خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Oct 23, 2009

المؤتمر السادس قبل الميلاد



أجلس فى البلكونة وتحيط بى كوبايات الشاى وقراطيس اللب من كل جانب، وتحول المكان بفعل قراءة الصحف وقزقزة اللب إلى مقلب زبالة عمومى، لا يقل قذارة عن ميدان لبنان ومدينة نصر.
بدأت أتصحف الجرائد التى لا تسر عدو ولا حبيب.. وبدأت حالة من الهزيان.
من أجلك أنت.. شعار مؤتمر الحزب الوطنى الجديد، يا حلاوة يا ولاد..
ست مؤتمرات قام بها الحزب الوطنى ولم يقعد حتى هذه اللحظة :

الأول كان شعاره : فكر جديد.. وتم تحريفه من قبل معارض خبيث إلى فجل جديد.

الثانى كان شعاره : العبور الأول.. يظهر إن ده هو العبور من عنق الزجاجة اللى بيقولوا عليه.

الثالث كان شعاره : العبور الثانى .. وده بقى العبور من رأس الزجاجة.. مشيها راس وخليك مؤدب.

الرابع كان شعاره : فكر جديد وإنطلاقة ثانية نحو المستقبل.. يا أم الإستهلاك والملل، عبور اول وعبور ثانى وفكر جديد أول وفكر جديد ثانى مع إنطلاقة - على الرابع - نحو المستقبل

ثم يأتى المؤتمر الخامس بالشعار الأشهر : مصر بتتقدم بينا.. ويقال إن مصر فضلت تتقدم بيهم حتى وصلت إلى القرن السابع عشر.. قبل الميلاد.

أما المؤتمر السادس فقد رفع الحزب الوطنى – فض فوه – شعار : من أجلك أنت.

ولا نعرف إلى من كان يشير الحزب الوطنى بإصبعة أثناء قول هذه الجملة..

أغلب ظنى أن أعضاء الحزب أشاروا بأصبعهم جميعاً إلى الوريث الوحيد قائلين فى نفس واحد : من أجلك أنت، لكن المواطن الغبى أخدها على نفسه، طب ما كانوا يقدروا يقولوا من أجل المواطن مثلاً، أو من أجل مصر.
لا أدرى لماذا أصبح المواطن المصرى بياخد كل الكلام على نفسه.

والمهم أن محصلة الستة مؤتمرات.. زبالة فى كل مكان، الرشوة والمحسوبية والبطالة والمخدرات والأمراض المتوطنة أصبحت جزء لا يتجزأ من خياشيم المواطن العادى فى مصر.

والأهم .. أن الأجيال الجديدة عمرها ست مؤتمرات، والمولودين حديثاً عمرهم تلات مؤتمرات أو مؤتمرين، ويمكن فى المستقبل الإشارة إلى عمر الإنسان بالمؤتمرات، فيقول الرجل : إبنى الكبير محمود عنده خمستاشر مؤتمر، وبنتى سعاد الصغيرة عندها دلوقت ماشاء الله سبع مؤتمرات.

وترفض البنت العريس المتقدم بحجة إنها لسه صغيرة وما كملتش عشرين مؤتمر، وتقول لصاحبتها إتقدم لى عريس عنده خمسة وعشرين مؤتمر.

أسماء مقترحة للمؤتمرات القادمة :
-       العبور الثالث والرابع والعبور الخامس عشر
-       من أجلك أنت يا مواطن
-       مصر بتتقدم بينا اللى يحب النبى يزق
-       مصر بتتحرش بينا ( عندما يتواكب المؤتمر مع العيد)
-       لما إنت ناوى تبيع ما قولتش ليه؟
-       كلنا إيد واحدة يا بهجت
-       فكر جديد كمان وكمان
-       جديد الفكر
-       الفكر المتجدد
-       التجديد الفكرى
-       التجدد الإفتكارى
-       الإفتكار التجديدى

كل مؤتمر وإنت طيب .. إنت هاتتم كام مؤتمر السنة دى؟

أحمد الصباغ

8 comments:

يا مراكبي said...

نفسي أحضر الحاجات الكوميدية دي

ألا المؤتمرات دي فيها أكل وكده؟

يا مراكبي said...

نفسي أحضر الحاجات الكوميدية دي

ألا المؤتمرات دي فيها أكل وكده؟

esraa said...

ههههههههه
أهو الهم اللي يضحك

شفـقــة و إحســــان said...

والله يا احمد مش هاكدب عليك
أنا عن نفسي لسة "مجفل" مؤتمري الأربعين
وطبعا ده بالتعداد الاشترااكي أو الوفدي
ماهو الوطني بتاعهم ده أيامها كان لسة مجرد فكرة

وبعدين انت داوش دماغك ليه ؟؟
ماتركزش معاهم أوي كده
مؤتمر خامس مؤتمر سادس ماتفرقش
أهي مؤتمرات وبتعدي
وتعيش وتفتكر

تحياتي
إحســان النحــاس

karim said...

يااحمد انت واللة بتاذن فى مالطة مش عارف ليية دية سمتنا مع الاسف وهى من شيم مصر دايما ساكتين وخايفييين, ارجو ان ترى مايعرض لدى ومنتظر راييك, تحياتى

نعكشة said...

:D

ضحكتني والله

نظراً لإني مسمعتش عن ولا مؤتمر من المؤتمرات

فانا حاسة انك بتتكلم عن دولة اخرى ولتكن كوتسيكا على رأي مسرحية من المسرحيات مش فاكرة اسمها

يلا خير

آه بالمناسبة
حلوة قوي الراجل اللى بيشرب شاي
و القطة اللى بتبص بصة تخوف دية
و الشارعين الفاضي و المليات
و الماية اللى جمبها حتة زرعة و حتة موجة ضغنتوتة

الصورة بتاعت الراجل اللى راكب حصان مايلة
هيا و الصورة بتاعت العمارة و الصورة اللى عليها علم اسود

عمو اللى بينادي على الناس اللى تحت عشان عوقوا فى مجايب الطلبات دة تحفة
و البنوتة اللى بتداعب الشاطي او الشاطيء يداعبها هادية قوي
جميلة يعني

فيه بعض الصور كنت بيبقى نفسي تكمل
بحسها مقطوعة كدة
زي اية يا نعكشة زي اية
استني اعيدهم تاني

زى القطة امو عيوب بتخوف دية
انا كنت عاوزة ودنها مليش دعوة
و العيش اللى كان بيتعمل على البتاع السخن دة انا كنت عاوزة وش الولد التاني

و الصورة اللى يتعانق فيها هذا المبنى مع الماء و فى خلفيتها فنارة
كنت عاوزة باقى المبنى من ناحية الماية يبان

والصورة بتاعت القطة النايمة

آه صحيح الصورة بتاعت الكوتشي و الشراب تحفة

بس خلاص

سلامٌ عليك

ست البيت said...

يا ابن الايه يا أحمد جامدة قوي الافتكاري والفكر الجديد وتجديد الفكر
ضحكتني والله
انا عندي دلوقتي 28مؤتمر وماشية في المؤتمر الخمسين

nanaalol said...

ههههههههههههههههههه
و الله ضحكتنى يا أ/ أحمد أنت لسة بتابع الكلام الفاضى ده ؟ يا عم كبر دماغك و فضك من دى السيرة خاف على صحتك و شبابك ، أنا عن نفسى بطلت أعبرهم أصل أنا صحتى على أدى و مش ناقصة بهدلة . ربنا يجملها معانا بالستر . نور على