خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Oct 13, 2010

مش ممكن نتعرف

(3)

التقاطع تحت كوبرى غمرة .. تاكسى واتوبيس سياحى وعربية كارو وميكروباص لابسين فى بعض .. قطع من الخردة يتخللها أعضاء بشرية ونهر من الدم

رجل عجوز : لا حول ولا قوة الا بالله
رجل طويل : حد يشيل قصادى
شاب لزميلة : تعالى اما نتفرج
بنت لزميلتها : ياااى حاجة فظيعة
ولد لابوه : هما الناس دول نايمين كدة ليه يا بابى
رجل خواجة : اوه ماى جود
بنت مثقفة : ماهم لو ماكنوش شعب بقر ما كانش ده حصلهم
فتاة ليل لصاحبتها : ما تيجى ندور فى الاعضاء دى يمكن نلاقى حاجة شغالة هيهيهيهيهييييي
رجل دين : اللهم احسن ختامنا يا ارحم الراحمين
شاب فرفور : يالهوى دم
رجل شرطة : ياللا ياض انت وهو من هنا
رجل طفيلى : هو فى ايه؟ هه؟ هه؟
رجل مفتى : البنت اللى هناك دهى .. وقفت فجاءة وهى بتعدى الشارع .. قام التاكسى دهوه دخل فى العربية دهى .. قام الاتوبيس دهوه مقلوب عليهم
ولية كبيرة : يا عينى يا كبدى

الجميع بلا استثناء التف حول الحادث فى حلقة دائرية تقوم بمهمة منع الاكسجين عن الوصول لأى كائن حى داخل الحلقة)
رجل: فى جثة بتتحرك هناك اهى
(صوت صرخة تهز منطقة رمسيس)
منى : يالهوى يامة الحقووونى .. ما حدش يلمسنى .. ماحدش يلمسنااااااااااى .. اوعى ياض ايدك .. اوعى ايدك يابت

الجميع يهلل .. الله أكبر .. واحدة عايشة .. أخذوا فى التصفيق الحاد وقد تناسوا باقى الجثث
فجاءة .. تمتد يد شخص يرتدى قميص اخضر مخطط .. لتنتزع يد منى من وسط الانقاض


منى ترقد فى الجبس فى بيتهم .. ولاء تمسك قلم وتسلى نفسها بالرسم على الجبيرة فى قدم منى
منى (تتكلم بصعوبة) : تصورى انه فضل بايت للصبح حتى بعد ما اهلى ما جم المستشفى .. وتصورى انه تبرع لى بدمه .. فصيلته نفس فصيلتى .. تخيلى ان دمه بيجرى فى عروقى دلوقت
ولاء (وهى ترسم على قدم منى المتجبسة) : الله الله .. ده ما طلعش هو اللى فارس مجروح .. ده انتى اللى طلعتى أميرة متخرشمة .. بقولك ايه .. انا ما فهمش الكلام اللى انتى بتقوليه ده .. الواد ده وشه نحس عليكى .. ده حتة واد صايع متعرفه عليه من على النت .. يعنى عايز يقضيها .. يا تقضيها يا إما تفكك.
منى (تتأمل ما رسمته ولاء) : بس ده عمل كل ده وبعد كدة مفيش اكتر من مكالمة كل يوم بيتطمن عليا والقلق مالى صوته .. ما بيتكلمش فى حاجة اكتر من كدة

على القهوة
عادل : ياراجل؟ حاجة غريبة اوى .. دى كان شبه الرغيف المدعم دلوقت تلاقيها شبه قطر الصعيد
أحمد (بعتاب وضيق) : أتلم بقى .. البت مخيشة فى تاكسى وبقت شوية اعضاء بشرية .. بعدين ما تتخيلش اهلها ناس محترمين اد ايه
عادل (يفكر بعمق) : إنت بتحبها يا احمد؟
أحمد (مرتبكاً) : لاااا مش حب .. بس أصل يا اخى اهلها ناس محترمين اوى .. بعدين البت غلبانة ورقيقة .. هى صحيح لسانها عامل زى مضرب التنس .. بس من جوة زى الجبنة القريش .. الصراحة بقى يا عادل أنا بحبها
عادل : بتحبها؟
احمد : اه .. وبموت فيها يا اخى .. ملهوف عليها كدة
عادل : طب وانت ناوى على ايه؟
أحمد : امممم .. هقابلها بكرة .. وهفاجئها


فى بيت منى .. منى وامها تجلسان على الأرض ويقرطفان حزمة من الملوخية .. أم منى تلقى بالملوخية على الأرض وتصرخ
أم منى : يالهووووووى .. الحقووووووونى يا نصيييييييبتى
منى : ما تهدى يا حاجة وبلاش فضايح
أبو منى (صوته يأتى من الداخل) : إشهقى كويس يا ولية خلّى شمخة الملوخية تطلع تمام
أم منى : تعالى يا رجل شوف الفضيحة بنتك عايزة تتجوز واد صايع من بتوع النت
(أبو منى يأتى من الداخل بالفالنة والبتاع .. وهو يفرك عينيه ويبدو مذبهل)
أبو منى : فى ايه يا ولية؟ الملوخية اتدلقت على النت؟
أم منى : يادهوووتى يا نصيبتى .. بنتك انحرفففففت يابو منى
أبو منى صارخاً : بقت بتشرب ملوخية؟
أم منى : يامصيبتى يانا .. ياراجل بنتك انحرفت وعايزة تتجوز واحد متعرفة عليه من على النت.
أبو منى : ايه؟ بتقولى ايه؟ ده انا لازم اربيها .. طاااخ طااااخ طااااخ


أحمد ومنى (ومنى لازالت متخرشمة إثر الحادث والعلقة ) يجلسان فى نفس المكان البيئة المطل على النيل ويشربان شاى بنعناع
أحمد : يعنى أيه اهلك رافضين؟ طب وانتى قولتيلهم ليه اننا متعرفين من على النت؟ ما قولتيش ليه كنت زميلك فى جامعة .. فى مدرسة .. فى اى نصيبة
منى : جامعة ايه ومدرسة ايه .. ماهم عارفين انى مخلصة كلية بنات .. والمدرسة والجامعة كانو بنات فى بنات .. زميلى منين بقى .. بعدين ما ينفعش اكدب عليهم
أحمد : هما شايفين لك عريس ولا ايه؟
منى : مش عارفة .. بس حاسة من كلامهم ان فى حد بيحوم.
أحمد (مداعباً) : خلاص نضرب ورقة عرفى؟؟
منى (مداعبة) : جتك ضربة فى نافوخك .. انا غلطانة انى حبيت واحد منحرف
أحمد : أنا منحرف يا بتاعة الملوخية .. بتشربى ملوخية عشان تنسى؟

(يتمشيان فى وسط البلد الى أن يصلا تحت كوبرى غمرة)
أحمد : فاكرة أول مرة قلبك دق ونطق بإسمى؟ كان فى المكان ده
منى : فاكر أول مرة لمست فيها ايدى؟ كان فى المكان ده
أحمد : أيوة وايدك كانت يومها أربع صوابع بس .. لقيتى الحاجات اللى وقعت؟
منى : بس يا بايخ .. وانت كنت محتاس وعمال تلم اشلائى واخدتنى فى تاكسى ووديتنى المستشفى
أحمد : .. ايوة والتاكس لهف خمستاشر جنيه .. فين الخمستاشر جنيه اللى عليكى يا بت
منى (بجدية واهتمام): إعمل محاولة أخيرة .. كلم بابا واقعد معاه .. واعزمه على شيشة معسل .. يمكن دماغه تلين
أحمد : معسل وقص وسلوم.. وراه لحد ما يشتعل ذاتى .. أنا مش هسيبك ابداً يا منى .. اوعدينى إنك ما تسيبينيش


(بعد شهرين على القهوة .. وأحمد يمسك الموبايل ويعاود الاتصال مرات ومرات)
عادل: أبوها وقفل السكة فى وشك .. وامها وفرجت عليها الدنيا .. والبت موبايلها اتقفل من شهرين .. واختفت نهائى عن الوجود .. وانت لسه بتدور عليها
أحمد : والله يا عادل مش عارف اعمل ايه.. بس أنا ناوى اعـ..

فجاءة
يرن تليفون أحمد ليعلن قدوم رسالة
يقرأ أحمد الرسالة:

صحيح اتجوزت وصحيح بقيت حامل ف أحمد صغير بس مش هنساك ابداً .. يا احلى احمد فى الدنيا .. منى


أحمد الصباغ

23 comments:

موناليزا said...

:)

R-H-S said...

يا احلي احمد في الدنيا
جامدة فحت هههههههههه
مش عارف تمطها شويتين

star said...

قصه لذيذه قصيره مليانه أحداث ممكن تحصل و ديه حلاوتها وجمالها يكمن فى نهايتها و اقعيه بشكل كبيييييير أوى دومت مبدعا يا أستاذ أحمد
تقبل مرورى وتتبعى لك شكرا

ويكا said...

بجد انت مجرم

قطة وخيوط said...

صحيح اتجوزت وصحيح بقيت حامل ف أحمد صغير بس مش هنساك ابداً .. يا احلى احمد فى الدنيا .. منى

الحب فى زمن النت
صحيح اتجوزت
وصحيح بقيت حامل
بس مش هنساك
الله على التضحية بجد
ده حب منى و أحمد 2010

عاشقه الرومانسيه said...

فى سؤال بيزن فى دماغى يارب الاقى عندك اجابه له
الا يااخويا من يوم ما وعيت على الدنيا واحمد ومنى عمرهم ما اتجوزوا الا دايما متشحططين كده
ماتعرفش ايه السبب؟


نصيحه بقى بما انك احمد اوعى تحب منى
عايزه أشوف عيالك ياابنى قبل مااموت

قلم رصاص said...

جميله اوي والله
تسلم ايدك بجد

ضحكتني الرساله اللي في النهايه

هههههههههههههه

دمت مبدعا

ريحانة الاسلام said...

اوبااااااااااااا
يا للصدمة
....
الصراحة كتابات حضرتك رهيبة بجد
ماشاء الله
دمت متميزا

gogo!sf said...

ايه يا ابنى ده حادثه وحب وجواز وحمل
بصرف النظر عن ان الحادث تحت كوبرى غمرة فعلا متكرر وحقيقى بيكون بنفس وصفك وده اكتر شىء اثر فيا والمنى جدا

لكن مش هنكر ان بعد اما اتأثرت بسبب الحدثه موت من الضحك على بابا منى وماماتهاوكمان على اسلوب احمد وطريقه منى

بجد انت بتوصف حاجه من واقع الحياه اينعم انا مسمعتش ولا شوفت اتنين بالاسلوب ده مع بعض بس انا واثقه انه فى كتير من نفس الفصيل

قصصك جميله وبيعجبنى اسلوبك فى الحوار

دومت بكل الخير يا افندم

Noha Saleh said...

بجد مدهشة
حلوة جدا ونهايتها جميلة اوى
احمد ومنى فى القرن الواحد والعشرين

Sonnet said...

بعد التحية
أنا عندي فكرة عن التدوين
أنا قيمت أو انتقدت مدونتي،ممكن تشارك و تقيم مدونتك!
http://shayunbiqalbi.blogspot.com/2010/10/2.html
أنت مدعوة للمشاركة في حملة مدونات في الميزان
مع خالص تقديري للمشاركة

شيرين سامي said...

حلوه أويييييييي وواقعيه جدا بجد انت أسلوبك بيشد بجد و سعيده اني بتابعك

شخابيط said...

الحوار حلو اوى ودمه خفيف
بس دى

"صحيح اتجوزت وصحيح بقيت حامل ف أحمد صغير بس مش هنساك ابداً .. يا احلى احمد فى الدنيا .. منى"

الحاجه الوحيده اللى مش عجابتنى فى القصه

عبد الرحمن said...

روميو و جولييت
قيس و ليلى
و أخيرا منى و أحمد
قصة جاااااامدة تنييين
:)))

ست البيت said...

دمعة حزينة
بس دا كل اللي اقدر اقوله

sweet angel said...

هههههههههه
جميله والله
بس ايه النهايه دي
هي دي صحيح النهايه الطبيعيه
انما بردو محزنه هو احنا ناقصين اكتئاب ؟

عباس ابن فرناس said...

هايل هايل هايل
بجد قصة فى منتها الجمال واقعيه جدا يمكن علشان كدا انا اتئثرت بيها جامد
ملحوظه ضغيره البنت اللى قالت:ما هم لو ما كنوش شعب بقر ماكنش ده حصلهم :حضرتك متاكد ان اللى قالت كدا مثقفه
تحياتى

كلمات من نور said...

وفية قوي

تحياتي

re7ab.sale7 said...

^-^ ابتسامة دي
بجد حلوة اوووي وتضحك اووي وممتعة اووي وواقعية اوووي
وانا كدة مبعرفش اكتب قصص خااااالص اوووي

سما الحب said...

والله زعلت
بس عارفه انه بيحصل كتييييييييييييير قوي
ربنا يهون علينا الدنيا ومافيها من الام

ahmed said...

قصه لذيذه قصيره مليانه أحداث ممكن تحصل و ديه حلاوتها وجمالها يكمن فى نهايتها و اقعيه بشكل كبيييييير أوى دومت مبدعا يا أستاذ أحمد
تقبل مرورى وتتبعى لك شكرا

ali said...

بجد قصة فى منتها الجمال واقعيه جدا يمكن علشان كدا انا اتئثرت بيها جامد
ملحوظه ضغيره البنت اللى قالت:ما هم لو ما كنوش شعب بقر ماكنش ده حصلهم :حضرتك متاكد ان اللى قالت كدا مثقفه

zaid said...

بصرف النظر عن ان الحادث تحت كوبرى غمرة فعلا متكرر وحقيقى بيكون بنفس وصفك وده اكتر شىء اثر فيا والمنى جدا

لكن مش هنكر ان بعد اما اتأثرت بسبب الحدثه موت من الضحك على بابا منى وماماتهاوكمان على اسلوب احمد وطريقه منى

بجد انت بتوصف حاجه من واقع الحياه اينعم انا مسمعتش ولا شوفت اتنين بالاسلوب ده مع بعض بس انا واثقه انه فى كتير من نفس الفصيل