خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

May 6, 2009

عــزيزتى : هيــفاء وهبى


الصديقة العزيزة : هيفاء وهبى ..
إزيك ؟
عندما وقع بصرى لأول مرة على خبر إعلان جوازك فى فى ورقة جرنان الشاندوتشات .. كنت أتمنى أن أكون أحد المعزومين ، فليس بعد عشرِتنا الطويلة وحبنا الطويل وصداقتنا التى أكلت الجزء الأكبر من عمرنا .. من شئ يُراعى ويُصان ..
لكِ الحق فى أن تغيّرى رقم موبايلك .. فربما يكون راجلك الجديد غيور .. وربما يكون قد إشترى لكِ خط إتصالات جديد وأرغمك على إستخدامهُ .. لكننى لا أخفى عليكى أننى كلما عاودت الإتصال ووجدت الهاتف مغلقاً إمتلأ قلبى بحزنٍ كبير .. وفمى بمرارةٍ شديدة
أنا - كما تعرفين - سأتمنى لكِ كل خير وسعادة حتى لو كنتِ من نصيب غيرى .. وحتى ولو سالت دمعتى وأنا أشاهد وعلى الهواء مباشرة الرجل الذى إحتل الكرسى الذى كان مخصصاً لى ..
إنتى تعرفين أننى كنت أختلف عن كل الشباب المحيطون بكِ فى ذلك المجتمع الليلى أحمر اللون .. فأنا الوحيد الذى كان يداعب أحاسيسك برسائل تمتلئ بالحب والإحساس أكثر مما تمتلئ بالفاحشة والغزل الجنسى والدعاوى الحمراء التى كانت تنهال من كل باقى أصدقائنا وزملائنا وومعجبينك ..  وكنت أرى فيكى الروح الجميلة لا الجسد الجميل .. وأرى العيون الرقيقة لا النهد الكبير .. وأرى الحياء المتوارى خلف رقصاتك ولا أرى أردافك وأكتافك العارية و ... و لعلك تذكرين حينما صارحتكِ أول مرة بشعورى تجاهك .. وكيف كانت مفاجأةُ لكِ أن يهتم شخص مثلى بفتاةٍ مثلك ..
فأنا سمعت من أولاد الحتة أن العريس الجديد .. الإيحة الجلدة .. قد أعطاكى مهراً تسعة ملايين جنيه .. أقولها وأنا أضرب كفاً بكف .. أقولها وأنا مكسوف لك فى الحقيقة .. ووشى فى الأرض أمام كل زملائى وكل من كان يعرف بعلاقتنا وحبنا ..
وعرفت من الجرنال أيضاً أن زوجك أسمه "أبو هشيمة" .. يعنى واحد متجوز ومخلف بنت إسمها هشيمة .. طب إيه اللى عجبك فيه ؟ تسيبى واحد "شمورت" وبيحبك وهيتجوزك بطوله ولوحده .. وتاخدى واحد أب وعنده بنت إسمها هشيمة ..  أستغفر الله العظيم
ورأيت صورة الأخ أبو هشيمة فى الجرنان .. أستغفر الله العظيم مش هنتكلم على خِلق ربنا 
لكن لا نستطيع أن نقول عن من تركت واحد مثلى وتذهب إلى شخص يضحك عليها بـ 9 مليون جنيه .. بالتأكيد لا يمكن إلا أن نقول أن "مراية الحب عميا" وخرسا وطرشة وحولة كمان
أنتى تعرفين أننى كنت قد أخترتك من بين عدة فتيات كانت تطاردنى ليل نهار .. ووتعرفين كم كنت أقف بصفك أمام معاملة "نانسى عجرم " الفظة تجاهك .. ووسط إضطهاد "ميريام فارس وإليسا وكل أفراد الشلة .. وحتى البت الجديدة "شيرين" التى إنضمت إلى شلتنا مؤخراً وكانت تظل تراقب علاقتنا حتى تزوجت وسافرت لتنجب فى أمريكا .. وأظنك تذكرين غضبك وإنزعاجك حينما قلت لكِ إنى ذاهب إلى سبوع بنتها.. وكم غضبتِ وإنهارتى وإرتعشت أطرافك فإهتز جسدك فسبب أزمة بين كل شباب المنطقة ..
أما عن التسعة ملايين جنيه الذى ضحك عليكى بهم الأخ الابو نسب "أبو هشيمة" فاسمحى لى أن أتساءل والدهشة تملأ عيونى .. كيف ترضى واحدة فى مثل نجوميتك وجمالك ومكانتك لدى المصريين الذين أصبحوا يعتبرونك أحد أضلاع مثلث الوطن .. كيف ترضى بمثل هذا المبلغ التافه .. طب بلاش أنا .. ده إنتى لو قولتِ يا جواز .. لإنهالت عليكى ملايين العروض من الشباب المصرى المستعد لدفع مبالغ أكثر من الـ 9 مليون جنيه عن طيب خاطر .. ثم أصلا هو تسعة مليون ده ممكن نعتبره مبلغ ؟ إنتى عارفة أقل شاب مصرى دلوقت بياخد كام ؟
ثم لقد رأيت صور قصرك الذى سوف تسكنين فيه .. وحاولت معرفة ما إذا كان تمليك .. أم أن أبو هشيمة قد فعلها للمرةِ الثانية وضحك عليكى بقصر إيجار جديد أو مفروش .. لكن الصحف اللعينة لم تكتب تفاصيل .. أو إنكِ لم تدلى للصحف بتفاصيل عن إذ ما كان قصرك إيجار أو تمليك أو مفروش متعمدة .. وفى هذه الحالة أستطيع أن اجزم أن الأخ هشيمة قد ضحك عليكِِ
ثم تابعت وبكل أسف أخبار حفل زفافك العِرة .. أسف جداً لإستخدام هذا اللفظ .. لكننى لا أجد كلمة أخرى لوصف ذلك الفرح الـ " نص لبّــة" .. الذى حضره 300 شخص أول عن آخر .. وتكلف 50 مليون ..  والنبى ده كلام
إن عدد شباب أصغر ثلاث بيوت فى حارتنا أكثر من 300 شاب .. و كنت أخطط لإن يكون زفافى عليكى يمتد من أطراف القاهرة وحتى وسط البلد .. مروراً بالمعادى والسيدة والخليفة والقلعة والموسكى وباب الخلق ومصر القديمة والجيزة كمان
أعلم أن الزواج هو قسمة ونصيب .. وأعلم أنك لم تُحبيننى .. ولكنك أحببت فيّا شهامة ولاد البلد .. وأحببتينى فقط عندما كنت أبادر دائماً لدفع الحساب للشلة فى المطاعم والكافيتريات .. لكنك لم تقرأى ما بقلبى يوماً .. ليس لإنكِ لا تعرفين القراءة .. لكن لإن ما بقلبى كان مكتوباً بلغة أخرى .. غير تلك اللغة التى يكتب بها الرجال على أفخاذ العذارى ..
صديقتى - أو قولى صديقتى السابقة – هيفا
لقد فقدتِ بزواجك هذا رجلاً من أعظم الرجال .. من أشجع الرجال .. كان سيفطرك حباً وترحالاً فى عالم الشوق .. وسيغديكِ فى أعظم فنادق أوروبا .. وسيعشيكِ على نغمات إرتفاع الطائرات المتجهة إلى بلاد الشمال ..
لكن زى ما بيقولوا الجواز قسمة ونصيب ..
وأنا نصيبى أن أظل ألتهم ساندوتشات الطعمية .. حتى إشعارٍ آخر
لكِ منى خالص التحية ..
أحمد الصباغ

32 comments:

esraa said...

9 مليون دولار
مش 9 مليون جنيه يااحمد
تفرق كتيييييييييير

بدراوى said...

هههههههههههه
تحفة يا ابنى
الا بالحق كلامك ده بعد انترفيوهاه مع عمرو اديب و لا قبل الإنترفيوه
هههههههههههههههههههه
؟

صعبان عليا يا صباغ
خللى بالك من نفسك بيقولوا فى انفلونزا الهيفاء منتشرة اعراضها تصحى من النوم تلاقى رقبتك طولت زى الزرافة و يقولولك مالك رقبتك هيفاء كدة ليه
!!!!
ههههههههههههه

معلش الزواج قسمة و نصيب
بس الصراحة قسمة بيقولوا بت حلوة و
قالتلى انا مستعدة اعمل عملية و ابقى شبه هيفاء بس صباغتوس يرضى عنى

هههههههههههههه

و بهذه المناسبة احب اسمع اغنية
يوم زفافك

اعذرينى يوم زفافك مقدرتش افرح زيهم مخطرش ابداً يوم فى بالى ان ابقى واحد
منهم

جايلك بهنى واقف بغنى

معرفش ليه ايه اللى جابنى غير انى اشوفك
بس و امشى و مش مهم اصعب عليهم كلهم

يوم ما جتلك غصب عنى مقدرتش امسك دمعتى ليه الزمان فرق ما بينا متكونيش من قسمتى
----
الا بالحق هو البوفيه كان ايه
؟!
حتتين جاتوه و ساندوتش بسطرمة
؟!

ههههههههههههههههههههه

مهندس مصري said...

هههههههههههههههههه
بقى إنت سيبت جسمها و ركزت على مشاعرها

لا شاعري يا خال و رومانسي بجد

مهندس مصري said...

ثم ما البنت نفت الكلام ده كله في حوارها مع عمرو أديب
و قالت كل الأرقام دي متفبركة
تحلف لك على المصحف يعني
:)

عصفور المدينة said...

واللي مش عاجبه البوست يعمل إيه
:(

mido said...

ياما قلنالك يا أبو الصبابغ لكن مسمعتش كلامنا ! ياما قلنالك البت دي دحلابة مصدقتش ، البت دي قراشنة و لا انت هنا ، اهي سابتك يا أبو الصبابغ و اخدت الفرفور :D

koketa said...

هو شر البلية ما يضحك
9 مليون دولار فرح
ومبالغ هائل
بس ما جاء من حرام يذهب للحرام
ومتزعلش نفسك ياخالو احمد ان شاء الله يعوضك خير

عاشقه وغلبانه said...

ياحنين ع الوسط يا استك
مش عارفه ايه علاقتها بالموضوع بس اهي نطت في دماغي
ههههههههههههههههههههه
ههههههههههههههههههه

الست فرويد said...

هههههههههههههه
تعرف انك لذيذ وانت بتكتبى كوميديا قوى
مع ان المدونة فيها سخرية فى بوستات كتير وفيها عمق فى بوستات كتير
وفى الحالتين انت رائع
دى اول مرة اعلق عندك مع انى دايما بقرا لك
بس كنت اخرج من غير ما ارد دائما
مش عارفه ليه
بس لما لقيت اول تعليق فاضى ليا
قلت خير فرصة اقولك قد ايه عجبنى شغلك وحسك الصحفى والادبى العالى جدا
تحياتى ليك يا احمد
ودايما رائع ومحافظ على رونق قلمك يارب ان شاء الله

romansy said...

اهلا اهلا بالمعجبين العاشقين
يا سلام على الحب يا اولاد
صحيح هتلاقى زيك فين راجل ملو هدومه وبياكل سندوتشات ومثقف وبيقرى الجرايد
وكمان عارف كل حاجه عنها
يلا بقى متزعلش نفسك
الجواز قسمه ونصيب
بس خد بالك
بقى احسن بقيت الشله تطير

حياة said...

بس تعرف يا ابو حميد ان سندوتش الطعمية الذ مائة مرة من هيفاء وبعدين طعم الطعمية لذيذ ياترى هيفاء بعد الزواج هيكون ايه

تحياتى

دعاء مواجهات said...

امووت واشووف وش ابو هشيمة بعد ما يقرا جوابك دة ويعرف المقلب اللى خدة

دا انت اديتو ع وشة وش كدة ..
ههههههههههههههههههههههه

تفتكر اية هيكون رد فعله ؟؟

ياسر جورج said...

روعة

ست البيت said...

خالو العزيز
تحياتي
كل يوم تزداد المدونة ثراء وتزداد أنت خبرة وكتاباتك نضجاً
حقاً
لكن حذاري يا أحمد ..أن تنفلت في فقاعة الكلام الغير مرغوب فيه ....
بص تزعل ..إزعل مش مهم بس أنا بحترم مدونتك وبحترم فيك أسلوبك الجميل
بس لو سمحت
- حبة أدب-
لم لسانك وكي بوردك شوية
- حبة قلة أدب-
ايه خلاص؟ عاوز الناس تاكل وشي وتقول معرفتش تربي
بجد بجد
بوستات جامدة
بس برضه يتفوك عليك سوووو في بوست هيفا
بفكر اعملها مسابقة
والجايزة .....
اسبها لخيالك...
تحياتي
صحيح يا خالو مش ناويين تعملوا لقاء مدونين قريب في اسكندرية ؟
بما ان الجو جميل
شوفوا ولما تقرروا ابقى قولي
تحياتي للمرة المليون
ودمت بحفظ الرحمن

Ahmed Talk said...

كل شئ قسمة ونصيب وربنا يعوض عليك باللي أحسن منها

Rania said...

وهو ده الحب الحقيقى
و ابقى طمنى عليك و حاول تفتكرنى
و اه يا فن

بجد البوست جامد طحن و الله
تحفه

ماجد said...

ملعووووووووووووووووبة
ههههههههههههههههههههههههههههههههه
انت دمــــــــــــــــاغ

يا مراكبي said...

سيبك منها وأنا أجوزك ست ستها

همس الاحباب said...

ده مرض ومنتشر فى المعادى حب هيفاء ولا ايه يا جدعان
وبعدين يا صباغ بما انها صديقتك ليه ما عزمتهاش مرة على البورصة
ده انت كنت شوفت شباب مصر من اسوان لاسكندرية فى انتظارك على البورصة
ههههههههه
معلش يا صباغ هى الخسرانة
وبكرة تندم
هههههههه

أحمد سعيد بسيوني said...

بجد

انت جامد

ياد يا شمورت

Bola 7elmi said...

ههههههههههههههههههههههههههههههههههه

دا انت حكايه أحمد ,,

بس بجد مش عارفه حالها قلب إزاي تخونك .. هو في ناس بالقسوه دي والماديه دي ..
بس بردو احمد المبلغ مش شويه دي دولارات دولارات مش بتلعب يعني ..

..

جه فـ بالي دلوقتي اغنيه
" الله يعوض علينا " بتاع المبدع ههههههه ايهاب توفيق

م علينا المهم .. وتستمر الحياه
وطظ فيكي يا هيفا




وأنا نصيبى أن أظل ألتهم ساندوتشات الطعمية .. حتى إشعارٍ آخر


" الدنيا دواره أحمد يا صباغ " ومسيرها تفتقر .. حق دعوات المصريين الغلابه هههههههههههههههه




بجد توبيك حلو جدا جدا جدا

عاشــــــ النقاب ـقــــة"نونو" said...

هههههههههههههههههههههههههههههه
طب كل
كل الطعمية هتبرد

صباح الصباح said...

هههههههههههههههه

خليك بقى يا خال مع سندوتشات الطعمية زى حالااتنا.. معلش اعتبرة قلب وراح

ههههههههههههههههه

فتاه من الصعيد said...

بجد انا شايفه ان البت انضحك عليها فى الجوازه دى...بس كل شىء نصيب...ويمكن خافت لتعنس ولا حاجه وقالت ضل راجل
خيرها فى غيرها
دمت بخير....تقبل مرورى

الجواز و سنينه said...

فعلا هيفا دى طلعت هيفا
بقى تسيب شب ورور زيك كده و تبص لابو هشيمه و تبيع نفسها ب 9 مليون دولار طيب ييجى ايه ده جنب الربع جنيه قصدرى ربع مليار اللى كنت هاتديهولها
دى خاينه يا راجل
كويس انها بانت على حقيقتها
و الف هنا و شفا السندوتش
هات حته بقى

ايمان مجدى said...

اول زيارة للمدونة
وحقيقى جميلة جدا ما شاء الله
بالنسبة للخسارة فهيفا اكيد الخسرانة وحضرتك الكسبان
كسبت السندوتشات وال9 مليون جنيه كمان ودول ما يتعوضوش بسهولة وخاصة السندوتشات
تحياتى

أبو أسامة said...

معلش بقى ياعم أحمد

الفلوس بتغير الناس

Mohamed said...

والله انت برنس وخيالك جامد اوى
وبالتوفيق
Fkrny

Ahmed Al-Sabbagh said...

مساء الجمال والأنوار
على أحلى ناس فى منطقة شمال أفريقيا التعليمية

اسراء
كماااان ؟؟

بدراوى
الكلام ده اثناء الانترفيو
:))

مهندس مصرى
من يومى يا باشمهندزز


عمى وأستاذى عصفور المدينة
مقدرش على زعلك طبعا
وما تقلقش
هما حبة لسعان وبيروحو على طول

ميدو
انا كدة ما بسمعش النصيحة
:(

كوكيتا
ياللا ادعيلى بقى ربنا يكرمنى

عاشقة وغلبانة
يا حنينة عالمناخير يا نضارة

الست فرويد
هو رعم انه مش أول تعليق
بس بعد كدة مفيش خروج من غير تعليق
هو دخول المدونة زي خروجها

رومانسى
اه فعلا هتلاقى زيى فين راجل بياكل جرايد ويقرا طعمية
:))

حــياة
فعلا خصوصا لو كان ساندوتش طعمية بالسلاطة

دعاء مواجهات
متهيألى ممكن يمسح رقمى

ياسر جورج
ده من زوقك وجمالك

ست البيت
اعتقد بعد كلمتك ان المدونة بتاعتى بتزداد (ثراءاً) ممكن هيفاء تفكر مرة أخرى
:))

أحمد تووك
ادعيلى بقى احسن اخوك محبط

رانيا
حاضر هديكى ميسدات من جوة السجن

ماجد
ياريتنى كنت محفظة مش دماغ

يامراكبى
طب ايدى على جيبك قصدى كتفك

خالد همس الاحباب
مين قالك انها ما جتش عالبورصة ؟

أحمد سعيد بسيونى
ألا يعنى ايه شمورت صحيح

Bola 7elmi
ويعنى ايه دولارات ما احنا مش بنلعب يعنى

عاشقة النقاب
ههههههههههههههههههه


صباح الصباح
اعتبره قصر جراح
اتهد عالبانيه

فتاة من الصعيد
ايوة الجواز سترة بردو

الجواز وسنينة
بلاش ورور دى ليسمونى فجلة
:)

ايمان مجدى
لا ماهى ما كنتش هتاخد الساندوتشات

أبو أسامة
مش كدة والنبى ؟

محمد
ربنا يكرمك
الا انت عملت الاختراع ده ازاى


شكرا يا جماعة ربنا يكرمكم
شربتوا حاجة ؟؟

hager za3bal said...

بوست في الجووووووووووووووووول بجد

سما أحمد said...

حقيقي روعه وعنجد اسلوب مشوق يجعلك تتابع للاخر

لكن الحمدلله انها بانت على حقيقتها قبل متلهف القرشين
هههه
يسلموووو
نقد ساخر وطريقة سرد روعه
و9 مليون دولار حقيقي ممكن يعملوا كتير ومكنش له لزوم يتعب نفسه ويدفع كتير انا حتى سمعت انها مو طماعة ابداا وبتعطي عواطفها بسخاء لاي كان
معلش ارضى بالنصيب

مصرية للأبد said...

هى يابنى الخسرانه ألا صحيح ماتعرفش الباشمهندس أبو هشيمه بيشتغل ايه ولا من عيلة مين انت عارف الحاجات دى مهمه دا نسب برضه والست سابت ناس كتير علشانه