خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Jan 25, 2008

مهرجان التاج



---- السلطان خالو أحمد الأول ----



مهرجان التاجات


أصدقائى وأحبابى الأعزاء
أشكركم على التواصل الجميل وأكرر أسفى لتأخرى الفترة السابقة
فى تقديم الموضوعات الجديدة والرد على تعليقاتكم والمشاركة فى المناقشات والتعليق
وذلك لظروف خارجة عن إرادتى
(موسيقى تصويرية)
وبعدين بقى انا بفتح تلاجة المدونة
قوم ايه ؟؟
لقيت هيصة تاجات فى الفريزر من شهر ديسمبر
وتاجات كمان قربت تحمض
تاجات من ايمى وكوكا واليعقوبى ومهندس مصرى ونضال وآبى
وقلت يا واد يا خالو أحمد
أعمل مهرجان تاجات
وجاوب كل التاجات اللى جت
ودى كل واحد من المعازيم تاج فى ايدة وهو خارج
وهبتدى بتاج بتاعى
وهو تاج متنوع برجاء اعطاء توضيح اجابتك بإختصار




تاج الصباغ

-------*-------*-------

1
هل توافق على حزف خانة الديانة من البطاقة الشخصية ؟


2
ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟

3
هل تعتقد بوجود إضطهاد للمسيحين فى مصر ؟

4
من هو الشخص الذى تختارة لرئاسة مصر ؟

5
أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟

6
فى رأيك الشخصى .. ما هى أفضل مدونة على بلوجر قمت بزيارتها ؟

7
للذكور فقط : أيهما تفضل كزوجة .. إمراءه عاملة ، أم ربة منزل ؟

للإناث فقط : هل توافقين على الزواج من رجل مطلق ؟

8
اذا تزوجت وأنجبت ولدين وبنتين .. أى الأسماء تحب أن تسمى ؟

9
هل تعتقد أن توريث الحكم فى مصر . . سيتم فعلا أم لا ؟

10
فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

ثم لمن تمرر هذا التاج ؟

المدعوين للرد على تاج الصباغ

مهندس مصرى – إيمى وكوكا – هاجر مصطفى - نوران بت خيخة وأى كلام
عاشقة الفردوس – محمد دكتور حر – اليعقوبى – الجعفرى – لماضة
شمس الزناتى – محمد نوشّا – أحمد الجيزاوى – محمد نضال – محمد مدحت
مروة الزارع – نهى فتافيت كلام لما ترجع من الإمارات – بنوتة مصر
أحمد مصطفى – عمر خروشات لما يرجع من ألمانيا – أبن عمر – قطة الصحراء
رحاب مصطفى – أميرة سهر الليالى – هايدى حسين – إسكندرانى أوى
سما - عصفور المدينة – أمير الهدوء – آبى – خمسة فضفضة
شيماء مهدى – صاحب المضيفة – السيد شبل – سارة سورسارة –
هند عمار – نور جديد – مكسوفة – عاشقة الوطن – سلمى عامر – وينكى
أمولا – عابد الرحمن – هبهههههوب – عاليا حليم – إيناس الفكر السجين
دودو – غمض عنيك – طارق هلال – سمكة – رئيس جمهورية نفسى
ولاء – إيمان حبة حاجات – سيد سعد – النجم القادم – إيمان الطاهر
صانعة الحرية – ياسمين أرض الأحزان – شيتوس – شاهى – دوبا
على حب – دكتور حماس – أحمد عبد الفتاح – محمد الشاعر – شهروزة
بنوتة مصرية – أشرف حمدى – إبن حجر العسقلانى – البنت الشلبية
فتحى الشيخ – وفاء بركات – إيناس أبو زيد – فانتازيا – نوارة نجم
علاء سالم – عاشقة القاهرة – زمردة – ياسر شمس الدين – فى القلب
لسه بعقلى – شيماء زاهر – نورى – نازك الملائكة – فرنسا هانم
آلام وأمال – محمد مارو – محمد رشاد – حبيبة – أجمل إحساس
البيرونى – أيه – مخطوبة – مش قادرة – محمد يوسفيات – د.أجدع بنوتة
أدم المهدى – الدائخ – د.محمد الجوهرى - مدحت نص - سمارت دكتور
حسام شاهين - شيماء فضفضة - سمراء النيل - حل وسط - مشمشة
بطة بكر - شمعى أسعد - إنسانة - بسنت - بودى وسعد التؤمان
حسن ارابيسك - إسراء - الدرويش المرووش - نهى منير
Shayma - TATA my own world – TOOTA my self first – Only Spot – Tona – shark - Cognition-sense
– no chance -
UNIQUE - Dr.
Online
- Che The Hermit
The Alien

وأنا كمان هحاول أوصل الدعوة للتاج للمنازل قصدى للمدونات
أوراق الإجابة هتتلم فى شهر مارس

والتاجات هى
------*-------*------*----
أولاَ : تاج قرآنى ... إتحدف عليا من اليعقوبى والجعفرى
ثانيا : تاج الحصانة ...اتحدف عليا من مهندس مصرى - إيمى وكوكا - آبى
تاج : متنوعات... إتحدف عليا من نضال - إيمى وكوكا

-----*-----*-------*-----


أولا : تـــــاج قــــــرآنى
-------*-------*-------
ماهى سورتك فى القران (اى احب سوره اليك تقرأها فى فرحك وفى حزنك) ؟
سورة يوسف – وغالبا أقرأها يومياَ أو أستمع لها بصوت مشارى

ماهى احب ايه اليك الايه التى دائما تتمناها؟
"إنما أشكو بثي وحزني إلى الله ، وأعلم من الله ما لا تعلمون"

ما هى اكثر ايه تخاف منها وتدعوا الله الا تكون من اصحابها؟
كل آيات العذاب والوعيد
أسأل الله لنا الجنة وأن يجنبنا النار

من هو احب صحابي واحب صحابيه اليك؟
أحب صحابى : أبوبكر الصديق ..أحب صحابية : السيدة خديجة

اذا كنت على العهد النبى صلى الله عليه وسلم فمن كنت تحب ان تكون ولماذا؟
الفاروق عمر بن الخطاب .. رجل قوى ولا يخشى فى الحق لومة لائم

من احب نبى اليك بعد الحبيب صلى الله عليه وسلم؟
سيدنا يوسف

ما هو منتداك وموقعك المفضل؟
أحب إسلام أون لاين .. وأحب مدونة دكتور حر - الجعفرى واليعقوبى - وعصفور المدينة وكل المدونات ذات الطابع الدينى السمح والتى تقدم السلوكيات والأخلاقيات الإسلامية بإسلوب سهل وسلس

ماهي احب الاسماء التي تحب ان تنادي بها ؟
من أسرتى وأصدقائى : أحمد
من المخاليل والمدونين : خالو أحمد
بعض الناس أخترعو لى أسم دلع بحبة أوى
لا داعى لذكرة لأننا فى حضرة تاج دينى ;)
يعنى مشيها أحمد

من هو كاتبك المفضل؟
كاتب دينى : الحقيقة أنا أستمع أكثر من القراءة
لكن أحب مطبوعات الشعراوى وكشك
رحمة الله عليهما
كاتب عام : أحمد رجب – مصطفى محمود – عمر طاهر – معظم شعراء القرن العشرين – وغيرهم

من هو قاريء القرآن المفضل لديك؟
قراء إذاعة القرءان الكريم وهم
عبد الباسط عبد الصمد
محمود خليل الحصرى
محمود على البنا
مصطفى إسماعيل
محمد صديق المنشاوى
وأعشق كل من
مشارى العفاسى
أحمد بن على العجمى

من هو منشدك المفضل؟
نصر الدين طوبار

ماهو نشيدك المفضل؟
مع الله – مشارى العفاسى

من هو الداعيه المفضل لديك او شيخك المفضل؟
أحب ثلاثة هم
الشيخ كشك
الشيخ الشعراوى
الاستاذ وجدى غنيم

ماهي اكثر عباده تشعرك انك قريب جدا من الله ؟
قراءة القراءن

ماهو املك في الحياه؟
أن أرى نصرة أمتى – وأن يسود السلام العالم

من احب افراد عائلتك اليك؟
أمى الحبيبة الغالية نور عينى اللى بشوف بيه


ثانيا : تاج الحصانة
-------*-------*-------

دخلت مجلس الشعب من اوسع ابوابه ايه هو رمزك الانتخابى المفضل ؟
مش هتفرق كتير
وليكن : رمز المصاصة
كنت تفضل الدخول مستقل او تتبع حزب معين ؟؟؟؟
والله كنت أتمنى أكون بنتمى لحزب بس هو مش موجود دلوقت
لأن النشاط الحزبى فى مصر صورى
كنت أتمنى اكون فى حزب بيضم كل شرفاء الوطن من التيارات المعارضة وحركة كفاية وجماعة الأخوان المسلمين والاشتراكين المعتدلين وكافة رموز التيارات الساسية التى ترفض الفساد

اذا دخلت مستقل هل توافق على التوقيع للحزب الوطنى بعد نجاحك كمستقل ؟
ايه السؤال ده .. لأ طبعا

اول حاجه هتعملها لنفسك ولاسرتك ؟
لما أخد أول مرتب هفرقة على أخواتى التلات بنات
ممكن بس أستغل وسطتى عشان والدتى تحج :) وربنا يسامحنى

ايه المشروع اللى ناوى تعمله لاهل دايرتك ؟
مستشفى كبير حكومى مجانى نظيف ومنظم

قعدت فى المجلس جنب نائب مميز . من هو النائب ؟
كل نواب المعارضة المحترمين واللى داخلين المجلس بدون تزوير
قدمت سؤال للحكومه ايه هو السؤال ؟
لماذا لا تسمحون بتداول السلطة

طلب احاطه موضوعه ايه ؟ وبتقدمه لمين ؟
فى طلبات كتيرة
مثلا : إحتكار صناعة حديد التسليح على أحمد عز
مما يضر بإقتصاد مصر ومصالح المواطنين

استجواب لاتنين من الوزراء موضوعه ايه ؟ وبتستجوب مين ؟
أوافق على إجابة أيمى وكوكا
وزير الداخليه عن بلطجة و سفالة الشرط
هوزير التربيه و التعليم عن ضياع التربيه و وكسة التعليم


انت مع الخصخصه ؟
أنا مع الخصخصة بمفهوما الإقتصادى السليم المبنى على إقتصاد قوى وصحيح
مش مجرد بيع ممتلكات الدولة ونهب التمن

هل انت مع قطع العلاقه مع اسرائيل ؟
طبعا .. وأكرة كل صور التطبيع

هل تؤيد الحرب على العراق ؟
لأ طبعا .. وأعتبرة إحتلال أمريكى

هل تؤيد مرور الامريكان فى القناه ؟
لا .. قد تكون الحاملات تحمل صواريخا أو وقودا لإسرائيل
ربما أوفق بشروط منها : معرفة محتويات الحاملات

هل انت مشترك فى مؤامره كسر فرنسا هانم بالاشتراك مع ام دبوه ؟
لأ .. أنا مشترك فى كسر حاجز الصمت بمولة سرير .. بس :)

ثالثا : تاج المتنـــوعات
-------*-------*-------

لو مكنتش مصري بس عربي كانت هتبقى إيه نظرتك للمصريين واللي بيحصل في مصر دلوقتي؟
كان هيصعب عليا أوى دولة كبيرة وذات حضارة زى دى يحصل فيها كدة
بس كنت هبقى عارف أنها بمثابة أسد نائم

لو كنت أوروبي أو غير مسلم هتبقي إيه نظرتك للعرب والمسلمين؟
نظرة للعرب : إنهم أغنياء بترول دون أى تقدير لهم
نظرة للمسلمين : كنت هترعب زى أوروبا وأمريكا ما بتترعب مننا
وعارفين كويس إننا لو صحصحنا هتبقى نهايتهم قربت

لوقالولك إنت بقيت رئيس جمهورية هتعمل إيه؟
أول حاجة هعملها حكومة إئتلافية تضم كافة رموز التيارات الفكرية والسياسية
والكفاءات فى كافة المجالات ليتولوا جميعا حكم مصر

لوسمح لك برؤية الرسول عليه الصلاة والسلام وإنك تقوله كلمة واحدة ؟
هبوس إيدة وهقولة : إدعيلى

لو كنا في عصر ازدهار الأندلس كنت تتخيل نفسك إزاي؟
خالو أحمد بردو :)

لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟
أظن لو فى بينا محبة وعشرة صادقة ده مش هيغير ده حاجة فى رائى
هما اللى جابو عيال عملو ايه

لو طلعت القمر هتكتب عليه ايه؟
لا إله الا ألله

لو مررت التاج لحد وماجاوبش هتعمل ايه؟
هحرمة من الميراث

أرجو أن تكونى استمعتم بالمهرجان
ومنتظر الرد على التاج
وإن شاء الله هرد على تاج الصباغ
وكمان هتنشر أقوى وأجمل الإجابات التى قيلت فى الرد على التاج
فى مارس مع الاحتفالات بعيد ميلاد المدونة


تحياتى
خالو أحمد الصباغ

Jan 20, 2008

Jan 16, 2008

كان نفسك فى إيه قبل ما تموت يا خالو أحمد ؟

كان نفسك فى ايه قبل ما تموت ؟؟

كتبت
نونا فتافيت كلام بوست أسمة : نفسك فى ايه قبل ما تموت ؟

والحقيقة افتكرت فى الاول ان الكلام عن الامنيات بصفة عامة

لما بدأت أقرا فهمت ان السؤال

كان نفسك فى ايه قبل ما تموت وما عملتوش

يعنى انا دلوقت ميت

وبسأل نفسى فى لحظة الموت؟؟

كان نفسك فى ايه يا أحمد تعملة قبل ما تموت وما عملتوش؟؟

كان نفسى اعبد ربنا كما ينبغى

وادى له جزء من حقة عليا فى العبادة الصحيحة

كان نفسى احفظ القرءان كامل

كان نفسى اساعد الغلابة وأشارك فى أعمال خيرية كتير

وكان نفسى اسافر بلاد الدنيا كلها

أمريكا وأوروبا وأسيا

ومجاهل أفريقيا

واروح بلاد الهند والسند .. وبلاد تركب الافيال

وكان نفسى احارب وادوق طعم الجهاد

وكان نفسى اكتب شعر كتيييير اوى

عشرات الدواوين اعبر فيها عن نفسى وعن وطنى

وكان نفسى أشوف مصر حالها كويس يسر الحبيب

وولاد مصر فى المكان اللى يستحقوه

وكان نفسى أرد واحد من مليون من جمايل أمى عليا

كان نفسى أتحول لتراب تمشى عليه برجليها

كان نفسى أتحول نسمة هوا تدخل رئتيها

كان نفسى أتحول لبسمة تفضل مرسومة طول العمر على شفايفها

كان نفسى أفنى تحت رجليها

وكان نفسى الاقى سكنى وأستطيع أن اكون سببا لسعادتها

ونخلف عياااال كتييير

يغيرو لقبى من خااالو أحمد .. إلى بابا

....

وبمناسبة الكلام عن أمنيات لم تتحقق قبل موتى

إفتكرت أوى كلمات كنت كتبتها

هى جزء من الأمنيات التى لم تتحقق

.. صدقينى كنت اتمنى جوارك
.. كنت اتمنى ان يكون الكون دارك
.. كنت اتمنى ان أجوب الارض سيرا فى انتظارك
.. ينساب عمرى فى يدك
.. ويذوب ليلى فى نهارك
.. لكن عمرى رغم آمالى واحلامى قصير
.. فإعذرينى اننى طفل صغير
.. واذكرينى واذكرى الحب الكبير
.. واذكرى انى ربيع
.. مات شعرا فى ضمير
.. غير انى لا ابالى بالبكاء وبالنشيج
.. لا ابالى لوعة للاشتياق
.. والان فلنرحل سريعا
.. قد اتى وقت الفراق..قد اتى وقت الفراق

خالو أحمد

Jan 14, 2008

أنا بحبك يا مصطفى .. إفتتاح دار الكتب على الإنترنت

مصطفى الحسينى

صاحب البوابة

شاب مصرى من خيرة شباب المدونين المثقفين

وصاحب فكرة دار الكتب على الانترنت



تقريبا بيقول .. عليا الطبيخ بالطماطم
أحمد الجيزاوى .. حبيبى وحبيب المدونين


شمس المدونين .. شمس الزناتى



سيلين ديون ولا مارنين مورنو ؟؟
لأ لأ دى
آبى يا ولاد
دى طلعت مش كوكب .. دى طلعت نجمة بجد
فى شخصيتها وفكرها الراقى وقدرتها على النقاش


مع مصطفى الحسينى .. ولحظات من التهييس



مع الاستاذ وائل عباس


مع المدون الشاعر طارق هلال

مصطفى مع مجموعة من الاصدقاء


الجيزاوى مع مجموعة من الاصدقاء


وقابلت كمان مجموعة من أجمل شباب مصر

إبن ناصر


سارة .. صاحبة بلاعة الحكومة

عاليا حليم

نقطة ميه


دومة ..شاعر الاخوان


إيناس .. صاحبة الفكر السجين


نوشّة..صاحب أنا مش معاهم

وآخرين من الاصدقاء المدونين


أصدقائى وأحبائى

أدعوكم لزيارة موقع دار الكتب على الانترنت
والاستفادة من الخدمة العظيمة
التى يقدمها من أجل المساهمة فى التشجيع على القرءاه
ومتابعة الكتب والمطبوعات التى تنشر فى مصر
موقع دار الكتب
http://www.daralkotob.net/

الموقع جميل وتقدر تعمل سيرش
وتوصل لأى معلومة تخص الكتب المنشورة بسهولة

ودى مكتبة البلد اللى اتجمعنا فيها


ويارب متجمعين كدة فى الخير


تحياتى

خاااالو أحمد

Jan 10, 2008

أحمد الصباغ .. فى الدستووور

طلعنا فى الدستوووور
أنا والعيال البلوجرية .. طلعنا فى الدستور

وأنا فرحان ان جرنان الدستور

الجريدة المستقلة الاولى فى مصر

بتدينا الإهتمام ده كله

إلى كل أصدقائى المدونين والمدونات
إكتبوا وعبروا

سطروا بأقلامكم تاريخ مصر القادم

أنتم ضمير الأمة فى هذا العصر

أكتب شعر

وارسم كاريكاتير

واكتب خواطرك

وأكتب مذكراتك وتجاربك

كل كلمة بتتكتب فى مدونة

وكل صورة

هى شاهد على عصر وشاهد على جيل

وشاهد على أهم فترات الحياة المصرية

وتحية الى كل مدوّن ومدوّنة





نص البوست الأصلى

كلام العيال البلوجرية

المجتمع البلوجرى قد أطلق لأول مرة عام 1999 الا انه لم يتخذ شكلة الحالى الا عام 2003 ثم شهد عام 2006 الصورة الحالية للتدوين وبدأت ثورة كبرى .. هى الثورة التدوينية واذا كان هناك عصر القنبلة الذرية وعصر السماوات المفتوحة فأنا شخصيا أسمى هذا العصر .. عصر التدوين و يوم بعد يوم بدأت تتضح ملامح المجتمع التدوينى وتتراص أفراد الأسرة التدوينية وبدأ هذا المجتمع فى الترابط والتماسك والتواصل بقينا نهنى بعض فى اعياد الميلاد وفى الأفراح والمناسبات ونعزى بعض فى حالات الوفاه بدأنا نفهم بعض ونتعرف على بعض اكتر بجد يا جماعة المجتمع التدوينى ده صار مجتمع عظيم لا يقل ابدا عن مجتمعات اخرى زى الصحافة والاعلام او الجامعات اصبحنا أبناء كار واحد اتضحت ملامحنا لبعض تعارفنا على أفراد الأسرة التدوينية عرفنا ان فلان عصبى وبراوى
وشايف النص الفاضى من الكوباية وساخط على الاحوال السيئة الموجودة فى بلادنا العربية وعلان هادى ومتكيف ومبسوط اوى وحاطط ايده فى ميه باردة وشايف النص المليان من الكوباية وتبتان متدين وهمة الشاغل هى القضايا اللى بتمس دينة وفلانة بيتوتية اوى ورومانسية وبتحب كل الناس وبتكتب من قلبها وعلانة وطنية ومتحمسة للبلد وهكذا وانا شخصيا بدأت اعرف مجموعة كبيرة من الاصدقاء المدونين اللى كلهم ..فعلا.. ينطبق عليهم قول رب أخ لك لم تلده أمك ولقيت فيهم وفى كتابتهم وتعليقاتهم وجبات روحية يومية !تشبع الروح الصحفية الكامنة فى معاميقى و تملى الحياه الرتيبة الكئيبة الجافة لقيت فيهم المرح والجدية والحماس والسخط والعمق والطفولة والحب والاخلاق النبيلة واظن كلنا حسينا بنفس الشعور أظن فعلا احنا بقينا أبناء كار واحد زى النجارين والصحافين والمهندسين والدكاترة لما تقول لدكتور .. تعرف الدكتور فلان ؟ يقولك آه مش اللى فاتح على أول الشارع اللى جنبنا ده باطنى شاطر وكشفة بكذا وعنده ولد فى كلية كذا واخوة اسمة كذا وأمة أصلا كانت داية وبيعمل عمليات فى مستشفى كذا اهو انا بقيت كدة لما تسألنى عن مدون أقولك اه ده صاحب مدونة كذا وفى كلية كذا وغاوى ندوات او بيحب الرسم أو الشعر و كان عامل معرض فى الحتة الفولانية عشان حكالنا مرة عن المعرض ده
ويوم بعد يوم المجتمع التدوينى بيكبر وبنرتبط ببعض اكتر وبنفهم بعض اكتر صحيح فى تكتلات تدوينية لان تقريبا فى حوالى 20000 مدونة مصرية واكيد مفيش حد قدر يزور ويحصر كل المدونات فحصلت بعض تكتلات ساعات ادخل مدونة جديدة الاقيها جميلة اوى عسولة خالص رغم انى عمرى ما زرتها والاقى فيها لينكات وتعليقات من ناس ما اعرفهمش خالص وابص الاقى الجروب ده اصحاب وانا معرفهمش وهما ما يعروفنيش لكن اظن انا بقى ليا جروب تدوينى سعيد وفخور انهم اصدقائى وانا انهاردة فكرت انى اكتب عنهم اكتب كل اسبوع بوست صغنون عن مدونة وتبقى فقرة ثابتة بعنوان مدونة الأسبوع وكمان انا هحط فى السايد بار بتاعى أهم أفراد الشلة الصباغية اللى بحب ازورهم دايما وهما كمان بيجو عندى دايما ومخلصين الشاى والأكل أول باول وهما عارفين نفسهم واحد واحد
اصدقائى الاعزاء ان التدوين خلق مساحة جديدة وواسعة للحرية الفكرية وهو أعجوبة هذا العصر ونقطة تلاقى وصداقة لكافة الشعوب والمستويات الفكرية والشعبية تفتكروا بعد عشر سنين هيكون التدوين وصل لفييين ؟؟

أجمل أقــــوال المدونين
يتبقى بقى انى اقول.. انى كنت بجمع أطرف أقوال المدونين اللى كانت بتعجبنى وتستوقفنى وهديكو منها جزء فى الوريد كلمة عبقرية هي من حرفين ... ولكنها أبلغ من ألف مقال... طظ أشرف حمدى
من مدونة كاريكاطظ إلى من رافقنى ويعلم سرى .. يعلم متى بكيت ..ومتى رن الفرح فى قلبى ..سمعنى ألتهج محتضرا ..ورأنى ولم يفرح لموتى ..وسحبنى من وحدتى العميقة لأعيش بينه وبين والورق إليك يا.... قلمى طارق هلال Arabic ID من مدونة بحب الرسم وبحب أرسم أحلامي حتى لو كانت بـ......الرصااااااص هايدى حسين من مدونة إرسم بالرصاص لا تجعل سفالة الاخرين تكشف عن سفالتك نوران الشاملى من مدونة بت خيخة وأى كلام ممكن اكون عاقلة..ممكن اكون مجنونة..لكن الاكيد ان لسة قلبى حى من مدونة شـــــهــــروزة من الممكن أن يكون عمر مدوناتنا أطول من أعمارنا..أكتبوا شيء فى ميزان حسناتكم فربما تكون صدقة جارية شريف عبد الهادى من مدونة فبركــة كون اللغة وعاء الفكر وكوني أنطق بلسان عربي غير مبين ، كوني مصري المولد والتاريخ والجذور، حيث أنطق الذال زاياً،وحيث أنطق الثاء سيناً، حيث ذلك كذلك، فإني أستميحكم عذراً إذا جاء الفكر مشوشا تارة، مشوها تارة، معتوها أحيانا، متعقلا أحياناً. بين بين أحايين أخرى _أنا عقل الفكر محبوس بين الجدارن أسامة يس من مدونة وميض لا يهمني اسمك .. لا يهمني عنوانك .. لا يهمني لونك .. ولابلادك .. يهمني الإنسان أحمد على مدونة يوميات عيل مصرى دايما الدنيا فى الأحلام بتبقى أحلى عشان كدة أنا هنا وكأنى فى حلم يعنى هنا هحلم على راحتى أمـــــــيرة من مدونة سهر الليالى هو أنا مش أديب ولا حتي كاتب وأكيد طبعا مش شاعر....... انا أصلا ما بعرفش أكتب من الأساس بس انا بحاول اقول حاجة في قلبي وخلاص كريم محمد من مدونة الأصيل ياخوفى لكون برغوتة نايمة على فروة كلب و بتحلم انها انسان أحمد عاشور من مدونة عاشوريات انا شااااب خجووول جدا من ناحيه البنات وبخاف وبترعب منهم علشان هم دماغهم لاسعه احيانا وبخااااف علي كرامتي جدا وعلي اصحابي جداا جداا وغيور علي اي حد علي اختي وعلي امي وعلي ابويا وعلي اصحابي وعلي حتي زمايلي ليه ماعرفش مصطفى محمود من مدونة حواديت وحكاوى دكتور لأني طبيب ان شاء اللهوحر لأني أعشق الحريه وأحبها وأكره القيد والظلم والحبس والذل وكل ما ما يجعل نفسي وروحي أسيرة لغير الله محمد أبو زيد مدونة دكتور حر

!! اللهم دسترّ مدوناتنـــــــا

أحمد الصباغ

Jan 9, 2008

الهجرة .. كل عام وأنتم بخير

ما أروع ان نقف لحظات
ننظر في دروس الهجرة النبوية الشريفة
من مكة المكرمة الى المدينة المنورة
وننظر بعمق في فصول الهجرة ودروسها
ونتعلم منها جوانب مضيئة
من حياة رسول الله صلى الله عليه وسلم
هذا النبي الكريم، والرسول العظيم
الذي لم يخرج من مكة مهاجرا الى المدينة المنورة
إلا بعد أن أذن له الله عز وجل بذلك
وبعد أن صبر وتحمل واحتسب
وعانى ماعاناه من البلايا والرزايا والأذى من أهله وذويه
ثم ممن حوله من الذين كرهوا ان تظهر كلمة الله عز وجل
وان تكون كلمته سبحانه وتعالى هي العليا
وكلمة الذين كفروا هي السفلى

والعقلاء من الناس
هم الذين يحرصون على اغتنام فرص المناسبات الاسلامية
ليقفوا عندها ويتدبروا في اسرارها ومعانيها
ثم ليستفيدوا من كل تلك الجوانب العطرة في السيرة النبوية الشريفة
وتقتنص مدونة أحمد الصباغ الفرصة
وتتقدم الى كافة الأصدقاء والأهل وأبناء الشعب المصرى والعربى
والامتين العربية والإسلامية
بخالص التهنئة بذكرى الهجرة النبوية الشريف
وبالعام الهجرى الجديد
أعادة الله عليكم الخير واليمن والبركات
وأستغل هذة المناسبة الاسلامية الجميلة
وأفتتح الركن الإسلامى مساهمة من المدونة فى نشر الثقافة الاسلامية

: ونبدأ بالموضوعات الآتيه
حفظ القراءن
من دعــاء الرسول .. صلى الله عليه وسلم
زجاجة مكسورة ..أو قشرة موز
قم الان .. قبل فوات الأوان

وأستغل الفرصة أيضا وادعوكم
لإفتتاح موقع دار الكتب مع الزميل مصطفى الحسينى صاحب البوابة
يوم الخميس الموافق 10 /1/2008 م
والمهتمين بالقراءة
عنوان حفل الإفتتاح
مكتبه البلد - ميدان التحرير بوسط البلد - 31 ش محمد محمود أمام الجامعة الأمريكيه
وكل عام وكل المدونين بخير
وعام سعيد

أحمد الصـــــباغ

Jan 4, 2008

كلام العيال البلوجرية - حفلة عيل مصرى


اصدقائى واحبابى البلوجرية الأعزاء

كل سنة وانتو طيبين تانى وأول بوست فى السنة الجديدة

انهارة بقى كان المفروض أكتب الحلقة التانية

من سلسلة "كلام العيال البلوجرية" اللى بكتب فيها خواطرى عن المدونين
لكن انهاردة فى مناسبة بلوجرية غير عادية


وهى إن صاحبها ..صديقنا - الغير عادى - الأستاذ أحمد

قرر أخذ فترة راحة طويلة وتعليق الكتابة فى المدونة لأجل غير مسمى

وقولت مش هكتب حاجة

غير التعليق اللى كتبتة هناك

"رسالة الى صديقى صاحب " عيل مصرى

السلام عليكم ورحمة الله

بداية احب اشكرك على كلماتك الرقيقة فى حقى وحق كل المدونين

الذين أعتبرهم جزء لا يتجزأ منى جسدا وروحا

واسمح لى أن أعتبر ان علاقتى بك هى ليست علاقة تدوين فقط

ولكن

هى علاقة إنسانية فوق العادة..تمثل انت فيها الطرف المُعلم

والصديق والأخ الأكبر.. و كتاب كبير مفتوح

يضم تجارب انسانية قيمة وجميلة وشيقة

.
.
فى البداية كنت فى مرحلة التعرف على مقالاتك

من مبدأ انها "حكاوى جميلة" ثم بعد قراءات قليلة

فؤجئت أن الموضوع يتعدى كونة حكايات مسلية.. الى أنه تجارب انسانية قيمة

تمثل خلاصة حياة لأنسان

عاش فى فترة من أهم فترات الحياة المصرية

تجارب انسانية طالما توقفت أمامها

وتأملت فيها تأمل المتذوق للوحة تشكيلية أو المشاهد لفيلم واقعى

وبالتالى فأنا اذا سمعت منك بخبر إغلاق المدونة لفترة

او لأجل غير مسمى

فلن يكون هذا بالنسبة لى وداعا

وإنما هو إنتقال من مرحلة إلى مرحلة

من مرحلة القراءة عبر الشاشة ربما لمرحلة قراءة وجها لوجه

فإلى القاء يا صديقى وأخى الحبيب

الى اللقاء وجها لوجه

أحمد
3/1/2007
الصورة عدسة : أحمد الصباغ
ملاحظة : الصورة دى بتفكرنى أوى بالاستاذ أحمد وما حدش يسألنى ليه *