خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

May 9, 2009

يورانيــــوم مَصــرى مِتخصّــب


يتوافر الآن بالأسواق يورانيوم مصرى مُخصب .. صالح لجميع الأغراض النووية والغذائيــة.. تم تخصيبة بواسطة ذكور هجينة ممتازة وبأحدث تقنيات التخصيب الموصى بها فى مزارع الماشية العالمية ..
كان هذا هو أول تصور أتى إلى نافوخى عقب تناقل الصحف للخبرالذى روجته صحيفة إسرائيلية عن حيازة مصر ليورانيوم مخصب .. كنت أظنها مزحة .. لكن طلعت إشاعة ، لذا فإن الموضوع يحتاج لإشعة مقطعية .. إو إختبار خصوبة فى معامل البرج .. يقال أن اليورانيوم المخصب هو بديل جيد للفسفور المشع المتواجد فى الجمبرى الذى يراه المصريون فى التليفزيون .. ويحتفظ به البعض على سيديهات ..
بينما أكدت "وداد" جارتنا عقب سماعها عن حيازة مصر ليورانيوم مخصب أنها ستتوقف عن تناول اللحوم ورفعت إيديها للسماء للدعاء على الحكومة التى سممت الماء والغذاء .. بينما قال الحاج "عبد الحكيم" إن فلوس اليورانيوم هتروح هدر زى ما راحت فلوس البترول والسياحة .. فى حين كان تعليق "عمرو سبانخ" وهو شاب روش من المنطقة : أهو حاجة طبيعى أحسن من الفياجرا اللى سممت جتتنا ..

هذا على مستوى الناس البيئة ..
بينما على مستوى الوزراء والمسئولين فإن الخبر كان له ردة فعل أخرى تماماً .. فبمجرد إنتشار الإشاعة فى الجريدة حتى تنافس المسئولين فى حجز حصتهم من اليورانيوم المخصب ، ومنهم من عرض رشوة ضخمة من تحت الترابيزة لإستقطاع كمية أكبر من زميله الوزير التانى ..

فى حين إنتشرت إشاعة فى هيئة الأبحاث المشعة عن أن مصر ستستخدم هذا اليورانيوم فى أغراض سلمية أو كدهان للتسلخات أو كبديل جوزة التيب أو محاولة إستغلاله فى علاج حصوة الكلى .. بينما إشيع أن وزير التضامن الإجتماعى قد حدد حصة من اليورانيوم المخصب لكل مواطن مقابل مبلغ "رمزى" .. لكن تم تذكيره بأن "رمزى" قد توفى منذ أعوام .. فقرر أن تكون الحصة مقابل مبلغ "غالى" .. فأعترض وزير الإقتصاد بإعتبار أن اليورانيوم هو مال عام لابد أن يوضع تحت تصرف الدولة ويتم تخصيص وزارة تحت إسم "وزارة شئون اليورانيوم" ..

فى حين وضعت وزارة الصحة فوراً خطة لعلاج إدمان اليورانيوم .. ومشاركة جمعيات حقوق الإنسان لمكافحة شم اليورانيوم تحت كوبرى الملك الصالح ..
كما بزرت إشاعة على الصعيد الدولى تزعم رصد الأمم المتحدة لظاهرة غريبة إنتشرت فى تلك البلد العربى الفقيروهى ظهور كميات هائلة من اليورانيوم المخصب فى الأسواق المحلية .. وتصدير فائضاً هائلاً إلى الخارج ..

ملايين الأطنان من اليورانيوم المخصب بعد أن كان الحديث عنه يكاد يكون بالجرامات او الملليجرام ..
تسألت كافة وكالات الأنباء العالمية والقوى المحركة للرأى العام العالمى عن كيفية تخصيب هذه الكمية الضخمة من اليورانيوم فى تلك البلد الفقيرة .. الإجابة لم تكن لدى وزارة البحث العلمى أو هيئة الطاقة الذرية .. وإنما إحتفظ بها سراً المركز القومى لدراسة أسباب الكبت الجنسى فى البلاد

تشرب يورانيوم ؟
بهذه الجملة الغريبة إستقبلنى عم سيد صاحب المقهى بصوت منخفض أقرب إلى الهمس
يورانيوم ؟؟ يورانيوم إزاى يعنى ؟؟
زغدنى عم سيد وهو يجز على سنانه .. " وطى صووتك يا أخى ما توديناش فى داهية .. ده حبة يورانيوم معتبر جولى من واحد حبيبى .. وأنا ما بعزش عنك حاجة"
"يورانيوم إيه بس يا عم سيد .. إنت عرفت منين إنه يورانيوم"
"ياجاهل إسكت ما تقولش كدة .. ده ريحته يورانيوم محوج ممتاز صنف أصلى .. أنت عبيط ياض ولا إيه "
" وإنت عرفت منين يا عم سيد ريحة اليورانيوم "
إكتفى عم سيد بهذا القدر من الحوار .. وأنهاه بنظرة إمتعاض وقرف
" بطل غلبة يعنى هتشرب يورانيوم ولا لأ"
إبتسمت وقولت له : شكراً .. هاتلى حلبة
أحمد الصباغ

15 comments:

Ahmed Talk said...

بيقولك لو شربت حبة يورنيوم مدوبين في شوية مية كل يوم الصبح صحتك تبقي تمام وتقيك شر أنفلونزا الطيور والخنازير وجنون البقر وسرطان السمك واي حاجة وحشة

ولو استمريت علي كدة إن شاء الله ممكن تشع وتبقي منور ومتحتحش كهرباء في البيت وتوفر

بالتوفيق

koketa said...

ايه ده هى مصر تطورت ولا ايه

بدراوى said...

ههههههههه
حلوة يا صباغ
قال تخصيب قال
هههههههههههه
مش بقولك اخرتنا التخصيب اللى بيبوز خطط تنظيم الأسرة
ههههههههههههههههههههههههه

بكره نلاقى انفلونزا اليورانيوم

إيناس حليم said...

ههههههههه
كان المفروض يا خالو تكتب في الآخر.. وبعدين صحيت من الحلم على دش ساقع من ولاد اختي
:))

تحياتي

لورنس العرب said...

يورانيوم مخصب ايه بس
على فكره
انا ملاحظ ان كل اللي بيمشي في الموضوع ده بتكون بلده مش لائيه تاكل اصلا
يعني ايران عامله مفاعل وبتطور محطات تخصيب اليورانيوم والشعب هناك حالته نيله
نفس الكلام في الهند وباكستان وكوريا الشماليه
احنا بأه معندناش يونيوم مخصب وحالتنا بردو نيله

Soul.o0o.Whisper said...

الدور الدور الدور الدور
الحرب ياللى عليكى الدور

................


و القادم أحلى

ست البيت said...

اقولك الحق ...بايخة وشبة بتاعت انفلوزنزا الخنازير
بس الأخيرة أخلي

tamer.sala7 said...

عندنا بقي اليورانيوم غلي علشان المصيفين


وكل البوابين بيتاجروا في اليورانيون للعيال السيس بتوع كوبري ستانلي وشارع خالد ابن الوليد وصيادين السمك اللي مفيش عندهم ضمير بيصطادوا السمك باليورانيوم بدل الدود وعاملين حجة ان الحكومة مانعة الصيد في شهر مايو ويونيو وبيبيعوا السمك ابو يورانيوم بضعف ثمنه واخر مرة اشتريت فيها سمك كان من غير يورانيون بس انا غلست علي الراجل واخدت منه سمكة واحدة باليورانيوم ومن ساعتها كل ما ادخل الحمام البول بقي لونه وريحته كلهم يورانيوم

كويس انك شربت حلبة

الكلمة نور said...

لو معندكش نووى
يبقى استرجل
وخصب يورانيوم

مهندس مصري said...

و بدل ما نقول اللي ما يشتري يتفرج
تبقى
اللي ما يتخصب يتنضب
;)

AMAL said...

هو ينفع اليورانيوم على غيار الريق

على باب الله said...

هههههههههههههه

يخرب بيت سنينك

esraa said...

ههههههههه
انا اول مره اسمع عن الاشاعه دي
طب بأمارة ايه يعني
قال يورانيوم قال

Ahmed Al-Sabbagh said...

يا مساء الجمال والجودة على أحلى أصحاب فى الدنيا

أحمد تووك
مفيش مشكلة من تعاطى اليورانيوم بس اخاف من التخصيب !

koketa
طبعا تطور طبيعى

بدراوى
ايوة وبكرة نخلف يورانيوم

ايناس حليم
لا ما انا قولت ايناس تكتبهالى
:))

لورانس
فعلا عندك حق
مع ان اللى يحاتجة البيت يحرم على اليورانيوم

Soul.o0o.Whisper
صباح التفاؤل

ست البيت
هى مين دى ؟

تامر صلاح
هههههه
صباح اليورانيوم المشع يا صديقى

الكلمة نور
ههههههههههههه
جامدة اوى

مهندس مصرى
أو
اللى ما يشترى يتخصب

Amal
لأ ممكن يعمل قرحة يورانيوم

على باب الله
:))
الله يكرم أصلك

Esraa
وآخر مرة هتسمعى عنها
:))

نورتوا المدونة كان نفسى أعزم عليكم بيورانيوم بس العين نظيرة واليورانيوم مشع


أحمد

مواطن مصري said...

ههههههههههههههه

بكرة يعملو شيشة يونرايم


تحفة

البوست