خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Oct 18, 2008

العفاريت والأنينيموس والمدونين

الانينيموس فى حياة كل مدون شئ اساسى بيدخل مع كل بوست يدلو بدلوه فى الموضوع سواء بشتيمة مباشرة أو اهانة أو استعباط أو استظراف او اى قرف ، وبقى الموضوع عادى بالنسبة لكل مدون

واصبح لكل مدون الانينيموس الخاص به ، شايلة فى ميدالية المفاتيح ، وبيقعد يفرج أصحابة عليه ، ويقولهم شوفوا الانينيموس بتاعى حلو أزاى ، ويقولوا له : وااااااااو نايس انينيموس أنت جبته منين ده

وبعض المدونين بقى ليهم قرين .. وهى درجة انينيموسيه أعلى

راجع قرين قطة الصحراء ، وآبى بلانت .....الخ

كمان فى درجة أعلى من الانينيموس القرين ، وهى درجة الانينيموس النصاب وهو شخص بيعمل مدونة تانية وبنفس توقيعك كمان

راجع موضوع مصطفى الحسينى صاحب البوابة

عن قرينة النصاب

يعنى المدون المبتدئ بيبقى له انينيموس عادى ، وبعدين ربنا بيوفقة ويترقى ويبقى له قرين

وبعدين اذا اجتهد وبقى يشرب اللبن وماما بتدعيلة

يقوم يطلع له انينيموس نصاب


أنواع الانينيموس

الانينيموس الكئيب : وهو انينيموس بيشمشم على أى مدونة ضاحكة او بوست ساخر او تهنئة أو عيد ميلاد أو مناسبة سعيدة أو حتى صورة ورد ويدخل يبكت فى المدون وينصحة بإنه يتكسف على عينه ويكشكشها ما يعرضهاش وان الايام السودا لسه جاية فمتفرحش اوى

الانينيموس الشــبـّيـح : بتشديد الباء وهو انينيموس داخل جوجل يعمل سيرش عن سعر الحشيش او عن حتة فيلم سكس وبعدين يكون فى مدون كاتب كلمة حشيش او جنس فى مدونتة فيدخل عم الشبيح يلاقى قصيدة شعر أو موضوع سياسى فيدخل يدلو بدلوه فى الموضوع .. وشوووف انت بقى اكيد لما الشبيح يكتب .. هيكتب درر

الانينيموس الحقنة : وهو انينيموس يهدف فى المقام الأول الى توقيع الناس فى بعضيها والقيام بدور مهدئ النفوس .. وزرع الكراهية والعداء فى كل مدونة يزرع فيها تعليقة

مثلا : يدخل عند فولان يقول انت سارق الموضوع ده من علان .. او يقول لفولان انت ما بتفهمش حاجة ده علان كتب عن الموضوع ده احسن منك ، وبعتبر الانينيموس القرين من النوع الحقنة

الانينيموس الإعلانجى : وهو انينيموس غالبا كان طموحة انه يطلع صبى اعلانجى ، يدخل فى كل مدونة ويلزق إعلان عن موضوع غريب لا يمت لموضوعك ولا لإهتمامك ولا سياق مدونتك بصلة .. يعنى مثلا يبقى مدون كاتب عن السينيما او واحدة كاتبة عن الطبيخ وتلاقيه داخل حاطط إعلان عن : دعوة للتضامن مع حيثيات عولمة الأدب الميتافيزيقى للخروج من أزمة المضمون السيريالزمى والغريب انك ممكن تلاقى نفس الاعلان متكرر فى نفس البوست تلات اربع مرات يعنى حتى ما بيبصش هو نسخ الاعلان هنا قبل كدة ولا لأه

الشيخ انينيموس : وهو انينيموس درويش ، يرتدى عمة حمراء كبيرة وجلباب ضخم ويجلس فى حلقة ذكر ماسكا اللاب توب بتاعة ، وما ان يرى كلمة مخالفة لتعاليم الدين حتى تثور ثورتة ويدخل ناهرا المدون ومتوعدا بالويل والثبور وسوء العاقبة ، ورغم انه غالبا بيكون خطابة الدينى ضعيف جدا الا انك لو ما اقتنعتش بكلامة يدخل بكومنت تانى ويبشرك بالنار خبط لزق

خالتى انينيموس : وهو انينيموس - بعيد عنك - بالع كلبة والده .. يدخل يشتمك وبدل ما يشتمك بما قل ودل لأ .. يكتب تقرير مفصل عن كينونة الاباحة المتأصلة فى دمه

وغالبا ما يثرثر بكلام محبط ويائس وينم عن شخصية سيكوباتية

الانينيموس الطفيلى : وهو انينيموس ينتشر ويتوغل وينتشر فى كل الصفحات والتعليقات والايميلات والماسنجرات .. تمسح له تعليق .. يبعت رسالة .. تمسح له رسالة .. يبعت تعليق .. وهكذا

الانينيموس الممل : وهو انينيموس يترك لك تعليقات ليس لها طعم ولا لون .. يعنى ما تبقاش فاهم هو عايز يشتم ولا عايز يتسلف فلوس ولا جاى ليه فى انهاره الاسود ده

الانينيموس التايه : اى والله مرة جالى تعليق من واحد انينيموس بيسأل عن اسم محل فى شارع الازهر .. وكان فى بوست متضمن عمل أدبى

الانينيموس الرومانسى : وهو انينيموس عاطفى ما أن يكتشف إن صاحبة المدونة هى أنسة حلوة تتمنى الاستقرار حتى يدخل عليها بالحنجل والمنجل ويسألها أسئلة بعيد عن الموضوع من نوعية : أنتى مرتبطة ولا لأ؟ أو هى الخواطر دى شخصية ؟ أو هو ليه كل اللى معلق عندك رجالة ؟ أو أنا أول ما شوفت مدونتك قلبى رفرف .. وهكذا


أنينيموس فى الافتتاح

اللى فطسنى من الضحك حكاية واحد جارى عنده بتاع سبعتاشر سنة بقالة سنة بيتابع مدونتى ، وحلم حياتة انه يعمل مدونة .. وف يوم جالى طاير من الفرح انه عمل مدونة .. وقولت له انهاردة لما ارجع البيت ، هدخل وهكون اول واحد يعلق عندك .. شوية ولقيته بيتصل بيا وبيعيط وبيقولى : فى واحد مجهول دخل كتب اول تعليق وشتمنى من غير ما اعمل له حاجة اهئ اهئ.. فمسحت المدونة


علاقة المدون بالانينيموس

وأصبح الان ممكن نسمع عن مدون اخلاقة عالية .. الانينيموس بتاعة بطل يدخل يشتمة لمدة اسبوع قام المدون راح يسأل عن الانينيموس فى البيت ويتطمن عليه ، أو مدون .. الانينيموس بطل يدخل يشتمة قام المدوّن جالة صداع وزغللة وراح يتعالج فى مصحة لمعالجة الإدمان


تبخير المدوَّنات

أقترحت المدونة أم سيد ان كل مدوّن يبخر مدونته لأنها تعتقد ان الانينيموس دول هما - بسم الله الرحمن الرحيم - من أسيادنا وإنه يتثنى على كل مدون تماشيا مع التكنولوجيا .. وضع خرزة زرقة فى المدونة ودق مسامير فى شاشة الكمبيوتر وذلك لفك العكوسات .. الهم إنى بلّغت اللهم خـد أم سيد


إمتحان فى علم الانينيموس

التعبير :أكتب فى أحد الموضوعات الأتية

أكتب قصة قصيرة لا تقل عن ميه واربعين صفحة أسلوب خالتى أنينيموس فى شتيمة المدوّن

أكتب قصة عن رحلة انينيموس رومانسى من أول تعليق وحتى جلوسة أمام المأذون

اجب عن سبعة من الخمس اسئلة الاتية

أولا : اذكر نوع الانينيموس الخاص بك مع التعليل والشرح؟

ثانيا : وضح بمثال الفرق بين الانينيموس الخنيق والانينيموس الغتيت؟

ثالثا : اذكر ثلاثة اشياء للحفاظ على الانينيموس من عوامل التعرية؟

رابعا : علل - الانينيموس يبدأ عملة بعد الثانية بعد منتصف الليل

خامسا : ردد الجملة الاتية تلات مرات : أنينيموسنا ضرب أنينيموسكم قام أنينيموسهم قال لأنينيموسنا خلى بالك من أنينيموساية أنينيموسكم

-------------

ملاحظــة 1 : أنا مش ضد الاعلانات فى التعليقات على طول الخط .. يعنى اما اكون عايز اعمل اعلان عن مناسبة ادبية مثلا يبقى اروح للناس المهتمة بالأدب .. لو عايز اعمل تضامن مع معتقل مثلا يبقى اروح للناس اللى غاويين سياسة

ملاحظـة 2 : لا يتضمن الكلام السابق إشارة إلى أصحابنا اللى ما عندهومش اكونت على جوجل وبيدخلوا انينيموس دول ينوروا فى أى وقت والمدونة مدونتهم

أحمد الصباغ

41 comments:

عاقلة علي ارض الجنون said...

بحجز و راجعه

عاقلة علي ارض الجنون said...

الانينيموس الإعلانجى

ده بشوفه كتيييييييييير أوي بقي بالهبل


-----

الشيخ انينيموس

أقولك علي حاجه يا خالو انا ف مره واحد دخل أرض الاحزان بهدللي كل الدنيا
قاللي الحزن من الشيطان و كلام كتييييييير اللي هو مفاده يعني .. اقفلي المدونه دي و افتحي مقلة لب .. و كل ده من العنوان .. و لا عبر ف المدونه نفسها و لا قرا انا بكتب فيها ايه أصلا .. دخل شمال علي طول رديت عليه قولتله .. يا حضرت لما تقرا ابقي اتكلم بقي .. مش ناقصه هي .. و اللي يغيظ ان تعليقه ما هو الا موضوع علي أحد المنتديات و ناقله كوبي بيست .. يا فرحتنا بالشيخ منقول للأمانه :)

--------------

الانينيموس الممل

آه منه آه .. متبقاش ده جاي مع مين ده و لا تبع ايه و لا فتح مدونتك منين أصلا


-------------

الانينيموس التايه

ههههههههههههههههههههههههه

لا بجد بجد بجد .. مش عارفه اقول ايه عليه .. عماله أضحك .. اللي يدون ياما يشوف و اللي يعلق يشوف أكتر نقول ايه بس !!

------------

الانينيموس الرومانسى

هههههههههههههههههههههههههههه
انا و الله فيه واحد قاللي انتي ف كلية إيه و عندك كام سنه و مرتبطه و لا سينجل .. ديليت هو الحل الوحيد مع الأشكال دي ..

:)


------------------

أنينيموس فى الافتتاح

يا عيني .. ليه بس كده .. ايه الانونيميسات الشريرين دول بس !!!
قوله يبقي أقوي محدش له عنده حاجه

----------------
علاقة المدون بالانينيموس

ههههههههههههههههه

بجد خالو الصباغ الفكهي :)

فظيعه بجد هههههههههههههه

----------------

تبخير المدوَّنات

ههههههههههههههههههههههههه

لا يا خالو انت محصلتش بجد :)

-----------------

تعظيم سلام بقي علي الملحوظتين اللي ف الاخر .. أومال هما عملوا ان فيه نوع من الأنونيمس .. طيب و محترم .. :)

بجد بجد بوست له مذاقة الخاص صباغي حتي النخاع يعني :)

معلش طولت بس بحب التحليل الدقيق و الشعرية هههههه

سلام لحسن انا كده هيست

عاقلة علي ارض الجنون said...

بجد مبسوطه أوي أول تعليقين مره واحده :)

زي ما يبقي البيت فاضي كده و الواحد يقعد يجري :)

Geddo Iskandar said...

ده أنت شايل ومعبي :D

خمسة فضفضة said...

السلام عليكم ورحمة الله وبركاته

هههههههههههه

مش قادره ابطل ضحك ، خصوصا ان لسه فيه واحد مستلمني وكل ما امسح تعليق يحط تلاته ، آل ايه بيعمل اعلان عن بولدوزرات للبيع


حد قاله اني عاوزه اهد مجمع التحرير ولا ايه مش عارفه

هههههههههه

سلام يا خالو

اوعى تفكر said...

ايه كال النواميس اللى اترمت علينا فجأه دى

~*§¦§ Appy §¦§*~ said...

لا مش هسال عليه ولا هعبره اشتاتا اشتوت واضح انه راح فى شجره عندى الحمد لله والله خايفه يكون بيعمل مصيبه هههههههه
بس موضوعك حلو يا صباغ على قد الالم والقرف اللى بشوفه منهم بس بضحك والله

ست البيت said...

الحمد لله انا مش بيجي عندي الناس دوووووووووووول خالص
لأن مدونتي مهوية
وبعدين يا خالو عاوز واحد يدخل عندي والمفترض أني بدافع عن المرأة يلاقيني لابسه حجاب في لساني
ولو أن لساني زالف بقاله يومين

وكنت بحضر بوست تحفه
والنت ابن التتتتتتيييييييييييييييت
فصل مني امبارح
والكمبيوتر كمان فوت
واضح ان بركاتي حلت
بس بجد يا أحمد البوست جميل
حل قوي
وعجبني الكلام والتقسيمات

وعجبني جدا ان خالو رجع يدون وبنشااااااااط
يصعب معه المتابعة
ناس م يعجبهاش العجب
منور كالعادة يا خالو

mostafa rayan said...

ارخم شيئ حد يدخل عندك ويفضل يشتم وانت مش عارف هو مين لاء ولما يعيش دور الناصح وهو اصلا معلوماته في الدين زي معلومات شوبيرعن الباليه المائي
حاجة خنيقة بجد
ربنا ياعم يكفينا شر المجاهيل
موضوع جامد وجه في وقته
تحياتي ليك يا جميل ودمت بكل الخير

اهو ده عيبه said...

هههههههه ايه ده يا صباغ
ده انت عامل دراسه موضوعيه كمان
لا بجد تصنيف هايل وتحليل شامل
بس انا الحمد لله ربنا راحمنى منهم
سلام

أبو أسامة - مدونة كباية شاي said...

تحياتي يا خال

بجد موضوع جميل جدا جدا

بس ما قلتليش


جارك اللى عمل مدونة وبعدين مسحها مع أول تعليق .... قلت له إيه ؟؟؟؟

تحياتي
توقيع
أنينموس غير مجهول على الإطلاق
أنا
:)

أحلى حياة said...

ههههههههههههههههههههههههه
اللهم احفظنا.. ربنا يكفينا الشر

مستجده :D

Sofy said...

انا لسة مدونة مبتدئة و الحمدلله مصادفتش اى انينموس ..
:] ربنا يستر

ـ-ـ- أحمد عبد العدل-ـ-ـ said...

رائع ياخال .. بصفتى مدون كى جى وان باشكرك جداً وبوصى بتدريس البوست ده فى مدرسة المدونين
على فكرة جالى واحد لطيف عامل اسمه على اسمى بس مزود اسم تالت فى الاخر وقال للناس اللى فى المدونة (تحياتى ) بصراحة أرق عفريت شوفته
تحياتى

همس الاحباب said...

هههههههه
الصباغ ودراسة متعمقة فى علم الانينموس
دى رسالة الماجستير ولا الدكتوراة يا عمنا
بس بجد الموضوع جامد قوى وعجبنى
ربنا يكفينا شرهم
تحياتى

آلام وآمال said...

عالي اوي يا احمد البوست ده
:D
تسلم ايدك يا خالو يا جاامد
انا اللي بيدايقني بصراحة بتوع الاعلانات
خنققققة

مصــــري said...

يا خــــــــال

والله انت دمك زي العسل.

أكتر حاجة بلاقيها الاعلانجي اياه
وباكره الموضوع ده جدا

تعرف اني في حد دخل عندي يعلن عن موضوعك مع الشخص اياه المدون ده.
والدكتور محمد الجوهري الله يكرمه خلص كل حاجة وكبسهم.

القرين بتاعي بيخش يشكر فيا والمشكلة اني متغاظ عشان مش عارفه.

تحياتي
أسامة

شباب روش طحن said...

حبايب قلبي المجهولين انا بكلم معاهم بقالي شهور حاجة جميلة جدا لما تلاقي واحد بيشتمك وواحد تاني بيتريق عليك

والأجمل لما تكون واثق أنهم مش فاهمين حاجة من ألي أنت كاتبه

Oss said...

والله انا عملت مره بوست عن اعلان كتبه انينيموس
كاتب مقاله عن الشعوذه فى صورة اعلان

بس انا الحمدلله الأنينيموس اللى عندى كلهم محترمين لأنهم معارفى
:)
لسه ما ارتقيتش لمرحلة الانينيموس الخنيق

عاااااااااااااااااااااا
عايز انينيموس
عايز انينيموس
عايز انينيموس
عايز انينيموس
:)
تحياتى

مهندس مصري said...

ياه دا إنت فصصتهم يا بني
و الله رغم انها مش بتحصل عندي كتير
بس بأتخنق منهم
بأحب اعرف أنا بأكلم مين و هل هو فاهم الكلام اللي انا كاتبه و الاهم هل هو فاهم هو بيقول ايه ؟
و لا بيهلفط في الكلام و خلاص
:)
بوست حلو يا أحمد
و ربنا يهدي المجاهيل كلهم

انا حره said...

ياساتر عليك انت اييييييه رساله الماجستير بتاعتك كانت دراسه عن الانونيموسات هههههههههه

لا ودراسه كافيه ووافيه تستحق امتياز مع مرتبه الشرف

ربنا يكفينا شر الانونيمس ابو لسان طويل دا وانا على حسب تقسيمتك دى ابقى لسه بحبى فى عالم التدوين لان مشرفنيش اى ريحه مشطوب الاسم فى مدونتى

خالد فوده said...

انا مره جااالي حوالي خمس تعليقات كلهم اعلاناااات
وهما كانو اول خمسه تعليقات
حسيت وقتها احساس غريب ان مدونتي وحشه ومواضيعا غبيه
لدرجه ان الناس مش عاوزه تعلق عندي
وسايبين الاعلانات شغااااله
بجد موضوع جمييييل اوي
سلام

نهله said...

أنينيموسنا ضرب أنينيموسكم قام أنينيموسهم قال لأنينيموسنا خلى بالك من أنينيموساية أنينيموسكم


هههههههههههههه


و الله العظيم بوستاتك كلها ذى العسل

الحمد لله انا لسا مدونة مبتدئة و لسا ما صادفت أنينموس خالص ,, ربنا يستر ههههههههههه

قلب مصرى said...

هههههههههههههههههههه
جامد البوست ده
وخلانى اكتشفت انى مش غريب فى الحكاية دى
طلعت عند كل الناس
بس انا خالتى مش بتيجى بقالها مده طويلة مش عارف ليه؟

د. محمد رضــــا .. هل تراني said...

sooooo funny

kolo kom we garak kom

be3ayt 3ashan rd

da fe nas betdkhol teshtem bas

kea we khalas


ta7yati

الشنكوتي الكبير said...

ولو اني يا ابو حميد عادتي اني ادخل عندك اشوف الجديد واتفرج وامشي زي ابو فصاده لا بقدم ولا بأخر بس بعرف ايه الجديد واقرأ وامشي

انما المره دي لازم اعلق اصلك جيت على الوجيعه
اولا طبع الموضوع خلاني فطست من الضحك ونسيت اني كنت مخنوق اصلا
لأن في واحد معلق عندي وبيتوعدني بأنه هيبهدلني وانه هيشتمني شتيمه ابيحه تطفش كل المدونات البنات من عندي بسببها مش عارف هو فاكرني فاتح كوافير حريمي ولا ايه
وسبحان الله انا مقريتش تعليقه لأني كنت قافل النت يومين كده وبعدين رجعت لقيت سووو حبيب قلبي دخل ورد عليه وهو بقى سخن عليا انا وسووو وبيتفلسف المصيبه بقى انه مطلعش انينيموس يا برنس
ده عنده مدونه فيها بوست يتيم بيشتم فيه الأهلي ويشجع الزمالك

ابقى تعالى اتفرج وشوف انا ناوي لما افوقله ابقى اعمله بوست لوحده بس لما افهم اصلا الأتهام اللي هو حاطه عندي بناه على ايه بالظبط

سلاااااااااااااااااااااام
اخوك ايهاب

دعاء مواجهات said...

ههههههههههههههههههههههه

بجد تحفه

ايه الخبرة العاليه ف علم الأنينيموس دى

دا انت تعمل

ماجيستير ف الأنينيموس ياراجل

وانت تناقشك فيه بردو

وانا هصقف

بيس

محمد عبد القوى said...

فى نوع انا عايز اضيفه ، وهو الانينيموس الأنتيم :
وده عبارة عن صديق لك انت عارفه كويس وعارف انه ملوش فى التدوين ولا مواضيعه ولا الليلة دي ن وان تامر حسنى عنده احسن من اديب حصل جايزة نوبل
دا بيدخل من باب الرخامة ويقعد ينتقد مواضيعك بشكل حاد قوى ..دا بيسبب كأبة للمدون اللى مابيكتشف ان ده صاحبه ويفتكره عابر سبيل ولا حاجة
لكن اللى رد الفعل بقى بيختلف ويتباين مع اللى بيهرش الليلة مابين غضب وضحك ورد ساخر وتجاهل

StEElBeaUtY said...

عايزة اقول بجد ان الموضوع فى محالة

بس بالنسبة لموضوع الاستظراف او قول كلمة ع سبيل الدعابة امر هام للكاتب لو تسال اغلب الناس بيحبوا يقرواء جريدة اية هتلاقيها الدستور ومن الاسباب الغالبة طريقة الكتاب فى الكتابة والداعبة التى يستخدموها فى الكتابة ولان الناس بيحبوا يحسوا ان الحياة بسيطة وانا نفسى اتبع هذا الاسلوب فى مدونتى لكن لاسف انا دمى تقيل ومش عارفة ازاى اكون خفيفة على الناس

وع فكرة من الاشياء الللى بتخلينى متبعالك يا خالو انك بتستخدم اسلوب جريدة الدستور

م/ الحسيني لزومي said...

شوف يا خال انا من سوء حظي اني لم اتعرف علي مدونتك من زمان ..المدونة رائعه وايجابية وتطرح موضوعات فعاله...واعزرني اذا كنت في اول مرة اعلق علي مدونتك يكون لي طلب عندك...اتحاد مدوني اسيوط تحت التأسيس بدأ حمله شعبيه للقيد بالجداول الانتخابيه من مدونتي "مواطنون ضد الشعب" والذي سوف يبدأ في اول نوفمبر وانا كلي امل في مساهمه منك في تفعيل هذه الحمله.
ولكم جزيل الشكر
م/ الحسيني لزومي
www.moatnondedelsh3ab.blogspot.com

د\أسماء علي said...

خالو أحمد

أنا حاليا قاعدة تحت المكتب من كتر الضحك اتزحلقت من الكرسي

أصل أنا بقى طفشت من الانينيموس من زمان و رحت لاغيت المجاهيل

رااااااح ايه بقى

ربنا كرمني بأكونت مالوش مدونة كان نفسه بس يقولي انه مش طايقني

لله ف الله كده

ههههههههههههه

أما قبل الغاء المجاهيل كان ربنا كارمني ب انينيموس قمررررر
بيدخل في كل بوست يكتبلي قصة تافهة و هبلة زي صاحبتها

أنا لولا إني باريح دماغي كنت عايزة اسأله طالما تعرف صاحبة المدونة ممكن تكلمها اي يكلمني ويقولي اني تافهة ولو مايعرفنيش يقولي حيثيات اكتشافه الرهيب المريب ده

و طبعا ربنا كرمني بالأنينموس الأمور اللي قلبه رفرف لما لاقى مدونتي اللي تدل اني مرهفة وركيكة وكميلة ونتعرف بقى

هههههههههههههه

كفاية كده

الموضوع جميل جدااااااااا بجد

Soul.o0o.Whisper said...

السلام عليكم و رحمة الله و بركاته

معلش يا خالو متأخرة
أنا كنت قرأت الموضوع والله
بس ماكنش عندى وقت اعلق


بس بصراحة ماكنتش قادرة امسك نفسى من الضحك
خاصة بتاع الافتتاح دا
دا جارك دا الظاهر عليه ابيييييييييييييض
إيه دا؟؟؟!!!....
هههههههههههههههههههه



و بعدين يا خالو العيب على المدونين
هما اللى مش بيرقوا مدوناتهم
ههههههههههههههههههههههه

بعد كدا ننزل رقية المدونات
لعل و عسى تنفع مع الناس دى
هههههههههههههههههههههههه



خالص تحياتى

ola_barakat said...

تصدق ان واحد دخل علي مدونتي ونقل لي كوبي وباست حوار بين واحد مدون وواحده ع الشات وبيقول انها عميله للموساد وبتحاول تجنيده لانه مش عارفه مهندس ايه كده
وانا مااااااالي ياعم هو انا هاروح ابلغ عنه ؟
مع العلم ان الشخص ده مدخلش عندي الا مره واحده بس ولما دخلت مدونته لقيتها صعبه جدا لانه بيتكلم ف الفيزياء
ده طبعا غير المجهول التاني اللي بيدخل يقول حاجات مالهاش معني ف الاصل
والاعلانات الغريبه بتاعت التضامنمع حاجات ماسمعناش عنها قبل كده
لا وبتكون اعلانات طويييييييييله اول ما اشوفها قبل ما اقراها بافرح واقول ده اكيد عاملتحليل نقدي للموضوع افجأ باعلان عن اي حاجه تانيه بس بجد موضوعك تحفه انت حللت الناس دي وقسمتهم صح
ربنا يجعل كلامنا خفيف عليهم بقي

Anonymous said...

اتقى الله يا أحمد يا صباغ
عليك اللحمة
و البتنجان
يا زنديق يا فاجر

أتسب الأنونيموس الدرويش

انهم قلوبهم عامرة بالإيمان عنك يا عدو الدين يا منحل

هذا و أدعو الله ان يهديك الى الطريق القويم

و ان لم تهتدى فالى الجحيم غير مأسوف عليك
و لا تلومن الا نفسك

ـ-ـ- أحمد عبد العدل-ـ-ـ said...

Anonymous said...
حصة العملى بدأت ولا ايه؟ ههه

البرنامج الأذاعى انت تسال والكمبيوتر يجيب said...

الصديق العزيز احمد الصباغ
اولا الموضوع جميل جدا
ايه رايك لو نعمله فى حلقتين من برنامجنا الأذاعى؟
وبالمناسبه نحييك على الهواء على انشطتك المتنوعه فى حلقة
الحميس 23-10
طبعا البرنامج يذاع على أذاعة البرنامج العام
اف ام 107 واربعه من عشره تسعه وعشره صباحا
ومدونتنا
http://netonradio.blogspot.com

كرانيش said...

احسن حاجه فى مواضيع يا احمد
انك مختلف بجد
فى اختلاف ما فى كتابتك
حاجه نفسنا نكتب عنها ولما بنيجى المدونه بنلاقيها
هو ده التميز
بقترح عليك برضو تصنف التعليقات بتاعه المدونين وتصنف المدونين نفسهم

تحياتى

عمر said...

ههههههههههههه

صحيح بوست قديم زمناً لكن بجد انت كل بوستاتك جديدة معناً

دمك خفيف والله يا أحمد

تحياتي يا باشا

ahmed said...

رائع ياخال .. بصفتى مدون كى جى وان باشكرك جداً وبوصى بتدريس البوست ده فى مدرسة المدونين
على فكرة جالى واحد لطيف عامل اسمه على اسمى بس مزود اسم تالت فى الاخر وقال للناس اللى فى المدونة (تحياتى ) بصراحة أرق عفريت شوفته
تحياتى

ali said...

البرنامج الأذاعى انت تسال والكمبيوتر يجيب said...

الصديق العزيز احمد الصباغ
اولا الموضوع جميل جدا
ايه رايك لو نعمله فى حلقتين من برنامجنا الأذاعى؟
وبالمناسبه نحييك على الهواء على انشطتك المتنوعه فى حلقة
الحميس 23-10
طبعا البرنامج يذاع على أذاعة البرنامج العام
اف ام 107 واربعه من عشره تسعه وعشره صباحا
ومدونتنا

zaid said...

ده طبعا غير المجهول التاني اللي بيدخل يقول حاجات مالهاش معني ف الاصل
والاعلانات الغريبه بتاعت التضامنمع حاجات ماسمعناش عنها قبل كده
لا وبتكون اعلانات طويييييييييله اول ما اشوفها قبل ما اقراها بافرح واقول ده اكيد عاملتحليل نقدي للموضوع افجأ باعلان عن اي حاجه تانيه بس بجد موضوعك تحفه انت حللت الناس دي وقسمتهم صح