعم بقالة فترة والبلد ذاهبة للكلاب على راى الانجليز.اللى كنت بحبة فى رمضانه وانتهى هو...يتبع

the ghost said...

اولا كل سنة وانت طيب يا استاذ احمد.انا عندى 16 سنة فى بالنسبالى مفيش ذكريات كتيرة اوى عن رمضان.لكنى هتكلم عن الفترة اللى انا متذكرها يعن من وانا عندى 12مثلا كل فترة الحجة بتتغير للاسوا مثلا رالمسحراتى هو عم محمد اللى باشوفة وهو ماشى والمفروض بيصحى الناس مثلا2005كان بيندى على الناس اللى بيسصحوا ولادهم علشان يسمعوا اسمهم وهو بينادى وطبعا كانت الاسرة بتدفع تمن الخدمة دى و2006 زاد عددالاسر طبعا كان فى كلسنة بعد رمضان كان بيلف على الشقق ياخد تمن السحور بالرغم ان احنا نقولة محنا صاحيين وبرضة كان بياخد فلوس,جت2007 والرجل بئة ما بيمشيش فى الشوارع وما شوفناهوش خلال ال30يوم بس جى فى الاخر علشان يشحت.ودى كل ذكرياتى عن المسحراتى.نا بحب كل حاجة قديمة عموما لكن حدممكن يقارنلى بين الفانوس ابو شمعة الجميل اللى انا عمرى ممسكتهوش وبين البتاع العبيط اللى بيقول وحوى يا وحوى.اما بالنسبة للمدفع فانا كنت بستناة وطبعا بستنى شاشة فودافون الحمرا والمدفع الورق اللى محطوط ومابيكونش لية فايدة لان بعدية بيجى اعلانين وبابا يصمم ما نكلش لغاية ما نسمع الادان.طبعا من الغنى عن اذكر ان انا عمرى ما روحت شارع قدرى دة.يمكن الحاجة الوحيدة اللى متفقين عليها هى الاغانى الرمضانية لانها االحاجة الوحيدة القديمة والجميلة بجد,طب حد يقولى على اغانى جديدة علشان ما احبهاش اصلا غير اغنية ايهاب توفيق.والعرقسوس بالنسبة لى حا جة مرة رذلة ريحته اللى بتسببلى اريكتاريا دىاللى بتتشم عن بعهد ميل بامانة رمضان بقة مالوش طعم بقالة فترة والبلد ذاهبة للكلاب على راى الانجليز.اللى كنت بحبة فى رمضانه وانتهى هو...يتبع

Dr.Mohammed Gohary said...

كل سنة وانت طيب

يا راجل يا طيب


رمضان كريم

واصحا يا نايم

Dr.Mohammed Gohary said...

بجد بوست أكثر من رائع

كل سنه وانت طيب يا حبيبي

ربنا يخليك يا أحمد بك

وهنزلك القاهرة بس أخلص من امتحاناتي دي

Dr.Mohammed Gohary said...

هههههههههههههههههه

فانوس علي شكل توكتوك هههههههههههههههه

هو انت لسه مولع بالتكاتك
يا توكتوكي؟؟؟؟؟؟


هههههههههههههههه
ودخلت وحوي يا وحوي في علي عليوة
هههههههههههههههههه
أغاني جامدة

عارفها كووووولهااااااا

بجد بوست روعة


كل سنه وانت طيب

رمضان كريم

the ghost said...
This comment has been removed by the author.
the ghost said...

اكمل ولا اية

Sourah said...

مش ممكن يا ابو احميد البوست الرائع ده ..
بصراحة قدرت تفرسني و تعليلي ضغطي و خلاص الدمعة هتفر من عيني ..
طيب هتسأل ليه ؟!!!
طبعا عشان اللي ما يعرفش يقول عدس ، الواحد هنا في الغربة - هيه مش غربة اوي يا دوب فركة كعب ساعتين بالطيارة لغاية الرياض بالسعودية - وقاعد و كافي خيره شره ، و بقول يا رب اجعل صبري ده في ميزان حسناتي .

تقوم سيادتك و بحسن نية ، تقول رمضان كريم ببوست اكتر من رائع ، فيه كل مظاهر رمضان ، و بالزات الفول ،وش القدرة اللي بيبقى زبدة، و اللي بضطر ادمسه في البيت ، لانني معنديش عم صالح - الراجل اللي كنت بشتري منه الفول المدمز من مصر - هنا ، و مش هقوللك مفتقدة العرق سوس ، اصلي ماليش فيه خااااالص ، بس ليا في الخروب و التمر هندي اوي ، وكله كوم بأه و الفوانيس ، اصل احنا ماعندناش فوانيس هنا، عيالي مايعرفوش الفانوس ،ولا اللي بيغني و لا حتى التوك توك ، اقول ايه بس ، الحمد لله ..

بس اكتر حاجه عجبتني في البوست ده كلمات الاغاني اللي ضفتها ، الحاجات دي درر يا جماعة و محصلة ثقافة شعب ،و ذكريات و قلوب فرحت ياما بيها ..

ربنا يسعدك يا احمد ، و كل سنة و انت طيب ، و كل المصريين بصة و سلامة ..

و اخر الكلام سلااااام ...!!!

كيارا said...

كل سنه وانت طيب

بجد بوست لذيذ جدااااااااااااا

تحياتي

كيارا

سمراء said...

كل سنة وانت طيب
رمضان كريم
اشكرك على الزيارة
سمراء

NilE_QueeN said...
This comment has been removed by the author.
NilE_QueeN said...

شهرك مبارك ان شاء الله

ومتنساش تعلق الشراشيب

Ihab Omar said...

كل سنة و انت طيب يا احمد
و رمضان كريم

ňįĝŗő said...

حبيبي
تعالى جنبي هنا تعالى
أنا برده زيك يا معلم في مسألة العرقسوس
علشان كده في البيت عندنا مش بيدوني غير كوباية واحدة بس ساعة الفطار
بس عارف إيه أكتر حاجة عاجباني في البوست
صورة إممممممم الكنافة إمممممممم المحشية إممممممم
اللي جوعتني و أنا لسه يدوبك فاطر

كل سنة و انت طيب يا أحمد


يلا سلام

صاحب المضيفة said...

ربنا بارك لك يا خال عل ىالتغطية الجميلة دي


رمضان كريم وربنا يسعدك


تحياتي

appy said...

كل سنه وانت طويل يا صباغوس فين الفانوس يا واد انت

Gannah said...

كل سنة وانت طيب
فكرتنا بكل الحاجات الحلوة المرتبطة برمضان
تحياتى

بت خيخة وأى كلام said...

كل سنة وانت طيب يا ابو حميد
والسنة الجاية تكون فى اى حتة انت عايزها

سلام
اختك خيخة

smilyrose said...

كل سنة وانت طيب يا أحمد

على فكرة فكرتنى بالمسحراتى

اللى كان عندنا فى البلد زمااااان واحنا صغيرين

كنا نستناه يوميا عشان نخرج معاه ونلف على الناس ونصحيهم

وافتكر كان فيه سنة كنت حصلت لى حادثة ومقدرتش اخرج معاهم زى

ما تعودنا وكانوا اصحابى يعدو على ويلعبوا معايا بعد السحور

ياااااااااااااااااااااااااااااااه كانت ايام ياريت تعود من تانى

وعلى فكرة أحلى رمضان تلاقيه فى الشعب الجميل بتاعنا دا

وزى ما بيقولو ا بالفلاحى طبلية رمضان واسعة

تساع من الحبايب الوف

ربنا يعودا عليك وعلينا وعلى الأمة الأسلامية بخير

رمضان كرررررررررررررررريم

ولو سمحت ياريت الفانوس

وحشنى قوى من ساعت ما كبرنا

رمضان كريم

Smilyrose

وردشان سابقا

محمد الكومي said...

كل سنة و انت طيب يا احمد و يعود عليك بالخير يا رب

نبراس العتمة said...

العزيز خالو أحمد الصباغ..

أحييك أولا على المدونة وعلى هذا الاحتفاء برمضان بطريقة تمتص رداد الروح..
شوقتني كثيرا للكنافة والعرقسوس..
أدفع عمري لأجده..
فأنا مغربي وهذا ما لا وقعت عيني عليه ولا رأته لكن بالمقابل ممكن أقول أن حلوى الكريوش والحريرة المصنوعة بطريقة مغربية هي من الأشياء التي يجب أن يسافر من أجلها المصري.. ما دام هدا النت الى حد الآن عاجز عن نقل هذه الأشياء ومقتصر فقط على تصويرها.. بانتظار أن ينقل لنا ملمسها ومداقها..ها هي تحياتي إليك أيها العبق برمضان

همس الاحباب said...

كل سنة وانت طيب يا اجمل خالو فى المحروسة
كل سنة وانت بينا ومنورنا
كل عام والاسرة الكريمة بخير وسعادة
ورمضان كريم يا باشا
والله ورجعتنا للزمن الجميل وذكريات رمضان الحلوة
ربنا يسعدك دايما ويهدى بالك ونفرح بيك قريب وانت ماسك فانوس كده
تحياتى وتقديرى
خالد

قوس قزح said...

يارب
كلما طرق هذا العبد بابك
أفتح له كنوزك
و سخر له عبيدك
و ابسط له رحمتك
اللهم اجعله من الصائمين القاثمين
الركع السجود
و بارك له فى شعبان و بلغه رمضان
فى يسر و سلامة و امان
اللهم امين

كل سنة و انت الى الله اقرب

مهندس مصري said...

الله ينور
فكرتني بجو رمضان اللي مفيش منه حاجة هنا خالص
و يا عالم رمضان ده حيعدي على الواحد إزاي
أدينا حنستكشف رمضان مختلف
و كلمات الأغاني جبارة

زهرة said...

أذيك أحمد
كل عام ونت بخير

أتمني السنة الجاية تكون حققت كل أمالك

المسحراتي كلنا كنا بنستناه عشان نسمعه وبنفرح جدا بمرروه

السحور بالرغم من اني مليش فيه الا أنه بحسسني بجو رمضان

فانوس رمضان مرتبطة بيه جدا لان اكتر ذكرياتي معاه
أما عن شكل الفانوس التكتوك أنا بفضل فانوس زماان شكلة أفضل

مدفع رمضان من الأشياء الأساسية المرتبطة برمضان وشوفته مرتين

الأغاني بجد حلوة جدا وفي أغاني اول مرة اعرفها

الجو الرمضاني أحلي جو وافضل شيء فيه التجمع العائلي

أما العرقسوس مش بحبه وبالهنا والشفا ليك

كل عام وانت بخير
وربنا يعودها علي سائر المسلمين بالخير

بس ياتري اشتريت فانوس رمضان لنفسك؟؟

رمضان كريم

اسكندراني اوي said...

كل سنه وانت طيب يا ابوحميد
فكرتنا برمضان في مصر
كلنا اتربينا على كل المظاهر الرمضانيه الجميييييييييييييييله دي اللي مافيش منها غير في مصر وصدقني رمضان في مصر واسكندريه وكل الجمهوريه له طعم خاااااااص جدا جدا

كل سنه وانت طيب مره اخرى
تحياتي

MaGn0liA... said...

كل سنه و انت طيب يا خالو احمد

بجد حكايتنا كلنا مع رمضان حلوه اوى


رمضان كريم و سعيد ليكوا كلكوا

سلامات :D

سها السباعي said...

اشكرك بشده على كلمات الاغاني

بجد

كل سنة وانت طيب

محمد الكومي said...

كل عام و انتم بخير بمناسبة شهر رمضان الكريم

رمضان كريم اعاده الله عليكم بالخير و اليمن و البركات

ليك فانوس عندي تعالى خده بسرعة يالا

عاشــــــ النقاب ـقــــة"نونو" said...

رمضان كريم
كل عام وانتم الى الرحمن اقرب

بذرة امل said...

كل سنة وحضرتك طيب
والى الله اقرب
وعلى طاعته ادوم

rovy said...

كل عام وانت بالف خير

رمضان مبارك علينا جميعا ان شاءالله

اطيب امنياتى

جنّي said...

السلام عليكم ورحمة الله وبركاته

كل عام وأنتم بخير
كل عام وأنتم صائمون
كل عام وأنتم مصلون
كل عام وأنتم قائمون
كل عام وأنتم قانتون
كل عام وأنتم متصدقون
كل عام وأنتم مغفور لكم
كل عام وأنتم معتمرون
كل عام وأنتم قائمون ليلة القدر
كل عام وأمتكم الإسلامية منتصرة

اللهم بلغنا رمضان وأهلّه علينا بالسلامة والإسلام واليمن والبركات والنصر والتمكين

أخوكم
سعيد

جنّي said...

كل عام وانتم بخير يا عم احمد

كان نفسي ازورك من زمان والآن تم المراد فما اسعدني بالتعرف على جنابك

جزاك الله خيرا

إبـراهيم ... معـايــا said...

رمضان حلو و أحمد وجميييل وكويس ، وابن حلااال يا صباااغووو بيــــــه ، ع فكـرة تدوينة مفتكسة وفظيعة وخطييرة وراااائعة، من الحاجات اللي بحبها ف رمضان كووولها ، ع فكـرة أنا برضو عرقسوسي الهوى
.
.
مممممممممممممممممم
تسلم إيدك


وعاوزين نفطر ف يوم ف شهر ف سنـة

قلب مصرى said...

كل رمضان وحضرتك بخير
اللهم بلغنا ليلة القدر واجعلنا من عتقاء هذا الشهر

على فكرة أنا كمان من مدمنين العرقسوس

وومن said...

يااااااااه

ايه كل الكلام ده انا متهئلي نقلت رمضان لايف بالصوت والصورة بس رمضان اللي أحنا نعرفة

بجد بوست هايل

وكل سنه وانت طيب بعودة الأيام

محمود الدوح said...

كل سنة وانت طيب يا خال الكل
اية اخبار الخلاخيل فى رمضان

المهم
انا داخل بس عشان اقولك
رمضان كريم

وبالنسبة لمدفع الافطار
فانا عمرى مسمعتة واللى اعرفة انة مش شغال اساسا
بس برضة بنفطر علية
هههههههههههههههههه

lyssandra said...

كل سنة وانت طيب

ورمضان كريم

جميل الجو اللي عبرت عنه في البوست
لأنه غالبا ماعدش موجود
وبنفتقد رمضان زمان اوي

تحياتي
دمت طيب

Lyssandra

Anonymous said...

كل عام والشعب المصرى والامه الاسلاميه بخير



لذا نرجوا من الجميع المشاركه فى المنتدى الاسلامى الجديد



بمناسبه شعر رمضان الكريم

http://quran.7olm.org/


وفقنا الله واياكم الى الخير والثواب


المنتدى تحت الانشاء نريد المساعده

http://quran.7olm.org/

انا من اهوى ومن اهوى انا said...

خالو كل سنة وانت طيب وبصحة وسعادة

ربنا يعود علينا كلنا بالخير

تحياتى يا خالو

محمد فوزى

HARD TIMES said...

ايه يا خالو دي حكاية انت مخلتش حاجة خالص تعيش وتفتكر هههههههه
كل سنة وانت طيب رمضان كريم
تقبل الله منا ومنكم
بس انت مختفي ليه محدش شايفك علي جروباتك الحلوة ليه

لولا said...

كل سنة ورمضان كريم علينا كلنا

مهيج الجماهير said...

كل سنة و انت طيب
و الله أول يوم فى رمضان لحد دلوقت جميييييييييييييييل
يا رب دايماً
و بعودة الأيام

ftafeet said...

ازيييييييك يااحمد
كل سنه وانت طيب وبالف خير
وان شاء الله ابقى رمضان الجاى معاكو

بجد خلتنى اشتاق لرمضان فى مصر تسلم ايدك

نوناااا

دعاء مواجهات said...

انا جيت متاخر بس عادى

مفيش بيننا الكلام دة

كل سنة وانت

احلى احمد فى الدنيا

Anonymous said...

neck fοrethought for κeen and сhronic ѕickneѕs Using completіng caution including tantriс maѕsage.
vigor ӏ call Qi, car ploughed into the
frοnt line of аn Τаntriс Μassage shop in ruгal Dorset.

Ηij is diκ, romig Tοpреr of tгaditionаl
and сοntempoгaneοus ρoetry anԁ Dancing in Ηawaі'i today.

Look at my site :: site
my page -