خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Aug 26, 2009

حبّـة موغات .. من الأدب العيد ميلادى

كانت ليلة مشهودة، حين أتوا بى من حيث الدفء والهدوء والأنتخة، وألقوا بى عارياً فى طريق الحياة البارد، أعتمد على نفسى فى التنفس وفى هضم الغذاء بعد أن كان يأتينى مهضوماً على الجاهز، بل وفى إعداده وهى المهمة التى ظلت شاقة حتى الأن.

يااه.. هل الحياة فى حاجة إلى بنى أدم جديد؟
يملأ الدنيا صراخاً وزعابيباً وأذى فى خلق الله، ويلوث البيئة؟

كنت أنا الولد الوحيد، ديك البرابر، الذى طال إنتظاره، على ثلاث بنات، بذلت إمى فى خلفتهن مجهودا كبير، ثم قررا – أبى وأمى – نسيان موضوع الخلفة،بعد مرور سبع سنوات على آخر خلفة البنات، والتركيز على التخلص منهن بسترتهن فى بيوت أزواجهن.

ثم أتت المفاجأة مع بدايات عام 1979 حين أخبرت الدكتورة أبى أن المدام حامل، وظل أبى طيلة تسعة أشهر يحلم بالمولود الجديد على أحر من الجمر.. عسى الله أن يأتى بالولد .. ثم.. وعلى حين غفلة من الزمن.. أتيت أنا.. واضعاً رِجل على رِجل .. تاتاتاتاااااااااااا

لم أرى وجه أبى حين أخبرته (الداية) بأن ربنا قد رزقه بالولد، ولم يوافينى الحظ أن أسأله هذا السؤال، لكننى متأكد أنه كان يمر بلحظة نشوة وسعادة عارمة وهو الذى طالما حلم بالولد الذى يرفع رأسة بين أهالى المنطقة!

وإنقسم الرأى فى يوم مولدى إلى قسمين : رأى يرى أنها مأساة بكل المقاييس، ورأى يرى أنه أعظم حدث شهده التاريخ، وكان الرأى الثانى هو رأيى أنا فقط.

تقول أمى أننى كسرت حاجز السنتين فى الرضاعة.. ومعروف أن الإنسان الطبيعى إن زادت فترة رضاعته على سنتين فإنه يصاب ببلاهةٍ ما، لكن ربنا ستر ولم أصب بالبلاهة، وإكتفيت بحبة عبط على خفيف.

ولقد كان مولدى قبيل الفجر بلحظات، ولذلك نشأت بحب الليل والسهر، وكانت أمى تعشق الموغات، وكنت أعشقها جداً ويقال إننى كنت بشرب الموغات وانا لسه مولود، وتوحمت أمى فيا على العنب والبطيخ، ولذلك أعشق إلتهام العنب الأحمر والبناتى، وأكل البطيخ، ونحت القشر كما البط البلدى.

وفى رواية تقول إنهم كانوا مصرين على إعطائى إسم (عبد السلام) ، إلا أن أختى حبيبة قلبى وملاكى الحارس (غادة) هى التى صممت على إسمى وقالت يا إما (أحمد) لابلاش.

وفى رواية أخرى تؤكدها جدتى لأبى الله يرحمها التى ماتت عن عمر يناهز المية وأربعين عاماً أننى ولدتُ أخضر العينين، أصفر الشعر، شاهق البياض، وردىّ الخدود.. وعن تفسير التحول المفاجئ فى خلقتى يُقال إننى بعد الولادة مباشرة وبمجرد إستنشاق هواء مصر النقى، وأكل العيش البلدى المدعّم صار حالى هكذا.

وتروى أحاديث أسطورية عن حب والدى الإسطورى لى، وعن الدلع الذى لم يشهده طفل فى كتب تاريخ الأطفال، لدرجة أن أحد الرويات تقول أن أبى ظل طوال الثلاث السنوات يلاعبنى بصورة متصلة دون أن ينام، وكانت أقصى أمانيه أن أمنحه أبتسامة أو ضحكة طفولية صغنونة.

ولم يمهلنى القدر أكثر من الثلاث سنوات، ومات أبى..

كان مصاباً مزمناً فى القلب، ودخل لعمل عملية فى قلبه المريض، وخرج محمولاً إلى مثواه الأخير، دون أن أراه وأمنحه الإبتسامة الطفولية الصغنونة.

وبعد رحلة كفاح أسطورية إستطاعت أمى أن تربى التلات بنات، والولد الذى أصبح طويل القامة، وإرتدى نظارة بفعل عوامل التعرية.

وهذا الإبن يحتفل الليلة بيوبيله البرونزى، وبيوم ميلاده التلاتين، هكذا وبدون مقدمات، وقد إكتشفت أن الأيام والسنوات جرت فجاءة كما يجرى مترو الأنفاق فجاءة وبسرعة رهيبة بعد خروجة من محطة حسنى مبارك وكأنه خائف من شئ ما.

وهناك عدة لحظات فى حياتى، تظل تتردد أمام عينى كشريط ذكريات سينيمائى:

1- اللحظة التى سألنى أحدهم: عندك كام سنة يا أحمد؟ فشددت قامتى ورددت فى ثقة : تسع سنين.

2- اللحظة التى تركتنى أمى أمام باب المدرسة فى أول أيام أولى إبتدائى.

3- اللحظة التى أمسكت (نهى) فيها بيدى، وكانت الإنثى الأولى التى تمارس هذا الفعل.. وكان هذا فى تالتة إبتدائى عشان دماغكم ما تروحش بعيد، وأمسكت إيدى بحنان ورقة بحجة( قوم عشان نلعب).

4- لحظة دخولى الجامع لأول مرة، مع عم (محمد حمزة) جارنا وصديق أبى الله يرحمه، وكان فى صلاة الفجر، وكنت منبهراً إنبهاراً شديداً.

5- لحظة دخولى إستاد القاهرة لأول مرة، وكان ممتلئاً عن آخره، وكان ذلك فى أولى ثانوى.

6- لحظة أول بوسة من فتاة، وكانت من (مروة) وكنت وقتها فى رابعة إبتدائى، وكانت هى فى الثانوية، وباستنى بحجة إنى كنت بعيط، شوف يا أخى دلع البنات!

7- لحظة مشاهدة جثمان ميت لأول مرة، وكان ذلك وعمرى حوالى عشر سنوات، وكان الميت يبتسم بوضوح.

8- لحظة الصفع بالقلم لأول مرة، من أبلة (زنوبة) مدرسة العربى والدين والحساب فى تانية إبتدائى، بس بعد كدة بقى عادى.

9- لحظة دخول السينيما أول مرة، وروية الشاشة الكبيرة، وكانت سينيما (فونتانا) الصيفى بالمعادى، وكان فيلم شادر السمك.

10- لحظة الحصول على أول مرتب فى حياتى، وكان ذلك فى أواخر عام 2001، والغريب إن المرتب خلص بعد ربع ساعة.

11- لحظة ما تميت تلاتين سنة فجاءة.

من الجميل أن يعيش البنى أدم مننا، بعقل راجل، وقلب طفل، ويعمل عبيط، ويصدر الطرشة للهوم، ويطفى الشمع زى ما انا بعمل دلوقت، على أن ينفخ جامد حتى يستطيع إطفاء تلاتين شمعة.

كل سنة وإنتم طيبين، وكل إشراقة شمس وأنا أستمتع بدفء صداقتكم التى هى أغلى ما أمتلك.

أحمد الصباغ

30 comments:

Anonymous said...

كل سنه وأنت طيب وعقبال مليون سنه ويارب السنه الجاية وكل سنينك تبقى أحلى مليون مرة من اللى فات
ويارب تحقق كل اللى بتتمناه وبتحلم بيه
عيد ميلاد سعيد ورمضان كريم
وأبقى خلينا نشوفك بقى قريبا

reem said...

كل سنة وانت طيب يارب
وعقبى لمليون سنة سعيدة

إيناس حليم said...

:) دايما عندك قدرة تضحكني وتبسطني بأي حاجة واي موضوع تكتبه

كل سنة وانت طيب يا خالو ويارب سنينك الجيا تعمل فيها كل اللي بتتمناه وتبقى سعيد وناجح والضحكة مش تفارقك ابدا

بالنسبة لموضوع ان شعرك كان اصفر وعنيك خضرا وخدودك وردي....الخ الخ
انت فشار يا خالو عشان اصلا انت مكنتش ايام العيش المدعم كنت كبرت واسمريت وبقيت انسان طبيعي خلاص
:))

شمس النهار said...

كل سنه وانت طيب وبصحه وسعاده وتحقق كل احلامك ان شاء الله

وكل سنه وانت طيب بحلول رمضان

مي said...

كل سنة وانت طيب وعفبال
مليووووووووووووووووووووووووون سنة
وانا كمان بقول ان اليوم ده أعظم حدث شهده التاريخ
بجد انت انسان جميل
وفعلا يا احمد ما أجمل لحظاتك اللى كتبتها او سجلتها فى شريط حياتك
إن شاء الله تحقق كل اللى تتمناه
ويجعل ايامك كلها فرح وسعادة

reem said...

كل سنة وانت طيب

وعقبال 150 سنة

يا احلى صباغ

A.SAMIR said...

حازي باااازي يووو يوووو
يا صبااغ

Anonymous said...

كل سنة وأنت طيب يا أستاذ أحمد وعلى فكرة أنا من مؤيدي النظرية التانية لولادتك ونفسي أفتكر كل ذكرياتي زيك كده

ويارب السنة الجاية تبقى في اتم صحة وأحسن حال

Anonymous said...

على فكرة دي أنا شوكولاتة بس البلوجر بيغلس

Kareem Brakat said...

كل سنه وانت طيب ياباشا وعقبال مليون سنه

Rannon said...

يعيش البنى أدم مننا، بعقل راجل، وقلب طفل، ويعمل عبيط، ويصدر الطرشة للهوم،

لخصت نفسك في تعريف صغير

كل سنة وانت طيب وعقبال سنين كتييييييييييير وانت راضي ومبسوط يارب :)

فاتيما said...

كل سنة و إنتا طيب يا خال المخاليل
كدا قوام دخلت عقد التلاتينات يا عم
بس خلى بالك يا بنى و عن تجربة
الكام سنة الجايين هيكرو منك و لا هتحس بيهم أساساً فإنجز كدا و متعقدش تاجل فى الحاجات قدر الامكان
عيد ميلاد سعيد
و إنت ف وسطنا يا عزيزى

Brownie said...

Happy birthday ...wish u the best =)

karim said...

كل سنة وانت طيب يا باشا دة احنا من سن بعض بقى ونفس الشهر والسنة كمان, تمنياى لك بالسعادة وتمتعنا بكتابتك دائما

ZooZ "3grbgr" said...

أقرأ لك منذ زمن


كل عام وأيامك أجمل

وليرزقك الله ما تحب وترضى

ولتكون له ما يحب ويرضى

ومبارك عليك الشهر

:")

Doha Helmy said...

كل سنة وأنت طيب يا أحمد .. عقبال السنة الجاية لما تكتب نفس البوست ده بس تقول أنك أتجوزت من ضمن اللحظات اللى بتيجي في شريط سنيمائي ;)

Anonymous said...

kol sana wenta tayeb happy birthy yo yo . happy birthy yo yo . ya rab tesaad we tfrah daiamn . ya rab million sana mn el farha wel reda we ramadan kariiiim .. Nebal

nody said...

كل سنه وانت طيب
ويارب وعقبال ما تحتفل باليوبيل الذهبى
ويكل احلى واحسن كمان

يا خوف فؤادي من غدي said...

تهنئة من القلب وعقبال مائة سنة
المشكلة ان حالنا مع اعياد الميلاد كلما تقدم بنا السن هو لسان حال المتنبي حين قال
عيدٌ بأيّةِ حالٍ عُدتَ يا عيدُ
بمَا مَضَى أمْ بأمْرٍ فيكَ تجْديدُ
على العموم جعل الله غدك خيرا من يومك ان شاء الله

Olivetree said...

كل سنه وانت طيب
وعقبال مليون سنه يارب
اسلوبك رائع فى السرد
ربنا يبارك فيك ويوفقك فى حياتك
ان شاء الله
:)

مذكرات كشكول المورق said...

تحية طيبة :)
ـــــــــــ
كل عام وأنت هكذا صباغ
تصبغ الحياة بلون يبهجك ويبهج من حولك هو لون إبتسامتك.
كل عام وأنت صباغ تصبغ ألم الدنيا وقت الظُلمة الحالكة بلون فوسفورى،بضوئه يهتدى آخرون فيحيل الألم إلى الأمل.
كل عام وأنت وسط مخاليلك ووسط كل من يحبك يا ابن الإنسان :)
كل سنة وأنت طيب وبخير وفى خير ومزيد من الصحة والعافية.
خالص تحياتى؛

اسماء جمعه بنت الشمس said...

HaPpY BiRtHdAy To You Ahmed
كل سنه وانت بألف صحة وسعاده وخير وهنا
يا احلى خااااالو
فى الدنيا كلها
كان نفسنا نكون معاك ونطفى معاك التلاتين شمعه
ويارب ما يكون اتكتب عليك فيهم ذنب واحد
ويا رب نشوفك اسعد الناس ونكون موجودين عشان نحضر عيد ميلادك المليون عشان بسسس
نقولك كل سنه وانت طيب
ونطفى معاك المليون شمعه

حلو قوى شريط الذكريات ده اتمنى لما يكون عندى 30 سنه تكون لسه عندى ذكريات مفرحه لأول كل شئ مر بحياتى

فى سؤال بقا بيلح علياااا
بيلحححح يعنى .... هو مين نهااا هههههههههه
بهزر على فكره
كل سنه وانت طيب للمره الالف
وربنا يرحم والدك يا رب ويفرح بيك وتلتقى بيه فى الجنه ان شاء الله
يا احلى خااااالو فى الدنياااااا
ولك عندى اعملك احلى عيد ميلاد بس لما اشوفك

حياة said...

عقبال مليون سنة وانت بسعادة وخير ونجاح في كل حياتك
كل سنة وأنت طيب ياخالو احمد

afew good men said...

كل سنة وانت طيب عقبال 80 سنة كفاية اوي

خوفا علي ان مش نلاقي مكان للشمع في التورتة

ليك وحشة والله ربنا يكرمك وكل سنة وانت طيب


وانا مع ايناس في حكاية الفشر رغم ان الرواية دي انا سمعتها قبل كدا عنك

ممكن فعلا بس مش في حاجة بتبقي علي حالها



كل سنة وانت طيب

يا مراكبي said...

الله عالبوست الجميل الظريف

بجد جميل

كل سنة وإنت طيب وعقبال كل سنة

بجد بقيت 30 سنة؟ لحقت؟

مختار الجندي said...

السلام عليكم ،

أزيك يا أبو حميد

واحشني جدا ومن ساعة ما انتقلت من بلوجر وأنا مش سامع عنك خلص ومبتسالش
علي فكرة انا مواليد 13 أغسطس ومكتوب 27 يعني

وكل سنه وانت طيب

بـسة .. و شهرته عم بسة said...

على فكرة التلاتين سنة ده اليوبيل اللؤلؤي مش البرونزي
و كل يوبيل و انت طيب
تحياتي

Anonymous said...

انا مصدقك ان شعرك كان اصفر انا برضه كان شعرى اصفر وعينى خضرة ولونى ابيض جميل جدا ثم حصل اللى حصل عنيى اسودت وشعرى سقط وبقيت اقرع ولونى اسمر من الشغل فى الشمس وطلعلى كرش وارداف واحوليت وقصرت

Anonymous said...

كل سنه وانت طيب يا حمادة وعقبال مليون بسنه ويارب تقدر تحقق كل اللى تتمناه وعاوزة اعرف امته كان شعرك اصفر وعنيك خضرا

Agen Bola said...

Thanks so much with this fantastic new web site. I’m very fired up to show it to anyone. It makes me so satisfied your vast understanding and wisdom have a new channel for trying into the world.