خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Oct 15, 2008

انا بقيت وزير

أحدث دولة على الفيس بوك عدد أفراد شعبها حوالى 600 نسمة فى منهم حوالى 200 وزير عمالين يقرفوا فى باقى الشعب وينهبوه ويسرقوه
وأنا واحد من هؤلاء الوزراء
و بما هو معروف عنى من حب للديمقراطية وتفتح عقليتى
واحترام للحرية وتشجيعى الدائم على الممارسة الديمقراطية
فأنا اتعينت وزير لمصادرة الحريات
وهى الوزارة التى تختص بكبت الحرية وتضييع الحقوق وخرس الالسنة وتدمير المعارضة ونشر اليأس والاحباط بين المواطنين ومصادرة الرأى وحبس الصحفيين فى جمهورية ديكتاتوريستان

الحمد لله انا قايم بدورى على أكمل وجه

ومن ساعة ما مسكت الوزارة وانا بحب اقفل لى تلات اربع جرايد على الريق على كام مجلة واعتقل لى خمس ست مدونين وأطرد خمس ست مواطنين من الجروب بالاضافة طبعا لحظر أى جماعة دينية أو حزب بدأ يكوّن شعبية فى الشارع الديكتاتوريستانى

فى احد الاجتماعات الوزارية لوزارة الاعلام ومصادرة الحريات
دار حوار يدل على موهبتى الديكتاتورية بالفطرة

دعبس الخنيق وكيل اول الوزارة لشئون الغتاتة قال
احنا نقفل الوول بتاع الجروب عشان ما حدش يتكلم

و عبده بواخة نائب الوزير لشؤون الكبت اقترح ان اللى يكتب حاجة فى الوول نعتقلة ونمسحة من الجروب

و خميس كمامات المستشار بتاعى لشوؤن إغلاق الأفواه قال : اللى نلاقيه بيلبخ نروح على طول ساحبين منه الكيبورد

و حسن تسلط نائب الوزارة لشوؤن الاستبداد قال : احنا نصادر الكمبيوترات من بيوت المواطنين

و سيد سيطرة وكيل وزارة لشوؤن السيطرة قال
احنا نعين لكل مواطن .. مواطن يراقبة عشان لو عمل حركة كدة ولا كدة يبقى كل تحت السيطرة

طبعا انا سمعت كل الاراء وبعدين رميتها فى الزبالة
انا طبعا مش معينكم يا كلاب عشان تقولوا ارائكم ..لكن شايلكم لوقت زنقة عشان تسندونى

ثم صمت قليلا وظهر عليا التجلى والابداع الديكتاتوري وقلت وسط انبهار وتصفيق الحيوانات اللى قاعدة
احنا نسيب كل اللى يتكلم يتكلم .. واللى يكتب يكتب
كل اللى عايز يقول حاجة ما نحرموش منها

ثم استطردت ساخطا
يا حوش الديمقراطية مش انهم يتكلموا.. الديمقراطية انهم يلاقوا حد يسمعهم وينفذ كلامهم
وده عند أمه يا أدهم .. معارضة
المعارضة احنا اللى بنصنعها
انا مقدرش أعيش يوم من غير معارضة
المعارضة دول هما اللى بيحلوا القاعدة

ده انا كل يوم بالليل بعمل حفلة تسلية فى القصر بتاعى
بجيب رقاصة وبهلوان وحاوى واتنين رؤوساء أحزاب معارضة
على كام رئيس تحرير صحيفة وبقعد اتسلى لغاية الصبح

تشششششششششش تصفيق حاد

وده طبعا فى ظل التوجيهات الحكيمة للرئيسة مريم مراد .. الله يرحمها قصدى الله يديها الصحة .. فى المنفى بتاعها لاننا عملنا عليها انقلاب وعزلناها واصبحت الان تحمل لقب الرئيسة المعزولة


أعرفكم أكتر على دولتنا اللذيذة
بنقول فى مقدمة البيان التأسيسى للدولة

سنسخر من النظام القائم
فهو يعاملنا بكل دكتاتورية
لذلك اقمنا هذه الدولة
وسنضع دستورا دكتاتوريا لها
نفس الدستور الذى تتعامل به الدولة معنا
سننقل كل تحكمات النظام وطرقه الفاشية لكم هنا
نحن الحكومة وانتم الشعب
ستستمتعون بنفس
ما تمتعكم به الدولة
الدكتاتورية هيه الحل


دستور الدولة

البـــــاب الأول: الدولــــــــــة

المادة (1)
دولة دكتاتورستان دولة نظامها ديكتاتوري يقوم علي أساس القمع ،‏ والشعب الدكتاتورستاني هم مجرد رعايا لدي الحاكم المستبد

المادة (2)
اللغة العربية الساخرة هي لغة الدولة الرسمية

المادة (3)
السيادة للحاكم وحده، وهو مصدر السلطات، ويمارس الحاكم هذه السيادة ويحميها، ويصون عرشه على الوجه المبين في الدستور.

المادة (4)
يقوم الاقتصاد الوطني علي بيع جميع أصول الدولة المتاحة وحماية المحتكرين‏,‏ وكفالة الأشكال المختلفة للسمسرة والحفاظ علي حقوق رجال الأعمال المقربين من النظام الحاكم‏ والقضاء على جميع الأنشطة الاقتصادية الغير عملاقة التي تؤثر بالسلب في الاقتصاد الدكتاتورستاني

المادة (5)
يقوم النظام السياسي في دولة دكتاتورستان على أساس تعدد الأحزاب وذلك في إطار المقومات والمبادئ الأساسية للمجتمع الدكتاتورستاني المنصوص عليها في الدستور. وينظم القانون الأحزاب السياسية. وللمواطنين حق تكوين الأحزاب ‏.‏ وفقا للقانون‏,‏ ولا يجوز قيام أحزاب على أى مرجعية أو أساس سياسي أو ديني أو اجتماعي أو اقتصادي أو جغرافي أو عنصري‏.

المادة (6)
الجنسية الدكتاتورستانية ينظمها القانون


النشيد الوطنى للدولة

اخترناكي وبايعناكي
مادام الحكم بقا ملاكي
لا في ضربه جويه
ولا في اصلا حريه
وارمي الفقرا واراكي
اول طلعه نسائيه
ضربت باب الحريه
ندي الشعب طعميه
وناكل احنا في كنتاكي
واخترناكي وبايعناكي

بيان ببعض القيادات فى جمهورية ديكتاتوريستان

مريم مراد : الرئيسة المعزولة
محمد عاطف : رئيسا للوزراء
محمود عثمان : نائب رئيس الوزراء و وزير الامن القومى
احمد الصباغ : وزير الاعلام ومصادرة الحريات
آبى بتنجانى : وزيرة الاسكان والتهجير وهد البيوت
محمد عيسوى : امين السياسيات بالحزب الدكتاتورى ونقيب الصحفيين
شادى عثمان : ابن عمى ولازم يكون وزير
اسراء بسبسة : المشرف العام على الصحافة الديكتاتورية
احمد محمد سعيد : وزير التثقيف الشعبى- وزارة جديدة لانج
بكر خليل : وزير على ما تفرج
احمد عبد العزيز : رئيس المخابرات
عبد الرحمن فارس : ده بالذات لازم كل يوم تعتقلوه
شوقى رجب : وزير العمل
مديحة بنت مصر : وزيرة شئون الدولة
رنا محمد : وزيرة على ماتفرج
محمد وجيه : وزير العلاقات الدولية
حسن كمال : نائب وزير الامن القومي علي ما نلاقي وزارة فاضية
احمد البربرى : وزير القوى العاملة والهجرة
نادين ابو شادى : رئيس ديوان رئيس الجمهورية
يحيى المدبولى : محافظ قاهستان العاصمة
محمد عبد الكريم : محافظ اسكندريستان
هدى حامد : وزيرة التجارة
ميونا عويس : منسق العلاقات الفلسطينية الديكتاتورية
مشيرة احمد: مش وزيره خالص لانها دايما معارضة
محمد عبيد : رئيس تحرير الأهرام و المستشار الاعلامى للرئاسه

وجارى تعين باقى الوزراء

طبعا الحكومة مستمرة غصب عنكم

ومرحبا بكم
فى
جمهورية ديكتاتوريستان



أحمد الصباغ

33 comments:

sebofy7alo said...

احنا شعبك وبنحبك
بالروح بالدم نفديك يا (تيييييييييييت)هههههههه
والله جاااااااااامد جدا البوست دة

نهله said...

الإنسان المصرى ما عاد له أى قيمة بمصر , و إستحاله إن أى وزير يفكر بشكوى مواطن إلا إذا إتصعدت الشكوى مش محلياً لا عالميا ً , شعب مصر بوادى و
الحكومة كلها بوادى تانى خالص

شكرا على البوست الجااااااامد جدااااااا

و ياريت لو فى أماكن لسا فاضية بالوزارة تعملوا حسابى ههههههههههه

عصفور المدينة said...

أنا قريت كلمة القاعدة في البوست ده
:)

عصفور المدينة said...

هنا مقر حكومة طالبان
:)

أحمد حشمت said...

برافو
ممكن أمسك وزارة المالية شهرين بس

مختار الجندى said...

شكرا جدا للوزير احمد الصباغ وياريت لو يتوسطلى امسك اى وزاره معاه وياريت لو يعرفنى على امين لجنة السيايات وبكده اضمن رئاسة الوزراء فى العهد القادم

همس الاحباب said...

هههههه
مبروك الوزارة يا خالو
والله انت تنفع رئيس حكومة كمااااان
كفاية انك اطول من رئيس الحكومة يا جدع
وحياة تيتى ممكن تعينى ساعى فى مكتب حضرتك
هههههه
تحياتى

احمد نور الدين said...

لا جمهورية جامدة :D
دكتور تامر احمد كان عمل جمهورية تفطس من الضحك اسمها انتيكا في كتابه ( حدث في انتيكا ) ممكن تاخدوا منه خبرات
اهي استفادة من خبرات السابقين
والامم بتستفاد من تاريخ بعضيها :D
تحياتي

شيماء الجمال said...

خالو يا خالو..
انا بقرأ البوستات بتاعتك والله بس آسفة اني مش بعرف اعلق :)

سلامات

عاقلة علي ارض الجنون said...

هههههههههههه

طيب يحيا خالو :)

مستغل الطبقات المخلوليه

:)

السخرية .. و الكوميديا السوداء
و تحيا جمهورية مصر العربيه

تحياتي

مخلولتك

ياسمين

بذرة امل said...

فكرة جامدة جدا جدا

وبصراحة ضحكتنى اوى

بليس ممكن تحجزولى كرسى من كراسى الوزارة اقعد عليه بقية عمرى ان كان فى العمر بقية

fashkool said...

انت جبت حاجه من عندك ؟.. وبالنسبه لكونك اصبحت وزير.. قديمه فيه الان كتير جدابيشتغلواالشغلانه دى .. عندى لك شغلانه جميله جدا ومنها واحده بس .. ايه رايك ؟

عاشقة الاستقرار said...

هههههههه بجد البوست حلو قوى

ومبروك ياسيدى الوزاره وعقبال رئاسه الجمهوريه

fashkool said...

قديمه دى اشاعه ياعمنا اظن الحكايه سهله كدا دا انت لو مسكت وزير فى اى حته فى الدنيا من غير توجيهاتنا حنسيبها لك .. ولوالحكايه دى بجد ارجوك عايز امسك معاك وزير الكلام والدعايه وكل عموم الفبركه اصل انا ممكن اقول كلام كتير وخطير وانشائى وفيه كل ا نواع البيان والهمبكه .. واحسن من بعضهم ويطلع كله على ما فيش .. انا نفسى فى شغلانه ما فيهاش الا واحد فى البلد .. ايه رأيك؟

fashkool said...

قديمه دى اشاعه ياعمنا اظن الحكايه سهله كدا دا انت لو مسكت وزير فى اى حته فى الدنيا من غير توجيهاتنا حنسيبها لك .. ولوالحكايه دى بجد ارجوك عايز امسك معاك وزير الكلام والدعايه وكل عموم الفبركه اصل انا ممكن اقول كلام كتير وخطير وانشائى وفيه كل ا نواع البيان والهمبكه .. واحسن من بعضهم ويطلع كله على ما فيش .. انا نفسى فى شغلانه ما فيهاش الا واحد فى البلد .. ايه رأيك؟

ابو النجوم said...

أحمد
أنت نسيت وزاره الامراض النفسيه والعصبيه واتمنى انك تحجزها لأخوك وانا هاأخلى الشعب ده يقول (كمننا) وهننفخ أى حد يعارض الريس

قلم رصاص said...

هههههههههههههههههههههه

أنا مش طمعان في أي وزارة .. ادوني بس رئاسة مجلس سلق البيض والقوانين الملفوفة في ورق سوليفان

حلو البوست يامعالي الوزير

ههههههههههههههههههه


تقبل مروري

مهندس مصري said...

مبروك يا سيادة الوزير

Miss. Sosa said...

مسكوني وزارة التعليم العالي انا خبرة في الحاجات ديه

واول مقترح تعليمي اني هلغي مجانية التعليم الجامعي وهشجع الصنايع والدبلون والبنات كفاية عليهم اعدادية وللفشلة اللي هيدرسوا خاص هعدل تقديرات النجاح
لحمار مع بردعة الشرف
بغل في اسطبل القرف
جحش في زريبة العلف

~*§¦§ Appy §¦§*~ said...

وبما انى وزيره فى الدوله دي وامبراطوره فى كوكب بتنجانستان
اوعدك بتحويل العشوائيات
الى حدائق وجانين وطرد اهلها هههههههههههههه

سومه...مجنونه فى بلد عاقل said...

ماشى يا صباغ انا بما انى برا التنظيم حعملى حزب المجانين المعارضين وارشح نسفى رئيس جمهوريه وافتكر انى كنت رئيس سابق فى ارعيا يعنى ذو خبره

mohamed ghalia said...

الحمد لله إنى ده بيحصلفى جمهورية ديكتاتوريستان
عندنا فى مصر حرية وديمقراطية
الحمد لله نبوس ادينا شعر ودقن
تحياتى على الإسلوب الرائع
دمت بود

نبض اسكندرية said...

حضنت الريح ليالى البرد
سترتك لية تعرينى

انا ابنك يا محروسة
ياارض القرع والكوسة

لاانا تاجر ولا فاجر
ولا هارب بملايينى

تحية عظيمة لكبير الدكتاستورين

وبنقول لساعتك ربنا يخليك وتعيشنا هبل اكتر ما احنا

Soul.o0o.Whisper said...

ههههههههههههههههههههههههه

تحفة يا خالو ..
قصدى يا سيادة الو زييييييييير

ههههههههههههههههههه


بس يعنى رغم التعليقات دى كلها
إلا غن الكل عاوز يمسك وزير فى وزارة من الوزارات

و نسيتو ان الرئيسة معزووووووووووووووولة


طب مسكنى الرئاسة يا خالو

هههههههههههههههههههههههههههههههه





هأستنى موافقون ؟؟...موافقون
تشششششششششششششششش
تصقيف "والله أنا افتكرتها طشة الطعمية
ماعلينا




خالص تحياتى

بنت مصريه said...

ههههههههههههههههههههه
يخرب عقلك يا احمد
الدوله دى بتفكرنى بدوله اعرفها
اسمها ايه يا ادهم افتكر معايا اسمها ايه اه افتكرت egypt
ههههههههههههههه
قولتها باعنجليزى عشان منتحبسش

australia said...

السلام عليكم د أولا :-ثانية :- مش هكبل أجي الدولة بتعتكم الى لم أكن حاجة كبيرة .
ممكن أمسك ريس البنوك كلها . أو أمسك مصانع الحديد والصلب أو شركة الملاحه لقناة السويس . أو شركات البترول . أو الجيش . أو كفايه بلاش طمع .

قلب مصرى said...

عندى فكرة سو لتكميم الأفواه فى دولتكم المحقرة.

اعلن ان لكل مواطن جائزة قيمة جدا إذا أبلغ عن أحد المعارضة المغرضة أو دل على من يفكر فى صالح الدولة وبعد أن تمنحه جائزة قدرها مليون بازوكا ديكتاتورى (العملة عندكم) خد منه ضرايب تلاتة مليون بازوكا ديكتاتورى وبكده تضمن إن الناس تبلغ عن بعض وفى النهاية هما اللى هايدفعولك فلوس.

كرانيش said...

مصر التى فى خاطرى وفى فمى

عماله ليه يا مصر فيه تفرمى؟؟؟

ابن حـجـر الـعـسـقـلانـى said...

بما إنى محايد ... أنا بقى سيبت كل حاجة .. و هاطلع لكم القطط الفطسانة فى الموضوع

بص بقى أنا مش معترض على أى حاجة إلا الجملة دى

نادين ابو شادى : رئيس ديوان رئيس الجمهورية

إيه حكاية "الجمهورية" دى ؟؟؟؟؟ هى مش كانت "ديكتاتورية" ؟؟

لا لا ... واضح إنكم مش شايفين شغلكم كويس .. إزاى نسمح بالاختراق الجمهورى للدكتاتورية .. دة تسيب

النهاردة تقولولى جمهورية .. بكرة تبقى اشتراكية .. و الديكتاتوريين يقعدوا فى بيوتهم بقى بعد كدة .. لا لا .. دة يبقى عند هيز ماذر

يعنى: عند أمه يا أدهم

خمسة فضفضة said...

السلام عليكم ورحمة الله وبركاته

الف الف مبروك يا خالو
طيب مالاقيش عندك وظيفه كده علي اد الحال في الوزاره
ولا حتي تتوسطلي عند وزير الصحه ان شالله يعيني وكيل وزاره


:)))))))))))))

dandana said...

فعلا
اى دولة حديثة ديمقراطية سليمة الانشاء والبنية التحتيو والفوقانية لازم يكون فيها جريدة اهرام

أميرة محمد محمد محمد said...

بس انا وزيرة الخارجيه في الدوله دي ازاي مش عارفني
ده انا ممكن شعبولا يغنيلي زي ماغني لعمرو موسي

وجه جديد د.أحمد عثمان said...

والله لكم مستقبل
بس فين وزير الميكروباصات
و فين وزير حماية الزبالة و التلوث البيئي
و فين منظمة حقوق الدبان و الناموس

دا انتوا عايزين شغل كتير
هي الديكتاتورية بالساهل