خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Nov 11, 2009

عزيزتى بيونسيه

 

عزيزتى بيونسيه..
تابعت وتابع معى الملايين من أبناء هذا الوطن التعبانين؛ أخبار مراسم تغيير ملابسك على خشبة المسرح، ونحن فى حالة إنتباه وصحصحة لم تمر على مواطن منّا منذ أكتوبر تلاتة وسبعين.

والحقيقة؛ لم يكن شغفنا بمتابعة تغيير ملابسك نوعاً من قلة الأدب، فقد تخطينا هذه المرحلة من سنين بعد أن قامت زميلتك هيفاء بتقبيل الواوا، والرقص فى ساحة الحسين، وبعد أن قامت زميلتك دينا بالرقص فى حفل بروم المدرسة الثانوى، ومداعبة طموحات الشباب أمام إحدى سينيمات وسط البلد، ففجرت ثورة التحديث والتطوير الأيدولوجى وغيرت مجرى التاريخ فصار التحرش الموسمى إحدى مظاهر إحتفالات المصريين بالعيد، وتحولنا من شعب طموحه المشاهدة، إلى شعب طموحه المداعبة.

وأنا لا أبدى إعتراض لا سمح الله على تغير ملابسك على خشبة المسرح، فكلنا يعرف أن تغيير الملابس حرية يكفُـلها الدستور المصرى للجميع، ومنا من يغير ملابسه تحت الكوبرى، ومن يغيرها فى البرلمان، أو فى الوزارة وأحياناً فى الطريق العام ولا أحد يسأله تلت التلاتة كام.

أما عن السيد زاهى حواس الذى تأخرتى عن ميعاده فى سفح الهرم لمدة ساعتين كاملتين إنشغل فيهما بكتابة مقال، فقد أثبت أنه ليس فقط عالم آثار لكنه أيضاً رجل حمش، وقد أدمعت عيناى وأجهشت بالبكاء وأنا أقرأ على صفحات الجرائد خبر توبيخ زاهى حواس لكِ لتأخرك عن الميعاد، وأشفقت عليكى وفكرت مراراً أن أنشأ جروب على الفيسبوك تضامناً معكى، لكننى علمت فيما بعد بأن تأثير جسدك على الشعوب أكبر بكثير من تأثير الفيسبوك.

وقد أعجبنى موقف زاهى حواس الحمش، وعرفت انه رجل يفضل الإثارة على الأثار لكنه لا يعجبه الحال المايل كمعظم المصريين الذين يسارعون (بشكم المرأة العوجاء على حنكها).

ولعلمك يا عزيزتى بيونسية..
نحنُ شعب نقدر الجمال والتعرى تقديراً كبيراً، لا يستثنى من ذلك علماء الدين، فلدينا رجل عالم جليل نزع النقاب عن وجه فتاة لكنه لم يحرك ساكناً عندما علم أنك تودين تغيير ملابسك فى سواحلنا المصرية، فالتعرية يكفلها القانون والدستور ولكن التغطية تحتاج لبعض التروى.

أغضبنى فقط يا بيونسيه ذلك الدخان الكثيف الذى كان يصاحب تغير ملابسك، والتى نشرت صوره الجرائد المصرية، فحرمنى متعة المشاهدة الكاملة، وإكتفيت بإستخدام خيالى المريض فى ترميم الصورة المهترئة نتيجة الدخان الكثيف، لكن والحق يقال أثبت خيالى كفاءة عالية وإبداعاً يفوق الوصف.

ثم أن المعارضين لمجيئك إلى مصر وتغييرك الملابس على المسرح لديهم عقد نقص وقصر ديل، فالجميع هنا فى مصر يطالب ليل نهار بالتغيير، ثم عندما تنادين إنتِ بالتغير يصيب الجميع حالة هلع وحنبلة.

والدليل البين على كذب هؤلاء هو تلك التذاكر ذات الألفين جنيه التى نفدت عن بِكرة أبيها، والتى إشتراها شباب من عمر 16 سنة إلى عمر 23 سنة، رغم أن معظم الشباب المصريين يحتاجون لمثل هذا المبلغ حتى يدخلون دنيا ويلبّسوا دبل.

عزيزتى بيونسيه..


لقد نورتى مصر، وكنت أتمنى من قلبى أن تستضيفك منطقتنا، فتتعرفين على شباب الحتة الكرام، ويتعرفون عليكٍ، فترين ما لم ترى عينيكِ، ويرون ما لم ترى أعينهم.



أحمد الصباغ




15 comments:

سومه...مجنونه فى بلد عاقل said...

هههههههههههههههههه الله يخربيت الشيطان انت مصيبه يا صباغ
اقولك اطلب من الصين تنزل منها نسخ :)) نوزعها ع الشباب الجديد لعلمك دكاتره التجميل اكتر ناس حيشتغلوا فى الفتره القادمه لعمل نيولوك بيونسيه

فاتيما said...

إيه يا صباغ
عاوز تجيب الاخت بيونسيه
توديها فين يا عم إنت ؟؟؟
كرم ضيافة
مصرى صميم
طيييييييب
حلو البوست قوى
أضحك الله سنك

soaad fakoory said...

مقال مكتوب باسلوب ساخر لاذع يشى بثقافه واسعه ومعلومات قيمه ..وينقصه ان زاهى حواس بعد توبيخها ..اهداها نسخه من كتابه الجديد ..استاذ احمد اهنئك على اسلوبك الرائع وبوست جميل..ة

dreem said...

ههههههههههههههههههههههههههههههههههههههههههه
برافووووووووووووووووووووو تسلم ايدك والله يااحمد
فنان يادى الجدع
المفروض كلامك ده يتنشر فالجرنال القومى .. أى والله
ألا انت عامل ايه ؟

Dr. Kafy said...

أحييك
بوست جامد و معبر فعلا

بس تقول إيه للمصريين الغلابة اللى مش لاقيين ياكلوا لكن معاهم ثمن حفلة بيونسيه!!!

~PakKaramu~ said...

Visiting your blog

المنباوي said...

استاذ أحمد الصباغ
تحيه تقدير وتبجيل واحترام .. ان لك موهبه حقيقيه في فن الكتابه عموما والساخره منها خصوصا ذات اسلوب سلس ممتع معبر
وان كثير من الكتاب المعاصريين لا يمتلكون تلك الموهبه
فهنيئا لك بموهبتك وهنيئا لي بصديق مثلك

karim said...

انا عايز اسال سؤال يعنى هى جت عليها و الدنيا قامت ياعم سيبك, الدنيا خربانة فى كل حتة ماتجيش بقى عند دية وتتكلم, كلة فى اللاوعى, بس ياترى مين اللى هايجى بعديها, اللة يخرب بيت المسؤولين اللى مش حاسين باى شىء

bos bos said...

عزيزتى بيونسيه..



لقد نورتى مصر، وكنت أتمنى من قلبى أن تستضيفك منطقتنا، فتتعرفين على شباب الحتة الكرام، ويتعرفون عليكٍ، فترين ما لم ترى عينيكِ، ويرون ما لم ترى أعينهم.


ههههههههههههههه
كنت عايزاها تشوف إيه بس ما تخلى الطابق مستور
كان هيجيلها صدمة من اللى هتشوفه ومش أى صدمة

dr.lecter said...

انت مسخره يااحمد بجد

انا حاسس بكل حرقه في كلامك يابني وبالنيابه عن 3 مليون شاب من نفس سني تعبانين وعندهم كبت باتضامن مع التدوينه دي

ست البيت said...

بوست جامد جااااااااااااااامد
من هنا للصبح
بس يبدو انك زعلان ان محدش عزمك
جامدة الحته بتاعته شيخ الأزهر
معلش كنت بكلمك وانا في الشغل
محدش يعرف وش منوسي

ست البيت said...

هي اتانخرتعلى ميعاد زاهي أفندي
لأ ملهاش حق
وبعدين حتستضيفها فين يا ولد يا صباغ
أقولك كنت استضفتها على البوصة
اهي تنور مصر كلها من هناك
ايه القباحة اللي مصر بقت فيها
وشيخ الأزهر الجميل ما اتحمقش ليه
وبتاع عيادة للكبار فقط
ما لطعش علينا برواية عصماء ولا مقال
ساخن مطالباً بوقف المسخرة
ولا الحرية في قلع الهدوم اما لبسها فقرار آخر
وبعدين أنت نيتك وحشة قوي يا أحمد
كل الحكاية انها كانت رايحة تشارك في تنشيط مشروع الصوت والضوء
فبمجرد أن ابو الهول حيشوفها حينطق لوحدة
من دون الحاجة لكهرباء ومولدات وتكالييف
وموضوع الضوء محلوله هي أساسا نورت مصر كلها
ومن هذا المنخنق أنا أطالب بهدم السد العالي لزمته ايه لما هي منورانا كده
ألا صحيح يا خالو حد اطمن علي أبو الهول ؟
ألا يكون كت مع الست بيونسييه ولا حاجة
وبعدين وقتها بصراحة بصراحة مش حيبقى عنده دم
اشحال هو مستولي على كل اللمبات الغير موفرة للطاقة اللي بتنزل مصر
كل ما حاجة تنزل من المطار عليه عدل واللمبة من دول ما فيش في بقها غير اللسفنكس اسفنكس
دا ابول الهول دا طلع طماع بشكل
يا لا قصر الكلام
حركة التغيير الجاية امتى يا خالو

رحــــيـل said...

هههههههههههههه

لاء معاك حق بجد
المفروض كنت توجب معاها
ازاى تسيبها تمشى من مصر بسرعه كده

اتمنى انك تكون بخير
ويارب تقرا رسالتك الست بيونسيه
هترجع تانى اكيد

الشعب لابد له من حكومه تشكمه said...

انا اسفه انى هعلق على موضوع مروه هنا بس مش عارفه الاقى الكومنت على البوست هناك..
المهم هو مش اتحكم عليه بالسجن مدى الحياه:( هو اتحكم عليه ب 15 سنه وبسسسس وبعدهل يخرج عادى...
ودى اكبر عقوبه فى القانون الالمانى حتى عائلة مروه غضبوا جداااااااااا بعد الحكم..لانهم كانوا عاوزينه مدى الحياه..

انا اسفه انى علقت هنا ..

مروة الزارع said...

هههههههههههههههه
فعلا لازم تيجى عندكم
بس ياريت تأكلها من عند المليجى
يعنى تاخد الجنسية كمان
هههههههههههه
هو مش اسمة المليجى برضوا
...........

وحشنى يا خاااااالوووووووو بجد

انا جبت يوسف على فكرة

عقبالك