خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Oct 24, 2008

أهــــم عشر حــاجـات فى حــياة ليـــلى




1
الرغى
عندما تجالس ليلى لعدة مرات تشعر وكأنها بالعة كلبة والده – لكن إذا كنت خبيرا بأمور ليلى فأنك تستطيع أن تميز عدة أنواع من الرغى
اولها : رغى فطرى ينشأ مع البنت بعد انتهاء الرضاعة فتجدها تتحدث مع أمها ومع أختها ومع دميتها ومع أخوها الرضيع ومع عمو حسن ومع جدو عباس اللى عمره 130سنة بالميت ، واخيرا لو مالقتش حد .. ترغى مع نفسها فى المرايه
ثانيها : نوع من أنواع الرغى يتولد مع شعورها لأول مرة بالحب ، فتجدها بتدلدق كلام مع كل صديقة ومع كل أفراد العيلة - نفر نفر - فتشكو وتتنهد وتكتئب وتنبسط وتكتب كشاكيل مذكرات وتملأ سطح مكتبها بالاشعار والقلوب والاسماء وتملأ درعها بالتاتوهات
ثالثها : نوع يظهر فجاءة إذا جلست ليلى فى وسط شلة ليلاوات ، فتجدها تبدع إبداعا مبهرا فى تفسير مقتل سوزان تميم ، وطريقة عمل طاجن المسقعة باللحمة الضانى ، وسر علاقة البت رنا بالواد حمبوزة ، ورأيها فى فستان البت عبير ، وخناقتها مع باكينام ، وخروجتها مع سوزينام فى أحاديث مالهاش آخر
وهكذا .. فإن الرغى سمة أنسانية رفيعة المستوى تميز ليلى .. وتفسير هذة الظاهرة على ما يبدو لى إن ليلى محرومة من بعض مميزات الرجل التى تجعلة أقل كبتا .. مثلا : ممنوع الخروج الا لسبب ، مع إن اخوها ممكن يخرج بسبب : إنه مش لاقى حاجة يعملها


2
النكـــد
وهو مرتبط بالطبيعة المنزلية حيث ان ليلى فى جميع أعمارها تقضى فى المنزل اكثر من ما يقضيه الرجل ، وتقل صفة النكد فى المرأة العاملة – لإنها مش فاضية - وتقل فى أيام الدراسة ، وتزيد فى الاجازات الصيفية ، وتزيد مع ليلى ربة المنزل الى أقصى حالاتها



3
ماما
دائما ما ترتبط ليلى بأمها سواء قبل الجواز أو بعدة .. قبل الجواز تحب ترجع من برة تحكى لامها كل حاجة عن حمادة اللى وقفت معاه انهاردة وعن هيثم اللى جه يستلف منها كشكول المحاضرات ، وعن سميح اللى حاسة بحاجة كدة ناحيتة بس مش عارفة ايه دى .. وغالبا بتكون الام منهمكة فى تقميع البامية بس مدية حس لليلى قال يعنى بتسمعها .. وفى الآخر تختم ليلى كلامها : ياترى ايه الاحساس اللى أنا حاسه بيه ده يا ماما ؟؟ تقوم امها تقول لها : ناولينى صينية أخرط فيها البطاطس



4
الشوبنج
عشق أبدى لا نهائى غير محدود .. للف فى وسط البلد وفى كايرومول وجنينة مول والعتبة وزنقة الستات وطلعت حرب وشارع الشواربى وكارفور وهايبر وفى محلات الأحذية والميك أب والملابس والطرح والـ - لامؤاخذة - اللانجيرى والعطور والاكسسوارات وغيره
تموت ليلى فى اللف على المحلات وفى المولات حتى لو مش هتشترى حاجة وغالبا يشاركها رحلة الشوبنج ليلى تانية زيها .. لان فى الظروف العادية مفيش راجل بيستحمل الرحلة دى إلا إذا كان من فئة ذوى إحتياجات خاصة يطلق عليها مجازا الأزواج



5
الطبيخ
لازالت صفة عشق الطبيخ موجودة فى ليلى المصرية الأصيلة رغم تدهورها كثيرا فى بنات اليومين دول عن بنات زمان ، تبدأ ليلى حياتها بكتاب الطبخ مثل كتاب أبلة نظيرة أو كتاب تعلمى الطبخ فى تلات أيام –ما كانش حد غلب – وغالبا تضع ليلى الكتاب على يمينها وتحت ايديها حلة وفي إيديها بصلة وسكينة وتقرأ .. خرطى البصلة وضعى ملح وفلفل وانتظرى حتى تحمر البطاطس .. الخ
ثم تبدأ ليلى مرحلة جديدة بعد الجواز مباشرة حيث تكتشف فجاءة وبدون مقدمات إنها لا تجيد الطبخ ، وإن كل خبرتها (الطبيخية ) هى تحمير البطاطس وعمل المكرونة بالصلصة .. فتبدأ زيارات أم ليلى لها ومساعدتها فى المطبخ .. كل هذا وزوجها البائس منتظر على أمل أن تجيد ليلى الطبخ يوما



6
الاطفال
عندما ترى الآنسة ليلى طفلا زغنونا فإنها سرعان ما تفرد دراعها قائلةً : يا خلاسى يا اختى كمال امو يا ناس .. عكس الرجل اللى بيتعامل مع الطفل بمطنق : غووور ياض منها هنا
وعشق ليلى للاطفال يمر بمراحل مختلفة
ليلى الطفلة تحب تشيل أطفال العيلة اللى أدها وغالبا بتقع هى وهما هى جدور رقبتهم
الانسة ليلى تحب تشيل ولاد صاحبتها اللى اتجوزت بدرى وخلفت عيل وتلاعبة فى مرح لا يخلو من غيظ وحسد
ليلى الأم تنظر لأى طفل مشخصة حالتة : ده بيكح الواد ده بيتعرى بالليل ، وده عنده انتفاخ وإسهال اديلوا انتوسيد والواد ده شبه خالتو سميحة وده طالع لخالو عبشكور
ليلى الجدة حيث تختم ليلى حياتها رافعة شعار أعز الولد ولد الولد فى حين تتعامل مع أولادها الكبار بنفس ذات المنطق غوووور ياض من هنا



7
الخياطــة
نادرا ما تجد ليـــلى ليس لديها ماكنة خياطة (سنجر) او (نفرتيتى) ، وتجد ليلى فى جميع مراحل عمرها مهتمة بالخياطة ، ليلى الطفلة تخيط فستان لعروستها ، وليلى بنت ستاشر سنة بتخيط شنطة لنفسها وبتطرزها وتحط لها ترتر ، وليلى الام تلم شربات العيال وتخيطها ، وتخيط زراير القمصان المقطعة



8
الدهـــب
لا يعبر حب ليلى عن طمع أو جشع لكنة طبيعة أنثوية فطرية ، أول ما البنت تتولد يجروا يخرموا ودانها عشان يجيبوا لها ( حلق ) بتاع ربع جرام ، وتتوالى مظاهر حب ليلى للدهب عبر سنوات عمرها ، شوية تمشى تشخلل بالدهب اللى فى ايديها ، وشوية : أنا عايزة خاتم يابابا ، وشوية البيت واقف على رجل واحدة عشان فردة حلق ليلى ضاعت فى الاوتوبيس ، وحتى فى الازمات أول فكرة دائما فى دماغ ليلى الزوجة هى : خد بيع حتتن الصيغة دول يا أبو فوزى



9
الجنــس
تسبب العادات والتقاليد المصرية التى تضع خطوط حمراء للحديث عن الجنس تسبب فضول دائم للست ليلى من أول ما تدخل سن البلوغ الى ما بعد الجواز ، ويصل إلى ذورته عند بلوغ سن الجواز فى العشرينيات من عمرها ، لكن الهوس الجنسى لـ ليلى مصرية هو هوس راقى لا يتعدى حديث هامس مع صاحبتها ليلى بشرطة ، أو إنبهار من حديث صاحبتها ليلى المتجوزة حديثا



10
اللبس
تعانى ليلى فى جميع مراحل عمرها حالة إدمان من النوع الخطر لشراء ملابس جديدة ونادرا ما يمر إسبوع على ليلى إلا وتكون اشترت فستان أو تونك أو بلوزة أو بدى أو جيبة أو طرحة أو شراب فيلية أو جزمة أو صابوه أو توكة شعر أو معصم وغيرة
وتجد دائما دولاب ملابس ليلى يكفى لكساء حى شبرا وإمبابة بعد فتحهم على بعض


وإنتو – يا ترى – بتحبو إيه ؟

أحمد الصباغ

61 comments:

دعاء مواجهات said...

عندما يكون الحديث عن ليلى

يبقى لااازمن نحجز الاول ونعوود

راجعالك

.........

محمد الكومي said...

انا بحب البطاطس بالكفتة

دعاء مواجهات said...

ياعم كومى

انت واقفلنا


؟؟ع باب المدونه ولا ايه

هو الواحد ميعرفش يتكلم الا ويلاقيك

ناطط

وبعدين دى مدونه مش مطبخ بيتكوا

ياعمنا
ماشى ياعم..

محمد الكومي said...

يعني هو انتي كنتي غفير المطبخ يا دعاء ولا يعني واقفة تعدي علينا اللقمة ماتسيبينا نسترزق

اقولك قومي يالا زبطي السلطات و كدة

دعاء مواجهات said...

نيجى بقى للصباغ باشا

واللى إتضحلى انو بينقصوا داتا

كبيرة جدا وضخمه جدا عن ليلى

القرن الحادى والعشرين

ليلى اللى بقت ند فى مجالات العمل الكتيرة

ليلى اللى مصممه تنجح وتتوجد ع الخريطه

ليلى اللى بتفكر بعقل واقعى وبتفهم كل حاجه ومع ذلك تصر على اظهار جهلها بكل حاجه

لسبب ما فى نفسها

ليلى اللى بتاخد كل قلم من الناس اللى حواليها ف الشغل والأصحاب والعيله وبرغم دة بتحبهم بردو

ليلى اللى برغم زعمها انها تجيد التفكير بعقلها الا انها رغما عنها تفكر بدقات قلبها

============

عزيزى أحمد


ربما أدمنت ليلى الرغى فعلا

ربما حاولت التظاهر بما ليس فيها

ربما حاولت رسم شكل خيالى لذاتها

ربما أوهمت نفسها بواقع غير موجود

لكنها

بالتأكيد

مازالت تحافظ على جزء مضئ فى ذاتها

ينير لها ما تبقى من

أوقاتها

ليلى ليست فقط ما ذكرت

فهناك ليلى اخرى أغفلتها

لكن هذا

لا يمنع من الاعجاب بالأسلوب الساخر المتميز

تحياتى اخى العزيز

...

Soul.o0o.Whisper said...

لحد ما خلصت قراءة ماكنش فى كومنتات

طب أحجز تالت مكان بسرعة

رحيق الحياة said...
This comment has been removed by the author.
دعاء مواجهات said...

ايه ياعم كومى

سلطات مين يابا

انت شايفنى شيف هنا ولا ايه

رووح ياعم اعمل لنفسك

بيس

محمد الكومي said...

بيس ازاي من غير ما تعملي واجب يعني

ناقص كمان تقوليلي اخدلي فمين غسيل

Ahmed Al-Sabbagh said...

باااااااااس
ليلى والكومى
قصدى دعاء والكومى
احنا هنتخانق ولا هناكل قصدى هنقرا

Soul.o0o.Whisper said...

بص يا خالو


مش عارفة بصراحة ...فى حاجات من دى ماليش فيها

تفتكر دى ظاهرة صحية و لا ايه؟؟
يعنى مثلا مش باحب الدهب
و لا ليا فى الطبيخ
و لا الخياطة

و كمان الرغى
صحباتى بيبئا نفسهم أنطق بأى حاجة
بس أحيانا باستجيب لإغراءاتهم
ههههههههههههههههههههه

و بالنسبة للشوبنج فعلا مش بانزل الا مع حد من صحباتى

اممممممممممممممممم
بالنسبة للنكد
بردوا مش باحبه
بس يمكن اوقات يعنى


ايه تانى؟؟؟
الملابس

يمكن عندى ...بس مش كتير اوى كدا
أصلى مش باحب الكركبة
و باحب البساطة لابعد الحدود

اممممممممممم
لو حاجة جدت فى الموضوع هاقولك


بس بجد موضوع تحفة
ضحكت عليه اوى



خالص تحياتى

دعاء مواجهات said...

معلش يااحمد كلمه

وهمشى

ما تاخد ياعم وهو انت صغير

ولا آجى اعلمك تاخدهم إزاى

يلا رووح

من غير بيس

خسارة فيك
....

محمد الكومي said...

يا عم انا هاسبها بس تعاطفا مع حالة المنزل اللي اكيد محتاجة لها

بيس يا خال

بيس يا دودو

محمد الكومي said...

طيب انا اخدهم و انتي هتعملي ايه

اوعي تقولي ان دورك اشرافي يعني تقعدي تديني توجيهات بس

لحسن ازعل بجد

انتي اصلا تناميو تحلمي بالغسيل خلصان تقومي تلاقيه مكوي

و سحبت البيس بتاعي

نيجار said...

خالنا احمد الصباغ
بالنسبه لموضوع ليلي
انتم في مصر ليلي بتاعتكم بسكوت
(طبعا مش الكل)
بس ليلي في الصعيد ليلى تانيه خالص ولو شفت مآسي ليلى عندنا هتبكي عليها بكل فخر البنت الصعيديه بتعيش ازهى عصور الجاهليه واكبر مصيبه في حياتها إنها بنت يعني أنثى
المهم (مدون سابق) سايبلك تعليق وعايزك تقراه
أنا قلت اقولك برضه
بس والنبي يا جماعه والله الدنيا ما مستاهله واحنا كلنا إخوات وياريت يا خالو مش عايزه دم في المدونه بتاعتي اه اديني بقولكم
وبص انا هنزل ردي على تعليقك عندي هنا كمان ده علشان اذا كسلت تقراه عندي
وسلام مؤقت

نيجار said...

خالنا احمد الصباغ
المشكله مش عارفه ليه الكل فاكرني انا اللي عملت الوثيقه طيب هسألك سؤال انت شفت إسمي من ضمن اللي كانت مكتوبه اسمائهم في الوثيقه طبعا انا كان يشرفني اني اكون من ضمنهم بس ده ما حصلش لإني اساسا عرفت بالموضوع بعد ما اتعملت ومش معني اني انشرها عندي اني اكون انا اللي عملاها وغير كده مادام حاجه انا مش كتباها يبقى مش من حقي اعدل فيها على مزاجي وده ما يمنعش اني في حاجات كتير عجباني فيها ومقتنعه بيها جداً وانا قلت الكلام ده وانا والله ما حدش اتعرض لي باي تجريح اوكلام من ده بس لما اشوف بعيني كلام قذف واهانه وقله ادب لناس غاليين عليا ده طبعاً حاجه تحرق الدم انما الحوار بهدوء وادب مين يقدر يقول عليه حاجه لما انا برضه في حاجات معترضه عليها بس قلت هقول وجهة نظري في المدونه المعموله علشان المناقشه
وبعدين مين قال نقاطع المسيحيين ولا نقاطع اي حد ، انا ضد الكلام ده تماماً بالعكس ده كان اول بند احترام الاديان والاعتقادات وعدم التجريح فيهم يبقى ده اسلوب ناس عايزين يقاطعوا حدا وغير كده انا السنه اللي فاتت محققه في قضيتين كبار فتنه طائفيه والحمدلله ربنا ساعدني اني اطفي نار الفتنه اللي كانت حصلانه وده برضه لإني فاهمه معنى الحياد كويس والعدل وبالنسبه لمدونات الشواذ انا طبعاًدول بس اللي انا مع مقاطعتهم بس مش مع تعريف المدونات بيهم لاننا بكده غير اننا بنشهرهم
كده احنا هنفضحهم وده حرام وحتي علشان اذا ربنا شاء وهداهم فأهلا بيهم وربنا هو اللي بيحاسب مش احنا يعني في افكار برضه كويسه في الموضوع بس مش اجبار ولا فرض على حد لاني زي ما بحبش ان حد يفرض عليا حاجه ما احبش انا كمان افرض حاجه على حد
ياريت توصلك وجهة نظري اللي ماحدش عارف يفهمها .
وتحياتي ليك

Ahmed Al-Sabbagh said...

نيجار
انا شوفت التعليقات عندك ورديت عليها
سيبك انتى
ليلى الصعيدية جدعة

بنوته مصرية said...

هههههههههههههههههههههههه

بقي ليلي كل دول

هههههههههههههههههه

الموضوع ساخر جدا

اقولك سر يا خالو

انا مع انكل فوزي

دعاء برافو عليكي ايوة كدا وريهم شغلهم

Ahmed Al khashab said...

أنا مع أنسة دعاء أن ليلى مختلفة تماما و كمان على مر العصور مش العصر ده بس
بل على العكس بنت العصر ده لسه مش وصلت لمرحلة كانت فى عصور سابقة بس ده مش ذنبها و إن كانت تتحمل جزء منه

و إن كنت متفق معاك يا أحمد فى موضوع النكد اللى من غير سبب
نكد من أجل النكد
كان فيه نكتة و أنا صغير سمعتها فى التلفزيون و لا الراديو بتقول " كان فيه راجل مراته بتنكد عليه فاتفقوا أن النكد يبقى يوم الخميس فرجع من الشغل يوم الأربعاء لقاه فرحانة و عمالة تغنى بكرة النكد بكرة
"

المشكلة عندى مع ليلى يا أحمد أنى حاليا و أنا ببحث عن عروسة مش لاقى ليلى المثقفة الثقافة الكافية زى أى واحد صاحبى اتكلم معاه
يمكن لأن حياء ليلى بيمنعها أنى اتعرف على مستوى تفكيرها بأسلوب أعمق

اخيرا كان نفسى اقابلك فى لقاء مدونى الفلاحين الشراقوة فى الزقازيق
:D
بس كنت لسه مش رجعت من الكلية لأن كليتى فى القاهرة
خيرها فى غيرها

wafaa said...

ظلمت ليلى يا خالو
بتغى عشان ما تنفحرش وضغطها ما يعلاش من جوزها وعيالها
النكد بقا ده مجرد رد فعل مش طبيعة فطرية, حد يعمل قلق هيا تنكد عادى جدا
ماما بقا هوا فى زى الام وحنان الام ؟
ماما هيا امى
الشوبيج بقا هيا يعنى هتتشوبنج لمين غير جوزها ؟ لازم يتحمل .. عقبال كده اما نشوفك من زى الاحتياجات الخاصة
الطبيخ لان اقرب طريق لقلب الراجل المصرى معدته دى اعتقد المفروض تعجبك
الخياطة دى ليلى المثابرة صاحبة البال الطويل وده اللى هيخليها تصبر على جوزها ومصاعب الحياة
وتعبت من الكتابة بقا
نكمل رغى وقت تانى
سلام

فاتيما said...

يا لهوتينى يا صباغ
هما دول أكتر حاجات شايقهم فى ليلى ؟؟
طب مفيش حاجات تانية كويسة حبتين
إيشحال ما كنت عن طريق التدوين قابلت ليلات كتيرات دماغهم ما شاء الله كويسة و متكلفة
طب قول بوقين حلوين زى إنها جدعة زى آبى و خيخة
و لا حنونة زى رودى و شاهىو فنانة مفروسة
و لا دماغها حلوة قوى زى دعاء مواجهات ومها زين و مهاميهو احسن تستاهل
و لا دمها خفيف موت زى لماضة
و لا ....
و لا .....
و لا ...........
يا لهوتين لهوتينى دا النمالذج رهيبة يا خالو
سبت الشقة كلها و قعدت فى أوضة واحدة
مااااااااااش
ليكم يوم يا فوزى هنطلعه على حبابى عينين الناس اللى واقفين جنب فوزى
...بجد بقى
دمك خفيف يا خالو و تحياتى ليكى

بت خيخة وأى كلام said...

اه انا احب ارغى اوى مع واحدة تكون ليلى


النكد من طرفنا بيكون رد فعل على نكد من طرفكم
احنا بطبيعتنا بنحب الفرفشة
بس انتوا ربنا يخليكوا لينا ومنتحرمش منكم ابدا
بتعمنلوا تصرفات تطلع عين اللى خلفونا وبنبقى عايزين نعضكم



ماما
!!!!!!!!!!!!!!!!!
انا بصراحة عمرى ما قلت لامى على اى حاجة
وفيه بينى وبينها
علاقة نائر ونئير دايما




اه انا احب الشوبنج
واحب اكتر انى اتفرج على المحلات
انا فطست على روحى من حتة واحد من ذوى الاحتياجات الخاصة
يسمى مجازا جوزها
هههههههههههههههههههههههههه
يارب يا احمد ربنا يبتليك بالاحتياجات الخاصة دى وتسمى مجازا زوج



الطبيخ
اه اعرف اطبخ كويس اوى والاكل بيطلع منى يجنن
لكن انا بعترف وبقولها بصوت عالى
انا بكره الطبيخ
وبكره وقفة المطبخ
وبحب اكل الشوارع



الاطفال
كلامك منطقى
بس فيه حاجة
ان الست لما بيكون عندها اطفال
بيكون كل همها
البحث عن حد بيحب ابنها اوى
علشان تلزقله للواد
علشان هى بتكون عايزة تقيل شوية

مابحبش الخياطة ومابحبش الدهب

الجنس
!!!!!!!!!!!!!!!!!!!!!
يا كزوفى يا كزوفى
اه يا قليل الادب



اللبس
لو كنت امرأة عاملة كنت هاشترى لبس كتير علشان يكون مظهرى كويس فى الشغل
لكن عادة انا معنديش لبس خروج كتير
لكن عندى بيجامات كتير


وكل الكلام اللى فوق ده نطلع منه بحاجة واحدة بس

جاتها نيلة اللى عايزة الجواز

وجاته نيلة اللى عايز يتجوز

وجاتهم نيلة هما الاتنين اللى عايزين يتجوزا



سلام
اختك خيخة

~*§¦§ Appy §¦§*~ said...

لو عملوا مسابقه فى الرغى يا صباغ
انت هتاخد الاول
بطل يا سوسه بقى احسن لك انا بحنذرك قدام الجماهير الغفيره دى كلها

زهرة الجنة said...

طبعا الراجل فكرته هي هي مش هتتغير
وزي كل فوزي يا أحمد شوفت الجانب السلبي ومخدتش بالك من الجانب الإيجابي

الرغي
مش في ليلي بس كمان في قوزي لدرجة انه ممكن ياكل دماغك من كتر الرغي

النكد
النكد هو النكد لو كان صفة في ليلي هيكون معاه في البيت وتنكد علي فوزي وكمان في الشغل وتنكد علي زميلاها
حتي سواق التاكسي اللي هتركبه هتنكد عليه..يعني مش مصاحي لليلي غير العاملة

ارتباط ليلي بمامتها
مهما كان ارتباط ليلي بمامتها الا بعد زواجها فالارتباط ده بيقل ولو ده مش حصل بيكون العيب في فوزي
ومن رأيي تكون ليلي مرتبطة بمامتها أحسن ما يكون فوزي مرتبك بمامته والا ايه رايك؟

الشوبينج
ده شيء صحيح متأصل في ليلي لان ذوق ليلي دايما رائع وحلو جدا
اما فوزي فأختياره للألوان بيكون دايما ملهوش علاقة ببعض
ومتقدرش تنكر يا فوزي قصدي يا أحمد ان فوزي لما يكون مبهدل ومش كاوي هدومه بيكون معندوش ليلي تعمله كده
لكن لو في ليلي أكيد بيكون انيق للغاية

الطبخ
من الغرائز في ليلي انها تحب المطبخ
وده العادي لانه من صغرها مامتها بتعودها علي كده


الأطفال
حب ليلي للأطفال ده شيء غريزي لان كل ليلي في الدنيا جواها الأمومة شيء آلهي
بعكس فوزي طبعا

الخياطة
ليلي بتحاول التكيف والأقتصاد في المصروفات بتخيط القديم او بتصنع شيء بنفسها وطبعا ده شيء حلو في ليلي

الدهب
يمكن زمان ليلي كانت بتحب الدهب
لكن الايام دي الدهب بالنسبة لليلي مش مهم ووجوده لمجرد احتياطات للأزمات في زمن أسود

****************
يا فنان
كل ليلي وكل فوزي بداخلهم ما هو أجمل من الدهب والماس ولكن يحتاجون لآزاحة الأتربة من عليه

وبرضه فوزي ميقدرش يعيش من غير وجود ليلي في حياته

الا ايه؟؟؟؟

كلام على بلاطة said...

بس
يكفيها الشوبنج
تحياتى

نهله said...

بصراحة عندك حق فى كل اللى قلته , لكن فى ليلى كتير انت نسيتهم ذى ما قالت دعاء

عن نفسى انا عملت اول حاجة من العشر حاجات دلوقتى .. دخلت مدونة خالو احمد

اسمحلى أبدى إعجابى بكل ما تطرحه من روائع

someone in life said...

ليلي ليلي ليلي
ليلي مختلفة في كل بلد و يمكن من منظقة للتانية

ليلي المصرية واخدة حقها و زيادة
ليلي في بعض البلاد تباع مثل الرقيق
ليلي ليس لها حقوق و مقهورة
اقرأ عن نوعيه جديدة من ليلي
http://samahasan.maktoobblog.com/138485
تحياتي لاسلوبك الرائع دائما ما يرسم علي وجهي ابتسامه

انا حره said...

ماكنة خياطة (سنجر) ؟؟؟ انت بتعرف الحاجات دى منيييييين

خليك كدا بنفس الطريقه استمر لحد ما ان شاء الله ان شاء الله مش هتلاقى اللى توافق تتجوزك وتعنس وتقعد فى ارابيزنا

قلب مصرى said...

أولا انا كنت هاموت من الضحك على اسلوبك اللى بحييك عليه والله من غير مجاملة
ثانية كتبت كام تعليق ورجعت مسحتهم علشان مش عارف ارد اقولك ايه كل ما اكتب حاجة الاقيها مش قد كلامك.
فاكتفيت بانى اقولك تسلم دماغك
وطبعا هاتطلع لنا كام ليلى تقول لا يا أحمد إحنا مش كده وتقعد تعد لك اسماء من نوعية سميرة موسى وهدى شعراوى وغيرهن.

ابن حـجـر الـعـسـقـلانـى said...

البوست دة جبااااااااااااااار


يابنى انت موسوعة

بجد بوست ما حصلش

Shereen said...

سرد جميل للخطوط العريضة لشخصية الفتاة المصرية... وجامع الى حد كبير... قللى بصراحة يا صباغ انت بتدور على قصة حب صح؟ انشغالك بالجنس الناعم وفهمك لطبيعته حسسونى بكدة

ابو النجوم said...

احمد
كل يغنى على ليلاه
والظاهر انت اتكلمت عن ليلى اللى تعرفها لكن فيه أنواع كتير من اليلاوات لم تعرفها ولم تتكلم عنهم فمثلا فين ليلى بائعه الخضار اللى على الناصيه وفين ليلى اللى بتبيع مناديل فى الاشاره وفين ليلى الكوافيره وفين ليلى استاذه الجامعه اللى الكلمه عندها بكام وليه وفين ليلى الفلاحه اللى لو حبت ترغى مش هتلاقى حد يسمعها وبعدين انت ناوى تعمل فتنه طائفيه بين الليلاوات والفوزيات . احنا لسه فى الاول ممكن تتراجع وتقول أن أى حد دخل المدونه وكتب الكلام ده
ياعم فوزى انت ناسى ان ليلى غاويه تشترى اكياس سوده وسواطير انت مستغنى عن نفسك عموما لو حصل لك حاجه ماتلومش الا نفسك انا شامم ريحه ريا وسكينه فى مدونتك

ابو النجوم said...

احمد
كل يغنى على ليلاه
والظاهر انت اتكلمت عن ليلى اللى تعرفها لكن فيه أنواع كتير من اليلاوات لم تعرفها ولم تتكلم عنهم فمثلا فين ليلى بائعه الخضار اللى على الناصيه وفين ليلى اللى بتبيع مناديل فى الاشاره وفين ليلى الكوافيره وفين ليلى استاذه الجامعه اللى الكلمه عندها بكام وليه وفين ليلى الفلاحه اللى لو حبت ترغى مش هتلاقى حد يسمعها وبعدين انت ناوى تعمل فتنه طائفيه بين الليلاوات والفوزيات . احنا لسه فى الاول ممكن تتراجع وتقول أن أى حد دخل المدونه وكتب الكلام ده
ياعم فوزى انت ناسى ان ليلى غاويه تشترى اكياس سوده وسواطير انت مستغنى عن نفسك عموما لو حصل لك حاجه ماتلومش الا نفسك انا شامم ريحه ريا وسكينه فى مدونتك

Ammy Atef said...

ليلى ما ادراك بليلى

ليلى كنز مدفون لايقترب منة احد غير وانصهر
احذر ليلى
ليست ليلى التى كتبت عنها هى ليلى التى اقصدها

مهندس مصري said...

هههههههههههههههههههههههههههههههههه
يا راجل
:)

أميرة ويلز said...

طبيخ ايه وخياطة ايه بس ياخالو وسينجر كمان انت جاي من القرن الكام بس دة انت قديم اوي :P

ojg said...

المفتري عليه ربنا
يعني هي هتكون بتلبس عشان مين؟؟
والمصيبة لو مابقتش بتهتم بنفسها
تعملوا فضيحة وتقولوا ايه ده؟؟؟
مراتي مابقتش زي الأول
والطبيخ؟؟
يعني بزمتك انت لو ماتعلمتش الطبيخ
هتاكلو دليفري من عند سمعة بتاع الفول؟؟
والنكد؟؟
من العيال والبيت والمصاريف والحياة والعيشة هو يعني بمزاجها
ده انتوا يا ولود فوزي تخنقوا الصراحه
وينطبق عليكو المثل القائل
لا عاجبهم العجب ولا صيام رجب
حقا
هؤلاء هما اللي يستاهلوا يكونوا فوزي
وليلى ماتنفعش معاكو
انتوا عايزين فتكات اللي تمشيكو ع العجين ماتلخبطهش

يا مراكبي said...

ههههههههه

ده بوست عالمي .. تحفه

ههههه

أخوك المراكبي من ذوي الإحتياجات الخاصة قوي

fashkool said...

الله الله الله الله .. الله يا استاذ احمد انت بتحب ليلى قوى .. وطبعا كلنا بنحبها فى العشر حاجات اللى ليلى بتحبهم كلنا نحب ليلى .. هوا فيه احسن ولا احن من ليلى .. ليلى امى .. ليلى اختى.. ليلى بنتى ليلى بنت الجيران ليلى الزميله كلهن ليلى .. وبرضه ليلى اللى بتنتع صغيرها على كتفها وتروح بيه للحضانه وهى للشغل .. وليلى اللى شايله شنطة الخضار وكمان شايله ليلى الصغيره على كتفها ومروحه على البيت .. وليلى وليلى وليلى .. وليلى الاخيره اللى شايله هم الدنيا معانا .. انهن ليلانا الصابرين فى البأساء والضراءانهن مثل بلدنا الصابره الشامخه التى لا نطيقها ولا نطيق البعد عنها بلدنا التى نكرهها من كتر ما بنحبها بلدنا التى نرفضها ولا نطيق بعدها عن احضاننا بلدنا القاهره والحانيه بلدنا التى لا نطيق سماع اسمها ونغنى لها .بلدنا التى فى القلب وفى العقل....آااااااه

نهر الحب said...

مش هقولك ربنا يرزقك بليلى من النوع اللى كاتب عنه يا صباغ
لكن ليلى اختلفت كتير اوى اليومين دول
بس ابقى ركز هههههههههه

Anonymous said...
This comment has been removed by a blog administrator.
شباب روش طحن said...

بإعتباري إنسان بيكره نفسه شويه

أقدر أقولك إن أنا عايز ليلي تفصيل وبعدين ممكن أوصفها زي ما أحب

وعموما أسلوبك جميل جدا وممتاز إلي حد ما غطي جزء كبير من صفات ليلي هذا العصر لكن طبعا في حاجات كتير جدت عليها غير دي بس عموما

ست البيت said...

يا واقعة بيضة
انت كنت معانا ولا ايه يا خالو
بس بجد بوست يموت من الضحك
يا بني ما تنشر الكلام اللي يفطس من الضحك دا في كتاب

بس مش شايف انك مفتري حبتين يا خالو
دا احنا طيبيييييييييييين
وعلى رأي تيمون
ومقطقطيييييييييييييييين

وبعدين تعالى هنا دا انتوا ابو النكد
دا حتى زمان قالت الحاجة ام سماعين
الندب الطار ولا قاعدة الرادل في الدار
يا غم
يعني انتوا اللي تتحطوا عى الجرح يطيب
دا انتو برميل ساعات بتبقوا برميل غتاتة على فدان عكننة
وياسلام على ضربة بوزكم وانتوا راجعين من الشغل
دا حتى الواد عكرووووت اخويا اللي لسه ما دخلش دنيا اتعدى من صحابة
دا انتوا فيرس
والمهم انو بيحكلنا انهم كانوا في العربية آخر انسجام وبيقسموا على بعض
امال لما رجعت البيت جرالك ايه يا ض منك ليه
فيرس
تموتوا في النكد
وعلى فكرة الستات كمان خدت على النكد منكم
لأن معنى عدم وجود النكد
.
.
.
.
وجود واحدة تانية في حياتكم

الكومي
لم الدور يا كومي
بدل ما الم العيال صحابي ونجيلكم ابو سليمان نروقكم
مالاكش دعوة بدودو
يا لم الدور وعلى مدونتك معتداااااااااااال ماااااااااااااااااااااارش
الا صحيح انتى وهشام مش بتروحوا مصر للتقافو والحوار
؟

اسماء جمعه بنت الشمس said...

يا مشردنا يا خالو
ايه الكلام ده
انت مش قده هتفتح على نفسك جبهة جهنم الليلاويه
اومال لما تجوز
ربنا ما يوقعك فى ليلى من القراشانات
عشان متطلعش عليك التشريد الى شردتهولنا
بس بأمانه قولى على ليلى واحده منااا شفتها كده زى مانت بتقول
ربنا يسامحك
انا هسيب باقى الليلات
يردوا عليك
ليلتك مش فايته

هويدا صالح / عشق البنات said...

طبعا المفروض أتلبس توب ليلى وأوبخك على النظرة النمطية دي لليلى
ده تعميم مش مظبوط يا أحمد
خالص جدا مش مظبوط
لأن ليلى اللي سكنة في الحلمية غير ليلى اللي ساكنة في حلوان
وطبعا أكيد غير بتاعة إمبابة
مصر الجديدة
والقللي
والشرابية وعد بقى يا معلم بقية ضواحي القاهرة وعشوائياتها
فصعب جدا أن تعمم صورة
حتى لو كانت إيجابية
تحياتي يا أحمد

العـابـره said...

أنا بعد كده هغنى وأقول
ماما زمانها ليلى
:)

نخياتى
العابــرة

M.K said...

أنا بحب جدا أقرأ مدونتك..
..........
ليلى الي عاملالكم قلق دي
بتتعامل بفطرتها
......
بترغي كتير...
أثبتت الدراسات أن المرأه تنطق في اليوم كلمات أكثر من معدل نطق الرجل...
بتحب الذهب
حلل لها الذهب بالاسلام
وحرم على الرجال..
لأن الله أعلم بطبيعتها...
.............
الشوبينج...
والله فيه شباب بيحبوا الشوبينج.. أكتر مني كوني ما بحبش الشوبينج كتير
بس لا مانع أروح مع ليلات صحابي بين فتره و أخرى
..................
والأطفال أحباب الله...
مين مش بيحبهم
والرجل بعد زواجه بيبقى
كل يوم مستني ولي العهد
وبيزن على ادماغ ليلى
ها حامل...
..........
شكرا لك يا خالو على الموضوع الجميل
والله يرزقك بليلى الي بتحلم بيها
..........
دمت بخير

mostafa rayan said...

بص يا نجم طبعا انا متفق معاك في كل اللي قلته ماعدا حاجة واحدة
بخصوص موضوع الجنس النسوان دلوقتي عنيهم بقت بجحة قوي خصوصا في الزمندة في ليالي كتير بتتفرج على مواقع جنسية وقنوات جنس ولو مسكت موبايل ليلي هتلاقي عليه كليبات ونكت جنسية خلاص الستات اللي بتختشي ماعدتش موجودة دلوقتي يا احمد
اضف إلى ذلك ان ليلي بتبقي في الشغل او لما تخرج تروح مشوار زي القمر اما في البيت لما بتكون قاعدة قدام جوزها بتكون شبه الشاويش برعي
يعني الراجل بيدفع فلوس مكياج علشان رجالة غيره تستمتع بيه
اضف إلى ذلك ان الست لما بتمسك شغلانه بيجلها احساس غير مبرر من العظمة وكأنها اصبحت رئيس جمهورية وتقولك انادلوقتي ست وبشتغل وتهمل في شئون بيتها رغم انها ممكن تكون بتصرف قد مرتبها مرتين في الموصلات لكنها رغم كدة بتصر عليه وتقولك اصلي بحقق ذاتي .. ذاتك ايه ياوليه هو انتي بتشتغلي كاتبة ولا عالمة ولا اديبة ولا حتي محامية او دكتورة دة انتي موظفة كول سنتر ولا سكرتيرة ولا بياعة في محل .. بس هي قلة عقل
هنعمل ايه يا احمد الجواز في حياتنا شر ولابد منه
والله يكون في عون الرجالة بجد

........................

- بخصوص وثيقة التدوين
اناعايز اقولك اني ماشتركتش فيها واللي وضعوها حطو اسمي عليها من غير ماعرف اي حاجة اصلا وانا فوجئت اني اسمي موجود فيها
وبالنسبة لرأيي عنها انا طبعا معترض عليها فالتدوين مساحة من الحرية المطلقة التي يجب ألا تقيد بأي قيود من حق اي حد يعمل اي حاجة في مدونته ومن حق اي حد يدخل عند اي حد من غير ما اي حد يكون له سلطة عليه او يقوله عملت كدة ليه
تحياتى لك ودمت بخير

الآنسة حنفي said...

نسيت برضه حاجة مهمة خالص

اهتمامها بمظهرها

الميك اب و تسريحة شعرها و كدة يعني

ده بعيدا عن الهزار اللي نت كاتبه باسلوبك الشيك اوي ده

صدقني انا بحييك عليه

يا ريت يا خالو تساعد اختك حنفي شوية عشان انا لسة نونو في عالم التدوين ده

سعيدة جدا بزيارتك و يا ريت تبقى تزورني في مدونتي

dandana said...

إيه ياخالو
إنت شادد حيلك على ليلى ليه
ماتسيبوها ف حالها بقى ياجدعان

على فكرة أنا متفقة معاك على العشر عناوين أنهم فعلآ شى مشترك بين ليلات كتير
بس أعتقد إن التوضيح اللى تحت كل واحد ف العناوين دى بيختلف من ليلى لأخرى
بيرجع لطريقة تفكيرها لثقافتها،لمستوى تعليمها،بيئتها
حاجات كتير أوى بتعمل فروق جوهرية

بأى حال أعتقد إنك عارف الكلام دا وان دا موضوع ساخر ف النهاية
صح..؟
أوعى مايكونش كدا

دا ياويلك من ليلى

t3ban said...

ليلي كتاب مقفول
لا يعلمه ما بداخله الا الله

عاقلة علي ارض الجنون said...

ههههههههه

طب ده كده انا مبقاش ليلي خالص .. هههههه

1
الرغي

و الله عندك حق .. انا عاماله أكتب أكتب أكتب .. ده يكون إيه غير رغي يعني ؟؟


2
النكد

لا أعوذ بالله منه .. لا لا بلاش النكد ده سيرته وحشه .. رغم ان البلوج بتاعتي إسمها أرض الأحزان :)

3
ماما

إطلاقا .. مطلقا بتاتا .. ايه الكلام ده .. معندناش إحنا الكلام ده يا خالو :) .. ده انا نفسي أدخل الجيش بس أي حاجه غير تمريض

4
الشوبنج

عندك حق 100 ف الميه .. انا بيجيلي حاله من الهستيريا و انا خارجه مع بنات يشتروا أي حاجه .. بجد بجد ببقي هعيط ف آخر اليوم .. تلاقي كل واحده عاجباها حاجه .. و مش عاوزه تشتريها .. ليه يا بنتي مش عاجباكي ؟؟ لا ما احنا ممكن لما نلف .. نلاقي حاجه أحلي .. نلف ؟؟!! طب لفوا انتوا بقي انا مروحه .. بجد بجد حاله غريبه بتجيلهم و هما بيشتروا و ممكن يشتروا حاجات مالهاش أي لازمه و كتير نبقي خارجين .. نبقي داخلين سوبر ماركت نجيب عصير أو بسكوت اي حاجه .. نخرج بحاجات تانيه و برضو منجيبش اللي عاوزينه .. بصراحه بصراحه الموضوع ده عاوز بوست لوحده

الطبيخ

إحم إحم .. أكره ما عليا العك .. لذلك مبفكرش أطبخ مطلقا .. مالها سندوتشات الجبنه ؟؟:D
ههههههههه
لا بجد مش بحب اعمل أي حاجه فيها سمنه و زيت كتير و مكونات معقده .. خلينا ف الحاجات الخفيفه كفايه بقي الواحد ممكن يموت من كتر الاكل

الاطفال

ههههههههههه انا مش بحبهم أوي كده يعني .. بس بصراحه انت فظيع يا خالو ..

الخياطه
انا من فئة نادرا جدا .. بابا مكنش بيرضي يخليني أمسك ابره عشان نظري ما شاء الله رهيييب :)

الدهب
احم احم

انا مش بحبه و إستحاله ألبسه .. يع
مع إحترامي لعاشقات الذهب

بس طبعا انا بعشق الفضه :)

الجنس
الثالوث المحرم ف البيوت المصريه .. الجنس و السياسه و الدين .. رغم ان كله بيفتي ف التلاته دول بالذات ..


اللبس
ههههههه
بيتحايلوا عليا و الله يا خالو أنزل أجيب لبس جديد :)

شكلي مش ليلي اللي انت تعرفها خالص :)

amr said...

جميل البوست يااحمد

بيعجبنى اسلوبك كتيرررر

ودايما متابع مواضيعك

وانا عن نفسى بشترك

مع ليلى فى زياره مدونه خالو أحمد

فى انتظار جديدك

خالص تحياتى

dreem said...

حلو اسلوبك بالرغم من سخريته
بس قول لى : هما مين اللى بسألهم انتوا بتحبوا ايه ؟؟

بسمة ولكن.. said...

ليلى اتغيرت خالص دلوقتى يا خالو
.
.
ليلى اللى بتتكلم عنها دى واقفة ف بلكون تانى خالص
وبعدين اسمها سوسن مش ليلى
(:

حاجات عيال said...

ازيك ياخالو
واضح إن حضرتك خبير في كل امور ليلي
ربنا يخليك لليلي
هل أبو ليلى واخو ليلي وزوج ليلى يستطيع العيش بدونها؟

زوجه said...

السلام عليكم
انا عن نفسي احب الخياطه والتفصيل جدا جدا
ومحبش الطبيخ
ومحبش الدهب الكتير بس احب الازواق تكون حلوه
اما ماما وعلاقتي بيها احب احكي معاها بس اتعلمت يكون خارج حياتي الزوجيه
أما الشوبنج مليش تقل عليه
انا لو نزلت اجيب لبنتي حاجه اول محل اطفال اي حاجه تعجبني اشتريها وخلاص بس بستخير قبلها
اما الاطفال
احب الاطفال جدا ومحبش اسيب بنتي حتي مع امي إلا للشديد الاقوي وافضل اتصل بيهم كل ساعه
ولا احب الرغي
لو حكيت اللي عندي بحكيه وبسكت
ام النكد
فجوزي بيقول اني كنت نكديه
واي حاجه ازعل منها يقولي يانكديه
مع انه ممكن يكون السبب في زعلي ده بس علشان يخلص
أما بخصوص اللبس
فأنا عندي كذا حاجه بنفس الشكل ونفس اللون ونفس التفصيله
علشان كده بكسل اشتري وبخلي ماما أو جوزي يشترولي بالنيابه عني لاني مليش تقل علي الشوبنج
بس والله انت ظالمنا اوي
لو كل فوزي يتقي الله
أاااااااااه هتبقي الدنيا هنا

ذو النون المصري said...

كويس انهم عشر حاجات بس
كل عام انتم بخير

Sonnet said...

مبروك نشر المقال
تحياتى

Anonymous said...

شكرا يا صباغ هى دى ليلى بس والله لو كنا وحشيين اوى كده ياريت تبعدوا يعنى ولا ام ولا اخت ولا زوجة ولا بنت ونشوف فى النهاية مين اللى حيستسلم اوك هههههههههههههه\\بسمة مسلم

angel said...

بص يا احمد انا النهاردة بس حتى قريت اللي انت بتكتبو رائع بجد بس بما اني وحدة من الليلات السوريات حبيت اشاركك الموضوع ده الليلى السورية ميزاتها وباختصار عند الطبيخ مفيش زيها يعني الشيف رمزي عشان عندنا من عمر ال8 سنين بنبدا بتعلم الطبيخ"من دون ذكر محبة الطبيخ او لا "تاني حاجة الليلى عندنا تحب تدلع وترقص وفي المغنى ما فيش بعدها واحسن حاجة فيها انها بتاعت كيف يعني قد ما كبرت وشاخت بتشوفها بتلعب مع جوزها طاولة وورق والحاجات دي وفالوقت الحالي بلايستيشن ليلى عندنا بتحب تلبس كتير عشان كلنا بنعتني فاجسامنا وبنحب نتباها فيها ولو احنا ما عملناش كده انتو حتطلع عينيكو لبرا .اما عن مسالة الرغي فدي طبيعة فاي بنت انها بتتكلم بمعدل 20,000 كلمة فاليوم والراجل بيتكلم بمعدل8000 كلمة يعني المشكلة مش فيهل لو اتكلمت زياده وخلينا نكون صريحين احنا لو ما اتكلمنا معاكو او طنشناكو مش هيبقا للحياه طعم .بس المساله محتاجة تفكير منطقي من الرجالة ومن دون عنصرية وانتو هتشوفو ان ليلى دي من غيرها فوزي هيضيع .شكرا ليك على الموضوع الشيق فعلا انت اتعديت حدود الذكاء بتعمقك فسايكولوجية النسوان