خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Oct 11, 2008

إزاى لما حد يتحرش بيكى.. تعجنية؟

التحرش الجنسى فى مصر بعد ما كان حادثة أيام فتاة العتبة وفتاة المعادى
أصبح ظاهرة أساسية فى المجتمع المصرى زيه زى التلوث البيئى وزى طابور العيش
شبكة اعلام مصرية نشرت موضوع لذيذ موت .. نقلا عن مجلة نسائية يابانية
بتوضح فيه لبنات حواء ازاى لما واحد يفكر يتحرش بيهم تقوم تاكلة العلقة التمام وتروقة
وقدمت المجلة بعض النصايح انك ما تلبسيش ملابس ضيقة او شفافة عشان المتحرشين ما يلاقوش حجة انهم بيتحرشوا
الغريب انهم عندنا دلوقت ما بيعتقوش لا محجبة ولا من غير حجاب ولا حتى منقبة
عزيزتى القارئة - ركزى معايا عشان نشوف تقدرى تدافعى عن نفسك ضد التحرش


أولا : لما تلاقى - المأسوف على عمره - المتحرش جاى منشكح وفاتح دراعاتة والانشكاحة تعلوا شفتاه وضارب شعرة جل ولابس الحتة الزفرة تقومى باصة له كدة بستهنة قال يعنى مش واخدة بالك .. يروح منشكح اكتر ومقرب وانتى واقفة متنحة بردو وبعدين يروح مقرب اكتر وانتى مطنشة خالص



ثانيا : اول ما يبقى بينك وبينه اربعة سنتى وخلاص هيحضن .. روحى موطية يروح هوا حاضن الهوا



ثالثا : أول ما يحضن الهوا .. ويبقى ريشة فى مهب الريح .. تقومى انتى بقى داعكة قورتك كدة لغاية ما تسخن وتحمر .. وتروحى رامية نفسك وترزعيه روسية .. تيجى فى دماغة .. تيجى فى دقنة .. تيجى فى حبابى نن عنيه .. هو وحظة .. زى ما تيجى تيجى



رابعا : صاحبك هياخد الروسية .. وعنيه هتلف .. وهينسى أسمة واحتمال ينسى نوعة .. تقومى انتى بقى وهو فى حالة الدروخة دى رزعاه شلوت فى اى حتة ربنا يقدرك عليها .. ده على الصعيد التحتانى .. اما على الصعيد العلوانى .. تقومى سنه سنانك كدة وتروحى أرماه - أرماه فى اللغة يعنى عضاه بغل شديد - فى دراعة



خامسا : صاحبنا بقى بعد الشلوت اللى فى المكان اللى ربنا قدرك عليه .. وبعد العضة التمام هيبقى عامل زى النخلة اللى بتولد .. شوفى انتى بقى النخلة اما بتولد بيبقى شكلها ايه .. هو النخل اصلا بيولد ؟؟ .. ما علينا وهو موطى وبيصوّت وبيسترجع ذكريات شبابة .. ايام ما كان عنده صحة ... تروحى انتى بقى رزعاه بوكس فى ضهرة وياحبذا لو لابسة خاتم عشان يوجعة فى ضهرة اكتر



سادسا : هيبتدى عم المتحرش يراجع نفسة ويحاول يوطى على رجليكى يبوسها .. تقومى انتى تعملى نفسك موافقة .. وبعدين تروحى مساكة راسة زى ما بتمسكة البطيخة .. وتروحى وعلى فجاءة رزعاه بركبتك فى وش اللى جابوه .. هيعمل صوت كدة : اتنننننننننننن



سابعا : صاحبنا المتحرش هيدلق كما شوال الخيار أو لنقل برميل طرشى ويبقى مهيض الجناح .. يعنى لقمة طرية لممارسة الجبروت والتجبر والديكتاتورية اللى انتى محرومة من ممارستها مع حد .. تقومى رافعة رجليكى كدة وياحبذا لو لابسة جزمة بكعب أو بوت حلو كدة وتروحى منولاه فى ضهرة



ثامنا : فى الاخر عم المتحرش مش هيبقى لا نافع طبلة ولا طار .. ولا حتى هينفع يبقى قطع غيار
وغالبا بعد كدة عم المتحرش ده هيقدم على سفر لبلاد برة

السؤال اللى محيرنى بقى
طب لما واحدة تتحرش بواحد .. وده بيحصل احيانا دلوقت
يعمل ايه ؟؟؟

45 comments:

~*§¦§ Appy §¦§*~ said...

وبعدها يا اختي تروحي القسم وابقى قبلينى اذا حد عتقك ولا نفع معاكي كل اللى اتعلمتيه ومتنسيش تحفظي قاموس الشتيمه كلها وانتى خارجع وذاكريه كويس

هههههههههه
انا عن الشق التاني يا عم توم كروز فمين دي اللى هتتحرش بتمساح هى هبله ولا ايه
وعمار يا مصر ويعيش الشبشب ابو ورده ويحيا السيلفن ديفنس وده النشيه الوطني لينا دلوقتى

مصري بالغربة said...

ايه ده يا ابو حميد انت بتحرض البنات ولا ايه؟

وبعدين مين ديه اللي هتعمل فيها زينة ولا هيركليز

ديه لو عيل صغير عنده عشر سنين مش هتعرف تعمل معاه اي حاجة ولا حتى شلوت هرلمز

هههههههههههههههههههههههههههههههههه

اي نعم البنات دلوقت بقوا عاملين زي معلمين المدبح ههههههه بس مش للدرجة ديه هيقدروا يعملوا كده يعني

وبعدين انت مش اول واحد ولا اخر واحد البنات بتتحرش بيه

لو تفتح المسألة ديه وتخلي الشباب يحكوا عن تحرش البنات بيهم هتسمع بلالاوي

ربنا يستر علينا منهم
ههههههههههههههههههههههههه

fashkool said...

باعتبار انك اول واحد زرت المدونه بتاعتى فانا دائما اتابع كتاباتك على مدونتك حلوه قوى حكاية البت العضلات بتاعة التحرش الجنسى بنت مانعه صحيح كمان اسعار المخدرات ح اخدها مقياس عشان ما حدش يضحك على لما نحكى عن اسعار المخدرات - اشكرك على زيارتك لمدونتى والتعليق على مقال مصطفى كامل وانا عامل موضوع عن الاسكندريه ح يشرفنى انك تقراه وتقول لى ايه رايك .. تحياتى لحضرتك..

أنسانة-شوية وشوية said...

هى اللي هتعمل الحركات اللي انت كاتبها دى يا احمد المفروض واحدة زينا ولا زى ستيفن سيجال ولا توم كروز والله انا كنت بفكر اشيل معايا اى سكينة او الرشاش اللي بيترش في العين يعمى بس مش عارفة اجيبه منين بس لا اعتقد ان اى واحدة عادية تعرف تقوم بالحركات دى
بس بجد جزاك الله خيرا

Anonymous said...

ازيك يا استاذ احمد .. موضوع جميل جدا
بس انتا كده عملت مشكلة للرجالة
مش حليت المشكلة للبنات
وارجوك اوعى تفهمنى غلط
انا اقصد ان الضرب ده هاتستخدمو مع جوزها اكيد
ولعلمك بئه .. اللى فى الصورة ده واضح انه جوزها
وابقى شوف بئه هانفهمهم ازاى ان الضرب ده مش علشان اجوازهم
مفيش تفاهم طبعا
هاتضرب يعنى هاتضرب
تحياتى
ع م ا ر

الباحث عن الحقيقة said...

تعبت نفسك ع الفاضي يا بو حميد
دول ما بيصدقوا حد يتحرش بيهم يابني
ماهو ده اللي فضل من الجواز
تحرش بس
هو مين ده اللي هيروح على واحده وهو فاتح درعاته يا حاج
وفين المساحة الفاضية اللي هتعمل فيها كل الحركات دي
ثم ان الجتت اللي في مصر مش بالرشاقة دي لا ستات ولا رجالة

بس انا مكنتش اعرف ان ثقافتك يا باني يا مستر ناشيونال

أبو أسامة - مدونة كباية شاي said...

السلام عليكم ورحمة الله وبركاته
كيفك يا خال .
ــــــــــ
1- كان الله في عون العبيط اللى هيحاول يعاكس واحدة بالشكل ده .
ـــــــــــ
2- قليلات هن من يستطعن أن يؤدين هذه الحركات ، أعتقد أن أدوات Self Defense أفضل بكثير .
ـــــــــــــــ
3- اللى هتفكر إنها تعمل كده تستحمل اللى هيحصلها .
لو كانت لابسة لبس مش ولابد : يعني الملزق والمحزق وال3.5 كيلو بودرة على وشها الناس هيسيبوا الواد اللى بيعاكسها ويتدوروا عليها هي يلوموها .
لو كانت لابسة لبس نص ونص ممكن تعدي وإن كان الغالب إن الظابط في القسم هيديها كلمتين في جنابها علشان ضربت الواد (جامد) .
أما بقى لو كانت لابسة خمار ولا نقاب واستطاعت أن تؤدي كل هذه الحركات فساعتها سوف يطلقون سراح الشاب البطل من القسم ويصدر لها قرار اعتقال بدعوى المشاركة في تأسيس وعضوية تنظيم محظور تم تأسيسه على خلاف القانون هو ميلشيات المعاكسات ( زي ميليشيات الأزهر كده ) .
ــــــــــــــــ
بالنسبة للسؤال الأخير يا خال :
في رأيي إن البنت اللى يحصل منها حاجة زي كده تبقى أزالت الفوارق الطبيعية التي حددها المجتمع وأصبح من حقي أن أضربها وأنا وائق إن الموضوع كله لن يزيد عن 3 أو 4 أقلام على صدغها ( وشها يعني ) .
ــــــــــــــــ
سلام يا خال

عصفور المدينة said...

أحمد البوست ده مبني على افتراض نظري موجود بس في أفلام الأكشن إن الطرف المضروب بيفضل مستسلم ويؤدي الدور اللي وصفه منسق الحركات

ومبني برضه على افتراض حقيقي إن المجتمع أصبح سلبي لدرجة أن الفتاة لا تجد من يدافع عنها ضد المتحرشين السفهاء

Desert cat said...

دى وصفه سهله دى وصفه هايله
يا احمد اصلا المتحرشين بيبقوا عيال جبانه
ده الواحد بس يقف للعيل من دول يقوله اخرس يا حيوان بيلاقيه جرى قدامه
طيب احكى لك انا على موقف حلو كدا مقطقط حصل معايا تانى يوم العيد
انا ماشية فى احد شوارع الزعازيع المكتظة بالشباشب اللى من العينة دى اللى هما المتحرشين يعنى
والاقى لك واد فى مواجهتى تمام وبيقولى ما تيجبى بوسه اه والنعمة هو اللى بيقول السافل ابن السافل
قولت له حاضر ولسه بقلع اللى فى رجلى لاقيته بيجرى قدامى اقسم بالله لو الشرطة بتطارده ما هيجرى بالطريقة دى .. انا قولت هو الواد شافنى مطلعه الفرفر ده انا بقلع الجزمة بس
فالعيال دى بتكون فى منتهى الجبن هو بيزيد فى افعاله لما يلاقى البنت ساكتة لو البنت تسكه على بؤه وبؤ اللى جابه مش كان بقى منتشر الحالات دى

انا حره said...

انت اكيد مكنتش متغطى كويس وانت بتكتب البوست دا

مين دى اللى هتضرب شحط طويل ولا حيطه متحركه الم من كفه اللى زى المرزبه كفيل انه ينسيها اهلها

ناقص تقول وبعد مايقع عالارض تطلع هيا سكينه المطبخ من شنطتها ونياهاهاهاهاااااااا بضحكه شريره كدا وتنقض عليه تقطعه

ههههههههههههه ابقى اتغطى كويس ياصباغ محسسنى انها بتضرب سوسن بنت اختها

سومه...مجنونه فى بلد عاقل said...

ههههههههههههه انت مسخره
بعدين اسمها سهتنه مش ستهنه
حلو كورس الكونغفو دا طب ما نشيل كاتر ومطوه احسن او مسحوق بصل ههههه
اه بخصوص النساء المتحرشات بالرجال ماما كانت جنبى وانا بقرا الموضوع وقريت السؤال الاخير واجابته
بتقولك لو واحده اتحرشت بواحد ميعملش حاجه
المفروض يتبسط بس هههههههههه
شوفت بقى سهله ازاى
هههههههههههههه
الى الامام ولو سمحت عاوزين الكورس عملى يعنى نصطاد عينه ونديها فى جنابها ونشوف التأثير
انت مسخره يا صباغ

سومه...مجنونه فى بلد عاقل said...

الله يرحم زمان لو البنت قالت يالهوتى تلاقى كله بيضرب بغباء منغير ما يستفهم

مهندس مصري said...

لو البنات عرفت تعمل الشويتين دول
نص الشباب الصيع حيمشي يعرج بعد ما يآخد الطريحة التمام
بص على آخر موضوع عندي
لإنه مهم جداً

سومه...مجنونه فى بلد عاقل said...

ياله اما ادوشك النهارده
شوف كمان البنت ممكن تتحرش بولد بس عن طريق لبسها الخارج طبعا هو مش مبرر للولد انه يعاكس ويضايق البنات بس حاليا الوضع صعب فى انفتاح رهيب فى الاعلام ثم ان الشباب والله معزور على الرغم من انه مدان..ولا ممبرر لاى خطا
لكن المفروض فى الوقت العصيب دا كل واحده كالاتى
تمشى زيها زى الراجل فى الشارع حتقولى ازاى حقولك يعنى تمشى محترمه متتهزش يمين ولا شمال عسكرى يعنى ....كلامى مبالغ فيه بس هو دا للى المفروض نعمله فى ظل ازمه الاخلاق وظل ازمه العنوسه
وبلاش الضحكه المجلجله اللى تهز الشارع
ثانيا تحاول مدام ماشيه لوحدها لبسها ميكونش ملفت يعنى بصراحه بتبقى لابسه عبايه والعبايه عليها ملفته اكتر من البطلون والبلوزه وللاسف هى متعمده تعمل كدا....وبتبقى لابسه جييبه وعليها رسمه فى حته ناقص تشيها وتكتب انظر هنا..؟؟
طبعا مش بتكلم عن الحجاب لان فى غير محبات محترمات فى اللبس والتعامل واخلاقهم برقبه محجبات ماشيين باستوميك والبناطيل اللويست اللى مفيش تفصيله مش باينه منها
انا نفسى كبنت غصب عنى بلتفت لها فما بالك الولاد؟؟
يعنى المفروض البنت تحترم نفسها فى اللبس سواء بحجاب او منغيره ...ميكونش بروبرق وملفت بزياده ومغرى لدرجه انه احيانا بيشبه بدل الرقص..؟
من الناحيه الاخرى نبادر فى حل ازمه العنوسه نقلل المهور والشبك والمتطلبات...ونزود ثقه الاهالى فينا كشباب عن طريق اننا نبين اننا مسؤلين مش شويه عيال...وتطلع مشاريع بناء وحدات سكنيه زى بيوت اليبانيين غرفه وصاله صغير وحمام ومطبخ ايه المانع ما فى ناس بتسافر السعوديه تقعد مع جوزها فى كدا اشمعنى فى بلدها متقعدش مادام واثقه من الانسان اللى معاها انه مجتهد وبيعمل اللى عليه
من ناحيه تانيه الاهل انتشر بينهم عاده الاستهتار والفرحه بان الولد ليه صحاب ع الموبايل وفى الكليه وعادى اما ابنى يمشى مع خمس بنات يشتغلهم وافرح بيه واقول عليه راجل ....ما فى الاخر مدودالى فى بنتى او بنت اختى او بنت اخويا او حفيدتى او زوجتى او اختى
لازم نوعى الشباب والاهل بطريقه صح ويكون فى حزم من الاهل شويه بدل التسيب اللى ماشى دلوقت ونشر ثقافه ان البنت زى الولد فى ان عيب البنت تمشى مع ولد ملهاش صله رسميه ولا دينيه بيه وعيب الولد يمشى هو كمان ويصاحب ميت بنت
انت فاهم طبعا انا قصدى ايه بكلمه يصاحب
مش نبهدل الدنيا ونيجى نشتكى
ونقول بناتنا ....كانوا فين بناتكم يوم ما ابنك كان بيشتغل عشره على التليفون وياريته حب زى بتاع زمان دا تسليه وقله ادب ومسخره
كفايه كدا بقى

Abo 7anf said...

السلام عليكم
اه يعم دا
وديت العيال فى داهيه
ملحق انبه صحابى
يعنى الواد رايح .........يقوم مضروب
ربنا يستر بقى

saso said...

ههههههههه

بس يا خالو انا اخاف اعمل كده كمان اكيد الناس هتيجي تخلصه من ايدي

كمان التحرش مش كده مش هيجي يحضن يعنى

ده الغالب بيبقي في وسائل المواصلات عشان كده انا باخد دايما معايا دبوووووووووس اى كللللللللللب يحط ايده على اى حاجه بشكه

بجد وساعات سيلف ديفينس

M.K said...

هههههههههه
معلومات مفيده يا خالو...
ربنا يخليك للوالايى و المضلوميين
...........
بالنسبه للشاب الي بتتحرش فيه البنت
يرجى اتباع ذات الخطوات الموضحه في البوست..
ده اذا ماكانش حابب يتعاكس
............
دمت بخير

Dr.ELsonpaty said...

tab da law wa7ed

tab law shelet mota7aresheen

te3mel eeeeeeeeeeeeh ????

اللهم لا تؤاخذنا بما فعل السفهاء منا

dr.Roufy said...

ههههههههههههههههههه
دا الراجل اتعجن بجد
بس دي مش اي بنت يعني..دي شكلها بتنتمي لجمعية : المرأة المتوحشة
مش من جموع الشعب الكادح..المتغذي على الفول والطعمية أكيد
:)

الطالبة عفو الله said...

هههههههههههههههه
و نعم النصايح
بس مفتكش لقى كل بنت تقدر على كل دة
دما لو قدر اديله صربة وحدة يبقى عملت معجزة هههههههههههه
بارك الله فيك يا احمد
و شكرا اوي على النصايح
دمت في حفظ الله

Dr.Mohammed Gohary said...

الله ينور يا صاحبي
أنا متابعك أهو من عالموبايل
شوف الحب فصلت النت ولسه متابعك لا بس بجد الله ينور وآدي جزاء اللي يتحرش ما عادش هينفع وربنا
ههههههههههه
خالص تقديري
ودعواتك لي ف الإمتحانات

عمر said...

وأنا صغير كنت دايماً ألاقي في شنطة أختي مطوة أيام ما كانت طالبة في الجامعة ومكونتش عارف ايه دي

ولما كنت أسألها إيه دي؟
كانت تقولي دي قطاعة ورق واحدة صاحبتي إديتهالي هدية

قولتلها أنا بأعرف أقطع الورق بالمقص
المقص أسهل

بس بعد مالعمر جري شوية

لقيت المطوة بتقطع الورق أحسن فعلاً

لقيت إن المفروض فعلاً كل واحدة تمشي بقطاعة ورق

وفي الغالب شخصية المتحرش بتكون شخصية ورق وسهل تتشرخ وتتقطع وتترمي في الزبالة كمان

هاتوا قطاعة ورق

تحياتي

علاء سالم said...

السلام عليكم

هههههههههههههههه
بجد فكرة
ماهو طالما البلد معدش فيها أمن ولا أمان بالشكل دا ( بالنسبه للمواطن العادي) يبقى نتعلم فنون الدفاع هن النفس وأمرنا لله
ههههههههههه
بجد فكرة البوست جامده والصور فعلاُ مالهاش حل

خالص نحياتي

عاشقه الفردوس said...

:))))))))))))))



ايه ده

علي فكره هحكيلك علي موقف حصل معايا شخصيا
وانا راجعه من الجامعه وراكبه الباص واحد كبير قعد جنبي وانا اصلا قولت خلاص ده راجل كبير يعني اكيد محترم وهيعتبرني زي بنته

لقيته كل دقيقه يقرب
ايه ياعم انا بقول عليك محترم وانا اتاخر شويه
لحد مالزقت في حيطه الباص
قولت مابهدهاش طلعت كتاب
advertisin'واصلا هو كتاب كبيييير اوي المفروض انه مرجع في امريكا

وحطيته بيني وبينه
انه يحترم نفسه ابدا
لقيته بيقرب كتفه مني
قولت لا بقي شكلك بتستهبل شيلت الدبوس اللي مظبطه بيه النقاب وربعت ايدي وده جه يقرب دررررررب شكيته


لقيته بيقول للسواق وقف هنا يااسطي


:)))))))))))))))))))))))))


فيه طرق تانيه كتيييير مش شرط الطرق دي يعني وبطريقه مهذبه ومحترمه :)))

Soul.o0o.Whisper said...

بصراحة مش قادرة أمسك نفسى من الضحك

خاصة النخلة لما بتولد
ههههههههههههههههههههههههه

إيه دا يا خالو ؟؟
هوا دا اللى اتعلمته فى الكلية؟؟؟


بس حركات ايه
تقولش جاكى شان
هههههههههههههههه


بس بجد فعلا ماعدتش واحدة بتتعتق
و ماعرفش المنتقبات بيتعاكسوا على ايه
آه والله العظيم

و مش هاقولك فى مكان مقفول
دا فى ماكن عام و وسط الزحمة
آه والله العظيم
لما بقت حاجة تفلق


على العموم الاحتياط واجب
هأتدرب شوية على الحركات دى
هههههههههههههههه

بس يا رتى أجرب فى مين ؟؟؟أجرب فى مين؟؟؟
ههههههههههههههههه




خالص تحياتى

نيجار said...

أولا بشكرك لزيارتك لمدونتي المتواضعه
وبجد مدونتك رائعه ومتنوعه
أما بقى بخصوص البوست ده
فأنا هقولك على حاجه يمكن البنات عندكم في مصر بيشجعوا بلبسهم على التحرش وانا والله في شهر زمضان لما كنت في مصر وبالأخص لما كنت في ستي ستارز شفت العجب العجاب في اللبس والبنات لابسه ومش لابسه وده غير العدد المهول للمفطرين في رمضان طبعاً الكلام ده ف رمضان فما بالك بعده أكيد أنئح المهم قولي بنات مصر بلبسهم يستاهلوا اللي بيحصل ( بس لاحظ برضه ان في فمصر محجبات وبنات لبسهم محترم ومنقبات بيحصل لهم كده)طب احنا اللي في الصعيد الجواني محجبات وبنلبس عبايات ومن غير ميكب وبنمشي في الشارع زي الغفر يبقى ليه عندنا تحرش لأوالجديد اللي راكب عجله بيبقى معاه جنزير طب احنا ايه
ذنبنا وخلى بالك المعاكسه عندنا بالايد وبيبقوا راكبين عجل علشان يجروا طبعا كلنا بقى عندنا فزع من اي عجله تقرب مننا طبعا من ايام الكليه اتعودت اشيل مطواه في الشنطه واتعودت اضرب أمال أستني لما يعمل زي ما بيعملوا ده انا اجتله طوالى ده احنا صعايده ودمنا حامي والحمد الله وان شاء الله هرخص طبانجه قريب هي سايبه عندينا ولا ايه بس على فكره انا عارفه ان اسلوبك فيه تريقه لإن الحركات اللي انت مصورها عايزه فاندام ولا جاكي شان مش بنات مصر البسكوت
تحياتي

Summar said...

:D الفكرة غلط
هو فى حد هيجي بالحضن ياوالدى الا لو كان متخلف عقليا
الحل البسيط يابنات بجد
احتفظوا بسكين صغيرة فى الشنطة..
ولما يتقبض عليكي قولى انك كنتى ناسياها عند اختك :D
بتكلم بجد على فكرة
ولو حد دايقك ممكن تعوريه فى رجله او دراعه..تعمليله رعب بس مايتقتلش
مع حبة صويت واللذى منه
هتفرج
:D

ابو اعصار said...

على فكرة انا متاكد انك النهارده اتفرجت على مسلسل 24 الي في ام بي سي اكشن
نفس اللي بيعمله جاك باور بالظبط
يا خال ده عاوز له وعي جماعي من البيت الشارع من الامن صح البنت ممكن تشيل ادوات حماية من السكينه الى مسدس الصوت بس برده خطوة متهورة لكن للضرورة احكام لو العملية وحشة اوي كده في الشارع


يا سلام على افكارك يا خال

اميرة عبد العال said...

اية الغباء دة
يعني مقالوش لو مجموعة متحرشين 10 او 20 او 40 زي ما بيحصل في وسط البلد وحادثة جامعة الدول
او لو المتحرش ماسك مطوة ولا مية نار
متهيألي دي مجرد رسوم كاريكاتورية
لا تمت لما يمكن ان يحدث في الواقع بصلة

تحياتي علي الضحكة

ngwan dobeai said...

الف شكر يا احمد واضافه الى كلامك فحل بصل وفصين توم هيساعدوا جامد فى الموضوع ده وكمان متنسيش الفلفل المطحون ودبوس الخروج ميخرجش من الشنطه وكونى مستعده
اما عن تحرش البنات بالبنين هو انت مسمعتش عن المثل اللى بيقول كله سلف ودين على العموم هويكلمها ويقولها وهومتأثر اوى انت معندكيش اخوات ولاد زى تخافى عليهم ..... وهى هتسيبه على طول

^ H@fSS@^ said...

بوستك مهم اوي و لازم يتاخد بشكل جد جدا
لكن للاسف
تم التالي

1- بعض مدونين/ات مستضعفين البنات و بيقولوا هما مش حيعملوا كدا و حيخافوا
يعني زرع لشك ثقة نفس البنت في قدراتها و ده غلط جدا و غير حقيقي
و الواحده اذا اتمرنت حتقدر تكسره هو و عشرة زيه
فلازم تدريب
عن نفسي لو انا في حالة دفاع عن النفس ببقى شرسة جدا و معرفش بيجيلي قوة من فين
ربنا القوي

2-
للاسف الاشد
ان بعض المدونين الذكور شايفين ان البنت تستاهل نوعا ما من اللي حصلها عشان هي لابسه لبس ضيق او ابصر مش عارف مين
مع ان الحجاب و النقاب و الاسدالات بقت اكتر من كدا مافيش
و زي ما انت قلت برضو بيتم التحرش بيهم

3-
للاسف المصيبي الشديد الحزييييييييين ان بعض المدونين من غير ذكر اسامي
قالولك ايه يا عم اللي انت كاتبه ده
دي البنت نفسها بتبقى هي اللي عاوزة يتحرش بيها الشباب و بهذا قد انزل من منزلة البنت لمستوى العاهرة التي تبحث عن عمل او تشوفلها شغلانة
فطبيعي لما تكون دي وجهة النظر
مؤكد الشارع حيبقى مليان بعدد مهول من المتحرشين بما انهم شايفينه حق طبيعي ليهم و رغبة دفينة عن البنت
فشكرا لكل ادم فكره بالمنظر ده

على صعيد اخر
موضوع التحرش ده فعلا لازم ياخد حيز التنفيذ و بشكل تنظيمي شعبي
يعني منستناش لما الحكومة او غيرها من اي المجموعات الاجتماعية هما اللي يدربونا
لازم احنا البنات نعمل حاجة
اول شئ يجيي في بالي
هو منال و اقتراحها الالمعي باننا نكون مسلحين بابر التريكوا و فور قيام المتحرش باي حركة او لفظ يتم غزه بالشكل المناسب في المكان المناسب
سواء مناطق تؤدي لفقدانه القدرة عن الخلفة
او في عنيه
او في اي مكان متاح قدامك
طبعا حيخش حد يقلي بس القسم حيلبسوها هي المشكلة و الغلط
معلش
ساعتها نقوم الدنيا و مرة على مرة المجتمع حيتغير
مش من مرة واحدة هي الحكاية بتم يعني
لازم نتعب شويتين

ممكن حل تاني و ده بيكون لما تضطري تتواجدي في مكان و في كمية من المتحرشين دول
اولا لو واقفة في طابور سينما او عيش
اي كان
اقفي وايديك في وسطك عشان ميجيش اي حيوان من دول و يعملك حركة مش ظريفةو عبال ما تستوعبي
يكون فل هاربا و انتي غرقانة في خضتك

لو بتتمشي
حطي شنطك تحت باطك بس تكون راجعة لورا لتحقيق نفس الهدف
و ان كانت مش حتنفع مع البنات زوات الشنط الفسفس

لكن ادينا بندي حلول لكل الفئات العمرية

لو وزنك تقيل شوية
مؤكد دايما بتخرجي و معاكي شنطتك
بس يقرب منك ارزعيه بالشنطة او عضيه في رقبته لو قريب منك
معلش
حيكون عرقان و ريحته وحشة
بس ديتها معجون سنان و خلاص

حركة تانية ظريفة اوي بعملها كتير لما بكون مضطرة انزل نص البلد او اي مكان زحمة او لو حتى واحد سخيف شغال يبص عليا و مبحلق
ببص في وشه و بعلو حسي بقوله
ايوة في حاجة؟؟
بتبص عليا ليه
او اشاورله علامة انه مجنون
و اعلي صوتي كمان
لغاية ما يتجرس في الشارع
اي نعم مافيش حد بيساعدني ف يحاجة
بس دي كفيلة انه يهرب
لاني اتفق مع قطة الصحرا انهم جبنا و خوافين


في كمان طرق تانية كتيرة
لكن عزيزاتي المتحرش بهن
اهم شئ انك متجبنيش
و متخافيش او تقعدي تحسبي ردة الفعل و مين يحقول ايه
احنا بنبقى في عرض لحظة
متخافيييييييييييييش
اتجراي و ميهمكيش و متخافيش على انوثتك
حتفضل متصانة في الحفظ و الصون
بالعكس
حتشعري بيها اكتر من اي وقت
الستات تحملهم للالم اقوى بكتير من الراجل
و مظنش فيه راجل واحد يقدر يستحمل يحمل و يولد و يخلف و لو مرة واحدة
حيموت بعد نص ساعة فقط

اخيرا
مقولة حكيمة جدا اعتقد اللي قالها سعد زغلول بس مش متاكده
ميموتش حق وراه مطالب
فيا عزيزتي
لو معتقدة انه من حقك تردي الصاع صاعين او من حقك تخرجي براحتك
او من حقك تارمي اللي اتحرش بيكي و مافيش حد يقدر يقولك بم
اذن متتنازليش عن حقك و خليكي وراه
اكل العيش مر فما بالكم بالحرية؟

للحوار بقية ان جاء في بالي شئ تاني
و اسفه لطول التعليق لكن مقدرتش امنع نفسي

تحياتي للجميع

زهرة الجنة said...

أيه ده ؟؟
شكلك بتتفرج كتير علي أفلام أجنبي
وخصوصا افلام الأكشن
وكمان مين يا أحمد اللي هتعمل كل ده
معتقدتش ان في اي بنت تقدر تعمل كده

وكمان مين الشخص اللي هيستسلم للدرجة دي للضرب ده يبقي حمار
هههههه
وبعدين الموضوع مش محتاج كل ده هي لو ضربته بالقلم وقالت له يا قليل الأدب هتلاقي مصر كلها بتضرب فيه ههههههه

وبعدين يا عم شوارزنجر انت هو فين بنت ممكن تتحرش بولد صعب قوي دي خيالك كده شطح لبعيييييييييد
لكن تعرف فعلا تبقي مصيبة لو بنت عملت كده

Che_wildwing said...

الكلام ده لما واحد بس هو اللى ييجي يتحمرش
لكن احنا عندنا في مصر وايمانا بمبادئ الاشتراكية بنتحمرش بتاع 100 أو 150 شاب مع بعض

وومن said...

ايه ده بس يا خالو فكرتني بأيام تدريبات الكاراتية

ومن منطلق بقي اني حد اتدرب فترة طويلة علي ماشابة من الحركات دي

احب اقولك ان الموضوع مش هاينفع عندنا خالص يعني مثلا متحرش في المترو في عز الزحمة المتحرش بها المسكينة مش هاتلاقي مكان تحرك ايديها ديلة بونية

واصلا لو علت صوتها وقالتلة يا قليل الأدب هاتلاقي البجح بيقولها هو حد كلمك مش عاجبك اركبي عربية السيدات

ولو اي مواصلة هايقولها انزلي خدي تاكسي

اما بقي عن كون المتحرش جبان فهو فعلا جبان علشان كدة لو في شارع هاتلاقية عمل عملتة وقال يا فكيك بالذات لو البت صوتت مثلا او شتمت

الموضوع بقي مدروس جدا والمتحرش من دول تحس انه بقي خبرة بيختار الضحية والزمان والمكان الصح

حاجة بقت تقرف بجد
معلش بقي طولت

قلب مصرى said...

ياريت بس كل البنات تقرا البوست وتتدرب عليه، لكن ياترى اللى هاتقرا هاتجلها القدرة تعمل كده.

زهرة الياسمين said...

متهيألى اللى تعمل كل ده معتقدش ان حد من البدايه ممكن يقربلها لإنها هيكون عندها عضلات

Ahmed Al-Sabbagh said...

الجميع

التعليقات جميلة جدا وجادة جدا وتستحق النقاش
واسمحولى اناقشها فى بوست منفصل

amr said...

ههههههههه

جميل اوى الموضوع واسلوبك الرائع

أستاذ أحمد

بس ياريت الدرس الجاى يكون لما يبقى تلاته او اتنين متحرشين تعمل المسكينه أيه

أظن يا تصوت ياتجرررررررررى

خيالى شويه الموضوع بس ممكن ينفع فى ظروف معينه جايز

خالص تحياتى

بنت مصريه said...

هههههههههههههههههههه
لا يا بابا افرض كان اطول منى ودا اكيد
ممكن ماطولش غير ركبه
انا بستسهل والم عليه الناس
اجى عند حته فيها ناس واقوم مزعقه
او اقرب عسكرى واقوم قايلاله
صدقنى ساعتها بيعملوا على روحهم

وبعدين النخل مابيولدش يا صباغ
مدارس ايه اللى بترحوها دى مش عارفه
النخل بيبييييض


وبعدين ايه اللى نعمل ايه لما البنات تتحرش بينا
مش قولتلك هات سيلف ديفنس
ههههههههههههههههه
سلام

ملكة said...

مع احترامي للناس المحترمين بتوع المجلة دي
بس هما ميعرفوش ان عندنا في مصر بالصلاة ع النبي نوع تاني من التحرشات
أصل الرجالة المعفنين اللي مش رجالة اساسا بيعملوا كدة عندنا من الضهر مش من الوش
تماما زي الجبناء اللي لما بيضربوا حد بيضربوه في ضهره وهو مش واخد باله مش في وشه بكل جرأة وشجاعة حتى لو الضرب في حد ذاته بلطجة ولامؤاخذة!
ثم هما برضو نسيوا حاجة في منتهى الأهمية الحقيقة
إن الحيوان المتحرش ده هيلاقي ألف مين يدافع عنه في الشارع ويخلصوه من بين ايدين المسكينة المتحرش بها
وهتلاقي الف الف واحد بيقول خلاص يا آنسة مفيش داعي ده راجل كبارة عيب تعملي فيه كدة معلش المسامح كريم وسيبيه علينا بينما هما بيخلصوه من بين ايدين الست اياها عشان يجري ابن ال... وهما يبقوا عملوا اللي عليهم
شوف انت بقى لما واحدة تفضح واحد في الشارع او في الاتوبيس وتقول انه كان بيتحرش بيها كام واحد هيعبرها؟؟
ها؟
قول كام؟
ولا واحد يا مؤمن
وحياة النبي الغالي عليه الصلاة والسلام ولا نفر هيعبرها حتى لو هي الست الوحيدة والباقيين كلهم رجالة..كله هيحط خلقته في اي داهية بعيد وهيعتبر نفسه أصم أبكم لم يعد يرى ومأسوف على شبابه
وابقى قابلني لو حد خد لها حقها ولا رحمها من الحيوان اياه...
صحيح..الرجالة ماتوا في الحرب!

^ H@fSS@^ said...

ya malika kalamik sa7 3ashan keda ana 2olt lama teb2i wa2fa , 7oti ediki fi wistik di betkhli 7awaliki manti2a shebh aminah naw3an mah.

Mona said...

ممكن أسئل هو السلف دفنس ممكن نجيبه منين ولا هو فيه خلطات معروفة ممكن حد يدلنا عليها و ربنا يسترها معانا و معاكم

عاقلة علي ارض الجنون said...

لا تخلو شنطتي من كاتر أو مقص حاد

ليس لشيء إلا أني أهوي الأعمال الورقيه

و القص و اللزق انت عارف بقي
ههههههههههههه

و بصراحه مش عارفه ارد عليك أصل مش عارفه أتخيلها رغم اني مصدقاها .. إزاي تحمي نفسك من تحرش إمرأه .. يع

سلام يا خال

^ H@fSS@^ said...

اعتقد ان مثال نهى رشدي احسن مثال على الكلام اللي قلته و قاله غيري
ان العبرة مش بقوتك و لا بضخامة جسمك و لكن العبرة باعتقادك في تمسكك بحقك مهما كان

السؤال المهم
ازاي تهتمي بنظرة مجتمع ليكي و خوفك لحسن يتهموكي بقلة الانوثة و نفس المجتمع ده بيهينك و بيتحرض بيك يو مش بيساعدك؟؟
فوقوا يا بنات
لازم كلكوا تبقوا نهى

اهي حسب كلام و وصف منى الشاذلي نهى قليلة الجسم و مش طويلة
يعني لا هي هجمة و لا غيره
و كمان مردتش تحرش السواق بحركات غريبة و محتاجة تمرين
هي فقط حست ان حقها مهدو رو لازم ترجعه
و رجعته
دي القوة اللي بتجيي لاي حد بيحس انه مظلوم

يا ريت كلنا نحسها

Akhadiwi Rajie said...

Would you be interested in exchanging links?
Cordis.europa.eu
Urgames.com
Yellowbot.com