خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Apr 6, 2009

إضـراب .. مع إيقاف التنفـــيذ


أعزائى شباب 6 إبريل ..

ترددت كثيراً قبل أن أكتب إليكم رسالتى هذه .. وأعلم أنكم الآن قد تكونون فى إنشغالٍ بالإضراب الذى هو موسمه الآن .. وأنكم قد تكونون قد أعددتم العدة من منشورات وبيانات وتجمعات وهتافات وشعارات للقيام بدورُ مشرف فى الميادين والشوارع يثلج صدور المصريين

كنت أحدث نفسى اليوم وأن أسير مطأطأ الرأس فى ميدان طلعت حرب الذى تعودت أن أرى فيه دائماً تلاحم مشهد كتائب الأمن المركزى مع بوابة جروبى ومكتبة الشروق .. وأنظر إلى المواطن الذى يسير فى الشارع فأحدث نفسى بصوتٍ أقرب للهمهمات ..

"هو لسه شباب 6 إبريل يظنون أن الشعب المصرى يفعل ما يمكن أن يقوم بالإضراب عن فعله فى يوم 6 إبريل ؟!"

يتخيل شباب 6 إبريل أن الشعب المصرى يمكن أن يضرب عن العمل.. ولا أدرى هل يعلمون أن الشعب المصرى يعانى من البطالة منذ عشرات السنين .. وأنهم لو نزلوا إلى قهوة المصريين لوجودوا الشعب يجلس وحيداً مهموماً يضع رأسه بين كفيه .. ويضرب أخماساً فى أسداس .. وقد أحمر قفاه وتقطعت فانلته الداخلية ذات الست رقع

شباب 6 إبريل يدعون الشعب المصرى للتوقف عن شراء الطعام واللحمة خلال يوم 6 إبريل فقط .. وهم لا يعلمون أن الشعب المصرى وُلد ثورياً ومن فرط حبه للإضراب فقد إمتنع عن شراء اللحمة طوال العام !

شباب 6 إبريل يدعون الشعب بالإمتناع عن نزول الشارع وركوب المواصلات .. وهم لا يعلمون أن المواطن المصرى لم يعد يجد أساساً موطئ لقدم فى أتوبيس أو مترو أو شارع وأن الكثيرين فضلوا الموت جوعاً فى البيوت عن الموت دهساّ فى المترو

شباب 6 إبريل يدعون المواطن المصرى لأن يسرف فى كره الحكومة والنظام الذى يحكمه منذ 30 سنة .. وهم لا يدركون أن الكراهية فى قلب هذا الشعب للنظام لا يكفيها بأى حال من الأحوال يوماً فى العام .. وإنما تحتاج عاماً كل يوم

يدعون شباب 6 إبريل إلى مقاطعة الجرائد القومية التى ترزح تحت نير النفاق والتملق وفاحت ريحتها وكمكمت.. وإلى مقاطعة الجرائد الصفراء ذات التلات ورقات .. وهم لا يعلمون أن الجريدة القومية هى أرخص جريدة يمكن لبائع طعمية أن يقتنيها نظراً لإرتفاع أسعار الورق فى السوق السوداء

شباب 6 إبريل يدعون للوقوف ضد التوريث .. وهم لا يعلمون أن مصر حُكمت بالتوريث منذ فجر التاريخ .. وأن الظلم يورث كرسى الحكم لإبنه الفساد فى كل صفحة من صفحات كتاب التاريخ .. وأن التوريث لا يحتاج إلى تحليل DNA فالرئيس الحالى دائماً هو إبناً شرعياً للـ "الرئيس السابق" .. والثورة هى بنت القصر .. والجمهورية هى بنت الملكية .. والشعب هو من يولد سفاحاً .. لذلك فهو ليس له صاحب .. ولذلك أيضاً فهو دائماً وحيداً مهموماً وخالى شغل على قهوة المصريين

شباب 6 إبريل يدعون للكتابة ضد الظلم .. وهم لا يعلمون أن مصر أصبحت الدولة الوحيدة التى أبدلت مشروع محو الأمية بمشروع "محو الرأى" و "مسخ الدماغ" و "وشرخ الفكر" وأصبحنا نطل على العالم من خلال عيون تامر حسنى ، وسعد الصغير ، ونجلا .. وأصبح رجال الفكر فى مصر من عينة شعبان عبد الرحيم وعبد الباسط حمودة .. لذلك من السهل جداً أن تجد جريدة الدستور تقدم لك فى عددها الأسبوعى الصادر الأربعاء الماضى ..  ملخص اللقاء الفكرى الذى حضره كلٌ من شعبان عبد الرحيم وسعد الصغير وعبد الباسط حمودة وأمينة!!

يتوهم شباب 6 إبريل أنه لازال للشعب المصرى ما يخسره .. وأنه يجب الإنتفاض كرد فعل عن ظلم دام عشرات السنين .. ولا يعلمون أن المواطن أصبح جسد ممسوخاً فكرياً ونفسياً .. ولو كان للإنتفاض فائدة فى جسدٍ ميت .. لكان وجب القيام به منذ سنوات طويلة

لا يعلم شباب 6 إبريل المكافحون أن الإضراب أصبح "مادة إعلامية" تملأ بها الصحف أوراقها .. وتُحشى بها دماغ المواطن كبديل عن البانجو الذى يشح أحياناً من السوق .. ولا يعلمون أن رؤوساء تحرير الصحف و رؤوساء الأحزاب وكبار رجال الدولة قد يجتمعون لصياغة مسرحية بعنوان "المعارضة اليوم" .. تعاد على المشاهد كل يوم .. حتى أن المواطن قد يصاب بصداع وزغللة إن لم يشاهدها يوماً ما .. وربما يقوم بعمل إنتفاض حقيقى

أعزائى شباب 6 إبريل المكافحون الحالمون بغدٍ مصرىّ تشرق فيه شمس الحضارة والتقدم والحرية على مصر.. وتفتح ساحة العدل أبوابها للمواطن .. أرسل إليكم بتحياتى وتقديرى وسلاماتى من قلب قهوة المصريين


وأهديكم كلمـــــــــــات
كنت قد كتبتها فى نفس ذات اليوم من العام الماضى 6 إبريل 2008م

لما الفســـاد وقـفوه حـــارس على وطنى
ولهيب الغلا كوانى .. وحتّ ف بدنى
لما الحرامى سرق منى اللقمة والميه
وسرق هدوءى وسكنى .. حتى من سكنى
لما الحلم حتى اتسرق .. من يومى .. من زمنى
لما النظام نسج - فى عز الشباب - كفنى
أنا قلت هعلن العصيان
فى يوم حزين مـَدنى

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما سألت عالعيش .. قالوا مفيش
وقالو العيش على الأبونية
وسألت عالزيت .. وعزّيت
لما عرفت إن الزيت بتسعة جنيه
وسألت على حديد البُــنا
قالوا الحديد .. خلاص فى كرش البيه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما البشر والحجر
ووادى النيل ببنى أدمينــــه
لما زمان الوطن بايامة وشهورة وسنينه
لما الصغير والكبير
قالوا كفاية مش عايزينــه
كفاية علينا حكم سنين
تخرج الواحـــــد من دينـه

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم


لما المبيد صبح سرطان
يهرى ف ارضنا .. فى الزرع .. فى مواطن
لما بؤ الميه صبح وسخ داكن
لما خرب الاقتصاد .. واحد على تلـّـــه
قاعد وشارب وواكل وساكن
لما الشباب بيصرخ .. فى ذل ومهانة
ولا شغل ولا توظيف ولا شقة ومساكن

انا قلت هعمل الإضراب
ولم الدنيا والعالم
فى يوم ابيض على المظلوم
اسود كئيب على الظالم

أحمد الصباغ

18 comments:

همس الاحباب said...

عندك حق والله
فى كل اللى انت قلته
البقاء لله فينا
ولا عزاء
تحياتى

كرانيش said...

كلامك فيه نبره حزن
معلش
اكيد فى بكره احسن
بيتهيالى بدايه النهايه كمان قربت
..

كلاكيت تانى وتانى said...

تصدق يا واد يا ابوحميد واسمحلى اقولك يا واد لأنى اختك الكبيرة المهم تصدق انى كنت متصورة انك مصور رائع فقط لكن انت محلل وكاتب اكثر روعة كل كلمة كتبتها حقيقة وحقيقة لا مجال للشك فيها الاعتقاد بأن الشعب المصرى سيؤيد اى امتناع عن العمل فى حين الدولة بتهددة بقطع عيشة لو هوة امتنع عن الشغل حلم لسة بدرى عقبال مانوصله لازم طبقات كتر من الشعب تفهم اولا يعنى اية اضراب واساسا مش اى طريقة للاعتراض ممكن تطبق عندنا احنا مجتمع ذوطبيعة خاصة صعب يتطبق عليها اللى بيتعمل فالبلاد التانية وان كتان موظفين الضرايب العقارية نجحوا وثقافة الاعتصام نجحت فثقافة الاضراب لسة بدرى عليها قوى
تحياتى وعميق شكرى لمقالك الذى امتعنى بحق

رحــــيـل said...

أزيك ياصباغ اخبارك ايه

معاك حق يااحمد بجد
هما من الواضح انهم مش واخدين بالهم ياريت يقروا البوست ده عشان يعرفوا ما تبقى من الشعب

تحياتى لك

mido said...

مع تحفظى على مطالب اضراب 6 ابريل 2009 و لكن مختلف معاك فى عدة نقاط :
---
يتخيل شباب 6 إبريل أن الشعب المصرى يمكن أن يضرب عن العمل.. ولا أدرى هل يعلمون أن الشعب المصرى يعانى من البطالة منذ عشرات السنين
-------------
اذا كانت الاضرابات كلها تأتى من العاملين فى الدولة و البطالة ملهاش علاقة
-----
لا يعلمون أن المواطن أصبح جسد ممسوخاً فكرياً ونفسياً .. ولو كان للإنتفاض فائدة فى جسدٍ ميت .. لكان وجب القيام به منذ سنوات طويلة
------------
كل ده يأس !!

حياة said...

الاضرابات فى جميع انحاء العالم اقالة حكومات وحكام اوكرانيا -باكستان- تايلند- تركيا-الهند هذه البلادالذى يتندر المصريين ببعض منها ويقول لك هو انت فاكرنى.... هذا هو الشعب المصرىياخذ كل شئ بالنكته وليس بالفعل السلبية يا استاذ
وقالها من زمان مفيش فائدة من 1981 حتى 2009 هل من مجيب فيه امل ان يكون هناك فائدة

تحياتى

Rania said...

تفتكر يا احمد العيب فى الشعب
العيب مش فى الشعب العيب فى فئه من الشعب مش كله
العيب فى الناس اللى بقت تفضل مصلحتها عن مصلحة البلد
العيب بقى فى المعارضه و اللى هى اصلا مش معارضه
العيب فى اى قوى عايزة تتزعم شوية شباب متحمسين و تعمل عليهم زعيمه و هى فى منتهى التناقض و مش بتسعى غير لمصلحتها
العيب فى اى قوى تتكلم و تجرا و ساعه الجد متلاقيهاش

شوف منظرنا انهاردة و منظرنا السنه اللى فاتت
كنت بسنع ناس سواقين وناس ماشيين فى حالهم بيقولا تسلموا معاكم الوضع فعلا بقى مستحيل حرام عليهم
على الاقل اللى مكنش بيضرب فى حاجة اسمها مشاركة وجدانيه
انهاردة فى ايه
اللى بيقول علينا شوية عيال و اللى عايز يظهر و يتزعم و بس
و كل واحد فى واديه
بلاش نعمم و نقول شعب
نقول فئه عايزة تقتص من الشعب
اى واحد مش خايف على منصلحه بلدة قبل مصلحته لازم يقتص من مصر و مستهلش يبقى بجد مصرى و من مصر

تحياتى

ابو اعصار said...

المفروض نفوق لا ن

الشمس بقت في وسط السما
والضهر ادن


الله ينتقم من اللي حطم معنويات الشعب المصري بل حتى وادو احلامه الحلم بقى حرام

سلام يا خال

لورنس العرب said...

شباب الجامعه اصله لسه صغير
لما يتخرجوا ويجربوا انهم يقعدوا على الرصيف ويشتغلوا في القطاع الخاص وييجوا الشغل بالعافيه ايام الاجازات الرسميه هايعرفوا ليه الناس لم تعمل الاضراب
الشباب في الجامعه- ممكن محدش يروح
لكن الشغل هنعمل فيه ايه؟
تقدر تقول لمديرك اصلي كنت عامل اضراب؟
اظن صعب
هما طبعا بيفكروا كويس
لكن فيه حاجات كتير ناقصه عندهم بحكم الخبره

محمد الجرايحى said...

السلام عليكم ورحمة الله وبركاته
صدقت....
هذا مع كل الأسف هو الواقع الأليم

بسمـــة مســـــلّم said...

السلام عليكم انا معاك فى ان مينفعش يبقى فى اضراب لان مفيش شغل اساسا وده مظبوط لكن الاضراب اللى بيخدم فئة معينة مظلومة فى المجتمع عين العقل زى المدرسين والادارين والاطباء لانها اللغة السليمة للتعامل مع الحكومة الفاسدة ودا اقل حاجة طبعا بعيدا عن التخريب والمظاهرات !!1تسلم يا خالو على القصيدة الحلوة سلام

همسات دافئه said...

صرخة كبيرة
ومحدش هايسمعها
كالعادة
***
وسرق هدوءى وسكنى .. حتى من سكنى
لما الحلم حتى اتسرق .. من يومى .. من زمنى
لما النظام نسج - فى عز الشباب - كفنى
:(

بسنت said...

يمكن ساعات الاضرابات او الاعتصامات بتجيب نتيجه
زى ما حصل فى موضوع موظفين الضرائب العقاريه واخيرا الصيادله
ولكن فى موضوع شباب 6 ابريل لا اعتقد انه هيجيب او جاب نتيجه
اصبحت زى دوشه شباب وتنتهى باعتقالات من الامن
ويوم وعدى وخلاص
يمكن لانهم شباب سواء جامعه او مخلصين كليات لكنهم مش بيضغطوا على الحكومه ومصالح الناس بصوره كبيره
بصفه عامه اضراب السنادى انا كنت ضده
لانى شيفاه بالا هدف ممكن يتحقق منه
لانه باختصار الامل مفقود فى انصلاح حال مصر السياسى والديمقرطى
احنا عايشين فيها وخلاص

mohamed ghalia said...

معاك حق ياصباغ
ياريت الشباب دول يفهموا كلامك كويس

حزيــــــــــــــــــن said...

انت اتحديت نفسك فى البوست دا يا صاحبى
تفوقت على نفسك

تحياتى وتقديرى

احمد مهنى

مثلية فقط said...

ما في فايدة يا أحمد

و بعدين يجو المسؤولين يقولو ليش الشباب بيركب قوارب الموت

سومه...مجنونه فى بلد عاقل said...

ياااااااااااااه يا صباغ فينك يا جدع كل دا خلاص بقيت عمو المهم ونسيتنا مردودالك يا سيدى
كلنا اعلنا العصيان والاضراب بس مش على الحكومات اعلناه على نفسنا من زمان

سومه...مجنونه فى بلد عاقل said...

نسيت اقولك حته من زجل لسه منزلاه امبارح
اضراب ورا اضراب ولا حد سامعلنا دى لو كلاب بتهوهو كانوا خافوا مننا