خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

May 5, 2009

أسئلة تحت خط الوهــــم


يا ترى لو جت مصر نوع من الانفلونزا إسمه أنفلونزا البحر الأبيض المتوسط .. هيعدموا البحر الأبيض المتوسط ؟ وياترى لو جه مرض "سعال جبال البحر الاحمر" .. هيعدموا الجبال ؟ وياترى لو جه "مرض إنيميا الخلايا المنجلية" .. هيعدموا الخلايا المنجلية ؟ ما هو اتضح ان حكومتنا بتفهم إن مسبب المرض هو الكلمة التى تأتى بعد إسم المرض .. يعنى لو قولت "دوحسة صوباع أحمد الصباغ" ده معناه إن أحمد الصباغ ناقل لمرض الدوحسة

ليه رئاسة الجمــهورية ملــهاش سن معاش ؟ مش رئيس الجمـــهورية ده مفروض موظــف حــكومة ؟ وحتى تبقى فرصــــة للإهــتمام بولاده ورعايتهم .. أو يجيله عقد عمل فى أى دولة تانية

هل دبح كل الخـــــنازير فى مصر معناه إن مـصر مش هيجيلها انفلــــونزا خنازير ؟ مع إن الفيرس هو فيرس بشرى وليس فيرس خنازير ؟ وهى ايه أصـــلا وسائل نقل المرض ؟ الخنازير ؟ والا الوافدين من برة ؟ والا مع الهوا ؟ والا الفيرس موجود دخل حدود البلاد وناقص بس إنه يتحور ؟

ليه أقباط المهجر ساكتين لحد دلوقت وما قالوش إن فى فتنة طائفية لما مصر بدأت تدبح فى الخنازير ؟ مع إنه كفاءة وما بيفوتوش فرصة ذهبية زى دى

كام واحد من المصريين مقتنع إن مصر مفيهاش أنفلونزا خنازير حتى الآن ؟

ليه موضوع إيمن نور وجميلة إسماعيل حصل فيه كدة ؟.. إعلان طلاق ثم قالوا لأ ده إنفصال بس مش طلاق ثم قالوا ان جميلة اسماعيل استنت ايمن عند المأذون وماجاش ورد أيمن وقال ما انا اللى اطلق مراتى برسالة موبايل وبعدين الموضوع توارى من المانشيتات والصفحات وكأننا شعب من الببغاوات التى تهيص فى الزيطة وتطبل وراء الزفة

وهو أصلا أيمن نور ده بطل قومى وتم تلفيق تهمة التزوير له بواسطة الحزب الحاكم لتجرئة على ترشيح نفسه فى الانتخابات ضد مبارك ؟ ولا هو فعلا مزور ويستاهل السجن ؟ طب لو هو مزور ويستاهل السجن إزاى إلتفت كل الجماهير دى حواليه ؟ طب لو مش مزور ومظلوم طب الشيخ خالد الجندى واخرون اللى قالوا انهم شافوا بعنيهم امضائتهم متزورة مع انهم قالوا لإيمن نور لأ مش هنشارك فى الحزب ؟ طب لو دول كدابين (منهم دعاه جدد ولعيبة كورة ومذيعين وغيرة ) ازاى الناس لسه بتعتبرهم شيوخ وبتسمع لهم ؟ فين الحقيقة

ليه المنتقبات لسه لابسين نقاب رغم الحملة الشعواء اللى عاملها كل من هب ودب ضدهم ؟ وليه العيال لسه بيتحرشوا رغم كل الهيصة الإعلامية ضد التحرش ؟ وكام واحد سمع عن الوقفة الاحتجاجية اللى اتعملت ضد التحرش ؟ وكام واحد اتوعظ منها ؟ وما هى نسبة تأثير الوقفة دى على توعية الشباب المصرى ؟ وإشمعنى اتعملت فى المقطم ؟ هو المقطم بيحصل فيه تحرش كتير ؟

ليه جرنان الشروق عمل كدة فى إيمان عبد المنعم ؟

كتب المصرى اليوم إنه حصل على انفراد " تفاصيل الخطة اللامركزية السرية للحكومة لإدارة إنتشار الفيرس الجديد .. ألا هو يعنى إيه خطة لامركزية سرية ؟

بعد ما وزير التعليم قال إن من حق العيال التلامذة ما يرحوش المدارس فى حالة ظهور إنفلونزا الخنازير فى مصر .. كام تلميذ يتمنى دخول المرض ؟

هو أنا لوحدى اللى مش عارف إجابات الأسئلة دى ؟ ولا فى حد تانى ؟
أحمد

15 comments:

Ahmed Talk said...

لا تقلق اخي انا كمان لا أجد إجابة لهذه الأسئلةوغيرها

Diyaa' said...

تعليق بسيط
هو مش هيبقي بسيط أنا عارف بس هحاول
القطرة بتاعة التجنيد كمان مبوظة عيني فالدنيا عندي شيش بيش حالياً :(

بص يا صباغ
أولاً..الأقباط بتوع المهجر مش فوتوا فرصة :) دي وصلتني من مايكل ..عايزين يشتكوا لأوباما

ثانياً..مدة صلاحية زعماء العصابة في مصر بتنتهي بالوفاة بس

ثالثاً..مش معني إن في مصر مفيش أسلوب منهجي سليم محترم لمواجهة الأزمات إن إعدام الخنازير غلط...بالعكس ده هيخفف من نسبة إنتشار المرض في مصر وبعدين مش من قلة أنواع اللحوم الناس تاكل خنازير اللي هي حرام أولاً وقذرة ثانياً

رابعاً..واضح إن موضوع أيمن نور من زمان فيه لعب كبير والتوكيلات اللي اتزورت دي مش أيمن اللي عملها لأنه مش مغفل أوي كده عشان يضرب توكيلات بأسامي ناس مشهورة وحزبه نازل إنتخابات ضد حسني وأكيد هيتحط تحت المجهر

خامساً مش من حق أي حد يتدخل في إنفصال فلان عن فلانة بس الموضوع اتعمل ككارت إرهاب لأيمن عشان يتحرق سياسياً ويبطل تنطيط بقي ويريح قلب جيمي في خطة التوريث

سادساً..كل اللي قلته قبل كده ومبطل قراية فما بالك لو قريت
القراية في جرايد بلدك هتجيبلك هسس يا أحمد

اقلع عنها :))
سلام

بدراوى said...

أحمد بخصوص موضوع أقباط المهجر
هما تدخلوا و قالوا لازم نقدم شكوى لأوباما
!!!
اما بخصوص وزير التعليم
فمش هو اللى قال ده وزير الصحة
و بعدين كمل التصريحات وزير التعليم
يعنى البداية من الجبلى
--
بخصوص الخطة السرية
صحيح انا لسة مقرتش التقرير
بس استغربت
هههههههههه

سرية ليه خايفين لا الفراخ تأخذ خبر
!!!
هههههههههههههههههههههههه

اما بخصوص ايمن نور
زور و لا مزورش ده زور فى توكيلات حزب
و بس
لكن الدور و الباقى على اللى زور انتخابات و مجلس شعب بيحكم بالباطل و غيره
و بعدين فين اللى قتلوا و سرطنوا الشعب و جرايمهم

بخصوص فيروس انفلونزا الخنازير
هو على باب المطار
مسنى اشارة من الكبارات
عشان يخش و جاى معاه اخوه الأهبل المتحور
عشان ينشر الموضوع
:-(

نبض اسكندرية said...

احمد هو لغاية امتى هنفضل نسأل ومنلاقيش حد يرد علينا؟

ولو لقينا حد رد بيكون ردة مهاترات

امر مؤسف للغاية

وأنما الحكومة تقاد من الخلف

لكن الحمدلله ولا طايلين امام ولا خلف

:((

يا مراكبي said...

قصدك أسئلة فوق خط الوهم .. فوق الخط مش تحته

أهم سؤال هو الخاص بالدوحسة بتاعة إصبع أحمد الصباغ

ده موضوع خطير جدا .. إوعي تكون موجود في مصر لو ده حصل .. هيصدر قرار رئاسي ببترك على طول

مهندس مصري said...

و هل إنت عايز أجوبة؟
أصل الأسئلة دي جوابها يطول

aMr tA3LaB said...

يا صباغ باشا طبعا مش ولحدك عندنا في التاريخ في احداث ليست لها اسباب وهناك اخبار ليست لها اسباب وفيه اسئلة ليست لها اجابات الكلام ده في التاريخ
فما بالك في مصر

وهي ام التاريخ

يعني مثلا انت تعرف دلوقت مين الي ضرب البرجين هو اسامة بن لادن ولا اليهود ؟ طب لو الي ضربه اسامة ليه 4000 يهودي يوميها مرحوش البرج طب لو اليهود ليه امريكا مضربتش تل ابيب

مثلا

هو صحيح الشيعة من نسب علي بن ابي طالب ولا هو ادعاء تقدر تثبت او مين هي شخصية محمد بن جعفر الصادق في الشيعة يعني يقربلهم ايه
طب يا ترى كامب ديفيد كانت معانا ومع العرب ولا ضدنا

حط اسئلتك على الاسئلة التاريخية الكتييييييير جدا جدا وحاول تجاوب مش هتلاقي ريح دماغك شوي انت في مصر

تحياتي

صمت المشاعر said...

b لا طبعا مش لوحدك اللي مش عارف اجابة الاسئله دي

تقريبا الشعب المصري كله مش عارف اجابة الاسئله دي وانا اولهم


بوست رائع ضم موضوعات كتير اووووووووووي وحقائق كتير اووووووووووي


دمت بكل خير

حياة said...

طبعا مفيش حد لاقى اجابة على هذه الاسئلة حتى الحكومة التى به جهبذة الاجهاز على ما تبقى من مصرولكن انهم راحلون وستبقى مصر

تحياتى

سوبيا said...

ياريت لو لو لقيت اجابات
فوق خط الوهم
تقولي

علشان انا مش عارفة

عاااااااااااااااااااااااااااا

Blank-Socrate said...

صباغ
بكل اسف
احنا فى حاله من اللاوعى
الناس الكبيرة اللى المفروض نثق فيها و توجهنا كلهم فى فساد و جهل و انانيه
--------------
ربنا يستر على البلد

esraa said...

للأسف انا كمان معرفش

Anonymous said...

:D
مش عارفه اعتقد ان التعبير ه اكتر حاجة مناسبة للبوست
بجد عارف اسئلة ملهاش اجابة غير كده

على باب الله said...

انا كمان مش فاهم

في الحقيقة المصريين إتعودوا على حالة عدم الفهم دي و تجلت بشدة في الفيلم الرائع ( شحاذون و نبلاء ) في جملة قالها صلاح السعدني لما خيروه بين الحقيقة و راحة البال

" قال : " إحنا أخترنا راحة البال

---

أبو أسامة said...

الحقيقة أنا كمان مش عندي أي إجابة خالص على أي سؤال منهم

وعلى رأي علاء مرسي

محدش فاهم حاجة خالص