خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Nov 18, 2008

لقاء بورسعـيد والتوكتوك البحرى

يوم الجمعــة 14/11/2008م كـان لقـاء المدونين فى بورسعيد ، وزيارة لملجأ الأيتام و فسحة فى القناة وشوارع المدينة ، ولن أطيل فى وصف اليوم .. لان الاصدقاء كلهم قاموا بالواجب وزيادة .. إنظر قائمة الناس اللى كتبوا عن اليوم فى آخر البوست

لكن من واقع الزيارة .. استطعت ان استنتج الملاحظات الاتية
اولاً : إن وسيلة النقل الحكومية المجانية الوحيدة فى مصر هى المعدية التى تعبر من بورسعيد لبورفؤاد .. وعرفت ده بعد ما حلفت طلاق تلاتة ان انا اللى دافع الاجرة .. وطبعا لما عرفت انها مجانية تنفست الصعداء

ثانياً : إن الاغذية والاطعمة فى بورسعيد مش مرشوشة مبيدات زى الأغذية فى باقى المدن .. وانما مرشوشة كوكايين ومخدرات .. حيث اننى اول ما تناولت الغذاء .. ما شوفتش الدنيا دى عاملة ازاى

ثالثاً : إن سبب وقوع داليا أهو ده عيبه فى المعدية لم يكن ان سواق المعدية ضرب فرامل فجاءة ، حيث اننا لم نسمع صوت احتكاك كاوتش المعدية بالماء .. وانما لأن داليا ربما كانت تضمر شراً ، أو لم تكن نيتها صافية .. أو لإنها محسودة

رابعاً : إن الأطفال فى بورسعيد يختلفون عن باقى الاطفال .. حيث انهم تأثروا بجو الحروب التى قامت فى بورسعيد عبر التاريخ ، لذلك من السهل جداً ان تجد فى بورسعيد طفل يلعب - بمنتهى البراءة - بمنشار
خامساً : إن مشاهد من أفلام إشاعة حب ليوسف وهبى وعمر الشريف ، وفيلم المشبوه لعادل إمام قد صوِّرت فى فنادق فى بورسعيد .. والفندق الأثرى بتاع إشاعة حب هدّوه وعملوا مكانة جنينه وفيها مراجيح

سادساً : ان سواق المعدية يختلف عن سواق الأتوبيس .. سواق المعدية لا يقف الا فى المحطات ، وما بيرضاش ينزل ركاب فى وسط الميه

سابعاً : إن قناة السويس عندم اكانت تستخدم لنقل الاسلحة الامريكية كان يُمنع الوقوف لأى شخص على ضفة القناة نهاراً ويتم إطفاء كافة الانوار ليلاً

ثامناً : إن الأيتام فى الملجأ لا يحتاجون فقط لدعم مادى ، وإنما لدعم معنوى ونفسى أيضا ونسبة كبيرة منهم يعانون من مشاكل نفسية .. ملحوظة : مش الأيتام اللى فى الملجأ بس .. لكن واللى بره الملجأ كمان .. راجع مدونة احمد الصباغ وانت تتأكد بنفسك

تاسعاً : إن أطفال بورسعيد أكتر رقة من المخاليل حيث يكتفون باللعب بأدوات عادية مثل : المنشار أو فاس أو مُـلِّة سرير ، ولا يمتد بهم الامر للغـزّ بالمطوة ، أو الوخز بالأبر ، أو النطح بالروسية ، أو خزق العين كما يفعل المخاليل

عاشراً : إن موقف الترجمان الذى كنت منه عام 2001 لعملى بمدينة السادات وقتذاك وكانوا يتعاملون بنظام - نفر كفر الشيخ يا كابتن - أصبح أسمع ميناء القاهرة البرى وبه - سبحان الله - سلالم كهربية متحركة وكافيتريا وإذاعة داخلية تنادى على المسافرين زى المطار كدة

حادى عشر : إن البورسعيدية يعشقون اللون الأزرق .. وتجد اللون الأزرق فى كل شئ فى بورسعيد .. التاكسى .. واجهات المحلات ، والعمارات ، والفنادق .. والبيوت .. وأقماع المرور .. لدرجة أن البحر والسما فى بورسعيد لونهم - سبحان الله - أزرق.

ثانى عشر : إن سارة رحيل كسرت القاعدة التاريخية الشهيرة التى تؤكد إنها عندما تؤكد حضورها للقاء فإنها بالتأكيد لن تحضر .. وفى هذة المرة حضرت .

ثالث عشر : إن انت من الممكن يبقى رقم موبايلك زيرو اتناشر ومع ذلك تكون - سبحان الله - فودافون .. وهذة المعلومة عرفتها عندما دخلنا أنا ونسمة وعسقول لمركز خدمة فودافون عشان ندخّــل موبايل نسمة الإنعاش .

رابع عشر : إن البورسعيدية بياكلوا الحلبة المنبتة فى طاجن بعد وضع الليمون عليها وهذة الأكلة لم أراها فى القاهرة.

خامس عشر : إن خالد همس الأحباب ، وعسقول و إحسان بك قد لعبوا الدنيئة معايا وشاركوا الجبهة البورسعيدية فى تصويرى أثناء تناول الطعام .. ونقول " تناول الطعام " مجازاً عن تعبيرات تدميرية أكثر دقة مثل : إغتصاب الأطباق ، والتحرش بالسمك ، وإبادة السلطة

سادس عشر : إن القناة يعبر بها عبّــارات وسفن شديدة الضخامة وعندما رأيت عبّــارة ضخمة تحيط بها سفن صغيرة وتمشى أمامها لنشات تشبه التكتك البحرى.. ظننت إن عبّــارة الريس معدية ودى التشريفة بتاعتها

!!!!!

الحاضـــرون
: نسمة هى فوضى - إيناس نهر الحب - أحسان بيه - شفقة هانم - ابن حجر العسقلانى - خالد همس الأحباب - بابا أبو خالد وزوجتة وإبنه خالد - سارة محاولات رحيل - داليا أهو ده عيبة - دعاء ربع ضارب - الكتاتنى - جاسر شباب روش طحن - سارة كوكا - ايمان كلام من القلب - ماما أمولة - أحمد الصباغ

آخــرين كتبــوا عن زيارة بورسعــيد
إيناس نهر الحب - بنات وتليفون
نسمة الجميلة صاحبة أحدث مدونة - أحلى يوم بجد

19 comments:

دعاء مواجهات said...
This comment has been removed by the author.
هى فوضى said...

بجد شكرا
وبوست يجنن بس اليوم كان حلو بيكم
وانا سعيدة جدا بيكم وباليوم
بس انت من السمك بيحصل لك حاجات غريبة موت بس هقول اية ضيف عندنا
بجد بجد شرفتنا بحضورك
ومتشكرة اوى على تعليقك عندى
يارافع من روحى المعنوية

مولان said...

يوم حلو اوووي وبجد كنت اتمني اني ابقي معاكم

كيكى said...

واوووووووووووووووووو
شكلوا كان يوم جامد طحن
والله ربنا يسعدكم ويهنيكم دايما على فعل الخير
*********************
ههههههههههههههههه
بس اية الحاجات الجامدة دى الى انت استخلصتها من الموضوع
والصور تحفة فى مدونة شفقة هههههههههههههههه
مش قادرة بجد امسك نفسى من الضحك
**************************
الله يا خليك كدة دايما ياصباغ لفعل الخير
عوووووووووووووووووووووووووووو

اهو ده عيبه said...

ازيك
الحمد لله اخيرا فوقت بعد 5ايام توهان من الاكل
بس تحليل منطقى بصراحه وعلمى وان دل على شئ يدل ان الاكل فعلا كان له تاثير
بجد كان يوم جميل وان شاء الله المرة الجاية ناكلك الحلبة المنبتة وحاجات تانية اكيد ماكلتهاش قبل كده
سلام يا خال

حواء said...

رحلة جميلة اوى يا صاصا ياريتنى كنت اقدر اكون معاكم واشوف الجنينة الاماكن الجميلة دى وخصوصا الجنينة .. بس انا بخاف مالمعدية بس بجد ربنا يوفقكم وعقبال ماتيجوا رحلة للمقطم ... هههههههه

رحــــيـل said...

اعمل فيك ايه ياصباغ
انت بتطلع اشاعات عليه بقى انا كل مره اقول انى جايه ومجيش
هى مره واحده
قلبك اسود
بس بجد كنت خواجه يومها
ايوه اكلم براحتك
مهو انا لو كانت الصور بتاعتك وانت بتاكل لسه معايا كنت وريتك
حظك من السما يااحمد

بجد سعيده جدا جدا انى اتعرفت عليك اخيرا

همس الاحباب said...

هههههههههه
ههههههههه
الحمد لله
انك رجعت لوعيك تانى
يا ابنى انا اتصلت بيك تانى يوم اطمئن عليك لقيتك فى التوهان
الله ينور يا ابو التهييس
بس بجد اليوم كان تحفة
وانت كنت اخر مسخرة بصراحة
بس ده تاثير الفراخ مش السمك يا صباغ
يعنى خلى بالك من نفسك بعد كده
هههههههههههه

علاء سالم said...

السلام عليكم

شكله فعلاً كان لقاءجميل ويوم أجمل
فاتني بجد اللقاء ده
بس إن شاء الله أكون حاضر معاكم في اللقاء القادم

ربع ضارب said...

السابع عشر
ان الصابغ لما بيجى بورسعيد او بياكل فراخ +سمك=لازم يهيس
التامن عشر:
ان الصابغ خريج زراعة ومعرفش الحلبة يا ناس واضح انهم مكنش عندهم باب الحلبة ده فى المقرر
عموما شرفتم والله بورسعيد وكان فعلا يوم جميل جدا بوجودكم

مدحت محمد said...

بورسعيد تحفة

وكمان جزاكم الله خيرا على فعل الخير

مهندس مصري said...

ماشي يا عم الأكيل
السمك مقلي كل و برق لي صنف زي الفل
:)

سلامي لجميع الحاضرين

شفقة هانم واحسان بك said...

حمدالله على السلامة يا صباغ والله فرحنا لعودتك بجد كنا قلقنين بعد القبض عليك
بس كفارة

شفقة هانم واحسان بك said...

حمدالله على السلامة يا صباغ والله فرحنا لعودتك بجد كنا قلقنين بعد القبض عليك
بس كفارة

الفاتح الجعفري said...

ربنا يتقبل يابوحميد ويجعل كل ذلك في ميزان حسناتك
من فرج عن مسلم كربة من كرب الدنيا فرج الله عنه كربة من كرب يوم القيامه
--
فما بالك ايتام
ربنا يبارك في عمرك ويجزيك كل خير

عاشقة القمر said...

ربنا يجعل لكم في ميزان حسناتكم
كان نفسي اكون معاكم
بس البعد

أبو خالد said...

أبني الحبيب /أحمد الصباغ
نورت بورسعيد و جزاك الله عني خيرا
أنت إنسان أصيل

Mahmoud farag said...

بوست جميل ...

و الاجمل طبعا هو بورسعيد

تقبل مروري

من:
مدون بورسعيدي

Reem said...

هىهىهى تسلم إيدك
http://omoma-tugheya.blogspot.com/