خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Jun 5, 2009

تجربتى فى لــمِّ الغســيل

فى مهمة رسمية نظراً لهطول بعض الأمطار قررت  أن أقوم بلم الغسيل من البلكونة .. فى حركة شمللة غير معهودة ، وهى الحركة التى إن دلت عن شئ فإنها تدل على روح المغامرة وحب التضحية وإنكار الذات  الذى أتميز بهم من صغرى ، وهى ليست المرة الأولى فقد قمت ذات مرة بغسل بنطلون ومرة قميص فى إحدى نوبات المغامرة والتضحية والإجتهاد ..

إكتشفت أن "لم" الغسيل مهمة أصعب كثيراً من الذهاب إلى المقطم والرجوع خمس مرات ، وأصعب من مهمة الجلوس فى أتوبيس 17 فى الثامنة صباحاً ، بل وأصعب من أكل البطيخ الساقع بالشوكة فى ليلة صيف حارة  ..

فقد بدأت أعراض شيخوخة مبكرة فى الظهور عليا ، وبدأتْ فى النهجان بصوتٍ عالٍ مثل حمار يجر عربة كارو فى مطلع ، وشعرت أننى على وشك السقوط فى الشارع نظراً لطولى الزائد الغير مبرر ، وكنت أحتضن المشابك والغسيل - كأم تحتضن إبنها - خوفاً من وقوعهم فى الشارع .. رغم ذلك تم بحمد الله وقوع عدد 6 مشابك و3 قمصان وبنطلونين وخمس شربات فى الشارع .. وتم إستدراك الأمر فيما بعد بالنزول إلى الشارع وجمعهم وسط مشاهدة وإنبهار الجيران بى ، وقامت أمى بغسلهم مرة أخرى وعلى وجهها نظرة – غير مفهومة – من الإحباط والإشمئزاز والقرف والنرفزة وخليط من بعض الصفات الإنسانية الغير مفهوم سببها ..

أشعر بظلم بيّن ، وإجحاف لحقى .. أنا المجتهد المتعاون المغامر الجدع الذى قمت مرة بغسل بنطلون جينز بنفسى ، بل وقمت بنشره أيضاً .. صحيح كانت المأساه حين ذهبت أمى لتقوم بـ "لمّــه" .. فوجدت بالبنطلون ممسوك بواسطة خمسة وعشرين مشبك ، ولم تفهم أمى وقتها موضوع الخمسة وعشرين مشبك  ، لكننى أوضحت لها فيما بعد الحالة التى إنتابتنى أثناء النشر من رعب وخوف من وقوع البنطلون فى الشارع ، فقمت بوضع خمسة وعشرين مشبك لتمسكه فى حبل الغسيل جيداً ..
وكان رد فعل أمى وقتها شبيه برد فعلها إزاء وقوع قائمة الملابس المذكورة أعلاه فى الشارع اليوم ..

تجارب نسائية وأمهاتية عديدة قمت بمحاولة خوضها مثل الطبيخ والغسيل و"النشير" والتنظيف .. وبائت جميعها بفشلٍِ أكثرمن "الذريع" بشويتين

والسؤال هنا .. هل توجد معاهد أو مراكز تعلم الرجال بعض المهارات الأُمهاتيه .. مثل : كورس لم غسيل .. بحيث أستطيع لم الغسيل بدون الحاجة إلى إعادة غسل الملابس مرة أخرى ..
أو كورس فى عمل السلاطـة .. بدون حدوث تفعيص حاد للطماطم ينتج عنه ما يشبه عصير طماطم وعليه خس وخيار وبصل .. ويسمى الكورس "تعليم عمل السلاطة .. بدون تفعيص .. فى ثلاثة أيام"

صديقى العزيز ..
إذا وقع عليك يوماً من إحدى البلكونات بنطلوناً فوق رأسك وأنت تمشى فى الشارع
فلا تقلق .. أنا بلم الغسيل
أحمد الصباغ

26 comments:

Rannona said...

ههههههههههههه
انا بقى لازم وانا بنشر او بلم الغسيل اوقع مشابك ...دي حاجة اجباري عندي ... بس مش بوقع هدوم الحمد لله

Rannona said...

ههههههههههههههه
الرجالة المفروض يتعلموا كل حاجة
self dependence

صباح الصباح said...

ههههههههههههه

25 مشبك يا خال

اوعى تقولى دة لكل رجل بنطلون!!

Soul.o0o.Whisper said...

السلام عليكم و رحمة الله و بركاته

بصراحة البوست رائع جدا
و لطيف اوى

عشان تعرفوا قيمة الام

و تعرفوا احنا بنتعب اد ايه
ههههههههههه


خلاص خلاص
هأشوفلك حكاية الكورسات دى
*_^



دمت بود

ايوشة said...

ههههههه سبحان الله جايز المهام الامهاتية دى نقول عليها سهلة وهما بيعملوا ايه يعنى زيادة بس اعتقد انها محتاج صبر وتفانى عالى
يعنى هما لما يطبخوا يغسلوا وينشروا بيعملوه بحب ومش منتظرين مقابل والحاجات دى للاسف مش بتتعلم فى اى مكان فى كتير بنات دلوقتى مش ليهم فى حاجة من ده كله ومهما تحاول تتعلم مش فى دماغها
زمان كانت حاجة فطرية فى كل البنات متربية انها هتكون ام والمهام دى كلها من اختصاصها دلوقتى البنت بتتربى على انها ازاى تتفنن فى اختراع كل يوم سبب جديد تتهرب بيه من اى مسئولية وتقول المفروض يكون فى مساواة
بس المفروض الرجال يتعلموا بعض الاساسيات البسيطة مش يكونوا زيرو كده فى كل حاجة ومفيش احسن من الجيش اصلاح وتهذيب :)

دودو said...

تدوينة ظريفة جداًياريت كل الشباب والاولاد يجربوا ذيك . على فكرة انا مش بعرف انشر او حتى الم الغسيل

دودو said...

تدوينة ظريفة جداًياريت كل الشباب والاولاد يجربوا ذيك . على فكرة انا مش بعرف انشر او حتى الم الغسيل

فتاه من الصعيد said...

ههههههههههههههه
انا برضه موش بعرف الم الغسيل وبيقع منى وبخاف المشابك تضيع
بس ابشرك انت عندك فوبيا المرتفعات زيي :D
يعنى محتاجين دكتور موش مراكز تدريب
دمت بخير .....تقبل مررى

همس الاحباب said...

يا شطارتك يا خالو
انت مش فالح فى حاجة خالص
ومال ناوى تتجوز ازاى فين المؤهلات للحياة الزوجية
والحمد لله انه كان بنطلون
وخد 25 مشبك ومال او نشرت حبل غسيل كامل
كان زمانك استلفت مشابك المنطقة كلها
قدر الله وماشاء فعل

إيناس حليم said...

ههههههههههههههه
جامد جدا يا خالو
منكرش اني بوقع ساعات مشابك بس مشبك مشبكيييييين
مش كل الفوضى اللي انت عملتها دي يا خالو..مشابك وهدوم ههههههه
وبعدين 25 مشبك ليه يعني أمال لو بتنشر ملاية هتعمل ايه
:)))

لا بس برافو عليك برده تستاهل كل تقدير واحترام انك كسبت شرف المحاولة
:)

بدراوى said...

هههههههههههه
يخرب عقلك يا بنى
حلوة اووووووووى التدوينة ديه
بس كلام فى سرك
كويس ان اللى وقعوا مش اندر وير
ههههههههه
بتبقى محرجة اوووى تنزل الشارع تلم الأندر وير اللى وقع و انت بتنشره
هههههههههههههههههههههههههه

يا مراكبي said...

طيب ولو وقعت فانلة داخلية .. نستدل على صاحبها ازاي؟

بنت مصريه said...

ههههههههههههه يخرب بيت عقلك يا احمد
انا لو مكان مامتك
كنت قتلتك
بس واضح ان مامتك متفهمه
وبعدين اسألوا اهل العلم ان كنتم لا تعرفون
عايز تعمل سلطه من غير تفعيش ما تجيبش طماطم طريه هاتها جمده
هههههههههههههربنا يا احمد يرزقك بزوجه تكون ما بتعرفش تعمل حاجه وتخليك تعمل كل حاجه
بوست جميل احييك

بت خيخة وأي كلام said...

جميلة جدا
كوميدية خالص
اسلوبك يجنن
ضحكتنى وانا مكتئبة

Amany said...

هههههههههههههههههههههههههه
عشان تعرفوا بس ان احنا لو قعدنا فى البيت مسئوليتنا بتبقى كبيرة وانتوا بتفتكروا ان شغلكوا حاجه
بس جامدة جدا يا احمد هههههه

سبهللة said...

هايلة يا احمد
يسلم مخك
ضحكتنى اوى

Anonymous said...

من شان تتجنب وقوع الهدوم غني تلولحي يادالية ياام غصون العالية تلولحي عرضين وطول ، بتخف اعراض وقوع الهدوم لحالها أكيد
اسالني

Sonnet said...

ربنا يعينك
يا خالو

enjy said...

والله انا مت من الضحك بجد تحفففففففففة الموضوع دة والله

ملحوظة : انا كل ما الم غسيل او انشر غسيل لازم يقع منى عدد واحد مشبك

سهر said...

والله برافو عليك
علشان بس تشوفوا الستات بتتعب قد إيه
:):)

Anonymous said...

هههههههههههههههه
هههههههههههههههه
هههههههههههههههه
المهارات النسائية دى غريزة فطرية
متحاولوش

بسمة

Anonymous said...

عايز معهد يعلمك لم الغسيل والطبخ ونشره والطبيخ والكنيس والتسييق كمان سهلة ياباشا عليك بمعهد الغربة وكمان هتتعلم حاجات تانيه كتير هتتعلم إزاي تبيع نفسك وصحابك وكل اللي تعرفهم عشان حفنه من الريالات وهتتعلم إيه معني الاستعباد
وغيره وغيره
تحب أحجزلك في الدفعة الجديدة

Rony said...

شكرا على تعليقك على مدونتى المتواضعه
أنا أيضا معجبه بمدونتك و وموضوعاتك وأسلوبك فى الكتابه

Blank-Socrate said...

صديقى العزيز زمن الدلع انتهى
بمعنى ان لما حضرتك تتجوز هتعمل كل دا غصب عنك
هى كمان بتشتغل و طالعه عنيها و معندهاش وقت تدلع سى السيد
فانت من الاول خليك بكرامتك و قلها يا حياتى انا عاوز اساعدك و علمينى
و ربنا يستر عليك
:)

مخبر قمل دولة said...

تحفة يا خال
يخرب بيت دماغك بجد
على فكرة .. انا المتعهد الاساسي بلم الغسيل عندنا في البيت بالاشتراك مع اخويا اللي في ابتدائي
شاطر اوي واعجبك في موضوع لم الغسيل ده

nour shahen said...

هههههههههههههههه
عسل يا احمد بس طالما مش ليك فى لم الغسيل بتجهد نفسك ليه
اهو اتحسب عليك أذيه مش مساعده
بينى وبينك لو انا مكان والدتك كنت مكتفتش بالنظرات بس
اصل دا تعب ومجهود وفى الاخر تجبهولى من الشارع
يلا معلش فيما بعد ابقى ابعد عن البلكونه حفاظا علي الغسيل ههههههههههههه
تحياتى