خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Oct 6, 2008

احنا بنات عائلات محترمات

مين قال اننا شعب متدين ؟؟
نفسى اعرف مين اللى أول من اطلق المقولة دى
مقولات نشأنا عليها وما نعرفش اى سبب وجيه لها
زى مقولة الطفل المصرى أذكى طفل فى العالم
وعمرنا ما شوفنا ولا قرينا دراسة علمية بتقول الكلام ده
يظهر ان دى مقولات بنألفها وبنصدقها

اللى فكر يخرج فى العيد ويركب والعياذ بالله المترو
واتوبيسات نقل عام ويروح ميادين
وجناين وحدايق
كان شاف وعرف وسمع واتأكد
اننا مش شعب متدين ولا حاجة

انا مش متعود اخرج فى العيد لكن تانى يوم رحت احضر حفلة فى ساقية الصاوى
وركبت المترو
وما ادراك ما المترو
شعب مصر بالكامل فى المترو وميدان التحرير وموقف الاتوبيسات
الظاهرة الغريبة والمدهشة والعجيبة
ان البنات فى العيد بتتهبل
ووبيلبسوا اللى على الحبل او يشتروا لبس بالقرش كله
وتلاقى اطقم بضى أخضر عريان وشفاف وبترتر بيلمع على بنطلون بنفسجى على جزمة برتقالى
على شنطة فضى
يعععععععععععع
وتلاقى كل شاب ساحب واحدة من دراعها
وفى المترو تلاقيه قافش فيها وحاضنها
قال يعنى خايف - بشهامة أهلة - ان حد يلمسها
لغاية كدة وعادى ممكن تقول شباب وبيفرح
العائلات بقى
لما تلاقى كام اسرة مع بعض امهات وابهات وعيالهم والبنات اخر قلة ادب ومسخرة
والشباب اخر صياعة وبلطجة
يبقى اكيد فى حاجة غلط
وان احنا مش شعب متدين ولا يحزنون
يعنى انا مثلا لما بكون مع اصحابى ممكن ارحرح شوية فى الهزار او الكلام
وان كان بحدود بردة
لكن مع اسرتى فى احترام زائد
متبقاش امى ماشية جانبى وانا بسب الدين لابن عمى
ولا قافش البت ووعمال اجيبها يمين وشمال
احنا سمعنا السنين اللى فاتت عن ظاهرة التحرش
الجديد السنة دى بقى ان البنات بتعاكس وبتتحرش كمان
وانا كنت هبقى ضحية .. فى الحتة اللى عند الاوبرا وانت داخل على الزمالك دى
ايوة الحتة العتمة دى
تلات بنات من امهات ترتر دول
بس الحمد لله ربنا ستر
والعينة دى كتييييرة وف كل حتة وف كل وقت
صحيح فى بنات محترمة ومؤدبة وتربية البيت
لكن اللى شوفتة فى العيد ده
أكد لى ان فى نسبة كبيرة مش تمام

والنبى ماحدش يقول احنا شعب متدين
احنا احسن شعب نسرف فى مشتريات العيد والمواسم
واحنا احسن شعب نوقف المصالح فى رمضان
واحنا احسن شعب يفتح ابواب خماراتة وكباريهاتة لزوار الصيف الحرّانين
احنا رعاة فن البورنو اللى جاى من لبنان ومن كل فجٍ عميق
واللى مش مصدق يتابع ميلودى وروتانا وافلام الموسم والذى منه
واللى بيفكر فى اجابة سؤال : هل احنا شعب متدين ولا لأ
يروح يقرا الاسئلة دى عند ملكة حسين
ويحاول يفكر ويجاوب عليها

وانا مش هخرج فى العيد تانى

53 comments:

مهندس مصري said...

المهم إنك سليم و الحمد لله
لأحسن لو واحدة من أم ترتر دول لمستك و لا خدشت حياؤك
كنت مش عارف حأعمل فيك ايه ؟
هههههههههههههههههههه :)

الحمد لله ربنا ستر

اما مين اكتر المتدينين و لا الصيع فده سؤال ملوش إجابة
بس ده لا ينفي إن نسبة المجاهرة بالمعصية كترت قوي

حمد لله على سلامتك

Soul.o0o.Whisper said...

احجز و بعدين أقرأ

سلام مؤقت
هههههههههههههههههههه

Medo said...

طب عينى فى عينك اللى يندب فيهم ترتر دول انت سبتهم ومشيت؟
قال ترتر قال

saso said...

ههههههههههههه

حلوه اوى حكايه البنات ام ترتر حاسب على نفسك اصل شرف الواد زى عود الكبريت ههههههههههه

البوست دمه خفيف اوى

انا اساسا بكره المترو ده كره العمى لانى الحمد لله فلاحه من المنصوره واليوم اللى بنزل فيه القاهره واركب اللمترو بيبقي يوم اسود

اخر مره جايه احط التذكره البتاع مش راضي يفتح واتزنقت زنقه هباااااااااب وفضلت اعيط من الكسوف والاحراج

ولا بقه جوا المترو يا سلام مش هزود على اللى قلته

كفيت ووفيت

عموما لازم تعرف ان انت اكيد اكيد ف مصر

يلا سلام بقه

بنت مصريه said...

يا بكاش مش هتخرج ف العيد تانى يا بكاش ههههههههههههههههههههه


والله يا احمد عندك حق ف كل اللى قولته بوستك دمه خفيف وواقعى

وده اللى بيحصل فعلاوالله
وربنا يعافينا ويعافيك والحمد لله ان ربنا ستر


بقولك ايه بعد كده ابقى خللى معاك على طول سيلف ديفنس
محدش ضامن الظروف
ههههههههههههههههههههههههه
سلاموز يا خالو

Soul.o0o.Whisper said...

بص يا خالو

فعلا اؤيدك ان شعب متدين دى شعارات
و طبعا الدلائل واضحة قدامك

و مش كدا و بس أدخل اى شات اسلامى و انت تشوف العجب من المصريين بالذات

هى بس نعرة فينا
بس يا خالو زى ماقلت طبعا ان دا ما يمنعش ان لسه فى ناس كويسة

المشكلة ان الناس دى بتنكمش على نفسها و مش بتظهر و شايفانا نشوف الوحش بس

أتمنى فعلا اننا نفهم
مش نبئا زى البغبغانات بنردد و خلاص


و بعدين يا خالو لو انت ماخرجتش فى العيد العيد يبئا ليه طعم إزاى ؟؟

هههههههههههههههههههههههه

ياللا الواحد ياما بيتعلم
و التعليم مابئاش مجانى خللى بالك



ياللا سلام

2ensan wnsan said...

حمد الله عالسلامه يا باشا من عملية ام ترتر دي ..

فعلا المتدينين قلوا في البلد والقله اللي تبان انها متدينه ( المقصرين والملتحين ) دول بيبقوا اصحاب تدين شكلي بس وللاسف دول كتروا اوي

واحنا مش شعب متدين ولا حاجه وبرضه مش شعب بلطجيه احنا شعب كوكتيل زي كل الشعوب عادي يعني

amr said...

هههههههههه

طرح رائع أحمد

وأنا هقتبس الجمله دى منك مع التعديل

لما تلاقى كام اسرة مع بعض امهات وابهات وعيالهم والبنات اخر قلة ادب ومسخرة
والشباب اخر صياعة وبلطجة

يبقى انت اكيد فى مصر

بس على فكره ربما التعميم هو الغلط فى كلمه احنا شعب متدين لكن أكيد مصر فيها ناس كتيررررر محترمين

بدليل وجود حضرتك وكل بلد فيها الكويس وال......

خالص تحياتى

mostafa rayan said...

بص يا احمد الدين عبادات ومعاملات
احنا بنعبد لكن مش بنتعامل كويس وتديننا مش بيظهر علينا لأنه اصلا فيه حاجات كتير غلط الشباب كله بقي تعبان رجالة وبنات فعادى تلاقي بنات بتهزر وبتلاغي ومافيش مشكلة
ربنا يستر بجد

مصري بالغربة said...

بس الحمد لله انهم معملوش معاك حاجة تانية

ولا خدوك حتة ضلمة كده ومثلوا فيلم المغتصبون

انت ما تعرفش ان فيه عصابة حريم

اسمها عصابة ام ترتر

الله يكون في عون سبابك يا مصر

Anonymous said...

http://zahrapharm2000.blogspot.com/2008/06/blog-post_24.html

حاتم عرفه said...

أحنا فينا كل العبر يا خالو..

بس بنركز فى حاجات غريبة فى أوقات غريبة
ربنا يحفظك من الترتر وأهل الترتر يا حبيبي

تحياتي ليك

ابو اعصار said...

ام ترتر دول يعملوا اي حاجا بس اهم حاجه ميخدشوش الحياء

فعلا يا خال ماظر تحزن والله واللي يحزنك ان الناس فاكرة الشعب المصري نازل معاه سجاده صلاه من بطن امه
واكتر مكان بسمع فيه سب الدين هو مصر

ربنا يستر ويهدي
بس انت واحشنا اوي انت انت والمدونين كم يوم وجايلكم

همس said...

اخخخخخخ ياااااااانى منك

محسسنى انك برئ فى النص


بتعمل دا كلو علشان نعجب بيك

خلاص يا عم اوعدك انى افكر فيك

متقلقش هديك فرصه

وبعدين بتتريق على البنات فى اللبس

طب ايه رايك دلوقتى فيه شباب ما تفرقهم كتير عن البنات اليومين دول

بص انا ديما اقول ان اليومين دول

الرجاله انقرضت فالحق ادارى باه


وبعدين كل مصيبه تقولو البنات متقلش ليه قلت ادب الشباب
وضحكين على البنات حتى لو كانت التربيه مش تمام هيبقى برضو المسؤل عنها راجل

حاجه تفقع

واياك اشوفك تجيب سيرة بنات تانى
سواء كدا ولا كدهو

رجاله مبتجيش الا بالعين الحمضه

سلام

ايه وكمان بترد عليا

Son of Egypt said...

السلام عليكم احمد

اولا انا احب ان اتشرف بتسجيل اول زياره فى مدونتك الجميله
وعلى فكره اللى شدنى اوى صورتك الموجوده مع المخاليل .. أيوه لأنك تشبه أخو صديق عزيز عليا واتصلت به وتأكد انك لست هو
نيجى بقا للموضوع
انا معاك ان فى سلبيات كتير جدا ولكن الإجابيات اكتر يا باشا
هقولك ازاى
انت بتقول البنات ام ترتر دول كانوا فى حته ضلمه انا اساسا مش عارف المكان
يعنى متخفين لأنهم عارفين ان اللى بيعملوا ده غلط وثانيا واسف انى اطول عليك
انت قابلت كام واحده محترمه وكام مش ومن الفلاحى مش من اللى فى الزلعه اكيد كلنا نعرف شكله ايه
اكيد المحترم اكتر اما بالنسبه للمترو بقا فكانت جاتلى دعوه من احدى المدونات انى اروح الساقيه ولكنهم لبعد المسافه إن ورتنى فسوف تعلم من اين انا وذلك كان فى رمضان عليا رفضوا علشان المترو بالزات
إن زورتنى فسوف تعلم من اين انا

تحياتى ومعلش طولت عليك ولكنه شرف لى انى ازورك واترك تعليق

أحمد الصباغ تشرفت بك
واسمحلى بزيارات اخرى دائمه إن شاء الله
nageh

همس said...

اه صحيح يا ابو حميد

نسيت اسالك

هو كان لون الترتر ايه
؟؟؟؟؟؟؟؟

هههههههههه

ojg said...

عندك حق اوي يا صباغ
انا بجد من سنين ماخرجتش في العيد
والعيد ده جالي مشوار مهبب
وخرجت
وعينك ماتشوف الا الالوان الهبله والمناظر المستفزة دي
ولقيت نفسي بجري أروح
وأنا بقول الحمد لله الذي عافانا مما ابتلى به البعض منا
ربنا يحرمنا برحمته يا صباغ

Summar said...

شفت التعليقات..محدش ماتكلمش عن الترتر:D
مفروض يغيروا علم مصر ويحطوا مكان النسر ترتراية
انا والله عندى احباط وزهقت من الكلام عن مصر ومساوئها...والشعب اللى مش متربي...المغرور المتأنعر
للأسف مافيش عندنا احترام
متعودين نخاف او مانخفش
لو خفنا هنتعامل كويس..ولو مخفناش هنتعامل بأصلنا
لكن مافيش تصرف اساسه الاحترام عندنا
حتى اللى بيظهر الاحترام بيكون فى الاساس خايف.
دلوقتى فى جرأة كتير حصلت..ومافيش طبعا احترام لأى حاجة ولا لدين ولا مبادئ
فبنتعامل بأصلنا..هو ده اصلنا يارأفت:Dعارف لو عملو قانون يجرمو فيه التحرش والله هتلاقى الناس ماشية زى الالف..

norahaty said...

السلام عليكم ورحمة الله وبركاته
الكلام دا اتقال قبل الاجيال اللى انت شوفتها دى ما تيجى بمعنى الدفعات اللى قبل كده ,اما دفعات المترو وخلافه فهى دفعات مهجنة (بالفيديو كليب لهيفاء وروبى ومن شابههن)ولا حول ولا قوة الا بالله
***هو انت رجعت حطيت المراقبة على التعليقات ؟مش كنت شيلتها؟؟

ملكة said...

وصلت هنا بمحض صدفة بس على رأي المثل يا محاسن..الصدف.. عينيا يابو احمد الصدف جاية في الطريق اهي :)

بص ياسيدي
العيد أساساً أنا اعتبرته مش بتاااعي خالص من زمان
اول يوم بضرب مشوار الصبح الساعة 10 وارجع بيتنا 2 الضهر ودمتم على كدة وحتى دي بقالي سنتين ماعملتهاش
أما ال3 ايام فبنحبس في البيت حبسة سودة بسبب اللي انت قلت عليه
ماتفهمش ايه علاقة العيد بالتحرش؟
يعني هل فيه سبب بيولوجي بيؤدي إلى هطل انصاف الرجالة دول عشان يعملوا كدة في العيد تحديدا؟ الله أعلم
وهل فيه سبب برضو ميكروبيولوجي بيخلي الناس تشرب خمرة وحشيش بالهبل من ليلة الوقفة لحد اخر ايام العيد؟
معنديش فكرة بس ممكن نسأل رئيس مجلس ادارة خمارة الأنس بعد ما يرجع من الصلاة في الموضوع ده

كله كوم بقى وحكاية البنات بتوع الضلمة دول كوم تاني
يعني اللي انا اعرفه ان اي شارع ضلمة وهادي هتلاقي فيه ولد وبنت بيذاكروا فيه كتاب الاحياء بتاع الثانوية العامة لبعض
انما بنت هي اللي تذاكر للواد وغزم عنه كمان؟!!
يانهار اثود..يانهار اثود
لأ بس عارف لو ماكانوش بترتر كنت شكيت في الأمر...وأكيد لو كنت انت ركزت معاهم شوية كنت لقيتهم لابسين جزمة حمرا بتلمع وحاطين 7كيلو مكياج في وشهم وماسكين شنطة اما حمرا أو فضي :)
أصل دي المواصفات المتعارف عليها في لبس العيد دلوقتي
واللي يغيظك يا مؤمن تلاقي الواحدة من دول لابسة بنطلون جينز وسطه واقع وهي اصلا مش اقل من 90 كيلو وعليه بادي فاقع قصير يادوب مغطي وسطها وكل البادي عامل جسمها طبقات من كتر الشحم وضيقة البادي ولابسالك حجاب مخرجة منه قصة على جنب وشعرها عاملاه ماشيت وضاربة طبعا الجزمة اياها الملونة الحمرا او الصفرا وماشية بجلالة قدرها هي و أمها الست الكبارة في الشارع تشد البادي على البنطلون كل شوية عشان عينين الرجالة الوحشيييين اللي تندب فيها رصاصتين!!
ويقولولك عنوسة وربنا يعدل للبنات كلها قال..ياخي الهي اللي تعمل كدة في نفسها ماتشم ريحة الجواز ابدا!

يلا بقى الواحد كان شايل ومفقووووووع

بس مشكرييين يا فندم على الاشارة للتساؤلات... يخليك لمجتمع مصر التدويني :)

¨¨¨°~*§¦§ Appyplanet §¦§*~°¨¨¨ said...

مش استاذ احمد قال يا ابنى احنا فى زمن كترت فيه مظاهر الاسلام وقلت فيه اخلاقه
اتنيل بقى ومتركبش المترو وبعدين انت بتصور ليه والله ما هتيجى الا لما واحد يدلك علقه اشوفها لك يا صباغوس يا محتايوس يا رب قول امين

قلب مصرى said...

بشكل عام المصريين بدأوا يفقدوا حاجات كتير بتميزهم زى روح الفكاهة والتسامح والتدين والتمسك بالاخلاقيات وبقينا فى انحدار اخلاقى عام كبير وسريع وده مش غريب على الظروف الاقتصادية والسياسية اللى بتمر بيها البلد لكن مع اول زنقة هتلاقى مصريين مختلفين عن بتوع العيد وهاتشوف مصريين بجد من بتوع زمان.

تامر الحسيني said...

هههههههههههههههههههههههه

الموضوع ده تحفة
بجد عندك حق والله
هو اولا الحمد لله بقضي العيد مع الاسرة في البلد
وربنا راحمني من الجو ده بتاع القاهرة في العيد

بس برضه النوع ابو ترتر ده متوافر قوي في كل حتة

مش عارف ايه اللوان والشكال الفجة دي
حاجة فيها بجد قبح

واخلاق المصريين
لن اتحدث عنها
فهي في غير حاجة لمن يظهرها
فاننا نراها تدني طوال الوقت
وبكافة الوسائل

تحياتي
تامر الحسيني
انسان عاشق حر

TATA said...

أنا الصراحة مش لاقية كلام .. حاجة تحزن فعلا ان يبقى الفساد علنا كده .. بس على فكرة لسه فى ناس ملتزمين كتير وناس متدينين .. بس دايما الشئ الوحش بيبقى فج أوى و بيشوه الصورة وبيخلينا ما بنعرفش نشوف الحلو

وشكرا على الموضوع ..

ست البيت said...

ما جبتيهاش حمرا ليه يا زوزو ؟؟؟؟؟؟؟؟
بني وبترتر ؟
عادي يا بني عاااااااااااااااااااااااااادي
وحجاب اشكال وألوان
مش احنا في عصر الالنفتاح ولا ايه؟
تقدر تقول لواحدة دا حرام
توديك القسم ومنه على ابو غريب يا باشا عدل
يا بني احنا بدل بنت تيييييييييييييييت
وستين تييييييييييييييييييييت
واقرا البوست الجديد
احنا شعب متنيل متاندل بستين داهية سودة
ولسه يا ما حنشوف لما احنا بلد الحريات .. الحريات
ولتلفزيون اللي مليان يا مزة ويا مكنة وخليها سينما صامتة
ومقضيها و
ايه سفن ايه بتاعت مكاوي
ولسه ياما حنشوف
وحيطلع عين اهالينا واللي خلفونا
لما فيلم واحد بتعرض على روتانا هانم قباحة
اسمه ما تيجي نرقص
يبقى أحمد مكاوى يرد عليهم
الهانم اللي بتحب تامر هجرس بتعمل كل حاجة يا جرعان على رأي سووو
باسم الحب
احنا شعب عوزة يتبعت الفضا
اسكت يا احمد احسن حفتح واتسحب على لا ظوغلي
بس الله يكرمك قلبت كل المواجع

مخنوق كيك said...

الي المدعوا احمد الصباغ

حبيب هارتي

انا دخلت ابص علي المدونة وخبط في الموضوع ده قلت اقراه واعلق عليه .. هعلق عليه افكاري مش هدومي متخافش

فعلا الشعب المصري اصبح تائه وفكره مشتت ومفيش مقوله راكبه عليه .. بغض النظر عن مين اللي راكب بس للاسف احنا شعب اصبح بيستخبي من كل حاجة وراء اي حاجة

يعني مبقاش فيه مبادئ معروفة عن الشعب المصري .. اصبح شعب فكرة مخربط كده ومفيش ملامح زي الفرخة المسلوقة

المهم يا مان انتظر مقولتي الجايه تعقيبا علي موضوعك ده

يللا يا عم عشان تعرف اني ديموكراتي

صحيح فين المدونة بتاعتي يا معلم ؟ بحثت كثيرا ولم اجدني .. اين انا ؟؟

بيس

كوارث said...

ازيك يا خالو
كل سنة وانتا طيب الاول
وكل سنة وانا طيب ثانيا
وكل سنه والبنات دول طيبين ثالثا
وكل سنة ومصر طيبة رابعًا
احنا زي الفل
سلامو عليكم

kochia said...

اه فعلا العيد مهازل
من غير شرح ولا كلام
كانه موسم للخروج علي العرف والتقاليد
ومش هقول الدين عشان ميصحش

تحياتي

smilyrose said...

كل سنة وانت طيب يا احمد

بجد ضحكتنى كتييييييير

وبعدين ايه حكاية اترتر دا

وبعدين مش كنت تاخد حارس خاص معاك

يا بنى انتو عملة نادرة الوجود

ولازم نخاف عليكم

المهم البنات دول كان عندهم زوق

هههههههههههههه

بس حد فيهم جه نحيتك اوعى

ممنوع اللمس او الاقتراب

يابنى قول على كل شئ يا رحمن يا رحيم


smilyrose

روح الحب الصادق

smilyrose said...

كل سنة وانت طيب يا احمد

وبعدين ايه حكاية البنات ام ترتر

ربنا يسترها

على فكرة ربنا يرحمنا برحمته

smilyrose

خمسة فضفضة said...

السلام عليكم ورحمة الله وبركاته

ازيك يا خالو كل سنة وانت طيب

اسمحلي اختلف معاك
لا احنا فعلا بلد متدين ونسبة المتدينين في تزايد بحمد الله وقارن بين دلوقتي وبين الستينات ولا السبعينات وشوف كم الناس اللي بدأت ترجع لربنا وشوف عدد الناس في المساجد وعدد الناس اللي بقوا حريصين علي العبادجات والسنن قبل الفروض
بس المشكله في ان الناس قليلة الادب هما اللي بدأوا يشيلوا برقع الحيا وبالتالي بدأوا يبانوا ويظهروا علي الساحه حتي لو كان عددهم صغير
وبيضخم ده ان الاعلام بيبروز الخبر ويكبره وكمان ده بيظهر اكتر في الاعياد والمواسم لانهم بيبقوا متجمعين في اماكن محدد زي مثلا السنيمات ووسط البلد وغيرها من اماكن الفسح المعتاده

زمان كان اللي بيعمل حاجه عيب او مخالفه للدين كان بيستتر دلوقتي ماعدش حياء ولا خشا وبقي اللي عاوز يعمل حاجه يعملها ومش مهم الناس اللي حواليه

عارف لو مثلا مصر فيها نص مليون او حتي مليون واحد وواحده من العينه اللي انت بتقول عليها دي برضو مايتعدوش حاجه ماتنساش اننا داخلين علي التمانين مليون

وربنا يهدينا ويهدي الجميع
آمين


سلام

engy said...

تدين ايه احنا التدين عندنا مجرد
منظر بس لا اكتر ولا اقل
بس الحمدلله انت رجعت بالسلامه
سلام

وومن said...

كل سنة وانت طيب يا احمد

الغريبة اني كل ما اقول لحد اني مش بخرج في العيد يستغرب جدا

كأن العيد مش هايبقي عيد لو مخرجتش في الزحمة والدوشة والتحرش بالقول والفعل والنظر

وبجد فعلا العيد دة فرصة لكل واحد يتحرر بطريقتة ويوقولك خارجين من صيام يعني الحسنات بتاعه شهر بحاله تضيع في يوم غير بقي المناظر اللي تحرق الدم
يحيا العيد في البيت لو كنت سألتني كنت هاقولك العيد ملوش غير البيت وطبق كحك وشوية ترمس

نهر الحب said...

اه
بص انا لى رأى من زمان اللى عايز يحترم نفسة ميخرجش من البيت فى العيد
سورى يعنى بس الخروج بالذات للبنات قلة قيمة ويمكن كمان قلة ادب وبهدله من غير داعى 00 زحام وتحرش وسماع الفاظ مش كويسة ومعاكسات على كل شكل ولون فانا بفضل القعدة فى البيت
ما عن البنات ام ترتر
فدا كل اللى عندهم استعراض جسد واحيانا يكون غير متناسق كمان لجذب نظر ابن الحلال واهو روشنة
يا احمد المحترمين فى بلدنا موجودين بس قليلين
تحياتى لك
وكل عام وانت بخير

نهر الحب said...

بما انك عامل اشراف على التعليقات
رجعتخطك ولا لاء؟؟

سمر الشافعى said...

ياعينى ياصباااااغ

كانو هيتحرشو بيك

لالالا انت ليك اهل صعايده يجطعوك جطييييع يابوى

خد بالك

GiGi said...

ممكن اتقمص دور جمعيات حقوق المراه
انت اساسا تبص لى البنات ليه مايلبسوا اللى هما عايزينه
واضح انك رجعى
انا عارفه انت زعلان على الشنطه الفضى ماهما مالاقوش شنطه دهبي بيلمع يعملو ا ايه يعني
وبعدين كل واحد يخليه فى حاله
نرجع بقى بجد
انت بجد انسان محترم بكل ماتعنى الكلمه وكل يوم بيزيد احترامى الزائد ليك
ربنا يكرمك وبجد بوست رائع

عاشقة الاستقرار said...

بدايه طبعا عيد سعيد وكل سنه وانت طيب

وانا معاك فعلا ان لبس البنات بقى صعب جداااا بصراحه انا بنت اهو ومعرفش هما ازاى بيسمحوا لنفسهم يلبسوا اللبس ده وكما ينزلوا بيه

بس مقدرش اقول غير انها اساسا تربيه بيت ودين المفروض يكون راسخ جوانا

بس انا عموما مش شايفه ان عدد المتدينين اقل بالعكس ماشاء الله فى ناس بتلتزم كتير جدددددا ولكن المشكله ان قصاد 10 ملتزمين مثلا هتلاقى 1000 واحد مش ملتزم

عموما ربنا يهدينا كلنا

تقبل احترامى وتقديرى

مصــــري said...

يا خـــــــال

الحمد لله ان ماحدش خدش حياءك
هههههههههههههه

المهم يا سيدي
انت بتتكلم في موضوع انا بقيت مقتنع بيه تماما.
الناس بقيت بتجاهر بالمعصية والبلطجة واللي يتكلم يبقي نهار ابو اللي جبوه منيل.

كفاية بقي عشان ماخبطش.

تحياتي
أسامة

mocca said...

بعيد على الموضوع خالص مش عارف اسلوب النقد ده فينا وإن إحنا كلنا بنعرف نسرد الوحش كويس جدا ونزوده كمان لكن مش كلنا بنعرف نسرد الحلو وكل واحد مبئاش عجبه حد ولا تسرف حد دا حتى اللى انا بكتبوا دلوقتى ده نقد طب ماكُل واحد وواحده يغير من نفسه اللى مش عجبوا لبس البنات ميبصش دا حتى الولاد كمان دلوقتى بتلبس هدوم اسخم من ابو ترتر اللى مسئط البنطلون واللى مبين ال....كده يعنى وشكرا ليك يا استاذ احمد
mocca

mocca said...

بعيد على الموضوع خالص مش عارف اسلوب النقد ده فينا وإن إحنا كلنا بنعرف نسرد الوحش كويس جدا ونزوده كمان لكن مش كلنا بنعرف نسرد الحلو وكل واحد مبئاش عجبه حد ولا تسرف حد دا حتى اللى انا بكتبوا دلوقتى ده نقد طب ماكُل واحد وواحده يغير من نفسه اللى مش عجبوا لبس البنات ميبصش دا حتى الولاد كمان دلوقتى بتلبس هدوم اسخم من ابو ترتر اللى مسئط البنطلون واللى مبين ال....كده يعنى وشكرا ليك يا استاذ احمد
mocca

prince4ever said...

ازيك يا خالو الاول
سبحان الله احنا احسن شعب يخرج من مود لمود تاني خالص في مدة قياسية...يعني العشره الاواخر من رمضان بيبقى الناس في حالة ايمانيه وروحانيه رهيبه و تحس انك في الجنه قولهم فيها سلام...واول يوم العيد يعني تاني يوم على طول بعد رمضان مش بعديه بشهر يعني...بنشوف اللي انت بتقول عليه....والله عندك حق في كل كلمة قلتها
اه بالحق...مدونتي اخيرا اتشرفت باضافة مدونة عظيمة لشخص عظيم زي حضرتك فيارب تقبل مني التحيه البسيطه دي
تحياتي
رامي...قصاصة ورق
مش التانيه

قلم رصاص said...

ههههههههههههههههههه

والله العظيم ياجدع الراجل ده بقول حاجات عجيبة
هههههههههههههههههه

الحمدلله انك بخير ياخالو
جت سليمه.. وبعدين ده لوكان حصل
موقفك يبقى ايه في الأمم المتحده طيب

ههههههههههههههههههه

والله ما انا عارف الشعب ده جرى له ايه
ربنا يهدي الجميع

تقبل مروري

صَاحبْ البَوَابْه ... الحٌريةْ بالمَجَــانْ said...

الدين تطبيق ولكى يتم تطبيقه لابد من فهم كنهه اولا ولأننا اصبحنا سلبيين فى ادنى مطالب الحرية ضاع منا كل شئ فلم نعد حتى ندرك ما نريد ان نكون هل نريد ان نكون متدينين ام كوول
أسأل نفسك اولا
؟

النجمة الصامدة said...

احنا مش شعب متدين

احنا شعب بيضحك على نفسه

وبيفهم نفسه انه متدين وتمام وزي الفل

لما البنات تملا المساجد في رمضان تراويح وتهج

وتصوم اتنين وخميس والستة البيض والستة المش عارف ايه

ورايحة جاية عاملة نفسها رابعة العدوية

وفي الاخر تلاقيها خارجة ببلياتشو في وشها وهدوم رش يدوب مدارية لون جلدها


يبقى فين التدين !!!

احنا بس بنحب نقول كلام يرضي ضميرنا ويحسننا اننا زي الفل واخر السطة
عشان مانتعبش

خلينا كدا


تحياتي ليك
مع ان دمي محروق

:D

hesham said...

عزيزى احمد

مقولة اننا شعب متدين و ان الطفل المصرى اذكى طفل فى العالم و غيرها من المقولات تنضم لغيرها من الاقوال و الافكار الغير معروفة الاصل و رغم ذلك نستخدمها و نستشهد بها فى حياتنا كانها بديهيات او مسلمات

فاصبحت مسلمات ابو جهل

و انا كنت كاتب بوست من فترة بنفس العنوان ده عن المسلمات و الموروثات التى نتوارثها و نقدسها دون اى سبب منطقى


اما عن الدين و التدين فقدجئت على الجرح يا صديقى

كلامك عن الدين و التدين يذكرنى بمقولة قرأتها لكاتب ما لا اتذكره الان عن ان الشعب المصرى اصبح شعب متعبد و ليس متدين بمعنى انه يهتم بمظاهر الدين و مناسكه الظاهرة دون تطبيق لجوهر الدين فى السلوكيات و التعامل
و من امثلة ذلك
الاهتمام بتأدية الصلاة دون الاهتمام بأفامتها او الخشوع فيها
الاهتمام بصوم رمضان دون صلاة او قرأة القرآن
ما يحزن حقا هو تحول الدين الى مجموعة من المظاهر و العادات مع انزواء الاهتمام بالجانب الروحانى و نسيان ان الدين معاملة فى الاساس


هش

اصحى يا مصر : اسلام ديو said...

اشمعنة يعنى الصورة بتاعت المترو دى
مكنت جبتلك صورة من ميكروباصات المقتبسة رمز تويوتا احسن

هههههههههه تحياتى ليك
اسلام ديو

عاقلة علي ارض الجنون said...

ههههههههههههه

و الله يا خالو بقت مهزلة .. أمال لو بيقولوا ان الشعب المصري غير محترم .. كان ايه اللي هنشوفه .. بس و الله فيه برضه ناس محترمه بس انت اللي حظك وقعك ف اليوم ده مع ناس مش ولا بد

تحياتي

ياسمين

أبو أسامة - مدونة كباية شاي said...

اهم حاجة يا خالو

انت تمام ولا إيه ؟

ههههههههههههه

والله عندك حق في كل كلمة قلتها
وأحسن حل في رأيي
إن كل الناس تقعد في بيوتها سنتين تلاتة مينزلوش الشارع في العيد لغاية ميتعلموا الأدب ولاد الفرطوس دول

قال شعب متدين قال ؟

ربنا يهدي الجميع

بدراوى said...

جامدة جداًَ يا خالو

بس بجد حاولوا يعاكسوك

ما تلاقيك كنت ضارب الجيل
على الشعر الحرير اللىعلى الخدود يهفهف
هههههه

يا خواتى عليه يا خواتى
انت فتنة لأى ست استخبى فى العيد
مش عايزين مشاكل
!!!

حزينه said...

حلوة اوى كنت انت الضحيه دى
والله مصر فيها حاجات كتير غلط
ربنا يرحمنا برحمته فى زماننا دة
على فكرة انا كمان مش بنزل فى العيد خالص
وانت كمان اوع تنزل
خلينا فى بيوتنا احسن لنا


حزينه

Romancia said...

للاسف عندك حق فى كلام كتير من الى قلته
الاهالى بقو بيفرحو بصياعه ولادهم
انا الحمد لله مبعيدش فى القاهرة خالص بسافر بلدنا
لكن والله شىء مقرف جدا المناظر الى بقت فى العيد وغير العيد
ولا ظاهرة التحرش الجديدة دى كمان
انا يمكن كنت بسمع عنها بس لكن لما شوفت بعينى واحدة منقبه بتتعرض لدة شىء غايه فى القرف والله كرهت النزول من بيتنا اصلا بس نعمل ايه بقى اكيد لازم نخرج عشان مصالحنا
انما بجد الايام دى مش محتاجة غير ان الواحدة او الواحد بقى مهى معدتش فارقه كلهم معرضين للقرف ميخرجوش من بيوتهم غير للضروره غير كدة
بجد
بيوتنا اولى بينا

Akhadiwi Rajie said...

It’s hard to find knowledgeable people on this topic, but you sound like you know what you’re talking about! Thanks
Lijit.com
Community.intuit.com
Pixarcarsdiecast.com