خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Sep 12, 2008

!!! خالو أحمد .. الطباخ

من خواطر رابع يوم رمضان
طبعا انا مش من عادتى اتكلم عن نفسى
وعن عبقريتى وقدراتى الفظيعة بالذات القدرات الغذائية
فى عمل أكل شهى بديع عجيب
انما انا - بعونك يارب - ظاهرة ما اتكررتش منذ فجر التاريخ
ومنذ الدولة الفاطمية ومنذ الامبراطورية اليابانية القديمة
وامبراطوريات ماوراء النهر

طبعا من أول رمضان وانا وحدى فى المنزل لأن الفامليا عند المخلولة الجديدة

ودى طبعا كانت فرصة ذهبية لأثبت لنفسى - وللأخرين - قدراتى الغذائية العجيبة
وبمجرد ما إنفردت بالمطبخ حتى انطلقت كحصان جامح واشتريت كميات مهولة من الخضار واللحمة والبيض والفواكه والعطارة وعسكرت فى المطبخ


أول يوم رمضان
المكرونة تمام التمام حاجة روعة طعمها شبه المكرونة بالظبط
وعملت صلصة جبارة .. بصل وطمطام وملح وتوابل انما ايه وااااو
صحيح كان لونها غامق شوية لكن جامدة
واللحمة خرافة متشوحة كدة وريحتها ايه فظيعة
وللا السلطة واااااو طول عمرى فنان ومبدع
والمغرب قالت الله أكبر وفضلت اكل لغاية ما العشا قالت الله أكبر من حلاوة الاكل
بعد الفطار فضلت مبنج كدة وحالتى ميئوس منها وعندى حالة إمساك شديدة أعقبها حالة إسهال شديدة ثم حالة نوم وخطرفة ثم انتفاخ


تانى يوم رمضان
صممت إن الأكل اللى بعمله حلو وعزمت مجموعة من أصدقائى
وعملت حاجات كتيييير شبه الطعام بالظبط.. طبيخ ورز ومكرونة ولحمة وسلاطات وحاجات كتير
وأكلو من الأكل اللى عملته
بالليل قبل السحور حاولت اتصل بيهم لكن التليفونات مقفولة
تقريبا لسه بيصلوا التراويح


تالت يوم رمضان
قررت إنى آكل برة أو اجيب أكل من برة
لا طبعا مش انهزام أو لإن أكلى وحش لا سمح الله
لا طبعا
بس نزولا على رغبة الجيران
ورغبة والدتى الغالية اللى بتخاف على تعبى


عموما كانت تجربة مفيدة جدا لشيف ممتاز زيى
اكيد طبعا الانسان الماهر بيتعلم من التجارب دى عشان يحسن مهاراته

وبردة لازم انقل لكم خبراتى وتجاربى - لازم تتعلموا منى
امال
لو ماكنش الناس ذوى العلم والخبرة أمثالى يكونو منارة للناس اللى حواليهم يبقى على الدنيا السلام
لذا قررت انى اكتب ملاحظاتى اللى طلعت بيها من أربع أيام رمضان


أولا : إن قلى البيض بالبسطرمة لا يفضل فى أطباق بلاستيك
ويفضل قليها فى أطباق معدن وبكرة ان شاء الله هجرب الاطباق الصينى وهقول لكم النتايج إن كان لينا عمر

ثانيا :إن عمل الكاتشب فى المنزل غير مستحب ويفضل شراءة من برة حيث انه يحتاج لكمية ضخمة من الشطة على البيض عشان يحمر
وبعدين طعمة مش بيبقى حلو زى بتاع برة مش عارف ليه

ثالثا : ان البتاع الابيض ده اللى بيبقى على المكرونة بالبشاميل من فوق مش بيبقى زبادى زى ما كنت فاكر

رابعا : أن المكرونة مش مهم تبقى كل مكروناية لوحدها
لكن ممكن تبقى مكعبات او كتلة واحدة كبيرة ويتم تقطيها بالسكينة مع أخذ بؤ صلصة ورا كل حتة عشان تبلع.. عاااااااا اهئ اهئ

خامسا : إن شرا الاكل من برة حتى لو من عند حسن كوليرا وعبدة تلوث هيبقى صحى اكتر من الاكل اللى بعملة

وإلى لقاء مع يوميات أخرى من يوميات رمضان

خالو أحمد الطباخ

94 comments:

مهندس مصري said...

هههههههههههههه
مش للدرجة دي
لا اكيد بتعرف تقلي في القلاية - الطاسة يعني - ماوصلتش للاطباق الصيني

ثم الموضوع يتاخد خفيف خفيف مش اول ما تطبخ تبدأ بديك رومي
إبدأ بالبيض و انت طالع
ثالثاً انت متالق كالعادة يا أحمد ما شوفتش اللي انا باعمله هنا مع زمايلي في طبخ الاكل
عيشة العزوبية صعبة يا بني

MaGn0liA... said...

ههههههههههههههههههه

يا عينى

ايه يا خالو بس

:D:D:D:D

معلش بكره يرجعوا البيت و ربنا يرحمك و يرحم صحابك من اللى انت بتعمله

معلش مش تزعل عادى

:D:D:D

يللا خيرها فى غيرها

سلاامات

Oss said...

لا يا خالو
انا عايز اتعزم عندك
وبعدين ابقى آخود كورسات طبيخ
اصلى ماليش فيه

هما صحابك دول تعبه قوى؟
:))

كل سنه وانت طيب

صحيح باقوللك ايه
لاقيت فى الزقازيق محل كبيييييير جنب محطة القطر اسمه "أولاد أحمد الصباغ"
كنت عايز ادخل اسألهم خالوا هنا ؟؟
:)
سلاموز

Ahmed Al-Sabbagh said...

مهندس مصرى

ياريس البيض والحاجات دى للمبتدئين
انما الخبراء امثالى لا

Ahmed Al-Sabbagh said...

MaGn0liA

ابدا

لازم اثبت للعالم عبقريتى الغذائية

:(((

والنبى ادونى فرصة

Ahmed Al-Sabbagh said...

oss

ههههه
شوفت يا بنى انا استثماراتى فى كل مكان فى مصر

ِِAdem El-Mahdy said...

مش تدوقنا يا عم تليفون صغير و نجيلك

Dr.ELsonpaty said...

la ana lazem agy a5od dars 5ososy 3andak

enta 3aref . . .

el-akla el-7elwa matet3awadsh

:D

FreeKiller said...

هههههه
حرام اللي يتعمله ف نفسك ده يا خالو

طيب عملتها ف نفسك
ضروري تعملها ف الغلابة أصحابك
و للا عشان يبقوا معاك عالحلوة و عالمرة يعني

:(

و بعدين كان لازم تعمل حسابك و تحجز لهم ف مشتشفى خمش نجوم بحالهم

قبل ما تخليهم يقدموا عالخطوة الجبارة دي


تعيش و تاكل غيرها يا خااااااال

سفروتة said...

ههههههههههههههههههههههههههههههههههه

الحمد لله انك عايش لحد دلوقتي يا خالو

بقي زبااااااااااااااااااااااااااااااادي بدل البشمل

هههههههههههههههههههههههههههههههههههه

ابقي طمنا علي اصحابك
:))

بنوتة مصرية said...

امساك واسهال
لا حول ولاقوة الا بالله
عموما فى حاجة اسمها دليفرى ارحملك من دة كله
رمضان كريم وياريت متكررش التجربة لتانى مرة لانى اى محاولة تانية معدتك بجد مش هتستحمل
اه صحيح انت قلتلى ان الفومليا سابوا البيت وكانوا عند المخلولة الجديدة
اية المخلولة دى بجد عشان اول مرة اسمع عنها ولادة جهل منى

علي أبوطالب said...

بس يكفيك شرف المحاولة يابو حميد :)

nona said...

لية كدة يا خالو دة حتى احنا موصينك انك تجيب الاكل دليفرى من برة
و اول ما تعمل مكرونة بالبشميل دة الواحد قاعد سنين على ما اتقن دخول المطبخ و انت من اول دخلة تبدع كدة
و الا صحيح قولى اية اخبار اصحابك دلوقتى فاتحوا التليفونات و الا لسة ابقا طمنئا عليهم
صحيح هو نوع جديد من المكرونة الاى بيتقطع دة بالسكينة و الصلصة بتشرب
ابقا ادينا الوصفة عشان نجربها فى حد بنحبهم قوى قوى قوى بس حب من نوع خاص طبعا كلنا عارفين
صحيح ناوى تعزمنا امتة عندك يا خالو عشان طبعا نجرب اكلات الشيف خالو احمد

بنوتة مصرية said...

خلاص يااحمد عرفت يعنى اية مخلولة لما قرتلك كتباتك
مبروك يااحمد

saso said...

رابعا : أن المكرونة مش مهم تبقى كل مكروناية لوحدها
لكن ممكن تبقى مكعبات او كتلة واحدة كبيرة ويتم تقطيها بالسكينة مع أخذ بؤ صلصة ورا كل حتة عشان تبلع.. عاااااااا اهئ اهئ


ههههههههههههههه مش ممكن بس تصدف فكره لطيفه جداااااااااااا ههههههههههه اكتلا الملحوظات اهميه وتلقائيه وواقعيه ....

ربنا يصبرك على اكلك والله ...

نور said...

ههههههه

ما شاء الله

حضرتك فكرتني بنفسي لما كنت صغيرة .. وأول مرة مسكت القلم .. كل الحروف كانت بتطلع حاجة واحدة

لولا الفشل ما كان النجاح

استمر يافندم .. وفقكم الله

وبإذن الله المرة الجاية متعملش البيض في طبق بلستك .. اصله غير صحي

Rehab Mostafa said...

ايه؟؟؟ طبق بلاستيك على النار ومكرونه بالزبادي ومكعبات
يانهار أبيض
ومش عايز يجيلك مغص الحمد لله انها جت على أد كده
ايه اللي بتعملوا ده ياخالو بس سيبك من الطبيخ والكلام ده ... وكمان بتعزم اصحابك ... هما لسه اصحابك ولا ايه
روح افطر معاهم أحسن من العذاب ده كله

بت خيخة وأى كلام said...

هههههههههههههههههههههه

والله انت عسل يا واد يا أحمد

كل سنة وانت طيب

اختك خيخة

Rannon said...

هههههههههههههه
بقالي كتير مضحكتش كدة
جرب تاني إوعى تستسلم يا خالو :D

تحياتي :)

Ahmed Al-Sabbagh said...

ادم المهدى

مابلااااااااااش يا ام بدوى

Ahmed Al-Sabbagh said...

Dr.ELsonpaty

احم احم

طبعا طبعا

انا عارف لازم اعلمكو وافيدكو من علمى الغذائى الوفير

Ahmed Al-Sabbagh said...

FreeKiller

هههههههههه

هما كدة العباقرة امثالى مش بياخدو حقهم

ومش بيتقدروا

Ahmed Al-Sabbagh said...

سفروتة

لأ طلعت مش زبادى

طلعت حاجة بيضة تانية

Ahmed Al-Sabbagh said...

بنوتة مصرية

واضح ان بقى عندنا اتنين بنوتة مصرية

رودى وانتى

يا بنتى انا معدتى محصنة ضد اسلحة الدمار الشامل اللى بعملها فى المطبخ

Ahmed Al-Sabbagh said...

على أبو طالب

يارافع معنوياتى ربنا يكرمك

Ahmed Al-Sabbagh said...

nona

ههههههه

أصحابى أختفوا فى ظروف غامضة

ياللا



كانو طيبين

Ahmed Al-Sabbagh said...

بنوتة مصرية

طب مش عيزالك مخلولة هدية

ههههه

FreeKiller said...

ماشي يا خال

بس مستنيين نتايج التجربة بتاعت الأطباق الصيني

اعمل جدول كده بالصلاة عالنبي
و اديني الخطوات و الادوات و المشاهدة و الاستنتاج

Ahmed Al-Sabbagh said...

saso

يا بنتى انا موسوعة علمية غذائية مفتوحة

بس انتو استفيدو منى

وابقى اقرى قسم المكرونة فى الموسوعة

Ahmed Al-Sabbagh said...

نور

شكرا يا مبدعة

فعلا انا لقيت ان الاطباق البلاستيك طعمها بيغير الاكل

:))

Ahmed Al-Sabbagh said...

Rehab Mostafa

ايه يا رحاب

هما كدة الناس مش بتقدر المواهب
مش عشان ما اخدتش بالى وقليت البيض فى طبق بلاستيك يبقى خلاص
ده مجرد سهووو

ههههههه

Ahmed Al-Sabbagh said...

بت خيخة واى كلام

بس انا زعلان انك مش جاية بكرة

اكتر من حزنى على المكرونة


عااااا

Ahmed Al-Sabbagh said...

rannon

اى خدمة ولو تحبى أأكلك من الاكل اللى بعملو

انا تحت امرك

نياهاهاها

Ahmed Al-Sabbagh said...

FreeKiller

حاضر عيونى

بفكر افتح قناة تليفزيونية عشان الناس كلها تستفيد من خبراتى الغذائية

Sourah said...

هههههههه

دا انت لخبطت الدنيا يا خال ..
كويس انك لسه و لله الحمد على قيد الحياة و قدرت تكتب كمان ..

ابقى طمنني على الخوة المصابين بتوع الفطار بتاع تاني يوم ، ربنا شفاهم بالسلامة و لا مبلطين في المستشفى :)
على العموم الحق اتصل بمحامي و احكيله حيثيات القضية ، ينكن حد فيهم يروح يبلغ و لا حاجه :)

و اخر الكلام سلاااام !!..

Unique said...

ههههههههه

رغم التجارب الاليمة دي كلها لكن مافيش خوف عليك طالما اتعلمت اهم درس
إن شرا الاكل من برة حتى لو من عند حسن كوليرا وعبدة تلوث هيبقى صحى اكتر

بس والله حتى العك بيبقى حلو في رمضان
ولا يهمك اطبخ وبالهنا والشفا

Anonymous said...

احييك اخي الاستاذ احمد علي المجهود في المدونةو الموقع والعمل الخير والانساني جزاكم الله خيرا كل عام وانتم طيبيين مع من تحب ياسيدي

أسيرة الأقدار said...

كنت فاكر ان اللى فوق المكرونة البشاميل زبادى .. تيب كويس انك مش افتكرته كريم شانتيه والا كان هايجيلك فوق الامساك والاسهال تلبك معوى حاااد .. انا اللى صعبان عليا اصحابك اللى ياعيني لسة بيصلوا التراويح الله يكون فى عونهم ويصبرهم
ههههههههههههههههههه
نصيحة بئا يا خالو بلاش تغامر بحياتك وتدخل المطبخ تانى وربنا يرجعلك الفاميليا بسرعة علشان ينقذوا الموقف المتدهور ده

ojg said...

بجد مش ممكن يا أحمد
ايه يابني العبقرية المهلبية دي؟؟
وتقول انك مالكش في الأكل؟؟
اكتر حاجه موتتني ضحك
ملاحظاتك
ياريتك مالاحظت ياخويا
كنت سيبهم يفوتوا عليك
بس سيبك انت
الأكل حلو بالنسبة لأول مرة
وآآآآآخر مرة
:)

مهيج الجماهير said...

ههههههههههههههههههههه
المهم انك لسة عايش
امساك و اسهال فى نفس ذات الوقت
ههههههههههههههههههه
بس لسة فاضل كتير على رمضان .. هتعمل ايه ؟
:D

M.K said...

ذنب صحابك برقبتك....
ههههههههههههه
كلو ولا القلي بالبلاستك...
بجد متدخلش المطبخ ده تاني..
تقبل مروري..
مع تحياتي..

بنوتة مصرية said...
This comment has been removed by the author.
بنوتة مصرية said...

اية يا بنتى دى احنا هنهزر
يالا اهو دة اول انذر لو كررتها تانى مش عارفة ممكن اعمل اية فيك اية
ثانيا مخلولة اية اللى اعوزها
انا عندى 2 مطلعين عينى
لجين وريتاج
والله لو انت عايز تعالى خد قبل اما العرض يخلص
عقبالك يااحمد
وتغير المودنة من خالواحمد الصباغ لبابا احمدالصباغ

كراكيب عادل said...

للدرجة دي ؟؟

بص انت تخيل الطعم وامشي وراة هتنجح

لو مقدرتيش خلي حد يعلمك لان موضوع الطبخ دة زي العوم كدة هينقذك يا صديقي من حجات كتيييير هتقابلك بكرة

قلب مصرى said...

ههههههههههههههههههه
بجد ومن غير هزار أنا اتعلمت الطبيخ كده برضو لكن والحمد لله دلوقت بقيت أعرف أعمل حاجات كتير وبيطلع طعمها وشكلها حلو
كمل كده وهاتتعلم بجد إزاى تطبخ وهاتبقى ممتاز وافتكر الكلام ده

صاحب المضيفة said...

تسلم الأيادي يا فنان


طيب انت اتقدمت خطة عني

انا لسه يادوب مبتدء في عالم الطبخ يادوب باعمل فول وبيض بالعافية



:D:D:D:D


سلاماتي يا خال

صباح الصباح said...

بتفكرنى ببؤنامج المشهور اوى بتاع منى عامر

كان اسمة اية

كان اسمة اية

ضار ومميت

ههههههههههههههههه

Two in One said...

هههههههه والله انت هايل يا خال والمفروض تاخد لقب ماستر شيف علي الابداع ده
وتنزل كتاب الطهي ع الطريقة الصباغية
بس تكتب رقم الاسعاف ورا كل وصفة

هههه

كل سنة وانت طيب :)

عاشقة القمر said...

كل عام انت بخير والشعب مصر كلهم مش كويس جدا انيك فكرت تدخل المطبخ مالو احد يتعلم هو انت ابن اختك مهند

عاشقة القمر said...

مولدة منهد عتمو همس

انا ودماغي said...

ههههههههههههههه
و الله انا هلكت من الضحك بجد الأكل صعب عليا أوى :(
بقولك حددلى معاد عشان آجى آخد عندك درس طبخ و نصيحة اخوية حاول تنزل كتاب عن الطبخ تعرض فيه خبراتك لان حرام المواهب الدفينة دى تضيع كدة و الناس تتحرم منها

و اصحابك بقى لسة بيصلوا التراويح و لا خلاص؟

WhItE HeArT said...

هههههههههههههههههههههههه ماشي ياخالو

بس ايه اللي خلاك بس تدخل المطبخ وكمان في رمضان

هههههههههههههههه

بوست لذيذ وعرفتنا معلومات جميله حقيقي

تحياتي

انى احبكم فى الله said...

تحياتى ليك يا خالو احمد الصباغ او يا احمد على المدونه الجميله لان فكرتها بجد جميله ولاقالب جميل والشعر اللى فوق جميل يعنى بجد بدون تعليق المدونه جميله واشكرك على المواضيع الطريفه والحلوة اللى انت بتنشرها

ضى القمر said...

ههههههههههه

أظرف حاجه انك جربت تعمل حاجات شكل الطبيخ ..

وجربت انك تاكل حاجات على شكل الأكل ..

أما الطعم فمش مهم ابداااااااااا
وبالنسبه لأصحابك عادى بصلة المحب خروووف ..

بس ياريتك عملت ليهم بصلة .. الا انك تقريبا ضرتهم ضرر ميتنسيش ...ههههههه

وبخصوص بقه المعلومات الهامه اللى خرجت بيها واللى ضفتها لينا ..

فأنا بصراحه استفدت منها جدااا ..
خاصة أن الباشميل مطلعش زبادى ..ههههههههه

بوست رووووووعه يا احمد

شفقة هانم واحسان بك said...

انت فين يا عم ماشى اللى ما بتفكر تعبرنى ولا نشوف تعليق واحد منك ماشى
احنا بنثبت اننا الاحسن وجينا اهو
بس بقولك ايه احنا عايزين نتعزم على العك ده اقصد الاكل الجميل اللى من صنع ايديك
شفقة

bosbos said...

طيب مافيش صور للوصفات الرائعة دى علشان اللى يفكر يجرب يعرف فى الاخر هيحصل ايه
هههههههههههههه

معلش معلش مفيش حاجة بتيجى بالساهل

نيجار said...

طبعاً دي أول مرة أزور مدونتك
وبجد مدونة رائعة
أما بالنسبة لموضوع الطبخ فالتجربة مش عيب وكفايه إنك إتعلمت وإستفدت من تجربتك حتى علشان لما تتزنق مرة تانيه تعرف تتصرف مع نفسك بس أرجوك بلاش تشوه الأكل الصيني وإذا كان نفسك قوي في أكل صيني في مطعم صيني حلو في سيتي ستارز وأسعاره حلوه جداًوممكن أقولك المنيو بتاعه أما إذا كان لازمن ولابد تحط لمساتك على الأكل ففي سبرنج رولز يعني فطاير خضار بالصيني بتكون مجمدة وما عليك إلا إنك تحمرهابس أما إذا أصريت علي الأختراع فإنت اللي عملت في نفسك كده

د/مروة المعداوى .....قباحة سابقا said...

كدا البت مها اختى شبطت و قالتلى ايه دا
انتو بتضحكوا علينا و بتاكلونا اكل تانى و لا ايه

و من ساعتها بتدبدب و بتقول انا عايزه من دا

منك للى كلت دراع جوزها
فتحت علينا فاتوحه
و ناويه تنفز وصفاتك

يادى وجع البطن و دلق الطبيخ
انت من انهارده محظورة مدونتك عندنا فى البيت
الواحد عايز ياكل ياخى
ابقى قولى و انا ابعتلك بدل متفضحنا كدا

تشااااااااااااووووووووو

زهرة الجنة (زهرة سابقا) said...

أيه يا عم أحمد اللي انتي عملت ده
بجد بجد حرام
أزاي واحد فز زيك يختفي عن عالم المأكولات
هههههههه
نصحية من أختك زهرة بجد بلا تدخل المطبخ تاني
أصلا معتقدتش اني في راجل بيعرف يطبخ
خليك في التدوين أحسن
ولو الظروف اضطرت لدخول المطبخ بلاش تأكل الأطفال من الأكل ده
اصلهم لسه شايفين الدنيا حلوة قدمهم
ههههههه

تحياتي ليك يا خالو أحمد

كيارا said...

ههههههههههههههههههههه


لالالالا تعالي عندي بدل الحوسه دي

عندي فطار انما ايه

بدل الحاجت الغريبه لا وايه المكرونه مكعبات فل بقي

كل سنه وانت طيب

الفاتح اليعقوبي said...

السلام عليكم
ماشاء الله ماشاء الله ياصباغ انت كده جبت درفها زي مابيقولوا

هو احسن حاجة تعملها انك قبل ماتعمل الاكل بتاعك وتعزم حد عليه
تكتب تحذير عليه
هذا الاكل غير مسموح لاصحاب القلوب الضعيفة ولايسمح به لاقل من سن 28 سنة

وربنا يوفقك ياصاحبي
كل عام وانت بخير
والسلام

Desert cat said...

البتاع الابيض اللى فوق البشاميل زبادى
زبادى يا احمد
مكانش العشم ياباشا للدرجة دى مش عارف الزبادى من بودرة التلك

عاشقة الاستقرار said...

بجد بجد حرام عليك اللى عملته فى نفسك ده

لا وايه كمان مش تعبت نفسك بس لا كمان اصحابك

بس عموما كويس انك جربت عشان متحاولش تطبخ تانى

وكل سنه وانت طيب

وبجد مدونتك حلوه جدا

تحياتى لك

سومه...مجنونه فى بلد عاقل said...

ههههههه يا متواضع
شوف يا صباغ يا ولدى هات انت بس الديك وسيب عليا السوا متشيلش هم المدونين لبعضيهم

عايش ولكن said...

ههههههه
بص كويس انك حاولت
النتيجه ايه بقا مش هتفرق كتير
كلو عند العرب صابون :))

Hosam Yahia حسام يحى said...

لئه بجد انتا كده بتظلم نفسك

انتا بتعرف تطبخ بس المووضع عايز ثقه

انا اخر حله رز عملتها حرقت 3 حلل

وبعدين استخبيت عشان ماما لو عرفت كانت هتخنقنى

عنوان البوست جااامد:d

Ahmed H. Melege said...

مدونتك جامده. وربنا يوفقك

عاقلة علي ارض الجنون said...
This comment has been removed by the author.
عاقلة علي ارض الجنون said...

هههههههههههههههه

طب قوللي و انا كنت جيت الحفله دي معاك و اهو نعك سوا احم احم قصدي نطبخ سوا

إبداع رهيب طبعا

خصوصا المكرونه الكتل دي :D

عجبتني :)

ههههههههههههه

صحيح

كنت عاوزاك ف حاجه مهمه جدا جدا جدا

بس في الاول اقرا آخر بوست علي نوته و قلم

ضروري :)

تحياتي يا خالو

مخلولتك

عاقلة علي ارض الجنون said...

غلطه إملائيه كالعاده :(

متنساش نتكلم فيه موضوع مهم أوي

تحياتي للأطباق البلاستيك :)

اللي أصبحت في خبر كان

ههههههههههههه

بجد بجد مش قادره أبطل ضحك

مخلولتك تاني -- أنا عارفه اني خيلتك بس مخلولتك و متقدرش تستغني عني بقي :P

mohamed said...

لا دانت شكلك شيف هايل فعلا لأ وايه عارف معلومات هايله انى البيض بالبسطرمة يفضل ميتعملش فى اطباق بلاستيك بس لو ملقتش الا هى مش مهم
ربنا يكرمك بعروسة تطبخلك عشان انا خايف عليك لتاكل صوابعك ورا الاكل الحلو اللى انت بتهببه ده

سلام

بنات صاحبة الجلالة said...

هههههههههههههه
فكرة جميلة بتاعه قلي البيض في طبق بلاستيك هجربها
واقولك النتيجة
انتظرونا بعد الاكل

تحياتنا

كريم بهي said...

خالو احمد الطباخ

زى حالاتى يابو حميد
علاقتى بالمطبخ = مشاكل

ربنا يرجعلك اللى سابوك
ويرحموك
وترجع من تانى
خالو احمد الصباغ


على فكــرة


انا موافق
على موضوع لقاء المدونين
بس قولى قبها بقتره معقولة عشان اجهز نفسى

اوك


تحياتى

كريم بهي

كريم بهي said...

احمد الطباخ

امير المدونين

تحياتى

وانا موافق على اللقاء دا
بس تقولى ايه نظامه
وفين
وامتى
قبلها بفترة معقولة
اوكى

ودا رقم موبايلى لو تحب
0181720551

كريم بهي

maioya said...

يعني البشاميل مطلعش زبادي :)
ومنكم نستفيد والله :d
ليه الاذيه دي بس
ده حتي رمضان كريم :P

Ahmed Al-Sabbagh said...

Sourah

المصابين حتى الان تقريبا بيصلوا التراويح
:(

Ahmed Al-Sabbagh said...

Unique

طبعا طبعا

:))

Ahmed Al-Sabbagh said...

Anonymous

ربنا يكرمك

شرفت المدونة وسعدت بيك

Ahmed Al-Sabbagh said...

أسيرة الأقدار

ابداااااااا

لازم اقدم رسالتى الغذائية فى الحياة

Ahmed Al-Sabbagh said...

ojg

هههههههههههههههههههههه

لا شوفتى ملاحظات متميزة

Ahmed Al-Sabbagh said...

مهيج الجماهير


ربك يسترها يا بنى

متهيألى الفطار يجوز فى الحالات دى

Ahmed Al-Sabbagh said...

M.K

دول شهداء زى بتوع الدويقة كدة

Ahmed Al-Sabbagh said...

بنوتة مصرية

هى يا بنتى دى بقت كلمة بطالة اليومين دول

وبعدين اكتبى بنوتة مصرية بشرطة

عشان كدة بتلخبط مع رودى

Ahmed Al-Sabbagh said...

كراكيب عادل


بص انت تخيل الطعم وامشي وراة هتنجح

تصدق جامدة اوى

Ahmed Al-Sabbagh said...

قلب مصرى

اه
انا حاسس ان كلها ربعميت سنة وابقى كويس

Ahmed Al-Sabbagh said...

صاحب المضيفة

فى طبق بلاستيك بردة ؟؟

Ahmed Al-Sabbagh said...

صباح الصباح


هههههههههه

الطبخ ضار جدا بالصحة

Ahmed Al-Sabbagh said...

Two in One

انا احط شنطة اسعاف مع كل وصفة

:))

Ahmed Al-Sabbagh said...

عاشقة القمر

ههههههه

انا مهند شخصيا

الا مين مهند ده ؟

Ahmed Al-Sabbagh said...

عاشقة القمر

؟؟؟؟؟؟؟؟؟؟؟

Ahmed Al-Sabbagh said...

انا ودماغي


اصاحبى شكلهم دخلوا فى التهجد والفجر

وومن said...

هههههههههههههههههههههههههههههههه

كل ده حصل في المطبخ الحمد لله لقيت حد بيطبخ احسن مني

كل سنه وانت طيب

عايزه اتطلق و said...

صباغ ...
يا صباغ..
انتا مش هتصعب عليا ولاا هقول الله يكون فى عونه..
ابتن ابتن ابتن.. انا هقول الله يكون فى عون مطبخكم وادواته على هذا التعامل التعسفى مع الادوات..
وانتا فى المطبخ لازم لازم تتعامل برقه مع الادوات يعنى بلاش الرذع والكسر اليى سمعته فى البوست وريحة الشياط خنقتنى ..شغل الشفاط..
ولا الطعم معدتتى بتوجعنى ..
احمدك يا رب ان الصباغ كل الاكل ده..
طبعا انتا عارف غلاوتك عندى..

وفاء بركات said...

كل سنه وانت طيب انا متهيألي بعد اللي قريته ده ىخليك خالو احمد الصباغ احسن وكفي الصائمين شر هذه التجربه الذيذه
زبادى ياأحمد
البيض بيتقلي في طبق بلاستيك
طمني علي العازيم اصحابك انا متهيألي انهم غيرو نمرهم
كل سنه ةرمضان وانت طيب