خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Apr 16, 2009

الفلــوس .. والريس برايز

كلما تذكرت "الريس برايز" فى فيلم ثقافى الذى إكتشفت خطيبته أنه يمتلك ألف جنيه فقط وفسخت الخطوبة فعاد إلى الثقافى عودٌ حميد

وكلما تذكرت جدتى التى كانت تجزم بشدة أن عفشها كان عفش ما يجيبوش وزير لدرجة أنه تكلف 8 جنيه كاملة ، ولم يبخل جدى على حتته الطرية فأتى بكل عزيز وغالٍ ، إيشى دولاب بجنيه ونص خشب أبنوسى ملوكى معتبر ، والصالون مدهب ضخم مكون من عشرات القطع التى تمكتهم من استضافة الحى بأكمله والذى دفع فيه جدى 2 جنيه ضارباً بذلك مثلا فى البذخ والإسراف

ثم أتذكر والدى الذى كان يحكى عن شبابه فى الخمسيسنات قائلاُ : الحياة على أيامنا كانت غليت والواحد عشان يقول يا عفش مش هيحتاج أقل من 50 جنيه
 وكان رحمه الله يلعن سنسفيل أبو الغلا والذى أصاب الحياة فى مصر المكتوية بنار الغلا فى أيام شبابه ..

ويقول فى فخر : لكننى لم أستسلم ولم أنهزم وتحديت الصعاب وإستطعت بفضل الله ثم عملى المتواصل ليل نهار ومساعدة أسرتى أن أشترى عفش ما يجيبوش وزير كلفته 75 جنيه رغم نصائح الأهل والأصدقاء المتكرر بعدم الإسراف فقد أحتاح هذه الفلوس بعدين والإكتفاء بعفش متوسط فى حدود الخمسين جنيه ، لكن أبى الرجل الكريم المعطاء فكر فى أن يرضى زوجته - اللى هى أمى - ويملا عينها بعفش ما جابوش شاب فى الحتة أو ما جابوش وزير على حد تعبير الناس القدام

ثم أتذكر صديقى الذى قررت أسرته ذلك القرار التاريخى بعد 32 سنة من العزوبية والصياعة والحياة كما "قرد قطع" فى أرابيز أهله ، وبعد أن أصبح على وشك إغتصاب مولة السرير والعض فى الأرض ، وبعد الإصابة بحالة من الهياج المتكرر وخوفاً منه على بنات الحتة وعلى الصابون الذى إرتفعت أسعاره فقد قرروا أن يزوجوه .. أن أن طشششش
ولما كانت أسرته غير ميسورة الحال ، ولإنهم لم يتندبوا أحد أعضاء الأسرة فى دول الخليج وبما أن أمه ليست رقاصة وإنما "ست شريفة" وأخته ليست فتاحة وانما "بنت عفيفة" وبما أنه هو شخصياً محاسب وبياخد 500 جنيه أول كل مكتب قصدى أول كل شهر ، وفى الوقت الذى أصبح فيه ساندوتش الفول بجنيه وربع وأصبحت الطعميايه - اللى هى طعام الغلابة - بربع جنيه القرص ، وأصبحت الفرخة فى الحالة النية بعشرين جنيه وفى الحالة المشوية بتلاتين جنيه على أقل تقدير ، وبما أنه لا يمتلك أى أمارة على الجواز أو حيثيات أو منطلق يجيب من خلاله سيرة الجواز .. فقد بدأت رحلة البحث عن عروسة بزميلاته فى العمل على أساس إنهم معرفة وعشرة سنين هيرضوا بقليلهم ..

فكانت المفاجأة صعبة حينما تقدم لإحدى زميلاته وإبتدره أبوها بأشهر جملة تقال فى مثل هذه المواقف "إحنا بنشترى راجل " .. تشعرك هذه الجملة بأنك تستطيع أن تأخذ عروستك بهدومها وتمشى وعليها بوسة من غير ما تدفع حتى حق الشاى اللى شربته ، مش مهم تجيب أى حاجة كفاية إنك راجل وأحنا كنا بنفكر نشترى راجل وكفاية إننا هنشترى راجل ..

لكن عندما تعلم أن هذه الجملة هى ليست أكثر من قول مأثور توارثته الأجيال عبر الأجيال وإنهم يقصدون بها " إحنا بنشترى راجل بشقته ومهره وشبكته وعفشه وفلوسه "
فإنه من الطبيعى أن صديقى يظن أن الزواج المناسب لشاب من ذوى الإحتياجات الرخيصة مثله هو جواز الاهل..أهُم مننا وعلينا ونبقى عيلة ف بعض وما حدش شايف حاجة ، وإبعد عن زميلات العمل أو الأصدقاء اللى ما بيملاش عنيهم إلا التراب

وعندما أعد العُدة وشمّع الفتلة وجمع من إسرته الأب والأم والإخوات ومن العائلة العم والخال والخالة وذهبوا جميعا لخطبة بنت عمته ، فقد قامت عمته برقع زغرودة معتبرة وإستـُـقبلوا خير إستقبال ، وأضاءت عمته الأنوار وأناموا الأطفال الصغار وإبتدره جوز عمته بـ " يابنى إحنا بنشترى راجل" !! ..

بغض النظر عن القلق الذى أصابه حين سماع هذه الجملة ، إلا أنه يذكر حتى الآن أن رد فعله تجاه طلبات جوز عمته التى فاقت طلبات أبو زميلته المتواضعة – قد أنشأ قطيعة بين أسرة عمته وباقى الأهل إلى يومنا هذا

يقول حجا : يلعن أبو اللى إتجوزا قبلنا وما نصحوناش واللى إتجوزوا بعدنا وما سألوناش .. ولهذا فإن صديقى صار يعتبر أن رفض العزوبية هو نوع من البطر ورفض النعمة .. صحيح الفلوس موجودة إكوام إكوام والحمد لله والأشية معدن
لكن يظل "الثقافى" شعاراً هاماً للمرحلة القادمة لهذا الجيل التعييس

5 إبريل 2009
أحمد الصباغ

29 comments:

عاشقه وغلبانه said...

عــــــــــــــــــادي
كل شئ عندي اليومين دول اقل كمان من العادي
مافيش جواز... عادي
في جواز... عادي برضو
في فلوس ... عادي
مافيش فلوس ... عادي برضو
كل الايام شبه بعض نسخه كربون والعمر بيعدي خلينا كده لحد مانقابل وجه كريم

مجداوية said...

السلام عليكم

المفروض التدوينة دي تُسمى إحنا بنشتري راجل
:)
:)

هم يضحك وهم يبكي

بس أنا باختلف معاك في الحل ومعلش يمكن أنا شريحة من الناس المقفلة وانت بتخاطب بالتدوينة دي ناس من سنك ولا مجال للخنقة أكتر ما انتم مخنوقين لكن الحل قاله رسول الله صلى الله عليه وسلم وهو الصوم
أنا شايفة أطباق بتتحدف عليا
:)

طبعا أنا عارفة ان كتير من الشباب عارف الحديث ده لكن هل جربوه ؟؟؟
أعتقد أن الفرج حييجي لما نعمل كل اللى نقدر عليه وربنا عليه كل الأمر

الناس مش بتبقى عايزة تتساهل في زواج بناتها عشان فيه معتقد إن اللي يجي سهل يروح سهل وده فعلا إلى حد بعيد بقى صحيح, وبنشتري راجل لازم يقابلها عودة لمثاليات الأخلاق لأن الواقع خلى الناس تخون بعضها

بس إزدياد العنوسة مخلتش الناس تيسر الزواج ليه ؟
البنات حتخلل جنب أهاليها كده ؟

فيه جروب على الفيس بوك اسمه خليها تعنس من السعودية لمغالاة المهور هناك

ممكن نسميه في مصر خليها تبور
:)
:)

حياة said...

والله كلامك صح ولكن ما الحل الشباب ما باليد حيلة والبنات ما يعرفون ايه الحل فاذا كان رايك هكذا فالعنوسة والشباب الثقافى ليس الحل هل الحل فى المسار وهل يقبل الاهالى فى مصر المحروسة هذا الزواج انت عملت حيرة للشباب حلها يا استاذ
تحياتى

sebofy7alo said...

انت وحشني جدااااااااا والموضوع دة لذيذ اوي وضحكت بجد من لذاذتة
الله ينور عليك
وحشني والله
سلامز

sebofy7alo said...

انت وحشني جدااااااااا والموضوع دة لذيذ اوي وضحكت بجد من لذاذتة
الله ينور عليك
وحشني والله
سلامز

reham said...

Ahmed,thanks..your post is adorable..the heading of your blog has touched my heart.
I just came from a fight..i need now my blog..i haven't used a stone,coz everyone has a mistake...i have used my shoes!
Greetings from Japan,
Reham Hassan

حسن ارابيسك said...

صباح الخير ياخال
الحقيقة ياخال تلك التدوينة بحق جميلة ورائعة وعميقة جداً ولا أخفي انها وبرغم المرارة والسخرية التي تقطر منها بشكل فطري عفوي بشكل خفه دم ولاد البلد عندما يتناولون أوجعاهم ومشاكلهم بشكل ساخر ولاذع لذلك لا أخفي انني إنفلت مني ابتسامات اعقبتها قهقهات عاليه وهي رد فعلي طبيعي عندما تشدني معك إلى قاع المشكلة وهمومهاوتغرقني فيها وبدلاً من أن نبكي نجد أنفسنا نضحك على حال عصرنا او مشاكله أو على حالنا بمعنى أصح
تناولك العبقري هنا يذكرني باللاذع الساخر الكبير أحمد رجب في تناوله لكل هموم هذا الوطن
تحياتي
حسن أرابيسك

اسامه عبدالعال said...

كفيت ووفيت
بوست هايل ياصباغ

mosooz said...

الموضوع جميل جدا بجد
وربنا يوفقك ان شاء الله

همس الاحباب said...

لا حول ولا قوة الا بالله
ولا تعليق بصراحة

dr.lecter said...

هو فيه حل تاني اليوين دول الا الثقفافي لجيل هيتزوج علي روحه

ربنا يكون في عوننا كلنا ويلهمنا الصبر في زمن الفتن والشهوات اللي احنا فيه ده

GeHaD-----(male) said...

يعنى الواحد لما يفكر يتجوز هيضطر انه يفكر كتير
كويس والله

koketa said...

لا حول ولا قوة الا بالله
والله حضرتك عندك حق فى كل كلمة قلتها
ربنا يسترها على الشباب والبنات

aMr tA3LaB said...

كان نفسي اقولك امبارح حلوة بس خوفت تقولي بتجامل وحرنكشات واحلى ما فيها السخرية بتاعتها وبجد نقل واقعي للتطور الطبيعي للحاجة الساقعة

دمت بخير

mostafa rayan said...

طيب والحل الثقافي دة هيستمر لحد امتى
من ابسط حقوق اي شاب انه ديدخل جوة الدنيا مايفضلش واقف يتفرج عليها من برة
تحياتي ليك يا اخي

mostafa rayan said...

استاذة مجدواية
اسمحي لي ان اختلف معك في نقطة
لما الاهالي تتساهل في جواز بناتها مع حد يستاهل هيشيل البنت جوة عنيه
لكن اكم من بنات ادفع فيهم مهر غالي قوي واتبهدلو واتهانو ورجعو لبيوت اهلهم تاني
قال رسول الله صلى الله وسلم
"اقلهن مؤنة اكثرهن بركة"
تحياتي لك

مهندس مصري said...

والله يا بني و اللي راحوا الخليج ما جابوش الديب من ديله برضه
ترجع تدور بتحويشة سنة في الغربة على شقة تمليك تقدر تدفع مقدمها و يكون قسطها حنين بحيث اللي يفضل من مرتبك في السنين الجاية اللي بتدفع فيها القسط يكفيك علشان تشطب الشقة و تجيب الشبكة و تعمل فرح و بقية المصاريف التانية
تفوجئ بأسعار تجنن
و كل صاحب برج يبتسم في وشك و يروح رازعك رقم للمقدم و الأقساط يخليك تلف حوالين نفسك

طيب و بعدين إزاي تخش بيت واحدة تخطبها من غير ما يكون معاك شقة

علشان ما تتعرضش لموقف محرج زي صاحبك

مش عارف يظهر ان الجواز شئ صعب قوي

يا مراكبي said...

وإقرأ أيضا

http://yamarakby.blogspot.com/2009/04/blog-post.html#links

بنوتة مصرية said...

الموضوع كبير اوى ياصباغ
اولا انت بتقول احنا بنشترى راجل كلمة بتتقال بس مش بتتنفذ لا الكلمة بتحصل بس مش معنى كدة انهم هيروحوا يجيبوا كل حاجة وهو زى الباشايعنى مثلا لو هو قصر فى حاجة ممكن اهل العروسة يساعدوا
وكمان ليية رد على كومنت متقال عندك من
مصطفى ريان
يااستاذ مصطفى انت بتقول ان الاهل لما بيقفوا مع زوج بنتهم هو بيحط بنتهم جوة عينة للاسف انا مش معاك خالص
يمكن لانى شفت مواقف كتير جدا ادامى انت عارف مثلا صاحبتى كانت متجوزة عن قصة حب ووقفت معاه وساعدتة جامد وفى الاخر بعد الجواز مطلع عينها مع ان البنت اتنازلت عن حاجات كتير جدا
اما شوف بقى صحابتى اللى مش اتنازلوا عن اى حاجة ازواجهم بيعملوا معاهم اية بجد ازواجهم شايلينهم فوق راسهم
تقريبا زى مابيقولوا الواحد اللى بييجى بالساهل بيروح بالساهل
اكيد مش كل الرجالة
بس اكيد معظمهم

واحد من العمال said...

السلام عليكم ورحمته وبركاته

للأسف كلامك صحيح وتكلفه الزواج أصبحت فلكيه وربنا يرحمنا فى الأيام الجايه بيقولوا حتبقى أصعب
عندك والدى رحمه الله تزوج فى الستينات ب150
جنيه وأنا تزوجت فى التسعينات بعشرين ألف مع وجود الشقه
وأختى تزوجت فى بدايه ألفين بسبعين ألف
ولادنا بق حيتجوزوا بكام ولا مش حيتجوزوا الله أعلم ربنا يرحمنا
لازم يكون فيه حل وهو
إلغاء الفشخره وكل ما لا يلزم علشان ولادنا تعيش بدون الإحتياج للريس برايز
ونعمل إعلان يوجه للأباء والأمهات نقول فيه
عزيزى المتفشخر عزيزتى المتفشخره نرجوكم بلاش فشخره علشان ولادنا وبناتكم .. وبناتنا وولادكم يتجوزوا وميحتاجوش أبداًللريس برايز فى يوم
تن ترارارمم تن تن

وتقبل تحيتى ومرورى
ودمت فى أمان الله

رامز عباس said...

مدونة رامز عباس تنقل لكم خبر وقفه التحرش

Ashraf said...

مدونتك جميلة ياخالو احمد

والبوست فكرته هايله

يهتم بيه جميع الشباب

bos bos said...

عندى ليك هدية فى آخر موضوع على مدونتى بتمنى تعجبك
:))))))))

Soul.o0o.Whisper said...

هو فعلا يا خالو
مشكلة الطلبات الكتير أحد الاسباب

لكن مش كلها
و بصراحة

بصراحة يعنى

من خلال الواقع اللى قدامى و الحالات اللى شفتها


اللى عاوز يتجوز بيتجوز
مفيش حاجة بتوقفه
غنى كان او فقير
تعرف ان فى واحد راح اتجوز مغربية عشان مابيطلبوش مهر باين
حاجة كدا مش فاكره
وهو أصلا يعنى الحمد لله ماحلتوش حاجة
و ربنا ييسرله الجواز من حيث لا يدرى و لا يحتسب

هو بس يسلك نيته
و يسيبها على ربنا
و إلا كانت النوادى و القاعات اتقفلت من بدرى
و لا ايه؟؟؟


ياللا سلام

ليلى فى عالم ادم said...

انا عايزة اقولك حاجة بجد
الحل فى ايد الشباب

انا وجوزى لسة متجوزين جديد ولما اهلى جم يعملوا كدة انا رفضت تماما وقلت لبابا انا بحبه وهاعيش على قد ظروفه مهما كانت

وفعلا احنا بيتنا متواضع جدا وفى حاجات كتيرة اوى جبناها بعد الجواز
واحنا اللى بيضنا الشقة بنفسنا

اللى بيحب حد ممكن يعمل المستحيل عشانه ومايتلككش بشماعة الظروف

Blank-Socrate said...

جاااااااااااامدة قوى يا صباغ
جت على الجرح :)
بس اعمل ايه بردوا هأتجوز لانى باحبها قوى
انا لسه اصلا مأعرفهاش لكن بحبها قوى
صدقنى لو فقط الاهل و الناس بشكل عام تبطل مظاهر كدابه
و فقط من حقهم ان يكون فى شقه مستقرة مش ايجار جديد يعنى
و شغل معقول و انسان كويس محترم ابن ناس كفايه قوى
تخيل لو لغينا معظم الاثاث الغير اساسى و الشبكه و الفرح اللى فى مكان راقى
تقريبا تكلفه الزاوج هتقل للربع
و عجبى

على باب الله said...

زمان كانوا بيقولوا عش العصفورة يكفينا و لقمة هنية تكفي من الحبايب ميه و ها نبني بيتنا قشاية قشاية

يظهر و الله و أعلم أن مشكلة الجواز دية مشكلة مصرية مستوطنة من قديم الزمان ... حاجة كده زي البلهارسيا

Sonnet said...

تحياتى
ادعوك و قراء مدونتك الكرام إلى يوم الكتاب
http://shayunbiqalbi.blogspot.com/2009/04/blog-post_1515.html

عيله مفتريه سابقا said...

العزيز الصباغ

الفكرة اصبحت فى الزيت والدقيق اللى بيعجنوا بيه الجوازة دى
التساهيل كتير وشرا الراجل موجود
لكن شوف
مبدأ اهل العروسه انهم يضمنوا حق بنتهم بعد مبقا لا فى ثقه ولا يحزنون
ومبدأ اهل العريس انهم يلاقوا بنت حلال متطلبش كتير

الموضوع خطير
النقطتين دول لو قرأتهم هتطلع منهم مليون موضوع
والمشكلة الكبرى
ان دول بيقولوا هنتنازل
ودول بيقولوا هنشارك
ووقت الجد
هووووووووووووووووووب ولا كأن

:)