خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Sep 7, 2008

ياترى نهايتنا هتبقى ازاى فيكى يا مصر ؟

اليومين دول طول ما أنا ماشى فى شوارع مصر بنظر للأشياء وأتأمل فيها وأتخيل نهايتى هتبقى فين؟؟؟

أمشى فى الشارع أبص لأتوبيس النقل العام وأفتكر الأتوبيس اللى وقع قدامى من كام سنة من على كوبرى الجيزة على نافوخ الناس اللى تحت وكل البشر ماتت وميدان الجيزة اخر النهار كان غرقان دم ومية ورمل .. واحس ان نهايتى هتبقى فى اتوبيس

أمشى قرب المقطم اللى زمان كنت بحب عظمتة وشموخة .. وأبص للصخور العالية ..وأفتكر بتوع الدويقة.. وافتكر قسوتة علينا زية زى اللى بيحكمونا ..واحس ان نهايتى هتبقى تحت صخرة

امشى جنب كوبرى .. وافتكر حادثة الكوبرى السنوية .. كوبرى السيدة عائشة اللى كل سنة يقع من عليه اتوبيس او ملاكى او تاكسى او عربية جيش .. واخر مرة الأرض هبطت تحت الكوبرى

أروح أصيف وأبص للبحر .. وأحس بخيال جثث سارحة فى الأعماق .. وافتكر حادثة العبارة المجيدة .. أفتكر سالم إكسبريس وافتكر السلام .. وكمان بفتكر براءة ممدوح اسماعيل .. واحس ان نهايتى هتبقى فى بطن سمكة

أسمع صوت السكة الحديد وهى جاية من بعيد .. يرن فى ودانى أهات وصرخات قتلى حوادث القطارات .. من كفر الدوار لقطار الموت بمطروح .. واحس ان نهايتى هتبقى على قضبان سكة حديد

أشوف عربية جاية من بعيد .. أفتكر مطبات وحفر ومنحنيات شوارع بلدنا .. والاف الحوادث اللى بتحصل قدام عيوننا سنويا واخرها الحادث كمين مرور المعادى شوف عند وائل عباس

ياااااااااااااااااااااااارب

اموت موتة كويسة

22 comments:

عايزه اتطلق و said...

ممكن نهايتنا فيها نبقا معجزين بس بصحتنا وحوالينا احفادنا ومتطمنيين على مستقبلهم وبكامال صحتنا من النضلفه اليى البلد فيها وده مستبعد..
وممكن ميتيين من جراء صعق كهربائى نتيجة انى اتخبطت فى عقلى وفكرت اريح ضهرى على عامود كهربا ..وده محتمل قوى ..
وممكن اكون مقدرتش اجارى الاسعار وجنونها فقررت اوفر واعيش فى مستشفى المجانيين اوفر واهه اكل ومرعى ...وده محتل جدا..
او ااقرر ان مش عايزه نهايتى تبقا بايديها عشانبحبها ومتهنش عليا انها تبقا قاتله وتموتنى وتروح فى داهيه بسببى ..فأخد ابنى وورقة طلاقى اليى شكلى مش هشوف وشها واخد الواد اليى حيلتى من الدنيا واسيبها فى حتالها وتسيبنى فى حالى واهاجر على بره ملها بوركينافاسو...
على الاقل معندهمش مجلس شورى اتحرق ولا عبارات بتغرق ولا صخور بتقع ..

عمار صبرى said...

السلام عليكم,

الحكومة بيقتلونا ..
فى العبارة يغرقونا...
وقصر الثقافة يحرقونا ...
وقطر الصعيد يقرقونا ...

فساد فى فساد فى فساد ...

بس للأسف احنا اللى سكتنا فى البداية على الظلم والظالم

احنا اللى شوفنا الفساد وسكتنا عنه وأهو الفساد ماسكتش عننا

لازم ندفع تمن سلبيتنا

وحسبنا الله ونعم الوكيل .

تحياتى ,

عمار صبرى

لماضة said...

يارب مقعش تحت ايد الدكاتره
اخترلك موته
الحق عليهم يعني
انا عن نفسي بفكر اجيب الكفن من دلوقتى وأزمزمه
وصيتك
الفاتحه على روحنا كل 3 مرات في اليوم قبل الاكل

bos bos said...

حرام عليك يا أحمد خلتنى أعيط من كلامك ده
كل اللى انت قلته بشع ودرجه بشاعته فوق الوصف
ومحدش عارف هو هيموت أزاى ولا فين ولا بأى طريقة المهم أننا نموت وربنا راضى

ضى القمر said...

اللهم عافينا واياكم يا احمد

خلاص النفس تعبت .. وجواها احساس غريب ..
كنا بندافع عن وطنا وارضنا .. وبنقول مهما عملت دى برضه ارضنا ..
لكن الأرض اللى ما تصون اهلها ..
هل برضه هتكون ارضنا ؟؟

بوست مؤلم جداا يا اخى ..
وشدة المه من صدقه .. ومن كل الحقائق اللى فيه .
يارب عافينا عافينا واحفظنا واياكم يا اخى

حسبنا الله ونعم الوكيل

محمد محمود يوسف said...

بعم أحمد متكتئبش

حد لاقي مطرح يموت فيه اليومين دول



ابقى ابعتلي الكود ومتنساش وحياة ابوك


:)

Dr.Mohammed Gohary said...

السلام عليكم
ايه يا خالو
انا زعلان منك
بقا تنسااااااا
انك ممكن تموت في الهواااااا وغرقان سوا سوا زي في طيارة مصر للطيران اللي وقعت في الخليج
اللي كانت نازلة ترانزيت في دبي

هههههههههههههههههههههه
يا سيدي

قل لن يصيبنا الا ما كتب الله لنا

---------
ولا تدري نفس ماذا تكسب غدا. ولا تدري نفس بأي أرض تموت

صدق الله العظيم

والله عندك حق يا أحمد

الواحد لما بيشوف الحوادث دي بيتمني يموت موته كريمة
ياااااااااااااارب
اجعلها شهادة لنا واياكم

تحياتي

مصطفى محمد said...

لنا الله يا صباغ .. علينا أن نلتزم بالنظام مبدئيا عند حدوث أي كارثة حتي لا تتفاقم .. ثم علينا أن نلعب بيننا دور الحكومة المرجو .. نخاف على بعض و نحذر بعض في ود اذا بدر من أي واحد منا تصرف قد يؤدي الي كارثة .. أو سرعة التصرف في النطاق المحدود للفرد اذا ما ظهر أمر يؤدي الي كارثة .. لأن حكومتنا أصبحت كما قال مرة ابراهيم عيسي .. جكومة مثل شخصيات الكارتون .. لا تعيش معنا في الواقع .. ربنا ينجينا من كل مهلك .. أتساءل كيف يدرس للأطفال في المدارس النشيد الوطني و حب مصر و هم يشهدون البلد تتساقط جزء جزء .. ربنا يستر

:)

Rannon said...

عندك حق
الواحد بقى متخيل الموت في أي لحظة بسبب اللي بيحصل حوالينا
ربنا يستر

قل لن يصيبنا إلا ما كتب الله لنا)

smilyrose said...

على فكرة يا أحمد دا احساسنا كلنا

مش بقى فيه أمان فى مكان بتروحه

مش عارف هتلاقيها منين ولا منين

مرة اتوبيس

مرة عباره

مرة قطار

مرة ميكروباص

منين ولا منين

ولا من صخور الجبل

المهم تعددت الأسباب والموت واحد

من الحكومة

قضاء وقدر

المهم فى النهاية نقابل وجه كريم

على أفضل حال

يعنى ميبقاش عذاب دنيا وآخره

ربنا يستر


Smilyrose

وردشان سابقا

Anonymous said...

انا امنية حياتى الاقى مدونة فى حاجة حلوة كل لما اخش اى مدونة الاقى حاجات محزنة قدامى من الدويقة للكمين وقبليهم حريق مجلس الشورى وقبليهم ممدوح اسماعيل هى العيشة بقت مملة ورخمة وكئيبة كدة لية

بس بفكر اننا نستاهل دة كلة علشان مستحملين الذل والظلم وكل المصائب دى الناس ماشية فى الشوارع مكتئبة والنكت قلت وكل حاجة معفرة ان حاسس ان البلد كلها مخنوقة والانفجار قرب وكل يوم اصحى من نومى واقول ياربى هو دا يبقى اليوم

قلب مصرى said...

وليه ماتخيلتش نفسك واقف فى طابور عيش وكانت دى النهاية.
وليه ماتخيلتش نفسك عضو فى مجلس الشورى وكانت دى النهاية.
وليه ماتخيلتش نفسك فى قصر ثقافة وكانت دى النهاية.
وغيرها وغيرها وغيرها .... النهايات فى مصر كتير قوى يا خالو اكتر من إننا نعدها.

اللهم احسن ختامنا.

šσяšαяαα said...

ههههههههههههههه انا كمان كاتبة بوست اسمه فاضل ايه فيكى يامالطة

ماحنا ومالطة جيران برضو وشكلنا عملنااتفاقية تخريب بينا وبينهم وتقريبا ناويين يغيروا اسم الجمهورية وهيبقى اسمها الجمهورية المالطية المدمرة ذاتيا
طويل شوية الاسمم مش كدا
بس انت عارف بقى الخراب بقى توماتيكى مش محتاج تخطيطات

بالنسبة للموت بقى انا عاوزة موتة كدا شرحة وبرحة
يعنى مثلا اكون واقفة فى البلكونة بستنشق الهواء العليل تقوم تييجى طيارة رش المبيدات وتنشن عليا اتخنق اروح اكلى ايس كريم بسرعة وانا بتخنق واسلم على ماما واخواتى وانا بتخنق برضو
وارجع اقف فى البلكونة وانا بتخنق
وبعدين يا يلحقونى ياتخنق
وبعدها طبعا هموت.. دا الطبيعى يعنى:)

ولا دايم الا وجه الله

GiGi said...

كل سنه وانت يب وبخير ويارب ربنا يكرم ويبقى اجمل رمضان ويرزقنا رضا ربنا علينا يارب
انا طبعا قرات التلات بوستاتالاخيره مع بعض بجد فعلا انسان رائع ربنا يعزك
ويديلك يارب طوله العمر ونشوفك بابا مش خالو بس ويكرمك كرم كبير قوي ويرزقك من نفضله ويطول فى عمرك وانت فى طاعه ربنا وسعيد وحياه جميله يارب
على فكره انا بدعيلك بجد وفاكراك ايما ربنا يكرمك على كل حاجه عملتها معايا
تحياتي
ادعيلي
وكل سنه وانت وماما واخواتك ومخاليلك طيبين يااااااااااااارب

كيكى said...

كنت هقولك اقعد فى البيت ومتزلش
لكن افتكرت ان ممكن البيت يوقع
!
كنت هقولك احفرلك خندق
بس ممكن يتهد

!
كنت هقولك اشترى جناحات وطير
بس ممكن تموت بسبب التلوث
!
اقولك
اعمل نفسك اجنبى وهتعيش زى الفل فى مصر وكل الحوادث الى قولتها عمرها ما هتحصل وانت اجنبى
!
!
الى فيها متغربين
الى فيها تايهين
الى فيها كل نهايتهم سودة
عموما..
لمة مانت مش اجنبى ماتصلى بينا على النبى
!
وايييييييييييييييييييييييييية
عووووووووووووووووووووووووووووووووو

كيكى said...

نسيت اقولك
....
احيييييييييييييييييييك على الرباعية الى انت كاتباة فى اول المدونة
والله الاول افتكرتها لعمنا صلاح جاهين
بجداحييييييييييييييييييييييك
رمضااااااان كريم
عووووووووووووووووووووو

MaGn0liA... said...

يا رب يحسن ختامنا كلنا


حاجه بقت مقلقه جدا

بس يوم ما هنتحرك و نقول لا

هنبقى حاربنا الفساد بجد

و حاجه مؤلمه بجد الاحساس ده

انك تبقى ماشى حاسس ان البلد فوضى

مفيش اى حاجه بتحصل صح

كله هبل

ربنا يستجيب لك يا احمد

و احنا كمان نموت موته كويسه

ابو النجوم said...

صباغ
يعنى هى الناس ناقصه . بوست يجيب الاكتئاب بجد كله حديث عن الموت والحوادث طيب ليه مافكرتش انك ممكن تموت وانت عندك 100 سنه ونايم على فرشتك عادى ليه التشاؤوم حتى فى الموت .. وبعدين انا شايف ان فيه تحامل على الحكومه فى كلامك وكلام الاخوه المدونين . طيب ايه ذنبها انها بتمارس الديمقراطيه معانا وتخلينا نختار الموته اللى تعجبنا وبعدين عامله تعدديه موتيه يعنى قمه الحريه فى الاختيار . بجد انتم ظالمين الحكومه دى حكومه نظيفه وبكره لما يجى رشيد هتبقى رشيده .. ماتكلمونا فى حاجه تفرح وبلاش سيره الحكومه والموت اللى هيموتنا ناقصيين عمر .

عاقلة علي ارض الجنون said...

ربنا يحسن ختامنا كلنا

فعلا الواحد بقي يحس انه ممكن يموت بسبب الاهمال او الفساد

ربنا يحسن ختامنا

ياسمين

محمد الكومي said...

ربنا يطلعنا منها على خير يابو حميد

و اللي انت حاسس بيه مانتش حاسس بيه لوحدك

Somaia said...

زي ما قولتلك يا أحمد على الفيس بوك
حلوة أوي أوي وعاجباني الفكـرة

انت عارف بجد بقى الخوف من ايه؟؟
الخوف ان الواحد في الآخر يموت موتة عادية ..
بعد ما يكون عاش عيشة عادية
الواحد لو مات أي موتة من الحاجات اللي فوق ديه ... هيبقى بموتته ديه
ممكن يغير حاجة
ممكن لما أموت في أوتوبيـس الناس تتحرك
ممكن لو مت في انفجار ارهابي أمريكا تحتل البلد ونخلص بقى ونجيب من الآخر

ممكن يظهر اسمي في شهداء الأوتوبيس اللذين غيروا مجرى تاريخ الوطن

انما لو مت موتة عادية آخري هيظهر اسمي في شهادة الوفيات

nona said...

يا ابو حميد بطل تفكير لحسن كتر التفكير لوحدة بيقصر العمر
و هتفرق كتير ماكلها موتة يعنى قولى هنعمل اية لو موتنا فى قطر و الا فى البحر و الا حتى فى السرير المهم اننا نموت و يكون اخيرتنا الجنة لان كدة يبقا نار فى الدنيا و نار فى الاخيرة
ربنا يجمعنا جميعا فى جنات النعيم
و ربنا يبارك فى عمرك و تشوف احفاد احفادك