خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Mar 27, 2008

بعد عام من التدوين

فى يوم ربيعى جميل من أيام شهر مارس عام 2007 كان مولد مدونتى "مدونة خالو أحمد " .. صحيح فِضلت بعد التاريخ ده فترة من الزمن فى تعداد الجماد ، وظّلت تحمل فقط صورة كبيرة ليا لعدة أسابيع .. ثم حملت بعض كلمات قليلة تحت الصورة أُعرّف بها نفسى .. لكن مع أول تعليق ، عرفت إن فى حد بيتابعنى وبدأتْ فى الخروج من مرحلة السكون إلى مرحلة النشاط والكتابة اليوميه والمتابعة والرد على التعليقات ، ويوم بعد يوم .. بدأت أطوّر المدونة فى الشكل والمضمون وطريقة التفكير والعرض وطريقة تناول الموضوعات ، ثم دخلت عصر الكاميرا الرقمية فبدأت بإثراء الموضوعات بصور حقيقة من إلتقاطى ، بدلا من الصور المنقولة أو المرسومة

ثم كانت الصداقات واللقاءات الأسطورية الرائعة مع مدوّنين من كل حتة ف مصر ، سواء أون لاين من خلال الزيارة الدائمة لمدوّنات أحبها ، أو اللقاءات التى كنا نعقدها فى المناسبات ، ولازلت أذكر أول لقاء مع مدوّنين .. والانطباع الجميل اللى أخدتة لما قابلت مجموعة من أجمل شباب مصر المحترم المُتحمس المثقف والمتفتّح جدا .. ثم توالت الصداقات التدوينية بعدها وأصبحت تُصبغ المدونة بلون الود والتقارب ... ثم أصبح التواصُل بين المدوّنين أحد أهم أهدافى التدوينية

المدونة فتّحت عينى على اللى بيحصل حواليا .. وبقيت ماشى "عنيا مفنجلة" لكل خبر بسمعة او موقف بمر بيه ، ولأول مرة بحس انى بقيت عامل زى " مرصد حلوان " يعنى التدوين زوّد ثقافتى وإحساسى بنبض المجتمع .. وكمان شغّل دماغى فى تحليل الاخبار والمواقف اللى بتحصل ، عشان أقدر أعرضها بإسلوبى لأصدقائى وزوار مدونتى

المدوّنة إكتشفتنى ، أى والله .. المدوّنة إكتشفت فيا حاجات كتير ما كنتش أعرفها ، يارتنى بدوّن من وأنا عندى 16 سنة ، أكيد كانت حياتى أتغيرت ... أكتشفت ان عندى هوايات ومواهب مدفونة لو كنت نميتها من صغرى كانت الأمور أختلفت ، أكتشفت إن عندى قدرة على الكتابة الساخرة بصورة ممكن تقترب من الإحتراف ، وإكتشفت إنى مشروع رسّام كاريكاتير لو أهتميت بالتدريب والمران والممارسة ، وإكتشفت إنى أنفع شاعر عامى ، ولما كتبت شعر عامى أستقبلوه اصدقاء مدونتى بترحاب وإعجاب ونقد بناء ، وإكتشفت أنى ديزاينر مبتدئ عملت مجموعة من التصاميم والبنارات المقبولة لمعظم اللى شافوها ، وكمان هوايات كتير بدأت تنزل على أرض الواقع مثل هواية التصوير الرقمى وبالفعل أعددت أول مجموعة صور رقمية لى بعنوان " لمحات مصرية " لعرضها فى المدونة ، وهى معروضة حاليا على موقع الفيس بوك

يعنى دلوقت أى حد يقدر يكتشف هواياتة ومواهبة ويختار منها اللى يحبة وينميه ويستغله إستغلال جيد ، ويتواصل مع الناس اللى بيشاركوة فى الموهبة دى ويسمع أراء ونقد ، وكمان يحضر ندوات ولقاءات مفيدة ، أنا شخصيا أعرف بين المدونين دلوقت أدباء .. وشعراء .. وموسيقين.. وعازفين .. وكُتّاب ساخرين .. وقصاصين .. ورسّامين .. وممثلين كمان .. وكافة طرق الإبداع الأخرى

المدوّنة علمتنى لغة الحوار ، وعلمتنى الإستماع وتقبل الأراء اللى بختلف معاها ، وترسّخ مفهوم " الناس فيما يعشقون مذاهبُ" بوجدانى ، وتأكدت أن "لولا أختلاف الأذواق لبارت السلع" ، وأن "كل شيخ وله طريقة" ، وانا اللى كنت بنظر للمختلفين معى على أنهم عندهم شذوذ فكرى ، أصبح من العادى بالنسبة لى إنى أقول بعد نقاش طويل : أنا متفق معاك .. أنا اللى كنت فاهم غلط ، ولقيت فى عالم التدوين مجتمع مترامى الأطراف بيضم مدى واسع جدا من التيارات والمذاهب الفكرية ، واستمتعت كتير بالإطلاع على أفكار بجد كانت لاول مرة بتعرّض لها

والمدوّنة علمتنى مهارات مهمة جدا .. المهارات الأساسية لتصميم المواقع ، والجرافيك ، عرفت يعنى أيه ويب ديزاين ، ويعنى أيه لغة "HTML" وأكواد ، وقالب مدوّنة ، وسايدبار ، وإزاى أصمم قالبTemplate لمدونتى وأزاى أجيب قالب جاهز من أحد مواقع خدمات المدوّنات ، وأعدل فيه ، وأضيف الخدمات المختلفة للمدونة زى شريط الأخبار وعداد الزوار وألبومات الصور

والمدوّنة أرشيف للحياة .. أيوة طول عمرى بحلم إنى أكتب يومياتى وأهم الأحداث اللى بمر بيها ، فالحياة أحداث تمر مثلما يمر زورق على سطح نهر فيحدث مسار رغوى أبيض سرعان ما يتلاشى ولا يتبقى له أثر ، كذلك هى أحداث الحياة .. رحلة رُحتها مع مجموعة من أجمل أصدقائك أخدتو شوية صور كل صورة بتعبر عن لحظة فى عمر الرحلة ، كتبت خواطرك وذكرياتك عن اليوم ده ، ونزلتها فى تدوينة جديدة ، أولاً عيّشت القرّاء فى جو الرحلة ، وثانيا حفظت يوم من عمرك فى أرشيف أدبى بديع

لم أفكر فى إنهاء علاقتى بالتدوين أبدا .. رغم حدوث منحنيات كتير فى سنة التدوين دى ، ورغم إن نسبة كبيرة أوى من المدوّنين قررو فى وقت من الأوقات انهم يقفلو المدونة ويبطلو تدوين .. لكن عمرى ما فكرت فى ده أبدا ، بالعكس كنت بحس ان لو حياتى إتغيرت بأى صورة من الصور سافرت مثلا أو بقيت نجم مشهور أو حتى بقيت رئيس جمهورية .. هدوّن بردو

مش بس كدة .. كمان لما كان حد بيقفل مدونتة أو بيفكر يقفلها لاى سبب من الأسباب .. كنت بحس بنفس شعور واحد مات له حد قريبة او صاحبة او جارة ، ده طبعا بالأضافة للشعور المأساوى لما كانت مدوّنة تتقفل للسبب القهرى اللى ما بنقدرش نقف قدامة وهو .. الموت

قبل التدوين .. كان كل هواياتى كتابة الشعر ، وما كنش فى حد يسمع لان نادر اوى فى مجتمع الشباب إنك تلاقى شاب مهتم ومتذوق للشعر ، ويقدر ينقدك نقد بناء ، وأذكر ان فى أحد فترات عمرى كنت أذهب لمحافظة أخرى كى ألتقى بصديق كاتب ومتذوق للشعر حتى نتبادل الأراء ، دلوقت ممكن بسهولة فى أى لقاء من لقاءات المدوّنين الدورية تلاقى على يمينك شاعر وعلى شمالك متذوق للشعر ، يعنى سوق عكاظ بس بصورة حديثة

رغم إن المدونة كانت تحمل إسمى فقط فى البداية .. لكن بعد فترة قصيرة جدا كتبت مجموعة تدوينات عن أطفال الأسرة اللى هما ولاد أخواتى البنات وأطلقت عليهم إسم " المخاليل " وبقت المدونة أسمها " مدونة خالو أحمد " وبقيت بعتز انى أشهر خالو بين المدونين

أصدقائى الأعزاء .. بعد مرور عام على إنشاء مدونتى .. تقدرو تقولوا إن خالو أحمد بيتولد من جديد ، وهيتولد من جديد فى كل إحتفال بمرور عام جديد على التدوين .. وبقول انا مش بس هستمر فى التدوين إن شاء الله ، لكن دايما هدعو الاصدقاء الغير مدوّنين انهم ينضمو عالم التدوين الرائع ، وكمان بقول لكل مدوّن : التدوين روحك ومتنفسك وملجأءك ، ومدونتك هى بيتك الروحىّ ، ونافذتك على العالم فلا تمنع نفسك من التدوين وأفتح نوافذك وتمتع بنور الشمس



وأشكر كل من علق فى مدونتى وناقشنى وزارنى ونصحنى وبادلنى الرأى وشاركنى همومى وأفراحى ، شكر صادق من أعماق القلب ، وأقول لهم أنتم من صنعتم .. مدوّنة خالو أحمد



أحمد الصبّاغ

Mar 26, 2008

الحكم على ابراهيم عيسى

حكمت محكمة جنح بولاق على إبراهيم عيسى - رئيس تحرير الدستور
فى قضية صحة الرئيس بالسجن 6 شهور مع الشغل
بس إبراهيم عيسى يقدر يستأنف وان شاء الله هياخد عفو
وكل الناس ومنظمات حقوق الانسان ومنظمة العفو الدولية متضامنة معاه
فلا نامت أعين الجبنـــــــاء

أحمد الصباغ

Mar 23, 2008

ملخص لقاء المدونين بساقية الصاوى / البورصة

كان أمس السبت 23 مارس 2008 موعدنا مع لقاء المدونين فى ساقية الصاوى وحضرت مجموعة كبيرة وجميلة من المدونين سواء من القاهرة او من مدن أخرى وتمت مناقشة مجموعة موضوعات هامة وحيوية
وتم فى اللقاء مناقشة مجموعة من الموضوعات منها

التعارف وتبادل لينكات المدونات ووسائل الاتصال
-----------------
توجية التهنئة من المدونين لأحمد الجيزاوى وشاهندا بمناسبة الخطوبة السعيدة
-----------------
مناقشة فكرة الكتاب الأدبى للمدونين – وتم الاتفاق على ان كل من يود الاشتراك فى الكتاب يختار افضل تلات اربع اعمال له ( شعر – قصة قصيرة ) ويرسلها لى على الايميل وانا هجمعها فى ملف وورد واحد وابعتها للجروب كله وبعدين كل واحد يكتب ملاحظاته واختيارة ونعمل جلسة لتحرير الكتاب واختيار الاعمال اللى هتشارك وايميلى تحت فى اخر البوست
-----------------
مناقشة التطور الطبيعى للتدوين وكيف تطورت فكرة التدوين بداخل كل منا من أول ما بدأ التدوين حتى الان
-----------------
مناقشة فكرة الكومنت موديراشن والحذف للتعليقات وعلاقتها بحرية الرأى والتعبير
-----------------
تقييم فكرة اتحاد المدونين المصريين ومناقشة الاراء المختلفة
-----------------
الاتفاق على التبرع بالدم يوم 5 إبريل 2008 بمركز المصل واللقاح فى الدقى – الفاكسيرا ، وزيارة ملجأ الايتام بعد التبرع
قائمـــــة الحاضــــــــرين

أحمد الصباغ صاحب مدونة خالو أحمد ..أنا
أحمد الجيزاوى صاحب مدونة بحبك يا مصر
دكتورة شاهندا صاحبة مدونة حاجات ملخبطة جوايا
أحدث عريس وعروسة فى عالم التدوين ، وكان أول حاجة تمت فى اللقاء توجية التهانى من كل المدونين لأجمل حبيبن فى دنيا المدونات وبجد بنتمنى ليهم كل التوفيق والأمنيات الطيبة
نوران الشاملى أشهر بت خيخة وأى كلام فى الدنيا ، وهى صاحبة فكرة التجمع للتبرع بالدم يوم 5/4/2008 وكمان فتحت موضوعات جامدة جدا للمناقشة فى اللقاء وكان منها تصور المدونين لطريقة التعبير عن الإعتراض عن الوضع الحالى للبلد اقرو البوست ده هو لازم نحرقها
نورا الخشن صاحبة مدونة اه .. وكفى ، والصديقة الجديدة فى عالم التدوين وده كان اول لقاء تحضرة معانا وهى بالمناسبة شاعرة وأديبة وفنانة تشكيلية جميلة اوى
ميكا بريطانية صاحبة مدونة ميسيف أتاك ، وصحفية بجريدة ديلى نيوز بيبر
حمادة زيدان : صاحب مدونة على مكتوب تحمل أسمة وهو كان بيدون على مكتوب لكن استقطابة لبلوجر وعمل من أول السطر
أحمد سعد دومة شاعر الأخوان وصاحب مدونة
لإننى احببت
محمد عطية مدونة الشاعر
أحمد مهنى – مدونة مزاج حزين
محمد – إبن حجر العسقلانى : صاحب مدونة الصحيفة الكاشفة وشهرتة أبو العساقيل وكمان فى اسم جديد قالوه امبارح .. عسقوووول
محمد عامر ( التمنياوى طه) وهو صديق قديم للمدونين لكنه لم يدوّن بعد وبنقول له مستنين نشوفك على بلوجر قريب
سيد سعد صاحب مدونة المكسرات وبدون أدنى مجاملة هو مدوّن يتمتع بحس فنى عالى اوى
القيثارة المكسورة غير مدونة
شيماء فارس صاحبة مدونة فضفضة ودى كانت اول حضور لها فى صالون المدونين وبجد شخصية جميلة
منار عونى قلب الاسد
أحمد سعيد مدونة أحمد سعيد
محمد قنديل صاحب مدونة مهندس مصرى اللى قرفان وبيفكر يسيب البلد ويمشى ، الحقيقة كان اسم المدونة ظاهر عليه اوى انهاردة ، بس لما اتكلم حسيت ان لسه لديه تفاءول .. حاجة غريبة هههه
احمد البوهى صاحب مدونة إنكسارات .. فى الحقيقة ده كان تانى لقاء ليا مع البوهى بس ما كنتش متخيل انه بالثقافة والروعة والفكر المنظم ده بجد رغم انه ما اتكلمش كتير لكن كلامة مركز جدا وعملى اوى ومنظم وعجبنى اوى وعجب معظم الموجودين
محمد الجوهرى بولوتيكيا
ابراهيم عادل "معايا" صاحب مدونة انا وانا ، مدون قديم ورائع لكن دى اول مرة اتشرف بلقاءة وهو شاب مثقف وعنده فكر تجاة كل اللى بيدور حوالينا
عبد الرحمن فارس لسانى هو القلم
رودينا مدونة بنوتة مصرية ، فاكهة اللقاء وأم العسولة نور اللى كانت موقفة الدنيا على رجل واحدة ، وكمان فى اكتر من خمستلاف مدون لغاية دلوقت اتقدمو عشان يحجزو خطوبة نور ههههههه
أميرة صديقة غير مدونة و هى صاحبة شيماء فضفضة
مدحت محمد مدونة مشاعر دافئة
لولا صاحبة مدونة أحلى الأوقات
احمد سوو جارى العزيز وصاحب مدونة عجوز وعندى30 سنة ، ده طلع مفترى بشكل كنا بنناقش فكرة نحذف والا نخلى التعليقات لو حد أساء لينا فى المدونة ، قام كل الناس اللى قال نحذف واللى قال نخلى ، ده بقى فهمنا ان يوم ما حد يقول فى التعليقات حاجة ما تعجبوش مش هيخرج من المدونة سليم هههههه كويس كدة بقى اما احب اشتمة بعد كدة ابقى ادخل مجهول ههههه
أسامة المهدى صحفى بجريدة المصرى اليوم
إسلام عيسى شاعر غنائى
محمد مدحت صاحب مدونة مواطن حقوقى
مدحت أبو طاقية صاحب مدونة الزينبى
محمد عادل مدونة ميت

أنا .. مع إبراهيم عادل

محمد الجوهرى

مهندس مصرى .. مبتسم والله اهو


سيد سعد .. صاحب المكسرات
وأخيرا وليس أخرا .. أحب أشكر بشدة كل اللى شرفوا الصالون بالحضور واتمنى دوام التوفيق والنجاح لكل المدونين
واتمنى من كل الاصدقاء اللى يحبو يحضرو لقاء المدونين القادم انهم يقترحو الميعاد والمكان اللى يشوفوه مناسب وهناخد بأغلب الأراء
E-mail:ahmed000eg@hotmail.com
أحمد الصباغ

Mar 20, 2008

محمد .. رسالة حب وسلام

إن ميلاد الرسول محمد صلى الله علية وسلم هو أعظم حدث فى تاريخ البشرية .. الرسول الذى كان وسيظل رحمة مهداة للعالم حتى قيام الساعة .. وانه أعظم رسالة من الله الى البشر .. حاملة الحب والسلام والتسامح
كـــل عــــام وأنتـــم بخــــــير
أحمد الصباغ

Mar 18, 2008

فى صحتك يا مصر

إن ما يحدث فى مصر الآن هو كارثة بشعة ، تشبة كوارث تسونامى وزلازل أسيا مع الفارق ان الكوارث المذكورة ، هى كوارث طبيعية لم يتدخل فى صنعها الإنسان ، أما ما يحدث فى مصر الأن فهى كوارث صناعية بشرية صنعتها أيادى مصرية سوداء مجرمة ، و صنعتها عشرات الأنظمة الديكتاتورية توالت على حكم مصر عشرات ومئات السنين ، لم يختار فيها المصرى حاكما واحدا يحكمة ، إما ملكا فاسدا جاء بالتوريث ، وأما رئيسا بالنيابة بعد موت ( البعيد اللى قبلة ) مقتولا أو منتحرا

مأساه سوداء .. لو اعتبرنا اللون الأسود بهذا السوء ، مأساه إمتدت من رغيف العيش ، الى شربة الماء ، الى تلوث الأرض والزرع ، وغش اللحوم والاغذية ، ونهب المال العام وهلاك الأرواح فى العبّارات والطرق والمواصلات ، والفساد الذى استشرى فى كل ركن وكل بقعة وكل مؤسسة وبيت وشارع وشبر أرض فى مصر

واليوم أصبح الفساد الذى ينهش مصر طولا وعرضا أصبح ملكا متوجا وحيدا بلا معارض ولا منافس ولا مصحح ، وأصبحت أصوات المعارضة بكل تيارتها الليبرالية والدينية والمستقلة أصبحت أصوات واهية لا تحرك ساكنا ، وأما رموز المعارضة الذين عقدنا فيهم بعض الأمل على التغيير فقد تم إلقائهم خلف قضبان السجون

إنها مأساه الذل والهوان ، ذل المواطن المصرى بين أهلة وفى أرضة وداخل وطنة .. مأساة طابور العيش الذى يتقاتل فيه المصريين فى أبشع ملهاة كوميدية ساخرة .. المصرى الذى علّم العالم كيف يزرع أرضة على مدى الآف السنين .. المصرى الذى يمتلك بين يدية أطول وأعذب نهر فى العالم ، وأخصب أرض فى العالم ، يتقاتل فى طابور العيش صباحا فيَقتِل أو يُقتَل ، من أجل الحصول على عشرة أرغفة وأصبحت مصر الأول فى العالم فى إستيراد القمح .. تخيلو؟؟! كيف وصل بنا الحال

تعملنا فى المدارس إن مصر من أغنى الدول بالموارد الطبيعية .. الغاز الطبيعى والثروة السمكية والتربة الزراعية والقطن طويل التيلة والسياحة وعلمنا أن مصر تمتلك ثلث أثار العالم والبترول والمياة الجوفية بالإضافة لنهر النيل والبحيرات المالحة والعذبة والسواحل الممتدة شمالا وشرقا على البحرى الأبيض المتوسط والأحمر .. بالإضافة لقناة السويس المعبر الرئيسى والوحيد بين قارات العالم القديم .. أظن إن هذة المعلومات قد حذفت من المنهاج .. لأ أظن أن لديهم القدرة بل قل البجاحة الكافية لأن يقولوا هذا الكلام وقد أصبحنا نحتل المرتبة الاولى فى الديون الخارجية بين الدول العربية ، وأصبحنا نتصدر قوائم الفقر العالمية ، وتخطنا دول كثيرة كنا نضرب بها المثل فى الفقر والتخلف ولا يسبقنا سوى الدول التى تعانى من المجاعات والجفاف والحرب الأهلية

أنظر الى كوب مياه من الحنفية .. تأمل جيدا .. وتخيل أن فى مصر أعلى معدل إصابة بالفشل الكلوى 17 فى الألف ، ومنظمة الصحة العالمية تقول أن فى مصر 12 مليون حالة إصابة بالفشل الكلوى وإلتهاب الكبدى الوبائى بدراجات إصابة متفاوتة ، ويوجد 18 مليون مصاب بالبلهارسيا وإن 54% من الأطفال مصابين بالأنيميا

ومأساة المصريين هى جزء من مأساة العرب والمسلمين المهانين والضائعين والمزّلين فى كل مكان ، مأساه فلسطين الضائعة التى لا تجد رجلا واحدا بين الحكام العرب يغير ويثور لكرامتة وكرامة الأمة المسلوبة ، ومأساه البوسنة والهرسك ، والشيشان ، والعراق وغيرها من الأعضاء المبتورة من جسم الوطن العربى الاسلامى

للأسف .. لم يبقى فى يدى ولا فى يد أحد من المصريين الشرفاء أى شئ نقوم به لإنقاذ الوطن .. لم يتبق شيئا .. ربما الشئ الوحيد المتبقى لى أن أنام وأحلم بمصر الجميلة النظيفة المتقدمة القوية المتحضرة العزيزة .. وأحلم بأهل مصر متعلمين ومنعّمين فى خيرها ، وبالقوى الجبارة الهائلة للشباب المصرى مستغلة فى صناعة واستثمار وتقنية وفكر .. لكن للأسف تسير مصر الأن نحو الهاوية الأخيرة التى تدخل بعدها فى سكرات .. الله وحده يعلم متى ستخرج منها ؟

أحمد الصباغ

Mar 17, 2008

دعوة للقاء المدونين بساقية الصاوى


أًصدقائى وأحبابى
أدعوكم للقاء المدونين بساقية الصاوى بالزمالك
يوم السبت 22/3/2008 الساعة 11 صباحيا

صفحة اللقاء على الفيس بوك

صالون أحمد الصباغ للمدونين على الفيس بوك
للذهاب لساقية الصاوى
من ميدان رمسيس أو الاسعاف خمس دقايق بمينى باص للزمالك او تاكسى
بالإضافة الى ورشة عمل مصغرة ابتداءا من الساعة 2 ظهرا
لبحث فكرة كتاب يتضمن أعمال أدبية للمدونين
أقترحتة أحدى دور النشر
: للتنسيق
تحياتى
أحمد الصباغ

Mar 10, 2008

تسمحولى أجاوب التاج بقى ؟

أصدقائى الأعزاء
اليوم تتم المدونة عاما بالتمام والكمال
والحقيقة انا مش بعتبر يوم انشاء المدونة يوم 10 مارس بالتحديد
لأن انشاءها استغرق أيام وربما أسابيع
وعشان كدة هيتضمن شهر مارس بالكامل فقرات ذات طابع خاص
تمثل ملخص لعام كامل من التدوين
نيجى للتاج بقى
التاج ده عبارة عن عشر أسئلة اختارتهم لانى فعلا محتاج اكون رأى فى الموضوعات دى
والحقيقة التاج ده لقى صدى واسع جدا
سواء فى المدونات على بلوجر
او مدونات على مواقع استضافة اخرى زى مكتوب
بل الامر امتد للمنتديات والمواقع الشخصية ومواقع بعض المنظمات السياسية
وانا سعيد جدا لأن ده بالنسبة لى مقياس نجاح لهدف مهم جدا من اهدافى التدوينية
هو التواصل
وفى الواقع انا فكرت فى تجميع كل الاجابات فى كتاب إلكترونى واحد
تمثل إستطلاع للرأى العام للمدونين فى الموضوعات التى يطرحها التاج
بحيث انه يكون وجبة متكاملة للقارئ
ويستطيع عمل رؤية شاملة للموضوعات
وكمان كنوع من التحية للأصدقاء اللى جاوبو التاج
ودعم لأواصر الصداقة بين المدونين
وانا فى اللمسات الأخيرة لتصميم الكتاب
وبعد كدة هحملة على مواقع الداونلود المشهورة
ويمكن أى حد تحميلة
واللى يحب يساعد فى انهاء الكتاب ده ياريت
انا جمعت حتى الأن أكثر من 100 إجابة على التاج
بس فى مئات اخرى مش قادر اوصل لها
فياريت اللى جاوب التاج او يعرف حد جاوب التاج
يساعدنى بالاشارة الى لينك الاجابة فى تعليق او ايميل
يتبقى إنى أقول انا فعلا استفدت كتير من قراءة اجابات التاج فى المدونات المختلفة
صحيح فى بعض الاسئلة ما اقتنعتش اقتناع كامل بالردود
وما كونتش رأى قاطع
وبعض الاسئلة الاخرى غيرت وجهة نظرى وكونت راى
ياللى بقى تسمحولى أجاوب ؟

هل توافق على حزف خانة الديانة من البطاقة الشخصية ؟

أوافق ، فى الحقيقة للموضوع بالنسبة لى عدة أبعاد
إذا كان وجود خانة الديانة فى البطاقة الشخصية يتسبب فى حدوث بعض الاضطهاد من أشخاص متعصبين لا يتفهمون سماحة الدين الإسلامى ولا يقدرون معنى كلمة وطن ، فإن الرسول صلى الله عليه وسلم يقول " لا ضرر ولا ضرار " .. ولقد رأيت أشخاصا حولى ينظرون لتلك الخانة على إنها الحقيقة الدينية لصاحب البطاقة .. لدرجة ان احد الاصدقاء المدونين الاعزاء جدا المعروفين برجاحة الرأى قال : أمال لو واحد خطب واحدة مسلمة او اتجوزها تعرف ازاى انه مسلم مهوش بوذى او يعتنق اى دين أخر ... يا حلولى .. يعنى هو لا بيصلى ولا بيصوم ولا بيمارس اى شعائر تدل على دينة ، وبالتالى هى محتاجة تشوف خانة الديانة عشان تتأكد من ديانتة .. طب ياريته ما كان مسلم

والطريف فى الموضوع أن أغلبية الشعب المسلم يرفض حذف خانة الديانة من البطاقة الشخصية وأغلبية الشعب المسيحى يطالب بحذف الخانة ، وهذا لا يشير مطلقا الى ان المسلمين يعتزون بدينهم بينما المسيحين لا يعتزون ، وأنما يشير الى الضرر الذى ربما وقع من قلة على بعض الأقلية المسيحية

وربما الرافضون لإلغاء خانة الديانة ينظرون الى الموضوع من وجة نظر أخرى ، ويتخوفون من حدوث مشاكل نتيجة لذلك ، وربما يؤدى الحذف الى مطالبات اكبر ، وربما يكون وراء هذا المطلب طموح لطمس الهوية الاسلامية لمصر ، والحقيقة انا لا استطيع أن أراهن على نية أى شخص ويكفينى مدى شرعية منطقَه المُعلن

لكن رغم الراى السابق إلا ان فى رأى أخر أنظر له بجدية واحترام هو راى الصديق " مختار العزيزى" : إذا كان في تمييز فهو حاصل دون حاجة إلى خانة الديانة. التمييز عموما حاصل فى مصر لأن مبدأ العدالة غايب أو مفقود تماما لأننا مفيش عندنا تعليم ولا تربية ولا إعلام محترم، وده معناه أن التمييز قبل ما يكون عشان الديانة فهيكون عشان المحسوبية والرشوة والتوصيات والنفوذ والأساطير والخرافات إلخ مظاهر الفساد الأخلاقى والاجتماعى ، يعني باختصار التمييز الدينى يدوب له نصيب صغير من حالة الفساد العامة، فممكن نعالج المرض الأصلي اللي هو غياب العدالة وثقوب الضمائر يكون أفضل. ونترك الناس يهنأوا بالتعبير عن انتماءاتهم الدينية فى البطاقة الشخصية.

يعنى ربما يبقى فى أكتر من وجهة نظر وكلهم صحيح ، يا أما نلغى خانة الديانة ، يا أما نسير فى إتجاة تحقيق العدالة فى المجتمع ونشر ثقافة الحوار وإحترام الأخر

ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين؟

أبدأ بإجابة السؤال من الأخر ، أيوة .. لى أصدقاء ومعارف من المثليين
والحقيقة يبدو أن المثلية الجنسية تصنف إلى أنواع ولا يمكن النظر الى الموضوع بأعتبارة حديث عن فئة شاذة فقط ، لأننى بالاطلاع على حياة واراء ومدونات الكثير من المثليين وجدت ان هناك فئة تتصف بالصفة دى شذوذا وانحرافا عن الفطرة السوية ، وفئة أخرى تتصف بها لوجود خلل سواء نفسى او اى نوع من أنواع الخلل
من ضمن من عرفت من المثليين ، شخص تعرض للتحرش الجنسى فى صغرة ، ويقول انه حاليا لا يشعر بأى عاطفة ذكورية تجاة أى بنت ، وربما عندما يستجيب لعواطفة يجد أن عواطفة تتجه نحو الرجال


ومن المفيد جدا عند الحديث عن هذا الموضوع خبر قرأناه فى الصحف فى الأونة الاخيرة ، وهو يمثل الجدوى الحقيقة من مناقشة موضوع المثليين
الخبر يقول : لأول مرة فى مصر .. عيادة لعلاج الشواذ ، والعيادة قام بإفتتاح الطبيب المصرى : أوسم وصفى ، ويهدف البرنامج الذي يقدمه الطبيب إلى علاج المثليين جنسيا عن طريق تدعيم ثقتهم بأنفسهم ودفعهم للتواصل الإنساني، بعيدا عن التفكير في الجنس وإثراء الوازع الديني داخلهم، ودفعهم إلى ممارسة الرياضة
أما عن الأعتراف بالمثليين فأنا مندهش جدا من فئة من المثليين أصبحو يعلنون عن أنفسهم بفخر ، وأصبحت لهم مطالب يطالبون بها ، وكأن الموضوع تحول لديهم إلى شئ طبيعى يستحق الفخر
وعموما فإن المثلية هى حرية شخصية " و كل إنسان ألزمناه طائره فى عنقه و نخرج له يوم القيامة كتابا يلقاه منشورا اقرأ كتابك كفى بنفسك اليوم عليك حسيبا" سورة الإسراء

هل تعتقد بوجود إضطهاد للمسيحين فى مصر ؟

الحقيقة كلمة اضطهاد ربما تشير الا انه صفة عامة وفعل منظم لكن فى الواقع هو ليس ذلك مطلقا ، و حتى إذا قولنا أنه يوجد إضطهاد فهو من بعض ذوى الثقافات المحدودة ، أو العقول المتعصبة ، أو نتيجة للجهل بالأخر
وانا نتيجة لعملى فى شركة مملوكة لمسيحين وما رايته من تسامح وتقارب ومودة ونتيجة للتصحيح الذى قمت به لرؤيتى تجاة المسيحين فأرى ان البعض احيانا يسئ للإسلام بتعصبة رغم ان ممكن يكون التعصب ده ليس له أى أساس
مثلا : سمعت فى محطة مترو لما المترو جه محطة مارجرجس واحد بيقول بقرف محطة المسيحين اهى وهو بيشاور على الكنيسة
لكن عموما سعدت جدا لما عرفت ان معظم المسيحين مش حاسين انهم مضطهدين وانهم متفهمين لوجود حالة جهل عامة بين بعض طبقات المجتمع المصرى ، وإن أقباط المهجر وما يدّعونه من وجود إضطهاد منظم ومقصود لا يعبر إطلاقا عن المسيحين فى مصر

من هو الشخص الذى تختارة لرئاسة مصر ؟

!الدكتور : أحمد مستجير .. بس الله يرحمة
للأسف استمرار الحياة الغير ديمقراطية فى مصر عشرات السنين أدت لظهور أجيال كاملة غير ناضجة وغير مكتملة سياسيا وفكريا ، وأصبح من العسير جدا أن ترى شخصا يجمع من الصفات والخبرات ما أن يؤهلة لأن تعطية ثقتك وتختارة رئيسا للبلاد ، وحتى الأشخاص الجديرين صعب الوصول إليهم
وفعلا لو كنت أخدت حق الانتخاب ولو كان الدكتور مستجير موجود كنت أخترتة
لكن مبدئيا لو حصلت أنتخابات تعددية نزيهه ، بين مرشحين يمثلون التيارات المختلفة ويختار الشعب واحد اختيار حقيقى ، فأنا أمضى على بياض بموافقتى على الشخص ده

أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟

سأدعوا الكثيرون .. أيمن نور ، نعمان جمعة ، عصام العريان ، على عبد الفتاح ، أسامة الغزالى حرب وغيرهم ، وكل ممثلى التيارات المختلفة ، وكل خبرة وكفاءة بالذات فى المجالات الصناعية والعلمية والإدارية

فى رأيك الشخصى .. ما هى أفضل مدونة على بلوجر قمت بزيارتها ؟

للتدوين أقطاب زيه زى أى مجال أخر ، وأقطاب التدوين زى : وائل عباس ، ونوارة نجم ، وعبد المنعم محمود ، وغادة عبد العال ، ومصطفى الحسينى ، و نهى محمود ، واحمد فؤاد نجم ، واحمد على ، بيحتلوا مكانة خاصة عندى
لكن الحقيقة انا بنظر لكل مدونة على إنها وجبة متكاملة أو حزب سياسى أو تيار فكرى ، وبدى لكل مدونه جزء من التأمل ، وبحترم جدا أفكار المدونين حتى اللى بختلف معاهم جزئيا أو كليا ، وبحرص على قراءة السطور وبين السطور كمان ، لكن بحكم الوقت مش بقدر أسيب تعليقات الا فى قليل جدا من المدونات

للذكور فقط : أيهما تفضل كزوجة .. إمراءه عاملة ، أم ربة منزل ؟
أفضل ربة المنزل بإعتباراها المهمة الفطرية التى خلقت لها المرأة ، رعاية الزوج والأولاد وبث الحنان والدفء فى المسكن ، لكن طبعا احترم المراءه العاملة لظروف قهرية ، يعنى مثلا أمى كانت سيدة عاملة لوفاة والدى فى صغرنا وأظن ان ده شئ نبيل نقدرة كلنا ، لكن العمل من أجل المساواه وتحقيق الذات والبطيخ وغير أرفضة تمام واعتبر المتحدثين عنه يعانون من العقد النفسية

اذا تزوجت وأنجبت ولدين وبنتين .. أى الأسماء تحب أن تسمى ؟

من الأولاد : زياد ، عمر
من البنات : همس ، نورا

هل تعتقد أن توريث الحكم فى مصر . . سيتم فعلا أم لا ؟

أشعر أن توريث الحكم سيتم فعلا ، ربما على بطريقة تمنحة بعض الشرعية مثل تقديم الحزب الحاكم لمرشحة ، وعدم وجود مرشحين على مستوى منافس وهكذا ، وادى الايام بيننا

فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟

أفضل إنجاز : الحفاظ على مصر من حدوث أى حرب أهلية والمحافظة على الأمن العام بصورة مقبولة ، كذا توفير مساحة معقولة من الحرية الفكرية
أسوأ عمل : القوانين المقيدة للحريات مثل قانون الطوارئ والاعتقالات ، والاستمرار فى الحكم حتى الأن ، وربنا يستر بقى

وأخير وليس أخرا
أشكر كل اللى جاوبوا التاج سواء انا وجهت لهم الدعوة
أو قام بالمهمة دى شخص أخر
ولسه الفرصة مفتوحة للجميع إنهم يجابو على التاج
وأشكر لكم الإهتمام ، وأعتذر عن تأخرى فى المتابعة والتعليق
لكن والله كل أصحابى فى بالى دايما
ومستنى ردود الناس اللى تحب تساعدنى فى تجميع إجابات التاج
مع خالص تمنياتى

أحمد الصباغ

Mar 9, 2008

لقاء المدونين بساقية الصاوى

أصدقائى الأعزاء

انهاردة هكلمكم عن لقاء المدونين فى ساقية الصاوى

بناءا على الدعوة الكريمة من الصديق
مصطفى السيد

والحقيقة إلتقيت مع مجموعة أكثر من رائعة

وكان فى كتير أول مرة أقابلة

وحمل اللقاء ليا أكثر من مفاجأة جميلة

منها مقابلة وينكى وإيمان الطاهر
لأول مرة بعد عشرة عمر تدوينية
وتنوع اللقاء من النقاش فى مواضيع عامة
وحول فكرة التدوين وأثرة فى حياة كل منا
اللقاء حضرة بالتمام والكمال 18 من المدوّنين

: تقرير الحاضرين

أحمد الصباغ
http://www.ahmedelsabbagh.blogspot.com/

مصطفى السيد سمير
سما زرقا وطيارات ملونة
http://samazar2a.blogspot.com/

هند محسن
عـاشـقــــة
http://hendm.blogspot.com/

وسام سمير
رؤى
http://ro2a-weswes.blogspot.com/

هدى عبد القادر محمود
فبدال ما نطق يا ولا لأ نضحك
http://rainbow4ever.blogspot.com/

وينكى
حاجه صغنونه ..من غير فذلكه
http://pinsywinsy.blogspot.com/

نوران الشاملى
بت خيخة وأى كلام
http://nouranelshamly.blogspot.com/

شريف
http://cherry0000.blogspot.com/


مسز إيجيبشيانا
http://cheers-tears.blogspot.com/

محمد
ابن حجر العسقلانى
http://kashefa-shop.blogspot.com/

سيد سعد
مكســـــــــــــرات
http://mksarat.blogspot.com/

أحمد ابراهيم
How am I?
http://how-am-i.blogspot.com/

محمد حسن مرسي
http://morsi6670.blogspot.com

صفحتة على اليوتيوب
www.youtube.com/morsi6670

إيمان الطاهر
خواطر فتاة
http://emyromantic.blogspot.com/

مصطفى العليمى
s@gi l'ombre
http://45days-repentance.blogspot.com/

ومن غير المدونين

نسمة ، ومحمد عامر

و منار عونى - اللى بجد فرحت اوى اوى لما عرفت انها بتدرس
فى نفس الكلية اللى اتخرجت منها - كلية الزراعة القاهرة
وكمان شخصية زى العسل

وهم حاليا غير مدونين ووعدونا بإنشاء مدوناتهم قريبا

طيب ممكن نحلى بشوية صور اكسيكلوسيف
Winkyyyyyyyy


مصطفى - صاحب الدعوة

سيد سعد - مكسرااااااااات

أحمد ابراهيم

أنا .. بعدسة خيخة

ختاما أحب أقول للجروب بجد سعدت جدا بلقائكم

ومنتظر الرد بخصوص الميعاد القادم

أحمد الصباغ

Mar 3, 2008

حوارات عالماشى

حوار مع مخلولة

أنا : ألووو .. ايوة مين ؟
صوت : ايوة يا خالو انا توتا
أنا : توتااااا .. ازيك يا حبيبتى
الصوت : مش تقول لى كل سنة وانتى طيبة يا توتا .. عيد ميلادى انهاردة
أنا : بجد .. لولولولولى كل سنة وانتى طيبة يا حبيبتى .. وياترى تميتى كام سنة ؟
الصوت : اممممم .. ستة ونص يا خالو

عااااااا .. طلع عيد ميلادها الستة والنص
شات مع المخاليل

رحت عند اختى من اسبوعين كدة ، ونزلت لهم الياهوو ماسنجر لأول مرة ، وتانى يوم افاجئ إن اختى اونلاين ، وان فى كائنات حية بتكتب على الكى بورد وبتبعت ما يشبة الكلام ، باباهم شايل المايك ، بس حبيت اسمعهم صوتى عملت كول ، لقيوا صوتى طالع من الكمبيوتر اتخضوا ، لقيت كوكا اللى هى مريم كتبت لى

وأنا أحط بؤى فين يا خااااااالو ؟؟ -
حوار سمعتة انهاردة فى المترو

شابين مصريين من أعماق مصر المحروسة ، واقفين بيتكلمو فى السياسة وده كان اخر حاجة سمعتها فى الحوار

الأول : شوفت أمريكا طايحة فى الكل ازاى يا زميل
الثانى : أيوة يا حاج دى ما حدش يقدر عليها .. دى عشرين ولاية
الأول : لأ دا مش كدة وبس .. دى أمريكا الشمالية وأمريكا الجنوبية

عاااااااااا
خالو أحمد