خالو أحمد الصباغ

مدونة أحمد الصباغ ترحب بكم .. من الآن لكى تستطيع أن تعبر عن أرائك وغضبك من الاحتلال ومن النظام الحاكم .. فعليك أن تمتلك مدونة .. وحجر .. وحذاء Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed....Welcome to my blog! Here you will find all things about me.. i am 31 years Egyptian Blogger .. i blogging on journalism, Poetry, Caricature, Photography, Arts, Sports.. The main ait for me is to connecting people and to discover myself..Ahmed

Sep 23, 2014

أزمة منتصف العمر


من أعراض ‫#‏ازمة_منتصف_العمر‬ اللى بتصيب البنى ادم فى التلاتينات .. حاجات يمكن لو انت مش مركز فيها مش هتاخد بالك منها .. فأحب أديك نبذه عنها بما انى فى التلاتينات وبما انك ممكن بشكل او بآخر بتتعامل معايا .. والحاجات دى تخصنى فى المقام الاول .. يمكن تنطبق على ناس تانية فى نفس المرحلة .. لكن بكتبها بالأصالة عن نفسى ..
- الانسان فى السن ده بيكون تركيبة غريبة بتجمع صفات مراحل عمرية مختلفة بشكل متمازج عجيب .. الهدوء الشديد المصحوب بجنان عنيف ، التركيز الفظيع المصحوب بعبثية مجرمة ..
- الانسان فى المرحلة دى بيكون فى برزخ ما بين قلة العقل وما بين الحكمة .. يعنى لا هو حكيم ولا هو غشيم .. هو انسان بيحب يجرب كل حاجة ..
- فى التلاتينات بيبقى فى اكتر من خط درامى للانسان .. خط اساسى ثابت .. شغله .. اسرته (سواء متزوج أو لأ مرتبط او لأ) .. علاقاته القديمة .. وخطوط درامية جديدة او متجددة او متبدلة .. اهتمامات جديدة .. علاقات جديدة .. نظرة جديدة للعلاقات القديمة .. تجارب جديدة وهكذا
- الشعار الرئيسى للفترة دى بالنسبة له ‫#‏لا_شئ_يهم‬ .. يعنى إنت بالنسبة للشخص التلاتينى حد مكرر بس بنيو لوك .. ما انتاش حد جديد .. انت عديت عليه قبل كدة بس بشكل تانى واسم تانى .. فحرصه عليك هيكون أقل بكتير لو بتتعامل مع حد فى العشرينات .. وأقل من واحد خمسيناتى مثلاً اللى بيكون صعب تدخل حياته أصلاً الا لما يكون له عندك مصلحة .. التلاتينى سهل تدخل حياته .. وسهل تخرج منها ..
- علمياً اكتر مرحلة الانسان بيعمل فيها activity مختلفة بتبقى التلاتينات .. او هكذا اعتقد .. فبقدر ما هو شخصية متنوعة على ما يبدو لك .. بقدر ما هو محتاج لبعض التركيز فى ابسط الامور حتى وهو بيتكم معاك وانتوا ماشيين فى شارع طلعت حرب عشان تجيبوا بوكسرات ... فبلاش تفصله حتى وهو بيقلب فى البوكسرات
- الفصلان هى الحاجة الفاصلة الكبرى فى علاقات الشخص التلاتينى (وبالذات انا) مع الاخرين .. يعنى لو انت أو انتى من محبى الفصلان فغالباً مستقبل علاقتنا مظلم مش هتكمل اسبوعين .. الفصلان فى كل حاجة .. يعنى تيجى فجاءة تسأل عليا وتهتم .. وفجاءة تختفى .. مثلاً .. او فجاءة تبقى شخصية لطيفة .. وفجاءة تبقى شخصية مزعجة .. مثلاً .. كل شئ يؤدى للفصلان المادى والمعنوى هو منبوذ ومكروه اكتر من محمد فؤاد فى برنامج فؤش .. وغالباً بيكون بداية قوية لنهاية العلاقة نهاية دراماتيكية ..
- الشخص التلاتينى ناصح جداً .. ومغرم بالتفاصيل .. المهم منها والعبيط .. عارف هو عايز منك ايه .. وعارف انت عايز منه ايه .. حتى لو مش هيستخدم المعلومات دى بأى شكل مفيد .. بس هى معلومات موجودة ومركز فيها جداً .. وممكن يسمح لك تستغله على الوجه الذى يروق لك .. بمنتهى الاريحية .. بدون ما ينزعج من الاستغلال ده .. بس تأكد انه مركز اوى مع التفاصيل دى .. فحاول تعامله بذكاء شوية .. بلاش تستعبطه عشان غالباً بيتغابى بسرعة 
- الشخص التلاتينى متقلب المزاج أحياناً كطفل رضيع .. محتاس أحياناً كطفل يحبو .. شقى أحياناً كطفل فى العاشرة .. قليل الادب أحياناً كمراهق فى ثانوى .. متحمس أحياناً كشاب فى العشرينيات .. رزين أحياناً كرجل فى الاربعينيات .. حكيم أحياناً كرجل فى الخمسينات .. هادئ أحياناً كرجل فى الستينات .. ضيق الخلق كرجل فى السبعينات .. مفيّص أحياناً كرجل فى الثمانينات !
- ركّز حبة وانت بتتعامل مع هذا الثلاثينى اللعين !