خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Aug 14, 2009

إضحك .. خلى الشمس تطلع


عارف إن ظروفك صعبة . زى ظروفى تمام .. وعارف ان مبررات الضحك معدومة .. وعارف إن الضحكة مكتومة ، وإن بلدنا عيانة فى المستشفى ، وإحنا متعلق لنا جلوكوز ..
 بس إحنا – أنا وإنت – إتعودنا نطلّع من الكوراث مبررات للضحك ، وإحنا إللى إخترعنا كلمة "شر البلية ما يضحك" ، وزميلنا خفيف الظل "المتبنى" قال : وكم ذا بمصر من المضحكاتِ .. ولكنه ضحك كالبكا ..
عمركش شوفت واحد واقف فى طابور عيش من سنتين ومبتسم وبيضحك للرغيف اللى طالع ؟
عمركش شوفت مواطن مبتسم وهو بيسلك المجارى اللى طافحة ؟
عمركش شوفت واحد عمال يرمى نكت على الناس فى الشارع وهو متشعبط فى أوتوبيس ، أو متشعبط فى واحد متشعبط فى الأوتوبيس؟
أوعى تقول ما شوفتش..!
الكداب بيروح فين ؟ بيروح النار .. وإحيانا بيبقى أمين لجنة سياسيات
طب طالما شوفت دول ما بتضحكش ليه ؟
إضحك بقى .. خلى الشمس تطلع
أحمد الصباغ

10 comments:

Enass Emam said...

على اد كل اللى انت قلته ده من نوعية الهم اللى يضحك
على اد ما فعلا الدنيا مش مستاهلة تكشيرة
اضحك الصورة تطلع فعلا حلوة

Doha Helmy said...

أبتسم .. فلا داعى للبكاء :)

Rannon said...

نضحك وماله

♥ Am fOpa'D ♥ said...

هم يضحك وهم يبكي

دول انصار الاتوبيسات مش واحد متشعبط في اتوبيس او واحد طول بيبقوا طاايرين كله ماسك في كله

هو في احلى من ابتسامة وراها خبايا,,,:)
مفيش حاجة مستاهلة

محمد سعيد said...

في مصر لا نملك إلا التفاؤل
وإلا هنفضل محلك سر
ومش هنعمل أي حاجة

ربنا يعدلها بإيدينا
:D

طوبة ذهب وطوبة فضة said...

ياااااااااااااه الشمس دى هتطلع امتى بقى اقولك على اللى يضحك اكتر انى بعد ما فضلت مستنيه مرتب الحكومه كدكتوره محترمه والمرتب متاخر شهرين ورحت اخر الدنيا عشان اقبضه لقيت الملاليم ناقصه بسئل خير الكام قرش نقصوا كام مليم قالوا لى عادى تامينات ومعاشات قعدت اضحك انا لسه اربعه وعشرين سنه وبيخصموا معاشات والله ناس قلبها علينا وربنا يخليهم لينا ويجعله عامر ازاى بقى ما نضحكش كل سنه وانت بكلصحه وخير دا اهم حاجه سلام

مهندس مصري said...

اصطباحة

بقلم بلال فضل ١٥/ ٨/ ٢٠٠٩
المفروض ألا يُسأل الكاتب عن مصادره، ولذلك دعنى أحتفظ لنفسى بمصدر هذه الشهادة التى أنقلها لك اليوم.

«أكتب لك هذه الرسالة بعد أن قضيت يوماً كاملاً داخل الأمانة المركزية للحزب الوطنى بدعوة من أحد زملائى الملتزمين حزبياً، والذى عرض علىّ الذهاب معه على أساس يعنى إنترنت ببلاش وأكل ببلاش وتكييف ووجه حسن، كل ذلك مقابل أن نقوم بعمل أكبر عدد من البروفايلات بأسماء مختلفة على الفيس بوك لنشترك بهم فى جروب شارك مع جمال مبارك فى حوار الشباب المفتوح، أقصد الحوار طبعاً، المهم وافقت ورحت وكان اليوم بالنسبة لى أشبه بفيلم به الكثير من المشاهد التى سأحاول أن أروى لك أهمها.

المشهد الأول: يدخل المهندس أحمد عز، للرجل هيبة، قصير آه لكنه جبار، بدأ كلامه قائلاً: «إزيكو ياشباب عايز أكلمكو شوية عن مفهوم الفكر الجديد، إحقاقاً للحق، وبرغم إنى كده هازعل إنسان غالى عندنا بس لازم تعرفوا إن جمال مبارك هو صاحب الشعار ده، وهو مابيحبش يقول بس ده حقه علينا»، بعد كده قعد يرغى شوية فى الفرق بين سياساتهم وسياسات البلد زمان أيام عبد الناصر،

طبعاً لو عندك ذرة احترام لعبدالناصر هيجيلك سكر أو ضغط أو تقع مشلول من كلامه، بعد كده ابتدا يتكلم عن الأداء البرلمانى لأعضاء الحزب، وقعد يحكى عن فضايح نواب المعارضة اللى معاه فى المجلس من كل التيارات، عشان يثبت إن الكلام الكويس اللى بنسمعه عنهم مش حقيقى، أنا شخصياً أصبت بإحساس يا عزيزى كلنا لصوص.

المشهد الثانى: يقف الدكتور محمد كمال فى القاعة ويذهب له شباب الحزب بأوراق كتبوا فيها الأسئلة التى من المفترض أن يجيب عليها جمال مبارك على الهواء، المضحك أن الدكتور كلما كان يتلقى سؤالا يقول لصاحبه: لا بلاش خد السؤال ده أحسن،

واضح أن الأستاذ جمال مابيحبش أى أسئلة من بره الكتاب، بعدها جاءت مرحلة تصوير الأسئلة، وللأسف مستوى شباب الحزب جعل الدكتور كمال يكتب صياغة الأسئلة أيضا، وكان يضعها على اللاب توب الذى يقوم بتصوير أصحاب الأسئلة، أنا بصراحة كانت أول مرة أشوفه، قصدى اللاب توب أبو كاميرا،

قابلت الدكتور مشكلة فى الخلفيات التى يفترض ألا تكون واحدة لكى لا يظهر أن الموضوع متطبّخ، ظل الدكتور يلف فى القاعة بلاب توبه لتصوير الأسئلة التلقائية لدرجة أنه اضطر أن يصور أحد الفيديوهات فى الحمام، بالمناسبة كانت هناك بنت موجودة طلبوا منها أن تصور سؤالاً بالحجاب ومرة من غيره على أساس أن ماحدش هياخد باله، والبنت رفضت خلع الحجاب، قررت أن أخرج من القاعة لكى أشرب سيجارة قبل ما أتشل لقيت المشهد الثالث، حيث كان يتم تضبيط القعدة التى ستقام لجمال مبارك يوم الأربعاء،

وجدت شخصاً يرتدى بدلة وكرافتة متشعلق تقريباً على كرسى وبيضبط حاجة فى الشاشة البلازما المعلقة فى المكان، أنا قلت الراجل ده أنا أعرفه، طلع مين، وزير إعلام مصر شخصياً بيضبط سلك الشاشة التى سيجلس عليها جمال مبارك.

طبعا أنت لاتنتظر منى الآن أن أقول لك كلاماً من نوعية بقى هى دى الناس اللى بتحكمنا؟، فأنت أدرى بهذا الكلام، أنا بس أريد أن أسألك: تفتكر قبل أن يمسك هؤلاء الناس الحزب الوطنى كان ممكن أسامة الباز ولا كمال الشاذلى يدخلوا ياخدوا حوار فى الحمام من عيل كتبوا له السؤال،

هل كان صفوت الشريف سيقف لتضبيط أسلاك فى قاعة، واضح إن الأيام السوداء اللى جايه هتخلينا نترحم على صفوت الشريف والشاذلى واللى كانوا معاهم، بالمناسبة عايز أقول لك إن معايا تسجيل لمحاضرة عز باشا، ومصور ٣ فيديوهات لمحمد كمال وهو فى الحمام بيصور سؤال هيتسأل لجمال مبارك، لو عايزهم إبعت لى عشان أحملهم وأبعت لك اللينك لأنى نزلتهم على النت، بالمناسبة الأكل كان من سيلانترو، كان عبارة عن وجبتين كل واحدة تعمل لها خمسين جنيه، مش وحشين والله».

آه يا عزيزى أنا مثلك لا أعرف إلى أين سيذهب بنا جمال مبارك والذين معه، لكننى أعلم جيدا من الذى أوصلنا إلى جمال مبارك والذين معه، وأعلم أنه لولا صفوت الشريف والذين معه، لما كان هناك جمال مبارك والذين معه، ياسيدى حلال عليك اللى أكلته، وربنا يعين مصر على ما ستشربه.

* يستقبل الكاتب بلال فضل تعليقاتكم على مقالاته عبر بريده الإلكترونى الخاص. belalfadl@hotmail.com

شفت المسخرة دي
إضحك قوي بقى
إضحك كركر على رأي ليلى مراد :)

Olivetree said...

كلامك مليون الصح بس حتى الضحكه بقت تخاف تطلع لا تغلى هى كمان

كلامك مقنع اوى بس صعب تقنع ضحكه انها تطلع والله عماله اسايس فيها وابدا ولا يمكن تسمع كلامى :(

salamy

♥ ضى القمر ♥ said...

ضحكت والله

على الأقل الضحكه دى هاتساعدنى علشان أقدر أكمل يومى
تسلم إيدك

Sbobet said...

This is a fantastic website and I can not recommend you guys enough. Full of useful resource and great layout very easy on the eyes.