خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Aug 21, 2009

أسئلة رمضانية

فاكر ورق رمضان المعمول بالنشا ؟ واللمبات القلاوظ أُم طبق بلاستيك ؟ والفانوس الكبير المعمول من الخشب والجلاد الملون ؟

ناوى تصوم زى كل سنة؟ ولا ناوى يكون صيامك أحسن السنة دى؟ ولا ناوى يكون صيامك جوع وبس؟ بتصوم وتفطر على تمر ولبن؟ ولا على تمر بس؟ ولا على ميه ساقعة؟ ولا بتفطر عالفوازير؟ بتحب بوجى وطمطم؟ بتحب تسمع مين من مقرأى القرآن؟ بتحب "مولاى إنى ببابك قد بسطتُ يدى"؟ وبتسمع "يارب عدتُ إلى رحابك تائباً"؟ بتاكل كنافة ولا بتوجع لك بطنك؟ بتنام بعد الفطار شوية؟ ولا بتتفرج على التليفزيون لغاية التراويح؟ بتفتح التليفزيون أساساً فى رمضان ولا بتقاطعه؟

فاكر الفانوس أبو شمعة؟ والفانوس أبو لمبة؟ والفانوس أبو مزيكا؟ بتحب أنهى أكتر ؟ إشتريت فانوس السنة دى لأطفال العائلة ؟

فاكر المسحراتى سيد مكاوى "مسحراتى منقراتى فى البلد جوال"؟ بكار أحلى ولا بوجى وطمطم؟ بتتسحر؟ ولا ما بتفرقش معاك؟ بتنام بدرى وتصحى قبل الفجر تاكل؟ ولا بتسهر لغاية السحور وبعدين تنام؟ وناوى تعمل إيه السنة دى؟ بتاكل كنافة وقطايف ولا كنافة بس؟ بتحب الياميش؟ بتنزل السيدة والحسين والازهر فى رمضان؟ إتسحرت عند الجحش قبل كدة؟ رحت الحديقة الثقافية فى السيدة زينب قبل كدة فى رمضان؟ عمرك صليت التراويح فى عمرو بن العاص؟ طب صليتها فى الحسين؟ طب فى السيدة زينب؟ بتصليها فى الجامع اللى جنب البيت؟

طب فاكر بوجى وطمطم فى رمضان ، وبوجى وطمطم والفيل الجميل ، ومحطة فلافيلو، وبوجى وطمطم والفانوس السحرى ، وحبيبتى إسمها مصر ، وأولاد القمر ، وفاكر أخر مواسم بوجى وطمطم عن النيل فى رشيد ؟

طب فاكر "رمضان جانا" و" أهو جه يا ولاد" و"إفرحوا يا بنات" و"هاتوا الفوانيس يا ولاد" و "وحوى يا وحوى" و"مرحب شهر الصوم" و "سبحة رمضان لولى ومرجان" و"يابركة رمضان" و "والله لسه بدرى والله يا شهر الصيام" ؟

هتدخل الفيسبوك فى رمضان؟ طب هتفتح المدونة؟ بعت لصحابك رسايل تهنئة فى الموبايل ولا على الميل بس؟ ولا إتصلت بيهم؟ بتتعب من الجوع؟ ولا من عدم شرب الشاى؟ ولا من قلة التدخين؟ طب فكرت تبطل التدخين فى رمضان؟ نجحت؟ ولا فشلت فى وقف التدخين؟ فطرت فى مائدة رحمن قبل كدة؟ جربت تعيش الاحساس ده ولا بتعتبرها مظهر من مظاهر الفقر؟ بتروح خيم رمضانية فى رمضان؟ بتعلق ورق وزينة قدام بيتكم؟ ولا سايب المهمة دى على عيال الشارع؟

بتسمع راديو فى رمضان؟ بتسمع تواشيح؟ بتختم القرآن؟ ولا بتختم كام مسلسل؟ بتابع كورة فى رمضان؟ بتابع الناس فى الشارع من الشباك وهى بتحتفل برمضان؟ ولا بتنزل تحتفل معاهم؟ إتسحرت على عربية فول قبل كدة ؟

صليت التراويح قبل كدة فى المسجد الأقمر وعمرو بن العاص والحسين والإزهر والسيدة زينب والسيدة عائشة والسلطان حسن والرفاعى ؟ بتفكر تجرب السنة دى ؟

لو جاوبت على الأسئلة دى يبقى إنت جاهز عشان تعيش رمضان بكل معانيه
فكر وقوللنا ناوى تعيش رمضان إزاى السنة دى ؟
***
جروب شهر رمضان الكريم (و) مدونة أحمد الصباغ .. يهنئانكم بقدوم شهر رمضان المعظم .. وكل سنة وإنتم طيبين
أحمد الصباغ

20 comments:

mimi said...

طيب ....... صلي علي النبي

أنا طقت في دماغي أجاوب علي أسئلتك دي كلها سؤال سؤال لحد ما أونكل بلوجر يكشّر ويقوللي كفاية زهقتي الراجل برغيك

احلي حاجة الزكريات اللي بتتفاوت من جيل للتاني

يعني فيه ناس مش فاكرة بوجي وطمطم

وفيه ناس بتعشق النينجا تيرتلز

طيب أنت فاكر اعلانات رمضان؟

لبس أميجو بينور وأنا عليها بدوّر ؟

طيب اعلان محمود إيه ده يا محمود؟
أنا هقفل المدونة في رمضان ...

وعملت اغنية افرحوا يابنات نغمة الرنين علي الموبايل

ايه تاني ؟ ايه تاني ؟؟؟؟؟

اه ... افتكرت
لأا نسيت

كل سنة وانت طيب

يا خوف فؤادي من غدي said...

رمضان كريم تقبله الله منك ان شاء الله
لي سؤال لك ارجو ان تجيبني عليه لانه يحيرني
ما سر مناداة المدونين لك بلقب خالو انت لست كبير في السن ولاحظت ان حتى من هم اكبر منك ينادونك به ارجو التوضيح
مع تحياتي

maha zein said...

يااااااااااااااااااااااااااااه
بجد
ابدعت
في شوية اسئلة خلتني عوزة اعيط

بجد برافو عليك احساسك ده


انا مليش دعوة
انا عوزة رمضان بتاع زمان يجي تاني
كل سنة وانت طيب

يا مراكبي said...

ذكريات كلها جميلة يا صباغ

بس كلها عني بعيدة زي ما انت عارف

Rannon said...

كل سنة وانت طيب يا صباغ :)

سومه...مجنونه فى بلد عاقل said...

كل سنه وانت طيب يا صباغ اه فاكرين الايام الجميله دى كلها

شوكولاتة said...

كل سنة وأنت طيب ياخالو أحمد وعلى فكرة انت شاطر قوي إنك قدرت تجمع كل الحاجات الحلوة دي واللي انا عيشت معظمها
كل سنة وأنت طيب

إيناس حليم said...

:) كل سنة وانت طيب يا خالو

سبهللة said...

كل رمضان وانت طيب
اللهم بلغنا فضله
انا تقريبا جاوبت على اسئلتك فى بوست عندى
ابقى روح اقراه

Tamer Nabil said...

السلام عليكم.


كل سنة وانت طيب يا احمد

رمضان كريم

تحياتى

أحسن تـستاهـل said...

أحمد.. رمضان كريم وكل سنة وانت صباغ كده وأبو حميد جدا
كل سنة وانت زي الفل

ليك مني كنافة وقطايف وقمر الدين وجلاش وكبده هيهيهيهيهيهيهي

مها ميهوووو

أحمد سعيد بسيوني said...

بسم الله

كل عام وأنتم بخير

أسأل الله العظيم أن يبارك لكم في هذا الشهر الكريم ويرزقكم القول والعمل الصالح

اللهم سلمنا إلى رمضان وسلم رمضان لنا وتسلمه منا متقبلا

دمتم في طاعة

Fahd said...

بارك الله فيك اخي

انت فعلا جمعت كل حاجه ، كل حاجه وقلبت علينا المواجع

الدنيا مبقتش زي الاول
فعلا فيه تغيير حقيقي في الحياة ومظاهرها

كل عام وانت بخير يا سيد احمد

سعيد اني قابلتك في عمر بوك استورز في اول حفل توقيع لكتب مدونيين

واتمني ان نلتقي مرة اخري

ابو اعصار said...

طبعا لازم اتباع بكار
كل سنة ونت طيب يا خال

مصعب صلاح said...

كل سنه وانت طيب والعائله بخير

وكل رمضان ونحن من الله اقرب واعبد

كل سنه وانت طيب

ورمضان كريم

mado80 said...

كل سنه وانت طيب يا صباغ

رمضان كريم

:)

hasona said...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
زتدبر معانيه وفهم علي النحو الصحيح
ورطب ألسنتنا بذكر يا الله

Anonymous said...

ناوي افطر زي كل سنة في شهر البضان والجوع والتطرف والنفاق الاجتماعي والتطفل والزحمة المتناهية ورائحة الفم الكريهة وانسداد الشوراع ونهيق الميكروفونات ..
كل سنة وانت بضان

قوس قزح said...

غسل الله قلبك
بماء اليقين
و اثلج صدرك
بسكينة المؤمنين
و بلغك
شهر الصائمين

.. * * . * * .
.* . . * . . *
* . رمضان . *
. * .كريم. * .
. . * . * . .
. . . * . . .

Rising said...

دايما كل الحاجات دي بتمثل لينا كلنا حالة حنين وارتباط بالماضي
بجد كانت أيام مش هتتعوض