خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Oct 3, 2008

!المدون المزنوق

قبل ما يظهر بلوجر ويظهر التدوين الالكترونى
كنا بنعانى احنا شباب مصر
من غياب حرية الكلمة بشكل كبير
لأنك صعب تقول كلمة حق فى جريدة او مجلة وصعب الوصول لها
وانهاردة بلوجر إدانا مساحة حرية بلا حدود
تتكلم وتقول اللى انت عايزة فى اى وتستخدم المدونة بالشكل اللى تحبه
وحدود الحرية ... هى فقط ما يضر الاخرين
لكن غير كدة اكتب ما تشاء .. وافعل ما تشاء
واعتقد فى ما تشاء
وده الفكر اللى كان سائد اول ما دخلت التدوين فى الربع الاول من عام 2007م
لكن انهاردة واحنا فى اواخر 2008 الوضع اختلف كتير
الفكر السائد هو .. ان المدون لما بيكتب حاجة يبقى لازم نقول له ليه؟؟ وازاى؟؟
انت ازاى تكتب كدة ؟؟ وعشان ايه؟؟ وليه؟؟ وفين؟؟

المدون بيكتب فى السياسة وبيشارك فى حملات تضامنية
مدون عامل فيها مناضل وهو لو شاف عسكرى هيطلع يجرى

مدون بيتكلم فى امور بعيد عن السياسة
مدون عامل زى خالتى بهانة غاوى حكايات مش بيشارك فى مشاكل مجتمعة

المدون يحط صور ويحضر لقاءات ويشوف مدونين
ده مدون فاضى بيحب الشهرة والمنظرة وغاوى نجومية

المدون يدون من البيت ويخفى شخصيتة
ده واحد جبان مستخبى ورا الشاشة .. يقول ما لا يفعل

مدون يزور مدونات ويعلق ويشارك
ده مدون فاضى مش لاقى حاجة يعملها ومقطوع

مدون ما يزورش الا مدونات معينة وما يهتمش انه يكتب تعليقات
مدون مغرور منعزل متكبر فاكر نفسة من الصفوة

مدون يكتب عن الغير
فين يا عم الكتابة عنك .. انت عامل المدونة عشان تكتب عن الناس؟

مدون يكتب عن نفسة
ياعم فلقتنا .. انت فاكر نفسك حد مهم عشان تقعد تكتب عن نفسك

مدون يكتب عن ذاتة ووجدانة
مدون متعقد لازم يدخل مستشفى المجانين

مدون يكتب كتابات كوميدية ساخرة
مدون معرّضها وفرحان بنفسة ومتفاءل وخلية لغاية ما يتصدم

مدون بيكتب بوست كل يوم
ايه ياعم ومين فاضى يقرا لك كل يوم

مدون بيكتب بوست كل تلات ايام
ياعم ده انا كنت هنسى انك مدون اصلا

مدون بيكتب بوست كل اسبوع
ياراااجل .. انت لسه فاكر تكتب والله افتكرناك مت

مدون بيشجع على المشاركات الخيرية
عامل مؤمن وبتاع خير وهو ياكل مال النبى وتلاقية عايز يطلع بسبوبة

مدون بيكتب عن غرامياتة وحبة للشرب واللهو
اعوذ بالله فاسق منحل جاى يفسد اخلاقنا بكلامة الساقط

أصبح الفكر هو التفرغ لنقد الناس وتنصيب انفسنا حكام على الناس
مع ان فى الواقع لو الواحد تفرغ لعيوبة هيلاقها مش بتخلص

ونظرا لإنى لما عملت المدونة دى عملتها لنفسى
يعنى مش فاتحها سبيل
فبحط فيها اللى بحبه فى الوقت اللى احبة
بحب التصوير فتلاقى فيها صور كتير
وبحب الكتابة الساخرة فهتلاقى فيها محاولات للكتابة الساخرة
بحب الشعر والخواطر فهتلاقى محاولات ليا ومختارات لناس بحبهم
بحب المتابعة السياسية فهتلاقى فيها بعض تحليل للاحداث
هتلاقى فيها اجتماعيات وخواطر سياسية ووكلام جد وكلام هبل
وناس كتير والحمد لله تقبّلت الكولكشن ده بكل حب وتقدير

لكن اللى طالع لى فى البخت
ان كل شوية الاقى حد كاتب بوست او باعت لى ايميل او كومنت
بيرمى عليا كلام من اللى ذكرتة فوق
ده بيعمل كذا .. وبيعمل كذا ليه
وليه ما يكتبش كذا أو حتى يكتب كذا

فأحب أقول ان المدونة دى مِلك
مهياش ايجار جديد لمدة سنتين
وانى مش هشوف الناس بتحب ايه واكتبة .. لانها مش جرنان
لكن هكتب اللى يعبر عنى لحظة إمتطاء الكيبورد

والكلام ده مش على لسانى بس .. لأ
على لسان كل اصحابنا اللى دماغهم مليانة

نصيحة أخوية تدوينية
ما تسمحوش لحد يسرق منكم الحرية اللى ادهالكم بلوجر

أحمد الصباغ

44 comments:

محمد الكومي said...

ما زلت عند رايي

المدونة اداة شخصية يعني كل شخص يملك مدونة هو حر فيها انشالله يقعد يسب و يلعن فيها ليل نهار او حتى يحط افلام سكس عليها او يقلبها موعظة او يحوش فيها فلوسه حتى

و بما انها اداة شخصية فهي ملك للشخص وحده

و اداتك يا متابع ان تعلق اولا تعلق و مثلما الشخص حر في استخدام اداته حر انت في استخدام اداتك

عمرو عبد الباري said...

جزاك الله خيرا .. خالو احمد
فعلا المدونة بيتي على الانترنت ... اللي عاوز يقرأ يقرأ وكانه بيزورني في بيتي ... واللي مش عاوز احنا مخطفناش حد وحبسناه في المدون يعني... جزاك الله خيرا

FreeKiller said...

بص يا خالو
انا كنت قريت بعض التلقيحات اللي بتقول عليها دي
ومش عندك و لا عليك بس
لاقيتها عند ناس كتير
بس بقول لك ايه
من المستحيل ارضاء جميع الناس
و لولا اختلاف الاذواق لبارت السلع

و زي ما بيقولوا برضه
ده الناس اختلفت على ربنا

فطنش تعش تنتعش
و على راي احمد مكي
كبر الدي ووسع الجي

القافلة تسير و الكلاب تنبح

ايه كميه الحكم اللي نازلة من بقك دي يا بت يا كيلر زي الحنفية

؟؟؟؟؟؟؟؟؟؟؟

ما علينا
رغيت كتير

اه بالحق انا لاقيت الريدر عندي بيقول انك نزلت بوست اسمه انا بقيت وزير
و يعدين بيقول لي فشل بلوجر ف العثورع عالصفحة
!!!!!!!!!!!!!!!!!!!!

سلام بقى ورايا فرح عقبالك يا خااااااااال

kareem azmy said...

ههههههههههه
و الله برافو عليك بوست هايل
لخصت فيه كل الكلام اللي ممكن يتقال
و كمان عرضت مشكلة هامة
بيعاني منها المدونين

و انا معاك
و مش هسمح لحد يسلبني حريتي
و مدونتي مش ايجار

بحيك بجد على البوست الرائع

مصري بالغربة said...

احسن تعليق بصراحة واللي ما اقدرش اعلق بعد منه

هو تعليق الرجل فري كيلر ده

بصراحة دماغ صح

فعلا كبر الي ووسع الجي

( مع اني بصراحة ربنا مش عارف يعني ايه الدي ويعني ايه الجي ) هههههه

ولك تحياتي

وتحياتي للقاتل الحر المحترف

مهندس مصري said...

ما أنا قلت لك قبل كده إكتب ما يعجبك ما دام ما بتئذيش حد
و خليك فاكر دايماً قصة جحا و إبنه و الحمار
و لو مشيت ورا كلام الناس حتشيل الحمار في الآخر على دماغك و برضه مش حتعجب
:)
بس انا موافق على كلامك تماماً و معاك 100% إنت لخصت كلام كتير مدونين ياما عايزين يقولوه

إكتب و إستمر في الإبداع بحرية و ربنا يوفقك لكل خير
:)

عاشقة القمر said...

كل سنه وانت طيب والله بجد عجبني يوست رائع جدا
واحيك
عندنا مثلا بقول من تابع ناس مات هم
بجد ناس لو صارت تايعه ناس اهتعب زياده
نحنا لنا حريه نعمل اي شي تختار في بالنا
بجد بوست جميل اوي

mahasen saber said...

الله ينور عليك يا صباغ يظهر ان حفلة ام كلثوم وهيا بتغنى بنفسها قدامك
طلعت منك شئ حلو وبوست جميلكان مستنى يطلع...ايوه كده كلامك مضبوط مليون الميه ويا ريت كل غير معروف قصدى الناس اليى بتعلق بغير معروف طبعا
يقروا البوست ده ويتعظوا البلوج ده
بيبقى فضفتى الشخصيه صفحه من صفحات حياتى اكتب واسجل فيها اليى يعجبنى
حد حب يشاركنى اهلا بيه
حد شاف ان حياتى واليىفيهاعايزه الحرق زى المسرح القومى برضه اهلا بيه بس فى حدود الادب والموضوع زاد منه عن كده يبقا اهلابيه مره واحده لحد ما يبقا معروف يبقا اهلا وسهلا بيه خالص
برافو يا صبغ وتسلم كيبوردك
ماتسلفهالى شويه...

mahasen saber said...

اه انا قولتلك عيد سعيد
اكيد لا ...
شوف يا سيدى كل سنه وانتا بالف خير
وصحه وستر ...
ومخاليلك زيدين مش ناقصين بالرغم من المدعو تنظيم الاسره
ودايما كده يا صباغ من احسن لاحسن
ان شاء الله
وشكرا على الفيس بوك مع انى شايفه ان الاكونت الاولانى اقوى ومتماشى ومتعايش مع الواقع بس اسمى مش وحش برضه
شكرا يا صباغ على كل شئ
ربنا يكرمك ويسعدك ...
بعقد عمل فى جزر القمر...

hesham said...

عزيزى احمد

اولا احييك على شجاعتك فى تناول الموضوع ده اللى يعتبر شائك جدا بالنسبة لوسط المدونين اللى للاسف تواكب مع اتساعه و تشعبه ظهور عيوب و مشاكل فى علاقات المدونين ببعضهم البعض و ده لان وسط التدوين لما اتسع و شمل ناس كتير و انتشر التدوين بدأت تظهر فيه المشاكل الموجودة فى واقع مجتمعنا فى العلاقات بين الناس على عكس لما ابتدى التدوين يظهر فى اوائل 2005كان العدد اقل و الناس كلها تقريبا عارفة بعضها

صحيح زيادة عدد المدونين و المدونات و اللقاءات و التواصل بين الناس شىء فى منتهى الجمال و الروعة لكن مافيش حلاوة من غير نار لانه واكب كل ده ظهور لمشاكل جانبية تافهة و لكنها منغصة لجو ووسط التدوين زى الشللية و التحيز و النفسنة بل وصل الامر فى بعض الاحيان للشجار و التراشق على صفحات المدونات

ما علينا من كل ده

اى مدون من حقه ينشر اللى هو عايزه على اساس ان المدونة بتاعته و هو حر يعمل و ينشر فيها اللى هو عايزه و محتوى المدونة بتاعته هو حر يشكله زى ما هو عايز و ينشر اى مواد هو عايزها

لكن لازم نحط فى اعتبارنا نقطة هامة و هى ان مهما بلغت درجة الحرية الممنوحة لاى شخص فى نشر مايريد فى مدونته الا انه لازم يضع فى اعتباره عدة اشياء
(و انا بتكلم هنا فى العموم مش على حد معين)

اولا
ان فى ناس بتدخل تقرا اللى هو كاتبه فما يشطحش فى حريته قوى يعنى و يكتب كلام غير مفهوم لاحد الا له او يكتب حاجات شديدة الذاتية لان الموضوع لو كده يبقى يكتب مذكراته فى اى اجندة عنده و يريح و يستريح لكن طالما هو لجأ ان يحط الحاجة اللى هو كاتبها دى على الانترنت و يعملها نشر الكترونى او publishing يبقى هو كده مهتم ان يشرك الناس اللى بتدخل مدونته معاه فى اللى نشره و الادعاء بالحرية المطلقة و انى بكتب الكلام ده لنفسى بس و مش مهم عندى رايكوا ادعاء متناقض مع النشر الالكترونى ذاته

ثانيا
ان مفهوم الحرية فى التعبير هو شىء اساسى فكل منا حر يفعل ما يشاء طالما لا يؤذى احد نفسيا او معنويا و اكلما ازداد مقدار الحرية زاد معه مقدار المسئولية المترتبة على هذه الحرية

ثالثا
ان الانتقاد مافيش اسها منه..و سهل
جدا انك تطلع عيوب و سلبيات اى حد و تتجاهل ايجابياته و ده مش شطارة بل على العكس كما ان لدي المنتقد الوقت و الحماس لطرح و ابراز السلبيات و تلقيح الكلام ياريت برضه يذكر الايجابيات و يوضحها عشان ما يظلمش الشخص اللى بينتقده و نكلنا فى النهاية بشر نخطىء و نصيب و مافيش حد فينا معصوم من الوقوع فى الخطأ لان الكمال لله واحده


و فى النهاية اتمنى انك لا تتأثر بأى انتقادات غير موضوعية او اراء سلبية
(او نفسنة)موجهة ضدك و تستمر كما انت مستغلا مساحة الحرية كاملةو اللى مش عاجبه هو حر ما يبقاش ييجى المدونة تانى ماحدش ضربه على ايده يعنى

اسف للاطالة و لكن الموضوع يستحق

تحياتى و تمنياتى الدائمة بالتوفيق

اخوك هش

سومه...مجنونه فى بلد عاقل said...

يا مراحب يا مراحب شايفه سيره مستشفى مجانين
لالالا احذرنى يا خالو الا المجانين
لا المدونه مش بيتى المدونه الشارع اللى بلعب فيه ههههههه
لو بيتى مكنتش دخلتها :))

كراكيب said...

السلاااااامو علييييكم

ياااااااااه بقالي كتير ماجيتش هنا
ازيك يا خالو كدة عامل ايه ان شا الله تكون كويس وكدة وفظيع

بالنسبة بقى للتدوين بقى والبلوجات وكدة
بصراحة انا معرفش انا من غير بلوج كان هيجرالي ايه
شغل المنتديات كان بيخنقني بس كنت بحس ان هو ده اللي موجود علشان نعبر بيه عن اللي جوانا
بس ربنا يخليلنا عمو بلوجر يارب وينوله اللي ف باله ويباركله في عياله قادر ياكريم على المعروف اللي عمله فينا ده

وسيبني اقولك بقى كل سنة وانت طيب وبلوجك مفتوحة بحسك كدة يا خالو ياااااارب

miro el niro kwaniro

أسيرة الأقدار said...

بص يا خالو .. الناس كل ما بيعدى الوقت بيتغيروا ويقولك اختلاف الاجيال واختلاف الاذواق .. كل حاجة فى الناس بتتغير الا حاجة واحدة بسسسس

هى ان الناس مبيعجبهمش العجب وصدق "مهندس مصرى" لما قال المثل بتاع جحا وابنه والحمار

انت جبت المفيد .. البلوج بتاعك ملكك الشخصى اعمل فيه الى يعجبك وسيب بئا اللى يقول يقول .. لان مهما عملت مش هايبطلوا يقولوا لان دى نفوس مريضة اصلا

عبير حمدي said...

عيد سعيد علي الجميع يا رب
اتفق معك تماما و الي مش عاجبة ميدخلش المدونة 00تقبل مروري و تحياتي

مصــــري said...

يا خـــــــــــال

تسلم يمينك والله يا خال.
طول عمري بقول ان المدونة بتاعت كل واحد دي عذبة ابوه يكتب فيها اللي هو عاوزه بس في خطوط زي الدين مثلا.
واهم حاجة تقبل الرأي الأخر.

بجد يعني بوست في التمام.

تحياتي
أسامة

ابن حـجـر الـعـسـقـلانـى said...

التدوينة دى رااااائعة يا صباغ .. بجد حلوةحلوة جدا

كلام فى الجون

fashkool said...

استاذ احمد .. السلام عليكم .. كل عام وانت بخير .. انت بتقول اللى عايز اقوله .. الكلمه صعب قولها .. الصوره صعب نشرها .. لكن اكتب زى ما انت عايز .. وما تكتبش زى ما احنا عايزين .. انشر يا جدع ورزقك على الله وعايزين الكلمه ترن وتسمع .. امال ايه اللى ح يغير الا الكلمه والصوره ما هى دى اللى فى ايدينا .. هو احنا فى ايدينا حاجه تانيه وما عملنهاش .. عمالين نقول زهقانين وما حدش سامع كلامنا .. حنطق .. لكن ح نعمل ايه .. اللى فى ايدينا بنعمله.. نصيحه .. ما تسمعش كلامنا احنا احنا اصلنا خايفين وعايزين نشيلك الشيله .
اناقلت لك النصيحه وانت حر اكتب بقى وشيل عننا اللى احنا خايفين منه اصل احنا اصبحنا جبناء .
.

دعاء مواجهات said...

جميل

يا أحمد

فى الجوون بجد

وزى م قولت لازم يكون فيه حدود
ومعايير ذاتيه نابعه من الشخص نفسه

تحياتى ليك

fashkool said...

استاذ احمد .. السلام عليكم .. كل عام وانت بخير .. انت بتقول اللى عايز اقوله .. الكلمه صعب قولها .. الصوره صعب نشرها .. لكن اكتب زى ما انت عايز .. وما تكتبش زى ما احنا عايزين .. انشر يا جدع ورزقك على الله وعايزين الكلمه ترن وتسمع .. امال ايه اللى ح يغير الا الكلمه والصوره ما هى دى اللى فى ايدينا .. هو احنا فى ايدينا حاجه تانيه وما عملنهاش .. عمالين نقول زهقانين وما حدش سامع كلامنا .. حنطق .. لكن ح نعمل ايه .. اللى فى ايدينا بنعمله.. نصيحه .. ما تسمعش كلامنا احنا احنا اصلنا خايفين وعايزين نشيلك الشيله .
اناقلت لك النصيحه وانت حر اكتب بقى وشيل عننا اللى احنا خايفين منه اصل احنا اصبحنا جبناء .
.

fashkool said...

استاذ احمد .. السلام عليكم .. كل عام وانت بخير .. انت بتقول اللى عايز اقوله .. الكلمه صعب قولها .. الصوره صعب نشرها .. لكن اكتب زى ما انت عايز .. وما تكتبش زى ما احنا عايزين .. انشر يا جدع ورزقك على الله وعايزين الكلمه ترن وتسمع .. امال ايه اللى ح يغير الا الكلمه والصوره ما هى دى اللى فى ايدينا .. هو احنا فى ايدينا حاجه تانيه وما عملنهاش .. عمالين نقول زهقانين وما حدش سامع كلامنا .. حنطق .. لكن ح نعمل ايه .. اللى فى ايدينا بنعمله.. نصيحه .. ما تسمعش كلامنا احنا احنا اصلنا خايفين وعايزين نشيلك الشيله .
اناقلت لك النصيحه وانت حر اكتب بقى وشيل عننا اللى احنا خايفين منه اصل احنا اصبحنا جبناء .
.

FreeKiller said...

اسمحلي يا صباغ ارد ع الراجل مصري بالغربة ده
**********************

احسن تعليق بصراحة واللي ما اقدرش اعلق بعد منه

هو تعليق الرجل فري كيلر ده



الله يخليك يا باشا
بس كده تقنع الناس اني راااجل
مااااااااااشي

-----------------------------
بصراحة دماغ صح


مع انهم بيقولولي غير كده خاااااااااالص

------------------------------
فعلا كبر الي ووسع الجي

( مع اني بصراحة ربنا مش عارف يعني ايه الدي ويعني ايه الجي ) هههههه


الجي ترمز للجمجمة
و الدي ترمز للدماغ

----------------------

وتحياتي للقاتل الحر المحترف

تحياتي لك كمان يا باشا

مواطن مصرى نايم said...

لا فض فوك يا صباغ
على فكرة
انا بلوجى برضوا منوع جداااا
بس بيغلب عليه النقد الساخر
و محدش بيجبر اى شخص انه يزورك
اللى مش عاجبه يشرب من البحر
او ميدخلش تانى طالما هو فعلا مش بيحب يقرالك
عالم فاضيه فعلا
كل سنه و انت طيب
عيد سعيد

Shereen said...

ههههههههههههه فكرتنى جحا وحماره يا أحمد وانت بتعدد أنماط ال bloggers... سيبك... انشالله تكتب حيت يا فجل... دى مساحتك... فض فيه مخك بالطريقة اللى تعجبك

ست البيت said...

حاسة ان حد دايس على ديلي ومش راضي يشيل رجله
حنونو
نيااااااااااااااو
ما كانش قاصدي با بشررررررررررررررر
نياوووووووووووووووووووووووووووو
نيااااااااااااااااااااااااااااااااااااااااااااااااااااااااااااااااااو

soly88 said...

انت صنفت انواع المدونين ببراعه وخفة دم
واللى مش عجباه الباميه فيه كوسه

أحمد سعيد بسيوني said...

عندك حق في كل اللي قلته

ياسمين حميد said...

صح يا أحمد

فيا مَن تأذيتَ مما كتبتُ
فلا تقرأه
واذهب لغيري
لعلّ تحبّذ ما يكتبون
فـأنا لستُ أكتبْ لكَ
أو لغيركْ
بل لِذاتي كتبتُ
وأنتم – لِذاتكمُ – تقرأون

ADAM said...

السلام عليك يا خالووو

والله تسلم كيبووردتك

وتسلم إيدك

كلامك صح

كل واحد بقى عاوز يدخل يشوف اللي هو عاوزه

أو اللي يناسبه

ولو ملقاش ده أو حاجة مختلفة عن فكره

أو متناسبهوش

يبقى كإنه مأجر لك المدونة دي بعد ما ورثها عن جده الباشا

ويبقى ناقص يطردك من بلوجر

ويتدخل بمنتهى البرود يقولك لازم تحذف التدوينة دي

ما علينا

المهم إنك اتهربت من العيدية

بس بردو هقولك كل سنة وانت طيب


آدم

المخلول الجديد

عاقلة علي ارض الجنون said...

برافووووووووووو

بجد يا خالو انا كمان بقول زيك

المدونه دي بتاعتي مش بتاعة حد و اللي مش عاجبه يخبط دماغه ف أنشف سايت

و عجبتني أوي دي

لكن هكتب اللى يعبر عنى لحظة إمتطاء الكيبورد

و انا كمان أحلي حاجه الحريه اللي علي بلوجر

و بعدين فيها ايه يعني لما واحد بيعمل حاجه ميقدرش عليها ف الحقيقه .. مش يمكن دي البدايه ؟

و برضه بقول محدش ليه دعوه دي مدونتي و محدش ليه دعوه

اللي مش عاجبه ميقراش .. هو هنا و ف الحقيقه و لا ايه ؟؟
كلام الناس مبيعملش حاجه المدونه انعكاس شخصيه
بجد بجد برافو

يا خالو كان نفسي أكتب عن الموضوع ده بس خلاص بقي مش هنكتب عليه :D

خالو يتكلم .. نستني شويه بقي

:D

اه صحيح خصوصا موضوع بوست كل يوم ده ..
ووضع قواعد للتدوين انا ممكن اقعد شهر مبكتبش و ممكن اسبوع اكتب فيه بتاع 20 بوست

هو حد بيجي يحصل فلوس عليهم يعني !!

برافو يا خالو بجد

:)

مخلولتك

معلش جيت متأخره كل ما آجي أعمل كومنت البروسر يهنج

يظهر انه معارض ف الموضوع ده و لا ايه :D

sherif abdallah said...

بس واضح ان حد لسعك جامد قوي
علشان كدة روحت كاتب البوقين دول
وزي ما بيقولو اللي علي راسة بطحة

بص يا ابني الحكاية مش ان كل واحد حر يكتب اللي هو عايزة والكلام الانشا اللي بتقولة دة
ما دام انت تركت باب التعليق علي البوست مفتوح يبقي تستحمل اراء الاخرين
سواء عاجباك او لا
مش عاجبك تعليق الناس يبقي تقفل الكومنتات وخلاص
وتتحول الي مرسل فقط
لكن عايز تكون مرسل و مستقبل يبقي تسكت وتسمع ردود الناس ورايها فيك
والكلمة دي لكل واحد بيقول غير كدة
اذا اردت ان تكون المدونة عزبة ابوك فقط يعني تغني وترد علي نفسك
يبقي تقفل الكومنتات عندك
غير كدة الناس حرة تقول رايها فيك مادام في حدود الادب
يعني بمنتهي الصراحة يا اخ احمد
كثير من تدويناتك مغرقة في السطحية شوية او مغرقة في الشخصية
او ساعات محدش بيفهم انت عايز اية
يعني لما تكتب موضوع انك حرقت الطبيخ
انت متوقع الناس تدخل تقول اية يعني سايب التعليق لية مفتوح
هل تعتقد انها ظريفة او تصلح لكتاب ساخر مثلا
يا ريت تنورنا
وارجع اقول مادام ارتضيت تكتب حياتك الشخصية علي الانترنت وهي في الغالب لا تهم احد
ودي مش اهانة دي حقيقة غالبيتنا حياتنا الشخصية لا تهم سوانا
يجب عليك ان تتقبل نقد الاخريين
ولا تطلب منهم ان يجلسو كما التلاميذ المتذنبين يقراو عبقرية ما تكتبو بدون اهتراض

Hossam said...

سلام عليكم يا احمد
ازيك
كل سنة وانت طيب
وعيد سعيد

سها السباعي said...

اتفق معك ان هناك اشخاص هدف حياتهم الاوحد هو التريقة على خلق الله بجمل كالتي ذكرتها حتى في المواقف الحياتية اليومية وليس فقط بين المدونين

فقد تابعت العديد من المدونين فترة طويلة فبل ان اقرر عمل مدونة

واقرا اكثر مما اكتب او اعلق

واعتبر ان التدوين مشاركة الاخرين فيما اكتب وافكر

انتظر تفاعلهم وتعليقاتهم لاستفيد وارى اوجه اخرى للموضوع من زاوية غير التى اراها

اقرا موضوعاتهم وكتاباتهم لارى مشاهد في الحياه لم اكن اراها من قبل

تزيد خبراتي ومساحات تفكيري

طبيعي ان تكون اهتمامات الناس ومقاصدهم مختلفة

ويمكنك ببساطة ككاتب التجاوز عن الاراء التي تراها لا هدف لها الا السخرية والكلام الذي لا فائدة منه سوى الاستفزاز
وتتفاعل مع التعليقات المحترمة وان كانت نقدا او كانت مخالفة لرايك

ويمكنني كقارئ ان اتجاوز التدوينة التي لا تعجبني او لا ارى فائدة في استكمال قراءتها او في التعليق عليها سواء لي او لكاتبها
واتطلع الى تدوينة قادمة تتيح لكليلنا تفاعلا مفيدا وبناءا على اي وجه

تحياتي لك
وكل عام وانت بخير

قلب مصرى said...

الله عليك يا خالو يا جامد
بالظبط كده المدونات دى ملك المدونين واحنا لنا الحرية نكتب اللى احنا عايزينه مش اللى ناس عايزة تقراه

دمعاتي said...

المشكلة ليست في النقد
بل في المبالغه في النقد الغير موضوعي والاسراف فيه
على كل الاوضاع و الاشكال
وياليت من ينتقدون غيرهم ينتقدون انفسهم اولا
اتفق معك تماما
فما اعطانيه جوجل لن تسرقه الحكومه مني ولا حتى حفنه من المنتقدين

تحياتي

أبو أسامة - مدونة كباية شاي said...

أبدأ من النهاية فأقول أن الحرية لم يعطها لنا بلوجر ولا وورد بريس ولا حتى ماي سبيس ولكن الحرية نحن ( المدونون كل المدونين ) صنعناها بأيدينا وانتزعناها انتزاعا بدليل الاعتقالات التى تمت لبعض المدونين بسبب انتماءاتهم التدوينية وليس التنظيمية مثل عبد الرحمن فارس ومحمد رفعت .
بعد ذلك يبقى أن أذكركم بالقصة الشهيرة
جحا والحمار وإبنه

كل عام وأنتم بخير

mahasen saber said...

ارد انا بقه على الخ اليى اسمه شريف عبد الله..
اولا كل سنه وانتا طيب..
ثانيا انتا بتقول انك هتنقد بمنتهى الادب انا بصراحه مشفتش اى ادب فى الموضوع يعنى لما سيرة ابوه وعزبته تدخل فى الموضوع فين الادب دى حاجه
حاجه تانيه اى كلمه المدون بيكتبها بتشكل اهميه بالنسبه ليه يعنى طبيخ اتحرق لبس القميص الصبح بالمقلوب مش مشكله المدون يكتب اليى يكتبه طالما بيعبر عنه او عن غيره المدونه تشيل من الموضوعات ما تشيل ..
باب التعليقات يتفتح يتقفل شئ مش يخص حد غير لمدون
انا وغيرى وغيرى لما نكتب عن شئ يخصنا او حدث يومى مرينا بيه احنا بنكتب عن نفسنا وانا لو صفحة الويب او مدونتى مش ساعتنى وشالت ترهاتى ومن كويس وغير ايه تانى هنفث فيه عن حياتى ومشاكلى وضغوطى وافراحى
يعنى نهاية الكلام ...كل مدونه هيا كشكول مذكرات شخصى للمدون يكتب فيها سياسى اجتماعى تاريخى شخصى
هو المسئول الاول والاخير
انتا بقه سيادة المتلقى عجبك المحتوى تدخل وتنور بالتعليقات بس من غير ما تسخر من اليى مكتوب لانها مشاعر بشر ونا بتحس
ومن غير ما تشتم لان اهالينا ربونا وكبرونا مش جزائم تيجوا تشتموهم فى الاخر...
يعنى الصباغ يتكلم عن مخاليله
يتكلم عن طبيخه
يتكلم عن نفسه او يكلم فيها
شى يخصه ويسعدنا اننا نشارك حد وافق انه يشاركنا فى يومياته يسعدنا اننا نشاركه فيها بادب
ولعلمك مفيش مدونه سطحيه ولاا سقفيه انا طالما حطيت مشاعرك بين ايدك واترجمت كلمات على الكيبورد يبقى شئ مهم ومهم جدا فوق ما تتخيل كمان..

الدائخ said...

المجتمع المصري بقي فيه داء غريب و مزعج .. ماحدش بيحب الحرية .. منين ما يتفتح منفس الواحد يتحرك فيه بحريته .. يتكلم و يقول و يعمل اللي هو عاوزه في حدود المعقول تلاقينا واقفين بالمرصاد و كأنه حرام .. حاجة تغيظ فعلاً ..

بس علي كل سيبك من كل الهطل .. ما دام مقتنع باللي بتعمله يبقي ما يهمكش ..

رحــــيـل said...

موضوع هايل ياحمد بجد

هى فعلا المدونه كده بيت كل واحد فينا هو ليه مطلق الحريه فيها
ويكتب فيها اللى هو عاوزه

انا كتير ناس كانت تفضل تقولى مدونتك كئيبه وليه الحزن ده
وميت مره اقووووول انا عمله مدونتى فضفضه
انا حره بقى اكتب اللى اكتبه

ياريت فعلا كل واحد يفهم كده ويعرف يحترم غيره مهما كان

أحمد مصطفى said...

انت مدعو لزيارة مجلة سيكولوجية مصرية


تحياتى
أحمد مصطفى

مصري بالغربة said...

تسمحلي يا احمد ارد على فري كيلر

انا اسف يا فري كيلر

انا كنت فاكرك رجل يعني معلش

بس بردوا كلامك عجبني جدا

وكبر الجي ووسع الدي

حلوة صحيح

Soul.o0o.Whisper said...

السلام عليكم و رحمة الله و بركاته

لا فض فوووك يا خالو
لالالالا ....قصدى
لا فضت كيبوردتك

أيوا كدا
كل واحد حر مادام فى منطقته و ماتعداش
منطقة شخص تانى

بس يا خالو
ساعات يعنى
ساعات
لما بيكون شخص عزيز على التدوين
و شايفه إنه مش مجرد مدون و بس
لا .... دا أصبح قدوة

إذن لما يكتب شئ كدا و لا كدا
ببئا زعلانة جدا
مش لشئ لكن لما حد بيعتبر الشخص دا قدوته
و بعدين جت حاجة فلته كدا
الشخص دا بتقل قيمته بالنسبة له

ولو أنا فى الموضع دا مارضاش دا لنفسى
فمش برضاه للشخص دا
و باحاول انى أقوله

لكن مش أبدا بدافع الانتقاد على الفاضى

لكن فى الآخر بردوا
دى منطقتى و دى كلمتى
و ليا حريتى فيها

إذن ليس لأحد أن ينازعنى فيها

بأشكرك جدا على البوست الرائع دا

و كل سنة و أنت طيب
مش بمناسبة العيد ..

لكن بمناسبة الرجوع للشغل من تانى
ههههههههههههههههههههههه



خالص تحياتى

A.SAMIR said...

ازيك يا احمد
كل سنة وانت طيب
عيد سعيد
كلامك في الصميم والله العظيم
طول عمري من ساعة ما بدأت المدونة عندي وانا شايف ان المدونة دي حاجة شخصية...زي شقتك بالضبط ماينفعش حد يقول لك تعمل ايه وما تعملش ايه
بس العجيب والغريب ان ممارساتنا في التدوين غريبة جداااااا
عموما انا عندي في الارشيف بوست عن الموضوع دة برضة
وان شاء الله اول ما هنزل البوست دة هدعوك للتعليق عليه
تحياتي

FreeKiller said...

اسمحلي يا خالو اقول بس حاجه

لمصري بالغربه

الاسف ممنوع و العتب مرفووووووع

و عشان تعدوا جمايل احمد مكي

هو بتاع الجي و الدي

ع.سالم said...

برغم إن البوست ده قديم أوي

(معرفش إيه اللي جابني هنا)

بس أنا متفق معاك جداً..كلام صحيح 100 ال100 !

تحياتي

___
3een-wants-to-see.blogspot.com