خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Aug 30, 2009

خوازيق النجومية

 
يظل الانسان متوضعاً وطيباً وأميراً وإبن حلال يود الناس ويسأل عنهم ويتودد إليهم حتى إذا فتح الله عليه أبواب الرزق أو الشهرة أو النفوذ فيبدأ فى الأنزحة والتعالى والألاطة على خلق الله.

فيبداً فى التعامل مع الناس من منطلق النجومية والشهرة، ويبدأ فى إدخال مصطلحات جديدة إلى قاموسة
1-               (بحبكم يا شباب) أو (إنتم حقيقى فى منتهى الجمال) : إن كان مطرباً
2-               (النجم مننا ما يقدرش يعيش من غير جمهوره) إن كان مصطفى قمر
3-               (إنتم السبب الحقيقى وراء فنى) إن كان ممثلاً
4-               (إنتظرونى قريباً) أو (أنا مبسوط من رأيكم فى مقالى) إن كان كاتباً.. إلخ إلخ

ثم يتخلى عن الكلمات الشعبية فى كلامه، ويتحدث إلى إمه وإخواته وإصحابه وكأنه يدلى بتصريح صحفى، ويبدأ فى التفكير جدياً فى كتابة مذكراته إو عمل فيلم وثائقى عن حياته – بالمناسبة أنا بفكر أكتب عن كفاحى – وتتحول حياته البسيطة لما يشبه بشخص يحيا أمام الكاميرا.

وهذا الداء – داء النجومية - هوا داء لعموم البشر على السواء منذ خلق آدم وحتى كتابة هذه السطور، ولا أحد معصوم منه، أنا شخصياً عندما أشترى قميصاً جديداً فإننى أغلق الموبايل لعدة أيام، ولا أرد على أحد، وإذا أنعم الله عليا بجوز شربات، فإننى برد السلام بألاطة ومحدش فى المنطقة بيعرف يكلمنى لمدة لا تقل عن إسبوع.

وأذكر زمان إننى عندما طلع إسمى فى الجرنان مرة فى بريد القراء، ظللت أنظر للناس من فوق لتحت كدة بتاع حوالى شهر، إلى أن سقطت فى بلاعة مفتوحة فى الشارع اللى جنبنا بس الحمد لله جت سليمة ومن وقتها وأنا أدعو الله إن يحمينى من شر التعالى والكبرياء وأستعيذ بالله من النجومية المزيفة منعاً للوقوع فى البلاعات المفتوحة.

والنجم يتخلى عن أشياء ربما يحبها من صميم قلبه مثل الأكل فى الشوارع أو ركوب أتوبيسات النقل العام (أيوة فى ناس غاوية فقر) أو الشعبطة فى ميكروباصات الجيزة أو الجلوس على قهوة عبده صرصار وتناول الشيشة مع الشاى الكشرى..

فالنجم أيضاً ضحية للمجتمع..

تخيل معى أنك ماشى فى ميدان السيدة عائشة مثلاً، ثم وجدت عمرو دياب يقف على عربية فول (إن خلص الفول أنا مش مسئول) ،  يتناول الفول بالزيت الحار مع بتنجان مخلل وطبق طرشى وفحل بصل ..

بالتأكيد ستجرى عليه – على عمرو دياب مش الفول – طالباً منه تذكار، حتى لو كان حزمة بصل أخضر،أو حتة خيارة، وتخيل معى أن عشرين مليون نسمة هم سكان ميدان السيدة عائشة سيشاركونك نفس الشعور تجاه سعادة الباشا النجم..

لذا فهو مضطر لتناول الفول بالزيت الحار فى بيتهم، وحبة حبة ربما يفقد الإحساس بالناس، ويتحدث إليهم على طريقة (إزيكم يا جمهورى عاملين إيه كدة)

وتخيل إنك قابلت كاتبك المفضل فى أتوبيس 923 المتجه إلى الجيزة والمنيب عبر السيدة زينب والقصر العينى، فإنك بالتأكيد ستبادر بإبتسامة واسعة وتقوم تقف عشان يقعد فيعرف الأتوبيس كله إن فى كاتب وصحفى معاهم فى الأتوبيس ويبدأ كل واحد فى أن يدلوا بدلوه

-       طب أما أنت كاتب ما تكتب لنا عن زحمة المواصلات ياعم الكاتب

-       كاتب إزاى ومعهوش عربية ؟

-       والله هما دول اللى مبوظين البلد بالخـ .. اللى بيكتبوه

-       وده كاتب معارض ولا ضاد من غير نقطة إن شاء الله

-       ده منظر كاتب والنبى؟ ده شكله كاتب كتابه

-       ياريت يكون من الكُتّاب إللى مع الشعب، مش من الكُتّاب اللى مع الرصين

-       أنا شوفت الكاتب ده إمبارح الصبح فى طابور العيش وبالليل فى التليفزيون هاهاهاه

أصدقائى الأعزاء

أنا مبسوط أن مقالى عجبكم، وإنتظروا جديدى دايماً، وتابعوا أعمالى، وما حدش يتردد إنه يكتب لى، أنا بحب جمهورى كتير، لإنى من غير جمهور زى الحلة من غير غطا، وحقيقى إنتوا أحلى جمــووووووه

يووووه.. يخرب بيت البلاعات المفتوحة

أحمد الصباغ

20 comments:

kmt said...

السلام عليكم ورحمة الله وبركاته
ربنا يخلينو ليكم
:D
بجد مقال لذيذ
ربنا يخليك لبنا يا نجم
:D

تحياتي
الى اللقاء

أحمد سعيد بسيوني said...

ماشي يا عم النجم

الله يسهلك

رمضان كريم عليك

كيكى عوووووو said...

كان معكم احمد الصباغ القاطن لحد الان فى بلاعه السيدة ..لذا نرجوا الله بعدم نشر اسمه بعد الان فى اى حته حتى لا تصل اليه اف 16 للخوازيق النجوميه!!1

أحلام حقيقية said...

هههههههه والله عند حضرتك حق

اسماء جمعه بنت الشمس said...

ههههههههههههههههههههههههه
بحبك يا خالووووووو جداااا جدااا وبتابع كتاباتك كتابه كتابه
لحد ما لبسونى نظاره
ممكن تكتبلى اوتوجراف
هههههههههههههههههههههههههههه
واتكلم عدل معايا ورد كويس عشان البلاعات متنساش
ههههههههههههههههههههههههههههه
والله انت عسل بجد
ربنا يحفظك يا رب

فاتيما said...

اضحك الله سنك يا صباغ
عيد ميلادك جايب لنا درر أهو
الحاجات دى لازم تتنشر ف كتاب يا صبابيغو و لتكن مبدئيا تحت عنوان
" يوميات خال المخاليل "
حاجة كدا
لو تركز فى كام بوست كمان المفروض يحصل كدا قريب و نيجى نبارك لسعادتك و نفرح بيك
قوم سعادتك تقولنا الكام جملة اللى فى الأخر دول بس متخافش
من غير بلاعات
كل سنة و إنت طيب و بألف خير يا خالو

Rannon said...

هههههههههههههههههههه
لا جامدة
يا كتاتبنا اللي مش مفضل
:D

خد بالك م البلاعة بعد كدة :D

دكتور حر said...

أولا

انت واحشني كتييير كتيير

ثانيا

كل سنه وانت طيب

ثالثا

تسلم ايدك بجد
جمال الموضوع انه من الواقع الحقيقي
هو موضوع الشهره فعلا صعب
ولكن الموضوع محتاج تقوى واخلاص

وربنا المعين
وتحياتي للخال

Anonymous said...

اجمل حاجه ف الشعب المصري يفضل يمشي يتأنزح كده على خلق الله ولا صحفي عاجبه ولا ممثل داخل دماغه حتى بتاع الفول مسلمش من انزحته هههههه
وبعد مايخلص على شعب مصر والدول المجاوره اللى فوق واللى تحت كللللللللله تررريقه . ميلاقيش غير نفسه يتريق عليها وينتقدها ويألس عليها لحد مايصطاد مولود جديد وينشن عليه ويسن سنانه ويجريييي عليه يهريه تريقه
هههههههه
اوعي تزعل . انا عاجبني اوي الكلام بتاعك ظريف ودمه خفيف . انت حقيقي صحفي شغااااال يونيفيرسااال . يوووه رجعنا للتريقه تاني . سوري سوري . انا احسنلي اقفل الكلام بقى
والى هنا اعزائي المشاهدين والمستمعين والمتفرجين , نكون قد وصلنا لختام حلقتنا وحقيقي حقيقي انا بحبكو كلكمووووووه
جيــــــــــجيــــــــــي

Anonymous said...

فين الكومنت بتاعي اللى كتبته ؟؟؟؟
جيجييييييييي

يا مراكبي said...

استنى لحظة قبل ما تتعمق في البلاعة

لحظة بس

ممكن توقيع على أوتوجراف؟

Rising said...

هههههههههههههههههههه
ضحكتني
حلو المقال بجد
صباحك فل

أم بتول said...

و الله عندك حق ، مثلا نجم أول ما ظهر كان مرمطون و كل دوره فى الفيلم انه يضرب و يتشتم و يتبهدل ، حبه حبه قل أدبه و بقى نجم كبير و زعيم فى قلة الأدب ، و الى يفرس أنه يقول لك الى عاوز يعرف تاريخ مصر يفرج على أفلامى لأنى أرخت لمصر بأفلامى ، بالذمة دة تقول له أيه وهو أول واحد شوه وجه مصر بالسفالة و قلة الأدب .
بوست جميل ، وربنا يكفيك شر الغرور أحسن كل بلاليع البلد مفتوحة .

Anonymous said...

السودان أرض مصرية

لم يعد مخطط تقسيم السودان إلى دويلات – بالأمر السري الذي تتداوله أجهزة مخابرات الدول الكبرى بل أصبح متداول فى وسائل الأعلام الأوروبية و الأمريكية . فالسودان سيتم تقسيمه إلى خمسة دويلات هي : دارفور ، جبال النوبة ، الشرق ، السودان الجديد ، السودان الشمالي والمقصود بالسودان الجديد – بداهةً – جنوب السودان. ويهدف هذا المخطط لخدمة "إسرائيل" أولاً وأخيراً، وحرمان العرب من أن يكون السودان الغني بأراضيه الخصبة وموارد المياه "سلة الغذاء العربية"، ومحاصرة واستهداف مصر، بالتحكم في مصدر حياتها، أي مياه النيل، ودفعها لأن تضطر إلى شراء مياه النيل بعد اجتراح قوانين جديدة بتقنين حصص الدول المتشاطئة القديمة والدويلات الجديدة.


ارجو من كل من يقراء هذا ان يزور ( مقالات ثقافة الهزيمة) فى هذا الرابط

www.ouregypt.us

عاشقة الفردوس said...

:D

أضحك الله سنك


كل عام وانت بخير


ربي يعافيك من الغرور والبلاعااااات

:D

مخبر قمل دولة said...

قمة الدماغ يافندم
مانت بتقع في البلاعات اهوه .. ماتكتب لنا عن مشكلة المجاري ؟

Doha Helmy said...

هههههههههههه الله يخليك لنا :)

أُكتب بالرصاص said...

كده برضه يا احمد
تقع في نفس البلاعة؟؟؟

تعرف
المشاهير دول غلابة

محرومين من حاجات كتير قوي

طبيب .. احترفت الاعمال said...

مقالة خفيفة الظل

وإلى الفنانين والمشاهير أقول معك : لا تتواضعوا فإنكم لستم عظماء لهذه الدرجة !

دمت بخير

Akhadiwi Rajie said...

An interesting discussion is worth comment. I think that you should write more on this topic, it might not be a taboo subject but generally people are not enough to speak on such topics. To the next. Cheers
Visual-paradigm.com
Inmethod.com
Qubeshub.org