خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Nov 6, 2008

الــ 44 رئيس أمريكى والــ 14 حاكم مصرى

قراءة فى الجانب الحلو فى الرئاسة الامريكية
ان اوباما ده هو الرئيس الاربعة واربعين
"امريكا دلوقت ام أربعة وأربعين"
لأ .. مش دى الحكاية
تعاولوا نلقى نظرة على الديمقراطية الامريكية شوية
ونحسد فى اللى جابوهم
عدد 44 رئيس أمريكى
من اول قيام الدولة الامريكية
سنة 1789م لغاية انهاردة 2008م
يعنى فترة زمنية قدرها 219 سنة
بقسمة السنين على عدد الرؤساء يطلع رئيس كل 4.9 سنة
يا ولاد المحظوظة
طب تعالوا نلقى نظرة على حكام مصر فى نفس الفترة
فترة حكم الحملة الفرنسية - نابليون
محمد على
ابراهيم باشا
عباس حلمى الاول
محمد سعيد باشا
الخديوى اسماعيل
الخديوى توفيق
الخديوى عباس حلمى الثانى
السلطان حسين كمال
الملك فؤاد الأول
الملك فـــــاروق الأول
محمد نجـيب
جمال عبد الناصــر
محمد أنور الســـادات
حسنى مبارك

تلاتاشر حــاكم فى عين العــدو
اللطيف فى الموضوع مش حكاية 13 حاكم و 44 حاكم بس
اللطيف ان جميع الـ 44 رئيس امريكى هم من اختيار الشعب الامريكى
وان الــ 13 حاكم مصرى .. لم يختار الشعب المصرى واحد منهم
اللى خديوى
واللى ملك
واللى سلطان
واللى مش عارف جاى من انهى داهية
إن الفارق بين رقم 14 المصرى ورقم 44 امريكى
هو فارق التقدم والعلم والاقتصاد القوى
والحضارة والقوة السياسية والتفوق العسكرى
والتكنولوجى والنهضة الابتكارية
والهيمنة العالمية
هو فارق شاسع جدا

الفارق ده
وضع أمريكا على رأس قائمة العالم فى كل المجالات

الاقتصادية والصحية
والعلمية والعسكرية
والسياسية والاعلامية
والتكنولوجية والتعليمية ووو

وألقى بمصر فى قاع القائمة
تتصدر الدول المصابة بالفشل الكلوى
والسرطان
والتخلف التعليمى والصحى
والاقتصاد المنهار
والبنيه التحتية المهدمة
والمال العام المهدر
وغياب الحريات وووو
ويجـــعل ويك إندكـــم كله حُــرية

تحديث : نسيت أحسب متوسط العمر الرئاسى لحكام مصر
التعليق ده من أبو النجوم عادل نجم :
نسيت تحسب المتوسط للحاكم عندنا هيطلع كام . أستنى هاأحسبهالك حوالى.. 15.6 سنه يعنى اربعه أضعاف الامريكان وكده نكون اتفوقنا عليهم فى حاجه .نصيحه للجميع لاتتفائلوا كثيرا فا اوباما لن يقدر على التغيير فهناك لوبى صهيونى وهناك مافيا الشركات المتعدده الجنسيات يتحكمون فى كل شىء حتى فى قرارات الرئيس . ولو لعب بديله هيخلوه يروح يزور دالاس ويحصل كنيدى برصاصه الرحمه

ملحوظة : إنتظروا ملف كامل بجميع حكام مصر عبر التاريخ ، وملف بكل رؤساء امريكا بالصور عبر التاريخ

22 comments:

مهندس مصري said...

منتظرين
:)

ابو النجوم said...

صباغ
نسيت تحسب المتوسط للحاكم عندنا هيطلع كام . أستنى هاأحسبهالك حوالى.. 15.6 سنه يعنى اربعه أضعاف الامريكان وكده نكون اتفوقنا عليهم فى حاجه .نصيحه للجميع لاتتفائلوا كثيرا فا اوباما لن يقدر على التغيير فهناك لوبى صهيونى وهناك مافيا الشركات المتعدده الجنسيات يتحكمون فى كل شىء حتى فى قرارات الرئيس . ولو لعب بديله هيخلوه يروح يزور دالاس ويحصل كنيدى برصاصه الرحمه.

fashkool said...

تفتكر يا استاذ احمد ان مصر فى يوم من الايام حيكون فيها رئيس الشعب هو اللى جايبه او حتى سلطان او ملك .. والله يا استاذ احمد احنا مش عايزين نختار حاكم لنا اليومين دول .. اصل ده بقى ترف مش حنقدر عليه عمرنا .. عارف يا استاذ احمد احنا عايزين بجد ايه .. عايزين روبسبير الفرنساوى اللى نصف المقاصل فى كل فرنسا ابان الثوره الفرنسيه .. الا من روبسبير ؟ فيقصف رقبة اللى مأكلينا الطين ومأكلينا الزفت والوكل اللى كله مبيدات مسرطنه وخلافه....

حياة said...

اللى يضحك فى الموضوع ان خلال حكم الرئيس القائد الزعيم ابو الطلة الباهية انتخب الشعب الاميريكى 5 روساء تخيلوا خمسةلواحدوهو دليل ان الشعب المصرى شعب مقهور لكن لابد من التفائل ان سيكون هناك رئيس منتخب من الشعب عام
3008
فافرحوايا شعب مصر

بسمة ولكن.. said...

الغريبة انى لسه متفائلة رغم كل ده
تخيلوا....!!!!!!!!

رئـــــيسـة حزب الأحلام said...

فرق جامد
وربنا يسهل
تحياتى

ojg said...

ياخوفي رصاصه الرحمة تطول حد تاني
استخبى اليومين دول
:))
شوف يا باشمهندس أحمد
كذب من قال أن أوباما سيسعى للتغيير
ظني في أوباما أنه سيلعبها بذكاء كما لعبها في الانتخابات
ولن يختلف عن السابقين
بل أخشى أن يحاول إثبات ولائه فيكون أسوأ ممكن سبقوه

أما بالنسبة للحكام المصريين
فهنيئا لهم بما أخذوا
وجزانا الله خيرا على صبرنا
:)

Gannah said...

والله يا أحمد أحييك على اعطاء امريكا لقب أم أربعة وأربعين بس يعنى عقبالنا
كنت كمان حسبت كام رئيس مر على أمريكا فى فترة رئاسة كل من الرؤساء الثلاثة عبد الناصر و السادات ومبارك
علشان أعتقد اننا هنخرج بنتيجة ان حالنا فى تدهور وان الكرسى أصبح بيلزق ومحتاجين واحد تيفال
معلش أصلى جعانة وعايزة أقلى بيض فده التشبيه اللى جه على بالى
تحياتى

يا مراكبي said...

وإليكم الرئيس رقم 45 هنا

http://yamarakby.blogspot.com/2008/11/blog-post.html

بعد ما تقراه إبقى إكتب بوست جديد عنوانه ال 5 رؤساء الأمريكيين وال 1 حاكم مصري

ههههه

وومن said...

أحمد
بقي أمريكا طلعت ام اربعه واربعين

هههههههههههههههه

بس انا برضة مش متفائلة زي وزة لسبب انها سيناريوهات ومكتوبة مش مهم مين هاينفذ

ولو اوباما عاوز يغير يبقي يفتكر كويس مصير كينيدي

وسلامي للحرية والديمقراطية

جمعاوي صاحب "عيادة أسنان" said...

السلام عليكم صباغ باشا
معانى رائة وجميلة جداااااااا وتثير الالم فى القلوب يا أحمد

بص يا سيدى
هى انتخابات امريكا اثارت في نفوسنا مشاعر كثيرة وعلامات استفهام واسعة وايضا مقارنات كثيرة زى اللى انت عملتها دى

وفى مقارنات تانية يا احمد يعنى سير العملية الانتخابية نفسه وبدئا من التقدم للترشيح وبعدين الدعاية ثم الانتخابات

بجد شتان شتان بيننا وبينهم

من الاخر المقارنة ظالمة وربنا يتم علينا نعمته ويحقق لينا اللى كلنا بنتمناه

دمت لنا بخير احمد ويلا سلام

Dr- Hema said...

بالهنا والشفا

نعيش ونشوف

د/هيما

حاجات عيال said...

هقول ايه....
لو لم أكون مصريا
لوددت ان أكون أمريكيا
عمار ياأمريكا

شمس النهار said...

كل الحكام اللي اتكلمت عليهم دول مش مصريين
عايز تتكلم اتكلم من اول محمد نجيب
اللي كتير مايعرفوش عنه حاجه

سومه...مجنونه فى بلد عاقل said...

على فكره انا واخده على خاطرى منك بقى يا راجل تكتب
الملك فـــــاروق الأول
محمد نجـيب
جمال عبد الناصــر
محمد أنور الســـادات
حسنى مبارك
اشمعنى قلت ملك على فاروق وجيت ع التنيين ومقولتش سياده الرئيس فولان الفولانى
اخص اخص وكاتب اسم واحد فيهم غلط كما
وبعدين يا احمد بارك الله فيما رزق يا شيخ يا مفترى
:))

سومه...مجنونه فى بلد عاقل said...

عموما انا وقعت بينك وبين المخابرات اتكل انا على الله بقى عملت اللى عليا وزياده:))

كيكى said...

ونبى يا احمد اوعى تنسى فى ملفك موضوع التوريث برضة!!!
اوعى تنسى الفاسد
اوعى تنسى الوسطى والمحسوبية
اوعى تنسى ان دول الى خلوا مصر فى قاع الدول همة دولة الى خلينا مش فالحين فى حاجة خالص ولا تعليم ولا صحة ولا حتى سياسة نافعين!!1!
بس سوال رفيع يا احمد اذا كان 14 عملو ا فى مصر كدة امال لو كانوا 44 كانوا عمالو اية؟؟؟ لو كان الى 44 زى 14 يالهوووووووووووى كنا عملنا اية
...........
ام اوباما
مبقتش تفرق سينا من سونيا؟
.......................
وبخصوص الكلام الى اكلمتوا مع مصطفى فخلينى اعمل رجيم ربانى على الى سمعتوا منة هههههههههههه قال نفسى راى فيك انك دمك زى العسل ومتفتح وحتة سكرة دى منى انا بقى هههههه
تسلم على بوستتك ودماغك
عووووووووووووووووووووووو

ـ-ـ- أحمد عبد العدل-ـ-ـ said...

علشان نبقى زيهم لازم نغير الطريقة اللى الناس عندنا بيوصلوا بيها للحكم

طبعاً الموضوع بعيد عن أوباما .. راح ولاّ جه رئيس أمريكا .. يعنى مينفعش يشتغل لصالحنا

تحياتى يا خال

هويدا صالح / عشق البنات said...

صباح الأمل في التغيير
حاجة مخجلة لما بلد يبقى عمره كله 300 سنة
يقدر يصنع حياته بايده أكثر من بلد عمره 7000 سنة
الفرق الوحيد بيننا وبينهم هم الناس
وليس الحكام
الحكام خامة طيبة للسلطة والدكتاتورية والقهر لو وجدوا الفرصة
والناس هم الذين يمنحون هذه الفرصة الذهبية
هل تعتقد أك لو أتيت بلينكولين بجلالة قدره وجعلته يحكم مصر ألن يجد حوله بطانة سوء تزين له التجبر والدكتاتورية ؟
وألن يجد شعبا صامتا خانعا لا حول له ولا قوة
الأدهى يا أحمد والأمر
أن الحزب الحاكم عندنا تماهى مع الدولة وصار يتكلم باسم الدولة يعني من يعادي الحزب الواطي لمؤاخذة يعادي الدولة المصرية
الأدهى يا أحمد والأمر أننا لدينا خلط طوال الوقت بين مفاهيم خطيرة مفهوم الدولة
مفهوم النظام
مفهوم الحكومة
هو مين تبع مين
وطريق حلوان من فين يا عم

dalia said...

أهلا يا خالووووو
انت جيت على الجرح ما بلاش الواحد واخذ باله بس مطنش يمكن يكون في نعمة الاحساس عند البعض وتيجي منه لواحده

Hannoda said...

أحييك

على حاجة بجد برافوا عليك انك علملتها

انك ضميت
محمد نجـيب
جمال عبد الناصــر
محمد أنور الســـادات
حسنى مبارك
للاترا و العثانيين و الفرنسيين

آه عبد الناصر كان قلبه على البلد
وعلى الناس بس ديكتاتوري

ربنا يصلح الحال

صبرني يارب said...

ما تفكرناش بالوكسه البني يا صباغ

اتشرفت بك امبارح يا صباغ