خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Jun 3, 2009

جمهــورية مصر الأوباميـــة

شعور رهيب بالمهانة والذل إجتاحنى وأنا أقف اليوم فى وسط الميدان الواسع أتابع إجراءات التنظيف والتلميع التى تُجرى على قدمٍ وساق ، وجموع المسئولين والظباط ولفيف من نواب الشعب الذين لم نراهم أبداً على الطبيعة ، يهرلون خلف العمال لمتابعة كفاءة النظافة والعمل ، ولودر ذو حامل يرفع كائناً بشرياً يقوم برش ودهان جسم الكوبرى باللون البرونزى اللامـع ..

ليست هذه نوبة نظافة أُصيبت بها الحكومة ، ولا صحوة ضمير مفاجئة أتت للذين شوهوا مصر وجعلوها عبرة لمن يعتبر ، ولا حالة شفقة تجتاح ذوى المناصب تجاه المواطن الذى "يكح جاز" و يتنفس " بلك أسود" .. وإنما
هى إجراءت إستقبال الرئيس الأمريكى الجديد "باراك أوباما" فى زيارته للقاهرة ..

نعم .. الرئيس الأمريكى "باراك أوباما" الذى أعلن فى أول يوم لترشيحه صراحةً " أنا صديق إسرائيل" .. والذى أتى ليستكمل مسيرة دموية بدأها سابقــوه فى فيتنام وأفغانستان والعراق والسودان ، ولكن ببساطة فإن الرئيس الجديد " حب يعمل تغيير" .. ويضع السم فى العسل .. بدلاً من تقديمة سماً خالصاً نقياً مصفى كما كان يفعل سابقــوه ..
أراد أن يداعب مشاعر ضحيته – اللى هو إحنا – التى أصابتها "هيستيريا الحرية الأوباميــة" المزعومـة منذ توليه الحكم  ..
زاطـت مصر زيطة ليست لها مثيل ..
وزاط العرب والمسلمين بهستيريا أوباميــة مجنونـة ..
وزاط العرب والمسلمون فى نوبة هيستيريا أوباميــة ..
وأعلن البعض أن رئاسـة أوباما نصرةً للإسـلام والمسلمين ..
وأطلق عليه البعض " الرئيس المسلم " مخدوعـين فى "حسين" التى تتوسط إسمه ..

نعم .. تتدفق فى عروقى دماءاً تغلى ، وأعصابى محروقـة مهترئة .. وأنا أرى مصر تصل لتلك الدرجة من العشوائية والغوغائيــة ، وتصبح بحق ربنا "تكيــة" وليست جمهورية ..
تكية .. بسير بكلمة ناظرها .. فى ظل غياب صاحبها .. تقف بإشارة من يد الناظر .. وتنام عشرات السنين بإشارة أخرى ..

نعم .. لا يستحق المصرى أن يرى شوارع مرصوفـة وجميلة ، ولا كبارى نظيفة مدهونة ، و لا حدائق منسقة وزاهية .. ولكن يستحقها فقط المسئولون حين يمروا عليها .. ويستحقها سيد العالم وتاج رأس العرب .. السيد أوباما

المأساةُ هائلة وفادحــة .. ويمكنك أن تدرك حجمها حينما تعلم أنهم يرصفون الطريق رايح فقط ، ويتركون " الجاى" قذراً ومليئاً بالمطبات والزبالة لإن الرئيس أوبما لن يمر به ..
يدهنون جسم الكوبرى من جانب واحد لإنه الجانب المُعرض لـ نن عنيين الرئيس الضيف .. أما الجانب الآخر الذى لن يراه سوى المواطنون .. فالخرى والبول والرائحة القذرة هى المتاح فقط لـ نن عنين المواطن .. كفاية إنها بتشوف أساساً

نعم .. نحن الشعب المصرى الذى يلتف كل ليلة حول "قناة المحور" فجعلنا لمصر "دوراً محورياً" .. جعل أوباما يختارها ليلقى خطابه للعرب والمسلمين من منارتها .. وكنت أتمنى أن يمر أوباما من "أول المحور" ليتنسم الرائحة القذرة التى هى عبارة عن خليط من نواتج دبغ الجلود ومقالب الزبالة ومزارع الخنازير والتى تتوارد وفيرة إلى رئات المصريين ..

نعم .. أخذتُ وأخذَ معى ألألاف والملايين من العاملين بالشركات فى وسط البلد والجيزة والقبـة .. أخذنا الخميس أجازة .. حتى يكون الرئيس الأمريكى فى مأمن من شرورنا وأشكالنا الضالّة التى تقطع الخميرة فى البيت .. من فرحتى بأجازة يوم الخميس .. وتعبيراً عما يجيش بصدرى تجاه الزيارة الأوبامية للتكية المصرية أفكر فى تنظيم مسيرة سلمية لأبناء شركات وسط البلد رافعين لافتات مكتوب عليها " كلــــنا بنــاخــد فــيها " .. لأ ..  بناخد أجازة يعنى فى شركات وسط البلد ..

نحن دولة لا تُحكـم بالقانـون ولا يسيطر عليها نظام ولكن تكــية يحكمها زمرة من " نظـّار العزبة" .. وناظر العزبة حين يستقبل ناظر عزبة أخرى من حقة أن يطرد بعض الأشكال الضالة من عزبته .. ويعطى الفلاحين أجازة يوماً حتى ينعم "الناظر الضيف" بهدوء العزبة..

نعم .. يأتى أوباما وتأتى معه أنفلونزا الخنازير إلى مصر ، وهى - لو تعلمون - جزء من كل ، وياليتها تقف على أنفلونزا الخنازير ..
سيأتى أوباما ويأتى معه المزيد من التطبيع مع المحتل الصهيونى ..
ويأتى أوباما وتأتى معـه مزيد من التحكمات والتدخلات الأمريكية فى شئون بلادنا العربية ..
ويأتى .. وتأتى معه إشادة بالديمقراطيــة المصرية ، وترحيباً بالتوريث ، وذمّــاً فى المعارضـة والإخوان المسلمين والتيارات الدينية ..

يا مرضى الحرية الأوبامية أفيقوا ..
فما أوباما إلا "بوش" آخر ، و"كلينتون" آخر ، و"نيكسون" آخر ..
وما هو إلا وجـه وسيم من وجوه الإخطابوط الكاسر الذى يلف عالمنا العربى المنكسر بأصابعـهِ الملوثة بدماء أطفالنا ونساءنا فى القدس وكابول وبغداد ..

ليت لدينا "شيخ إمام" آخر ليغنى مع عم "نجم"  لـ أوباما ، ما غناه لـ نيكسون عندما زار مصر عام 1974
شرفت يا نيكسون بابا يا بتاع الووترجيت
عملولك قيمة وسيما سلاطين الفول والزيت
فرشولك أوسع سكة من راس التين على مكة
وهناك تنفذ على عكا ويقولوا عليك حجيت
ما هو مولد ساير داير شيلاه يا صحاب البيت
جواسيسك يوم تشريفك عملولك دقّة وزار
تتقصع فيه المومس والقارح والمندار
والشيخ شمهورش راكب عَ الكوديا وهات يا مواكب
وبواقي الزفة عناكب ساحبين من تحت الحيط
ما هو مولد ساير داير شيلاه يا صحاب البيت
عزموك فقالوا تعالى تأكل بامبون وهريسة
قمت انت اكمنك مهيف صدقت ان احنا فريسة
طبيت لحقوك بالزفة يا عريس الغفلة يا خفة
هات وشك خدلك تفة شوبش من صاحب البيت
واهو مولد ساير داير شيلاه يا صحاب البيت
خذ مني كلام يبقى لك ولو انك مش حَ تعيش
لا حَـقول أهلاً ولا جهلاً ولا تيجي ولا ما تجيش
بيقولو اللحم المصري مطرح مابيسري بيهري
ودا من تأثير الكشري والفول والسوس أبو زيت
واهو مولد ساير داير شيلاه يا صحاب البيت
صدقونى الموقف صعب عليَّّ ..  وأنا أرى بلادى لا تستيقظ من ثباتها العميق ولا تقف على رِجل واحدة إلا لتقوم بـ " تسييق" الشوارع لأجل زيارة الرئيس الأمريكى ..

أحمد الصباغ

12 comments:

بن آدم said...

السلام عليكم
لما كان مسؤول كبير ييجى عندنا فى الأقاليم ويجددوا الشوارع والممرات اللى حواليها كان الواحد بيقول لنفسه على الأقل زمان القاهرة حلوة بما انهم فيها - لكن مبدأ التدليس والغش والخداع بادئ من ضغير لكبير لأكبر منه
لكن أنه دوله تدلس على واحد حتى لو كان رئيس أكبر دولة فى العالم دى قمه المهانة للأسف مقالك خلا الواحد يحس أد اييه بقال صغيريييييييييين أوى

بدراوى said...

المقال ده احسن مقال قريته فى موضوع اوباما
بجد مش بهزار

بجد انت قولت كل كلامى يا صباغ باشا

ده انا مرارتى مفقوعة اووووى
من اللى بيحصل

حاجة وسخة يا راجل
معلش ده اقل لفظ ممكن اقوله
فى الظرف ده

اخص على ديه بلد يا شيخ

بيتعاملوا مع اوباما على انه المهدى المنتظر
!!

سهر said...

اول تعليق
ههههههههههههههههه
انا قررت اخد بنصيحتك ويكون عندي مدونة
يخرب بيت ام اوباما
البلد بكره هتبقى مقفولة بسببه

ض/خالد said...

مراتي اتصلت بيا امبارح
بتقول لي متنزلشي من الشغل وتيجي البيت اللنهردة...
خليك عنك أصل الأمن الأمريكي في الشوارع...

وطبعا انت واخد بالك اني مخبي اف 16 او ار بي جي في لحيتي...

مقالك فعلا من افضل المقالات في الموضوع..
وووفعلا كما ذكرت الناس انخدعت باسم ابيه (حسين) وقالوا صلاح الدين جاي من الغرب...

مع انهم لو لاحظوا ان راس النفاق والمنافقين في المدينة كان اسمه (عبد الله) بن أبي بن سلول...

أقوم اروح البيت ..معلنا العصيان على كلام زوجتي :)

لورنس العرب said...

ملحوظه على موضوع النظافه
ده طبع عندنا
في احد الايام كانت سوزان مبارك هاتمر من كوبري عندنا في المعادي لإفتتاح مكتبه
دهنوا الكوبري ودهنوا السور وكان كله تمام
وده على الرغم من انها كانت راكبه عربيه ومش هاتبص من الشباك أصلا
وعندنا في المصانع
لما بييجي تفتيش الأيزو أو حد يزور المصنع تلائي كل العمال لبسوا اللي على الحبل والاقنعه الواقيه عشان سلامة الغذاء وغيره من الحاجات ال 100% بتاعة الصحه
يعني ده تقريبا طبع عندنا وهو الاهمال المستمر
أما بالنسبة للأخ اوباما
خلت أعلق على الاخبار كالعاده في اسلام اون لاين ولقيت واحده كاتبه بتقول اللهم اعز الاسلام بأوباما
قلت لها يا حاجه انتي مش واخده بالك انه كل يوم جيشه بيقتل اخوانك في العراق وافغانستان وبيحتل بلاد الخليج؟
ولله انا مش عارف الناس بتفكر ازاي
بس ارجع واقولك ان بردو مش كله غلطان
هو بنفسه قال انه هايوجه خطاب للعالم الاسلامي وده اللي خلى الناس تنظر للزياره على انها غير طبيعيه
على كل حال كلها سعه ونعرف هايقول ايه

Me7'o said...

ياأخوانا أنا مش عارف إنتم زعلانين ليه كده...
مااحنا واخدين على كده لما اى محافظ بيتكرم وبينزل الشارع بيتعملوه كده وأكتر بس هى المرة دى بزيادة حبتين ماهو برضه كل برغوت على قد دمه يا أخوانا...
مش كده ولا إيــــــــــــه

ياريت يا صباغ تخش تقولى رأيك فى المدونة المفعوصة دى
http://mylifeflavor.blogspot.com

رؤية said...

فعلا تلك الاجراءات المبالغ فيها بشكل مستفز اثارت استياء الناس بشدة
وما زاد على ذلك منع فتح المحلات وفتح شبابيك البيوت او النظر منها
فالندفن احياء اذا حتى تنتهى زيارة الرئيس اوباما
ويبدوا انه قد اصبت حين قلت ان وش المواطن المصرى يقطع الخميرة من البيت علشان كدا اعتقل المواطنون فى بيوتهم هذا اليوم

تحياتى

بطوط حبوب said...

يا عم انت " ابن حسين " جاى يزورنا
قلنا نروق البلد شويه ونشيل الكركبه وكده
لا اكثر ولا اقل
عملتها انت موضوع بقى ليه
نياهاهاهاهاههاها
:D

Desert cat said...

المهم يا كبير فى الامر ان الخميس اجازة
وكل لما نحب نضف الشوارع نبعت لاوباما نتوسل له يجى زيارة

عبد من عباد الله said...

على فكره دي مش ثقافه حكومه لأ ( نووووووو ) دي ثقافه شعب بأكمله ، مين فينا مش بيعمل كل لما بيزوروا حد مهم ...

معظمنا بتبقى بيوتنا مش قد كده في الترتيب و النظافه لكن تعالى نتخيل لو رئيس الحي كده جي عند حد فينا و قولي ايه اللي ممكن يتعمل في البيت ؟؟ بلاش رئيس الحي خليه مديرك في الشركه ؟؟ بلاش مديرك يا سيدي خليه عريس لبنتك ؟؟؟؟

لو جاوبت بصراحه على السؤال حتعرف ان الحكومه دي فعلاً حكومة ممثله للشعب و لست حكومة من بلد اخرى .

afew good men said...

الله ينور عليك

كلامك في الجون

مايـو said...

إحساسى بالذل ليس فقط من تلك الإجراءات التى قُضيت ، بل بأمل الغلابة فى العصاه السحرية -خطابه- ، فهل بعد خطابه الآن أمل فى التغيير؟!!!