خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Jun 30, 2008

التدوين جنب البحر


أصدقائى وأحبائى
أنا شايف أن التواصل على أرض الواقع من أهم عناصر التدوين المفيد ، ولا أحب الإكتفاء بالتدوين خلف الشاشة والكيبورد ، ورغم أن مجال عملى هو مجالا علميا بحت ، إلا إننى أحرص على حضور اللقاءات أو الندوات أو حفلات التوقيع أو حتى المؤتمرات السياسية أو الأدبية بالإضافة الى لقاءات أصدقائى من المدونين ،لإنى بلاقى فى اللقاءات دى استفادة كبيرة ومتعة عظيمة بسبب التنوع الرهيب فيما يقدمة المدونون من أفكار وألوان الابداع وحب الوطن واتجاهات فكرية وثقافية متنوعة ، ولذلك ربما أتاخر أحيانا فى الكتابة فى المدونة لفترات ، وشايف إن من حق أصحابى عليا إنى أعتذر لهم فى كل مرة أتأخر فيها عن الكتابة
وانهاردة هحكى لكم عن لقاء المدونين الكبير فى مدينة الاسكندرية
واللقاء ده بدأ التخطيط له لما عزمونا - أنا ومجموعة من مدوّنى القاهرة - أصدقائنا مدوّنى الاسكندرية .. وبما إن الدعوة كانت موثقة بعزومة على العشاء وفسحة جميلة ، فقد وجهت الدعوة من صالون الصباغ للمدونين وتحدد يوم الجمعة 27/6/2008 للقاء مدوّنى مصر بالاسكندرية
وتفضلت جمعية مصر للثقافة والحوار من خلال الصديقتين هناء صابر صاحبة مدونة تعالوا ، ومها عمر صاحبة مدونة تفاصيلنا بإستضافة لقاء المدونين ، كما أعلن الشاعر المصرى الاستاذ عبد الرحمن يوسف عن رغبتة حضور لقاء المدونين
وفى يوم الجمعة سافرت مع مجموعة من أصحابى المدونين للاسكندرية
بدأ اللقاء فى الثانية ظهرا وكنا على موعد مع الشاعر عبد الرحمن يوسف فأبهرنا بأربع قصائد وهى
قصيدة التفاؤل
قصيدة الظلم ظلم
وقصيدة عاطل وألقاها لأول مرة
ثم قصيدة بعنوان بين قصيدتين

ثم طلب الاستاذ عبد الرحمن ان يستمع لبعض أشعار المدونين
فأنشد كل من أحمد سعد دومة و محمد عبد القوى بعض قصائدهم
وفى نهاية الفقرة قمنا بأخذ اللقطات التذكارية
الشاعر عبد الرحمن يوسف مع إبراهيم عادل و أحمد الصباغ و أحمد سعد دومة وقطب حسنين

كلمة من عبد الرحمن يوسف للمدونين

تذكار عبد الرحمن يوسف للمدونين
( من محمود الدوح )

لمشاهدة ألبوم صور كامل للمدونين مع عبد الرحمن يوسف
إضغط هنا

لمشاهدة لقطات الفيديو لفقرة الشعر
إضغط هنا


ثم بدأ لقاء المدونين ودارت نقاشات ومداخلات ودردشة شارك فيها الأغلبية العظمى من الحضورمها عمر بدأت اللقاء بالحديث عن قصتها مع التدوين

شمعى أسعد ضرب مثالا رائعا فى النقد البناء لكتاب مدونات مصرية للجيب وتداخل مع حاتم عرفة مصمم الغلاف وقدم العديد من الاقتراحات والملاحظات البناءة

محمد الكومى .. ملك الكبدة تحدث عن مشاكل الاسكندرية
ودور المدونين فى مناقشتها واظهارها

هناء ومها قامتا بمجهود جبار لتنظيم وانجاح اللقاء

هشام علاء تحدث عن تجربتة فى التدوين وعن تجربة مدونات مصرية للجيب

صورة جماعية

لمشاهدة ألبوم الصور كامل للقاء المدونين
إضغط هنا

لمشاهدة فيديو لجزء من حديث لماضة وأدم المهدى وحاتم عرفة
إضغط هنا

لمشاهدة فيديو لجزء من حديث الدكتور عمرو أبو خليل
إضغط هنا

لمشاهدة فيديو لجزء من حديث شيماء الصباغ ومحمد الكومى وشيماء بشرى
إضغط هنا

ثم أعقب لقاء المدونين الغداء ثم رحلة على كورنيش الاسكندرية وأيس كريم وزيارة لقلعة قيتباى
وكانت حقيقى رحلة اكثر من ممتعة

وكانت الرحلة قد شهدت العديد من الظواهر التدوينية الميكروباصية

حالة إبداع ميكروباصى
وحالة تهيس ميكروباصى
وحالات من الغيبوبات الميكروباصية
كما كنا فى حالة مجاعة عارمة أثناء ما نسمية بالاصطباحة فى رمسيس

وبيستغلوا أجازة الصيف وبيغلوا اجرة المواصلات

لمشاهدة ألبوم صور الرحلة

إضغط هنا

كما قمت بإلتقاط مجموعة كبيرة من الصور الرقمية لبعض الأماكن الهامة بالاسكندرية

لرؤية ألبوم لمحات من الإسكندرية على الفيس بوك إضغط هنا


قائمة الحاضرين
-----------------

أدم المهدى – مدونة ادم المهدى

محمود الدوح - احنا وهما

عادل – مدونة احرار ولكن

سعيد الشريف - مدونة الايجابية والاصلاح

ابراهيم عادل – مدونة أنا وأنا

محمد عبد القوى على – مدونة قلم الحرية

هيثم الدهشان – همسات العشق

خالد الامير – مدونة شباب مصر الاحرار

هانى جابر – مدونة بحب الحرية

محمد الكومى صاحب مدونة ملك الكبدة و مدونة ليبرالى مصرى

جومانة حمدى – مدونة أنا والاتى

احمد سعد دومة – مدونة لاننى احببت و مدونة شاعر اخوان

يحيى عمرو على مدونة أينشتين

أسماء – مدونة نبض اسكندرية

اسماعيل محمد – مدونة اسكندرانى

هشام علام – كلام هشام

اميرة محمد – مدونة انها اساطير الخريف

شيماء بشرى – مدونة شقاوة شعب

مروة مصطفى – مدونة د.منوسى ومدونة أنا اهتم

شيرين العقاد – مدونة احلام مواطن على الهامش

ايمن محمد ادم – مدونة حال الناس

محمد عطية احمد عطية ( محمد الشاعر ) – مدونة الشاعر

حاتم عرفة – مدونة جامع الفراشات

اميرة ابو الخير – مدونة سهر الليالى

احمد سوو – مدونة عجوز وعندى 30 سنة

دكتورة مروة عامر – مدونة لماضة

هيثم أبو خليل – مدونة متر الوطن بكام و مدونة ياللا نفضحهم

محمد رشاد محمد – مدونة المنسى

مدونة محدود الدخل

قطب حسنين – مدونة جيفارا مصر

محمد احمد عبد الجليل – مدونة سحابة وتعدى

شريف عصام الدين – سيبو ف حالو

شمعى أسعد – مدونة قصاقيص ورق

طارق حسين – مدونة أخبار سكندرية مصورة

اسماعيل الاسكندرانى – مدونة أنباء الأسكندرية المصورة

مصطفى المغربى – مدونة غنى يا بهية

شيماء الصباغ

(اذا كنت قد حضرت اللقاء ولم تجد اسمك فى قائمة الحضور برجاء التنبية فى صفحة التعليق)

وأخيرا

شكر خاص لكل المدونين الاسكندرانيين اللى اكرمونا بجد

وشكر خاص لهناء صابر ومها عمر لإستضافة اللقاء فى الجمعية

وشكر خاص لمحمود الدوح وهيثم الدهشان وإبراهيم عادل ومحمد الشاعر

للمشاركة فى التنظيم والتغطية والتصوير

وشكر لمجلة كلمتنا على تغطية اللقاء

وشكر خاص لدكتورة لماضة وشمعى أسعد ومصطفى المغربى
وشكر لكل المدوّنين اللى حضروا اللقاء

والى لقاء فى لقاءات تدوينية قادمة
تحياتى
أحمد الصباغ
--------------
هامش: يوم الاربعاء الماضى كان فى ندوة فى المجلس الأعلى للثقافة وتم استضافة مجموعة كبيرة من المدونين منهم أنا وأحمد مهنا وإيناس لطفى وإبراهيم عادل واحمد سلامة وهدى جمال الدين ، وتم تسجيل حوار معى للبرنامج العام يذاع يوم الثلاثاء الساعة 6.40 مساءا وسوف اقوم قريبا بكتابة نبذة عن هذة الندوة .. لرؤية بعض صور الندوة على الفيس بوك إضغط هنا

Jun 11, 2008

رابطة محبى الحشيش فى مصر

والله انا كنت مشغول فعلا الكام يوم اللى فاتوا
وهو ده السبب اللى مخلينى بتأخر شوية عن المدونة
وعن متابعة الحبايب
وكمان كنت بحاول أرصد بعض من توابع زلزال مدونات مصرية للجيب
وده لايقل أهمية عندى من كتابة موضوعات شخصية
لكن وانا بقلب كدة فى الفيس بوك وقعت فى جروب اسمه
رابطة محبى الحشيش فى مصر
وضحكت اوى من العنوان والمحتوى
وكان واضح اوى ان عاملة مجموعة من الشباب المهيس
وتقريبا عايزين يوصلوا رسالة معينة لحد ما
لانهم كانو بيتكلموا عن دعم الحشيش
تعالو نشوف مقتطفات من الكلام اللى بيتقال فى الجروب


اهلا ومرحبا بكم فى رابطه محبى الحشيش فى مصر
تم انشاء الرابطه من اجل الاترقاء بمستوى الحشيش
فى مصر و الوطن العربى والشرق الاوسط وتم انشاء الرابطه فى شهر11
عام 2007 وتم الافتتاح الرسى يوم 14/2/2008

اهداف الجمعيه

اولا
الارتقاء بالحشيش الى مستوى افضل

ثانيا
توصيل الدعم الى مستحقيه

ثالثا
الاتفاق مع شبابنا فى الاسكندريه للتصدير الى باقى المحافظات

رابعا
طرح المشاكل التى تواجه شبابنا والتوصل معا الى حل جذرى لها

وحرصا من الاداره لتتواصل مع اعضائها تم انشاء العديد من الفروع
ببعض محافظات الجمهوريه ومنها

المركز الرئيسى بمحافظه الاسماعيليه

فرع جامعه المستقبل
فرع محافظه طنطا
فرع 6 اكتوبر

وجارى الان التجهيز لانشاء فروع عديده لتغطى كافه انحاء الجمهوريه

مع تمنايتى بقضاء وقت متع فى الرابطه
الجنرال ورئيس مجلس الاداره

نشره الاخبار من المركز الرئيسى للرابطه
---
فى خطوه جريئه من مجلس اداره الرابطه تم تخصيص
جزء من ايرادات الرابطه لدعم الساده الديلرات حتى لا يتخطى
سعر الربع 25 جنيها مصريا وهذا لدعم الساده محدودى الدخل

وده واحد عامل اعلان

الان وحصريا في المنصورة
اجود وانقى واعلى انواع الحشيش في مصر
المنصورة ... لا اصل ولا صورة
اتفرج يا سلام
اسطفة عشرة على عشرة
فيها كل ما تشتهيه الانفس
لا عليها برشام ولا بتطفي منك .. وكمان طرية وكلها حنية على صدرك
مبتعملش حرقان خااااااااااالص
الان ربع القرش ب خمسة وعشرين جنيه مصري فقط + 5 جنيه مصاريف الشحن
وعرض خاص لفترة محدودة القرش ب 90 جنيه فقط
نصلكم حتى باب منزلكم
090066666666

مع المصطبحين جروب ... دماغك في ايد امينة

وتحت عنوان : تم فتح باب التعيين فى الرابطة
بعض التعليقات

بناء على تعليمات صريحه من الجنرال تم فتح باب التعين من جديد
لاعضاء الرابطه وعلى المتطوعين للعمل بالرابطه التقدم بطلب المنصب
الذى يريده


وده تعليق تانى

بعد إذنك
انا عاوز امسك منصب رئيس قسم التسويق بالرابطة
وعندى استعداد وامكانيات لفتح اسواق جديدة

احلى تعليق قريتة

عايز اتعين مستحق دعم
ههههههههه

اراكم قريبا
تحياتى
خالو احمد

Jun 9, 2008

العيال رجعوا تاني

نص المقال التانى للفاجومى : أحمد فؤاد نجم عن مدونات مصرية للجيب

مش قلت لكم.. أهي حبلت وحزقت وولدت بسم الله ما شاء الله بنات وولاد النبي حارسهم زي قطف الورد.. ذكاوة وصحصحة وخفة دم ومفهومية في التاريخ والاقتصاد السياسي ولا أحلي ولا أروع وهما دول مستقبلك يا مصر. يا بنت الإيه يا للي جننتيني ودهولتيني وبرضه لسه باحبك مش عارف ليه؟

حبيبتي ما مدينه

متزوقة وحزينه

في كل حاره حسره

وف كل قصر زينه

ممنوع من أني أصبح

بعشقك

أو أبات

ممنوع من المناقشه

ممنوع من السكات

وكل يوم في حبك

تزيد الممنوعات

وكل يوم باحبك

أكتر من اللي فات

<

أنا أسمع عنس حاجة اسمها «النت» مجرد سمع إنما أكتر من كده ماتلاقيش، دنا حتي «الموبايل» ماليش أي علاقة بيه من أصله وما افتكرش إني لا قدر الله ح أشيله في المستقبل المنظور ومره أهداني صديقي المهندس نجيب ساويرس «موبايل» قلت له

إيه ده؟

قال لي

موبايل.

قلت له

موبايل إزاي يعني؟

قال لي:

- يعني تليفون تتكلم فيه، انت مش بتعرف تتكلم؟

خدت منه «الموبايل» ومشيت قابلني شخص قال لي

- تاخد ألف جنيه وتجيب البتاع اللي في إيدك ده؟

قلت له:

- آخد ألف جنيه واديك أي حاجة.

وفعلاً خدت الألف جنيه من الشخص اللي لسه ما أعرفوش لغاية وقتنا هذا واديته «الموبايل» ولما قلت لنجيب الحكاية ضحك وقال لي:

- بدأت تشغل مخك ودي بداية مبشرة، قول لي بقي، لما تبقي دي علاقتي بالموبايل ايشحال بقي علاقتي بالمدعوق اللي اسمه «النت».

امبارح بس كنت قاعد في دار ميريت هجم علي شاب زي القمر وبالأحضان والقبلات وقال لي:

- كانت أمنية حياتي إني أقابلك يا عم أحمد.

قلت له:

- أديك حققت الأمنية.. إنت اسمك إيه بقي؟

قال لي:

- إيهاب عمر.

قلت له:

- أنت لسه بتدرس يا إيهاب؟

قال لي:

- لا خلصت يا عم أحمد.

وتدخل محمد هاشم «كهربا» زي سعيد عبيد ما مسميه وقال:

- إيهاب من المدونين يا عم أحمد.

أنا سمعت عن المدونين مجرد سمع ممكن ياد يا إيهاب تديني سطرين عن المدونين دول؟ راح مناولني كتاب وقال لي:

- دا ممكن يديك فكرة عن المدونين يا عم أحمد.

الغلاف مكتوب عليه «مدونات مصرية للجيب» وتحتها مكتوب «مشروع وطن» وأول صفحة بعد الغلاف مكتوب «عدد خاص جدًا» الصفحة اللي بعدها مكتوب فيها «مدونات مصرية للجيب.. كتاب يؤلفه الشعب المصري» يا حلاوة يا ولاد.. الشعب المصري بقت سيرته تيجي تاني في سياق الحديث والأحداث بعدما أهملوه كتاب السلطة أكثر من ربع قرن واكتفوا بالحديث عن الرئيس والمدام والأنجال وفي أحسن الفروض عن مشكلة الحضري والمنتخب وحسن شحاتة وشحاتة حسن وسمير زاهر وزاهر وسمير إلي آخر هذا الحديث الممل الممجوج من شعب يقتل بعضه «ع العيش الحاف» وحسبنا الله ونعم الوكيل.. فكروني بالعيال بتوع السبعينيات من القرن الماضي.. العيال اللي نوروا الدنيا بانتفاضتهم المجيدة اللي أفزعت الرئيس السادات وجابت له الشلل الرعاش بعيد عن السامعين والحاضرين.

هما هما نفس الوجوه المصرية الحبيبة بنات وولاد ونفس الاشتعال الوطني الواعي ونفس الجسارة ونفس الثقة بالنفس والاعتزاز بالوطن الحبيب والانتماء الفكري لثقافتنا وأمتنا وتاريخنا.. وإيه رأيكم بقي إني بعد ما قابلت الواد إيهاب عمر ده زدت النص ربنا يحميهم ويكفيهم شر اللي ما يطيقوا شره واحنا بقي يا أجيال الفشل والخيبة مش مطلوب مننا إلا الدعاء لهم بالتوفيق يمكن ينجحوا ويحققوا مشروع الوطن اللي ياما حلمنا بيه، وطن العدل والحرية وطن العلم والمعرفة.. يا رب.


تحياتى

Jun 5, 2008

أحمد فؤاد نجم فى حديث عن مدونات مصرية للجيب

كبير ثوّار الكلمة
عمنا الكبير الجميل
أحمد فؤاد نجم

فى حدث مهم جدا لكل من شارك فى انجاح كتاب المدونين
أول حديث له عن
مدونات مصرية للجيب لجريدة الدستور


نص مقال عم نجم الفاجومى عن الكتاب

أنا لما اخدت الكتاب اياه من الواد الجميل ايهاب عمر ماكنتش اظن انى ح اعيش مستقبل مصر المحروسة اهو كتاب وخلاص .. اتارينى اسم الله على مقامكم كنت حمار ودى مش اول مرة الحمد لله . ومش حتكون اخر مرة لان على راى حجازى الرسام كلنا حمير ربنا وده مش عيب .. والحمار احسن من البغل والزحلفة والفار

روّحت البيت ياعمنا وقلت اشوف ايه اللى بيكتبوه العيال بتوع النت اللى اطلق عليهم الاعلام الرسمى اسم المدونون واللى صنفهم اجهزة الامن العربية فى خانة " مثيرى الشغب" اللهم احفظنا واللى اصدرت عليهم بعض المحاكم احكاما بالسجن المشمول بالنفاذ .. وفتحت الكتاب : " الى المغتربين خارج مصر وداخلها نهديكم كلماتكم" .. يعنى دول بيكلموا حوالى تمانية وسبعين مليون فى عين العدو ونطلّع منهم الحكومة والاضيشها قول مليون ونص والباقى مغتربين برا مصر وجواها .. ده اول هام .. تانى هام بقى خفة الدم المصرية الحراقة اللى كانت اختفت فترة الابادة الجماعية للمصريين اللى بدأت بحرقهم فى قطارات السكك الحديدية ومرورا بإغراقهم بالعبارات المضروبة برضة ناهيك عن نظام السرطنة اللى نفذة باقتدار يوسف والى مزراحى ايام ما كان وزير زراعة - الله لا عاد يعودها- وتفضل اساليب الابادة الجماعية للمصريين ولا تنتهيش .. العيال دول بقى طالعين بخيرهم يعنى "بيور" وبيور دى انا سمعتها من واحد تاجر بودرة ويتحدث عن بضاعتة انا الاول اتفكرتها بيور جمع بير بالعامية المصرية زى جمع ديب بالعامية ديوبة لكن لما سألت واتقصيت قالولى بيور يعنى مش مخلوط ..أهى العيال دى مش مخلوطة وعشان كدة ناقلين كل الجينات المصرية واهمها خفة الدم وخد عندك مثلا مدونة "سكوت حنصوت " ..و"مدونة عايزة اتكلم".. و"مدونة البنت الشلبية" .. و"مدونة اهو دا عيبة".. و"مدونة بت خيخة واى كلام" ..و"مدونة بنوتة لاسعة"..و"مدونة يوميات عيل مصرى" ... وطبعا انا مش ح اقدر اقول كل المدونات لان عدم المؤاخذة المساحة ما تكفيش فما حدش يتقمص منى يا عيال والايام بيننا على رأى شكوكو وقال يا جحا عد موج البحر قال الجايات اكتر من الرايحات

تعالى بقى سيادتك لافتتاحية الكتاب اللى كتبها احمد البوهى اول هام حتفرح جدا جدا ان قضية فلسطين العربية والمغتصبة نايمة بالطول والعرض فى وجدان الجيل القادم بقوة لبناء مصر المستقبل يعنى لا صداقة السادات لمناحم بيجن ولا العلاقة العضوية بين مجرم الحرب قاتل الاطفال اللص الصهيونى المرتشى ايهود اولمرت وبين الرئيس مبارك او بين القاتل ايهود باراك وجمال مبارك قدرت تطرمخ ع القضة وتحولها الى كان كان ودو ده كان رهانى لما قولت لهم فى باريس عن اسرائيل هذا مشروع محكوم عليه بالفشل ويومها كان المذيع صهيونيا متعصبا وقال لى

انت الان تعترف بمعاداتك للسامية

ودى فى اوروبا وامريكا تهمة تساوى الزندقة فقلت له

وانت الان تعترف انك حمار لانك تتهمنى بمعادة السامية وانا سامى يا حمار يا صعيونى يا متعصب

ويختتم احمد البوهعى مقدمتة بالحديث عن كتاب المدونين قائلا : كتاب يسير فى اتجاة مواز لحرية الرأى والتعبير والمشاركة مهما اختلفت الاراء وتعددت الافكار وتناقضت الرؤى وتنوعت التجارب فى وطن واحد يكفى لان يستمع الجميع الى بعضة البعض وان سيشترك الجميع فى حلم بدايتة مساحة اتفاق وود حلم النهوض بهذا الوطن .. الكلام ده يا جدعان فى خطر امن الدولة ويستحق ان يحال لقضاء وتصدر ضدة احكام بالسجن المشمول بالنفاذ ؟ حد يفهمنى باعتبار غبى وجهول وحاقد وما اسواش بصلة ... والجميل فى الموضوع ان العيال المدونين دول فيهم مبدعين وشعرا بحق وحقيقى شعرا بالفصحى والعامية ودول مثالين الاول بالفصحى

المبدأ فى جيل الطمس

ما عادت ترغب فيه الشمس

يتوسط اجيالا حبلى بصراخ اليأس

يعلنها للناس جليا

يطويها للعالم طيا

بنى الارهاب على خمس

محمود موسى

بسم الله نصلى ع الحبيب ونقول توكلنا

ونتعاد يكون الحق رسمالنا

كلامنا اليوم عن الاوجاع عن اللى اتباع

وكام مليار بقول اجأة فى حجر بتاع

مالوش لازمة

احمد عصام

والبقية تأتى

اذا كان فى العمر بقية

---------

الى هنا ينتهى كلام عم نجم

الذى اعتبرة وساما على صدرى وعلى صدر كل مدوّن

وكل من شارك فى كتاب الشعب مدونات مصرية للجيب

وهذا الكلام اعتبرة شهادة تكريم لأبناء هذا الجيل ( البيور ) على حد تعبير عم نجم


ودى كمان خبر توقيع الكتاب فى جرنان نهضة مصر

تغطية الصديق العزيز الصحفى شعبان هداية




ويقول احمد البوهى

لم اتمالك نفسي من السعادة الطاغيه التي شعرت بها في قلبي و انا اقراء مقال عمنا احمد فؤاد نجم بجريده الدستور الصادره اليوم وهو يتكلم عن كتاب مدونات مصريه ويشيد به و بالفكره و بالمدونينين ووصفنا ان شباب جديد يحمل قلب و فكر جديد و لسنا مجرد عيال بتلعب و خلاص الي حد تعبيره


عندما يقوم شخص بحجم و مكانه عمنا فؤاد بالاشاده بينا و تشجيعنا فهذ اكبر دليل اننا بدانا نسلك الطريق الصحيح لخروج بالمدونات من العالم الافتراضي الي العالم الحقيقي لتسمع الدنيا كلها صوتنا

ادعوكوا لقراءه المقال في جريده الدستور الصادره بتاريخ اليوم 5/6


الموجود بالصفحه الخامسه تحت عنوان
بداية الرحلة

أحمد الصباغ


Jun 4, 2008

حالة حنين شنيعة


كنت أتحدث مع صديقة فقالت
عندى حالة حنين للقيم والصفات الحلوه اللي ضاعت
ورديت أنا كمان فى حالة حنين
للأماكن واللحظات الحلوة والناس الغائبة

وأكتشفت كدة على سهوة
إن عندى حنين شنيع مريع
لأيام ولحظات واماكن مضت من سجل حياتى
قاعدة الجيزة بالقرب من كوبرى عباس
والنيل الجميل مع شلتى أصدقاء حياتى
ومع كوباية الشاى الكشرى
ننسى الدنيا بكل هموما ومشاكلها وتعقيداتها
ونرى الوجة الجميل لها
حتى لو اتكلمنا فى مشاكل الحياة والعمل والظروف
بردة بيبقى كلام لطيف خالى من العصبية

إفتكرت مشوارى الشبة يومى من كلية الزراعة فى ميدان الجيزة
إلى مكتبة مبارك فى الدقى
أوقات كنت بروح عن طريق شارع الجامعة
وبعدين اكسر على شارع نهضة مصر اللى قدام الجامعة
وأوقات كنت بروح من ورا
موازى لسور جنينة الحيوانات اللى هو شارع مراد
وكان لما اروح اخر النهار بعد العصر كدة
الاقى كمية مهولة من طيور أبو قردان
تقريبا كل أبهات قردان اللى ف مصر
بتتجمع على الشجر الموازى لجنينة الحيوانات
اللى هو قدام الفورسيزون وبرج النيل الادارى الالومينتال الكبير ده

طبعا مشوارى الشبة يومى ده غالبا ما كنتش ببقى لوحدى
كان بيقطعة معايا ناس من اعز اصدقاء ورموز حياتى
اللى بفتكرهم فى كل يوم وكل لحظة
وكانت بتدور احاديث جميلة
وبيتقال كلام اعتقد ان لسه كتير عالق فى ذاكرتى
رغم مرور سنوات على الايام الجميلة دى

وطبعا بفتكر زياراتى الكتير لقلعة صلاح الدين الأيوبى
أو قلعة الجبل كما يسميها البعض
وزيارة المتحف الحربى اللى عارضين فيه الدبابات والطيارات
اللى شاركت فى حرب اكتوبر
واللى ياما اتصورت جنبها مع اصدقاء احب إلىّ من نفسى
لكن لم يعودو فى حياتى الان
ومتحف الشرطة اللى فيه صور ريّة وسكينة المشهورة
وصور حادثة المنشية والمسدس اللى أطلق منه الرصاص على جمال عبد الناصر

لو رجعت بقى لأكتر من عشرين سنة يعنى قبل ما اكمل العشر سنين
كنا متعودين انا واسرتى الصغيرة الذهاب الى عين حلوان كل يوم جمعة
والكلام ده فضل طوال سنوات عديدة
يعنى انا وعيت على الدنيا لقيتهم بياخدونى كل يوم جمعة لعين حلوان
ونعدى فى ثكنات المعادى ويجيبولى سندوتشات كبدة من الراجل اللى جنب المترو ده
رغم اننا بنبقى واخدين من البيت كميات اكل مهولة
(بس تقريبا كنت بعز موضوع أكل الشوارع ده من صغرى يعنى مفطوم على التشرد )
لدرجة انى دلوقت وانا عندى 28 سنة وحتة لما بشم ريحة سندوتشات كبدة فى أى حتة
بفتكر يوم الجمعة فى ثكنات المعادى واحنا رايحين عين حلوان

وياسلام بقى على قعدتى فى حديقة الريادى قدام شط النيل مباشرة
مش بيفصل بينك وبين النيل سور او حاجز
والمنظر بيبقى مهيب والجو رائع وصوت عبد الوهاب ينبعث مع نسمات الهواء
هل تذكرين بشط النيل مجلسنا
نشكو هوانا فنفنى فى شكاوانا
تنساب فى همسات الماء أنتـنا
وتستثير شجون النهر نجوانا
وحولنا الليل يطوى فى غلائله
وتحت أعطافه نشوى ونشوانا
ذابا تباريحا وأشجانا
نكاد من بهجة اللقيا ونشوتها
نرى الدنا أينعت والدهر بستانا
ونحسب الكون عش اثنين يجمعنا
والماء صهباءا والأنسام ألحانا
لم نعترف والهوى يغرى جوانحنا
وكم تعالت روحانا وقلبانا
نقضى حياء ونفضيه عفة وتقا
إن الحياء سياج الحب مذ كانا
ثم انثينا ومازال الغليل لظى
والوجد محتدما والشوق ظمآنا


بجد أتمنى أدفع نص عمرى وتعود لحظة من اللحظات دى

ولكن ..
لسه جنينة الريادى ف مكانها
ولسه النيل بيجرى قدامها
ولسه شط النيل ما بيفصلوش عن الحديقة سور
لكن لم يعد الاشخاص الذين شاركونى هذة اللحظات موجودين
إذن .. فالطلب عزيز المنال جدا


خالو أحمد الصباغ

Jun 3, 2008

طريقكم أخضر

عدنا .. بعد انقطاع عن التدوين اكتر من عشر أيام

هو طبعا إنقطاع عن الكتابة فى المدونة وليس عن التدوين

لأنى لا اتوقف عن الكتابة ومتابعة المدونة يوم واحد

ولكن الايام اللى فاتت دى كنت بعمل تجديدات فى المدونة

وان شاء الله فى خلال هتشوفوا التجديدات دى

وكمان هنعمل تحليل تفصيلى لكتاب مدونات مصرية للجيب

وهنتكلم عن كل الناس المشاركين فى العمل سواء بالكتابة او النقد ومتابعة الكتاب

-------------

رودى بنوتة مصرية كلمتنى عن لقاء نسائى هيعملوا فى نادى الزراعيين

وكانت بتسألنى عن أسعار الدخول بما أنى مهندس زراعى عريق

( بالمناسبة انا روحت النادى ده مرة واحدة بس ما تقولوش لحد )

لأنى طبعا عملت فيها أبو العوريف وقعدت أصدر فتاوى زراعية

وقريت عند نوران بت خيخة عن اللقاء ده

ههههههههههه

نادى المهندسين الزارعيييين ؟؟

اسمه نادى الزراعين وبطلوا فضايح

طيب بما ان التجمع نسائى

فأنا هتنكر فى صورة عيل صغير عنده تلات سنين واجى مع واحدة منكم

ههههههههههههههههههه

بالتوفيق ان شاء الله

وربنا يجعل لقائكم أخضر

وطبعا لازم توطدوا روح الصداقة بينكم

يعنى كل واحدة تهادى زميلتها بحزمة جرجير كدة او كيلو بسلة

وكمان ارفعوا شعار التدوين النظيف

( يعنى بدون كيماويات )

هههههههههههههههههههه

وطبعا المشاريب اللى هيطلبوها فى اللقاء دى اكيد

هتتراوح بين عصير جزر و جنزبيل وشاى أخضر

أو عصير طماطم


والمزة هتكون فجل او كرات وخضار

ههههههههههههههههه


ويبدوا ان البرنامج الانتخابى قصدى برنامج اللقاء اللى كتباه خيخة

يتضمن موضوعات دسمة جدا

من ضمنها

كيف تعكنينين على زوجك

ههههههههههههه

( بفكر اعمل لقاء رجالى للرجالة المتجوزين ونتكلم عن تقتل زوجتك فى تلات خطوات )

وانا استغل هذة المناسبة الخضراء قصدى السعيدة

واحذر البت آبى من ما يحاك بها حيث ان خيخة والمدونات المتزوجات

يتربصن بها لزعزعة عقيدتها الزواجية

طبعا ما هو العزوبية تاج على رؤوس العزّاب لا يراه إلا المتزوجون

هاهاهاهاها

انتظروا التجديدات المريعة فى المدونة

خالو أحمد