خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Feb 13, 2009

غطينى وفلانتين عليا

ويأتى الفلانتين هذا العام كئيباً ككل عام بلا حبيب .. كل عام أخرج إلى الشوارع فأجد مليارات الدباديب ومعاهم شوية عشاق كدة عالماشى .. وأجد بلايين القلوب الحمراء تتقدم مواكب ثنائيات الأحبة .. وأبدو أنا زى "قرد قطع" أمشى وحيداً متفرداً فأبدو كزنجى أسود يمشى بين أهل الإسكيمو .. الجميع يلمحونى ويميزونى ويشيرون إلى بالبنان والعطف والشفقة .. وأذكر أن أحد العشاق فى الفلانتين الماضى وضع ربع جنيه فى جيبى وربت على كتفى
وكنت قد قررت فى عام من الأعوام ألا أخرج يوم الفلانتين حتى لا أصاب بالقهر السنوى المعتاد .. وعندما فتحت التليفزيون وجدت دباديب وقلوب .. أفتح الإنترنت أجد دباديب وقلوب .. أفتح البوتجاز .. دباديب وقلوب .. أفتح التلاجة .. دباديب وقلوب .. خبطت دماغى فى الحيط غيظاً وكمداً فنزفت دباديب وقلوب
بعض أصدقائى من ذوى الدباديب والقلوب يتعمدون إرسال لى رسائل تهنئة بمناسبة الفلانتين .. فأرد لهم الرسالة لاعناً سنسفيل جدودهم .. فيضحكون شامتين .. وأخيراً رشيت عليهم شوية مية قائلاً وأنا بجزّ على أسنانى : ياللا ياض يا كلب منك ليها من هنا ..بلاش مياصة وقلة أدب ..
قال فلانتين قال .. اممممم .. سمعت فتوى بتقول إن الفلانتين حرام لإنه ليس عيداً للمسلمين .. قشطة أوى .. عندما سيسألنى أحدُ : هتقضى الفلانتين فين ومع مين السنة دى ؟ .. سأجاوب بسرعة : عيد الحب حرام .. فليس فى الاسلام ما يسمى عيد الحب ..أيوة كدة تمام .. قال يعنى انا واد حبّيب ومقطع السمكة وديلها وهيمنعنى بس ان عيد الحب حرام .. طب يجى الحب كدة وأنا أطلع له خمستلاف فتوى بتحلله
والسنة دى.. "سنة فلانتينية غير عادية" .. أصبت بنزلة برد شعبية معوية رئوية حادة .. جعلت مناخيرى لونها أحمر طبيعى .. يعنى فلانتين إجبارى كدة .. وإرتفعت حرارتى  وإحمر وجهى بشدة .. ومنعتنى عن الكتابة لفترة طويلة .. يعنى حتى لن أستطيع كتابة كلمتين رومانسية كدة أعمل فيها إنى واقع لشوشتى فى الحب
طب إيه العمل؟؟
قررت إنهاردة إنى اخرج غداً باكرً .. أذهب إلى أكبر محل لبيع أدوات الفلانتين فى وسط البلد.. وأجمع تحويشة العمر .. وأشترى أكبر دبدوب فيكى يا مصر .. وأشترى قلب أحمر سبع أوض وصالة .. مش قلب أبو مهجتين العادى ده بتاعنا .. وبعدين أشترى صندوق هدايا ملون ذو فيونكة حمراء كبيرة على أن يكون الصندوق فى حجم عربية نقل .. وأحمل أدوات الفلانتين وأسير فى شوارع القاهرة متفاخراً وأنا لابس الحتة الزفرة .. على أن أنظر فى الساعة كل دقيقة (قال يعنى مستنى حبيبتى وهى إتأخرت عليا) وأظبط الموبايل يرن كل ربع دقيقة .. يعنى بإختصار أكيد الأعداء .. وأعيش جو الفلانتين على أكمل وجه
مش مهم بقى هودى الدبدوب والقلب والصندوق فين فى الآخر .. المهم إنى ما أحسش إنى وحيد.. وعشان ما أموتش وأنا محروم من الفلانتين .. أما الأدوات دى ممكن أرميها فى النيل بعد ما أخلص .. أو أتبرع بيها لدار أيتام العشاق
أصدقائى الأعزاء
إذا كنت تمشى صباح الغد فى شوارع وسط البلد المزدحمة بالمحبين.. ووجدت شاب طويل يسير وحيداً حزيناً فى شوارع القاهرة .. يحمل دبدوب ضخم جداً فى حجم منزل من طابقين .. وقلب أحمر أكبر منه .. وصندوق ملون كبير فى حجم عربية نقل .. فإبتسم .. إنه أنا
أحمد الصباغ

35 comments:

أحمد سعيد بسيوني said...

مش يمكن يكون انا

انا هو انت

حد فاهم حاجة

رندا said...

يارب يرزقكـ باجمل حبيبة ويكون كل حياتك عيد حب مش يوم واحد بس
اتمنى لك زوجة رقيقة خلوقة

دة من اجمل البوستات الى قرتها بجد
كنت منتظرة بسمة واهو ابتسمت اسلوبك روعة فية ولا الصورة

:)
:)
:)

رندا said...

نسيت اقولك

اسم البوست روعة

:)

اية دة انا مش اول رد وكنت فاكرة انى اول رد وقعت فى الفخ

:)

حروف (دلو مرة ثانية وجرح ثاني سابقا) said...

كل سنة وانت طيب

Heba Sayed said...

السلام عليكم

دى اول زيارة لمدونتك الرائعة

المدونة والعناوين والمضمون جميل

بس ليه حضرتك مكتأب كده

ابتسم للحياة وهتلاقى القدر مرة واحدة

رزقك بالزوجة الصالحة


وبعدين هتقول ياريت اللى جرى ما كان :D

عادى يعنى

عام سعيد عليك

esraa said...

):

طب قولي شارع ايه عشان اجي امشي فيه انا كمان

Habiba said...

:))

العنوان يموت من الضحك يااستاذ احمد

والنبى انا كمان غطينى وفالنيتن عليا:)

بقولك ايه
فى دور الايتام مش هتنفعهم الدبدوب والقلب
ممكن تبعتهم ليا وانا والله هشكرك لانى بحب الدباديب
وربنا مش راضى يبعتلى واحد يجيبلى دبدوب اعمل ايه يعنى؟ :((

Anonymous said...

سلام عليكم وعيد حب سعيد مع انى مش مقتنعة انه يوم وبس لا دا كل حياتك بس لو بصيت من الزاوية الصح اول ما تفتح عيونك على اجمل ام واشقى اخوات واحلى اصحاب بيخافوا عليك بجد ولو زوجة او لسه شويه لا كتيير حتحس انك كل يوم فى عيد يا اجمل خالو نصيحة حب نفسك اوى لانها تستاهل تتحب وشكرا على البوست الجمييييييل\\بسمة مسلم

Soul.o0o.Whisper said...

ابتسااااااااااااااااامة كبيييييييييييييرة



دا بمناسبة ان عندى امل اشوفك بكرة
((ابئا قابلنى


هههههههههههههههههههههههههههههههه
هههههههههههههههههههههههههههههه

بجد بوست تحففففففففففففففة

إيه دا؟؟؟؟



تعيش و تاخد فلانتين غيره
بس يارب يبئا مع اللى تتكعبل فيه و يكون نصيبك



ياللا سلام بئا

عاشقه وغلبانه said...

خلاص يا احمد انا مستعده اخد منك الدبدوب والقلب


ايه رأيك

دعاء مواجهات said...

كلنا لها ياعم

محدش يمشيلك ف فلانتين

اللى خلف مامتش

والبركة فيك انت

الكبير ياعلى

قصدى يااحمد...

عاشقه الفردوس said...

:))))))))))))

الله يرزقك باللي تتجوزها ومحدش عارف يمكن كمان شهر ولا حاجه ونلاقيك كاتبلنا تدوينه طويله عريضه بتعلن فيها عن خطوبتك

:))) الله كريم

مخبر قمل دولة said...

مانجيلكش ف فالالنـ(ـطين) وحش يا خويا

hasona said...

السلام عليكم

مستعجل علي ايه
اليوم ده هيجي هيجي ان شاء الله

وتقعد مع نفسك تفتكر الايام الخوالي

ولأن قلبك مليان خير وحب
أكيد ستجدها بسرعة
من تقدر هذا القلب

Desert cat said...

مش كنت تفكرنى يا احمد اهدى لك وردة حمرا بهذه المناسبة
من الفوكيه اللى كان معايا

bos bos said...

هههههههههههههههههههههههههههههههههه

كلنا فى الهوا سوا

اه والله عادى يعنى وعارف أنا جاتلى أجمل رسالة على موبايلى النهاردة مع انى مبعترفش بالفالنتين ويوم واحد الناس تحب فيه بعضها ولكن الرسالة كانت من أخويا حبيبى تخيل أكيد هتبقى أجمل رسالة

وان شاء الله السنه الجاية يكون معاك نصك التانى

رئـــــيسـة حزب الأحلام said...

هههههههههههههههههههه
ههههههههههههههههههههههههههه
ههههههههههههههههه
والله ضحكتنى اضحك الله سنك
البوست بتاعك دة هديه لكل اللى حب ولا شافشى يوم فلانتين عدل
يلا بلا فلانتين بلا نيلة هما يأكلوا الشعب الاول
تحياتى

romansy said...

انت عارف ممكن ناخد منه الحاجات الحلوه بس
كل سنه وانت طيب
يا احمد باشا
يا استاذنا

Rannon said...

هههههههه
يا خسارة يا صباغ مش هعرف أشوفك
عشان مش بخرج اليوم ده
ابقى اتصور بقى وورينا الصور :))

Soooo said...

يابني انت بنفسك قلتها .. عيد الحب حرام

وبعدين دبدوب ايه وقلب اخضر ايه بس
هو في قلوب زرقا في البلد
دي حتى القلوب السودا حاجه وحشه
تقوم تقولي قلب اصفر
ياشيخ بلاش كلام فاضي


ملحوظه
في مظاهرة معداويه هتتعمل .. جاي ولا اشوف غيرك؟؟؟؟





سلامووووووووووز

عاشــــــ النقاب ـقــــة"نونو" said...

لا حولولا قوة الا بالله
ناس غلابة صحيح
عارف ليه؟؟؟؟؟
هقولك وامري لله

ما عندهمش غير يوم حب واحد بس طووووووول السنة

بجد اليوم دة بالذات باعلن أشفاقي على كل حاملي وشاريين القلوب والدباديب الحمرا واشباههم
وعاوزة اقولك حاجة مهمة جدا باذن الله هيجي يوم ورجلك تيجي وباذن الله هتعرف ان فيه احلى من الكلام الفارغ دة يخلي كل ثانية في حياتك حب
تحياتي

FreeKiller said...

ههههههههه
منا قلتلك الحل ايه
عموما
كل سنة و انت طيب يا سيدي
و لا تزعل
ههههههههههه

ابو النجوم said...

صباغ
والله انت صعبان عليا جدا لانك بتبص تحت رجليك أسأل الناس الحبيبه بتوع زمان عملوا ايه بعد الفلانتين ... الله لايوريك ياابوحميد والله يجازى اللى اتجوزا قبلنا ولا قالوا لناش ويجازى اللى بعدنا لانهم مسألوناش... ياعم الحاج ..فلانتين ده اختراع حريمى علشان تقع فى المصيده زى الجبنه اللى بيحطوها للفار فى المصيده احمد ربنا انك ماعندكش واحده تحاسبك على النفس وطلع ليه ورجع ليه ...واخيرا خد الحكمه دى
العزوبيه تاج على رؤوس العزاب لايرام الا المتزوجون
وعجبى عليك يافالنتينو

ست الحسن said...

خفة دمك واضحة أوي في التدوينة دي يا احمد

وبرغم انك بتتريق بس فيه شوية وجع صغننين يلمسوا الواحد بجد

أقولك على سر
عيد الحب ده طلع مقلب كبير أوي
صدقني
اللي بيحبوا بعض بجد مبيحتاجوش يعملوا الأفلام دي
الأفلام دي بيعملوها الناس اللي كل علاقتهم بالحب هي الهدايا والفسح والكلام الحلو

وبعدين أقولك على حاجة غريبة حصلت النهاردة
أنا قايمة من النوم مبسوطة وبغني
لية معرفش
مع اني زيك بردو مجاتنيش هدايا والكلام ده
بس تصدق بطلت أزعل في الفالانتين

....

مهندس مصري said...

ما ترميش الحاجة
حوشها و خزنها للفلانتاين اللي بعده
دي حاجات قيمة و تنفع و يا عالم حتتمنظر بيها كام سنة لحد ما تقدر تستخدمها بجد
:))

اسماء said...

هابي زالنتطين داي
هههههههههههههههههههههههه
موضوعك تحفة
والنبي يا خويا لولا الملامه لكنت لفيت شوارعك يا مصر بنفس الدبدوب الاحمر ابو فيونكة حمرا واللى عينه بتنور احمر اما يغني_متعفش جاله حصبة والا ايه_ الفك يا مصر شارع شارع ادور ع الناس اللي " بيفلنطلوا "مع بعض مرة في شهر فبراير ومرة تانية في نوفمبر وادعي من كل قلبي دعوة واحدة غلبانة وشقيانة مش لاقية اللى تقوله هابي زالنطين
بس مين برضه
هابي زالنطين عليك وع كل زوارك ف المدونة
...موضوعك اسلوبه حلو اوى...

Anonymous said...

Valentine day is not only for lovers, it's also made for friends who love each other more than lovers

والله بوست غلبان وجميييييييييييل ومن خلال التعليقات اكتشفنا تعليقات كتيرات من معجبات للاستاذ أحمد، شوف كاام واحده عايزه دبدبوب يا حرام ، اللهم ارزقه بفتاه صالحه تستاهله وتكمل معااه مشواره ، اااااامييييييييييين \\\ نبال \\\

MR-BOLICA said...

احمد البوست ده شديد بجد
هابى سينجل فلانتين داى

بذرة امل said...

ههههههههههه
طول ما أن بقرأ البوست بضحك
تحفى البوست بجد

الجواز و سنينه said...

ههههههههههههههههههه
مش لوحدك اللى مستنى حد مش جى فى الفلانتاين
فيه كتير غيرك
المهم ان الفلانتاين بتاعك لما ييجى ميعاده ييجى مع واحده تكون هيه حب عمرك من غير عيد حد حب يفكركم بالحب
ساعتها ابقى اديها الدبدوب الكبير مش خساره فيها تحويشه العمر
كنت فى مول و لقيت سعر هدايا الفالنتاين يترواح من 200 إلى 2000 قلت يعزمنى على كباب و كفته احسنلى من الدبدوب
هههههههههههههههه

زعلانه شويه said...

بيقولك هم يبكى وهم يضحك

ع العموم كل سنه وانت طيب

خديجة عبدالله said...

أنا ردى زى عاشقة النقاب :)
بكرة إن شاء الله نبارك لحضرتك بالحب اللى بجد مش اللى مدبدب ده

بوست جميل :) أسعد الله قلبك

هبة الله said...
This comment has been removed by the author.
Anonymous said...

انا مقدره و متفهمه تماما سبب تعاستك الابدية اللي واضحه اويييييييي في كل صورك
ربنا يكون في عونك يا بني
و هابي فلانتين :)))))))

zaid said...

قررت إنهاردة إنى اخرج غداً باكرً .. أذهب إلى أكبر محل لبيع أدوات الفلانتين فى وسط البلد.. وأجمع تحويشة العمر .. وأشترى أكبر دبدوب فيكى يا مصر .. وأشترى قلب أحمر سبع أوض وصالة .. مش قلب أبو مهجتين العادى ده بتاعنا .. وبعدين أشترى صندوق هدايا ملون ذو فيونكة حمراء كبيرة على أن يكون الصندوق فى حجم عربية نقل .. وأحمل أدوات الفلانتين وأسير فى شوارع القاهرة متفاخراً وأنا لابس الحتة الزفرة .. على أن أنظر فى الساعة كل دقيقة (قال يعنى مستنى حبيبتى وهى إتأخرت عليا) وأظبط الموبايل يرن كل ربع دقيقة .. يعنى بإختصار أكيد الأعداء .. وأعيش جو الفلانتين على أكمل وجه