خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Dec 20, 2008

وصلة نت مصرية مع حجر شيشة

كان "على لاسلكى" وزير الإتصالات فى إحدى دول العالم الثالث يسرع الخطى ويزاحم العربيات والأتوبيسات حتى يستطيع اللحاق بالطائرة التى تبقى على إقلاعها أقل من نص ساعة .. وهى الطيارة المتجهة إلى أوروبا .. وذلك حتى يقوم بدفع الإشتراك الشهرى لبلاده فى وصلة النت التى حصلت عليها من بلاد العالم الأول

كانت الشوارع زحمة ، وكان عليه إما أن يقطع المسافة المتبقيه للمطار سيراً على الأقدام أو يركب أوتوبيس 419 المتجه للمطار أو يركب تاكس .. وفضل "على لاسلكى" أن يستقل الأوتوبيس بعد أن ضرب إتنين فول وواحد بطاطس من عند البرنس ثم ذهب إلى قهوة البورصة وتناول الشيشة مع واحد شاى خمسينه ثم قام متعجلاً إلى المطار

وأقلعت الطائرة متجهة إلى فرنسا .. فقد سمع من واحد زميله وزير.. إن مكتب الاشتراكات فى روما قد أُغلق لظروف المطر والتجديدات .. و فقد أشار عليهِ الدكتور " سلومة الكبير" رئيس مجلس الوزراء بالذهاب إلى فرنسا عن طريق تخريمة من ايطاليا أو مباشرة بالطيارة
وقال رئيس الوزراء لـ "على لاسلكى" : لو هتركب طيارة "نصر للطيران" يبقى قوم ساعتين بدرى عشان تقعد فى الطيارة بدل الوقفة والمشوار طويل .. وتبّــت كويس على فلوس الاشتراك ، ما تعملش زى شهر يناير اللى فات لما الفلوس إتنشلت منك فى الطيارة

وعليه .. نزل "على" فى مطار باريس الدولى بالقرب من موقف الميكروباصات .. وكانت الشمس قد إنتصفت فى السماء والجو بقى حر .. وشعر "على" بالجوع .. وكانت توجد عربية فول مكتوب عليها : إن خلص الفول "جون" مش مسئول

عندما وقف "على" لتناول الفول على عربية "جون" لم يشعر بالغربة .. وشعر وكأنه فى وطنه .. فقد كان المصريون والعرب يحيطون به من كل جانب يتناولون الساندوتشات وأطباق الفول مع البتنجان المخلل وفحل البصل

واحتاج "على" أن ياخد إصطباحة على أى قهوة .. لكن "دردوع الجوال" وزير اتصالات دولة عربية شقيقة نصحهُ بأن يلحق مكتب الإشتراكات .. لإنهم متدلعين وبيقفلوا بدرى .. وإرتجف "على لاسلكى" خوفاً من عدم اللحاق بدفع الإشتراك .. ثم أعطى رئيس الوزراء ميسدكول فإتصل به رئيس الوزراء ساخطاً وقال له : بترن عليا ليه فى إنصاص الليالى .. فقال "على لاسلكى" : إن الساعة دلوقت فى باريس إتناشر الضهر .. لكنه يشعر بالحر ويحتاج لحجر شيشة قبل دفع الاشتراك .. فقال له رئيس الوزراء : إعمل اللى تعمله بس لازم ترجع الليلة دى عشان عندنا كام شركة ومؤسسة لازم نبيعهم إنهاردة .. وعايزك معايا فى الحوار ده

جلس كل من "على لاسلكى" و "دردوع الجوال" و "نايف رنّات" و "على عثمان الدش" و "العزيز بن هاتف" و "القمر سمعان سماحة الصناعى" ومجموعة من وزراء الإتصالات فى الدول العربية الشقيقة الذين أتوا إلى باريس لدفع إشتراك النت .. جلسوا على قهوة الحاج ميتيران فى ميدان الرينو فى باريس .. وكانوا يحتسون الشيشة والسحلب ويتناقشون فى أوضاع الإتصالات فى الوطن العربى
وكان "دردوع" مستاءاً من إرتفاع أسعار الكول توون فى بلاده
وقال "نايف" : أن بلاده تنوى بث قناة سكس لنشر الثقافة الجنسية بين المواطنين
وقال "عثمان الدش" : إنه ليس معه رصيد فى الموبايل ويحتاج لعمل مكالمة .. ثم أخذ موبايل " سمعان" عشان يعمل مكالمة
وقال "سمعان" : لابد أن نواجه مشكلة "خدش الكروت" فى البلاد العربية وتأثيرها على أظافر المواطنين
وقال "على لاسلكى" إنه مضطر ياخد الحجر ويقوم عشان يدفع إشتراك النت
فنظر له "العزيز" بخيبة أمل قائلاً : دول خلاص زمانهم قفلوا
فهبَّ "على" من مكانه ونط فى ميكروباص اللوفر المتجه إلى ليبرمان
ولكنه عندما وصل إلى مبنى دفع الإشتراكات وجد الموظفين قد إنصرفوا

عاد بخيبة أمل فقد كان هذا هو آخر يوم فى الشهر .. وهذا يعنى قطع الخدمة عن بلاده
أعطى رئيس الوزراء رنه .. فإتصل به قائلاً : النت قطع هنا .. هو إنت ما دفعتش الاشتراك يا منيل ولا ايه؟

وضع "على لاسلكى" يده فى جيبهُ متحسساً النقود إبتسم فى خبث قائلاً : لا ياباشا .. أصل المبلغ إتسرق منى تانى فى الطيارة
أحمد الصباغ أبو وصلة

22 comments:

وومن said...

هههههههههههههههههه

هو النت قاطع في مصر علشان مش دفهنا الإشتراك وانا اللي منفصلة عن العالم وقال كل ما افتح الماسبنج الاقي كل الناس اوف لاين

البت المشمشية حلوة بس شقية said...

اكيد احنا مدفعناش الشهرية
بس الحمد لله النت اشتغل عندى بسرعه
ومعملش زى المرة اللى فاتت

نهله said...

الله يسامحه (على لاسلكى) بقى هوا السبب فى قطع النت و انا كنت فاكرة ان الكابل هوا السبب

هههههههههه

تسلم يا خالو على البوست الجميل

همس الاحباب said...

هههههههههه
وانا كنت فاكر انه خطا عندى انا بس فى الجهاز وكماااان على الموبيل
الحمد لله انه طلع بسبب تانى
وكله من على لاسلكى
لازمن يتاخر فى دفع الاشتراك
بوست خفيف
تسلم ايديك يا صباغ

ضــى القمــر said...

طيب لو ممكن نساهم معاهم إحنا مستعدين .
لكن بلاش العذاب ده كل شويه .
..
انا توقعت فى الاول ان السبب من عندى بس .. لكن لما عرفت أن المشكله عند الكل ارتحت جداااا ( شر جداا معلشى ..هههه )

اجمل تحيه للصباغ الراوى ..:)

مهندس مصري said...

هههههههههههههههههههههههههههههههههه

صبرني يارب said...

تصور فعلا شكلها باين كده
هههههههههههههههههه

يلا اشمعن ده الى هايبقى كويس

Soul.o0o.Whisper said...

هههههههههههههههههههههههه

و أنا أقول بردوا يارب ليه النت فاصل

أتاريهم لسه بيتباحثوا

طب ادفعوا و خلصونا الاول

هنعمل ايه بئا

عرببببببببببببب


ربنا يرحمنا









خالص تحياتى

Foxology said...

هههههههههههههههههههههههههههههه

والله انا قلت كدة برضه انهم قطعو عننا النت علشان مدفعناش اشتراك الوصلة :))

تحياتى :)

أحمد سعيد بسيوني said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

يخرب عقلك









يا علي لاسلكي

smilyrose said...

الله يسامحه

يعنى هو السبب كنت فكراه الكبل

واتسبب فى تعطيل امتحاناتى

وكل دا بسببه

ياااااااااااااه على احوالنا

بقت تفرح

حسبى الله ونعم الوكيل

smilyrose

روح الحب الصادق

مصــــري said...

والله روعة ياخــــال

عارف فكرتني بالأسماء دي بـ"أحمد رجب" الساخر العظيم في رائعته "الوزير جاي".

طب اشاعة اسماك القرش دي ايه.
اشاعة حكومية ولا ايه.

أسامة

RiddleR said...

بص يا أحمد
لو الموضوع كدا انا ليا أصحاب في حتت في أوربا ممكن يبقو يوصلو الفلوس
او حتي يدفعوها من معاهم مؤقتا لحد ما الوزارة تبعتهم بس طبعا عاوزين ضمانات

أو ممكن ناخد وصلة من أمريكا، دا حتى لو مشينا وصلة من أمريكا لهنا أكيد محدش يقدر يقرب لها :P :P

ممكن تقرا دا وتقول رأيك بجد في النقطة الأخيرة؟
مصادفة أم مؤامرة؟

ست البيت said...

ولأني من انصار نظرية المؤامرة ، ففكر معاي كده وافتكر إن اللي حصل دا حصل امتى ؟ شطااااااااااااار
لما اتفتح معبر رفح المرة اللي فاتت
والمرة دي ؟
برافوووووووووووووووووو سفينة الكرامة
شديد البوست يا خالو

GiGi said...

هى ايه حكايه السفن اللى بتقطع الكابلات علشان كده عاملين موضوع قناه السويس والقرصنه علشان يشغلوا النت
بس هو على لاسلكى شغال ازاى والنت مقطوع
والله الوزرا فى بادنا بيتعبوا وبيحاولوا يشتغلوا وهما مخلصين شحن
ماهى البلد مابقاش فيها حاجه تتباع فيشحنوا منها

مخبر قمل دولة said...

يابن اللعيبة
دا انت عليك شوية قفشات
فصلتها عربي عربي يعني
ايه الفن دا
فكرتني بموضوع كان في الدستور من زمان بيتكلم عن لو شعب مصر راح فرنسا وشعب فرنسا جه مصر مع بقاء حكومة كل بلد فيها ( حفاظا على سيادة الدول طبعا )
المهم بقا يا سيدي دعاء العدل كانت عاملة في الموضوع ده حتة كاريكاتير بس ايه
جامد اخر حاجة
عاملة ميكروباص فرنساوي والراجل طالع من الشباك بيشاور بإيده وبينادي
شانزليزيه لوفر لوفر
بس كان جامد
معلش رغيت كتير

كرانيش said...

لم اجىء لسمح الله لاقل رايى فى هذا الموضوع

بل لاقل لك انى جئت


لأجلك

Raghda Rashad said...

اهو الاخ لاسلكى ده كان هيخلينا نلبس فى الحيط انا وصحابى عشان مخلصناش البحث

الدكتورة كانت هتحجزنا فى المسشتفى لما يبانلنا نت او صحاب

المهم ان لاسلكى معاه الفلوس و هيجيب بيها ايس كريم و يقف ياكله ادام برج ايفل

سعادة حضرته بالدنيا و مافيها

بسنت said...

ههههه
جميله اوى بس الغريب انك ما جبت سيره التوك توك خالص
كدا نكون ظلمنا الكابلات وطلع السبب الدش
دمت مبدع

عاشقه وغلبانه said...

الاشتراك اتسرق
اهئ اهئ
وفصلوا النت
اهئ اهئ
الواحد كان قاعد مالوش لازمه
منك لله يا لاسلكي انت وحجر الشيشه
هانفضل طول عمرنا في الوصله دي
انا بقول نجرب الويرلس
اهئ اهئ

الباحثة عن السعادة said...

لكل صديق يطلع على مدونة طبيب بلا سماعة أرجو أن تقنعوه بعدم غلق المدونة

تقبلوا تحياتى
الباحثة عن السعادة

ابو اعصار said...

سكر وهتفضل طول عمرك سكر