خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Sep 29, 2008

حتى لا يحترق التاريخ

كان يوم أسود .. مأسوى .. اختلطت فيه النيران بالرماد والهباب .. والجدران المحترقة
والغبار والدخان الاسود بالصرخات
الناس فى ميدان العتبة يصرخون ويجرون فى كل مكان
عيونهم دامعة مذهولة غير مصدقة ما يحدث
الكل فى ميدان العتبة .. المثقف .. والفلاح .. والعامل .. والشاب .. والنساء
الكل يكتم دمعة فاره من عينة .. دمعة ساخنة تغلى
وأنا أقف مذهول أحدق فى النيران المشتعلة
أرى الان أمامى مصر تحترق
أرى مائة عام من تاريخ مصر تحترق
شريط الدخان الاسود المتصاعد
تتصاعد معه ذكريات مرورى الأول من أمام هذا الهيكل الفنى الرهيب

عندما استلمت عملى الحالى فى قصر النيل منذ ثلاث أعوام
كان ميدان العتبة هو محطة النزول بالنسبة لى كل صباح
كنت أنزل فى الميدان وأمام المسرح القومى فى السابعة والنصف صباحا
من " الميكروباص" قبل أن يكمل مسيرتة إلى رمسيس
والمسافة المتبقية أقطعها ماشيا من أمام المسرح مرورا بميدان الأوبرا
وجامع كخيا ثم شارع قصر النيل
كانت هذة رحلتى اليومية الصباحية
وكانت قطرات الندى تبلل الأرض وحالة من شبة الهدوء التام تسود المنطقة
قبل ازدحام الميدان بعد الساعة الثامنة
وكانت تبهرنى اللوحات الكبيرة القديمة على السور الخارجى
لرؤوساء المسرح القومى
جروج أبيض .. سميحة أيوب .. عبد الله غيث .. سعد أردش ..
عبد الرحيم الزرقانى .. كرم مطاوع .. سعد الدين وهبة .. وغيرهم
لوحات كبيرة أبيض وأسود لرؤوساء ونجوم المسرح القومى طوال قرن ونص
كان يبهرنى مبنى المسرح القومي بجمال التصميم وروعة الديكور داخليا وخارجيا
المبنى الذى اعتبرة تحفة معمارية أثرية ، يغلب على مواد بنائه الخشب
ويتكون من قاعة كبيرة تحمل اسم جورج أبيض
بالإضافة إلى قاعة أصغر تحمل اسم المخرج المسرحي والممثل عبد الرحيم الزرقاني
والآن .. أرى كل شئ يحترق
صروح من أجمل ما بنت مصر على مدار مئات السنين تحترق
المسرح الأول فى حياة المصريين .. يحترق
كما إحترق المبنى التاريخى فى مجلس الشورى
لم أستطع كتمان الدمعة مرة أخرى ففرت هاربة من عينى
لتحتضن الأرض .. وتضمها وتقول لها اغفرى لنا وسامحينا

أرجوكم .. إغلقوا المتاحف .. والمسارح .. اغلقوا المبانى التاريخية
وأخفوها خلف ستائر الظلام
دعوها حتى يمر هذا الزمان ويأتى جيل غيرنا
يحترم الفن .. ويقدس التاريخ
ويعرف قيمة ما بنته مصر
أرجوكم حتى لا تلعننا الأجيال القادمة
وحتى لا يلعننا التاريخ .. وتلعننا مصر
التى أسأنا لها كثيرا
وأتلفنا ما بناه رجال عظماء فى مئات السنين
لإننا لان نقدر الفن .. ولا نحترم قيمة العلم والادب
أتلفنا الأرض .. لاننا لا نقدر قيمة الزراعة
وبعنا المصانع .. وقتلنا الصناعة ، فاختفى الحرفى الماهر
وحرقنا وأتلفنا كل قيم وخالد فى مصر

-------
من أرشيف الصور





جورج أبيض

سلامة حجازى


أحمد الصباغ

Sep 24, 2008

المخلولة طلعت من البيضة

المخلولة الجديدة خرجت من الحضّانة
والحضّانة - بتشديد الضاد - للى مايعرفهاش
دى المكان اللى بيروحوه المخاليل قصدى الاطفال
لما بينزلوا ناقصين أو أقل من تسع شهور
دى المخلولة اللى حكيت لكم عنها أول رمضان
وسموها جنى - اللى هى مقتبسة من الاية الكريمة
وَجَنَى الْجَنَّتَيْنِ دَانٍ - الرحمن:54
وانا طبعا لجهلى الشنيع ما كنتش اعرف إن فى إسم كدة
كنت فاكرة جنا أو جانا
لكن جنى لازالت زغنونة أوى .. كتكوتة زغيورة بشكل مرييع
يعنى تحس إن عمرها لازال 3 فيمتوثانية كدة

الحقيقة انا مش بكتب عشان احكى عن المخلولة الجديدة
لكن لما نظرت لعيونها لما فتّحتهم لأول مرة
ونظرت لإيديها البيضا الزغنونة اوى
عدى من قدام حياتى شريط ذكريات وأفكار وخيالات
وتخيلت لما كنت أنا زيها .. برئ كدة وكوتكوت وأبيض
أبيض القلب طبعا مش اللون لأن أنا طول عمرى صوباع عجوة
وإن كان فى بعض الروايات بتقول انى كمان مولود شرير هههه
مش عارف ليه لما عينى بتيجى فى عيون مولود صغنون
بفتكر صراع الخير والشر
بفتكر الناس اللى ملت الدنيا خير
والناس اللى ملت الدنيا شر وحروب
بفكتر الرسول العظيم والصحابة الكرام والانبياء أولى العزم
وبفتكر هتلر وموسولينى وستالين ومونجستو
بفتكر العلماء والشعراء والفنانين والمصلحين
وبفكتر الحرامية والسفاحين والمغتصبين والمجرمين
بفتكر الحروب والثورات والاغتيالات والانفجارات
وبفتكر البيوت والمزارع والبشر والمطر
وكمان بفتكر ضعف الانسان واحتياجة الدائم لمدد وعون الله
بفتكر لحظة الخطأ والعصيان والذنب والرزيلة
وبفكتر لحظة رجوع الإنسان اللى الله تائب نادم دامع مذعور
وأغلب ظنة انه هالك وانه غير مقبول وانه من اهل النار
فيستقبلة الله تعالى بالرحمة والعفو والغفران
ويفتح له أبوابة .. ويفرج همة .. ويرزقة من حيث لا يحتسب
بفتكر لحظات غضبى وثورتى وعنفى وجهلى وسخطى
وبفتكر لحظات رضايا وقناعتى ارتياحى
بفتكر لحظات النجاح والسعادة والانطلاق
وبفتكر لحظات المرض والبؤس والفشل والموت
بفتكر الدراجة اللى جت لى هدية لأول مرة وانا عمرى سبع سنين
وبفتكر لما عملت بيها حادثة ودخلت ف عمود نور
وبفتكر الألم الرهيب اللى حسيت بيه فى رجلى وقتها
بفتكر صورتى مع أمى وأنا شايل عروسة قماش كانت ماما عملهالى
وبفتكر لما زعقت لأمى وأغضبتها
وقطعت الصورة عشان أنا ولد مفروض ما يصحش يلعب بعروسة لعبة
عنيا دمعت .. ورحت بايس إيد ماما اللى كانت قاعدة جنبى
وفوقت من سرحانى وخيالاتى على صوت جنى .. واااااء
بس بصوت واطى اوى ما تسمعوش الودن المجردة
ولقيت ايديها اللى أد سن الدبوس قافشة على صوباعى
إبتسمت
وحسيت بأمل وحب للحياة

خالو أحمد

عزاء واجب

نقدم التعازى لإختنا سومة صاحبة مدونة مجنونة فى بلد عاقل
فى وفاء جدتها
ونسال لها ولأسرتها الصبر والسلوان

ونسأل الله فى هذة الأيام المباركة
ان يغفر لها ويرحمها
اللهم اسكنها جنات الفردوس الأعلي مع النبيين والصديقين والشهداء
اللهم يمن كتابها
ويسر حسابها
وثقل بالحسنات ميزانها
وثبت علي الصراط اقدامها
واسكنها في اعلي الجنات
بجوار حبيبك ومصطفاك صلي الله عليه وسلم

اللهم ارحمنا فوق الارض
وارحمنا تحت الارض
وارحمنا يوم العرض عليك

اللهم أمين

Sep 22, 2008

رمضان كريم

والله لسه بدرى يا رمضان
أعتذر لأصدقائى واخواتى الذين قاموا بالتعليق على البوست المحذوف
وكل عام وحضراتكم بكل خير

أحمد

البابا شنودة .. وزغلول النجار

كنا لسه بنتكلم عن حوا رالاديان والتسامح والود بين اصحاب الديانات المختلفة وتقبل كل منا الأخر
وإذ فجأتن يعود تانى للساحة الموضوع اللى بيزعلنى وينرفزنى ويخلى الدم يجرى ف نافوخى
سنة 2004 كان فى موضوع وفاء قسطنطين - المواطنة المسيحية اللى كانت زوجة لأحد رجال الدين المسيحى
وبعدين أعلنت إسلمها وبعدين قامت الدنيا وهاجت وماجت
وأعلنت الكنيسة احتجاجها وإعتكف قداسة البابا شنودة فى الدير
وبعدين طلبت الكنيسة عمل جلسة نصح وإرشاد
وعادت وفاء للمسيحية .. واترهبنت وفضلت جوة الدير
طبعا ده ملخص اللى حصل
لكن التفاصيل شملت بقى ملايين الاشاعات اللى شحنت الجو اكتر ما هو مشحون
اللى يقول وفاء اجبرت على الاسلام
واللى يقول ان وفاء اجبرت على العودة للمسيحية
واللى يقول ان فى مؤامرة
واللى يقول ان فى تواطؤ
واخر الكلام اللى فجّر مفاجأة كلام الشيخ زغلول النجار
زغلول النجار يؤكد مقتل وفاء قسطنطين في دير وادي النطرون "شبكة الاعلام العربية "
وفاء قسطنطين اتقتلت .. أن أن تششششش


قام قداسة البابا شنودة طلع التصريح ده
البابا شنودة يقرر ظهور وفاء قسطنطين علي «أغابي» للرد علي زغلول النجار المصرى اليوم
أن .. أن .. تشششششش

أنا طبعا بكن كل الاحترام للشخصيتين ..قداسة البابا شنودة والشيخ زغلول النجار

لكن لى عدة ملاحظات هقولها وأجرى على الله

أولا : ليه حرصت الكنيسة من الناحية والحكومة المصرية من ناحية تانية والأزهر والمؤسسات الاسلامية من ناحية تالتة على التعتيم على الموضوع بصورة تثير الفتنة والجدل .. ليه ما تطلعش وفاء قسطنين من أول يوم فى التلافزيون وتقول يا جماعة ما تخافوش عليا انا اخترت الدين الفولانى بإرادتى .. ليه الموضوع كله كان أشبة بما يدور خلف الكواليس لدرجة ان الناس فقدت ثقتها فى وبقى المسيحين حاسين ان بنتهم المسيحية فى أجبرت وف خطر.. والمسلمين حاسين ان اختهم اللى اسلمت بتتعذب ومخطوفة .. فى مصلحة مين ده ؟؟

ثانيا : الشيخ زغلول النجار قال حاجة .. وقداسة البابا شنودة قال حاجة مضادة تماما .. وحاجة منهم بس هى اللى هتبقى صح.. يا أما وفاء قسطنين مش هتطلع فى التلافزيون وده هيبقى تأكيد إنها إتقتلت فعلا .. وطبعا دى هتبقى مصيبة كبيرة جدا جدا .. يا أما وفاء قسطنطين هتطلع فى التلافزيون سليمة معافية حيه ترزق .. وهتبقى مصيبة أكبر .. ومنين نجيب مصداقية تانى فى الشيخ الجليل ؟
واحد من الاتنين صادق .. واحد بس اللى كلامة صح
أنا مش بتهم حد لا سمح الله
أنا بتكلم بلسان واحد بيحب مصر وبيكرة الاثارة والفتنة لأقصى درجة
وإذا إتكلمت بلسان مسلم .. فأنا مسلم بيحب المسيحين جدا ومش بيفرق فى المعاملة بين صديق مسلم وصديق مسيحى
بل أحيانا بقرا مقال البابا الثابت فى جريدة وطنى .. وكمان بتابع وعظات وكلمات للأنبا موسى عن بعض التكنولوجيات الجديدة زى الانترنت والفيس بوك والشات ولقيته بيلمس حاجات قلما حد اتكلم فيها من رجال الدين عموما

إذن .. احنا كل ما نطفى شعلة .. تطلع شعلة تانية
نخلص من موضوع وفاء .. يطلع موضوع أبو فانا
نخلص من أبو فانا .. يطلع تانى موضوع وفاء

رغم إنى صوتى مش عالى
وكلمتى مش هتبقى مسموعة لأكتر من عده مئات أو الاف
إلا إنى هطالب الكنيسة والأزهر فورا بتوضيح موقف وفاء قسطنطين فورا وعلى الملأ
علشان نحمى مصر

اللهم إنى بلغت
اللهم فاشهد

----
ملحوظة : انتقدوا براحتكم دون الاساءة لأى دين أو شخصية

Sep 19, 2008

تغطية إفطار منظمة المؤتمر الاسلامى الامريكى


بعد انتهاء العزاء فى موبايلى الفقيد .. وجارى لم قرشين لشراء موبايل جديد
إنهاردة هحكى لكم عن يوم جميل وإفطار الجماعى
جت لى دعوة يوم 11 سبتمبر من
منظمة المؤتمر الإسلامى الأمريكى
بدعوة من داليا زيادة
مديرة مكتب منظمة المؤتمر الإسلامى الأمريكى بالقاهرة وشمال إفريقيا

وكان إسمة إفطار التسامح
وكان فى كنتاكى النادى الأهلى بمدينة نصر

وقاموا بإطلاق حملة .. محاربون من أجل حرية العقيدة
لتدعو الى نشر التسامح والحرية الدينية ونبذ العنف فى المجتمع


وضم الإفطار عدد من والمدونين والصحفيين ونشطاء فى المجتمع المدنى

بالإضافة لمجموعه من المسلمين والمسيحين والبهائين على مائدة واحدة
فى كرنفال ودى جميل

ومن الشخصيات الجميلة اللى قابلتها اليوم ده

الدكتورة بسمة موسى - استاذ مساعد فى جامعة القاهرة
شخصية جميلة جدا ومتفتحة وهى صاحبة مدونة باقة ورد

وشادى سمير صاحب مدونة بهائى مصرى
وإنتظروا ان شاء الله قريبا حوار سأجرية معه ليحدثنا عن البهائية
ويوضح لنا بعض الأمور الغامضة بالنسبة لكتير مننا عن البهائيين

صديقى العزيز وجارى المدون الجميل أشرف توفيق وخطيبتة
صاحب مدونة أخف دم وكتاب مبسوطة يا مصر

والمدونة الجميلة نهى محمود صاحبة الكراكيب
وعرفت سر تسميتها المدونة كراكيب لإنها بتحب الكركبة وطلعت بشاركنى فى هوايتى المفضلة ههههههه

والمدونة الجميلة مدام سهى زكى صاحبة مدونة أميرة الحكايات
وبنتها العسووولة نهى

والاستاذ خليل أبو شادى .. الصحفى بجريدة البديل

والمدونين أحمد حربية و سيد تركى أصحاب مدونة أبو سويلم

قبل ما اسيبكم مع صور الإفطار الجماعى
أحب أكلمكم شوية عن منظمة المؤتمر الإسلامى الأمريكى

مؤسسة المنظمة هى السيدة زينب سويح
وأنشات المنظمة بعد احداث 11 سبتمبر والهجمة الشرسة على الاسلام
بهدف توضح ان الاسلام ينبذ العنف وان المسلمين هم قوم سلام ومحبة
والمنظمة لها فروع فى واشنطن وبوسطن والبصرة
بالاضافة لفرع القاهرة اللى تم انشائة منذ حوالى عام

وده تعريف بالمنظمة .. من داليا زيادة
منظمة المؤتمر الإسلامي الأمريكي هي منظمة غير حكومية حديثة النشأة نسبيا مهتمة بنشر الحقوق المدنية في العالم الإسلامي من خلال الدعوة إلى التسامح و تبادل الأفكار بين المسلمين و بعضهم البعض و بين المسلمين و غير المسلمين في جميع أنحاء العالم

وعن رسالة وأهداف و أنشطة منظمة المؤتمر الإسلامي الأمريكي

منظمة المؤتمر الإسلامي الأمريكي هي عبارة عن مبادرة مدنية غير دينية تهدف إلى تحدي الصورة السلبية المتزايدة التي دأب الأمريكيون و الغرب عموما على النظر إلى المسلمين عبرها من خلال مناصرة و دعم القيادات الإسلامية التي تتمتع بقدر كبير من تحمل المسئولية و الفهم من أجل إنشاء حوار متكامل الأركان بين أبناء الديانات المختلفة و منها الإسلام.

نظرا لإزدهار و نمو طائفة المسلمين في المجتمع الأمريكي الذي يتميز عن غيره من مجتمعات العالم من حيث التنوع الحضاري و الحريات المدنية، رأينا أنه من الواجب علينا أن نجعل من المسلمين الأمريكيين قدوة يحتذى بها في كافة المجتمعات الإسلامية أو التي تضم جاليات إسلامية في جميع أنحاء العالم.

إننا لا نخشى و لا نتردد في الدعوة الصريحة لمنح المرأة حقوقها المهدورة و مساواتها في الحقوق و الواجبات مع الرجل. كما أننا لا نخشى و لا نتردد في المطالبة بحرية الرأي و التعبير، و نشر مبدأ اللاعنف – و عدم تقديم أعذار أو مبررات من أي نوع لأي عمل إرهابي مهما كان، في محاولة منا لحماية أرواح المسلمين و غير المسلمين في جميع أنحاء العالم.


أنا .. وداليا زيادة


داليا زيادة .. والصحفى خليل أبو شادى



داليا زيادة .. ونهى محمود


داليا زيادة .. وشادى سمير ودكتورة بسمة موسى

مجموعة من المحامين ونشطاء حقوق الإنسان


أشرف أخف دم


فى إنتظار الإفطار


لمشاهدة ألبوم الصور كاملا على الفيس بوك
إضغط هنا


الموقع الرسمى
لمنظمة المؤتمر الإسلامى الأمريكى ..هنا

و
جروب منظمة المؤتمر الإسلامى الأمريكى بمصر
على الفيس بوك .. هنا


إقرأ أيضا عن إفطار التسامح هنا
موقع أبناء مصر
الدكتورة بسمة موسى مدونة باقة ورد

Sep 18, 2008

الهاتف الذى طلبتة ربما يكون ضائعا او مسروقا

من وحى فقدان الموبايل
طبعا انتم عارفين أد ايه مش بحب اتكلم عن نفسى وعن قدراتى ومواهبى .. وخاصة
موهبة الانتباة والصحصحة
أنا معروف منذ نعومة أظافرى بالأنتباه والصحصحة .. وأمى دايما بتشيد بيا فى المواقف دى
عمرها وانا صغير ما بعتتنى أجيب لها حاجة ورجعت لها بالحاجة أو الفلوس
بل كنت غالبا برجع ناسى إنى كنت رايح أجيب حاجة ..ولما تسألنى : طب فين الفلوس ؟
بقولها بإستغراب : فلوس إيه ؟

لكن .. طبعا لا يمنع إنى دايما اديكوا نصايحى وخبراتى ..أمال؟
لو ماكنش المنتبهين والمصحصحين أمثالى
يعلموا شباب المصحصحين وياخدوا بإيدهم
لغاية ما يبقوا - عقبال أملتكم - زييى كدة
يبقى على الدنيا السلام

خليك مصحصح .. وأعمل زيى تمام .. لا تحتفظ بالارقام والاسامى فى نوتة او أجندة .. خليها بس على الموبايل .. عشان لو ضاع .. تقعد تلف زى الشحاتين على الناس .. والنبى الرقم يابية

بالنسبة للمناسبات والمواعيد .. أعمل فيها خواجة وخلى كل المواعيد اللى المفروض تعمل فيها حاجة خليها بس على الريمندر
أوعى تكتبها زى الناس البلدى فى ورقة.. خصوصا لو كنت عندك زهايمر .. لغاية ما موبايلك يضيع وتلاقى أخوك قابلك فى الطريق بالصدفة وقرفان منك وبيقولك : أنت ما جيتش فرحى ليه ياض إمبارح ؟

لو كنت من الأثرياء مثلى ... يعنى بتركب أتوبيسات نقل عام فاخرة زى اتوبيس 923 المفتخر أو 912 المفتخر اوى واتوبس 17ج اللى شكمانة جوة الاتوبيس وبيطلع الدخان جوه
وبتحب من باب التواضع تقف على الباب مع بعض الناس التانية المتواضعين بردو
او بتركب مكروباظظظ موقف العاشر من السيدة عائشة ساعة صبحية والدنيا رايقة كدة
أو بتعشق ركوب مترو الانفاق من التحرير الساعة اتنين الضهر فى شهر أغسطس المجيد فى عز الطراوة والروقان والبرد
أحلى حاجة كدة انك تقف وانت باصص للسما وبتتأمل فى النجوم والكواكب والمجرات
سيبك خالص من الحاجات اللى فى جيبك
وانسى انك شايل موبايل
أو إن فى جيبك محفظة فيها مرتبك وبطاقتك وأوراكك
أعتبر نفسك ما عندكش جيب ورا

خدها منى حكمة
لو كنت مخلص وأمين وإبن حلال مثلى .. يبقى موبايلك لو اتسرق هيرجع لك تانى
إنما بقى لو ضلالى ومفترى وتاكل مال النبى وتحلى بالصحابة .. فموبايلك مش هتشوفة تانى
سامع واحد بيسألنى .. أمال انت ما لقيتش موبايلك تانى ليه ؟
طبعا ده سؤال مغرض ذو مغزى دنئ .. وأقولة : لكل قاعدة استثناء طبعا .. والمؤمن دايما مبتلى

ومن أول يناير
هكون إنسان حريص .. وايييييه


موبايلى ضاع وعليه ديشليون رقم وكمية رسايل وداتا ضخمة ومش كلها محتفظ بيها
من النهاردة هبقى حريص .. اللى يلاقى شبشب عامل كدة يعرف انه بتاعى


ولو لقيتوا واحد شايل الموبايل كدة يبقى أنا




ومش بعيد خوفا على تليفون البيت بعد كدة تلاقى فى الشارع واحد كدة

طبعا انا عارف ان فى ناس معجبة بإنتباهى وبشخصيتى الحريصة
طبعا الانسان لازم ولابد يكون حريص
الحرص واجب يا نااااس

خالو أحمد .. أبو من غير موبايل

موبايلى ضاع

احيط حضراتكم علما.. اهئ اهئ .. بأن موبايلى ضاع
لذا فهو مغلق حاليا إلى ان يأتى الله بأمرة
أهئ أهئ
كل عام وأنتم بخير ورمضان سعيد عليكم
اهئ اهئ


خالو أحمد .. أبو من غير موبايل

Sep 14, 2008

زرنا مستشفى الأطفال وفطرنا مع بعض .. التغطية

تحديث : شيماء زاهر .. كتبت عن اليوم بإسلوبها الادبى الرائع .. وإيناس نهر الحب كتبت حزب بلا مقر

الحمد لله قمنا بزيارة مستشفى أطفال أبو الريش ..وكان يوم فى رأيى موفق بحمد لله وإستطعنا إننا نؤدى جزء صغير من دورنا تجاه أطفال أبرياء مرضى .. وبقول جزء صغير لإننا لسه قدامنا مشوار طويل
وحسيت بفخر شديد وانا فى وسط المجموعة الرائعة اللى جم فى عز الصيام والحر من كل فج عميق
من القاهرة وبورسعيد والمنوفية وطنطا وكل حتة ف مصر

الاتنين أصحاب الدعوة تعبوا أوى فى تنظيم اليوم
داليا .. قوس قزح و رحاب ..كوكب أبى
و
أحمد سوو .. تعب فى تنظيم وحجز الافطار الجماعى بعد الزيارة


اليوم بدأ فى الثالثة عصرا إتجمعنا قدام المستشفى وبعدين دخلنا
ودخلت مجموعة جهزت شنط الهدايا والملابس والتبرعات المادية الاخرى
وتم عمل مجموعات .. كل مجموعة لزيارة قسم معين حسب الفئة العمرية والحالة
المستشفى فيها اطفال من اول مخاليل عساسيل رضع لغاية حوالى عشر سنين دول اللى شوفتهم
المحزن ان المستشفى دى بتضم أطفال مرضى القلب والفشل الكلوى والسرطان والعلاج فيها مجانا لكن أعتقد حجم المساعدات اللى بيتقدم لها قليل لذلك مش عايزين نوقف المساعدات للمستشفى حتى لو تتم بصورة فردية خلال الفترة الجاية
واللى عايز يروح لوحدة ده
موقع المستشفى على جوجل إيرث


اليوم فى تقديرى كان يوم جميل جدا والعدد اثناء زيارة المستشفى كان اكتر من سبعين من المدونين وغير المدونين
وانا كنت سعيد اوى وقابلنا مجموعة جديدة من المدونين أول مرة ألتقى بهم
على سبيل المثال
كيكى عووووووووو .. انا خلاص سميتها كدة
وهى شخصية لذيذة جدا جدا ودمها خفيف وتحس انك تعرفها من زمااان
و
عبد الرحمن .. مواطن صيدلى مطحون وجودة كان مفاجأة ليا واحنا كانت بيننا صداقة كبيرة لكن ده أول لقاء
وهمس .. مصرية لكن متغاظة آند مفروسة .. والحقيقة قمت معاها بواجب غيظ تمام ههههه
و
مدام إيناس وابنهم عمرة 12 سنة
و ساجى كانت مانعانا من التصوير داخل المستشفى وكنا فاكرينها مسئولة من المستشفى
ولما عرفت انها معانا كنت ناوى اسرق منها الفطار بتاعها بس قولت الطيب احسن ههههههه
بجد شخصيتين من أجمل الشخصيات
و نونا .. صاحبة مدونة المهاجر نموذج لإنسانة متدينة ومنقبة ومتفتحة والكل كان فرحان بيها جدا
الكاتبة والمدونة
شيماء زاهر .. اللى كانت حريصة على متابعة الاخبار معايا قبل الزيارة بتلات ايام وكانت ملهوفة اوى انها تشوف الاطفال وتلعب معاهم
محمد الغزالى .. طبعا مش أول لقاء لكن كان حضورة مفاجأة سعيدة جدا ليا .. لانى عارف مشغولياتة

وغيرهم كتير .. كل الناس اللى كانوا موجودين فى منتهى الجمال
( فى قائمة ببعض أسماء الحاضرين فى أخر التدوينة )


من الحاجات اللى ضايقتنى إن فى ناس جت وكانت واخدة جنب خالص .. لدرجة اننا عرفنا فى اخر اليوم ان فى ناس جت واحنا ما نعرفش .. والمتوقع فى اللقاءات دى انها بتبقى فرصة جميلة للتعارف فمش عارف ليه هما كانوا واخدين جنب كدة


بعد إنتهاء زيارتنا
لمستشفى اطفال أبو الريش اليابانى كانت الساعة حوالى خمسة وكانت الناس فيصت من الجوع والعطش والتعب .. ( بضحك عليكم انا بس اللى كنت فيصت من الاثار الجانبية للأكل اللى بعملة ) ههههه
إتوجهنا كلنا لشارع شامبليون ..
مطعم أبو خالد .. وكان سوو حاجز لنا 30 مكان
وطبعا عددنا كان اكتر من كدة .. وكنا قربنا ناكل فى بعض هههه بس الحمد لله المكان كان يساعى من الحبايب ألف
وكان هيحصل اكتر من حادث دلق شوربة على نافوخى لكن ربنا كان بيستر

بعد الفطار .. فى ناس مشيت وناس جت معانا لوسط البلد فى جو رمضانى جميل
ودى لقطات من اليوم الجميل ده


مجموعة من الصور الجماعية قدام المستشفى











الاستاذ الغالى أحمد كمال .. وحبيب قلبى يوسف


أنا .. وميرا

أحمد كمال .. محمد يوسف .. بابا أبو خالد .. أنا .. أحمد سكر


فى أروقة المستشفى



خالد همس الاحباب .. وأحمد شاهين


محمد قلب مصرى .. وخالد

أنا وقلب مصرى وخالد واحمد سكر




ضياء باشا

ودى لقطات للأطباق بعد هجوم الافطار المريع





ألبوم الصور كامل على الفيس بوك
إضغط هنا

ودى بعض أسماء الحاضرين مع الاعتذار عن السهو الخطأ
وأى خطا فى اللينكات او سهو يريت يتم الاشارة له فى التعليقات وانا هعدلة

قائمة ببعض الحاضرين

رحاب - كوكب أبى

داليا قوس قزح

أحمد سوو

أحمد سكر

ميرا - إمراءة بعقل رجل

إيناس نهر الحب

نسمة هانم أخت إيناس

رودى بنوتة مصرية

عبد الرحمن فارس

محمد عطية الشاعر

خالد همس الأحباب

محمد قلب مصرى

بابا أبو خالد

أحمد كمال

محمد محمود يوسف

طارق كوارث

ابن حجر العسقلانى

دعاء مواجهات

همس مفروسة اند متغاطة

كيكى

مهندس محمد .. وايت هارت

دكتورة جنة

محمد الغزالى

محمد حسام

محمد مدحت

سها

سحر غريب وأخواتها الثلاثة

سلوى و سالى و سماح

إيناس وإبنها
some one in life

ساجى

وزة

الاستاذ شريف

عبد الرحمن- مواطن صيدلى مطحون

سوما

شيماء زاهر

الباحث عن الحقيقة

أحمد شاهين - غنوة وحدوتة

صباح الصباح

ضياء

سارة سورسارة

نونا - المهاجر

رحاب - بنات صاحبة الجلالة

يوميات واحدة مفروسة جدا

رشا ونيرمين

مدونون أخرون كتبوا عن اليوم

أحمد سكر
كوكب آبى
كيكى عوووووووووو

طبعا مش هشكركم لأن ربنا يجازيكم خير جزاء ان شاء الله
لكن هقول إن اللى بيعملوه المدونين دلوقت مثال حقيقى على مشاركة الشباب فى خدمة المجتمع .. ومش بس بالكلام
وإن لسه فى بارقة أمل فى شباب لما بيقدر يعمل حاجة بيعملها
وطالما لسه فى شباب من النوع ده .. يبقى مصر مش هتموت

انتظروا التحديث لاحقا

أحمد الصباغ