خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Sep 18, 2009

وداع رمضان والفرحة الأورديحى



تم البدر بدري
والأيام بتجري
والله لسة بدري
والله يا شهر الصيام

فى آخر أيام رمضان تطرأ على المصريين تغيرات موسمية كتلك التى تطرأ عليهم قبل رمضان بأيام..

فالمصريون يرون فى كافة المناسبات موسماً للشراء، رمضان لشراء السلع والخزين، والعيد لشراء الملابس الجديدة والكحك والغريبة و – لامؤأخذة – البيتيفور والبسكويت وهكذا فإن المصريين حولوا بقدرة قادر كافة المواسم إلى مواسم للشراء لا للعبادة أو التهانى أو الفرحة خالية الدسم.

المصريون لا يمؤمنون بالفرحة الأورديحى..
تلك الفرحة الخالية من الأكل والسمن والزيت والسكر واللحمة والياميش والقمر الدين والعصائر والكحك والبسكويت والملابس واللحمة والسمك والسردين والرنجة والبصل.

لا نفرح إلا إذا كانت الفرحة متغمسة بلحمة ضانى، ولا نفرح إلا أن نبلع وراء الفرحة شفطة من قمر الدين أو العرقسوس، ولا نفرح إلا إذا إرتدينا ثياب الفرحة الجديدة المبتاعة من شارع الشواربى و 26 يوليو والعتبة والموسكى، ولا نفرح إلا إذا مسكنا بين أيدينا حلويات الفرحة ومضغناها بأسناننا.

الفرحة بتعريفها الفطرى لا تتضمن أى أدوات غذائية بل هى فرحة الأهل والأحباب والأصدقاء وهى فرحة الطبيعة الجميلة وفرحة المواسم الطيبة وفرحة العودة للعام الجديد والعيد الجديد ورمضان الجديد والموسم الجديد.

لكن إذا عزّت الفرحة وصارت صعبة وبالغة المحال كان لابد من تقديمها فى طبق مرصع بالياميش ومحوط بكحك العيد ومبطن باللحوم المشوية حتى يتثنى لنا تذوقها.

أهم مظاهر عيد الفطر فى مصر :  
1-         صلاة العيد فى جامع عمرو بن العاص.
2-         صوانى كحك العيد والغريبة والبيتيفور والبسكويت .
3-         الملابس الجديدة للأطفال والمراهقين ولازلت أذكر بدلة الظابط التى كنت أحلم بها فى طفولتى، حتى كبرت وبدأت أكرهها كلما رأيتها.
4-         التحرش : وهو السمة الرئيسية لشوارع وسط البلد والشوارع المزدحمة فى السنوات الأخيرة خلال أيام العيد.
5-         الباعة الجائلون : وتعتبر أيام العيد موسماً للشراء ويرتاح غالبية المواطنين للشراء السريع نظراً لزحمة المحلات لذا فإن الباعة الجائلين يتكاثرون بشدة فى تلك الأيام.
6-         المتسولون أو (الشحاتين) وفى أيام العيد ينقسم الشعب المصرى إلى قسمين بالتساوى تقريباً.. مواطنين، وشحاتين.. ويطلب القسم الثانى (حسنة قليلة تمنع بلاوى كتيرة) من القسم الأولانى، ويقوم القسم الأولانى بالشخط أولاً فى القسم الثانى ثم بعد ذلك يخرج الحسنة ليعطيها بإيدٍ خفية إلى القسم الثانى الذى سرعان ما يجهش بالدعاء للقسم الأولانى.
7-         الزحمة : وفى العيد يأتى البشر من كل فجٍ عميق إلى حديقة الحيوان والأزهر والأورمان والفسطاط والقلعة وكوبرى عباس وقصر النيل والجامعة وكافية الحدائق والكبارى والسينمات والميادين والكافيهات، وهى فرصة جيدة للصوص لكى يقوموا بعملهم فى المنازل الخالية.

بينما نستمتع بجو رمضان الجميل بتراوحيه وفوانيسه وكنافته وقطايفه وشوارعه المضيئة بمصابيحه إذا فجاءة أسمع صوتاً ينادى :
لا أوحش الله منك يا شهر الصيام

فيحزم رمضان شنطته ليرحل ، واعداً أيانا أن يأتى فى العام القادم، لكن لا ندرى من سيظل فى إنتظاره، الحياة، ومن سيأتى رمضان فى العام القادم فلا يجده.

تم البدر بدري
والأيام بتجري
والله لسة بدري
والله يا شهر الصيام

كلمات نرددها بحزن مع أواخر أيام شهر رمضان الكريم، ولا ندرى كيف مر هذا الشهر العظيم هكذا كلمح البصر إلا حينما نقرأ الأية "أَيَّاماً مَّعْدُودَاتٍ" فنزرف الدمعات على رحيل أيامه المعدودات الجميلة.. سائلين الله أن نكون من المحظوظين ببلوغ رمضان القادم.

أتمنى لكم عيداً سعيداً طيباً دسماً خالية من الزحمة والتحرش


أحمد الصباغ

30 comments:

عاشقه وغلبانه said...

كل سنه وانت طيب يا احمد
فعلا تم البد بدري والايام بتجري
ويارب يعيده عليك وعلينا بخير وصحه وسلامه
وعيد الفطر من غير كحك وبسكوت واللي لامواخذه البتيفور اللي بتقول عليه ده مايبقاش عيد حتي لو بنعملها ومانكلهاش زي حالاتي كده
ههههههههههههههههه

وبلاش تحرش ولا زحمه

بدراوى said...

خالو باشا
كل سنة و انت طيب و عيد فطر سعيد

sameh ezzat said...

شوف يا صباغ يا خويا هوا انا رائي ان ده مش عيب ان يكون استقبالنا للمناسبات بتكون ديما باشراء لان ده يدل اننا ناس مرتاحين ع الاخر وحياتنا وردي

طب بالزمه ينفع يكون في رمضان من غير ياميش وكنافه والقطايف والبسبوسه والذي منه ؟؟؟ ثم ياتي العيد ويأتي معه الكحك والسكوت والامؤخده البيتفور
وطبعا السربعه علي شراء لبس العيد اشكال والوان وادفع ياسيدي دا احنا في عيد الكل سعيد
:)

بس علي فكره من الاخر اي مناسبه في مصر بتحس بيها وبتحس من عادتنا الجميله واللي بتمني متقطعش ابدا حتي لو خربت بيوتنا
ياعم انتا لو رحت السعوديه واي بلد عربي مش هتحس بولا موسم من المواسم اللي احنا بحتفل بيها وبنعملها اعياد كمان

يالله كل سنه وانتا طيب يا صباغ وعايزين نتقابل ياراجل بقا وحشتني

nona said...

كل سنة وانت طيب الأول
كلامك صح
الناس بتتلكك أصلا علشان تشتري اي حاجه اللي له لزوم واللي مالوش المفيد واللي لأ
وربنا يبلغنا رمضان اللي جاي

P A S H A said...

كل سنة وأنت طيب وعيد سعيد عليك وعلى المسلمين جميعاً إن شاء الله ،، هو حضرتك بتصلي العيد في جامع عمرو ؟؟

الازهرى said...

لالالالا
أنا العيدعندى أبسط من كل ده
بعد الفجر أروح على النادى أكبر مع الناس ونصلى العيد ونرجع نسلم على كل الناس فى طريقنا رايح جاى

وبعدها أفضل فى البيت لرابع يوم العيد

بس خلاص

كل سنة وانت طيب وبالف خير

كل سنة وانت اجمل والى الله اقرب

عيد سعيد على كل المسلمين يارب

شوكولاتة said...

ربنا يبلغك رمضان القادم يا أحمد إن شاء الله ويسعدك إن شاء الله

كل سنة وانت طيب

م/ الحسيني لزومي said...

تقبل الله منا ومنكم
كع عام انتم بخير

Soul.o0o.Whisper said...

كل سنة و انت طيب يا خالو

و عيد سعيد عليك يارب و على العيلة كلها

و بجد بوست تمام
بس بذمتك مصر من غير كدا يبئا ليها طعم؟؟؟

صحيح بنغالى شوية و دا اللى غلط

بس لو غابت عنا المظاهر المرفقة (( حلوة المرفقة دى

بتوحشنا و بنفتقدها
و اسأل اى حد مسافر برا


تحياتى
و دمت بكل خير

ضكتور جدا said...

كل سنة وانت طيب يافندم
وعيد سعيد علينا كلنا سواء بأكل وهدوم أو من غيرهم

أميرة الرومانسية said...

كل سنة وانت طيب يا احمد
عندك حق في كل كلمة
دائما اي مناسبة عندنا مرتبطة ارتباط وثيق بالاكل والشرا
نفسي اعرف ليه
بس علي العموم اكيد المظاهر ديه هي اللي بتضفي الفرحة في قلوب الناس
كل سنة وانت طيب
اه ومتنساش الكحك والبسكويت

أحمد سعيد بسيوني said...

بسم الله الرحمن الرحيم

تقبل الله طاعاتكم

وكل عام وانت بخير

جعله الله عيد حب وسعادة وهناء

دمتم بود

حمدى جعوان said...

كل سنه وانت طيب يا احمد ويارب يكون عيد مبروك علينا جميعا

(المهاجر الى الله) said...

السلام عليكم ورحمة الله وبركاته:
فى الاول كل عام وانتم بخير بمناسبة عيد الفطر المبارك اعاده الله علينا وعلى الامة الاسلاميةبالخير واليمن والبركات:
.............................
قولهم الناس دى اللى مفيش فايدة فيهم دول ،
يبقى الواحد فيهم يستلف عشان يعمل الشويتين دول وبعد الهوجة ماتعدى يدخل فى دوامة السداد لرمضان اللى جاى .
عموما هوة ده الشعب المصرى فى عصر مبارك.
تحياتى

يا مراكبي said...

ههههه

حلو آخر بوستين دول

كل سنة وانت طيب

سومه...مجنونه فى بلد عاقل said...

كل سنه وانت طيب يا صباغ مع انك مش زينا دا انت من تل ابيب يعنى لسه عيدك مجاش وحتعيد مع الاسرائيليين
:p
(وراك لحد ماخد العيديه:)

زى الهوا said...

Happy 3id

ذات النطاقين said...

اسلوبك مشوق وجذاب
اجبرتني علي قراءة الموضوع للآخر

عيد سعيد

د. ياسر عمر عبد الفتاح said...

كل عام وأنتم بخير

كل عام والأمة الإسلامية إن شاء الله منتصرة

كل عام ونحن جميعاً إلي الله أقرب وعلي طاعته أدوم

تقبل الله منا ومنكم صالح الأعمال

ماء تشرين said...

كل سنه وحضرتك طيب يارب مهما المصرين كده لازم الفرح تكون ملموسه وخارجيه لانو هما من جواهم مش فرحنين هما بيحولو

عاشقة الأحزان said...

كل سنه وحضرتك طيب

عيد سعيد علينا وعلى الامة الاسلاميه جمعاء

مودتى
ايناس

بنوتة said...

السلام عليكم
موضوع حضرتك جميل جدا وطرقتة شدتنى جدا واصبحت اسفة جدا انى مزرتش المدونة من زمان
كل سنة وحضرتك طيب
بس انا ليا راى فى كلام حضرتك
انا شايفة ان الجو الرمضانى بتاع زمان مش موجود دلوقتى ويمكن للسبب دا بقينا بنتمسك بالحاجات اللى سبق ذكرها فى الموضوع علشان نحسس نفسنا بالعيد

عاشقة الفردوس said...

: )

امي بتشتري كام كيلو كده علشان اخواتي يتسلو فيهم : )))


لحد مايخلص العيد ونعمل لنا شوية لوحدنا بئى : )


كل عام وانت بخير

عيد سعيد عليك وعلى كل المسلمين

ريمان ونوسه فى هاكونا مطاطا said...

كل سنه وحضرتك طيب

عيد سعيد علينا كلنا

مودتى

Angel said...



أ/ أحمد الصباغ

كل سنة وحضرتك بكل خير

وعيد سعيد عليك وعلى كل أحبابك
إن شاء الله


للأسف عادات الشعوب بتتوارثها الأجيال

سواء هي مفاهيم صحيحة أم خاطئة

بس هنعمل ايه شعبنا كده

وربنا يجعل كل أيامنا سعيدة

تقبل مروري الأول ولي الأخير



Angel Love

Angel said...



سامح عزت ...


بس علي فكره من الاخر اي مناسبه في مصر بتحس بيها وبتحس من عادتنا الجميله واللي بتمني متقطعش ابدا حتي لو خربت بيوتنا
ياعم انتا لو رحت السعوديه واي بلد عربي مش هتحس بولا موسم من المواسم اللي احنا بحتفل بيها وبنعملها اعياد كمان


فعلا أستاذ سامح معاه حق

واسأل مجرب ومتغرب

ربنا يديم عليك السعادة

وعلى شعبنا وعلى الأمة العربية



Angel Love

ماما أمولة said...

كل عام وانت بكل خير يارب

سنابل قمح said...

كل سنة وانت طيب يا أحمد
ربنا يعيده عليك انت وكل حبايبك وانتو ف احسن حال
بجد العيد لما بيكون اورديحي بيبقي وحش اوى وكأنه ماجاش زى السنة دى عندنا كدة
ستي الله يرحمها كانت لو حد قالها بلاش كحك العيد كانت تزعل وتقوله ده فال وحش هو احنا عندنا عزا ؟ ربنا ما يحرمش البيت من فرحة العيد وكحك العيد

مواطن شووجااع said...

ودق الكفته وتصبيعها وقليها

دا معلم بارز من معالم الإحتفال بالعيد


بس المظاهر بتختلف من كل حتة للتانية ومن محافظة لأخري

سبهللة said...

تدوينة أكثر من رائعة
كل سنة وانت طيب
يا خال